ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཟླ་བདུན་པའི་ཚེས་བཅུ་ཉིན། རྒྱལ་ཡོངས་སྲིད་གྲོས་ཀྱིས་པེ་ཅིན་ནས་ཞིང་སྡེའི་གཞིས་སྲུང་ལོ་ལོན་དང་བྱིས་པར་གཅེས་སྐྱོང་བྱེད་པའི་དྲ་རྒྱའི་སྲིད་གླེང་རྒྱང་བསྟེན་གྲོས་མོལ་ཚོགས་འདུ་བསྡུས་པ་དང་། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཝང་དབྱང་གིས་གྲོས་ཚོགས་ལ་འགོ་འཛིན་མཛད་པར་མ་ཟད་གསུང་བཤད་གནང་། ཁོང་གིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཞིང་སྡེའི་གཞིས་སྲུང་ལོ་ལོན་དང་བྱིས་པར་གཅེས་སྐྱོང་དང་ཞབས་ཞུ་སྒྲུབ་པའི་བྱ་བ་བཟང་བོར་བསྒྲུབ་པའི་ཐད་ལ་གནང་བའི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་བྱས་ཏེ། འཕེལ་རྒྱས་ཀྱི་མཐོང་རྒྱ་ལ་བརྟེན་ནས་ཞིང་སྡེའི་གཞིས་སྲུང་མང་ཚོགས་ཀྱི་གནད་དོན་ཐག་གཅོད་པ་དང་། གཅིག་གྱུར་སྒོས་འཆར་འགོད་དང་མཐུན་སྦྱོར་བྱེད་པ་དང་རྩ་ལག་མཉམ་བཅོས་རྒྱུན་འཁྱོངས་བྱེད་དགོས་ལ། ཡུལ་བབ་དང་བསྟུན་པ་དང་གནད་ཁེལ་སྲིད་ཇུས་ལག་བསྟར་བྱེད་རྒྱུ་རྒྱུན་འཁྱོངས་བྱེད་པ་དང་། མི་དམངས་དཀྱིལ་སྙིང་དུ་འཛིན་པའི་འཕེལ་རྒྱས་བསམ་བློ་དངོས་འབེབས་གང་ལེགས་བྱས་ནས། ལོ་ལོན་དང་བྱིས་པ་ཚང་མར་སྤྱི་ཚོགས་རིང་ལུགས་ཀྱི་ཁྱིམ་གཞི་ཆེན་པོའི་དྲོད་ཁོལ་མྱོང་སུ་འཇུག་དགོས།
ཨུ་ཡོན་བཅུ་གཉིས་ཀྱིས་རྒྱལ་ཡོངས་སྲིད་གྲོས་ལས་ཁུངས་དང་ཧྲན་ཞི་དང་ཨན་ཧོས། ཡུན་ནན་བཅས་ཚོགས་ར་བཞི་དང་དེ་མིན་ཁ་པར་གྱི་རྣམ་པར་བརྟེན་ནས་གཏམ་བཤད་པ་དང་། ཨུ་ཡོན་བརྒྱ་དང་དྲུག་ཅུ་ཡིས་སྤོ་འགུལ་འགན་འཁྲི་ལག་བསྟར་སྟེགས་བུའི་སྟེང་རང་རང་གི་བསམ་འཆར་སྤེལ།
ཨུ་ཡོན་རྣམས་ཀྱིས་རིམ་མཐའི་ཇུས་འགོད་ལ་ཤུགས་སྣོན་ཞིང་བཅའ་ཁྲིམས་ཁྲིམས་སྲོལ་དང་ཆ་ཚང་བྱེད་ཐབས་འཐུས་ཚང་དུ་བཏང་ནས། ཞིང་སྡེའི་གཞིས་སྲུང་མང་ཚོགས་ལ་གཅེས་སྐྱོང་དང་ཞབས་ཞུ་བསྒྲུབ་རྒྱུ་དེ་ཆེད་དོན་འཆར་འགོད་དང་སྲིད་གཞུང་གྲུབ་འབྲས་དཔྱད་ཞིབ་མ་ལག་ཁྲོད་དུ་འཇོག་དགོས་པ་དང་། ཁྱོན་ཡོངས་ནས་དབུལ་ཐར་དང་ཞང་སྡེ་དར་སྤེལ་འཐབ་ཇུས་ནུས་ལྡན་སྒོས་འབྲེལ་མཐུད་བྱེད་པར་སྐུལ་འདེད་བཏང་སྟེ། ཞིང་བ་ལས་བཟོ་བ་ཕྱིར་ཕ་ཡུལ་དུ་ལོག་ནས་ལས་སྤེལ་ལས་ཞུགས་བྱེད་པར་སྐུལ་མ་གཏོང་བ་དང་། མཁར་གྲོང་དུ་ཞོར་ལས་བྱེད་པར་ཁྲིད་པའི་བྱིས་པའི་འོས་འགན་སློབ་གསོའི་སློབ་ཞུགས་སྲིད་ཇུས་དངོས་འབེབས་བཟང་བོ་བྱས་ནས། མགོ་ཁུངས་ནས་རིམ་བཞིན་གཞིས་སྲུང་ལོ་ལོན་དང་བྱིས་པ་ཇེ་ཉུང་དུ་གཏོང་དགོས། གཞི་རིམ་བཅོས་སྐྱོང་ལ་ཤུགས་བསྣན་ནས་གཞིས་སྲུང་ལོ་ལོན་དང་བྱིས་པའི་བདེ་ཐང་སྲུང་སྐྱོབ་བྱེད་དགོས། སྤྱི་ཚོགས་རོགས་ལས་ལ་ཤུགས་སྣོན་ཞིང་ཚོགས་པའི་རྩ་འཛུགས་དང་སྤྱི་ཚོགས་སྟོབས་ཤུགས་ཀྱི་ཁྱད་སྟོབས་འདོན་སྤེལ་གང་ལེགས་བྱས་ཏེ། ཞིང་སྡེའི་གཞིས་སྲུང་མང་ཚོགས་ལ་གཅེས་སྐྱོང་བྱེད་པ་དང་སྤྱི་ཚོགས་དང་མཉམ་བསྲེས་བྱེད་པ་སོགས་ཀྱི་ཆེད་ལས་ཞབས་ཞུ་བཟང་བོ་བསྒྲུབ་དགོས་པའི་གྲོས་གཞི་བཏོན།
སློབ་གསོ་པུའུ་དང་དམངས་སྲིད་པུའུ། ཁྲིམས་འཛིན་པུའུ། མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་པུའུ། ཞིང་ལས་ཞིང་སྡེ་པུའུ། རྒྱལ་ཁབ་འཕྲོད་བསྟེན་བདེ་ཐང་ཨུ་ཡོན་ལྷན་ཁང་སོགས་ལས་ཁུངས་ཀྱི་འགན་འཁུར་བློ་མཐུན་གྱིས་ཡུལ་དངོས་ནས་བསམ་བློ་བརྗེ་རེས་བྱས།