ཡུལ་ཤུལ་གྱིས་རྒྱལ་ཁོངས་ལྗང་སྒྱུར་དང་རི་སྐྱེས་སྲོག་ཆགས་དང་རྩི་ཤིང་སྲུང་སྐྱོབ་བྱེད་ཤུགས་ཇེ་ཆེར་བཏང་བ།

ཀྲུང་གོ་བོད་ཀྱི་དྲ་བའི་འཕྲིན། ཟླ9པའི་ཚེས21ཉིན། གསར་འགོད་པས་ཡུལ་ཤུལ་བོད་རིགས་རང་སྐྱོང་ཁུལ་གྱི་ཁུལ་ཨུའི་གཞུང་སྒྲུབ་ཁང་ནས་རྒྱུས་ལོན་པ་ལྟར་ན། ཉེ་བའི་ལོ་འགའི་རིང་ལ། ཡུལ་ཤུལ་ཁུལ་གྱི་གོང་འོག་ཀུན་གྱིས་རི་ལྗང་ཆུ་དྭངས་ནི་གསེར་རི་དངུལ་རི་ལས་ལྷག་པའི་འདུ་ཤེས་བརྟན་པོ་བཙུགས་ཏེ། རྒྱལ་ཁོངས་ལྗང་སྒྱུར་གྱི་འཕེལ་རྒྱས་ལ་མགྱོགས་མྱུར་གྱིས་སྐུལ་འདེད་བཏང་བ་དང་། རི་སྐྱེས་སྲོག་ཆགས་དང་སྐྱེ་དངོས་སྲུང་སྐྱོབ་བྱེད་ཤུགས་ཇེ་ཆེར་བཏང་ནས། ཁུལ་ཡོངས་ཀྱི་སྡོང་འཛུགས་ལྗང་སྒྱུར་དང་རི་སྐྱེས་སྲོག་ཆགས་དང་སྐྱེ་དངོས་སྲུང་སྐྱོབ་བྱ་བར་ལོ་རྒྱུས་རང་བཞིན་གྱི་ཐོད་བརྒལ་བྱུང་།

ལྗང་སྐྲུན་ལྗང་གཅེས་ལྗང་སྲུང་བྱས་ཏེ། རྒྱལ་ཁོངས་ལྗང་སྒྱུར་བྱ་བ་ཇེ་མགྱོགས་སུ་བཏང་། ཉེ་བའི་ལོ་འགའི་རིང་ལ་བསྡོམས་པས་འདེབས་འཛུགས་ལ་འཚམ་པའི་སྡོང་ཕྲུག་སྣ་ཚོགས་ཁྲི1217.85བཙུགས་པ་དང་། སྤྱི་ཆིངས6375.3གྱི་སྟེང་སྡོང་འཛུགས་ལྗང་སྒྱུར་ལེགས་འགྲུབ་བྱུང་། རྒྱལ་ཁོངས་ལྗང་སྒྱུར་མྱུར་ལམ་དུ་ཞུགས་ཏེ། མཐོར་འདེགས་ཆེན་པོ་བྱུང་བའི་དུས་རིམ་དུ་གོམ་པ་སྤོས། སྲང་ལམ་མཛེས་ལྗོངས་མཐོར་འདེགས་བྱུང་བ་དེས་ཡུལ་ཤུལ་གྲོང་ཁྱེར་ལ་རྒྱལ་ཡོངས་འཕྲོད་བསྟེན་གྲོང་ཁྱེར་གྱི་མཚན་སྙན་ཐོབ་པར་བྱེད་ནུས་གལ་ཆེན་བཏོན་པ་ལས་གཞན། ཡུལ་ཤུལ་གྲོང་ཁྱེར་གྱིས་རྒྱལ་ཡོངས་དཔལ་ཡོན་གྲོང་ཁྱེར་བརྩོན་ལེན་དང་། སྐྱེད་ཚལ་གྲོང་ཁྱེར་འཛུགས་པར་ཡང་རྨང་གཞི་བརྟན་པོ་བཏིངས། མིག་སྔར་རྒྱལ་ཁབ་ཀྱི་བརླན་ས་སྤྱི་གླིང2བཙུགས་ཟིན་པ་དང་། ཡུལ་ཤུལ་གྲོང་ཁྱེར་དང་རོང་པོ་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ2ཀྱི་བརླན་སའི་སྲུང་སྐྱོབ་དང་སླར་གསོའི་ལས་གཞི་ལག་བསྟར་བྱེད་བཞིན་པའི་སྒང་རེད། ཡུལ་ཤུལ་ཁུལ་གྱི་ནགས་ཤིང་ས་བོན་འབྱུང་ཁུངས་འཛུགས་སྐྲུན་གྱི་ལས་གཞི་དང་ནགས་ལས་གནོད་ལྡན་སྐྱེ་དངོས་འགོག་སྲུང་ཚོད་འཛིན་ལས་གཞི་འགྲུབ་ཟིན་པ་དང་། གཙང་གསུམ་འབྱུང་ཡུལ་གྱི་རྗེས་དྲན་རྡོ་རིང་མཛེས་ལྗོངས་མཐོར་འདེགས་གཏོང་བའི་བཟོ་འགོད་ལག་བསྟར་བྱས་པར་མ་ཟད། ཡུལ་ཤུལ་མཐོ་སྒང་གི་ས་མུའུ་སྟོང་གི་སྡོང་པོའི་སོན་བཟང་གསོ་སྤེལ་ཚོད་ལྟའི་རྟེན་གཞི་འགྲུབ་ཟིན།

ཁྲིམས་འགལ་ལ་རྡུང་རྡེག་བྱེད་པར་ཤུགས་བསྣན་ནས། རི་སྐྱེས་སྲོག་ཆགས་དང་སྐྱེ་དངོས་ཀྱི་ཐོན་ཁུངས་སྲུང་སྐྱོབ་བྱས། ཡུལ་ཤུལ་ཁུལ་གྱིས་ཉེ་བའི་ལོ་འགའི་རིང་ལ་ཁྲིམས་ལྟར་རྩད་ཆོད་པ་གྱོད་དོན238ལ་བུད་པ་དང་། ཁྲིམས་འགལ་ཉེས་ཅན275ལ་ཆད་པ་བཅད་དེ་ནགས་ཚལ་དང་རི་སྐྱེས་སྲོག་ཆགས་ཀྱི་ཐོན་ཁུངས་བདེ་འཇགས་སྲུང་སྐྱོབ་ནུས་ལྡན་བྱས། རི་སྐྱེས་སྲོག་ཆགས་ཁ་གསབ་གྱོད་དོན4328བསྒྲུབས་པ་དང་། རི་སྐྱེས་སྲོག་ཆགས་ཀྱིས་མི་ལུས་དང་རྒྱུ་ནོར་ལ་གྱོང་གུད་བཟོས་པའི་ཁ་གསབ་མ་དངུལ་སྒོར་ཁྲི2523དོན་ཐོག་ཏུ་ཕབ། ཆེད་དོན་ཞིབ་འཇུག་ཚོགས་འདུ་བསྡུས་ཏེ། ཁུལ་ཡོངས་ཀྱི་མངའ་ཁོངས་སུ་ཤུག་པ་ཉོ་ཚོང་གི་ནག་ཁྲོམ་དང་། རི་སྐྱེས་སྲོག་ཆགས་ཉོ་ཚོང་གི་ནགས་ཁྲོམ་ལ་རྡུང་རྡེག་ནན་མོ་གཏོང་བའི་ཆེད་དམིགས་བྱ་འགུལ་གཅིག་བསྡུས་ཀྱིས་སྤེལ།  །

རྩོམ་སྒྲིག་པ། མཁའ་མཚོ་སྐྱིད།

དཔྱད་མཆན 0 ཡོད།