ཀྲུང་གོ་བོད་ཀྱི་དྲ་བའི་འཕྲིན། ཉེ་ཆར། ཀན་ལྷོ་ཁུལ་སྤྱི་བདེ་ཅུས་དང་ཁུལ་སློབ་གསོ་ཅུས། ཀྲུང་གོ་མི་དམངས་དངུལ་ཁང་ཀན་ལྷོའི་ཡན་ལག་དངུལ་ཁང་བཅས་ཀྱིས་མཉམ་འབྲེལ་སྒོས་སྒྲུབ་པའི“ལང་ཚོ་སྲུང་སྐྱོང·བདེ་སྐྱིད་ཀྱི་སློབ་ཁང”ཞེས་པའི་གློག་འཕྲིན་དང་དྲ་རྒྱའི་མགོ་སྐོར་སྔོན་འགོག་གི་དྲིལ་སྒྲོག་བྱ་འགུལ་གཙོས་སློབ་འབྲིང་དང་པོ་ནས་སྤེལ།
བྱ་འགུལ་སྤེལ་སྐབས། མི་དམངས་དངུལ་ཁང་ཀན་ལྷོའི་ཡན་ལག་དངུལ་ཁང་དང་།ཁུལ་སྤྱི་བདེ་ཅུས་གཡོ་ཇུས་འགོག་རྒོལ་ལྟེ་གནས་ཀྱི་འབྲེལ་ཡོད་འགན་ཁུར་པས་སྔ་རྗེས་སུ་དགེ་སློབ་ཡོངས་ལ་གློག་འཕྲིན་དང་དྲ་རྒྱའི་མགོ་སྐོར་དང་དངུལ་བུན་གྱི་འབྲེལ་ཡོད་ཤེས་བྱ་བཅའ་ཁྲིམས་ཀྱི་ངོས་ནས་གོ་སླ་བའི་འགྲེལ་བཤད་བརྒྱབ་ཅིང་། དྲ་རྒྱའི་གྱོད་དཔེ་ངོ་མ་དང་ཟུང་འབྲེལ་བྱས་ཏེ་སློབ་སྟོན་དམར་ཁྲིད་བྱས། དྲིལ་སྒྲོག་བྱེད་སྒོའི་སློབ་སྟོན་ལ་གསོན་ཉམས་དོད་ཅིང་། སློབ་མའི་འཚོ་བ་དང་ཡང་ཉེ་བར་བཅར་ཡོད་པས། བྱ་འགུལ་ལ་ཞུགས་པའི་དགེ་སློབ་ཚོའི་དགའ་བསུ་ཆེན་པོ་ཐོབ།
ཁུལ་སློབ་གསོ་ཅུས་ཀྱི་འབྲེལ་ཡོད་འགན་འཁུར་པས་བསྟན་དོན། ཐེངས་འདིའི་དྲིལ་སྒྲོག་བྱ་འགུལ་ནི་ནག་སེལ་གཤེད་བཅོམ་གྱི་འཐབ་རྩོད་ལ་སྐུལ་འདེད་གཏིང་ཟབ་བཏང་ནས་སློབ་མའི་ཁྲིམས་མཐུན་ཁེ་དབང་ལ་ནུས་ཤུགས་ཡོད་རྒུས་སྲུང་སྐྱོང་བྱེད་པའི་ཁྲིམས་སྲུང་གི་འདུ་བྱེད་ཅིག་ཡིན་ལ། སློབ་མའི་དོགས་ཟོན་དང་ཉེན་ཚབས་ཀྱི་འདུ་ཤེས་ཇེ་ཟབ་ཏུ་གཏོང་བ་དང་མགོ་སྐོར་ཐེབས་སུ་མི་འཇུག་པ། སྐྱོན་བྲལ་ངང་འཚར་ལོངས་འབྱུང་བ་འགན་ལེན་བྱེད་པ་བཅས་ཀྱི་བྱམས་སྐྱོང་གི་འདུ་བྱེད་ཅིག་ཀྱང་ཡིན། ཁུལ་ཡོངས་ཀྱི་སློབ་གསོའི་སྡེ་ཁག་དང་སློབ་གྲྭ་ཁག་གིས་སློབ་གསོ་སྔོན་ལ་སྤེལ་རྒྱུ་མཐའ་འཁྱོངས་བྱ་རྒྱུ་དང་། རང་འགུལ་ངང་ཞབས་འདེགས་ཞུས་ཏེ་ཆེད་དོན་སྒྲིག་བཅོས་བྱེད་ཤུགས་ཆེ་རུ་བཏང་སྟེ། སྤྱི་བདེ་ལས་ཁུངས་དང་མཉམ་དུ་དོགས་ཟོན་དང་རྡུང་རྡེག་གི་བྱ་བ་ཁག་ལ་ཕྱོགས་ཡོངས་ནས་སྐུལ་འདེད་ཧུར་ཐག་བཏང་ནས།གཞོན་ནུ་ལོ་ཆུང་གི་སློབ་མ་ཚོ་འཚར་ལོངས་འབྱུང་བར་ཁོར་ཡུག་བཟང་བོ་ཞིག་བསྐྲུན་ཐུབ་པའོ། །