ཕ་ཡུལ་གྱི་སྐྱེ་ཁམས་ཁོར་ཡུག་ལ་བདག་སྐྱོང་བྱ་རྒྱུ་ནི་ང་ཚོའི་འོས་འགན་ཡིན།

“སྤྱི་ཁྱབ་ཧྲུའུ་ཅི་ཡིས་ངེད་ཚང་གིས་སྒོ་ཕྱུགས་འཚོ་སྐྱོང་བསྐྱུར་རྗེས་ཀྱི་འཚོ་བའི་འབྱུང་ཁུངས་སྐོར་དྲིས་བྱུང་ལ། རྒྱལ་ཁབ་སྤྱི་གླིང་སྐྱེ་ཁམས་བདག་སྐྱོང་པའི་འགན་ཁུར་རྗེས་ཟླ་རེར་ཟླ་ཕོགས་སྒོར1800ཡོད་པ་ལས་གཞན། རྩྭ་སའི་སྐྱེ་ཁམས་ཁ་གསབ་མ་དངུལ་དང་། དྲོད་ལེན་འབར་རྫས་ཁ་གསབ། ལས་ཞོར་ཡོང་སྒོ་སོགས་ཡོད་པ་ཤེས་རྗེས། ཁོང་བཞད་ཅིང་དབུ་ལྡེམ་ལྡེམ་གནང་བཞིན་ང་ལ་གཙང་གསུམ་འབྱུང་ཡུལ་གྱི་སྐྱེ་ཁམས་སྲུང་སྐྱོབ་ལེགས་པོ་བྱེད་པའི་འགན་འཁྲི་འཁུར་དགོས་ཞེས་གསུངས་པས་ང་ཚོ་སྐྱེ་ཁམས་བདག་སྐྱོང་པར་གནོན་ཤུགས་ཡོད་ལ་སྒུལ་ཤུགས་ཀྱང་ཡོད་པར་གྱུར།”

2016ལོའི་ཟླ8པའི་ཚེས23ཉིན་གྱི་ཕྱི་དྲོར། རྨ་ཆུའི་མགོ་ཁུངས་མཚོ་སྐྱ་རིང་འགྲམ་དུ་སྤྱི་ཁྱབ་ཧྲུའུ་ཅི་དང་མཉམ་དུ་བརྙན་ལམ་ནས་ཁ་བརྡ་བྱས་པའི་རྣམ་པར་ཕྱིར་དྲན་བྱས་པ་ན། སྐབས་དེར་ཏག་ཏག་རྨ་ཆུའི་མགོ་ཁུངས་སུ་སྐོར་སྲུང་བྱེད་བཞིན་པའི་མགོ་ལོག་བོད་རིགས་རང་སྐྱོང་ཁུལ་རྨ་སྟོད་རྫོང་མཚོ་སྐྱ་རིང་ཞང་དཀར་རྩེ་སྡེ་བའི་སྐྱེ་ཁམས་བདག་སྐྱོང་པ་དགེ་འདུན་རྒྱ་མཚོའི་སེམས་སུ་སྔར་བཞིན་སྤྲོ་བའི་རྦ་རླབས་འཕྱུར་བཞིན་ཡོད།

དགེ་འདུན་རྒྱ་མཚོ་ནི་རྨ་ཆུའི་མགོ་ཁུངས་ནས་སྐྱེས་ཤིང་འཚར་ལོངས་བྱུང་བ་ཡིན་ལ། རྩྭ་ཐང་དུ་ལོ30ལྷག་ལ་འཚོ་བ་རོལ། དོན་དག་ཟིན་ཐོར་འགོད་ཤེས་པ་ནས་བཟུང་། ཁོའི་འཚོ་བ་ནོར་ལུག་དང་རྩྭ་སར་ཁ་བྲལ་མ་མྱོང་། 2013ལོར། ལུས་སྟོབས་དར་ལ་བབ་པའི་དགེ་འདུན་རྒྱ་མཚོ་དང་སྡེ་བའི་ནང་གི་མི་བཅུ་ཕྲག་འགའ་གཙང་གསུམ་འབྱུང་ཡུལ་རང་བྱུང་སྲུང་སྐྱོབ་ཁུལ་གྱི་རྩྭ་ས་སྐོར་སྲུང་པ་དང་པོར་གྱུར། 2016ལོའི་ཟླ6པའི་ཉིན་ཞིག་ལ། དགེ་འདུན་རྒྱ་མཚོས་ཤ་ཉེ་ཞིག་གི་ཁ་ནས་གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་གིས་སྐྱེ་ཁམས་བདག་སྐྱོང་པ་བསྡུ་ལེན་བྱེད་བཞིན་འདུག་ཅེས་པའི་སྐད་ཆ་ཞིག་ཐོས་པ་ན། དགེ་འདུན་རྒྱ་མཚོ་འཕྲུལ་རྟར་ཞོན་ནས་ཞང་ཐོག་ཏུ་སོང་སྟེ། རེ་ཞུ་ཡི་གེ་ཞིག་ཧྲུའུ་ཅིའི་ལག་ཏུ་སྤྲད། ཟླ་གཉིས་ཀྱི་རྗེས་སུ། ཁོ་རང་སྐྱེ་ཁམས་བདག་སྐྱོང་པ་ངོ་མ་ཞིག་ཏུ་གྱུར།

ཐོག་མའི་དུས་སྐབས་ཀྱི་རྣམ་པ་དང་མི་མཚུངས་པས་ཅི་ཞིག་བྱ་དགོས་པ་མི་ཤེས་པར། ལོ་ངོ་འགའ་ལ་བྲེལ་བྲེལ་འཚུབ་འཚུབ་ངང་ལས་ཀ་བསྒྲུབས་པ་ན། མི་གཞན་པས་བལྟས་ན་ལས་ཚེགས་ཤིན་ཏུ་ལྕི་བ་དང་། ཟླ་ཕོགས་དམའ་བའི་ལས་ཀ་འདིས་དགེ་འདུན་རྒྱ་མཚོ་ལ་རང་ཉིད་ཀྱི་ཤེས་རྟོགས་མང་པོ་ཡོད་པར་གྱུར་ཞིང་། ཁྱད་པར་ལོ་ངོ་ལྔའི་སྔོན་གྱི་འཚུབ་སྣང་དང་ངར་ཤུགས་དང་སེམས་འགུལ་བཅས་མཉམ་འདུས་ཀྱི་ཁ་བརྡ་དེས་ཁོ་ལ་ལོ་ངོ་འདི་ལྔ་པོའི་རིང་ལ་སྒུལ་ཤུགས་ཀྱིས་ཁེངས་སུ་བཅུག

“ཕ་ཡུལ་གྱི་སྐྱེ་ཁམས་ཁོར་ཡུག་སྲུང་སྐྱོབ་བྱ་རྒྱུ་ནི་ང་ཚོའི་བསྒྲུབ་འོས་པའི་བྱ་བ་ཞིག་ཡིན་ལ། ཏང་ཡོན་ཞིག་ཡིན་པའི་ཆ་ནས། ང་ཚོས་མགོ་ཁྲིད་ནས་དོན་དག་དེ་ལེགས་པོ་བསྒྲུབ་དགོས།”

དགེ་འདུན་རྒྱ་མཚོས་དེ་ལྟར་བཤད་ཅིང་དེ་ལྟར་བསྒྲུབས།

ཕྱི་རུ་སོང་ནས་སྐོར་སྲུང་བྱེད་ཐེངས་རེར། ཁོས་སྤྱི་ལེ་བཅུ་ཕྲག་འགའ་ལ་འཕྲུལ་རྟ་བཞོན་དགོས། སྐོར་སྲུང་ལས་འགན་མ་འགྲུབ་ཚེ། དགོང་མོར་ཕྱི་རོལ་ཏུ་སྦྲ་གུར་སྟབས་བདེ་ཞིག་ཕུབ་ནས་ཞག་འདུག་བྱེད་དགོས། ཆུ་བོའི་མགོ་ཁུངས་སྦགས་བཙོག་བྱས་ཡོད་མེད་དང་། ཁོར་ཡུག་ལ་གཏོར་བརླག་བྱས་ཡོད་མེད་སོགས་རྩྭ་ཐང་གི་ཡོད་ཚད་ལ་ཁོས་མཉམ་འཇོག་བྱ་དགོས་ལ། གནས་ཚུལ་ལ་འཕྲད་ཚེ་མྱུར་དུ་སྙན་ཞུ་འབུལ་དགོས།

“སྔོན་ཆད་དང་བསྡུར་ན། ད་ལྟ་རྩྭ་ཐང་གི་རྩྭའི་སྐྱེ་སྟོབས་བཟང་ལ། ང་ཚོའི་ཡོང་སྒོའང་འཕར་སྣོན་བྱུང་།”དགེ་འདུན་རྒྱ་མཚོ་ཚང་ལ་ནོར60ལྷག་ཡོད་པ་དེ་མཉམ་ལས་ཁང་ལ་སྤྲད་པ་དང་། ལོ་རེར་སྐྱེ་ཁམས་བདག་སྐྱོང་པའི་ཟླ་ཕོགས་དང་རྩྭ་སའི་ཁ་གསབ་ལས་གཞན། ད་དུང་མཉམ་ལས་ཁང་གི་ཁེ་ཕོགས་ལེན་ཐུབ་པས། ཁྱིམ་ཚང་གི་བཟའ་མི་གསུམ་པོའི་འཚོ་བར་འགྱུར་ལྡོག་ཆེན་པོ་བྱུང་ཡོད།

དགེ་འདུན་རྒྱ་མཚོར་འཕྲད་པ་ནང་བཞིན། ང་ཚོ་ཡང་བསྐྱར་མཚོ་སྐྱ་རིང་ཞང་མཚལ་རྩེ་སྡེ་བའི་སྐྱེ་ཁམས་བདག་སྐྱོང་པ་བསོད་བསོད་ལ་འཕྲད་དུས་ཁོའི་མིག་མདངས་ཁྲོད་སྔོན་མེད་པའི་རང་ཉིད་ལ་ཡིད་ཆེས་དང་བག་ཕེབས་ཀྱི་ཉམས་ཤིག་ཤར་འདུག

“ལོ་འདི་དག་ལ་འགྱུར་ལྡོག་ཆེན་པོ་བྱུང་ཡོད། རྩྭ་ཐང་གཙང་མར་གྱུར་བ་དང་། མཚོ་ཆུ་སྔར་ལས་ཇེ་དྭངས་སུ་གྱུར་ལ། སྔོན་ཆད་མཐོང་མ་མྱོང་བའི་འདབ་ཆགས་དང་། རི་སྐྱེས་སྲོག་ཆགས་ཇེ་མང་ནས་ཇེ་མང་དུ་གྱུར། ”

ཇེ་བཟང་ནས་ཇེ་བཟང་དུ་གྱུར་བ་ནི་རྨ་ཆུའི་མགོ་ཁུངས་ཀྱི་སྐྱེ་ཁམས་ཁོར་ཡུག་ཙམ་མིན་པར་ད་དུང་བསོད་བསོད་རང་ཉིད་ཀྱང་རེད།

“ལོ་ངོ་ལྔའི་སྔོན་ལ་བརྙན་ལམ་འབྲེལ་མཐུད་བྱེད་སྐབས་ངས་བོད་སྐད་ཀྱི་ལམ་ནས་སྤྱི་ཁྱབ་ཧྲུའུ་ཅིའི་དྲི་བར་ལན་བཏབ་པ་ཡིན་ལ། ལན་ཤར་མར་བཏབ་བྱུང་མོད། འོན་ཀྱང་བློ་འགྱོད་སྐྱེས་པ་འགའ་རེ་ཡོད།”ལོ་འགའི་རིང་ལ། བསོད་བསོད་ཀྱིས་གོ་སྐབས་ཡོད་ཚད་སྤྱད་དེ་སློབ་སྦྱོང་བཟང་པོ་བྱས་ཤིང་། རྒྱ་ཡིག་འབྲི་སྲོལ་སྦྱངས་པ་དང་། སྐྱེ་ཁམས་ཁོར་ཡུག་ཕྱོགས་ཀྱི་སྲིད་ཇུས་ལ་རྒྱུས་ལོན་བྱས་པ། ཁོའི་དགེ་རྒན་ནི་རང་གི་ལག་ཐོགས་ཁ་པར་ལས་གཞན། ད་དུང་སྐོར་སྲུང་བྱེད་རོགས་ལས་གྲོགས་དང་། གསོ་སྦྱོང་སྐབས་སུ་འཕྲད་པའི་ཆེད་མཁས་པ་དང་། ད་དུང་སློབ་གྲྭ་འགྲིམ་བཞིན་པའི་བུ་ཆུང་བཅས་ཡིན།

དེང་སྐབས། ལག་ཁྱེར་ཁ་པར་སྟེང་གི་རིག་ནུསAppཁ་ཕྱེས་པ་ན། སྐོར་སྲུང་གི་ལམ་ཐིག་དང་། བར་ཐག གནམ་གཤིས། མཚོ་ངོས་ལས་མཐོ་ཚད། དུས་ཚོད་སོགས་ཀྱི་བརྡ་འཕྲིན་ལག་མཐིལ་དུ་བཞག་པ་ནང་བཞིན་མཐོང་ཡོང་། ཐོལ་བྱུང་དོན་རྐྱེན་ལ་འཕྲད་པ་དང་། རི་སྐྱེས་སྲོག་ཆགས་དཀོན་གྲས་ལ་ཐུག་པ་ན། བསོད་བསོད་ཀྱིས་དུས་ཐོག་ཏུ་པར་བླངས་ཏེ་དྲ་ཐོག་ཏུ་འཇོག་པ་དང་གནས་ཚུལ་གསལ་བཤད་བྱས་དང་བྱེད་བཞིན་ཡོད།

“སང་ལོར་ང་ཚོ་སྔར་ལས་ཡག་པོ་ཡོང་ངེས།”

བསོད་བསོད་ཀྱིས་བཞད་བཞིན་པའི“ང་ཚོ”ཞེས་པ་ནི་བགྲང་གིས་མི་ལང་ཞིང་ཁོ་དང་འདྲ་བར་ཁུ་སིམ་ངང་ས་གཞི་འདི་སྲུང་བཞིན་པའི་སྐྱེ་ཁམས་བདག་སྐྱོང་པ་རྣམས་ཡིན་ལ། ཁོ་ཚོའི་སེམས་ཁོང་དུ་བརྩེ་སེམས་ཟབ་པའི་རྨ་ཆུའི་མགོ་ཁུངས་ཀྱང་ཡིན། །

རྩོམ་སྒྲིག་པ། མཁའ་མཚོ་སྐྱིད།

དཔྱད་མཆན 0 ཡོད།