ཀྲུང་གོ་བོད་ཀྱི་དྲ་བ།

ཀྲུང་གོ་མ་གཏོགས་པའི་འཛམ་གླིང་ཡོངས་ཀྱི་རྒྱལ་ཁབ་སོ་སོའི་པྲོག་དབྱིབས་ནད་དུག་གསར་བའི་གློ་ཚད་ཀྱི་རིམས་ནད་འགོས་པའི་ནད་པ་འབུམ་གསུམ་དང་ཁྲི་བརྒྱད་བདུན་བརྒྱ་ཉེར་གསུམ་དུ་བསླེབས།

ཡོང་ཁུངས། : མཚོ་སྔོན་བོད་སྐད་རླུང་འཕྲིན།     སྤེལ་དུས། : 2020-03-27
ཡིག་གཟུགས། :ཆུང་། འབྲིང་། ཆེ།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།  འཛམ་གླིང་འཕྲོད་བསྟེན་རྩ་འཛུགས་ཀྱིས་ཚེས་ཉེར་དྲུག་ཉིན་ཁྱབ་སྒྲོག་བྱས་པའི་གཞི་གྲངས་གསར་བ་ལྟར་ན། ཀྲུང་གོ་མ་གཏོགས་པའི་འཛམ་གླིང་ཡོངས་ཀྱི་རྒྱལ་ཁབ་སོ་སོར་པྲོག་དབྱིབས་ནད་དུག་གསར་བའི་གློ་ཚད་འགོས་པའི་ནད་པའི་ཁ་གྲངས་འབུམ་གསུམ་དང་ཁྲི་བརྒྱད་བདུན་བརྒྱ་ཉེར་གསུམ་དུ་བསླེབ་ཡོད་ཟེར། 

འཛམ་གླིང་འཕྲོད་བསྟེན་རྩ་འཛུགས་ཀྱིས་ཉིན་རེའི་རིམས་ནད་ཀྱི་གནས་ཚུལ་སྙན་ཞུ་བྱས་པ་ལྟར་ན། ཡོ་རོབ་གླིང་དབུས་ཕྱོགས་ཀྱི་དུས་ཚོད་ཚེས་ཉེར་དྲུག་ཉིན་གྱི་སྔ་དྲོའི་དུས་ཚོད་བཅུའི་བར། ཀྲུང་གོ་མ་གཏོགས་པའི་འཛམ་གླིང་ཡོངས་ཀྱི་རྒྱལ་ཁབ་སོ་སོའི་ཉིན་གཅིག་ལ་འཕར་སྣོན་བྱུང་བའི་པྲོག་དབྱིབས་ནད་དུག་གསར་བའི་གློ་ཚད་འགོས་པའི་ནད་པའི་ཁ་གྲངས་ཁྲི་བཞི་དང་སྟོང་དགུ་བརྒྱ་དང་དྲུག་ཡིན་པ་དང་། བསྡོམས་པས་འབུམ་གསུམ་དང་ཁྲི་བརྒྱད་བདུན་བརྒྱ་ཉེར་གསུམ་དུ་བསླེབ་ཡོད། ཀྲུང་གོ་མ་གཏོགས་པའི་རྒྱལ་ཁབ་གཞན་པའི་རྐྱེན་ལམ་དུ་ཤོར་བའི་ནད་པའི་ཁ་གྲངས་སྔ་ཉིན་ལས་སྟོང་གཉིས་དང་སུམ་བརྒྱ་གོ་ལྔ་ཇེ་མང་དུ་སོང་ཡོད་ལ། བསྡོམས་པས་ཁྲི་གཅིག་དང་སྟོང་བདུན་ལྔ་བརྒྱ་ཞེ་གཅིག་ཏུ་བསླེབ་ཡོད་ཟེར། 

འཛམ་གླིང་ཡོངས་ཀྱི་ཁྱབ་ཁོངས་སུ་པྲོག་དབྱིབས་ནད་དུག་གསར་བའི་གློ་ཚད་འགོས་པའི་ནད་པའི་ཁ་གྲངས་སྔ་ཉིན་ལས་ཁྲི་བཞི་དང་སྟོང་དགུ་ཉིས་བརྒྱ་བཅུ་དགུ་འཕར་ཡོད་ལ། བསྡོམས་པས་འབུམ་བཞི་དང་ཁྲི་དྲུག་སྟོང་གཉིས་དྲུག་བརྒྱ་ཞེ་བརྒྱད་དུ་བསླེབ་ཡོད། རྐྱེན་ལམ་དུ་ཤོར་བའི་ནད་པའི་ཁ་གྲངས་སྔ་ཉིན་ལས་སྟོང་གཉིས་དང་བཞི་བརྒྱ་གཅིག་འཕར་ནས། བསྡོམས་པས་ཁྲི་གཉིས་དང་བརྒྱད་བརྒྱ་སོ་བཞིར་བསླེབ་ཡོད་ཟེར།

འདས་པའི་དུས་ཚོད་ཉེར་བཞིའི་རིང་ལ། རྒྱལ་ཁབ་གསུམ་གྱིས་པྲོག་དབྱིབས་ནད་དུག་གསར་བའི་གློ་ཚད་འགོས་པའི་ནད་པ་ཐོག་མ་བྱུང་བ་སྙན་ཞུ་བྱས་ཡོད། དེ་དག་ནི་སོ་སོར་ཧྲིན་ཅི་ཚི་དང་ནེ་ཝེ་སི་རྒྱལ་ཕྲན་མཉམ་འབྲེལ་དང་། ཀེའུ་ནེ་ཡཱ་པུ་སོ། མཱ་ལི་བཅས་རེད། །

རྩོམ་སྒྲིག་པ། : ཚེ་མཁར་རྒྱལ།