ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ལྷོ་ཁོ་རེ་ཡའི་མཉམ་འབྲེལ་གསར་འགྱུར་ཁང་གིས་སྤྱི་ཚེས9ཉིན་ལྷོ་ཁོ་རེ་ཡའི་དམག་ཕྱོགས་ཀྱི་དཔོན་རིགས་ཤིག་གི་སྐད་ཆ་ལུང་དུ་དྲངས་ནས། ལྷོ་ཁོ་རེ་ཡ་དང་ཨ་རི། ལྗར་པན་བཅས་རྒྱལ་ཁབ་གསུམ་པོས་སྤྱི་ཚེས21ཉིན་ལྷོ་ཁོ་རེ་ཡའི་ཅི་ཀྲའུ་གླིང་ཕྲན་ལྷོ་རྒྱུད་མཚོ་ཁོངས་སུ་དུས་ཡུན་ཉིན་གཉིས་རིང་གི་མཉམ་འབྲེལ་མཚོ་ཐོག་འཚོལ་སྐྱོབ་ནང་སྦྱོང་བྱ་རྒྱུ་རེད་ཅེས་བསྟན་ཡོད་པ་རེད།
ད་ཐེངས་ཀྱི་ནང་སྦྱོང་ནི་ལྗར་པན་གྱི་ཨན་ཕེ་སྲིད་གཞུང་ནས་འདི་ཟླའི་ཚེས1ཉིན་རྩ་ཁྲིམས་ཀྱི་འགྲེལ་བཤད་བཟོ་བཅོས་དང་། མཉམ་སྡེབ་རང་སྲུང་དབང་ཆའི་བཀག་རྒྱ་མེད་པ་བཟོ་རྒྱུའི་ནང་བློན་ཁང་གི་གྲོས་ཆོད་ལ་གྲོས་འཆམ་བྱུང་རྗེས་ལྷོ་ཁོ་རེ་དང་ཨ་རི། ལྗར་པན་བཅས་ཀྱིས་མཉམ་འབྲེལ་ནང་སྦྱོང་བྱེད་ཐེངས་དང་པོ་ཡིན་པས་ལས་རིགས་ཁག་ནས་དོ་ཁུར་ཆེན་པོ་བྱེད་ཀྱི་ཡོད།
ལྷོ་ཁོ་རེ་ཡའི་དམག་དཔུང་མཉམ་འབྲེལ་དྲག་ཇུས་པུའི་དཔོན་རིགས་ཤིག་གིས་དེ་ནི་ལྷོ་ཁོ་རེ་ཡ་དང་ཨ་རི། ལྗར་པན་བཅས་ཀྱིས་ལོ་ལྟར་བྱེད་པའི་འཆར་ཅན་གྱི་མཉམ་འབྲེལ་ནང་སྦྱོང་ཞིག་ཡིན་པ་ལས། དམག་དོན་འཐབ་རྩལ་ནང་སྦྱོང་གི་ཁོངས་སུ་གཏོགས་གི་མེད་ཅིང་། ནང་སྦྱོང་གིས་མི་ཆོས་རིང་ལུགས་ཀྱི་རོགས་སྐྱོབ་བྱེད་སྒོ་གཙོ་བོར་འཇོག་རྒྱུ་རེད་ཅེས་བསྟན་ཡོད་པ་རེད། །
