ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཀྲུང་གོའི་མཉམ་འབྲེལ་རྒྱལ་ཚོགས་སུ་རྒྱུན་དུ་སྡོད་པའི་འཐུས་ཚབ་ཚོགས་པའི་མགྲིན་ཚབ་པས་ཚེས་བཞི་ཉིན། བདེ་འཇགས་ལས་འཛིན་ལྷན་ཚོགས་ཀྱི་གཅིག་བདུན་གཅིག་བརྒྱད་ཨུ་ཡོན་ལྷན་ཁང་གི་ཆེད་དོན་བྱ་བའི་ཚན་ཆུང་གིས་སྙན་ཞུའི་གསང་བ་ཡང་བསྐྱར་ཕྱིར་ཤོར་དུ་བཅུག་པའི་ཐད་ལ་ཡིད་མི་ཚིམ་པ་དང་དོ་ཁུར་བྱེད་པའི་ཚུལ་བསྟན།
མགྲིན་ཚབ་པས་བསྟན་དོན། ཀྲུང་གོ་ཕྱོགས་ཀྱིས་གཅིག་བདུན་གཅིག་བརྒྱད་ཨུ་ཡོན་ལྷན་ཁང་གི་ཆེད་དོན་བྱ་བའི་ཚན་ཆུང་གིས་འཆར་འགོད་བྱས་པའི་ཉིས་སྟོང་ཉི་ཤུའི་དུས་སྐབས་བར་མའི་སྙན་ཞུའི་གསང་བ་སྨྱན་བྱད་ལ་ཤོར་བ་དང་། སྨྱན་བྱད་མི་ཉུང་བ་ཞིག་གིས་དོན་དངོས་དང་མི་མཐུན་པའི་འུད་སྒྲོག་བྱས་པའི་ཐད་ལ་ཡིད་མི་ཚིམ་པ་དང་དེར་དོ་ཁུར་བྱེད་བཞིན་ཡོད། དེའི་སྔོན། ཆེད་དོན་བྱ་བའི་ཚན་ཆུང་དེར་ཐེངས་མང་པོར་སྙན་ཞུའི་གསང་བ་ཕྱིར་ཤོར་བའི་གནད་དོན་བྱུང་མྱོང་བ་དང་། ཀྲུང་གོ་དང་བཅས་པའི་རྒྱལ་ཁབ་མང་པོས་དེར་དོ་ཁུར་བྱེད་བཞིན་ཡོད། ཀྲུང་གོས་མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཁྲུའུ་ཡིས་གནད་དོན་དེར་ལྟ་སྟངས་ནན་མོབཟུང་ནས། རིགས་དེ་མཚུངས་ཀྱི་གནད་དོན་ཡང་བསྐྱར་འབྱུང་བར་སྔོན་འགོག་བྱེད་དགོས་པའི་བླང་བྱ་བཏོན་པ་ཡིན།
མགྲིན་ཚབ་པས་བཤད་རྒྱུར། ཀྲུང་གོ་ཕྱོགས་ཀྱིས་ཐོག་མཐའ་བར་གསུམ་དུ་བདེ་འཇགས་ལས་འཛིན་ཀྱི་ཁྲའོ་ཞན་དང་འབྲེལ་བའི་ཇུས་ཆོད་ཁྱོན་ཡོངས་དང་གཟབ་ནན་སྒོས་ལག་བསྟར་བྱེད་བཞིན་ཡོད་པ་དང་། རང་སྟེང་གི་རྒྱལ་སྤྱིའི་ལས་འགན་ལག་བསྟར་ནན་མོ་བྱས་ཏེ། གྱོང་གུད་ཆེན་པོ་ཁུར་མྱོང་བ་དང་། བློས་གཏོང་མང་པོ་བྱས་མྱོང་། ཀྲུང་གོ་ཕྱོགས་ཀྱིས་མུ་མཐུད་དུ་ཕྱེད་གླིང་གྲོས་མོལ་གྱི་ཞི་བའི་རྣམ་པ་མངོན་འགྱུར་བྱེད་པར་ཤུགས་སྣོན་པ་དང་། ཕྱེད་གླིང་གནད་དོན་ཆབ་སྲིད་ལྟར་ཐག་གཅོད་པའི་འཕེལ་རིམ་ལ་སྐུལ་འདེད་བཏང་སྟེ་ཕྱེད་གླིང་དུ་ཉིང་རྡུལ་མེད་པ་དང་ས་ཁུལ་གྱི་ཡུན་སྐྱོང་བདེ་འགོད་ཐད་ལ་འཛུགས་སྐྲུན་རང་བཞིན་གྱི་བྱེད་ནུས་འདོན་སྤེལ་བྱེད་འདོད་ཡོད་ཟེར། །