ཀྲུང་གོ་བོད་ཀྱི་དྲ་བའི་འཕྲིན། པེ་ཅིང་དགུན་དུས་ཨོ་རྩལ་འགྲན་ཚོགས་ཐོན་ལ་ཉེ་བ་དང་ཆབས་ཅིག་ཞིང་ཆེན་ཡོངས་ཀྱི་ས་གནས་སོ་སོ་རུ་གངས་འཁྱགས་ལུས་རྩལ་ལ་ཞུགས་པའི་མི་ཇེ་མང་དུ་སོང་བ་དང་། མི་དེ་བས་མང་པོ་ཞིག་གངས་འཁྱགས་ལུས་རྩལ་ནང་ཞུགས་ནས་ཡིད་དབང་རབ་ཏུ་འཕྲོག ཟླ1པོའི་ཚེས16ཉིན་གསར་འགོད་པས་ཞིང་ཆེན་ལུས་རྩལ་ཅུའུ་ནས་ཤེས་རྟོགས་བྱུང་བར་གཞིགས་ན། མིག་སྔར2021ལོ་ནས2022ལོའི་བར་གྱི་དགུན་དཔྱིད་གཉིས་ཀྱི་གངས་འཁྱགས་ཀྱི་བྱེད་སྒོ་དང་རྒྱལ་ཡོངས་མང་ཚོགས་ཀྱི་གངས་འཁྱགས་སྐབས་བརྒྱད་པའི་མཚོ་སྔོན་ཡན་ལག་ཚོགས་རའི་བྱེད་སྒོ་ཁྱོན་ཡོངས་ནས་སྤེལ་ཏེ། ཞིང་ཆེན་ཡོངས་ཀྱི་ས་གནས་སོ་སོས“བདེ་འཇགས་ལ་གཟབ་ནན་དང་ཡུལ་བབ་དང་བསྟུན་པ། གྲོན་ཆུང་དངོས་གཉེར། ཆུང་གྲས་ཁ་ཐོར། སྤྱི་ཕན་དམངས་ཕན”བཅས་ཀྱི་རྩ་དོན་ལྟར་གངས་འཁྱགས་འགྲན་བསྡུར་དང་བྱེད་སྒོ་སྣ་ཚོགས་གོ་རིམ་ལྡན་པའི་ངང་སྒྲིག་འཛུགས་བྱས་ཏེ། ཕུན་སུམ་ཚོགས་པའི་གངས་འཁྱགས་ལུས་རྩལ་ལ་བརྟེན་ནས2022ལོའི་པེ་ཅིང་དགུན་དུས་ཨོ་རྩལ་འགྲན་ཚོགས་ལ་བསུ་བ་བྱེད་བཞིན་ཡོད།
ཤེས་རྟོགས་བྱུང་བར་གཞིགས་ན། ན་ནིང་ནས་བཟུང་ཞིང་ཆེན་ཡོངས་ཀྱི་གངས་འཁྱགས་ལུས་རྩལ་མགྱོགས་མྱུར་ངང་དར་མགོ་ཚུགས་ནས། གངས་རྩེད་བྱ་རྒྱུ་དེ་གྲོང་མི་མང་པོ་ཞིག་གི་དུས་ཆེན་དང་ངལ་གསོའི་སྐབས་སུ་རོལ་རྩེད་དུ་བདམས་པའི་བྱེད་སྒོ་ཞིག་ཏུ་གྱུར་ཡོད། ད་ལོའི་དགུན་ཁ་དང་སང་ལོའི་དཔྱིད་ཀར་ཞིང་ཆེན་ཡོངས་ཀྱི་རིམ་པ་སོ་སོའི་ལུས་རྩལ་སྡེ་ཁག་གིས་འགྲན་བསྡུར་དང་བྱ་འགུལ་ཁག30སྒྲིག་འཛུགས་བྱ་རྩིས་ཡོད། དེའི་ཁྲོད་དུ་ཞིང་ཆེན་ལུས་རྩལ་ཅུའུ་ཡིས་སྒྲིག་འཛུགས་བྱས་པའི་བྱ་འགུལ་ཁག7དང་། གྲོང་ཁྱེར་དང་ཁུལ། རྫོང་སོ་སོའི་སྒྲིག་འཛུགས་བྱས་པའི་བྱ་འགུལ་ཁག23ཡོད། དེའི་ནང་རྩལ་འགྲན་རིགས་དང་མང་ཚོགས་ཀྱི་རིགས། དབང་བོ་སྐྱོན་ཅན་བཅས་ཀྱི་རྣམ་གྲངས་འདུས་ཡོད། །