ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཀྲུང་གོའི་མཉམ་འབྲེལ་རྒྱལ་ཚོགས་སུ་རྒྱུན་དུ་སྡོད་པའི་འཐུས་ཚབ་ཚོགས་པའི་གནས་སྐབས་ལས་ཚབ་པ་ཏའེ་པིང་གིས་ཚེས་བཅུ་དྲུག་ཉིན་བདེ་འཇགས་ལས་འཛིན་ལྷན་ཚོགས་ཀྱི་དྲག་ཆས་འཁྲུག་རྩོད་ཁྲོད་སྤྱི་དམངས་ལ་སྲུང་སྐྱོབ་དང་མི་ཆོས་བར་སྟོང་ལ་སྲུང་སྐྱོང་བྱེད་དགོས་ཞེས་པའི་ཡོངས་བསྒྲགས་གྲོས་ཚོགས་སྟེང་གཏམ་བཤད་སྤེལ་ཏེ་བསྟན་དོན། མི་ཆོས་རོགས་སྐྱོར་གྱིས་དྲང་གཞག་དང་བར་གནས། ཕྱི་རོལ་དང་མཐུན་པ་དང་སྒེར་ཚུགས་ཀྱི་རྩ་དོན་བརྩི་སྲུང་བྱེད་དགོས་པ་དང་། མི་ཆོས་རིང་ལུགས་ཀྱི་ངོ་བོ་སྲུང་འཛིན་བྱེད་དགོས་པ་ལས། ས་མཚམས་འགྲན་རྩོད་དང་ཆབ་སྲིད་སྟེང་མགོ་སྐོར་གཏོང་བའི་ལག་ཆ་རུ་གཏན་ནས་འགྱུར་མི་རུང་ཟེར།
ཏའེ་པིང་གིས་བསྟན་དོན། མིག་སྔར། པྲོག་གསར་གློ་ཚད་རིམས་ནད་ཀྱིས་སྔར་བཞིན་འཛམ་གླིང་ཡོངས་ལ་ཤུགས་རྐྱེན་ཐེབས་བཞིན་ཡོད་པ་དང་། འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཁ་ཤས་ཀྱི་འབྲུ་རིགས་བདེ་འཇགས་གནས་ཚུལ་ཇེ་སྡུག་ཏུ་འགྱུར་བཞིན་ཡོད་ལ། ལྷག་པར་དུ་འཁྲུག་རྩོད་ས་ཁུལ་དང་རྒྱལ་ཁབ་ཀྱི་དཔལ་འབྱོར་སྤྱི་ཚོགས་འཕེལ་རྒྱས་དེ་དཀའ་གནད་གསར་པ་དང་འཕྲད་དེ་མི་ཆོས་རིང་ལུགས་ཀྱི་དགོས་མཁོ་སྔར་ལས་ཇེ་དྲག་ཏུ་གྱུར་ཡོད། དེ་དང་མཉམ་དུ། མི་ཆོས་གནད་དོན་ཆབ་སྲིད་ཅན་དུ་འགྱུར་ཚད་ཇེ་དྲག་ཏུ་འགྲོ་བ་དང་། ཕྱོགས་རྐྱང་བའི་བཀག་སྡོམ་གྱིས་མི་ཆོས་གནས་བབ་ལ་ཐེབས་པའི་ཤུགས་རྐྱེན་ངན་པ་རྒྱུན་མཐུད་ཇེ་མང་དུ་འགྲོ་བ་སོགས་ཀྱི་རྒྱུ་རྐྱེན་དག་གིས་འཛམ་གླིང་ཡོངས་ཀྱི་མི་ཆོས་གནས་བབ་ཇེ་སྡུག་ཏུ་བཏང་བ་དང་། མི་ཆོས་འགུལ་སྐྱོད་ཀྱི་ཕན་ནུས་ལ་ཤུགས་རྐྱེན་ཆེན་པོ་ཐེབས་བཞིན་ཡོད། དེ་བས། རྒྱལ་སྤྱིའི་སྤྱི་ཚོགས་ཀྱིས་ངེས་པར་དུ་ཕྱོགས་མང་རིང་ལུགས་ངོ་མ་རྒྱུན་འཁྱོངས་དང་ལག་བསྟར་བྱེད་དགོས་པ་དང་། མི་ཆོས་ཐད་ཀྱི་དངུལ་གཏོང་ཇེ་མང་དུ་གཏོང་དགོས་ལ། མཐུན་སྒྲིལ་རོགས་རེས་ལ་ཤུགས་སྣོན་དང་མི་ཆོས་བར་སྟོང་བདེ་འཇགས་སྲུང་སྐྱོབ་བྱེད་དགོས།
ཏའེ་པིང་གིས་ནན་གྱིས་བསྟན་དོན། མི་ཆོས་བར་སྟོང་ལ་སྲུང་སྐྱོབ་བྱེད་དགོས་ན། ངེས་པར་དུ་མི་ཆོས་གནད་དོན་ཆབ་སྲིད་ཅན་དུ་འགྱུར་བར་བཀག་འགོག་བྱེད་དགོས། མི་ཆོས་འགུལ་སྐྱོད་ཀྱིས་མཉམ་འབྲེལ་རྒྱལ་ཚོགས་ཀྱི་སྒྲིག་ཡིག་སོགས་བརྩི་སྲུང་བྱེད་དགོས་པ་དང་། རོགས་སྐྱོར་བྱེད་ཡུལ་རྒྱལ་ཁབ་ཀྱི་བདག་དབང་དང་སྒེར་ཚུགས། མངའ་ཁོངས་ཆ་ཚང་ཡོང་བ་དང་རྒྱལ་ཁབ་གཅིག་གྱུར་ལ་བརྩི་འཇོག་བྱེད་དགོས་ལ། རོགས་སྐྱོར་བྱེད་ཡུལ་རྒྱལ་ཁབ་ཀྱི་ས་གནས་བཅའ་ཁྲིམས་དང་སྤྱི་ཚོགས་སྲོལ་རྒྱུན་བཟང་བོར་བརྩི་འཇོག་བྱས་ནས་རོགས་སྐྱོར་བྱེད་ཡུལ་རྒྱལ་ཁབ་ཀྱི་ནང་སྲིད་ལ་ཐེ་གཏོགས་བྱེད་མི་རུང་། འདི་ལྟར་བྱས་ཚེ་ད་གཟོད་རྩ་བའི་སྟེང་ནས་རོགས་སྐྱོར་བྱེད་ཡུལ་རྒྱལ་ཁབ་ཀྱི་རྒྱབ་སྐྱོར་ཐོབ་ཐུབ་པ་དང་། མི་ཆོས་བར་སྟོང་ལ་སྲུང་སྐྱོབ་སྔར་ལས་བཟང་བོ་བྱེད་ཐུབ། །