ཀྲུང་གོ་བོད་ཀྱི་དྲ་བའི་འཕྲིན། མཚོ་སྔོན་ཞིང་ཆེན་ཡོངས་ཀྱི་རིམ་པ་སོ་སོའི་སློབ་གྲྭ་ཁག་གིས་རིམས་ནད་སྔོན་འགོག་ཚོད་འཛིན་དང་སློབ་འགོ་ཚུགས་པའི་གྲ་སྒྲིག་ལས་ཀ་སྔར་ལས་ལེགས་པོར་བསྒྲུབ་ཆེད་དང་། རྒྱ་ཆེའི་དགེ་སློབ་ཚོའི་གཟུགས་གཞི་བདེ་ཐང་དང་ཚེ་སྲོག་བདེ་འཇགས་ལ་འགན་ལེན་བྱ་ཆེད། ཉེ་ཆར། ཞིང་ཆེན་སློབ་གསོ་ཐིང་གིས་ཞིབ་འཇུག་བྱས་ནས《ཞིང་ཆེན་ཡོངས་ཀྱི་སློབ་གསོའི་མ་ལག་གིས་རིམས་ནད་སྔོན་འགོག་ཚོད་འཛིན་དང་སློབ་འགོ་ཚུགས་པའི་གྲ་སྒྲིག་ལས་དོན་ཏན་ཏིག་ངང་བསྒྲུབ་རྒྱུའི་སྐོར་གྱི་མཛུབ་ཁྲིད་བསམ་འཆར》བཟོས་ཏེ་ཕྱོགས་དྲུག་གི་ཐད་ནས་སློབ་གྲྭའི་རིམས་ནད་སྔོན་འགོག་ཚོད་འཛིན་དང་སློབ་འགོ་ཚུགས་པའི་གྲ་སྒྲིག་ལས་དོན་ཐད“གནད་སྨིན་ཕྱོགས་སྟོན”བྱས།
“ལམ་སྲོལ་ཆ་ཚང་གཅིག”གིས་འགན་སྲུང་ཤུགས་ཆེར་གཏོང་དགོས། ཞིང་ཆེན་ཡོངས་ཀྱི་སློབ་གསོའི་མ་ལག་གིས་རིམས་ནད་སྔོན་འགོག་ཚོད་འཛིན་དང་སློབ་འགོ་ཚུགས་པའི་གྲ་སྒྲིག་ལས་དོན་དེ་མིག་སྔའི་ལས་དོན་གལ་ཆེན་ཞིག་ཏུ་བརྩིས་ནས། “ས་ཁུལ་གཅིག་ལ་ཐབས་ཇུས་གཅིག”དང“སློབ་གྲྭ་གཅིག་ལ་ཇུས་གཞི་གཅིག”གི་བླང་བྱ་ལྟར་ཡུལ་བབ་དང་བསྟུན་ཏེ་ཞིབ་འཇུག་བྱས་ནས《སློབ་འགོ་ཚུགས་པའི་ལས་ཀའི་ཇུས་གཞི》དང《རིམས་ནད་སྔོན་འགོག་ཚོད་འཛིན་གྱི་འཕྲལ་སྡོམ་སྔོན་ཇུས》བཟོ་དགོས།
“འོས་འཚམ་གསུམ་”གཙོ་གནད་དུ་འཛིན་དགོས། ས་གནས་སོ་སོའི་སློབ་གྲྭ་ཁག་གིས་ཞིང་ཆེན་གཞན་ཏུ་འཁོར་ཞག་དང་ཡུལ་སྐོར་ལ་སོང་བའི་དགེ་སློབ་དང་། ཞིང་ཆེན་གཞན་ནས་ཡིན་ཞིང་མཚོ་སྔོན་དུ་སློབ་སྦྱོང་བྱེད་པའི་སློབ་ཆེན་སློབ་མ། ཕྱི་རོལ་དུ་ལས་གནས་ཚབ་སྒྲུབ་དང་དངོས་སྦྱོང་བྱེད་པའི་དགེ་སློབ། སློབ་གྲྭའི་ལས་གཞི་གཞན་སྤྲོད་དང་རྨང་གཞིའི་འཛུགས་སྐྲུན་བྱེད་པའི་ཁེ་ལས་ཀྱི་མི་སྣ་བཅས་ལ་ནན་གྱིས་དམིགས་ནས། མི་སྣ་བཀོད་སྒྲིག་བྱས་ཏེ་མཐིལ་རྟོགས་གྲལ་བཤེར་གྱི་ལས་དོན་དང་གནད་དུ་འཁེལ་བའི་དོ་དམ་འོས་འཚམ་གྱིས་སྤེལ་ནས་སློབ་གྲྭའི་ནང་རིམས་ནད་མི་ཐོན་པ་བྱེད་དགོས། ཚེ་སྲོག་གི་སློབ་གསོ་དང་། དྲིན་ཚོར་གྱི་སློབ་གསོ། ཁྲིམས་སྐྱོང་གི་སློབ་གསོ། ཡིད་རྟོན་གྱི་སློབ་གསོ། མི་རིགས་མཐུན་སྒྲིལ་ཡར་ཐོན་གྱི་སློབ་གསོ་བཅས་ལ་སྐུལ་འདེད་བཏང་ནས་དགེ་སློབ་ཀྱི་བསམ་བློ་དང་ཆབ་སྲིད་ཀྱི་སློབ་གསོའི་ལས་དོན་བཀོད་སྒྲིག་འོས་འཚམ་བྱེད་དགོས། ཚན་རིག་དང་མཐུན་པའི་ངང་དམའ་རིམ་དང་མཐོ་རིམ་སློབ་འབྲིང་ལོ་རིམ་གསུམ་པའི་སློབ་ཚན་གྱི་ཟུར་ཁྲིད་ཡག་པོ་བྱས་ཏེ་སློབ་མའི་གུང་གསེང་གི་འཚོ་བ་བཀོད་སྒྲིག་འོས་འཚམ་བྱས་ཏེ་སློབ་མ་རྣམས་ལ་བག་ཕེབས་སྤྲོ་སྣང་གི་གུང་གསེང་ཞིག་གཏོང་དུ་འཇུག་དགོས།
“གནད་ལ་ཁེལ་བ་བཅུ་”ཡི་གཞི་ཐིག་བསྐྲུན་དགོས། ས་གནས་སོ་སོའི་སློབ་གྲྭ་ཁག་གིས་དངོས་སུ་སློབ་འགོ་ཚུགས་པའི་དུས་ཚོད་གཏན་འཁེལ་གསལ་པོ་མ་བྱས་གོང་། ངེས་པར་དུ་དྲིལ་བསྒྲགས་སློབ་གསོ་གནད་ལ་ཁེལ་བ་དང་། རིམས་ནད་སྔོན་འགོག་ཚོད་འཛིན་གནད་ལ་ཁེལ་བ། མངོན་མེད་རྐྱེན་ངན་བཅོས་སྐྱོང་གནད་ལ་ཁེལ་བ། མཉམ་འགུལ་ལམ་སྲོལ་གནད་ལ་ཁེལ་བ། དགེ་སློབ་ཀྱི་གྲལ་བཤེར་གནད་ལ་ཁེལ་བ། དགེ་རྒན་བཀོད་སྒྲིག་གནད་ལ་ཁེལ་བ། སློབ་ཁྲིད་དང་དཔེ་དེབ་གནད་ལ་ཁེལ་བ། དངོས་ཟོག་གྲབས་གསོག་གནད་ལ་ཁེལ་བ། མི་སྣ་གསོ་སྦྱོང་གནད་ལ་ཁེལ་བ། འཕྲོད་བསྟེན་བཅོས་སྐྱོང་གནད་ལ་ཁེལ་བ་བཅས་བྱས་ནས། སློབ་གྲྭའི་རིམས་ནད་སྔོན་འགོག་ཚོད་འཛིན་གྱི་རྨང་གཞི་ཇེ་བརྟན་དུ་གཏོང་བ་དང་རིམས་ནད་སློབ་གྲྭའི་ནང་མཆེད་པར་འགོག་ཟོན་མཐའ་གཅིག་ཏུ་བྱས་ནས་ནུས་ཤུགས་ཡོད་རྒུས་རྒྱ་ཆེའི་དགེ་སློབ་ཚོའི་ཚེ་སྲོག་བདེ་འཇགས་དང་གཟུགས་པོ་བདེ་ཐང་ཡོང་རྒྱུར་འགན་ལེན་བྱེད་དགོས།
“ལམ་ལུགས་དྲུག་”ཚད་ལྡན་དུ་གཏོང་དགོས། སློབ་གྲྭའི་རིམས་ནད་སྔོན་འགོག་ཚོད་འཛིན་དང་ཐོལ་བྱུང་སྤྱི་བའི་འཕྲོད་བསྟེན་དོན་རྐྱེན་སྙན་སེང་ཞུ་བའི་ལམ་ལུགས་དང་། དགེ་སློབ་ཀྱི་ཞོགས་པའི་ཞིབ་བཤེར་ལམ་ལུགས། ནད་ཀྱིས་རྐྱེན་པས་ལས་ཀར་མ་ཞུགས་པ་ཐོ་འགོད་དང་རྗེས་འདེད་སྙན་སེང་ཞུ་བའི་ལམ་ལུགས། “དུས་ཐོག་ཏུ་སློབ་གྲྭར་འབྱོར་མ་ཐུབ་པ་དང་གཟུགས་པོ་བདེ་ཐང་མིན་པའི་སློབ་མའི”སློབ་ཚན་སླར་གསོ་ར་སྤྲོད་དཔྱད་བཤེར་ལམ་ལུགས། རིམས་ནད་སྔོན་འགོག་ཚོད་འཛིན་གྱི་བདེ་ཐང་སློབ་གསོའི་ལམ་ལུགས། དུག་སེལ་དང་ཟུར་བཀར་ལམ་ལུགས་སོགས“ལམ་ལུགས་དྲུག”བཙུགས་ཏེ་འཐུས་ཚང་དུ་བཏང་ཡོད།
“བླང་བྱ་ལྔ་”ཡི་འགན་འཁྲི་ཁ་གསལ་བཟོ་དགོས། ས་གནས་སོ་སོའི་སློབ་གྲྭ་ཁག་གི་འགན་འཁུར་བློ་མཐུན་གཙོ་བོས་ས་ཁོངས་དོ་དམ་དང་འགན་འཁྲི་འཁུར་མཁན་དང་པོའི་འགན་འཁྲི་འཁུར་དགོས། དོ་དམ་ལ་ཤུགས་སྣོན་ཏན་ཏིག་རྒྱག་པ་དང་གཅིག་གྱུར་འཆར་འགོད་བྱས་ནས་སློབ་འགོ་ཚུགས་པའི་འབྱོར་ཐོ་འགོད་པ་དང་། གཅིག་སྡུད་ཐོག་སློབ་ཁྲིད་བྱེད་པ། དགེ་སློབ་ཀྱི་ཟ་མ་སོགས་གཙོ་གནད་ལྷུ་ཚིགས་ལ་ནན་གྱིས་དམིགས་པ་དང། “གཙོ་གནད་མི་སྣ་རིགས་བཞི”དང་དེ་བཞིན་སློབ་འགོ་ཚུགས་པའི་གཟའ་འཁོར་གཉིས་སོགས་གཙོ་གནད་དུས་མཚམས་ལ་ནན་གྱིས་དམིགས་དགོས་ལ། ཟ་ཁང་དང་། སློབ་ཁང་། ཉལ་ཁང་། དཔེ་མཛོད་ཁང་སོགས་གཙོ་གནད་གནས་ཡུལ་ལ་ནན་གྱིས་དམིགས་ནས་རིམས་ནད་སྔོན་འགོག་ཚོད་འཛིན་གནད་ལ་ཁེལ་བ་དང་། བྱ་ཐབས་ལག་བསྟར་ནན་པོ་བྱེད་པ། མཛུབ་ཁྲིད་རོགས་རམ་ཤུགས་ལྡན་བྱེད་པ། བྱ་ཐབས་རྗེས་འདེད་དང་དོ་དམ་ཏན་ཏིག་བཅས་བྱེད་དགོས།
“དཔྱད་ཞིབ་བཞི་མཉམ་འགུལ”གྱིས་སྤུས་ཚད་འགན་ལེན་བྱེད་དགོས། སློབ་གྲྭ་མ་འཚོག་གོང་ཞིང་ཆེན་སློབ་གསོ་ཐིང་ཆེད་དོན་ལས་དོན་ཚོགས་ཆུང་དུ་བཅའ་སྡོད་བྱས་ནས་འབྲེལ་མཐུད་ས་ཁུལ་དང་སློབ་གྲྭའི་རིམས་ནད་སྔོན་འགོག་ཚོད་འཛིན་དང་སློབ་འགོ་ཚུགས་པའི་གྲ་སྒྲིག་བྱ་ཚུལ་ལ་ལྟ་སྐུལ་མཛུབ་ཁྲིད་དང་ཞིབ་བཤེར་དཔྱད་འདེམས་བྱེད་དགོས། ས་གནས་ཁག་གིས་ཁོངས་གཏོགས་དོ་དམ་གྱི་དབང་ཚད་ལྟར་སློབ་འགོ་ཚུགས་པའི་ཚད་གཞི་བཟོ་དགོས་པར་མ་ཟད། སློབ་གྲྭའི་རང་གིས་རང་ལ་དཔྱད་བསྡུར་དང་། རྫོང（ཁུལ）སློབ་གསོ་ཅུའུ་ཡིས་གདེང་འཇོག གྲོང་ཁྱེར（ཁུལ）སློབ་གསོ་ཅུའུ་ཡིས་དཔྱད་བསྡུར། ཞིང་ཆེན་སློབ་གསོ་ཐིང་གིས་དཔྱད་འདེམས་བཅས་ཀྱི་གོ་རིམ་ལྟར་རིམ་པ་སོ་སོ་དང་རིགས་སོ་སོའི་སློབ་གྲྭའི་སློབ་འགོ་ཚུགས་པར་དཔྱད་དཔོག་བྱེད་དགོས། རིམས་ནད་སྔོན་འགོག་ཚོད་འཛིན་དང་སློབ་འགོ་ཚུགས་པའི་གྲ་སྒྲིག་ལས་དོན་གང་ལེགས་དང་ཏན་ཏིག་མ་བྱུང་ཚེ་འབྲེལ་ཡོད་འགན་འཁུར་བའི་འགན་འཁྲིར་བདའ་འདེད་ནན་མོ་གཏོང་དགོས། །
རྩོམ་སྒྲིག་པ། རིག་འཛིན་ལྷ་མོ།
མཚོ་སྔོན་སློབ་གསོ་ཐིང་གིས་བྱ་ཐབས་དྲུག་བཏོན་ནས་སློབ་གྲྭའི་སྔོན་འགོག་ཚོད་འཛིན་དང་སློབ་འགོ་ཚུགས་པའི་གྲ་སྒྲིག་ལས་དོན་ལ“གནད་སྨིན་ཕྱོགས་སྟོན”བྱས་པ།