གཞིས་ཁྱིམ་གསར་པར་སྤར་ནས་བདེ་སྐྱིད་ཀྱི་འཚོ་བ་གླེང་བ།

མཚོ་ལྷོ་བོད་རིགས་རང་སྐྱོང་ཁུལ་ཞིན་ཧེ་རྫོང་རྩི་གོར་ཐང་གྲོང་རྡལ་གྱི་ཨ་མདོ་དམངས་སྲོལ་རིག་གནས་སྡེ་བ་ནི་གསར་དུ་གྲུབ་པའི་སྤོ་དམངས་བཀོད་སྒྲིག་བྱ་ཡུལ་ཙམ་མིན་པར་དེ་ལས་ཀྱང་རོང་འབྲོག་མང་ཚོགས་ཀྱི་ཁྱིམ་གསར1200རེད།

སའི་རྒྱ་ཁྱོན་ལ་སྤྱི་ཆིང100ཡོད་ཅིང་། རྩི་གོར་ཐང་གྲོང་རྡལ་དང་། ཆུ་སྔོན་གྲོང་རྡལ། ཐང་ནག་ཞང་། ཆུ་ཁོལ་ཞང་། ལུང་བཟང་ཞང་བཅས་ཞང་གྲོང་རྡལ་ལྔ་ལ་ཁྱབ་ཡོད་པ་དང་། དེ་ནི་ཞིན་ཧེ་རྫོང་གིས་རོང་འབྲོག་མང་ཚོགས་སྐོར་ཞིག་སྡོད་གནས་ཁ་ཐོར་ཡིན་པ་དང་། འགྲིམ་འགྲུལ་ཧ་ཅང་སྟབས་མི་བདེ་བའི་དོན་དངོས་ལ་དམིགས་ཏེ་སྐུལ་འདེད་བཏང་བའི་ཡུལ་གཞན་དུ་གནས་སྤོ་བའི་ལས་གཞི་ཞིག་ཡིན་ཞིང་།2017ལོའི་ཟླ9པར་ལས་མགོ་བརྩམས། ད་ལྟ། དེང་རབས་ཅན་གྱི་དམངས་སྲོལ་རིག་གནས་སྡེ་བ་ཞིག་དེ་རུ་ཆགས་འདུག་ལ། དབུལ་ཕོངས་མང་ཚོགས་ཀྱི་འཚོ་བ་གསར་པ་ཞིག་འགྲུབ་ཡོད་པར་མ་ཟད། དེ་ལས་ཀྱང་ཞིན་ཧེ་རྫོང་གི་དབུལ་ཐར་འགག་སྒྲོལ་ལམ་བུའི་སྟེང་གི་རེ་བའི་ལེའུ་ཞིག་རེད།

རིན་ཆེན་ཐར་ཚང་ནི་ཞིན་ཧེ་རྫོང་ཆུ་ཁོལ་ཞང་གསེར་ཐང་སྡེ་བའི་ཡིག་ཚགས་དང་བྱང་བུ་བཟོས་ཡོད་པའི་དབུལ་ཁྱིམ་ཞིག་རེད། 2018ལོའི་ཟླ9པར། དུས་རིམ་དང་པོའི་གནས་སྤོ་ཁྱིམ་ཚང་ཞིག་ཡིན་པས་ཁྱིམ་ཚང་གཅིག་གི་བཟའ་མི་ཆེ་ཆུང་ལྔ་བོ་རྫོང་མཁར་དང་སྤྱི་ལེ་གཉིས་ཡོད་པའི་ཨ་མདོ་དམངས་སྲོལ་རིག་གནས་སྡེ་བར་གནས་སྤར་བ་དང་། སྨི་གྲུ་བཞི་མ80ཅན་གྱི་ཁང་པ་གསར་པར་བསྡད་ཅིང་། སྔོན་ཆད་དགུན་ཁར་ཙག་མི་ཁོག་ལ། དབྱར་ཁར་ཆར་མི་ཁོག་པའི་ས་ཁང་དང་ཁ་གྱེས། གནམ་ས་བླ་འོག་བརྗེས་པ་ལྟ་བུའི་འགྱུར་ལྡོག་འདི་གླེང་ཚེ། རིན་ཆེན་ཐར་གྱིས་མཐེ་བོང་སྒྲེང་བཞིན་བཤད་པའི་སྐད་ཆའི་ནང་དུ་སྲིད་ཇུས་བཟང་པོའི་བཀའ་དྲིན་གྱིས་ཁྱབ་འདུག

“ང་ཚོའི་སྔོན་ཆད་ཀྱི་སྡོད་ས་ཚང་མ་ས་ཁང་ཡིན་ཞིང་། ཆ་རྐྱེན་ཞན་ལ་སྡོད་གནས་མཐའ་འཁོབ་ཡིན་པས། རྫོང་མཁར་དུ་ཡོང་ནས་དོན་དག་རེ་བསྒྲུབ་དགོས་ན་ཉིན་ཕྱེད་ཅིག་གི་དུས་ཚོད་དགོས་ཤིང་། སྨན་པར་བསྟེན་པ་དང་སློབ་གྲྭར་འགྲོ་བ་ཐམས་ཅད་ལ་དཀའ་ཚེགས་ཤིན་ཏུ་ཆེ། ད་ལྟ་སྐར་མ20ལ་སོང་ན་རྫོང་མཁར་དུ་ཐོན་ཐུབ་ལ། ཁོད་ཡངས་ཤིང་འོད་གསལ་བའི་ཁང་གསར་འདི་འདྲ་ཞིག་ཏུ་གནས་སྤོར་ཐུབ་པ་ནི་སྔོན་ཆད་ཡིད་ལའང་དྲན་མ་མྱོང་། འདི་ལྟ་བུའི་གནས་མཛེས་སྡུག་ལྡན་པ་ཞིག་ནས་སྡོད་ཐུབ་པས་ཚང་མ་ཤིན་ཏུ་བདེ་སྐྱིད་ལྡན”ཟེར།

ཞིན་ཧེ་རྫོང་དབུལ་སྐྱོར་གསར་སྤེལ་ཅུས་ཀྱི་ལས་བྱེད་མི་སྣ་ལིའང་ཙུང་ཞའོ་ཡིས་ངོ་སྤྲོད་བྱས་པ་ལྟར་ན། ལས་གཞི་དེས་སྡོད་ཁང་དང་། ལུས་རྩལ་ར་བ། ཞིང་པའི་སྤྲོ་ཁྱིམ་དང་མི་རིགས་ཀྱི་སྲོལ་རྒྱུན་ལག་ཤེས་བཟོ་ལས་ཚོང་ཁང་སོགས་རྨང་གཞིའི་སྒྲིག་བཀོད་འཛུགས་སྐྲུན་བྱེད་སྐབས། བོད་རིགས་དམངས་སྲོལ་གྱི་གོམས་གཤིས་འབུར་དུ་ཐོན་པར་བྱས་ཡོད་ལ། སྲོལ་རྒྱུན་དམངས་སྲོལ་དང་དེང་རབས་ཐོན་ཁུངས་ཟུང་འབྲེལ་བྱས་ཤིང་། རིག་གནས་དང་ཡུལ་སྐོར་མཉམ་འདྲེས་ཡོང་དུ་བཅུག་སྟེ། དབུལ་ཕོངས་མང་ཚོགས་ཡུལ་གཞན་དུ་གནས་སྤར་རྗེས་ཀྱི་རྗེས་མཐུད་ཐོན་ལས་འཕེལ་རྒྱས་ཐད་འགན་སྲུང་ཡོད་པར་བྱས།

ཞིན་ཧེ་རྫོང་ལུང་བཟང་ཞང་རྔ་རྡུང་སྡེ་བའི་བསོད་ནམས་རྒྱ་མཚོ་ནི་སྡེ་གསར་ཐོན་ལས་འཕེལ་རྒྱས་གཏོང་བའི་ལས་སྐྲུན་པ་སྐོར་ཁག་དང་པོ་རེད། 2018ལོའི་ཟླ10པའི་ཟླ་མཇུག་ཏུ། ཁོས་སྡེ་བའི་ནང་གི་ཡིག་ཚགས་བྱང་བུ་བཟོས་པའི་དབུལ་ཕོངས་ཁྱིམ་ཚང11དང་མཉམ་འབྲེལ་གྱིས་དངུལ་བུན་བསྐྱིས་ཤིང་མ་དངུལ་སྡུད་རུབ་བྱས་ནས་གསར་དུ་གྲུབ་པའི་ཚོང་ཁང་ཞིག་འགན་གཙང་ལེན་བྱས་པ་དང་། མཉམ་འབྲེལ་སྒོས་མཛེས་བཟོ་དང་རྒྱན་སྤྲས་ལས་སྣོན་གྱི་ཁང་པ་དང་རང་འདེམ་ཚོང་ཁང་གཉེར་བར་གྲ་སྒྲིག་བྱེད་བཞིན་ཡོད་ལ། རང་བདག་གསར་གཏོད་ལ་བརྟེན་ནས་ཡོང་འཕར་ཕྱུག་བསྒྱུར་བྱེད་བཞིན་ཡོད།

“ང་ཚོ་ཚང་མ་ནི2018ལོའི་ཟླ9པར་ས་འདིར་གནས་སྤར་བ་ཡིན་ལ། ཚོང་སྒོ་ཕྱེས་ནས་གཟའ་འཁོར་གཉིས་ལས་འགོར་མེད། སྲིད་གཞུང་གིས་ང་ཚོར་ལོ་གཉིས་ཀྱི་ཁང་གླ་མེད་པར་བཏང་བར་མ་ཟད། ང་ཚོས་རྗེས་ཕྱོགས་ཚོང་གཉེར་ཇི་ལྟར་བྱེད་པར་མཛུབ་སྟོན་གནང་བས། ང་ཚོས་ཀྱང་ཤུགས་རྒྱག་དགོས་ལ། རྗེས་ཕྱོགས་ཀྱི་འཚོ་བ་ཇེ་བཟང་ནས་ཇེ་བཟང་ཡིན་པར་ཡིད་ཆེས་ཡོད། ”དེང་ཕྱིན་ཆད་ཀྱི་འཆར་གཞི་གླེང་སྐབས། བསོད་ནམས་རྒྱ་མཚོར་ཡིད་ཆེས་ཀྱིས་ཁེངས་ཡོད།

དགའ་འོས་པའི་འཕོ་འགྱུར་ནི་དེ་ཙམ་གྱིས་མི་ཚད་དེ། ཨ་མདོ་དམངས་སྲོལ་རིག་གནས་སྡེ་བའི་དོ་དམ་འཛིན་གྲྭའི་འཛིན་དཔོན་གཡང་འཛོམས་ཐར་གྱིས་ངོ་སྤྲོད་བྱས་པ་ལྟར་ན། ཞིང་སྡེའི་བུད་མེད་ཀྱིས་རང་གི་སྒོ་ཁ་ནས་ལས་ཞུགས་མངོན་འགྱུར་ཡོང་ཆེད། སྡེ་བའི་ནང་དུ་གད་བདར་པ10བཀོད་སྒྲིག་བྱས་ཏེ་སྡེ་བ་ཡོངས་ཀྱི་འཕྲོད་བསྟེན་གཙང་ཕྱག་དང་གད་སྙིགས་གཙང་འདྲེན་གྱི་འགན་བླངས་ཡོད་པ་དང་། དེང་སྐབས་ཁོ་མོ་ཚོས་ཟླ་རེར་ཡོང་སྒོ་སྒོར1800ལེན་བཞིན་ཡོད། གནས་སྤོར་ནི་ཐབས་ལམ་ཡིན་ཞིང་དབུལ་ཐར་ནི་ད་གཟོད་དམིགས་ཡུལ་དངོས་རེད། རྗེས་ཕྱོགས་ཨ་མདོ་དམངས་སྲོལ་རིག་གནས་སྡེ་བས་ད་དུང་སྤྱི་ཕན་རང་བཞིན་གྱི་ལས་གནས་འགའ་བཀོད་སྒྲིག་བྱས་ཏེ་བཀོད་སྒྲིག་བྱ་ཡུལ་གྱི་དབུལ་ཕོངས་ཁྱིམ་ཚང་དེ་ལས་མང་པོའི་ལས་ཞུགས་གནད་དོན་ཐག་གཅོད་རྒྱུ་རེད།

2018ལོའི་ཟླ11པའི་ཟླ་མཇུག་བར་དུ། སྡེ་གསར་ལ་གནས་སྤར་ཡོང་བའི་འབྲོག་དམངས་ཁྱིམ་ཚང853ལ་སླེབས་ཟིན་པ་དང་། ཨ་མདོ་དམངས་སྲོལ་རིག་གནས་སྡེ་བས2018ལོའི་ལོ་མཇུག་ཏུ་ཚང་མ་འཛུགས་སྐྲུན་བྱས་ཚར་ཏེ་ནང་དུ་མི་སྡོད་པ་དང་ལས་གཉེར་བྱ་རྒྱུ་མངོན་འགྱུར་བྱ་རྒྱུ་རེད། གྲང་ངར་ཆེ་བའི་དགུན་ཁ་འདིར། ཞིན་ཧེ་རྫོང་གི་ཁྱིམ་ཚང་སྟོང་ཕྲག་གི་མང་ཚོགས་རྣམས“ཡུལ་གཞན་དུ་གནས་སྤོ”བའི་ལས་གཞི་བརྒྱུད་ནས་སྡེ་གསར་དུ་གནས་སྤར་ཞིང་རྫོང་མཁར་དུ་བསྡད། གནས་སྤར་བ་འདིས་འཚོ་བ་གསར་པའི་ནང“གནས་སྤར”དུ་བཅུག་པར་མ་ཟད། དེ་ལས་ཀྱང་ཞིན་ཧེ་རྫོང་གི་དབུལ་ཐར་འགག་སྒྲོལ་དེ་ལེའུ་གསར་པ་ཞིག་ལ་བསྐྱོད་དུ་བཅུག་པ་རེད། །

རྩོམ་སྒྲིག་པ། མཁའ་མཚོ་སྐྱིད།

དཔྱད་མཆན 0 ཡོད།