ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཚོང་དོན་པུའུ་འཛད་སྤྱོད་སྐུལ་འདེད་སིའི་འགན་འཁུར་བས་ཚེས21ཉིན་ངོ་སྤྲོད་བྱས་དོན། ཟླ6པར་རྒྱལ་ཡོངས་སྤྱི་ཚོགས་ཀྱི་འཛད་རྫས་སིལ་ཚོང་བསྡོམས་འབོར་སྒོར་དུང་ཕྱུར་ཁྲི3.35ཟིན་ཏེ་དུས་མཚུངས་ལས1.8%ཆག་པ་དང་། ཟླ4བསྟུད་མར་ཆག་སྟེ་རིམ་རྩིས་བྱས་ན་ཆག་ཚད་བརྒྱ་ཆའི་གྲངས18.7ཟིན་ཡོད། ཟླ་དང་པོ་ནས་དྲུག་པ་བར་གྱི་སྤྱི་ཚོགས་འཛད་རྫས་སིལ་ཚོང་བསྡོམས་འབོར་སྒོར་དུང་ཕྱུར་ཁྲི17.23ཟིན་ཏེ་དུས་མཚུངས་ལས11.4%ཆག་ནས་ཆག་ཚད་དུས་ཚིགས་དང་པོ་ལས་བརྒྱ་ཆའི་གྲངས7.6ཉུང་དུ་ཕྱིན་ཡོད།
ཚོང་ཟོག་བྲིན་ཚོང་བྱེད་ཚད་རིམ་བཞིན་མང་དུ་ཕྱིན་ཞིང་། ཟླ6པར་ཚོང་ཟོག་སིལ་ཚོང་བསྡོམས་འབོར་སྤྱིར་ན་ན་ནིང་དུས་མཚུངས་ཀྱི་སྒོར་དུང་ཕྱུར་ཁྲི3གྱི་ཚད་གཞིར་སླར་གསོ་བྱུང་ཡོད། དེའི་ཁྲོད་འཚོ་བའི་མཁོ་ཆས་འཛད་སྤྱོད་བྱེད་ཚད་འཕར་ཅུང་མགྱོགས་པ་དང་། འབྲུ་སྣུམ་དང་། ཉིན་རེའི་མཁོ་ཆས། སྨན་རྫས་བཅས་བྲིན་ཚོང་བྱེད་ཚད་དུས་མཚུངས་དང་བསྡུར་ན་ཁག་སོ་སོར10.5%དང་། 16.9% 9.7%འཕར་ཡོད།
ཞབས་ཞུའི་འཛད་སྤྱོད་མུ་མཐུད་སླར་གསོ་བྱུང་ཞིང་། ཟླ6པར་བཟའ་བཏུང་གི་ཡོང་འབབ་དུས་མཚུངས་ལས15.2%ཆག་པ་དང་། ཆག་ཚད་ཟླ་5པ་ལས་བརྒྱ་ཆའི་གྲངས་3.7ཉུང་དུ་ཕྱིན་ཡོད། རྒྱལ་ཡོངས་མྱུར་སྐྱེལ་ཞབས་ཞུའི་ཁེ་ལས་ཀྱི་ལས་སྒོའི་ལས་འབོར་ཐུམ་སྒྲིལ་དུང་ཕྱུར74.7དང་ཡོང་འབབ་སྒོར་དུང་ཕྱུར797ཟིན་ཏེ་ཁག་སོ་སོ་དུས་མཚུངས་ལས36.8%དང23.9%འཕར་ཡོད། །