ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། འཛམ་གླིང་འཕྲོད་བསྟེན་རྩ་འཛུགས་ཀྱིས་ཚེས་ཉེར་གཉིས་ཉིན་ཁྱབ་སྒྲོག་བྱས་པའི་གཞི་གྲངས་གསར་བ་ལྟར་ན། ཀྲུང་གོ་མ་གཏོགས་པའི་འཛམ་གླིང་ཡོངས་ཀྱི་རྒྱལ་ཁབ་སོ་སོར་ཏོག་དབྱིབས་ནད་དུག་གསར་བའི་གློ་ཚད་འགོས་པའི་ནད་པའི་ཁ་གྲངས་འབུམ་གཉིས་དང་ཁྲི་གཅིག་དྲུག་བརྒྱ་ཞེ་བཞིར་བསླེབ་ཡོད་ཟེར།
འཛམ་གླིང་འཕྲོད་བསྟེན་རྩ་འཛུགས་ཀྱིས་ཉིན་རེའི་རིམས་ནད་ཀྱི་གནས་ཚུལ་སྙན་ཞུ་བྱས་པ་ལྟར་ན། ཡོ་རོབ་གླིང་དབུས་ཕྱོགས་ཀྱི་དུས་ཚོད་ཚེས་ཉེར་གཉིས་ཉིན་གྱི་དགོང་མོའི་དུས་ཚོད་བཅུ་གཅིག་དང་སྐར་མ་ང་དགུའི་བར། ཀྲུང་གོ་མ་གཏོགས་པའི་འཛམ་གླིང་ཡོངས་ཀྱི་རྒྱལ་ཁབ་སོ་སོའི་ཉིན་གཅིག་ལ་འཕར་སྣོན་བྱུང་བའི་ཏོག་དབྱིབས་ནད་དུག་གསར་བའི་གློ་ཚད་འགོས་པའི་ནད་པའི་ཁ་གྲངས་ཁྲི་གཉིས་དང་སྟོང་ལྔ་དགུ་བརྒྱ་གྱ་བདུན་ཡིན་པ་དང་། བསྡོམས་པས་འབུམ་གཉིས་དང་ཁྲི་གཅིག་དྲུག་བརྒྱ་ཞེ་བཞིར་བསླེབ་ཡོད། ཀྲུང་གོ་མ་གཏོགས་པའི་རྒྱལ་ཁབ་གཞན་པའི་རྐྱེན་ལམ་དུ་ཤོར་བའི་ནད་པའི་ཁ་གྲངས་སྔ་ཉིན་ལས་སྟོང་གཅིག་དང་ལྔ་བརྒྱ་གོ་བཞི་ཇེ་མང་དུ་སོང་ཡོད་ལ། བསྡོམས་པས་སྟོང་དགུ་དང་ལྔ་བརྒྱ་བཅུ་བདུན་དུ་བསླེབ་ཡོད་ཟེར།
འཛམ་གླིང་ཡོངས་ཀྱི་ཁྱབ་ཁོངས་སུ་ཏོག་དབྱིབས་ནད་དུག་གསར་བའི་གློ་ཚད་འགོས་པའི་ནད་པའི་ཁ་གྲངས་སྔ་ཉིན་ལས་ཁྲི་གཉིས་དང་སྟོང་དྲུག་རེ་དགུ་འཕར་ཡོད་ལ། བསྡོམས་པས་འབུམ་གཉིས་དང་ཁྲི་དགུ་སྟོང་གཉིས་བརྒྱ་ཞེ་གཉིས་ལ་བསླེབ་ཡོད། རྐྱེན་ལམ་དུ་ཤོར་བའི་ནད་པའི་ཁ་གྲངས་སྔ་ཉིན་ལས་སྟོང་གཅིག་དང་དྲུག་བརྒྱ་འཕར་ནས། བསྡོམས་པས་ཁྲི་གཅིག་དང་སྟོང་གཉིས་བདུན་བརྒྱ་གྱ་བཞིར་བསླེབ་ཡོད་ཟེར།
འདས་པའི་དུས་ཚོད་ཉེར་བཞིའི་རིང་ལ། ཨ་ཧྥེ་རི་ཁ་གླིང་གི་རྒྱལ་ཁབ་བཞི་ཡིས་ཏོག་དབྱིབས་ནད་དུག་གསར་བའི་གློ་ཚད་འགོས་པའི་ནད་པ་ཐོག་མར་བྱུང་བ་སྙན་ཞུ་བྱས། སོ་སོ་ནི་མཱ་ཏཱ་ཀ་སི་ཁཱ་དང་ཨན་ཁོ་ལཱ། ཨིག་ལི་ཐི་ལི་ཡཱ། ཝུ་ཀན་ཏཱ་བཅས་རེད། །