ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ནེ་ཀྲི་རི་ཡའི་ནུབ་བྱང་ཕྱོགས་ཀྱི་ཁ་ཆི་ན་མངའ་སྡེའི་འགོ་གཙོ་ཨ་མིས་ནུའུ་མཱ་ས་ལིས་ཀྱིས་ཚེས་བཅུ་གསུམ་ཉིན་བཤད་རྒྱུར། མངའ་སྡེ་དེའི་བཅའ་སྡོད་སློབ་འབྲིང་ཞིག་ལ་ཉིན་ཤས་གོང་ཐོབ་ཐང་གསར་པོར་མི་ཤེས་པའི་དྲག་ཆས་པའི་འཇབ་རྒོལ་ཐེབས་ཏེ་མིག་སྔར་སློབ་མ་སུམ་བརྒྱ་དང་སོ་གསུམ་གར་སོང་ཆ་མེད་དུ་གྱུར་ཟེར།
མཱ་ས་ལིས་ཀྱིས་མཚམས་སྦྱོར་བྱས་པ་ལྟར་ན། འཇབ་རྒོལ་དོན་རྐྱེན་དེ་ཚེས་བཅུ་གཅིག་ཉིན་གྱི་དགོང་མོར་བྱུང་བ་དང་། འཇབ་རྒོལ་ཐེབས་པའི་སློབ་གྲྭ་དེར་བསྡོམས་པས་སློབ་མ་བརྒྱད་བརྒྱ་སོ་དགུ་ཡོད་ཟེར། འཇབ་རྒོལ་དོན་རྐྱེན་བྱུང་རྗེས། བྲོས་བྱོལ་བྱས་པའི་སློབ་མ་ཁ་ཤས་ཕྱིར་སློབ་གྲྭའི་ནང་དུ་ལོག མིག་སྔར་གར་སོང་མི་ཤེས་པའི་སློབ་མའི་ཁྲོད་ཀྱི་སློབ་མ་ཁ་ཤས་དྲག་ཆས་པས་འཛིན་བཟུང་བྱས་ཡོད་པ་དང་། སློབ་མ་ཁ་ཤས་བྲོས་བྱོལ་བྱས་རྗེས་གར་སོང་ཆ་མེད་དུ་གྱུར་བ་རེད་ཟེར།
མཱ་ས་ལིས་ཀྱིས་བཤད་རྒྱུར། བདེ་འཇགས་མི་སྣས་གར་སོང་མི་ཤེས་པའི་སློབ་མ་འཚོལ་ཞིབ་དང་ཡང་ན་བྱེད་ཐབས་སྣ་མང་སྤྱད་དེ་སློབ་མའི་ཁྱིམ་བདག་དང་འབྲེལ་གཏུག་བྱེད་བཞིན་ཡོད་པ་དང་། འཛིན་བཟུང་བྱས་པའི་སློབ་མའི་ཁ་གྲངས་ཞིབ་བསྡུར་བྱེད་བཞིན་པའི་སྒང་ཡིན་ཟེར།
མིག་སྔའི་བར། རྩ་འཛུགས་གང་གིས་ཀྱང་ཐེངས་འདིའི་འཇབ་རྒོལ་དོན་རྐྱེན་བཟོས་པ་ཁྱབ་བསྒྲགས་བྱས་མེད། མངའ་སྡེ་དེའི་སློབ་གྲྭ་ཡོད་ཚད་ཀྱི་སྒོ་བརྒྱབ་ཡོད་པ་དང་། ཉེན་རྟོག་ཕྱོགས་ཀྱིས་དྲག་ཆས་ཉེས་ཅན་དག་ལ་རྗེས་འདེད་འཛིན་བཟུང་བྱེད་བཞིན་ཡོད།
ནེ་ཀྲི་རི་ཡའི་ཙུང་ཐུང་པུའུ་ཧ་ལིས་ཀྱིས་ཚེས་བཅུ་གཉིས་ཉིན་གསལ་བསྒྲགས་སྤེལ་ནས། ཐེངས་འདིའི་འཇབ་རྒོལ་དོན་རྐྱེན་ལ་རྒོལ་གཏམ་བཏང་བར་མ་ཟད། ནེ་ཀྲི་རི་ཡའི་བདེ་འཇགས་སྡེ་ཁག་གིས་སྟོབས་ཤུགས་ཡོད་རྒུ་བཏོན་ནས་འཇབ་རྒོལ་བ་འཛིན་བཟུང་བྱེད་དགོས་པ་དང་། སློབ་མའི་བདེ་འཇགས་ལ་འགན་སྲུང་བྱེད་དགོས་པའི་བཀའ་ཕབ།