ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཚེས5ཉིན། ཀྲུང་གོའི་ལམ་ཐུང་མྱུར་ཤུད་ལུས་རྩལ་པ་ཆུའུ་ཁྲུན་ཡུས་དང་། ཧྥན་ཁུ་ཞིན། ཀྲང་ཡུས་ཐེན། ཝུའུ་ཏ་ཅིན། རིན་ཙེ་ཝེ་བཅས་ཀྱིས་པེ་ཅིང་དགུན་དུས་ཨོ་རྩལ་འགྲན་ཚོགས་ཀྱི་གསེར་གྱི་རྟགས་མ་ཐོག་མ་བླངས། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན་ནམ་རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་སུན་ཁྲུན་ལན་གྱིས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཚབ་བྱས་ནས་ཀྲུང་གོའི་ལུས་རྩལ་འཐུས་ཚབ་ཚོགས་པར་རྟེན་འབྲེལ་གློག་འཕྲིན་བཏང་། གློག་འཕྲིན་ཡོངས་གཤམ་གསལ་ལྟར།
ཀྲུང་གོའི་ལུས་རྩལ་འཐུས་ཚབ་ཚོགས་པ།
ངས་རང་རྒྱལ་གྱི་ལུས་རྩལ་པ་ཆུའུ་ཁྲུན་ཡུས་དང་། ཧྥན་ཁུ་ཞིན། ཀྲང་ཡུས་ཐེན། ཝུའུ་ཏ་ཅིན། རིན་ཙེ་ཝེ་བཅས་ཀྱིས་པེ་ཅིང་དགུན་དུས་ཨོ་རྩལ་འགྲན་ཚོགས་ཀྱི་ལམ་ཐུང་མྱུར་ཤུད་མཉམ་བསྲེས་ཚོགས་པའི་སྨི2000ཀྱི་མཐུད་རྒྱུག་འགྲན་བསྡུར་ནང་དཔའ་ངར་ཞུམ་མེད་ངང་གཟི་བརྗིད་བྱ་དགའ་བརྩོན་ལེན་བྱས་ཤིང་། ཀྲུང་གོའི་ལུས་རྩལ་པས་སྐབས་འདིའི་དགུན་དུས་ཨོ་རྩལ་འགྲན་ཚོགས་ནང་ཞུགས་པའི་གསེར་གྱི་རྟགས་མ་ཐོག་མ་དེ་བླངས་ནས། མེས་རྒྱལ་དང་མི་དམངས་ལ་གཟི་བརྗིད་མཚན་སྙན་བླངས་པ་ཐོས་བྱུང་། ངས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཚབ་བྱས་ནས་བྱ་དགའ་ཐོབ་པའི་ལུས་རྩལ་པ་དང་ཀྲུང་གོའི་ལུས་རྩལ་འཐུས་ཚབ་ཚོགས་པར་སྤྲོ་སེམས་འཁོལ་བའི་ངང་རྟེན་འབྲེལ་ཞུས་པ་ཡིན།
མཐར་ཀྲུང་གོའི་ལུས་རྩལ་འཐུས་ཚབ་ཚོགས་པས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི“ཀུན་སྤྱོད་ལྡན་པའི་གསེར་གྱི་རྟགས་མ་དང་། ཉམས་འགྱུར་ལྡན་པའི་གསེར་གྱི་རྟགས་མ། དྭངས་གཙང་ཡིན་པའི་གསེར་གྱི་རྟགས་མ”བཅས་ཀྱི་བླང་བྱ་ལག་བསྟར་ནན་ཏན་བྱས་ནས། “འགན་འཁྲི་ཕྲག་ཏུ་འཁུར་བ་དང་འབད་འཐབ་བྱེད་པར་ང་རང་ཡོད”ཅེས་པའི་འགན་འཁྲིས་ཀྲུང་ཧྭའི་ལུས་རྩལ་སྙིང་སྟོབས་དང་ཨོ་ལིམ་ཕིག་གི་སྙིང་སྟོབས་དར་སྤེལ་བཏང་སྟེ། བསམ་པའི་དཔལ་ཡོན་དང་ལུས་རྩལ་ལ་གྲུབ་འབྲས་གཡུར་དུ་ཟ་བ་བླངས་ནས་མེས་རྒྱལ་དང་མི་དམངས་ལ་གཟི་བརྗིད་སྔར་བས་ཆེ་བ་བརྩོན་ལེན་བྱེད་དགོས་པའི་རེ་བ་ཡོད།
སུན་ཁྲུན་ལན།
2022ལོའི་ཟླ2པའི་ཚེས6ཉིན།