ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཨུ་རུ་སིའི་ཕྱི་འབྲེལ་བློན་ཆེན་ལཱ་ཧྥུའུ་ལོ་ཧྥུའུ་ཡིས་ཚེས་ཉེར་ལྔ་ཉིན་བཤད་རྒྱུར། འཐབ་ཇུས་མཚོན་ཆ་ཇེ་ཉུང་དུ་གཏོང་བའི་ཆིངས་ཡིག་གསར་བའི་རྒྱུན་བསྲིངས་ན་འཛམ་གླིང་ཡོངས་ཀྱི་འཐབ་ཇུས་གཏན་འཇགས་ལ་སྲུང་སྐྱོབ་བྱེད་པར་ཕན་ཐོགས་ཡོད་ཟེར།
ལཱ་ཧྥུའུ་ལོ་ཧྥུའུ་ཡིས་བཤད་རྒྱུར། གལ་ཏེ་ཨུ་རུ་སི་དང་ཨ་མེ་རི་ཁས་བཀོད་པའི་འཐབ་ཇུས་མཚོན་ཆ་ཇེ་ཉུང་དུ་གཏོང་བའི་ཆིངས་ཡིག་གསར་བའི་ལག་བསྟར་ཡུན་ཚད་ཇེ་རིང་དུ་གཏོང་ཐུབ་ན། འཛམ་གླིང་ཡོངས་ཀྱི་འཐབ་ཇུས་གཏན་འཇགས་ལ་སྲུང་སྐྱོབ་ཐོབ་སྲིད་པ་དང་། འཕུར་མདའ་དང་ཉིང་རྡུལ་མཚོན་ཆ་སོགས་ཚོད་འཛིན་བྱེད་པའི་ཐད་ནས་ཉམས་ཉེན་འབྱུང་བར་ཡང་སྔོན་འགོག་བྱེད་ཐུབ། ཨུ་རུ་སིའི་ཕྱོགས་ཀྱིས་བལྟས་ན་འཐབ་ཇུས་མཚོན་ཆ་ཇེ་ཉུང་དུ་གཏོང་བའི་ཆིངས་ཡིག་གསར་བའི་ལག་བསྟར་ཡུན་ཚད་ཇེ་རིང་དུ་གཏོང་དགོས་པར་བསམ་ཡོད་ཟེར།
ལཱ་ཧྥུའུ་ལོ་ཧྥུའུ་ཡིས་བསྟན་དོན། ཡིད་འཕང་བ་ཞིག་ལ་ཨ་མེ་རི་ཁས་ད་ལྟའི་བར་ཨུ་རུ་སིའི་འཐབ་ཇུས་མཚོན་ཆ་ཇེ་ཉུང་དུ་གཏོང་བའི་ཆིངས་ཡིག་གསར་བའི་ལག་བསྟར་ཡུན་ཚད་ཇེ་རིང་དུ་གཏོང་བའི་འབྲེལ་ཡོད་གྲོས་གཞིར་ལན་ཅི་ཡང་བྱིན་མེད་པ་དང་། དེར་ཨུ་རུ་སི་ཡིས་སེམས་ཁུར་བྱེད་བཞིན་ཡོད་ལ། ཨུ་རུ་སིའི་ཕྱོགས་ཀྱིས་ཨ་མེ་རི་ཁས་གང་མགྱོགས་སྒོས་དོན་དེའི་ཐད་ནས་རྣམ་འགྱུར་གསལ་བོ་སྟོན་པར་རེ་བ་བྱས་ཡོད་ཟེར། །