ཀྲུང་གོ་བོད་ཀྱི་དྲ་བའི་འཕྲིན།སྔར་ལས་ལྷག་པའི་སྒོ་ནས་མཐོ་སྒང་གི་མཛེས་སྡུག་ཤང་གྲོང་འཛུགས་སྐྲུན་བྱེད་པའི་བྱ་བ་ལེགས་པོར་སྒྲུབ་པ་དང་། ཤུགས་ཆེན་པོས་ཞིང་ཆེན་ཡོངས་ཀྱི་རིག་གནས་ལས་དོན་དང་རིག་གནས་ཐོན་ལས་འཕེལ་རྒྱས་ལ་སྐུལ་འདེད་གཏོང་ཆེད། ཉེ་ལམ། མཚོ་སྔོན་ཞིང་ཆེན་རིག་གནས་གསར་འགྱུར་པར་སྐྲུན་ཐིན་དང་ཞིང་ཆེན་སྡོད་ཁང་དང་ཤང་གྲོང་འཛུགས་སྐྲུན་ཐིན་གྱིས་གཙོ་སྒྲུབ་བྱས་ཤིང་། ཞིང་ཆེན་རིག་གནས་ཁང་གིས་འགན་སྒྲུབ་བྱས་པའི་ཞིང་ཆེན་ཡོངས་ཀྱི་མཐོ་སྒང་གི་མཛེས་སྡུག་ཤང་སྡེའི་རིག་གནས་འཛུགས་སྐྲུན་ལ་སྐུལ་འདེད་གཏོང་བའི་ཤང་གྲོང་ལས་བྱེད་པར་གསོ་སྦྱོང་བྱེད་པའི་འཛིན་གྲྭ་བདེ་བླག་ངང་མཇུག་བསྒྲིལ་བ་དང་། ཞིང་ཆེན་ཡོངས་ཀྱི་ད་ལོའི་མཐོ་སྒང་གི་མཛེས་སྡུག་ཤང་གྲོང་འཛུགས་སྐྲུན་གྱི་འགན་འཁུར་བའི་ཤང་གྲོང་གི་འབྲེལ་ཡོད་འགན་འཁུར་མི་སྣ210གསོ་སྦྱོང་ལ་ཞུགས་ཡོད།
རྒྱུས་ལོན་པ་ལྟར་ན། ཐེངས་འདིའི་གསོ་སྦྱོང་ལ་གཅིག་བསྡུའི་གསོ་སྦྱོང་དང་ཡུལ་དངོས་ལྟ་སྦྱོང་བརྟག་བཤེར་ཟུང་སྦྲེལ་བྱེད་པའི་ཐབས་སྤྱད་ཡོད་པ་དང་། གསོ་སྦྱོང་གིས“མཐོ་སྒང་གི་མཛེས་སྡུག་ཤང་གྲོང་འཛུགས་སྐྲུན་དང་སྲོལ་རྒྱུན་སྡེ་བར་སྲུང་སྐྱོང་བྱེད་པ”དང་། “རིག་གནས་ལས་གཞི་བྱ་བ་ལེགས་པོར་སྒྲུབ་ཏེ་རོང་འབྲོག་ཁུལ་གྱི་གཞི་རིམ་སྤྱི་བའི་རིག་གནས་འཛུགས་སྐྲུན་ལ་སྐུལ་འདེད་གཏོང་བ”། “མཚོ་སྔོན་ཞིང་ཆེན་གྱི2013ལོའི‘ཁུལ་གསུམ’གྱི་རིག་གནས་འཇོན་མི་ལ་རོགས་སྐྱོར་བྱེད་པའི་འཆར་གཞི”། “ཧུར་བརྩོན་གྱིས་མི་རིགས་མཐུན་སྒྲིལ་འཕེལ་རྒྱས་སྔོན་ཐོན་ཁུལ་གསར་འཛུགས་བྱས་ནས་མཚོ་སྔོན་གྱི་ཚན་རིག་འཕེལ་རྒྱས་དང་ཐོལ་བརྒལ་འཕེལ་རྒྱས། ཡུན་རིང་བརྟན་བརླིང་ལ་སྐུལ་འདེད་གཏོང་བ”དང“སྐྱེ་ཁམས་དཔལ་ཡོན་དང་སྐྱེ་ཁམས་དཔལ་ཡོན་འཛུགས་སྐྲུན་བྱེད་པ”སོགས་ཆེད་དོན5ལ་གཞིགས་ནས་འཆད་ཁྲིད་བྱས་ཡོད་པ་མ་ཟད། གསོ་སྦྱོང་སློབ་མ་རྣམས་མཚོ་ཤར་གྲོང་ཁྱེར་ཧུའུ་ཀྲུའུ་ཧོར་རིགས་རང་སྐྱོང་རྫོང་དུ་ཕྱིན་ནས་སྡེ་བ4ཡི་ཤང་གྲོང་འཛུགས་སྐྲུན་དང་སྲོལ་རྒྱུན་སྡེ་བར་སྲུང་སྐྱོང་བྱེད་པའི་དཔེ་སྟོན་སྡེ་བ་ལ་ཡུལ་དངོས་ལྟ་སྦྱོང་བྱས་ཏེ། ས་གནས་དེའི་སྡེ་བ་དང་གྲོང་རྡལ་འགོ་ཁྲིད་ཀྱིས་ཤང་གྲོང་འཛུགས་སྐྲུན་དང་སྲོལ་རྒྱུན་སྡེ་བར་སྲུང་སྐྱོང་བྱེད་པའི་བསམ་བློ་དང་བྱེད་ཐབས། ཉམས་མྱོང་ལ་ཉན། །
