མདུན་ཤོག- གསར་འགྱུར།- རྒྱལ་སྤྱིའི་ཐོས་གནད།

ཧཱ་སག་སི་ཐན་གྱིས་ཕཱ་ལེ་སི་ཐན་དང་དབྱི་སི་རལ་གྱི་ཞི་བའི་གྲོས་མོལ་སླར་གསོ་བྱེད་དགོས་པའི་འབོད་སྐུལ་བཏང་།

རྩོམ་པ་པོ། བསོད་ནམས་ཚེ་རིང་།  ཡོང་ཁུངས། མཚོ་སྔོན་བོད་སྐད་རླུང་འཕྲིན།  2014-07-25 11:27

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཧཱ་སག་སི་ཐན་གྱི་ཕྱི་འབྲེལ་པུའུ་ཡིས་ཚེས་ཉེར་བཞིའི་ཉིན་གསལ་སྒྲོག་སྤེལ་ཏེ། དབྱི་སི་རལ་དང་ཕཱ་ལེ་སི་ཐན་གྱིས་ཞི་བའི་གྲོས་མོལ་སླར་གསོ་བྱེད་དགོས་པའི་འབོད་སྐུལ་བཏང་།

གསལ་སྒྲོག་ལས་བཤད་རྒྱུར། ང་ཚོས་དབྱི་སི་རལ་དང་ཕཱ་ལེ་སི་ཐན་ཕྱོགས་གཉིས་ཀྱིས་མྱུར་དུ་ཕན་ནུས་ལྡན་པའི་བྱེད་ཐབས་སྤྱད་དེ་ཁྲག་བཞུར་འཁྲུག་རྩོད་མཚམས་བཞག་ནས་ཞི་བའི་གྲོས་མོལ་སླར་གསོ་བྱེད་དགོས་པའི་འབོད་སྐུལ་བཏང་བ་ཡིན་ཟེར།

གསལ་སྒྲོག་ལས་ཅཱ་ཧྲ་ས་ཁུལ་གྱི་གནས་བབ་ཇེ་སྡུག་ཏུ་སོང་བ་དང་མི་སེར་དཀྱུས་མ་མང་བོར་ཤི་རྨས་ཐེབས་པར་སེམས་ཁུར་ཆེན་པོ་བྱེད་པའི་ཚུལ་བསྟན། གསལ་སྒྲོག་ལས་བཤད་རྒྱུར། འཁྲུག་རྩོད་སྔར་ལས་ཛ་དྲག་ཏུ་སོང་བ་ལས་དབུས་ཤར་ས་ཁུལ་ཡོངས་ཀྱི་བརྟན་འཇགས་ལ་ཤུགས་རྐྱེན་ཐེབས་ཡོད་པ་དང་། རྒྱལ་སྤྱིའི་སྤྱི་ཚོགས་དང་འབྲེལ་ཡོད་ཕྱོགས་སོ་སོས་ས་ཁུལ་གྱི་ཞི་བདེ་ཐད་འབད་བརྩོན་བྱས་པར་ཡང་གཏོར་བརླག་ཐེབས་པ་རེད་ཟེར།

ཅཱ་ཧྲ་ས་ཁུལ་གྱི་ཕཱ་ལེ་སི་ཐན་འཕྲོད་བསྟེན་སྡེ་ཁག་གིས་ཚེས་ཉེར་བཞིའི་ཉིན་བདེན་དཔང་བྱས་དོན། དབྱི་སི་རལ་གྱིས་རྣོ་དབལ་སྲུང་བའི་འགུལ་སྐྱོད་སྤེལ་བའི་ཚུན་ལ། ཕཱ་ལེ་སི་ཐན་གྱི་མི་བདུན་བརྒྱ་དང་བཅོ་བརྒྱད་རྐྱེན་ལམ་དུ་ཤོར་བ་དང་། མི་སྟོང་བཞི་དང་ལྔ་བརྒྱ་ལྷག་ལ་རྨས་ཕོག ཤི་རྨས་ཐེབས་པའི་མི་མང་ཤོས་མི་སེར་དཀྱུས་མ་རེད། དབྱི་སི་རལ་ཕྱོགས་ཀྱིས་བསྒྲགས་པའི་གནས་ཚུལ་ལྟར་ན། འཁྲུག་རྩོད་དེ་ལས་དབྱི་སི་རལ་གྱི་དམག་མི་སོ་གཉིས་དང་དབྱི་སི་རལ་གྱི་མི་སེར་དཀྱུས་མ་གསུམ་རྐྱེན་ལམ་དུ་ཤོར་ཡོད་ཟེར།  །

པར་དབང་གསལ་བསྒྲགས།      ངེད་ཀྱི་སྐོར།      འབྲེལ་གཏུགས་བྱེད་ཚུལ།

གློག་འཕྲིན་ཡིག་སྒམ། tibet3@126.com    ཁ་པར། 0971-8455441

©2006-2013 China Tibetannet Corporation པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག