ཀྲུང་གོ་བོད་ཀྱི་དྲ་བའི་འཕྲིན། ཟླ་11པའི་ཚེས་7ཉིན། མཚོ་སྔོན་ཞིང་ཆེན་ན་གཞོན་ཁེ་ལས་པའི་ཚོང་ཚོགས་འཛུགས་པའི་ཚོགས་ཆེན་ཟི་ལིང་དུ་འཚོགས་ཤིང་། ཚོགས་འདུའི་ཐོག་ལས་འཛིན་དང་ལྟ་ཞིབ་པ། ཚོགས་གཙོ། ལྟ་ཞིབ་ལྷན་ཚོགས་ཀྱི་ཀྲུའུ་ཞི། ཚོགས་གཙོ་གཞོན་པ། ལྟ་ཞིབ་ལྷན་ཚོགས་ཀྱི་ཀྲུའུ་ཞི་གཞོན་པ། དྲུང་ཡིག་ཆེན་མོ། དྲུང་ཡིག་གཞོན་པ་བཅས་བདམས་ཐོན་བྱུང་ཡོད། ཧྲིན་ཀྲང་གཞོན་པའམ་ཞིང་ཆེན་བཟོ་ཚོང་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་ཁོང་ཡུང་གིས“མཚོ་སྔོན་ཞིང་ཆེན་གྱི་ན་གཞོན་ཁེ་ལས་པའི་ཚོང་ཚོགས་”ཀྱི་སྒོ་བྱང་ཕྱེས་པ་རེད།
གསར་དུ་བདམས་ཐོན་བྱུང་བའི་མཚོ་སྔོན་ཞིང་ཆེན་གྱི་ན་གཞོན་ཁེ་ལས་པའི་ཚོང་ཚོགས་ཀྱི་ཚོགས་གཙོ་ཀྲུང་དབྱང་ཅུན་གྱིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ན་གཞོན་ཚོར“ཕུགས་བསམ་ཆེན་པོ་ལྡན་དགོས་པ་དང་ཏན་ཏིག་གིས་བྱ་བ་སྒྲུབ་དགོས་པའི”གཏམ་བཤད་གནང་བ་དེ་ཡིད་ལ་བརྟན་པོར་ངེས་ནས་ལག་གདང་སྦྲེལ་ཏེ་མདུན་དུ་བསྐྱོད་ཅིང་། “ན་གཞོན་གསར་པས་བྱས་རྗེས་གསར་པ་འཇོག་དགོས”ཞེས་པ་ལྟེ་བའི་འདུ་ཤེས་སུ་བྱས་ཏེ་ཕུགས་བསམ་དང་དད་སེམས་བརྟན་པོ་བཅངས་ཤིང་ཡང་དག་པའི་ཆབ་སྲིད་ཀྱི་ཁ་ཕྱོགས་རྒྱུན་འཁྱོངས་བྱེད་དགོས་ལ། འཕེལ་རྒྱས་ཀྱི་ཡིད་ཆེས་ཇེ་བརྟན་དུ་བཏང་ནས་རྩེར་སོན་གྱི་ལང་ཚོའི་གྲུབ་འབྲས་འཇོག་དགོས་པ་དང་། ཞབས་ཞུའི་ཐོག་མའི་འདུ་ཤེས་ཇེ་བརྟན་དུ་བཏང་ནས་ཚོང་ཚོགས་ཀྱི་ནུས་པ་ཏན་ཏིག་གིས་འདོན་སྤེལ་བྱས་ཏེ་ན་གཞོན་གྱི་བློ་གྲོས་གཅིག་སྡུད་དང་ཐུན་མོང་ཐོག་འཕེལ་རྒྱས་འགྲོ་རྒྱུར་སྐུལ་འདེད་བཏང་ནས་འབྱོར་ཕྱུག་དང་ཤེས་དཔལ། འཆམ་མཐུན། མཛེས་སྡུག་བཅས་ལྡན་པའི་མཚོ་སྔོན་གསར་པ་འཛུགས་སྐྲུན་བྱ་ཆེད་ལེགས་སྐྱེས་སྔར་བས་ཆེ་ཞིང་གསར་བ་ཞིག་འབུལ་དགོས་ཞེས་གསུངས།
ཉིན་དེར། མཚོ་སྔོན་ཞིང་ཆེན་གྱི་ན་གཞོན་ཁེ་ལས་པའི་ཚོང་ཚོགས་དང་རྒྱལ་ཡོངས་ས་གནས་ཁག་གི་ན་གཞོན་ཚོང་ཚོགས་རྩ་འཛུགས་བར་མཉམ་ལས་སྒྲོམ་གཞིའི་གྲོས་མཐུན་ལ་མིང་རྟགས་བཀོད་པ་དང་འབྲེལ་མཚོ་སྔོན་ཞིང་ཆེན་གྱི་ན་གཞོན་ཁེ་ལས་པའི་གླེང་སྟེགས་སྐབས་དང་པོ་གཉེར་བ་རེད།།
རྩོམ་སྒྲིག་པ། རིག་འཛིན་ལྷ་མོ།
མཚོ་སྔོན་ཞིང་ཆེན་གྱི་ན་གཞོན་ཁེ་ལས་པའི་ཚོང་ཚོགས་བཙུགས་པ།