ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། དབྱི་ལིང་གི་ཉིང་རྡུལ་ནུས་པའི་གནད་དོན་གྱི་རྒྱལ་ཁབ་དྲུག་དང་དབྱི་ལིང་གི་ཕྱི་འབྲེལ་བློན་ཆེན་གྱིས་ཚེས་ཉེར་བཞིའི་ཉིན་ཐུན་མོང་གསལ་སྒྲོག་སྤེལ་ཏེ། དབྱི་ལིང་གི་ཉིང་རྡུལ་ནུས་པའི་གནད་དོན་གྱི་གྲོས་མོལ་ཡུན་ཚད་ཉིས་སྟོང་བཅོ་ལྔ་ལོའི་ཟླ་དྲུག་པའི་ཚེས་སུམ་ཅུའི་ཉིན་བར་ཇེ་རིང་དུ་གཏོང་རྒྱུ་ཐག་བཅད།
དབྱི་ལིང་གི་ཕྱི་འབྲེལ་བློན་ཆེན་ཀྲ་ལི་ཧྥུའུ་དང་ཡོ་རོབ་གླིང་མནའ་འབྲེལ་དབྱི་ལིང་གི་ཉིང་རྡུལ་ནུས་པའི་གནད་དོན་གྱི་མཐུན་སྦྱོར་བ་ཨ་ཧྲི་ཏོན་གཉིས་ཀྱིས་ཚེས་ཉེར་བཞིའི་ཉིན་གྱི་དགོང་མོར་བསྡུས་པའི་གསར་འགྱུར་སྒྲོག་སྤེལ་ཚོགས་འདུའི་སྟེང་ཐུན་མོང་གསལ་སྒྲོག་སྒྲོག་འདོན་བྱས། གསལ་སྒྲོག་ལས་བཤད་རྒྱུར། ང་ཚོས་མིག་སྔའི་གནས་བབ་རྨང་གཞིར་བྱས་ཤིང་། ཆེས་མང་ན་ཟླ་ངོ་བཞིའི་དུས་ཚོད་ནང་གྲོས་མོལ་ཡོངས་འགྲུབ་བྱེད་རྒྱུ་ཡིན་པ་དང་། དགོས་བ་ཡོད་ན་ཟླ་དྲུག་པའི་ཟླ་མཇུག་བར་གྱི་དུས་ཚོད་བེད་སྤྱད་དེ་ལག་རྩལ་དང་དང་འཆར་ཟིན་བྱ་བ་གང་རུང་ཡོངས་འགྲུབ་བྱེད་རྒྱུ་ཡིན་ཟེར།
གསལ་སྒྲོག་ལས་བཤད་རྒྱུར། རྒྱལ་ཁབ་དྲུག་དང་དབྱི་ལིང་གིས་མུ་མཐུད་དུ་ན་ནིང་ཟླ་བཅུ་གཅིག་པར་རྒྱལ་ཁབ་དྲུག་དང་དབྱི་ལིང་གིས་བཀོད་པའི་ཐུན་མོང་འགུལ་སྐྱོད་འཆར་གཞིའི་ཁྲོད་ཀྱི་དམ་བཅའ་ལག་བསྟར་བྱེད་རྒྱུ་བསྐྱར་སྒྲོག་བྱས་པ་དང་། རྒྱལ་ཁབ་དྲུག་དང་དབྱི་ལིང་གིས་ཟླ་བཅུ་གཉིས་པར་མུ་མཐུད་དུ་སྐོར་ཐེངས་གསར་བའི་གྲོས་མོལ་སྤེལ་རྒྱུ་ཡིན་ཟེར།
གསལ་སྒྲོག་ལས་ད་རུང་བཤད་རྒྱུར། རྒྱལ་ཁབ་དྲུག་དང་དབྱི་ལིང་གིས་འདས་པའི་ཟླ་ངོ་འགའི་ནང་གྲོས་མོལ་སྐོར་ཐེངས་བཅུ་ལྷག་སྤེལ་ཏེ་ཐུན་མོང་གི་ལྟ་ཚུལ་རེ་འགའ་བྱུང་ཡོད་ཀྱང་། དབྱི་ལིང་གི་ཉིང་རྡུལ་ནུས་པའི་གནད་དོན་ཐག་གཅོད་བྱེད་ལག་རྩལ་རང་བཞིན་དང་འདོན་དགོས་པའི་ཐབས་ཇུས་ལ་དམིགས་ཏེ། ཕྱོགས་སོ་སོས་བྱ་བ་སྔར་ལས་མང་བོ་ཡོངས་འགྲུབ་བྱེད་དགོས། ཕྱོགས་སོ་སོས་གྲུབ་འབྲས་ཡོད་པའི་བསམ་ཚུལ་གསར་བར་གཞིགས་ན་ཕྱོགས་ཡོངས་ཀྱི་ཐག་གཅོད་ཇུས་གཞི་ཞིག་འགོད་ཐུབ་པར་སྔར་བཞིན་ཡིད་ཆེས་ཡོད་ཟེར།
ཟླ་འདིའི་ཚེས་བརྒྱད་ཉིན་ནས་ཚེས་ཉེར་བཞིའི་ཉིན་བར། དབྱི་ལིང་གི་ཉིང་རྡུལ་ནུས་པའི་གནད་དོན་གྱི་རྒྱལ་ཁབ་དྲུག་དང་དབྱི་ལིང་གིས་ཚེས་ཉེར་བཞིའི་ཉིན་ཆེས་མཇུག་མཐའི་དུས་བཅད་ཡིན་པའི་གྲོས་མོལ་ཐེངས་ཤིག་སྤེལ་བ་རེད། རྒྱལ་ཁབ་དྲུག་གི་ཕྱི་འབྲེལ་བློན་ཆེན་གྱིས་གྲོས་མོལ་སྤེལ་བ་དང་དེའི་རྗེས་སུ་ཀྲ་ལི་ཧྥུའུ་དང་གྲོས་མོལ་བྱས་པ་རེད། །
རྩོམ་སྒྲིག་པ། མཁའ་མཚོ།
རྩོམ་སྒྲིག་འགན་འཁུར་བ། དབྱང་བྷ།
