མཚོ་ནུབ་ཁུལ“སྐྱེ་ཁམས་སྟོབས་ལྡན་ཁུལ”གྱི་ཕྱོགས་སུ་གོམ་པ་བརྟན་པོ་སྤོས་པ།

ཀྲུང་གོ་བོད་ཀྱི་དྲ་བའི་འཕྲིན། ཏང་གི་ཚོགས་ཆེན་ཐེངས་བཅོ་བརྒྱད་པའི་ཚུན་ལ། མཚོ་ནུབ་སོག་རིགས་བོད་རིགས་རང་སྐྱོང་ཁུལ་གྱིས་ནགས་ལས་སྐྱེ་ཁམས་བཟོ་འགོད་ཆེན་མོ་བཞི་མཐུད་མར་ལག་བསྟར་བྱེད་པ་སྲོག་ཤིང་བྱས་ཏེ། སྟོབས་ཤུགས་ཡོད་རྒུས་ཚྭ་འདམ་གཞོང་གི་ལེ་བར་སྟོང་གི་རླུང་འགོག་བྱེ་འཇགས་ཀྱི་ལྗང་མདོག་བསྐྲུན། ཁུལ་ཡོངས་ཀྱི་བྱེ་འགྱུར་ས་ཞིང་གི་རྒྱ་ཁྱོན་སྤྱི་ཆིང་ཁྲི2.82ཇེ་ཉུང་དུ་ཕྱིན་པ་དང་། ཐང་རྒོད་ཅན་དུ་གྱུར་བའི་ས་ཞིང་གི་རྒྱ་ཁྱོན་སྤྱི་ཆིང་ཁྲི3.27ཇེ་ཉུང་དུ་ཕྱིན་ཏེ། “བྱེ་འགྱུར་དང་བསྟུན་ནས་མི་ཕྱི་ལ་བསྣུར་བ”ནས“ལྗང་མདོག་དང་བསྟུན་ནས་བྱེ་མ་ཕྱིར་བསྣུར་བའི”ལམ་ཚད་རྡོ་རིང་གི་དོན་སྙིང་ལྡན་པའི་ལོ་རྒྱུས་རང་བཞིན་གྱི་འཕོ་འགྱུར་མངོན་འགྱུར་བྱུང་།

མཚོ་ནུབ་ཁུལ་གྱིས་གཞི་རྒྱ་ཆེན་པོའི་སྒོ་ནས་རྒྱལ་ཁོངས་ལྗང་སྒྱུར་དང་། བྱེ་འགྱུར་ས་ཞིང་བཅོས་བསྒྱུར་ལ་སྐུལ་འདེད་བྱས་པ་དང་མཉམ་དུ། རང་བྱུང་གི་ཆ་རྐྱེན་བཟང་པོ་དང་ཟུང་འབྲེལ་བྱས་ཏེ། འཕང་འབྲས་སྐྱེ་ཁམས་དཔལ་འབྱོར་ནགས་ར་ཤུགས་ཆེན་པོས་འཕེལ་རྒྱས་བཏང་བ་དང་། རོང་འབྲོག་མང་ཚོགས་ཀྱི་བྱེ་འགོག་བྱེ་བཅོས་དང་ནགས་རྩྭའི་ཐོན་ལས་ཀྱི་ཧུར་བརྩོན་རང་བཞིན་ལ་སྐུལ་སློང་གང་ལེགས་བྱས་ཏེ། སྐྱེ་ཁམས་འཛུགས་སྐྲུན་དང་ཐོན་ལས་འཕེལ་རྒྱས་ཀྱི་མཉམ་འགུལ་བཟང་པོ་མངོན་དུ་གྱུར། “ཀུང་སི+རྟེན་གཞི+ཞིང་ཁྱིམ”གཉེར་སྟངས་ཀྱི་བྱེད་ཐབས་སྤྱད་དེ། གཏེར་ལེན་ཁ་དང་། ན་གོར་མོ། ཏུའུ་ལན་རྫོང་། ཨོ་ལན་རྫོང་སོགས་སུ་གཞི་ཁྱོན་ཅན་དང་། ཚད་གཞི་ཅན། ཚད་ལྡན་ཅན་གྱི་འཕང་འབྲས་རྟེན་གཞིའི་འཛུགས་སྐྲུན་ལ་སྐུལ་སྤེལ་ཧུར་ཐག་བྱས། མཚོ་ནུབ་ཁུལ་གྱི་རྒྱལ་ཁབ་སྤྱི་ཕན་ཤིང་ནགས་བདག་སྐྱོང་ཁ་གསབ་རྒྱ་ཁྱོན་དེ་སྔའི་སྤྱི་ཆིང་ཁྲི57.71ནས་ད་ལྟའི་སྤྱི་ཆིང་ཁྲི143.56ལ་འཕར། ཁུལ་ཡོངས་ཀྱི་ཀྲུང་དབྱང་ནོར་སྲིད་ནགས་ཚལ་སྐྱེ་ཁམས་ཕན་འབྲས་ཐེབས་རྩའི་ཁྱབ་ཁོངས་ཁྲོད་བཞག་པའི་རྒྱལ་ཁབ་གཙོ་གནད་སྤྱི་ཕན་ཤིང་ནགས་ཀྱི་རྒྱ་ཁྱོན་གྱིས་ཞིང་ཆེན་ཡོངས་ཀྱི་རྒྱལ་ཁབ་གཙོ་གནད་སྤྱི་ཕན་ཤིང་ནགས་ཁ་གསབ་རྒྱ་ཁྱོན་གྱི36.07%ཟིན། མིག་སྔར། ཁུལ་ཡོངས་ཀྱིས་ཁྱོན་བསྡོམས་པས་ནགས་སྲུང་པ5628གླས་ཡོད་པ་དང་། ཟླ་རེའི་ཆ་སྙོམས་ཟླ་ཕོགས་སྒོར2700ཡིན་ཞིང་། ལོ་རེའི་ཆ་སྙོམས་ཡོང་སྒོ་སྒོར་ཁྲི3.24ཡིན་ལ། དབུལ་ཕོངས་མི་གྲངས་ལ་སྐྱེ་ཁམས་སྲུང་སྐྱོབ་ཁྲོད་སྔར་ལས་མང་བའི་ཁེ་ཕན་དངོས་ཐོབ་དུ་བཅུག་སྟེ། དབུལ་ཐར་འགག་སྒྲོལ་དང་སྐྱེ་ཁམས་དཔལ་ཡོན་འཛུགས་སྐྲུན་གཉིས་རྒྱལ་མངོན་འགྱུར་བྱུང་།

ནགས་ལས་ཐོན་ལས་བཟོ་འགོད་དང་སྤྱི་ཕན་ཤིང་ནགས་བདག་སྐྱོང་བཟོ་འགོད་ལག་ཏུ་བསྟར་བའི་དུས་མཚུངས་སུ། མཚོ་ནུབ་ཁུལ་གྱིས་དེ་དང་མཉམ་དུ་རྨོ་བསྐྱུར་སྡོང་འཛུགས་རྩྭ་འདེབས་བཟོ་འགོད་དང་།ནགས་ལས་སྐྱེ་ཁམས་གཙོ་གནད་བཟོ་འགོད་ལག་ཏུ་བསྟར། ཁུལ་ཡོངས་སུ་རིམ་བརྩིས་བྱས་ན་རྨོ་ཞིང་བསྐྱུར་ཏེ་ནགས་རྩྭ་བཏབ་ཚད་སྤྱི་ཆིང་ཁྲི1.1ལག་བསྟར་ཡོངས་འགྲུབ་བྱུང་། མིས་བཟོས་ནགས་སྐྲུན་རྩྭ་འདེབས་དང་། རི་རྒྱ་ནགས་གསོ་རྩྭ་འདེབས། ལས་གཞི་བྱེ་འཇགས། སྤྱི་ཕན་ཤིང་ནགས་འཛུགས་པ་བཅས་ནུས་ཤུགས་གང་ཡོད་ཀྱིས་སྤེལ་ཞིང་། གྲོང་ཁྱེར་གྱི་མཐའ་འཁོར་དང་། འགྲིམ་འགྲུལ་ལམ་འགྲམ། རི་རྒྱ་ནགས་གསོ་བཅས་གཙོ་གཞི་ཡིན་པའི་ས་ཁོངས་རང་བཞིན་གྱི་ལྗང་མདོག་སྐྱེ་ཁམས་བཀག་དངོས་ཐོག་མར་གྲུབ་པར་མ་ཟད། དེའི་བྱེད་ནུས་ཀྱང་ཐོན་མགོ་བརྩམས།

“ལྔ་བཅུ་གསུམ”གྱི་ཚུན་ལ། ཁྱོན་བསྡོམས་པས་བྱེ་འགྱུར་ས་ཞིང་རྒྱ་ཁྱོན་སྤྱི་ཆིང་ཁྲི20.84བཅོས་སྐྱོང་བྱས། སྤྱི་ཕན་ཤིང་ནགས་འཛུགས་པ་དང་། བྱང་གསུམ་འགོག་སྲུང་ཤིང་ནགས་སོགས་ལས་གཞི་ཤུགས་ཆེན་པོས་ལག་བསྟར་བྱས་པ་དང་། མདོ་ལ་རིང་མོའི་སྐྱེ་ཁམས་སྲུང་སྐྱོབ་སླར་གསོ་གཅིག་གྱུར་སྒོས་སྐུལ་འདེད་བཏང་སྟེ། བརླན་སའི་བཀོལ་སྤྱོད་དོ་དམ་ལམ་ལུགས་དང་སྤྱིའི་གྲངས་འབོར་ཚོད་འཛིན་དོ་དམ་གཟབ་ནན་དུ་བཏང་ཞིང་། སྐྱེ་ཁམས་ཐོན་ཁུངས་ཀྱི་སྤུས་ཀ་མཐོར་འདེགས་ཆེན་པོ་བྱུང་ཞིང་། རི་ཆུ་ནགས་ཞིང་མཚེའུ་རྩྭ་ཐང་བཅས་ཀྱི་སྐྱེ་ཁམས་མ་ལག་སྲུང་སྐྱོབ་ཁྱོན་ཡོངས་ནས་ཇེ་དྲག་ཏུ་བཏང་། ཁུལ་ཡོངས་སུ་ད་ཡོད་ཀྱི་རིགས་མི་འདྲ་བའི་རང་བྱུང་སྲུང་སྐྱོབ་ཁུལ་དང་། ནགས་ཚལ་སྤྱི་གླིང་། བརླན་སའི་སྤྱི་གླིང་། ས་གཤིས་སྤྱི་གླིང་། མཛེས་ལྗོངས་གྲགས་ཅན་ཁུལ་སོགས53ཡོད་པ་དང་། རང་བྱུང་སྲུང་སྐྱོབ་ཁུལ་གྱི་གྲངས་ཀ་ཞིང་ཆེན་ཡོངས་ནས་ཆེས་མང་ཞིང་། སྤྱིའི་རྒྱ་ཁྱོན་ཧ་ལམ་སྤྱི་ཆིང་ཁྲི1885ལོངས་པ་དང་། རི་སྐྱེས་རྩི་ཤིང་ཐོན་ཁུངས་རིགས400ལྷག་དང་། རི་སྐྱེས་སྲོག་ཆགས་ཀྱི་རིགས196ཡོད། དེར་བརྟེན། མཚོ་ནུབ་ནི“བཟོ་ལས་ཀྱི་ཁུལ་ཆེན་པོ”དང“ཐོན་ཁུངས་ཀྱི་ཁུལ་ཆེན་པོ”ནས“སྐྱེ་ཁམས་སྟོབས་ལྡན་ཁུལ”གྱི་ཕྱོགས་སུ་གོམ་སྟབས་བརྟན་པོ་སྤོས་པ་རེད། །

རྩོམ་སྒྲིག་པ། ཀླུ་མོ་མཚོ།

དཔྱད་མཆན 0 ཡོད།