ཀྲུང་གོ་བོད་ཀྱི་དྲ་བའི་འཕྲིན། མིག་སྔར། མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་ལ་སྐྱེ་ཁམས་ཕྱུགས་ལས་དང་ཕྱུགས་ཟོག་དཔེ་སྟོན་གསོ་སྤེལ། ཕྱུགས་ལས་ཐོན་རྫས་ཕྱིར་བཙོང་། འབྲོག་ཁྱིམ་སྤྲོ་གཏོང་ཁང་། གཟན་ཆས་ལས་སྣོན། རྩོལ་ལས་ཕྱིར་གཏོང་། ཞིང་ལས་འཕྲུལ་ཆས་གླ་གཏོང་ཞབས་ཞུ་སོགས་ཁྱད་ལྡན་རོང་འབྲོག་པའི་ཆེད་ལས་མཉམ་ལས་ཁང108ཡོད་པ་དང་། མཉམ་ལས་ཁང་འདི་དག་གིས་མཐའ་འཁོར་གྱི་རོང་འབྲོག་པ་ཁྱིམ་ཚང5381ལ་སྣེ་ཁྲིད་དེ་ཕྱུག་བསྒྱུར་བྱས་ཤིང་། དེ་རྫོང་ཡོངས་ཀྱི་ཤང་གྲོང5དང་སྲིད་འཛིན་སྡེ་བ31ལ་ཁྱབ་ཡོད།
རྒྱུས་ལོན་པ་ལྟར་ན། ཉེ་བའི་ལོ་འདི་དག་ལ། རྐང་ཚ་རྫོང་གིས་ཞིང་ཕྱུགས་ལས་སྒྲིག་གཞི་ལེགས་སྒྲིག་བྱེད་པ་གཙོ་གནད་དུ་བཟུང་སྟེ། “སྡོད་དམངས་སྤོ་བསྒྱུར་དང་ཕྱུགས་ཟོག་ཉུང་འཕྲི། ལྗང་བསྒྱུར། ཡོང་སྒོ་སྤེལ་བ”བཅས་ཀྱི་སྤྱིའི་བླང་བྱར་གཞིགས་ཏེ། རྫོང་ཡོངས་ཀྱི་ཞིང་ཕྱུགས་གཙོ་ཁྲིད་ཐོན་ལས་ལ་དམིགས་ནས་ཧུར་བརྩོན་གྱིས་རོང་འབྲོག་པས་དམངས་སྒྲུབ་ཆེད་ལས་མཉམ་ལས་དཔལ་འབྱོར་རྩ་འཛུགས་སྒྲུབ་པར་སྐུལ་མ་དང་རོགས་སྐྱོར་བྱས་ལ། རོང་འབྲོག་པའི་ཆེད་ལས་མཉམ་ལས་རྩ་འཛུགས་གསོ་སྐྱོང་དང་འཕེལ་རྒྱས་སུ་གཏོང་བ་དེ་རོང་འབྲོག་ཁུལ་གྱི་དཔལ་འབྱོར་ལམ་ལུགས་གསར་སྐྲུན་བྱེད་པའི་ཐབས་ལམ་ཤིག་ཏུ་རྩིས་ཏེ་ཞིང་ཕྱུགས་ལས་ཐོན་ལས་ཅན་དང་རྩ་འཛུགས་ཅན་གྱི་ཆུ་ཚད་མཐོར་འདེགས་སུ་བཏང་བ་དང་། རོང་འབྲོག་པའི་ཡོང་སྒོར་སྐུལ་འདེད་གཏོང་བའི་ཐབས་ལམ་གལ་ཆེན་ཞིག་ཏུ་རྩིས་ནས་རིམ་བཞིན་ཁྱབ་ཁོངས་སྣ་མང་དང་བརྗོད་དོན་སྣ་མང་། རྣམ་པ་སྣ་མང་། རིམ་པ་སྣ་མང་གི་དེང་རབས་ཞིང་ཕྱུགས་ལས་འཕེལ་རྒྱས་རྣམ་པ་ཞིག་གྲུབ་ཡོད། 2013ལོར། རྐང་ཚ་རྫོང་གིས་ཆེད་ལས་མཉམ་ལས་ཁང4ཚད་ལྡན་ཅན་དུ་འཛུགས་སྐྲུན་བྱས་ཏེ། བསྡོམས་པས་རོགས་སྐྱོར་མ་དངུལ་སྒོར་ཁྲི10བཏང་སྟེ། རོང་འབྲོག་པའི་ཆེད་ལས་མཉམ་ལས་ཁང་སྔར་ལས་ཚད་ལྡན་ཅན་དང་ལམ་ལུགས་ཅན་དུ་འཛུགས་སྐྲུན་བྱས་པས་རྫོང་ཡོངས་ཀྱི་རོང་འབྲོག་པའི་ཆེད་ལས་མཉམ་ལས་ཁང་བདེ་ཐང་ངང་འཕེལ་རྒྱས་སུ་འགྲོ་བར་སྐུལ་འདེད་བཏང་། མིག་སྔར། རྐང་ཚ་རྫོང་གི་ཚད་ལྡན་ཅན་དུ་འཛུགས་སྐྲུན་བྱས་པ་དང་ཞིང་ཆེན་རིམ་པའི་ཚད་ལྡན་ཅན་གྱི་མིང་མཛོད་དུ་ཚུད་པའི་རོང་འབྲོག་པའི་ཆེད་ལས་མཉམ་ལས་ཁང27ལ་སླེབས་ཡོད། །
