2018ལོར་རྨ་ཆུའི་སྟོད་རྒྱུད་ཀྱི་ཆར་ཆུ་འབབ་ཚད་ལོ་རྒྱུས་ཀྱི་ཟིན་ཐོ་གསར་པ་བཏོད་པ།

ཀྲུང་གོ་བོད་ཀྱི་དྲ་བའི་འཕྲིན། གསར་འགོད་པས་མཚོ་སྔོན་ཞིང་ཆེན་གནམ་གཤིས་ལྟེ་གནས་ནས་ཤེས་རྟོགས་བྱས་པར། 2018ལོར་རྨ་ཆུའི་སྟོད་རྒྱུད་ཀྱི་ཆར་ཆུ་འབབ་ཚད་རྒྱུན་གཏན་ལས་མང་བ་དང་། 1961ལོ་ནས་གནམ་གཤིས་ཀྱི་ཟིན་ཐོ་ཡོད་ཚུན་གྱི་ལོ་རྒྱུས་ཀྱི་ཟིན་ཐོ་གསར་པ་བཏོད་པ་དང་། རྨ་ཆུའི་སྟོད་རྒྱུད་ཀྱི་ཆུ་རྒྱུག་ཁུལ་གཙོ་བོའི་ཆུ་རྒྱུན་མང་དུ་མངོན་གསལ་དོད་པོ་ཕྱིན་ནས་ཆར་ཆུ་མང་བའི་རྣམ་པ་ཡུན་རིང་རྒྱུན་འཁྱོངས་བྱུང་བ་རེད།

མཚོ་སྔོན་ཞིང་ཆེན་གནམ་གཤིས་ལྟེ་གནས་ཀྱི་མཐོ་རིམ་ལག་རྩལ་ཆེ་མོ་བ་མ་ཀྲན་ལེང་གིས2018ལོར་རྨ་ཆུའི་སྟོད་རྒྱུད་ཀྱི་ཆར་ཆུ་འབབ་ཚད་ཧའོ་སྨི711ཟིན་ནས་རྒྱུན་གཏན་ལས(1981ལོ་ནས2010ལོ་བར)བཅུ་ཆ་གསུམ་མང་དུ་ཕྱིན་པ་དང་། ཟླ8པ་དང9པར2012ལོ་ཚུན་གྱི་ཆུ་ཆེ་ཤོས་རྒྱས་ནས་ཚ་རྔ་འགག་ཆུ་མཛོད་ནས་ཆུ་ཐེངས་མང་ཤོར་བ་རེད། ལོར་ཆར་ཆུ་འབབ་ཚད་མང་ཉུང་ཞིབ་དཔྱད་གཏན་འཁེལ་གྱི་སྟོན་རྟགས་ལ་གཞིགས་ན། 2018ལོར་རྨ་ཆུའི་སྟོད་རྒྱུད་ས་ཁུལ་དུ་རྒྱུན་གཏན་དང་མི་འདྲ་བའི་ཆར་ཆུ་འབེལ་པོ་བྱུང་ཡོད་ཅེས་ངོ་སྤྲོད་བྱས་པ་རེད།

མཚོ་སྔོན་ཞིང་ཆེན་གནམ་གཤིས་ལྟེ་གནས་ཀྱི་དཔྱད་གཞིར་དབྱེ་ཞིབ་བྱས་པར་གཞིགས་ན། རྨ་ཆུའི་སྟོད་རྒྱུད་ཀྱི་ས་ཁུལ་ཁག་གི་ཆར་ཆུ་འབབ་ཚད་ཧའོ་སྨི472.5ནས986.9བར་ཟིན་ནས་རྒྱུན་གཏན་དང་བསྡུར་ན18.4%ནས65.1%བར་འཕར་བ་ལས་བྲག་དཀར་དང། འབའ། རྨ་སྟོད། རྨ་ཆེན། རྨ་ཆུ། ཁྱུང་མཆུ་བཅས་ཀྱི་གནམ་གཤིས་ས་ཚིགས་སུ་ཆར་ཆུ་འབབ་ཚད་བཅུ་ཆ་གསུམ་ཡན་མང་དུ་ཕྱིན་ཞིང་བྲག་དཀར་གནམ་གཤིས་ས་ཚིགས་སུ་ཆར་ཆུ་འབབ་ཚད་མང་ལ་འབབ་ཚད་མཐོ་ཤོས་ཟིན་ནས་བཅུ་ཆ་བདུན་ཟིན་ཡོད་པ་རེད།

2018ལོར་རྨ་ཆུའི་སྟོད་རྒྱུད་ཐང་ནག་ཆུ་དཔྱད་ས་ཚིགས་སུ་ཆ་སྙོམས་ཆར་ཆུ་འབབ་ཚད་སྐར་ཆ་རེར་རྨི་རྒྱ་དཔངས་གྲུ་བཞི912.7ཟིན་པ་དང་རྒྱུན་གཏན་དང་བསྡུར་ན་བཅུ་ཆ་ལྔ་མང་དུ་ཕྱིན་ནས1989ལོ་ཚུན་གྱི་ཆར་ཆུ་འབབ་ཚད་མཐོ་ཤོས་ཀྱི་ལོ་ཡིན་པ་རེད།

མ་ཀྲན་ལེང་གིས་སྤྱི་ཡོངས་ནས་བརྗོད་ན། རྨ་ཆུའི་སྟོད་རྒྱུད་ས་ཁུལ་དུ་ལོ་འཁོར་མོར་ཆར་ཆུ་འབབ་ཚད་མང་བའི་རྐྱེན་གྱིས་དུས་ཐུང་གི་འབྲུབ་དུས་ཐོན་མོད། འོན་ཀྱང་ཞིང་ལས་དང་གློག་མཁོ་འདོན་སོགས་དཔལ་འབྱོར་འཕེལ་རྒྱས་དང་། དེ་བཞིན་སྔོ་ཁེབས་བཟང་དུ་འགྲོ་བ་དང་། དབུས་སྨད་རྒྱུད་ཀྱི་ས་ཁུལ་གྱི་ཆུ་མཁོ་འདོན་ལ་ཕན་ཐོགས་ཆེན་པོ་བྱུང་ཡོད་ཅེས་བརྗོད། །

རྩོམ་སྒྲིག་པ། ཀླུ་མོ་མཚོ།

དཔྱད་མཆན 0 ཡོད།