ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཨུ་རུ་སིའི་འཐབ་འཛིང་གནམ་གྲུ་ཡིས་ཚེས་བཞི་ཉིན་པཱ་ལོན་ཀྲི་མཚོ་ཁོངས་ཀྱི་བར་སྣང་ནས་ནོར་ཝེའི་མྱུལ་ཞིབ་གནམ་གྲུ་ཞིག་བཀག་འགོག་བྱས།
ཐཱ་སི་གསར་འགྱུར་ཁང་གིས་བསྒྲགས་པ་ལྟར་ན། ཨུ་རུ་སིའི་དམག་དཔུང་གིས་ཉིན་དེར་པཱ་ལོན་ཀྲི་མཚོ་ཁོངས་ཀྱི་བར་སྣང་ནས་གནམ་གྲུ་ཞིག་ཨུ་རུ་སིའི་རྒྱལ་མཚམས་ཀྱི་ཉེ་སར་བགྲོད་བཞིན་པ་ཤེས། ཨུ་རུ་སིའི་བྱང་ཕྱོགས་གྲུ་གཟིངས་རུ་ཁག་གིས་མྱུར་དུ་མུས་ཀི-31རྟགས་ཅན་གྱི་འཐབ་འཛིང་གནམ་གྲུ་ཞིག་མངག་ནས་དམིགས་འབེན་དེའི་ཉེ་སར་བཅར། བདེ་འཇགས་བར་ཐག་ནས་ངོས་འཛིན་དང་བཀག་འགོག་བྱས། གནམ་གྲུ་དེ་ནི་ནོར་ཝེའི་མཁའ་དམག་གི་ཁོངས་སུ་གཏོགས་པའི་གླག་རྒོད-20རྟགས་ཅན་གྱི་མྱུལ་ཞིབ་གནམ་གྲུ་ཞིག་ཡིན་པ་རེད་ཟེར།
བསྒྲགས་པ་ལྟར་ན། ཨུ་རུ་སིའི་འཐབ་འཛིང་གནམ་གྲུས་འཕུར་བསྐྱོད་བྱེད་སྐབས་ཐོག་མཐའ་བར་གསུམ་དུ་རྒྱལ་སྤྱིའི་མཁའ་ཁོངས་ཀྱི་བེད་སྤྱོད་སྒྲིག་སྲོལ་བརྩི་སྲུང་བྱེད་བཞིན་ཡོད་ཟེར། །