མཚོ་སྔོན་གྱིས་ཆུའི་སྦགས་བཙོག་འགོག་བཅོས་དང་ཆུའི་སྐྱེ་ཁམས་སྲུང་སྐྱོབ་ལ་ཁྱོན་ཡོངས་ནས་སྐུལ་འདེད་བཏང་བ།

ཀྲུང་གོ་བོད་ཀྱི་དྲ་བའི་འཕྲིན། “2019ལོར་རང་ཞིང་ནི་རྒྱལ་ཁབ་ཀྱིས་དཔྱད་ཞིབ་བྱས་པའི་ས་ངོས་ཆུ19ཡི་བཅད་ངོས་ཆུ་སྤུས་ལ་ལྟ་ཞིབ་དང་ཚད་བླངས་པ་ཁྱོན་ཡོངས་ནས་ཚད་ཐིག་ཏུ་སླེབས་པའི་ཁྲོད་ཚུད་པ་དང་། ཆུ་སྤུས་ལེགས་པའི(ཚད་ལོན་པའམ་ཡང་ན་རིགསⅢཔ་ལས་ལེགས་པ)ཚད94.7%ཡིན་པས། རྒྱལ་ཁབ་ཀྱི་རེ་འདུན་ལས་བརྒྱ་ཆའི་ཆ་ཤས5.2ཀྱིས་མཐོ་བ་དང་། ཆུ་སྤུས་མི་ལེགས་པའི་རིགསⅤཀྱི་བཅད་ངོས་བསྡུར་ཚད0ཡིན་པས། རྒྱལ་ཁབ་དང་རང་ཞིང་གི་གཏན་འབེབས་དམིགས་ཚད་ལ་སླེབས།”ཉེ་བའི་ལོ་འགའི་རིང་ལ། རང་ཞིང་གིས་ཞི་ཅིན་ཕིང་གི་སྐྱེ་ཁམས་དཔལ་ཡོན་དགོངས་པ་མཛུབ་སྟོན་དུ་འཛིན་པ་རྒྱུན་འཁྱོངས་བྱས་ཤིང་། རྒྱལ་ཁབ་སྐྱེ་ཁམས་བདེ་འཇགས་བཀག་དངོས་མཐའ་གཅིག་ཏུ་སྲ་བརྟན་དུ་གཏོང་བའི་འགན་འཁྲི་ཕྲག་ཏུ་བླངས་ཤིང། “གཙང་ཆབ་ལྷུང་ལྷུང་ཤར་དུ་བཞུར་བ”ཡི་ཆབ་སྲིད་ལས་འགན་ཁག་ཐེག་བྱས་ཤིང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་དང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ཇུས་ཆོད་བཀོད་སྒྲིག་དོན་འཁྱོལ་གཏིང་ཟབ་བྱས་ཏེ། ཆུའི་སྦགས་བཙོག་འགོག་བཅོས་དང་ཆུའི་སྐྱེ་ཁམས་སྲུང་སྐྱོབ་བྱེད་པའི་བྱ་བར་ཁྱོན་ཡོངས་ནས་སྐུལ་འདེད་བཏང་ཞིང་། ཆུའི་ཁོར་ཡུག་སྤུས་ཀ་མངོན་གསལ་གྱིས་ཇེ་ལེགས་སུ་གྱུར་ཏེ། མི་དམངས་མང་ཚོགས་ཀྱི་ཐོབ་སྣང་དང་། སྐྱིད་སྣང་མུ་མཐུད་དུ་ཇེ་མཐོར་བཏང་།

“ལྔ་བཅུ་གསུམ”གྱི་ཚུན་ལ། རང་ཞིང་གིས་ཀྲུང་དབྱང་དང་། ཞིང་ཆེན་རིམ་པའི་ཆུའི་སྦགས་བཙོག་འགོག་བཅོས་དང་། ཆུའི་སྐྱེ་ཁམས་སྲུང་སྐྱོབ་སླར་གསོའི་ཆེད་སྤྱོད་མ་དངུལ་སྒོར་དུང་ཕྱུར34.37བཀོལ་ཏེ། ཞིང་ཆེན་ཡོངས་ཀྱི་བཞུར་ཁོངས་ཀྱི་ཆུའི་སྦགས་བཙོག་ཕྱོགས་བསྡུས་བཅོས་སྐྱོང་དང་། ཆུ་དང་མཚེའུའི་བཞུར་ཁོངས་ཀྱི་སྐྱེ་ཁམས་སྲུང་སྐྱོབ་སླར་གསོ་དང་། གཙོ་གནད་མཚེའུ་དང་ཆུ་མཛོད་སྐྱེ་ཁམས་སྲུང་སྐྱོང་བྱེད་པ་སོགས་ཀྱི་རིགས་ཆེན་པོ8དང་རྣམ་གྲངས132བཀོད་སྒྲིག་ལག་བསྟར་བྱས་ཏེ། བཞུར་ཁོངས་ཀྱི་ཆུ་སྤུས་མུ་མཐུད་དུ་ལེགས་བསྒྱུར་དང་མུ་མཐུད་དུ་བཟང་ཕྱོགས་སུ་བསྐྱོད་པར་ཁག་ཐེག་བྱས།

འཐུང་ཆུའི་མགོ་ཁུངས་སྲུང་སྐྱོང་བྱེད་པའི་འགག་སྒྲོལ་འཐབ་འཛིང་མུ་མཐུད་དུ་ལེགས་པོར་བརྒྱབ་སྟེ། 2019ལོའི་རྫོང་རིམ་པའི་འཐུང་ཆུའི་ཆུ་ཁོངས་ཀྱི་ཁོར་ཡུག་སྲུང་སྐྱོང་ཆེད་དོན་འགུལ་སྐྱོད་ལ་སྐུལ་འདེད་ཏན་ཏིག་བཏང་ཞིང། ཞིང་ཆེན་ཡོངས་ཀྱི་ཞིང་སྡེའི“ཏུན་སྟོང་མི་ཁྲི”ཡི་གཅིག་སྡུད་རྣམ་པའི་འཐུང་ཆུའི་ཆུ་ཁོངས་མཐའ་གསལ་རྟོག་ཞིབ་ཧུར་ཐག་སྒོས་རྩ་འཛུགས་བྱས་ཏེ་སྤེལ་ཞིང་། ས་གནས་དང་། རྫོང་། ཞང་། སྡེ་བ་བཅས་རིམ་པ་བཞི་ཡི་གཅིག་སྡུད་རྣམ་པའི་འཐུང་ཆུའི་ཆུ་ཁོངས་ཚད་ལྡན་ཅན་འཛུགས་སྐྲུན་དང་།དོ་དམ་ཁྱོན་ཡོངས་ལ་ཁེབས་པའི་ཚོད་ལྟའི་བྱ་བ་རྩ་འཛུགས་བྱས་ཏེ་སྤེལ། ནག་ཅིང་དྲི་ངན་འཐུལ་བའི་ཆུ་ངོས་བཅོས་སྐྱོང་གི་འགག་སྒྲོལ་འཐབ་འཛིང་མུ་མཐུད་ལེགས་པོར་བརྒྱབ་ནས། ཆུ་དང་མཚེའུའི“རྙོག་དྲ་བཞི་གཙང་སེལ”བྱེད་པའི་ཆེད་དོན་བྱ་འགུལ་གཏིང་ཟབ་ཏུ་སྤེལ་ཏེ། ཆུ་ཁོངས་འགྲམ་རྒྱུད་བདག་སྐྱོང་དང་། ཆུའི་སྦགས་བཙོག་འགོག་བཅོས། ཆུའི་སྐྱེ་ཁམས་སླར་གསོ་སོགས་གཙོ་གནད་ལས་འགན་ལག་བསྟར་བྱེད་པར་མཐུན་སྦྱོར་སྐུལ་འདེད་བཏང་ནས། ཆུ་དང་མཚེའུའི་རྣམ་པ་མུ་མཐུད་དུ་ལེགས་བསྒྱུར་བྱས། །

རྩོམ་སྒྲིག་པ། མཁའ་མཚོ་སྐྱིད།

དཔྱད་མཆན 0 ཡོད།