ནང་སོག་ནས་ཉིང་སྐྱུར་གདགས་གཤིས་ཡིན་པའི་ནད་དཔེ60ཐོན་པ་དང་། ནང་སོག་གི་ཡུལ་སྐོར་བྱ་འགུལ་ཚང་མ་མཚམས་བཞག

ཀྲུང་གོ་བོད་ཀྱི་དྲ་བའི་འཕྲིན། གསར་འགོད་པས་ནང་སོག་མན་ཇུ་ལི་གྲོང་ཁྱེར་རིམས་ནད་འགོག་སྡོམ་ལས་དོན་བཀོད་འདོམས་པུའུ་ཡིས་ཟླ11པའི་ཚེས29ཉིན་གྱི་ཆུ་ཚོད16ཐོག་འཚོགས་པའི་གསར་འགྱུར་ཡོངས་བསྒྲགས་ཚོགས་འདུའི་ཐོག་ནས་ཤེས་རྟོགས་བྱས་པར་གཞིགས་ན། ནང་སོག་མན་ཇུ་ལི་གྲོང་ཁྱེར་གྱིས་ཟླ11པའི་ཚེས28ཉིན་གྱི་སྔ་དྲོའི་ཆུ་ཚོད8པར་ཁྱོན་ཡོངས་ནས་རེས་སྐོར་དང་པོའི་ཉིང་སྐྱུར་བརྟག་དཔྱད་ལས་དོན་སྤེལ། ཟླ11པའི་ཚེས29ཉིན་གྱི་ཆུ་ཚོད8པར་རེས་སྐོར་དང་པོའི་བརྟག་དཔྱད་ལས་དོན་ལེགས་པར་གྲུབ་ལ། ཁྱོན་མི175554ཡི་མ་དཔེ་འཚོལ་བསྡུ་བྱས་པ་དང་། བརྟག་བཤེར་ཁྲོད་གདགས་གཤིས་ཡིན་པའི་མ་དཔེ60ཐོན།

མན་ཇུ་ལི་གྲོང་ཁྱེར་གྱིས་ཚེས29ཉིན་གྱི་སྔ་དྲོའི་ཆུ་ཚོད8པར་གཞི་ཁྱོན་ཆེ་བའི་ཉིང་སྐྱུར་བརྟག་དཔྱད་ལས་དོན་ཐེངས་གཉིས་པ་སྤེལ་བ་རེད། མི་སྣ་འགྲོ་སྐྱོད་དང་གཅིག་བསྡུ་བྱེད་ཚད་ཉུང་དུ་བཏང་ནས་རིམས་ནད་མཆེད་པའི་ཉེན་ཁ་ཇེ་ཆུང་དུ་གཏོང་ཆེད། ཐེངས་འདིར་མི་སྣ་ཡོངས་ཀྱི་ཉིང་སྐྱུར་བརྟག་དཔྱད་གྲོང་མིའི་གཞིས་ཁུལ་དུ་མ་དཔེ་འཚོལ་བསྡུ་བྱས་པ་རེད། མིག་སྔར་མ་དཔེ་འཚོལ་བསྡུའི་ལས་དོན་གོ་རིམ་ལྡན་པའི་ངང་སྤེལ་བཞིན་ཡོད་པ་རེད།