ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ནེ་ཀྲི་རི་ཡའི་དབུས་ཕྱོགས་ཀྱི་ནེ་ཀྲེར་མངའ་སྡེ་རུ་ཚེས་བཅུ་དགུ་ཉིན་སྤྱི་སྤྱོད་རླངས་འཁོར་ཞིག་དང་ལྗིད་ཐེག་རླངས་འཁོར་ཞིག་ཐོ་བརྒྱབ་པའི་དོན་རྐྱེན་བྱུང་སྟེ་མི་བཅོ་བརྒྱད་རྐྱེན་ལམ་དུ་ཤོར་བ་དང་། མི་གཅིག་ལ་རྨས་ཕོག
ནེ་ཀྲི་རི་ཡའི་ཉེན་རྟོག་ཕྱོགས་ཀྱི་མགྲིན་ཚབ་པ་ཝ་ཞིག་གིས་ཉིན་དེར་མངའ་སྡེ་དེའི་ལྟེ་གནས་གྲོང་ཁྱེར་མེང་ན་རུ་བསྡུས་པའི་གསར་འགྱུར་སྒྲོག་སྤེལ་ཚོགས་འདུའི་སྟེང་བཤད་རྒྱུར། སྤྱི་སྤྱོད་རླངས་འཁོར་ཞིག་ཚེས་བཅུ་དགུ་ཉིན་གྱི་ཞོགས་པར་མངའ་སྡེ་དེའི་པའོ་སོ་ཁུལ་གྱི་གྲོང་སྡེ་ཞིག་གི་ཉེ་འདབས་ནས་ལམ་འགྲམ་དུ་བཞག་ཡོད་པའི་ལྗིད་ཐེག་རླངས་འཁོར་ཞིག་དང་ཐོ་བརྒྱབ་རྗེས་མེར་འབར་བ་དང་། སྤྱི་སྤྱོད་རླངས་འཁོར་སྟེང་གི་མི་བཅོ་བརྒྱད་རྐྱེན་ལམ་དུ་ཤོར་བ་དང་། མི་གཅིག་ལ་རྨས་ཕོག རྨས་མ་དེ་ས་གནས་སྨན་ཁང་དུ་བསྐྱལ་ནས་སྨན་བཅོས་བྱེད་བཞིན་ཡོད།
ཝ་ཞིའུ་ཡིས་བཤད་རྒྱུར། ཉེན་རྟོག་ཕྱོགས་ཀྱིས་དོན་རྐྱེན་དེའི་འབྱུང་རྐྱེན་ལ་རྟོག་ཞིབ་བྱེད་བཞིན་ཡོད་ཟེར། ཁོས་མང་ཚོགས་དག་གིས་རླངས་འཁོར་སྐོར་སྐབས་འགྲིམ་འགྲུལ་སྒྲིག་ལམ་བརྩི་སྲུང་བྱས་ཏེ་དོན་རྐྱེན་འབྱུང་རྒྱུ་སྔོན་འགོག་བྱ་དགོས་པའི་འབོད་སྐུལ་བཏང་།
ལམ་གྱི་གནས་ཚུལ་མི་བཟང་བ་དང་ལྗིད་ཚད་ལས་བརྒལ་བ། མགྱོགས་ཚད་ལས་བརྒལ་བ་སོགས་ཀྱི་རྒྱུ་རྐྱེན་གྱི་དབང་གིས་ནེ་ཀྲི་རི་ཡ་རུ་འགྲིམ་འགྲུལ་དོན་རྐྱེན་རྒྱུན་དུ་འབྱུང་བཞིན་ཡོད། །