ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། འཛམ་གླིང་འཕྲོད་བསྟེན་རྩ་འཛུགས་ཀྱིས་ཚེས་ཉེར་བརྒྱད་ཉིན་ཁྱབ་བསྒྲགས་བྱས་པའི་གཞི་གྲངས་གསར་པ་ལྟར་ན། འཛམ་གླིང་ཡོངས་སུ་བསྡོམས་པས་པྲོག་གསར་གློ་ཚད་རིམས་ནད་བྱུང་བའི་ནད་པའི་ཁ་གྲངས་དུང་ཕྱུར་ལྔ་དང་བྱེ་བ་བཞི་ས་ཡ་གཉིས་འབུམ་གཅིག་ཁྲི་བརྒྱད་སྟོང་བརྒྱད་བདུན་བརྒྱ་གྱ་དགུ་ལ་སླེབས་ཡོད།
འཛམ་གླིང་འཕྲོད་བསྟེན་རྩ་འཛུགས་ཀྱིས་བསྒྲགས་པའི་གཞི་གྲངས་གསར་པ་ལྟར་ན། ཡོ་རོབ་གླིང་དབུས་ཕྱོགས་ཀྱི་ཚེས་ཉེར་བརྒྱད་ཉིན་གྱི་ཆུ་ཚོད་བཅོ་བརྒྱད་དང་སྐར་མ་སུམ་ཅུའི་སྟེང་། འཛམ་གླིང་ཡོངས་སུ་པྲོག་གསར་གློ་ཚད་རིམས་ནད་བྱུང་བའི་ནད་པའི་ཁ་གྲངས་སྔ་ཉིན་ལས་འབུམ་གསུམ་དང་ཁྲི་བརྒྱད་སྟོང་གཅིག་བརྒྱད་བརྒྱ་བཅོ་བརྒྱད་ཇེ་མང་དུ་སོང་སྟེ་བསྡོམས་པས་དུང་ཕྱུར་ལྔ་དང་བྱེ་བ་བཞི་ས་ཡ་གཉིས་འབུམ་གཅིག་ཁྲི་བརྒྱད་སྟོང་བརྒྱད་བདུན་བརྒྱ་གྱ་དགུ་ལ་སླེབས་ཡོད། རྐྱེན་ལམ་དུ་ཤོར་བའི་ནད་པའི་ཁ་གྲངས་སྔ་ཉིན་ལས་བདུན་བརྒྱ་དང་བཞི་ཇེ་མང་སོང་སྟེ་བསྡོམས་པས་ས་ཡ་དྲུག་དང་འབུམ་གསུམ་ཁྲི་གཉིས་སྟོང་དགུ་ཉིས་བརྒྱ་དོན་ལྔ་ལ་སླེབས་ཡོད། །