ཀྲུང་གོ་བོད་ཀྱི་དྲ་བའི་འཕྲིན། རྨ་ཆུ་རྫོང་གིས་ས་ཁོངས་ཀྱི་ཁྱད་ཆོས་ལྡན་པའི་གནའ་བོའི་རིག་གནས་དྲིལ་བསྒྲགས་བྱ་ཆེད། ཉེ་ཆར། ཀན་ལྷོ་བོད་རིགས་རང་སྐྱོང་ཁུལ་རྨ་ཆུ་རྫོང་རིག་གནས་ཁང་གིས་སྐོར་སྐྱོད་རིག་གནས་ཉམས་ལེན་ཁང་གི་སྒོ་ཕྱེས་པ་རེད།
སྐོར་སྐྱོད་རིག་གནས་ཉམས་ལེན་ཁང་གིས་རིག་རྩལ་འཁྲབ་སྟོན་དང་སྲོལ་རྒྱུན་ཤེས་བྱ། འབྲོག་པའི་རིག་གནས་བཅས་ནང་དོན་ཁག་གསུམ་གྱི་ཐད་དྲིལ་བསྒྲགས་བྱས་ཤིང་། བོད་ཀྱི་དམངས་ཁྲོད་ཀྱི་རྡུང་ལེན་དང་འབྲོང་རྭའི་སྒྲ་སྙན་གྱི་རྡུང་རྩལ། གེ་སར་གླེང་བརྗོད་དང་གླིང་བུ་འབུད་ཚུལ། མངོན་མིན་རིག་གནས་ཤུལ་བཞག་ལས་གཞི། མི་རིགས་ཀྱི་སྒྱུ་རྩལ། ལག་ཤེས་ཐོན་རྫས། བཟའ་བཏུང་རིག་གནས། འབྲོག་པའི་འཚོ་བའི་གོམས་སྲོལ་སོགས་ཕྱོགས་བཞི་མཚམས་བརྒྱད་ཀྱི་མགྲོན་པོར་ཡུལ་དངོས་ནས་ཉམས་སུ་མྱོང་དུ་བཅུག
ཉེ་བའི་ལོ་ཤས་ནང་དུ། རྨ་ཆུ་རྫོང་ཨུ་དང་རྫོང་སྲིད་གཞུང་གིས“གནམ་འོག་གི་རྨ་ཁུག་དང་བོ”“གེ་སར་རྒྱལ་བོའི་ཕ་ས”“འཛམ་གླིང་གི་ཆེས་མཛེས་པའི་བརླན་སའི་རྩྭ་ཐང”“ཀྲུང་གོའི་རྟ་རྒྱུགས་ཀྱི་ཕ་ས”“བོད་ཀྱི་དམངས་གླུ་དང་རྡུང་ལེན་གྱི་ཕ་ཡུལ”བཅས་ཡུལ་སྐོར་ཚོང་རྟགས་གྲགས་ཅན་ལྔ་ནན་གྱིས་སྐྲུན་པ་དང་། མངོན་མིན་རིག་གནས་ཤུལ་བཞག་བྱ་བ་སྔོག་འདོན་དང་སྲུང་སྐྱོང་ཧུར་ཐག་བྱས་ཤིང་། བོད་ཀྱི་དམངས་གླུ་གསར་གཏོད་གོང་འཕེལ་གཏོང་བར་སྐུལ་མ་བཏང་བ་དང་། དམངས་ཁྲོད་ཀྱི་གླེང་བརྗོད་སྒྱུ་རྩལ་བ་གསོ་སྐྱོང་ཤུགས་ཆེན་བྱས། རྫོང་ཁོངས་ཀྱི་མངོན་མེད་ཤུལ་བཞག་རིག་གནས་ཐོན་ཁུངས་ཀྱི་རིགས་དང་གྲངས་ཚད། ཁྱབ་ཚུལ། འཚོ་གནས་ཁོར་ཡུག སྲུང་སྐྱོང་བྱེད་ཚུལ་སོགས་ཀྱི་གནས་ཚུལ་ལ་ཁྱོན་ཡོངས་ནས་མཐིལ་རྟོགས་བྱས། ཉེན་ཁར་ཐུག་པའི་མངོན་མིན་ཤུལ་བཞག་རིག་གནས་ལས་གཞི་ལ་བརྟག་དཔྱད་ཞིབ་མོ་བྱས་ཏེ། སྔ་རྗེས་སུ་མངོན་མིན་ཤུལ་བཞག་རིག་གནས་ལས་གཞི་རིགས13རྣམ་གྲངས43གྱི་སྙན་ཞུའི་བྱ་བ་ལེགས་གྲུབ་བྱུང་།།