ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཨུ་རུ་སིའི་རྒྱལ་ཕྲན་མཉམ་འབྲེལ་བདེ་འཇགས་ཅུའུ་ཡིས་ཚེས་ཉེར་བདུན་ཉིན་སྤྱི་སྒྲོག་སྤེལ་ཏེ། ཨུ་རུ་སིའི་བདེ་འཇགས་སྡེ་ཁག་གིས་ཉེ་སྔོན་ཁི་ལི་མུས་ཡཱ་ནས་དབྱི་སི་ལན་བཅིངས་འགྲོལ་ཏང་ཞེས་པའི་འཇིགས་སྐུལ་རྩ་འཛུགས་ཀྱི་ཁོངས་མི་ཉི་ཤུ་འཛིན་བཟུང་བྱས་ཟེར།
སྤྱི་སྒྲོག་ལས་བཤད་རྒྱུར། ཅུའུ་དེའི་ཁྲིམས་འཛིན་མི་སྣ་དང་ནང་སྲིད་པུའུ། རྒྱལ་དམངས་ཉེན་སྲུང་དམག་དཔུང་བཅས་ཀྱིས་མཉམ་འབྲེལ་འགུལ་སྐྱོད་སྤེལ་ཏེ། ཁི་ལི་མུས་ཡཱ་ནས་དབྱི་སི་ལན་བཅིངས་འགྲོལ་ཏང་ཞེས་པའི་འཇིགས་སྐུལ་རྩ་འཛུགས་ཀྱི་ཡན་ལག་ལས་ཁུངས་གཏོར་བ་དང་། རྩ་འཛུགས་དེའི་ཁོངས་མི་ཉི་ཤུ་འཛིན་བཟུང་བྱས་པར་མ་ཟད། རྩ་འཛུགས་དེའི་དྲིལ་སྒྲོག་རྒྱུ་ཆ་མང་བོ་དང་འཇིགས་སྐུལ་བྱ་འགུལ་ཐད་བཀོལ་བའི་འཕྲིན་གཏོང་ཡོ་བྱད་མང་བོ་གཞུང་བཞེས་བྱས་ཡོད་ཟེར།
སྤྱི་སྒྲོག་ལས་བཤད་རྒྱུར། འཇིགས་སྐུལ་རྩ་འཛུགས་དེས་ཁི་ལི་མུས་ཡཱ་རུ་གསང་བའི་བྱ་འགུལ་སྤེལ་བཞིན་ཡོད་པ་དང་། འདུ་ཚོགས་ལ་བརྟེན་ནས་མང་ཚོགས་ལ་འཇིགས་སྐུལ་རིང་ལུགས་དྲིལ་སྒྲོག་བྱས་ཏེ་ས་དེའི་མུའུ་སི་ལིན་གྱི་མང་ཚོགས་ཁྲོད་ནས་མི་སྣ་བསྡུ་ལེན་བྱེད་བཞིན་ཡོད་པས། འབྲེལ་ཡོད་བྱ་འགུལ་དེ་ཨུ་རུ་སིའི་རྩ་ཁྲིམས་དང་འགལ་ཡོད་ཟེར། །