ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། འཛམ་གླིང་དཔལ་འབྱོར་གླེང་སྟེགས་ཀྱི་སྲོལ་འབྱེད་མཁན་དང་ལག་བསྟར་ཀྲུའུ་ཞིའི་འགན་གཅིག་ལྕོགས་སུ་ཁུར་མཁན་ཧྲི་ཝ་པུའུ་ཡིས་ཚེས་བཅུ་བཞིའི་ཉིན་བསྟན་དོན། རྣམ་པ་གསར་བའི་ཁེ་ཕན་ལ་འབྲེལ་བའི་ཕྱོགས་ཀྱི་འདུ་ཤེས་དར་སྤེལ་བྱས་ཏེ། དབུལ་ཕྱུག་གི་བར་ཁྱད་དང་ནམ་ཟླའི་འགྱུར་ལྡོག་སོགས་འཛམ་གླིང་རང་བཞིན་གྱི་འགྲན་རྩོད་ཐག་གཅོད་བྱེད་དགོས་ཟེར།
འཛམ་གླིང་དཔལ་འབྱོར་གླེང་སྟེགས་ཀྱི་ཉིས་སྟོང་ཉི་ཤུ་ལོའི་ལོ་ཚོགས་དེ་ཚེས་ཉེར་གཅིག་ཉིན་ནས་ཚེས་ཉེར་བཞིའི་ཉིན་བར་སུའེ་ཙེར་གྱི་ཏཱ་བོ་སི་ནས་སྤེལ་རྒྱུ་རེད། སྐབས་འདིའི་ལོ་ཚོགས་ཀྱི་བརྗོད་སྙིང་ནི་འཛམ་གླིང་ཡོངས་ཀྱི་སྟོབས་ཤུགས་གཅིག་ཏུ་དྲིལ་ནས་རྒྱུན་མཐུད་འཕེལ་རྒྱས་མངོན་འགྱུར་བྱེད་དགོས་ཞེས་པ་དེ་རེད།
ཧྲི་ཝ་པུའུ་ཡིས་བསྟན་དོན། འཛམ་གླིང་དཔལ་འབྱོར་གླེང་སྟེགས་ཀྱིས་ཐོག་མ་ཉིད་ནས་ཁེ་ཕན་ལ་འབྲེལ་བ་ཡོད་པའི་ཕྱོགས་ཀྱི་འདུ་ཤེས་བཏོན་ཏེ། ཚོང་ལས་ལས་རིགས་དང་ཆབ་སྲིད་ལས་རིགས། སྤྱི་དམངས་སྤྱི་ཚོགས་སོགས་ཁེ་ཕན་ལ་འབྲེལ་བ་ཡོད་པའི་ཕྱོགས་ཀྱིས་ཕན་ཚུན་འབྲེལ་འདྲིས་བྱེད་དུ་བཅུག་ཡོད་ཟེར།
གཙོ་སྒྲུབ་ཕྱོགས་ཀྱིས་མཚམས་སྦྱོར་བྱས་པ་ལྟར་ན། རྒྱལ་ཁབ་བརྒྱ་དང་བཅུ་ལྷག་ནས་ཡོང་བའི་ལས་རིགས་སོ་སོའི་མི་སྣ་སྟོང་གསུམ་ཙམ་སྐབས་འདིའི་ལོ་ཚོགས་ལ་ཞུགས་རྒྱུ་ཡིན་པ་དང་། གྲོས་ཚོགས་ནས་སྐྱེ་ཁམས་དང་དཔལ་འབྱོར། སྤྱི་ཚོགས། ལས་རིགས། ལག་རྩལ། མཐའ་མཚམས་ཀྱི་ཆབ་སྲིད་བཅས་ཁྱབ་ཁོངས་ཆེན་པོ་དྲུག་གི་གནད་དོན་ལ་གྲོས་བསྡུར་བྱེད་རྒྱུ་རེད།