ཀན་སུའུ་ཡི་ས་ཁུལ་བཞི་ཡིས་རིག་གནས་ཡུལ་སྐོར་བྱེད་མཚམས་བཞག

ཀྲུང་གོ་བོད་ཀྱི་དྲ་བའི་འཕྲིན། གསར་འགོད་པས་ཚེས19ཉིན་ཀན་སུའུ་ཞིང་ཆེན་རིག་གནས་དང་ཡུལ་སྐོར་ཐིང་ནས་ཤེས་རྟོགས་བྱུང་བར། ཐེངས་འདིའི་རིམས་ནད་ལ་ཁ་གཏད་འཇལ་ཆེད། ཀན་སུའུ་ཞིང་ཆེན་གྱིས་ཞིང་ཆེན་ཡོངས་ཀྱི་རིག་གནས་ཡུལ་སྐོར་ལས་རིགས་ཀྱི་རིམས་ནད་སྔོན་འགོག་ཚོད་འཛིན་གྱི་འཕྲལ་བསྟུན་བྱ་བའི་ལམ་སྲོལ་ལག་བསྟར་བྱས་ཏེ། ལན་ཀྲོའུ་དང་ཅིའུ་ཆོན། ཅ་ཡུས་ཀོན། ཀྲང་ཡེ་བཅས་ས་ཁུལ་བཞིའི་རིག་གནས་ཡུལ་སྐོར་གཉེར་སྐྱོང་བྱེད་གནས་དང་གཉེར་སྐྱོང་བྱེད་སྒོ་འཕྲལ་མར་སྒོ་བརྒྱབ་ནས་འཁྲབ་སྟོན་དང་འགྲེམས་སྟོན། མང་ཚོགས་རང་བཞིན་གྱི་རིག་གནས་བྱེད་སྒོ་སྣ་ཚོགས་མེད་པར་བཟོས། ཞིང་ཆེན་ཡོངས་ཀྱི་ཡུལ་སྐོར་ལས་དོན་ཁང་གིས་ཞིང་ཆེན་བརྒལ་བའི་ཡུལ་སྐོར་ལས་སྒོ་མཚམས་བཞག

རིམ་པAཡི་མཛེས་ལྗོངས་ཁུལ་ཁག་ལ་དམིགས་ཏེ་ཀན་སུའུ་ཞིང་ཆེན་གྱིས“ཚད་བཀག  ཁ་ཆད། འཚང་གཡོལ”བཅས་ཀྱི་བླང་བྱ་ལག་བསྟར་དོན་འཁྱོལ་ནན་ཏན་བྱས་ནས། ཡུལ་སྐོར་བ་སྣེ་ལེན་བྱེད་ཚད་ལ་ཚོད་འཛིན་ནན་མོ་བྱེད་པ་དང་། འཛིན་བྱང་ཁ་ཆད་བྱེད་དགོས་པའི་ལམ་ལུགས་དོན་འཁྱོལ་བྱེད་པ། མཛེས་ལྗོངས་ཁུལ་ནང་མ་སོང་སྔོན་ལ་ཨང་བཤེར་ཐོ་འགོད་དང་། ལུས་དྲོད་འཇལ་དགོས་པའི་བླང་བྱ་དོན་འཁྱོལ་བྱེད་པ། ཡུལ་སྐོར་པར་སྨི་གཅིག་གི་བར་ཐག་རྒྱུན་འཁྱོངས་དང་ཁ་ཐུམ་རྒྱག་པར་སྐུལ་མ་བྱེད་དགོས། མཛེས་ལྗོངས་ཁུལ་ནང་མི་སྣ་འདུ་འཛོམས་བྱེད་སླ་བའི་འཁྲབ་སྟོན་སོགས་ཀྱི་རྣམ་གྲངས་དང་གཙོ་གནད་ས་ཆར་འཕྲོད་བསྟེན་དོ་དམ་དང་སྔོན་འགོག་ཚོད་འཛིན་བྱ་ཐབས་ལ་ཤུགས་སྣོན་རྒྱག་པ་དང་། མི་ཚོགས་ཁྲིད་སྟོན་དང་ལམ་སྟོན་བྱ་ཐབས་དོན་འཁྱོལ་ནན་པོ་བྱེད་དགོས་པའི་བླང་བྱ་བཏོན།

སྐར་མ་རིམ་པའི་གསོལ་མགྲོན་ཁང་དང་རྟེན་རྫས་བཤམས་མཛོད་ཁང་། སྤྱི་པའི་དཔེ་མཛོད་ཁང་སོགས་ཀྱི་མི་སྣ་བལྟོས་བཅས་ཀྱིས་མང་ས་ཡིན་པས། ཀན་སུའུ་ཞིང་ཆེན་གྱིས་འཕྲོད་བསྟེན་དོ་དམ་བྱེད་ཤུགས་ཆེ་རུ་གཏོང་བ་དང་རླུང་རྒྱུ་དུག་སེལ་བྱེད་ཤུགས་ཆེ་རུ་གཏོང་དགོས་པ། ནང་དུ་འཛུལ་བའི་མི་སྣར་ཨང་བཤེར་དང་དྲོད་ཚད་འཇལ་བ། ཐོ་འགོད་སོགས་ཀྱི་སྔོན་འགོག་ཚོད་འཛིན་བྱེད་ཐབས་དོན་འཁྱོལ་ནན་པོ་བྱེད་པ་དང་། ལས་ཞུགས་མི་སྣའི་བདེ་ཐང་ལྟ་ཞིབ་ཚད་ལེན་དང་དོ་དམ་སོགས་ལ་ཤུགས་སྣོན་རྒྱག་དགོས་པའི་བླང་བྱ་བཏོན་ཡོད།

   དེ་སྔོན། ཧྲའན་ཞི་ཞིང་ཆེན་གྱིས་ཉིང་སྐྱུར་བརྟག་དཔྱད་གདགས་གཤིས་ཡིན་པའི་ཡུལ་སྐོར་བ2ཀྲང་ཡེ་དང་ཅིའུ་ཆོན། ཅ་ཡུས་ཀོན་སོགས་སུ་ལྟ་སྐོར་བྱས་ཚུལ་བརྡ་ཁྱབ་བཏང་བ་དང་། ཀན་སུའུ་ཞིང་ཆེན་གྱིས་འཕྲལ་མར་མི་སྣ་གྲལ་བཤེར་དང་། འབྲེལ་བ་དམ་ཟབ་ཡོད་མཁན་རྩད་ཞིབ། ཉིང་སྐྱུར་བརྟག་དཔྱད། ཁོར་ཡུག་ལ་དུག་སེལ་སོགས་ཀྱི་ལས་དོན་སྤེལ་བ་རེད། ཚེས19ཉིན་ལན་ཀྲོའུ་རུ་པྲོག་གསར་གློ་ཚད་ནད་དུག་ཉིང་སྐྱུར་བརྟག་དཔྱད་ཀྱི་འབྲས་བུ་གདགས་གཤིས་ཡིན་པའི་མི6གསར་སྣོན་བྱས་པ་དང་ཁྲེང་ཀོན་ཆུས་ཀྱི་ཁུལ་ཆུང་གཉིས་ཉེན་འབྲིང་ཁུལ་དུ་ལེགས་སྒྲིག་བྱས་པ་རེད།  །

རྩོམ་སྒྲིག་པ། ཚེ་རིང་དོན་འགྲུབ།

དཔྱད་མཆན 0 ཡོད།