ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཟླ5བའི་ཚེས6ཉིན། “ཀྲུང་གོ་དང་ཨ་ཧྥེ་རི་ཁ་གཉིས་མཉམ་ལས་བྱས་ནས་གནམ་གཤིས་འགྱུར་ལྡོག་ལ་ཁ་གཏད་གཅོག་པ་དང་རྒྱུན་མཐུད་འཕེལ་རྒྱས་ཀྱི་ནུས་པ་ཟམ་མི་ཆད་པར་ཇེ་དྲག་ཏུ་གཏོང་བ”བརྗོད་དོན་གཙོ་བོ་ཡིན་པའི་ཀྲུང་གོ་དང་ཨ་ཧྥེ་རི་ཁའི་དཔལ་འབྱོར་སྤྱི་ཚོགས་ལས་འཛིན་ལྷན་ཚོགས་ཀྱི་གྲལ་སྒོར་ཚོགས་འདུ་བརྙན་ལམ་བརྒྱུད་ནས་འཚོགས།
རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པའམ་ཀྲུང་གོའི་དཔལ་འབྱོར་སྤྱི་ཚོགས་ལས་འཛིན་ལྷན་ཚོགས་ཀྱི་ཀྲུའུ་ཞི་ཀྲང་ཆིང་ལི་ཡིས་བརྗོད་དོན་གཙོ་བོའི་གཏམ་བཤད་སྤེལ་སྐབས། ཀྲུའུ་ཞི་ཞི་ཅིན་ཕིང་གིས་ཀྲུང་གོ་དང་ཨ་ཧྥེ་རི་ཁ་བར་གྱི་འབྲེལ་བ་འཕེལ་རྒྱས་སུ་གཏོང་བར་ཚད་མཐོའི་མཐོང་ཆེན་གནང་ཞིང་། གཙོ་བདག་དག་གིས་ཕྱི་འབྲེལ་ལ་བརྟེན་ནས་ཀྲུང་གོ་དང་ཨ་ཧྥེ་རི་ཁ་བར་གྱི་འབྲེལ་བ་བརྟན་བརླིང་ངང་ཡུན་རིང་གནས་བར་སྣེ་ཁྲིད་བྱས་ཡོད། ཀྲུང་གོ་དང་ཨ་ཧྥེ་རི་ཁའི་མཛའ་གྲོགས་མཉམ་ལས་ཀྱི་སྙིང་སྟོབས་དར་སྤེལ་གཏོང་ཤུགས་ཆེ་རུ་གཏོང་བ་དང་། དབུལ་འཕྲི་དང་དབུལ་སྒྲོལ་གྱི་ཉམས་མྱོང་བརྗེ་རེས་ལ་ཤུགས་སྣོན་པ། “རྒྱུད་གཅིག་ལམ་གཅིག”གི་སྤུས་ཚད་མཐོ་བའི་འཕེལ་རྒྱས་མཉམ་སྐྲུན་ལ་སྐུལ་འདེད་གཏོང་བ། 《ཀྲུང་གོ་དང་ཨ་ཧྥེ་རི་ཁ་གཉིས་ཀྱིས་གནམ་གཤིས་འགྱུར་ལྡོག་ལ་ཁ་གཏད་གཅོག་པའི་བསྒྲགས་གཏམ》དོན་འཁྱོལ་བྱེད་པ། མུ་མཐུད་དུ་ལྗང་མདོག་གི་དར་གོས་ཚོང་ལམ་གཏིང་ཟབ་ཏུ་གཏོད་པ། ཀྲུང་གོ་དང་ཨ་ཧྥེ་རི་ཁའི་མཉམ་ལས་ཀྱི་ཚད་གཞི་མཐོ་བ་དང་རྒྱུན་མཐུད་བྱ་ཆོག་པ། དམངས་འཚོར་ཕན་འདོགས་པ་བཅས་ཀྱིས་སྔར་ལས་ལྷག་པར་མགྱོགས་མྱུར་སྒོས་ཀྲུང་གོ་དང་ཨ་ཧྥེ་རི་ཁའི་ལས་དབང་གཅིག་མཐུན་ཚོགས་པ་བསྐྲུན་ཆེད་ལེགས་སྐྱེས་གསར་པ་འབུལ་དགོས་ཞེས་གསུངས་པ་རེད།
ཨ་ཧྥེ་རི་ཁའི་དཔལ་འབྱོར་དང་སྤྱི་ཚོགས་ལས་འཛིན་ལྷན་ཚོགས་ཀྱི་མནའ་འབྲེལ་ཀྲུའུ་ཞིའམ་མོ་རོ་ཁོ་དཔལ་འབྱོར་དང་སྤྱི་ཚོགས་ཁོར་ཡུག་བཅས་ཀྱི་ལས་འཛིན་ལྷན་ཚོགས་ཀྱི་ཀྲུའུ་ཞི་ཧྲ་མི་ཡིས། ཨ་ཧྥེ་རི་ཁ་ཕྱོགས་ཀྱིས་ཀྲུང་གོ་དང་ཨ་ཧྥེ་རི་ཁའི་མཉམ་ལས་ལ་ཚད་མཐོའི་མཐོང་ཆེན་བྱེད་ཀྱིན་ཡོད་ལ། ཀྲུང་གོ་ཕྱོགས་དང་མཉམ་དུ་གནམ་གཤིས་འགྱུར་ལྡོག་ལས་བྱུང་བའི་འགྲན་སློང་ལ་ཁ་གཏད་གཅོག་རྒྱུ་དང་། ལྗང་མདོག་ཐཱན་ཉུང་གི་བསྒྱུར་སྤོ་ལ་སྐུལ་འདེད་བཏང་ནས་ཕྱོགས་གཉིས་ཀྱི་མི་དམངས་ལ་བདེ་སྐྱིད་བསྐྲུན་འདོད་ཡོད་ཅེས་བསྟན། །