ཞི་ཅིན་ཕིང་གིས་ཏོག་དབྱིབས་ནད་དུག་གསར་པ་འགོས་པའི་གློ་ཚད་ཀྱི་རིམས་ནད་ཐད་མཛུབ་སྟོན་གལ་ཆེན་གནང་བ།

ཞི་ཅིན་ཕིང་གིས་ཏོག་དབྱིབས་ནད་དུག་གསར་པ་འགོ་བའི་གློ་ཚད་ཀྱི་རིམས་ནད་ཐད་མཛུབ་སྟོན་གལ་ཆེན་གནང་སྟེ། མི་དམངས་མང་ཚོགས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་ཨང་དང་པོར་བཞག་ནས་རིམས་ནད་མཆེད་ཚུལ་བཀག་འགོག་མཐའ་གཅིག་ཏུ་བྱེད་དགོས་པའི་ནན་བཤད་གནང་། ལི་ཁེ་ཆང་གིས་མཆན་འགོད་མཛུབ་སྟོན་གནང་།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཉེ་དུས་ཧུའུ་པེ་ཞིང་ཆེན་ཝུའུ་ཧན་གྲོང་ཁྱེར་སོགས་ས་ཁུལ་མང་པོར་ཏོག་དབྱིབས་ནད་དུག་འགོས་པའི་གློ་ཚད་ཀྱི་རིམས་ནད་ཐོན་ཡོད། ཟླ1ཚེས20ཉིན་གྱི་ཆུ་ཚོད18བར་དུ། ས་ཁོངས་ནང་རིམ་རྩིས་བྱས་ན་ཏོག་དབྱིབས་ནད་དུག་གསར་པ་འགོ་བའི་གློ་ཚད་ཀྱི་ནད་པ224སྙན་ཞུ་བྱས་པའི་ནང་ནད་པ་217(ཝུའུ་ཧན་གྲོང་ཁྱེར་གྱི་ནད་པ198དང་། པེ་ཅིང་གྲོང་ཁྱེར་གྱི་ནད་པ5།ཀོང་ཏུང་ཞིང་ཆེན་གྱི་ནད་པ14བཅས)གཏན་འཁེལ་བྱས་པ་དང་། དོགས་པ་ཡོད་པའི་ནད་པ7(སི་ཁྲོན་ཞིང་ཆེན་གྱི་ནད་པ2། ཡུན་ནན་ཞིང་ཆེན་གྱི་ནད་པ1། ཧྲང་ཧའེ་གྲོང་ཁྱེར་གྱི་ནད་པ2། ཀོང་ཞི་ཀྲོང་རིགས་རང་སྐྱོང་ལྗོངས་ཀྱི་ནད་པ1། ཧྲན་ཏུང་ཞིང་ཆེན་གྱི་ནད་པ1བཅས།) ཡོད། ལྗར་པན་གྱིས་ནད་དཔེ1དང་ཐེ་ལན་གྱིས་ནད་དཔེ2བརྡ་ཁྱབ་བཏང་ཞིང་། ཧན་གོས་ནད་དཔེ་གཏན་འཁེལ་བྱས་པ1བརྡ་ཁྱབ་བཏང་བ་བཅས་རེད།

རིམས་ནད་ཐོན་རྗེས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་ཚད་མཐོའི་མཐོང་ཆེན་གནང་། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་མཛུབ་སྟོན་གལ་ཆེན་གནང་སྟེ། ཉེ་ཆར་ཧུའུ་པེ་ཝུའུ་ཧན་གྲོང་ཁྱེར་སོགས་སུ་ཏོག་དབྱིབས་ནད་དུག་འགོས་པའི་གློ་ཚད་ཀྱི་རིམས་ནད་གཅིག་རྗེས་གཉིས་མཐུད་ངང་ཐོན་པར་ངེས་པར་དུ་ཚད་མཐོའི་མཐོང་ཆེན་བྱས་ནས་སྔོན་འགོག་ཚོད་འཛིན་ལས་དོན་ནུས་ཤུགས་ཡོད་རྒུས་ཡག་པོར་བསྒྲུབ་དགོས། མིག་སྔར་དཔྱིད་གསར་དུས་ཆེན་རིང་། མི་འབོར་ཁྱབ་རྒྱ་ཆེ་བའི་ངང་འགྲོ་འོང་བྱེད་བཞིན་ཡོད་པས་རིམས་ནད་སྔོན་འགོག་ཚོད་འཛིན་གྱི་ལས་དོན་ཡག་པོ་བསྒྲུབ་རྒྱུ་ནི་གལ་འགངས་ཤིན་ཏུ་ཆེ་བ་ཞིག་རེད། རིམ་པ་ཁག་གི་ཏང་ཨུ་དང་སྲིད་གཞུང་དང་དེ་བཞིན་འབྲེལ་ཡོད་སྡེ་ཚན་གྱིས་མི་དམངས་མང་ཚོགས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་ཨང་དང་པོར་བཞག་ནས་ཇུས་གཞི་ཞིབ་ཚགས་བཟོ་བ་དང་། ཕྱོགས་སོ་སོའི་སྟོབས་ཤུགས་སྒྲིག་འཛུགས་ཀྱིས་སྔོན་འགོག་ཚོད་འཛིན་བྱེད་པ། བྱེད་ཐབས་ནུས་ལྡན་ཏན་ཏིག་སྤྱད་དེ་རིམས་ནད་མཆེད་ཚུལ་བཀག་འགོག་མཐའ་གཅིག་ཏུ་བྱེད་དགོས། ནད་པར་ནུས་ཤུགས་ཡོད་རྒུས་སྨན་བཅོས་བྱས་ཏེ་ནད་དུག་འགོས་པ་དང་མཆེད་པའི་རྒྱུ་རྐྱེན་གང་མགྱོགས་རྩད་གཅོད་བྱས་ཏེ་ནད་དཔེ་ལྟ་ཞིབ་ཚད་ལེན་ལ་ཤུགས་སྣོན་རྒྱག་པ་དང་ཐག་གཅོད་ཀྱི་བརྒྱུད་རིམ་ཚད་ལྡན་དུ་གཏོང་དགོས། རིམས་ནད་ཀྱི་ཆ་འཕྲིན་དུས་ཐོག་ཏུ་ཁྱབ་བསྒྲགས་བྱས་ནས་རྒྱལ་སྤྱིའི་མཉམ་ལས་གཏིང་ཟབ་ཏུ་གཏོང་དགོས། གླེང་ཕྱོགས་ཀྱི་ཁྲིད་སྟོན་ལ་ཤུགས་སྣོན་རྒྱག་པ་དང་། འབྲེལ་ཡོད་སྲིད་ཇུས་དང་བྱ་ཐབས་དྲིལ་བསྒྲགས་དང་གསལ་འགྲེལ་ལས་དོན་ལ་ཤུགས་སྣོན་རྒྱག་པ། སྤྱི་ཚོགས་ཀྱི་སྤྱི་ཡོངས་བརྟན་ལྷིང་སྲུང་སྐྱོང་མཐའ་གཅིག་ཏུ་བྱེད་པ་བཅས་བྱས་ཏེ་མི་དམངས་མང་ཚོགས་བརྟན་ལྷིང་འཆམ་མཐུན་གྱི་དཔྱིད་གསར་དུས་ཆེན་ཞིག་གཏོང་ཐུབ་པར་འགན་ལེན་བྱེད་དགོས་ཞེས་བསྟན།

ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུའམ་རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་མཆན་བཀོད་མཛུབ་སྟོན་གནང་ཞིང་། འབྲེལ་ཡོད་སྡེ་ཚན་དང་ས་གནས་ཁག་གིས་མི་དམངས་མང་ཚོགས་ཀྱི་བདེ་ཐང་ལ་ཚད་མཐོའི་འགན་འཁུར་བའི་རྣམ་འགྱུར་ཐོག་ནས་ཁ་གཏད་གཅོག་པའི་ཇུས་གཞི་འཐུས་སྒོ་ཇེ་ཚང་དུ་གཏོང་བ་དང་། ནུས་ཤུགས་ཡོད་རྒུས་སྔོན་འགོག་ཚོད་འཛིན་ལས་དོན་ཡག་པོར་བསྒྲུབ་པ། སྔ་མོ་ནས་ཤེས་རྟོགས་དང་། སྔ་མོ་ནས་སྙན་ཞུ། སྔ་མོ་ནས་ཟུར་བཀར། སྔ་མོ་ནས་སྨན་བཅོས། གཅིག་སྡུད་སྐྱོབ་བཅོས་བཅས་ཀྱི་བྱ་ཐབས་དོན་འཁྱོལ་བྱེད་དགོས། ནད་དུག་གི་འབྱུང་རྩ་དང་། འགོས་པ། ཁྱབ་སྤེལ་སོགས་ཀྱི་རྐྱེན་རྩ་མགྱོགས་མྱུར་ངང་རྩད་གཅོད་བྱས་ཏེ་རིམས་ནད་དང་སྔོན་འགོག་ཚོད་འཛིན་ལས་དོན་གྱི་ཆ་འཕྲིན་དུས་ཐོག་ཏུ་དོན་དངོས་དང་མཐུན་པའི་ངང་ཁྱབ་བསྒྲགས་བྱས་ཏེ་རིམས་ནད་སྔོན་འགོག་གི་ཤེས་བྱ་ཚན་རིག་དང་མཐུན་པའི་སྒོ་ནས་དྲིལ་བསྒྲགས་བྱེད་དགོས། འཛམ་གླིང་འཕྲོད་བསྟེན་རྩ་འཛུགས་དང་། འབྲེལ་ཡོད་རྒྱལ་ཁབ། ཞང་ཀང་དང་ཨའོ་མོན། ཐའེ་ཝན་བཅས་ས་ཁུལ་དང་འབྲེལ་གཏུག་མཐུན་སྦྱོར་ཡག་པོ་བྱས་ཏེ། མཉམ་ལས་དམ་ཟབ་བྱས་ནས་མཉམ་ཤུགས་ཆགས་པ་དང་། རིམས་ནད་གང་སར་མཆེད་པར་སྔོན་འགོག་མཐའ་གཅིག་ཏུ་བྱ་དགོས་ཞེས་བསྟན།

ཞི་ཅིན་ཕིང་གི་མཛུབ་སྟོན་དང་ལིས་ཁི་ཆང་གི་བླང་བྱ་གཞིར་བཟུང་། རྒྱལ་སྲིད་སྤྱི་ཁྱབ་ཁང་གི་མཉམ་འགོག་མཉམ་སྡོམ་ལས་ཁུངས་ཀྱིས་ཟླ1པོའི་ཚེས20ཉིན་བརྙན་འཕྲིན་ཁ་པར་ཚོགས་འདུ་འཚོགས་ནས་ཏོག་དབྱིབས་ནད་དུག་གསར་པ་འགོས་པའི་གློ་ཚད་ཀྱི་རིམས་ནད་སྔོན་འགོག་ཚོད་འཛིན་ལས་དོན་ཕྱོགས་ཡོངས་ནས་བཀོད་སྒྲིག་བྱས་པ་རེད། རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱིས་ཏོག་དབྱིབས་ནད་དུག་འགོས་པའི་གློ་ཚད་ལ་ཁ་གཏད་གཅོག་པ་དང་ཐག་གཅོད་ལས་དོན་གྱི་འགོ་ཁྲིད་ཚོགས་ཆུང་བཙུགས་ནས་ས་གནས་ཀྱིས་རིམས་ནད་ལ་ཁ་གཏད་གཅོག་པའི་ལས་དོན་ཡག་པོར་བསྒྲུབ་རྒྱུར་མཛུབ་ཁྲིད་བྱས་པ་རེད། ཧུའུ་པེ་ཞིང་ཆེན་སོགས་འབྲེལ་ཡོད་ས་གནས་ཀྱིས་ཁོངས་གཏོགས་ཁུལ་གྱི་འགན་འཁྲི་སྔར་བས་དོན་འཁྱོལ་བྱས་ཏེ་བྱ་ཐབས་ནུས་ལྡན་ཏན་ཏིག་སྤྱད་དེ་རིམས་ནད་སྔོན་འགོག་ཚོད་འཛིན་གྱི་ལས་དོན་ཁག་མཐའ་གཅིག་ཏུ་ཡག་པོར་བསྒྲུབས་པ་རེད།

རྩོམ་སྒྲིག་པ། ཚེ་རིང་དོན་འགྲུབ།

དཔྱད་མཆན 0 ཡོད།