ཀྲུང་གོ་བོད་ཀྱི་དྲ་བའི་འཕྲིན། 2021ལོར་མདོ་ལ་རི་བོའི་རྒྱལ་ཁབ་སྤྱི་གླིང་མཚོ་སྔོན་ས་ཁུལ་གྱི་སྒྲིག་སྲོལ་དང་ལམ་སྲོལ་འཁོར་རྒྱུག་བརྟན་པོ་ཡིན་པ་དང་ལས་དོན་སོ་སོའི་ཐད་གྲུབ་འབྲས་མངོན་གསལ་བླངས་ཡོད། ལྷག་པར་དུ་མདོ་ལ་རི་བོའི་རྒྱལ་ཁབ་སྤྱི་གླིང་སྐྱེ་ཁམས་སློབ་གྲྭ་བཙུགས་ནས། རང་བྱུང་སློབ་གསོའི་ཁྱད་ལྡན་དོ་དམ་སྲུང་སྐྱོང་ས་ཚིགས་བསྐྲུན་ཏེ་རྒྱལ་ཁབ་ཀྱི་ཡུན་རིང་ཚན་ཞིབ་རྟེན་གཞི་དང་། གཞི་གྲངས་ཆེན་མོའི་ལྟེ་གནས། སྐྱེ་ཁམས་ཚན་རིག་ཁྱབ་གདལ་ཁང་སོགས་རང་བྱུང་སློབ་གསོའི་ལས་སྟེགས་འཐུས་ཚང་དུ་བཏང་ནས་རང་བྱུང་སློབ་གསོ་སྤེལ་རྒྱུར་རྨང་གཞི་བཏིང་ཡོད།
རང་བྱུང་སློབ་གསོ་སྤེལ་རྒྱུ་ནི་མདོ་ལ་རི་བོའི་རྒྱལ་ཁབ་སྤྱི་གླིང་མཚོ་སྔོན་ཞིང་ཆེན་དོ་དམ་ཅུའུ་ཡི་དམིགས་བསལ་ལས་དོན་ཞིག་ཡིན། མདོ་ལ་རི་བོའི་རྒྱལ་ཁབ་སྤྱི་གླིང་གི་སྒྲིག་སྲོལ་ཚོད་ལྟའི་ལས་དོན་སྤེལ་བ་ནས་བཟུང་། མདོ་ལ་རི་བོའི་རྒྱལ་ཁབ་སྤྱི་གླིང་མཚོ་སྔོན་ཞིང་ཆེན་དོ་དམ་ཅུའུ་ཡིས་ལས་སྟེགས་བསྐྲུན་ནས་རང་བྱུང་སློབ་ཁྲིད་ཀྱི་གཡུལ་ས་གཙོ་བོ་ཇེ་ལེགས་སུ་བཏང་། ཟི་ལིང་དང་མཚོ་བྱང་། མཚོ་ནུབ་སོགས་སུ་སྔ་རྗེས་སུ་མདོ་ལ་རི་བོའི་རྒྱལ་ཁབ་སྤྱི་གླིང་སྐྱེ་ཁམས་སློབ་གྲྭ13བཙུགས། དེའི་སྐབས་སུ་སློབ་ཚན་ཞིབ་འཇུག་གསར་སྤེལ་དང་སློབ་དེབ་རྩོམ་སྒྲིག དགེ་རྒན་གསོ་སྐྱོང། སློབ་གྲྭའི་དངོས་སྤྱོད་བཅས་ཀྱི་ཐོན་སློབ་ཞིབ་གསུམ་མཉམ་འདྲེས་གཏིང་ཟབ་བྱེད་པའི་ལྷུ་ཚིགས་ཆ་ཚང་འཚོལ་ཞིབ་བྱས་ཡོད། ཚད་ལྡན་ཅན་གྱི་རང་བྱུང་སློབ་གསོའི་སློབ་དེབ5དང་རང་བྱུང་སློབ་གསོའི་སློབ་དེབ9རྩོམ་སྒྲིག་དང་གསར་སྤེལ་བྱས་ཏེ། དགེ་རྒན་དང་དོ་དམ་པ། དང་བླངས་པ་བཅས་བསྡུ་ལེན་བྱས་ནས་རང་བྱུང་སློབ་གསོའི་དགེ་རྒན་དཔུང་ཁག་བཙུགས་པ་མ་ཟད། རང་བྱུང་སློབ་གསོ་དང་སྐྱེ་ཁམས་མྱོང་ཚོར། སློབ་ཚན་ཇུས་འགོད་རྟོག་ཞིབ་སོགས་ཀྱི་བྱ་འགུལ་སྤེལ་བ་རེད། །