ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། མོང་གོལ་རྒྱལ་ཁབ་ཀྱི་གྲོས་ཁང་གིས་ཚེས་ཉི་ཤུ་ཉིན་ཚང་འཛོམས་གྲོས་ཚོགས་བསྡུས་ཏེ། རྒྱལ་ཁབ་དེའི་ཉིས་སྟོང་ཉེར་གཅིག་ལོའི་ཙུང་ཐུང་འདེམ་བསྐོའི་བྱ་འགུལ་དེ་ཟླ་དྲུག་པའི་ཚེས་དགུ་ཉིན་སྤེལ་བར་ཐག་བཅད།
གསར་དུ་བཟོ་བཅོས་བྱས་པའི་མོང་གོལ་རྒྱལ་ཁབ་ཀྱི་རྩ་ཁྲིམས་དང་མོང་གོལ་རྒྱལ་ཁབ་ཀྱི་ཙུང་ཐུང་འདེམ་བསྐོའི་བཅའ་ཁྲིམས་སོགས་འབྲེལ་ཡོད་བཅའ་ཁྲིམས་ལྟར་དུ། མོང་གོལ་རྒྱལ་ཁབ་ཀྱི་གྲོས་ཁང་གིས་ཉིན་དེར་གྲོས་ཚོགས་བསྡུས་ཏེ། ཨུ་ཡོན་མང་ཆེ་བ་ཡིད་འཐད་བྱུང་བའི་འདེམ་ཤོག་མཇུག་འབྲས་ཀྱིས་ཉིས་སྟོང་ཉེར་གཅིག་ལོའི་ཙུང་ཐུང་འདེམ་བསྐོའི་དུས་ཚོད་སོགས་ཆོད་དོན་ལ་གྲོས་མཐུན་བཀོད།
གྲོས་ཁང་གི་ཆོད་དོན་ལྟར་ན། མོང་གོལ་རྒྱལ་ཁབ་ཀྱི་ཉིས་སྟོང་ཉེར་གཅིག་ལོའི་ཙུང་ཐུང་འདེམ་བསྐོའི་བྱ་བ་དེ་ཟླ་དང་པོའི་ཚེས་ཉེར་ལྔ་ཉིན་ནས་དངོས་སུ་མགོ་རྩོམ་རྒྱུ་ཡིན་པ་དང་། འདེམ་ཤོག་འཕེན་པའི་བྱ་འགུལ་དེ་ཟླ་དྲུག་པའི་ཚེས་དགུ་ཉིན་སྤེལ་རྒྱུ་རེད།
གསར་དུ་བཟོ་བཅོས་བྱས་པའི་མོང་གོལ་རྒྱལ་ཁབ་ཀྱི་རྩ་ཁྲིམས་ལས་གཏན་འཁེལ་བྱས་དོན། ཙུང་ཐུང་གི་འགན་ཡུན་ལོ་དྲུག་ཡིན་པ་དང་། བསྟུད་འགན་ཁུར་མི་རུང་ལ་ཡང་བསྐྱར་འདེམ་བསྐོའི་ནང་ཞུགས་མིི་ཆོག ལོ་ལྔ་བཅུའི་ཡན་དང་། མོང་གོལ་རྒྱལ་ཁབ་ནས་བསྟུད་མར་ལོ་ལྔའི་ཡན་ལ་འཚོ་སྡོད་བྱས་པའི་མོང་གོལ་རྒྱལ་ཁབ་ཀྱི་སྤྱི་དམངས་དག་ཙུང་ཐུང་འདེམ་བསྐོར་ཞུགས་པའི་ཐོབ་ཐང་ཡོད་པ་ཡིན།