མདུན་ཤོག- གསར་འགྱུར།- ཡུལ་གྲུའི་གསར་འགྱུར།- ཀན་སུའུ།

རྩེ་དྲུག་དགོན་དུ་སྐབས་བདུན་པའི་ཚད་མའི་རིག་སྒྲ་ཆེན་མོ་ཚོགས་པ།

  ཡོང་ཁུངས། མཚོ་སྔོན་པོ་དྲ་བ།  2013-08-25 11:54

 ཀྲུང་གོའི་བོད་ཀྱི་དྲ་བའི་འཕྲིན། ཉེ་སྔོན། གདན་ཞུས་ལྟར་སྣང་ཞིག་དང་ཀོ་དགོན་སྟེང་ཆེན་དགོན་མཐོང་གྲོལ་རི་ཁྲོད་སོགས་ནས་ཕེབས་པའི་གྲྭ་བཙུན130ཡས་མས་དགོན་འདིར་དངོས་སུ་འབྱོར་ཞིང་། ཕྱི་ཉིན་ཞང་ཞུང་སྒོ་པའི་འདུས་སྡེ་ཁྱུང་པོ་རི་བོ་རྩེ་དྲུག་གླིང་གི་སྐབས་བདུན་པའི་ཚད་མའི་རིག་སྒྲ་ཆེན་མོ་དངོས་སུ་དབུ་ཚུགས་ཏེ་ཉིན14རིང་འཚོགས།

དེ་ཡང་སྔ་དྲོའི་ཆུ་ཚོད9ནས10བར་འདིར་ཕེབས་པའི་དགོན་སྡེ་ཁག་གི་རིག་པ་སྨྲ་བ་རྣམས་ཆབས་ཅིག་ཏུ་འཆད་རར་རྩོད་སྦྱོང་གནང་། ཆུ་ཚོད10ནས11བར་རྗེ་རིན་པོ་ཆེའི་ཚད་མའི་ལེའུ་གསུམ་པའི་ནང་ནས་རྩེ་དྲུག་དཔོན་སློབ་ལུང་རྟོགས་བསྟན་པའི་རྒྱལ་མཚན་དང་དགེ་བཤེས་ཡོན་ཏན་ཕུན་ཚོགས་སོགས་ཀྱིས་དཔེ་ཁྲིད་གནང་། ཆུ་ཚོད11ནས12བར་ཡང་འཆད་རར་རྩོད་སྦྱོང་གནང་། ཕྱི་དྲོ་ཆུ་ཚོད5་ལྔ་པ་ནས7བར་དམ་བཅའ་འཚོགས་ཤིང་། དེ་ཡང་དགོན་ཁག་སོ་སོ་ནས་ཕེབས་པའི་རིག་པ་སྨྲ་བ་རྣམས་དང་། འདིར་བཞུགས་རིག་པ་སྨྲ་བ་བཅས་བསྡོམས་པའི་རིག་པ་སྨྲ་བ230ཡས་མས་ཡོད་པ་དག འཇིག་མེད་ཐོས་བསམ་གླིང་དང་། ཐོག་མེད་ལུང་རིག་གླིང་ཞེས་གླིང་གཉིས་སུ་ཕྱེས་ནས་འཇིག་མེད་ཐོས་བསམ་གླིང་ཚང་ཆུ་ཚོད་གཅིག་ལ་དམ་བཅའ་བཞུགས་སྐབས། ཐོག་མེད་ལུང་རིག་གླིང་ཚང་གིས་རྩོད་པ་གནང་ཞིང་། ཐོག་མེད་ལུང་རིག་གླིང་ཚང་ཆུ་ཚོད་གཅིག་ལ་དམ་བཅའ་བཞུགས་སྐབས། འཇིག་མེད་ཐོས་བསམ་གླིང་ཚང་གིས་རྩོད་པ་གནང་སྟེ། དུས་ཚོད་ཟིན་པ་དང་བསྟན་རྒྱས་སྨོན་ལམ་གསུང་སྟེ་ཚོགས་གྲོལ། སྤྱི་ཟླ8པའི་ཚེས16དང17སྟེ་བོད་ཟླ7པའི་ཚེས10དང11གཉིས་ལ་ཐུག་ཆེན་དམ་བཅའ་འཚོགས་ཤིང་། སྔ་དྲོ་རྩོད་པ་དང་དཔེ་ཁྲིད་སོགས་གོང་ལྟར་ལ། ཕྱི་དྲོ་ཆུ་ཚོད5ནས6:30བར་ཡིན་ལ། ཉིན་དང་པོར་འཇིག་མེད་ཐོས་བསམ་གླིང་ཚང་དམ་བཅའ་བཞུགས་པ་དང་། ཉིན་གཉིས་པར་ཐོག་མེད་ལུང་རིག་གླིང་ཚང་དམ་བཅའ་བཞུགས་ཤིང་། གླིང་གཉིས་པོར་ཕན་ཚུན་རྩོད་པ་གནང་བའི་མཇུག་མཐར། བཀའ་དྲིན་བླ་ན་མ་འཆིས་པའི་རབས་འབྱམས་དགེ་བའི་བཤེས་གཉེན་ཆེན་མོ་ཡོན་ཏན་ཕུན་ཚོགས་དང་། བློ་གྲོས་རབ་གསལ་རྣམ་པ་གཉིས་ནས་གླིང་གཉིས་པོས་རིག་ལམ་འགྲན་བསྡུར་གྱི་རྩོད་པ་གནང་བར་དཔང་པོ་མཛད་དེ། དམ་བཅའ་བའི་ཁྱབ་ལོག་གི་ཟིན་ཐོ་དགེ་བཤེས་ཡོན་ཏན་ཕུན་ཚོགས་མཆོག་གིས་གསལ་བསྒྲག་གནང་མཐར་ཚད་མའི་རིག་སྒྲ་འཚོགས་པའི་དགོས་པ་དང་རྒྱུ་མཚན་སོགས་བཀའ་སློབ་གང་ཟབ་གནང་བ་དང་། མ་ཟད་ཁྱུང་པོ་རི་བོ་རྩེ་དྲུག་གླིང་གི་སྐབས་བདུན་པའི་ཚད་མའི་རིག་སྒྲ་ཆེན་མོ་འདིའི་སྐབས་སུ་ཕེབས་པའི་གྲྭ་ཚང་འདུས་པ་ཡོངས་ལ་རྩེ་དྲུག་ཤེལ་བྲག་དྲི་མེད་གླིང་གི་བླ་སྤྲུལ་འདུས་པ་ཡོངས་ཀྱི་ཚབ་ཞུས་ཏེ་བཀའ་དྲིན་ཆེ་ཞུ་བ་དང་། ལྷག་ཏུ་རྒྱལ་བ་སྨན་རི་བའི་ཚབ་ཞུས་ཏེ་བཀའ་དྲིན་ཆེ་ཞུ་བ་ཡིན་ཞེས་སོགས་ཀྱིས་བཀའ་སློབ་གནང་ཞིང་བསྟན་རྒྱས་སྨོན་ལམ་གསུང་སྟེ་ཚོགས་གྲོལ་མཚམས་མཛད་སྒོར་ཞུགས་པའི་དགེ་སློབ་ལྷན་རྒྱས་དྲན་རྟེན་གྱི་སྐུ་པར་སྐྱོན་པར་མཛད། ཕྱི་ཉིན་སྤྱི་ཚེས18དང་བོད་ཚེས12ཉིན་མཛད་སྒོ་འདིར་དངོས་སུ་ཕེབས་ཏེ་རྒྱལ་བའི་བསྟན་པ་རིན་པོ་ཆེ་ལ་ལུང་རིག་ཚད་མའི་ལམ་ནས་སྲི་ཞུ་གང་ནུས་སྒྲུབ་པའི་སྐུ་ངལ་འོ་རྒྱལ་ཚད་མེད་གནང་བར་སྙིང་ནས་ཡིད་རངས་དང་བཅས་ཐུགས་ཚེག་ངལ་གསོའི་ཚུལ་དུ་དགའ་སྤྲོ་བཏང་རག་གི་མཆོད་སྤྲིན་ཕུལ་བ་བཅས་སོ།  ། 

པར་དབང་གསལ་བསྒྲགས།      ངེད་ཀྱི་སྐོར།      འབྲེལ་གཏུགས་བྱེད་ཚུལ།

གློག་འཕྲིན་ཡིག་སྒམ། tibet3@126.com    ཁ་པར། 0971-8455441

©2006-2013 China Tibetannet Corporation པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག