ཀྲུང་གོ་བོད་ཀྱི་དྲ་བའི་འཕྲིན། ཟླ11པའི་ཚེས25ཉིན་ནས་ཚེས27ཉིན་བར། མཚོ་སྔོན་ཞིང་ཆེན་ཏང་ཨུའི་ཧྲུའུ་ཅི་གཞོན་པའམ། ཧྲིན་ཀྲང་ཞིན་ཁྲང་ཞིང་གིས་ཟི་ལིང་ནས་སྔ་གཞུག་ཏུ2021ལོའི“རྒྱུད་གཅིག་ལམ་གཅིག”ནུས་ཁུངས་གཙང་མའི་འཕེལ་རྒྱས་གླེང་སྟེགས་ལ་ཕེབས་པའི་རྒྱལ་ཁབ་ནུས་ཁུངས་དངུལ་གཏོང་སྡེ་ཚོགས་ཚད་ཡོད་ཀུང་ཟིའི་སྤྱི་གཉེར་པ་ལིའུ་གོ་ཡའོ་དང་། རྒྱལ་ཁབ་གློག་ཤུགས་དངུལ་གཏོང་སྡེ་ཚོགས་ཚད་ཡོད་ཀུང་ཟིའི་སྤྱི་གཉེར་པ་ཅཱང་དབྱི། ཀྲུང་གོ་ཉིང་རྡུལ་བཟོ་ལས་སྡེ་ཚོགས་ཚད་ཡོད་ཀུང་ཟིའི་སྤྱི་གཉེར་པ་ཀོའུ་ཅུན། ཀྲུང་གོ་ཀོང་ཏུང་ཉིང་རྡུལ་སྡེ་ཚོགས་ཚད་ཡོད་ཀུང་ཟིའི་ཏུང་ཧྲི་ཀྲང་དབྱང་ཁྲང་ལི། ཀྲུང་གོ་ཚན་རྩལ་སློབ་ཆེན་གྱི་སློབ་གཙོའམ། ཀྲུང་གོ་ཚན་རིག་གླིང་གི་ཡོན་ཧྲི་པཱོ་ཞིན་ཧི་སོགས་ཚོགས་ཞུགས་མགྲོན་པོ་ལ་ཐུག་འཕྲད་གནང་།
ཞིན་ཁྲང་ཞིང་གིས་ཐོག་མར་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ཚབ་བྱས་ཏེ་གླེང་སྟེགས་ལ་ཞུགས་པའི་མགྲོན་པོ་རྣམས་ལ་དགའ་བསུ་ཞུས་པ་དང་། མགྲོན་པོ་རྣམས་ཀྱིས་དུས་ཡུན་རིང་པོར་མཚོ་སྔོན་གྱི་དཔལ་འབྱོར་སྤྱི་ཚོགས་འཕེལ་རྒྱས་ཐད་ལ་ཐུགས་ཁུར་དང་རྒྱབ་སྐྱོར་གནང་བར་བཀའ་དྲིན་ཆེ་ཞུས། ཁོང་གིས་མཚོ་སྔོན་གྱི་ས་རྒྱ་ཆེ་ཞིང་ས་བབ་དམིགས་བསལ་ཡིན་ལ། ཐོན་ཁུངས་ཕུན་སུམ་ཚོགས་པ་སོགས་ཀྱི་ཁྱད་སྟོབས་གང་མང་ལྡན་པ་དང་། ནུས་ཁུངས་གཙང་མ་འཕེལ་རྒྱས་སུ་གཏོང་བར་མདུན་ལྗོངས་རྒྱ་ཆེན་པོ་ཡོད་པ་དང་རེ་བ་མངོན་གསལ་ལྡན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་གཟིགས་ཞིབ་གནང་སྐབས། མཐོ་སྒང་གི་ཐུན་མོང་མ་ཡིན་པའི་ཐོན་ཁུངས་ལ་རྐང་བཙུགས་ཏེ། ཧུར་ཐག་སྒོས་གསར་དར་ཐོན་ལས་གསོ་སྐྱོང་བྱེད་པ་དང་། འཛམ་གླིང་རིམ་པའི་ཚྭ་མཚོ་ཐོན་ལས་རྟེན་གཞི་མྱུར་དུ་འཛུགས་སྐྲུན་བྱས་ནས། རྒྱལ་ཁབ་ཀྱི་ནུས་ཁུངས་གཙང་་མའི་ཐོན་ལས་ཀྱི་མཐོ་ས་དང་རྒྱལ་སྤྱིའི་སྐྱེ་ཁམས་གནས་སྐོར་གྱི་དམིགས་ས། ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་ས་གསར་སྐྲུན་བྱེད་དགོས་པ་གསལ་པོར་བསྟན། དེང་སྐབས་ཞིང་ཆེན་ཡོངས་ཀྱི་གོང་འོག་བར་གསུམ་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ནན་ཏན་སྒོས་དངོས་འབེབས་བྱས་ཏེ། རྒྱལ་ཡོངས་ཀྱི་ཐཱན་རྩེར་སོན་དང་ཐཱན་སྙོམ་སྦྱོར་གྱི་དམིགས་འབེན་ལ་ཞབས་འདེགས་ཞུ་རྒྱུ་དམིགས་པ་དང། ནུས་ཁུངས་གཙང་མའི་གསར་སྤེལ་འགུལ་སྐྱོད་དང་རྣམ་པ་གསར་པའི་གློག་ཤུགས་མ་ལག་གསར་སྐྲུན་འགུལ་སྐྱོད། ནུས་ཁུངས་གཙང་མའི་ཚབ་བྱེད་འགུལ་སྐྱོད། གསོག་ནུས་སྣ་མང་ཅན་གསར་སྐྲུན་འགུལ་སྐྱོད། ཐོན་ལས་རིམ་འཕར་སྐུལ་སྤེལ་འགུལ་སྐྱོད། འཕེལ་རྒྱས་རྐྱེན་སྲོལ་འཛུགས་སྐྲུན་འགུལ་སྐྱོད་བཅས་འགུལ་སྐྱོད་ཆེན་པོ་དྲུག་ལག་བསྟར་ནན་མོ་བྱེད་པ། ཚད་གཞི་མཐོ་ཞིང་སྤུས་ཚད་ལེགས་པའི་སྒོ་ནས་རྒྱལ་ཁབ་ཀྱི་ཐོན་ལས་གཙང་མའི་མཐོ་སའི་འཛུགས་སྐྲུན་གཏིང་ཟབ་དངོས་གཉེར་ལ་སྐུལ་འདེད་གཏོང་དགོས་ཞེས་གསུངས།
དེའི་སྐབས་སུ་ཞིང་ཆེན་སྲིད་གཞུང་དང་ཀྲུང་གོ་ཀོང་ཏུང་ཉིང་རྡུལ་སྡེ་ཚོགས་ཚད་ཡོད་ཀུང་ཟི་གཉིས་ཀྱིས་འཐབ་ཇུས་མཉམ་ལས་གྲོས་མཐུན་བཞག
ཞིང་ཆེན་ཏང་ཨུའི་རྒྱུན་ལས་ཨུ་ཡོན་ནམ་རྒྱུན་ལས་ཧྲིན་ཀྲང་གཞོན་པ་ལི་ཅེ་ཞང་དང་། ཧྲིན་ཀྲང་གཞོན་པ་ཀྲང་ལི་གཉིས་སོ་སོ་ནས་འབྲེལ་ཡོད་བྱ་འགུལ་ལ་ཞུགས། །
རྩོམ་སྒྲིག་པ། གསང་བདག་རྒྱལ།
ཞིན་ཁྲང་ཞིང་གིས2021ལོའི“རྒྱུད་གཅིག་ལམ་གཅིག”ནུས་ཁུངས་གཙང་མའི་འཕེལ་རྒྱས་གླེང་སྟེགས་ལ་ཕེབས་པའི་སྐུ་མགྲོན་སྐོར་ཞིག་ལ་ཐུག་འཕྲད་གནང་།