ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཨུ་རུ་སི་དཀར་པོའི་ཙུང་ཐུང་ལུའུ་ཁཱ་ཧྲིན་ཁི་ཡིས་ཚེས་ཉེར་བདུན་ཉིན་བཀའ་རྒྱ་བཀོད་དེ། ཞིང་ལས་གནད་དོན་གྱི་འགན་ཁུར་བའི་ཙུང་ལི་གཞོན་པ་ལུའུ་སི་དང་། ཞིང་ལས་དང་ཟས་རིགས་པུའུ་ཡི་པུའུ་ཀྲང་ཀྲ་ཡཱ་ཚི་གཉིས་ཀྱི་ལས་འགན་བླངས།
ཨུ་རུ་སི་དཀར་པོའི་ཙུང་ཐུང་གསར་འགྱུར་ཅུའུ་ཡིས་སྤེལ་བའི་གནས་ཚུལ་ལྟར་ན། ཨུ་རུ་སི་དཀར་པོའི་ཤར་ཕྱོགས་ཀྱི་མའོ་ཅི་ལའོ་ཧྥུའུ་ཀྲིག་ལག་བསྟར་ཨུ་ཡོན་ལྷན་ཁང་གི་ཀྲུའུ་ཞི་ཏའོ་མཱ་ནེ་ཧྥུའུ་སི་ཅིའི་ལས་འགན་ཀྱང་ཉིན་དེར་བླངས་ཡོད་ཟེར།
རྒྱུས་ལོན་བྱུང་བ་ལྟར་ན། ལུའུ་ཁཱ་ཧྲིན་ཁི་ཡིས་ཉེ་སྔོན་མའོ་ཅི་ལའོ་ཧྥུའུ་ཀྲིག་ཏུ་རྟོག་ཞིབ་བྱེད་སྐབས། ཀྲིག་དེའི་རྗེས་ལུས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནས་ཚུལ་དང་། ཁྱད་པར་དུ་ཞིང་ལས་ཀྱི་འཕེལ་རྒྱས་གནས་ཚུལ་ལ་མི་དགའ་བའི་ཚུལ་བསྟན་ཏེ། འབྲེལ་ཡོད་འགན་ཁུར་མི་སྣའི་ལས་འགན་ལེན་རྒྱུའི་རེ་བ་བཏོན་པ་རེད། །