ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཉེ་ལམ། རྒྱལ་ཁབ་ནགས་ལས་དང་རྩྭ་ཐང་ཅུས་སོགས་སྡེ་ཁག་གིས་གཙོ་སྒྲུབ་བྱས་པའི་སྐབས་གཉིས་པའི་རྒྱལ་སྤྱིའི་ནགས་ཚལ་གྲོང་ཁྱེར་གྱི་ཚོགས་ཆེན་ཅང་སུའུ་ཞིང་ཆེན་ནན་ཅིན་གྲོང་ཁྱེར་དུ་ཚོགས་མགོ་བརྩམས་ཤིང་། ཚོགས་ཆེན་གྱི་བརྗོད་བྱ་ནི“ནགས་ཚལ་གྲོང་ཁྱེར་དང་གྲོང་ཁྱེར་གྱི་འཚོ་བ”ཞེས་པ་དེ་ཡིན།
རྒྱལ་ཁབ་ནགས་ལས་དང་རྩྭ་ཐང་ཅུས་ཀྱི་ཅུས་ཀྲང་ཀོན་ཀྲི་ཨོའུ་ཡིས་ཚོགས་ཆེན་སྟེང་བསྟན་དོན། མིག་སྔར་ཀྲུང་གོ་རུ་གྲོང་ཁྱེར194ནི་རྒྱལ་ཁབ་ནགས་ཚལ་གྲོང་ཁྱེར་ཡིན་ཞིང་། ཞིང་ཆེན17དུ་ནགས་ཚལ་གྲོང་ཁྱེར་ཚོགས་པའི་འཛུགས་སྐྲུན་སྤེལ་ཡོད། རྒྱལ་ཡོངས་ཀྱི་གྲོང་ཁྱེར་འཛུགས་སྐྲུན་ཁུལ་ལ་ལྗང་སྒྱུར་ཁེབས་ཚད10.1%ནས41.1%བར་ཇེ་མཐོར་སོང་ཡོད་པས། འཚོ་སྡོད་ཁོར་ཡུག་མུ་མཐུད་དུ་ཇེ་ལེགས་སུ་འགྲོ་བཞིན་ཡོད། །