ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཟླ1པོའི་ཚེས19ཉིན། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ། རྒྱལ་སྲིད་སྤྱི་ཁྱབ་ཁང་ཟས་རིགས་བདེ་འཇགས་ཨུ་ཡོན་ལྷན་ཁང་གི་ཀྲུའུ་རིན་ཧན་ཀྲིན་གྱིས་འགོ་འཛིན་མཛད་དེ་རྒྱལ་སྲིད་སྤྱི་ཁྱབ་ཁང་ཟས་རིགས་བདེ་འཇགས་ཨུ་ཡོན་ལྷན་ཁང་གི་ཚང་འཛོམས་གྲོས་ཚོགས་ཐེངས་གཉིས་པ་བསྡུས་པར་མ་ཟད་གསུང་བཤད་གལ་ཆེན་གནང་། ཚོགས་ཐོག་ནས་ཏང་གི་སྐབས་བཅུ་དགུ་བའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་བ་དང་ཀྲུང་དབྱང་དཔལ་འབྱོར་བྱ་བའི་གྲོས་ཚོགས་ཀྱི་དགོངས་དོན་སློབ་སྦྱོང་དང་ལག་བསྟར་བྱས་ཤིང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་ལག་བསྟར་དང་དངོས་འབེབས་བྱས་པ་དང་། ཉིས་སྟོང་བཅུ་དགུ་ལོའི་ཟས་རིགས་བདེ་འཇགས་བྱ་བའི་གནས་ཚུལ་ཡར་ཞུ་བྱས་པར་ཉན་པར་མ་ཟད། འབྲེལ་ཡོད་ཡིག་ཆར་གྲོས་ཞིབ་བྱས་པ་དང་ཉིས་སྟོང་ཉི་ཤུ་ལོའི་བྱ་བ་གཙོ་བོར་ཞིབ་འཇུག་དང་བཀོད་སྒྲིག་བྱས།
ཚོགས་ཐོག་ནས་ཧན་ཀྲིན་གྱིས་ཉིས་སྟོང་བཅུ་དགུ་ལོར་ཟས་རིགས་བདེ་འཇགས་ཐད་ནས་བླངས་པའི་གྲུབ་འབྲས་ལ་ཁས་ལེན་གང་ལེགས་མཛད། ཁོང་གིས་བསྟན་དོན། ད་ལོ་ནི་འབྱོར་འབྲིང་སྤྱི་ཚོགས་ཁྱོན་ཡོངས་ནས་འགྲུབ་པར་བྱེད་པ་དང་ལོ་ལྔའི་འཆར་གཞི་བཅུ་གསུམ་པ་མཇུག་བསྡུ་བའི་ལོ་ཡིན་པས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བཏོན་པའི་ཆེས་གཟབ་ནན་བཞི་ཡི་རེ་བ་ལག་བསྟར་དང་དངོས་འབེབས་བྱས་ཏེ། འགན་འཁྲིའི་བསམ་པ་དང་དགོས་གལ་བསམ་པ་ཇེ་དྲག་ཏུ་གཏོང་བ་དང་། ཟས་རིགས་བདེ་འཇགས་བཅོས་སྐྱོང་མ་ལག་དང་བཅོས་སྐྱོང་ནུས་པའི་དེང་རབས་ཅན་ལ་སྐུལ་འདེད་གཏོང་དགོས་ལ། ཏན་ཏན་ཏིག་ཏིག་སྒོས་ཟས་རིགས་བདེ་འཇགས་བྱ་བ་བཟང་བོར་བསྒྲུབ་པ་དང་། ཟས་རིགས་བདེ་འཇགས་ཀྱི་ཚད་མཐའ་རྒྱུན་འཁྱོངས་བྱེད་དགོས། དུས་དང་རྣམ་པ་ཀུན་ཏུ་གནད་དོན་གྱི་ཁྲིད་ཕྱོགས་རྒྱུན་འཁྱོངས་བྱེད་པ་དང་ཚན་རིག་དང་མཐུན་པར་གནད་དོན་རྩད་གཅོད་པའི་རྐྱེན་སྲོལ་འཛུགས་དགོས་ལ། མང་ཚོགས་ཀྱིས་ཡིད་འཇོག་བྱེད་པའི་གནད་དོན་ལ་དམིགས་ཏེ་ཐག་གཅོད་བཟང་བོ་བྱེད་པ་དང་། གནད་དོན་ཐག་གཅོད་པའི་བརྒྱུད་རིམ་ཁྲོད་དུ་བྱ་བ་སྔར་ལས་དམ་འཛིན་བྱེད་དགོས་ཟེར།
ཧུའུ་ཁྲུན་ཧྭ་དང་ཝང་ཡུང་གཉིས་ཀ་གྲོས་ཚོགས་ལ་ཞུགས། །