ཀྲུང་གོ་བོད་ཀྱི་དྲ་བ།

ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པའི་རྒྱལ་ཁ་ཕུ་ཐག་བཅད་དེ་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རྒྱལ་ཁ་རླབས་པོ་ཆེ་བརྩོན་ལེན་བྱེད་དགོས།

ཡོང་ཁུངས། : བོད་ལྗོངས་ཉིན་རེའི་ཚགས་པར།     སྤེལ་དུས། : 2017-11-03
ཡིག་གཟུགས། :ཆུང་། འབྲིང་། ཆེ།

—— ཀྲུང་གོ་གུང་ཁྲན་ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་བཅུ་དགུ་པའི་ཐོག་གི་སྙན་སྒྲོན།    

(2017ལོའི་ཟླ10ཚེས18ཉིན)ཞི་ཅིན་ཕིང་།

༡.jpg

ཟླ10ཚེས18ཉིན་ཀྲུང་གོ་གུང་ཁྲན་ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་བཅུ་དགུ་པ་པེ་ཅིང་མི་དམངས་ཚོགས་ཁང་ཆེ་མོར་འཚོགས་ཤིང་། འདི་ནི་ཞི་ཅིན་ཕིང་གིས་སྐབས་བཅོ་བརྒྱད་པའི་ཀྲུང་དབྱང་ཨུ་ཡོན་ལྷན་ཁང་གི་ཚབ་ཞུས་ནས་ཚོགས་ཆེན་ཐོག་སྙན་སྒྲོན་གནང་བའི་གནས་ཚུལ་ཡིན་པ།

བློ་མཐུན་རྣམ་པ།

ད་ལྟ་ངས་ཀྲུང་དབྱང་ཨུ་ཡོན་ལྷན་ཁང་སྐབས་བཅོ་བརྒྱད་པའི་ཚབ་ཞུས་ནས་ཚོགས་ཆེན་ལ་སྙན་སྒྲོན་ཞུ་རྒྱུ་ཡིན།

ཀྲུང་གོ་གུང་ཁྲན་ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་བཅུ་དགུ་པ་ནི་ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པའི་རྒྱལ་ཁ་ཕུ་ཐག་གཅོད་པའི་དུས་རིམ་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དུས་རིམ་གསར་པར་སྐྱོད་པའི་འགག་རྩའི་དུས་སུ་སྐོང་ཚོགས་བྱས་པའི་ཚོགས་ཆེན་ཧ་ཅང་གལ་ཆེན་ཞིག་རེད།

ཚོགས་ཆེན་གྱི་བརྗོད་བྱ་གཙོ་བོ་ནི། ཐོག་མའི་བསམ་འདུན་མ་བརྗེད་ཅིང་། འགན་འཁྲི་ཡིད་ལ་བརྟན་པོར་འཆང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དར་ཆ་རླབས་པོ་ཆེ་མཐོན་པོར་བསྒྲེངས་ཤིང་། འབྱོར་འབྲིང་སྤྱི་ཚོགས་ཕྱོགས་ཡོངས་ནས་བསྐྲུན་པའི་རྒྱལ་ཁ་ཕུ་ཐག་བཅད་དེ། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རྒྱལ་ཁ་རླབས་པོ་ཆེ་བརྩོན་ལེན་དང་། ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་ཀྲུང་གོའི་ཕུགས་འདུན་འགྲུབ་ཕྱིར་འབད་བརྩོན་ལྷོད་མེད་བྱེད་དགོས་པ་འདི་ཡིན། ཐོག་མའི་བསམ་འདུན་མ་བརྗེད་ན། ད་གཟོད་མགོ་མཇུག་འཁྱོངས་པར་ངེས། ཀྲུང་གོ་གུང་ཁྲན་ཏང་མིའི་ཐོག་མའི་བསམ་འདུན་དང་འགན་འཁྲི་ནི་ཀྲུང་གོ་མི་དམངས་ལ་བདེ་སྐྱིད་བསྐྲུན་རྒྱུ་དང་། ཀྲུང་ཧྭ་མི་རིགས་བསྐྱར་དར་དོན་གཉེར་བྱེད་རྒྱུ་ཡིན། ཐོག་མའི་བསམ་འདུན་དང་འགན་འཁྲི་འདི་ནི་ཀྲུང་གོ་གུང་ཁྲན་ཏང་མི་རྒྱུན་མི་ཆད་པར་མདུན་དུ་སྐྱོད་པར་སྐུལ་མ་ཐེབས་བྱེད་ཀྱི་རྩ་བའི་སྒུལ་ཤུགས་ཡིན་པས། ཏང་ཡོངས་ཀྱི་བློ་མཐུན་ཚོས་ངེས་པར་དུ་ནམ་ཡིན་ཡང་མི་དམངས་དང་དབུགས་ལམ་གཅིག་གྱུར་དང་། བདེ་སྡུག་མཉམ་མྱོང་། གཅིག་སེམས་གཅིག་སྦྲེལ་གྱི་ཐོག་ནས། མི་དམངས་ཀྱིས་བདེ་སྐྱིད་འཚོ་བར་སྨོན་ཚུལ་དེ་ནམ་ཡང་འབད་འཐབ་ཀྱི་དམིགས་ཡུལ་དུ་བཟུང་སྟེ། དུས་ནམ་ཡང་རྣམ་གཡེང་གི་བསམ་འཁྱེར་མི་འཆང་བར་ཞུམ་མེད་མདུན་སྐྱོད་ཀྱི་འབད་འཐབ་ཉམས་འགྱུར་ལྡན་པར་བྱས་ཏེ། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་བརྗིད་རླབས་ཆེ་བའི་དམིགས་ཡུལ་འགྲུབ་པར་ཁ་ཕྱོགས་ནས་མུ་མཐུད་དཔའ་ངར་ཆེར་སྐྱེད་ཀྱིས་མདུན་དུ་བསྐྱོད་རྒྱུ་ཡིན།

དེང་སྐབས། རྒྱལ་ཁབ་ཕྱི་ནང་གི་གནས་བབ་ལ་འགྱུར་བ་རྙོག་འཛིང་ཆེ་ལ་ཟབ་མོ་ཡོང་བཞིན་ཡོད་པ་དང་། རང་རྒྱལ་གྱི་འཕེལ་རྒྱས་སྔར་བཞིན་འཐབ་ཇུས་ཀྱི་གོ་སྐབས་ལྡན་པའི་དུས་སྐབས་གལ་ཆེན་དུ་གནས་པས། མདུན་ལྗོངས་ལ་འོད་སྟོང་རབ་ཏུ་རྒྱས་ཤིང་། འགྲན་སློང་ཡང་ཧ་ཅང་དྲག་པོ་ཐུག་ཡོད། ཏང་ཡོངས་ཀྱི་བློ་མཐུན་གྱིས་ངེས་པར་དུ་གཟིགས་རྒྱང་སྔར་ལས་རིང་བ་དང་། བདེ་དུས་ཉེན་དྲན། འཕོ་འགྱུར་གཏོང་ཕོད་པ། གསར་དུ་གཏོད་ཕོད་པ། འཕེལ་རྒྱུན་ནམ་ཡང་མི་ཆད་པ། འཕེལ་མཚམས་ནམ་ཡང་མི་འཇོག་པར། རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་དེ་ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པའི་རྒྱལ་ཁ་ཕུ་ཐག་བཅད་དེ། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རྒྱལ་ཁ་རླབས་པོ་ཆེ་བརྩོན་ལེན་བྱེད་དགོས།

གཅིག འདས་པའི་ལོ་ལྔའི་རིང་གི་ལས་དོན་དང་ལོ་རྒྱུས་ཀྱི་རང་བཞིན་ལྡན་པའི་འཕོ་འགྱུར།

ཚོགས་ཆེན་བཅོ་བརྒྱད་པ་འཚོགས་ཚུན་གྱི་ལོ་ལྔ་ནི་ཏང་དང་རྒྱལ་ཁབ་འཕེལ་རྒྱས་བྱུང་རིམ་ཁྲོད་ཀྱི་སྤྱིར་བཏང་མ་ཡིན་པའི་ལོ་ལྔ་རེད། འཛམ་གླིང་གི་དཔལ་འབྱོར་བསྐྱར་དར་ཞན་པ་དང་། ཆ་ཤས་སུ་གདོང་ཐུག་དང་ཟིང་ཆ་ཡང་ཡང་ལངས་ཤིང་། སའི་གོ་ལའི་རང་བཞིན་གྱི་གནད་དོན་ཇེ་དྲག་ཏུ་སོང་བའི་ཕྱིའི་ཁོར་ཡུག་དང་། རང་རྒྱལ་གྱི་དཔལ་འབྱོར་འཕེལ་རྒྱས་རྒྱུན་རྣམ་གསར་པར་བསྐྱོད་པ་སོགས་འགྱུར་ལྡོག་ཟབ་མོ་རབ་དང་རིམ་པ་བྱུང་བར་དམིགས་ཏེ། ང་ཚོས་བརྟན་པོའི་ངང་ནས་ཡར་རྒྱས་ཡོང་བར་བྱེད་པའི་ལས་ཀའི་རྩ་བའི་དགོངས་གཞི་མཐའ་འཁྱོངས་བྱས་ཏེ། དཀའ་བར་མི་འཛེམ་པར་མདུན་དུ་བསྐྱོད་པ་དང་། གསར་གཏོད་ཡར་བརྩོན་བྱས་པས། སྒྱུར་བཅོས་སྒོ་འབྱེད་དང་སྤྱི་ཚོགས་རིང་ལུགས་ཀྱི་དེང་རབས་ཅན་དུ་འགྱུར་བའི་འཛུགས་སྐྲུན་ལ་ལོ་རྒྱུས་ཀྱི་རང་བཞིན་ལྡན་པའི་གྲུབ་འབྲས་ཐོབ་པ་རེད།

ཚོགས་ཆེན་བཅོ་བརྒྱད་པའི་དགོངས་དོན་ལག་ལེན་མཐར་ཕྱིན་བསྟར་བའི་ཆེད་དུ། ཏང་ཀྲུང་དབྱང་གིས་ཚང་འཛོམས་གྲོས་ཚོགས་ཐེངས་བདུན་སྐོང་ཚོགས་བྱས་ཏེ། སྲིད་གཞུང་གི་སྒྲིག་གཞི་སྒྱུར་བཅོས་དང་། འགན་ནུས་བསྒྱུར་བ། ཕྱོགས་ཡོངས་ནས་སྒྱུར་བཅོས་ཟབ་ཏུ་སྤེལ་བ། ཁྲིམས་མཐུན་ལྟར་རྒྱལ་ཁབ་སྐྱོང་བར་ཕྱོགས་ཡོངས་ནས་སྐུལ་སྤེལ་གཏོང་བ། “ལོ་ལྔ་ཚན་བཅུ་གསུམ་པ”ཡི་འཆར་གཞི་འགོད་པ། ཕྱོགས་ཡོངས་ནས་ཏང་ནན་པོས་སྐྱོང་བ་སོགས་གནད་དོན་གལ་ཆེན་སོ་སོར་གྲོས་ཐག་བཅད་པ་དང་བཀོད་པ་བཏིངས་པ་རེད། ལོ་ལྔའི་རིང་ལ། ང་ཚོས“ཕྱོགས་ལྔ་གཞི་གཅིག”གི་སྤྱིའི་བཀོད་པར་གཅིག་གྱུར་ཐོག་སྐུལ་འདེད་བཏང་བ་དང་། “ཕྱོགས་ཡོངས་བཞི”ཡི་འཐབ་ཇུས་ཀྱི་བཀོད་པར་མཐུན་སྦྱོར་ངང་སྐུལ་འདེད་བཏང་བ། “ལོ་ལྔ་ཚན་བཅུ་གཉིས་པ”ཡི་འཆར་འགོད་རྒྱལ་ཁའི་ངང་འགྲུབ་པ། “ལོ་ལྔ་ཚན་བཅུ་གསུམ་པ”ཡི་འཆར་འགོད་བདེ་བླག་ངང་དོན་འཁྱོལ་བཅས་བྱས་པས། ཏང་དང་རྒྱལ་ཁབ་ཀྱི་བྱ་གཞག་ཕྱོགས་ཡོངས་ནས་རྣམ་པ་གསར་པ་བཏོད་པ་རེད། 

དཔལ་འབྱོར་འཛུགས་སྐྲུན་ལ་གྲུབ་འབྲས་གལ་ཆེན་ཐོབ་ཡོད། འཕེལ་རྒྱས་ཀྱི་བསམ་གཞི་གསར་པ་བློ་བརྟན་འགྱུར་མེད་ཀྱིས་ལག་ལེན་བསྟར་བ་དང་། འཕེལ་རྒྱས་ཀྱི་ལྟ་བ་ཡོ་བསྲང་དང་། འཕེལ་རྒྱས་གཏོང་སྟངས་མཐའ་གཅིག་ཏུ་བསྒྱུར་བས། གོང་སྤེལ་གྱི་སྤུས་ཀ་དང་ཕན་འབྲས་རྒྱུན་མ་ཆད་པར་ཆེ་རུ་ཕྱིན་པ་རེད། དཔལ་འབྱོར་འཕེལ་ཚད་མགྱོགས་འབྲིང་རྒྱུན་འཁྱོངས་ཐུབ་སྟེ། འཛམ་གླིང་གི་རྒྱལ་ཁབ་གལ་ཆེན་ཁྲོད་མདུན་གྲལ་དུ་སླེབས་ཤིང་། རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་ཁྲི་ང་བཞི་ནས་སྒོར་དུང་ཕྱུར་ཁྲི་བརྒྱད་ཅུར་འཕར་ཏེ་འཛམ་གླིང་གི་ཨང་གཉིས་པར་ཟིན་པ་དང་། འཛམ་གླིང་གི་དཔལ་འབྱོར་འཕེལ་བར་ལེགས་སྐྱེས་འབུལ་ཚད་བརྒྱ་ཆ་སུམ་ཅུ་ཡན་ཟིན་པ་རེད། མཁོ་སྤྲོད་ཕྱོགས་གྲུབ་ཚུལ་རང་བཞིན་སྒྱུར་བཅོས་ལ་སྐུལ་འདེད་གཏིང་ཟབ་ཏུ་བཏང་བ་དང་། དཔལ་འབྱོར་གྲུབ་ཚུལ་རྒྱུན་མ་ཆད་པར་བཟང་པོར་བསྒྱུར་བ། གྲངས་ཀའི་དཔལ་འབྱོར་སོགས་གསར་དར་ཐོན་ལས་དབྱར་མཚོ་རྒྱས་པ་ལྟར་འཕེལ་བ། མྱུར་བགྲོད་ལྕགས་ལམ་དང་། གཞུང་ལམ། ཟམ་པ། གྲུ་ཁ། གནམ་གྲུ་འབབ་ཐང་སོགས་རྨང་གཞིའི་སྒྲིག་བཀོད་འཛུགས་སྐྲུན་ལ་སྐུལ་སྤེལ་མགྱོགས་པོ་བཏང་བ་རེད། ཞིང་ལས་དེང་རབས་ཅན་དུ་གོམ་སྟབས་བརྟན་པོའི་ངང་ནས་སྤེལ་བ་དང་། འབྲུ་རིགས་ཐོན་སྐྱེད་ཐུབ་ཚད་རྒྱ་མ་དུང་ཕྱུར་ཁྲི་གཅིག་དང་ཉིས་སྟོང་ཟིན་པ་རེད། གྲོང་ཁྱེར་དང་གྲོང་རྡལ་ཅན་དུ་བསྒྱུར་ཚད་ལོ་རེར་ཆ་སྙོམས་བརྒྱ་ཆའི་གཞི་གྲངས་གཅིག་དང་ཚག་གཉིས་འཕར་བ་དང་། ཞིང་ལས་སྤོ་སྒྱུར་མི་འབོར་ཁྲི་བརྒྱད་སྟོང་ལྷག་ཙམ་གྲོང་ཁྱེར་དང་གྲོང་རྡལ་གྱི་གྲོང་མིར་བསྒྱུར་ཡོད། ཁུལ་ཁོངས་འཕེལ་རྒྱས་མཐུན་སྦྱོར་བྱེད་ཤུགས་ཆེ་རུ་ཕྱིན་པ་དང་། “རྒྱུད་གཅིག་ལམ་གཅིག”འཛུགས་སྐྲུན་དང་། པེ་ཅིང་ཐེན་ཅིན་ཧོ་པེ་གསུམ་མཐུན་སྦྱོར་ངང་འཕེལ་རྒྱས་བཏང་ཞིང་། འབྲི་ཆུའི་དཔལ་འབྱོར་རྒྱུད་འཕེལ་རྒྱས་བཏང་བར་གྲུབ་འབྲས་མངོན་གསལ་དོད་པོ་ཐོབ་ཡོད། གསར་གཏོད་སྐུལ་སྤེལ་གྱི་འཐབ་ཇུས་དོན་འཁྱོལ་ཤུགས་ཆེན་བྱས་པ་དང་། གསར་གཏོད་ཅན་གྱི་རྒྱལ་ཁབ་འཛུགས་སྐྱོང་བྱས་འབྲས་ཕུན་སུམ་ཚོགས་ཤིང་། སྔ་རྗེས་སུ་ལྷའི་ཕོ་བྲང་དང་། ཀླུ་མོ། ལྷ་མིག ཝུའུ་ཁུང་། མོ་ཙི། གནམ་གྲུ་ཆེ་རིགས་སོགས་ཚན་རྩལ་གྱི་གྲུབ་འབྲས་གལ་ཆེན་ཐོན་པ་རེད། སྒོ་འབྱེད་ཅན་གྱི་དཔལ་འབྱོར་སྒྲིག་སྲོལ་གསར་པ་རིམ་བཞིན་ཆ་ཚང་དུ་བཏང་བ་དང་། ལྷོ་མཚོའི་བྲག་རྡོའི་གླིང་ཕྲན་སྐྲུན་པར་སྐུལ་སྤེལ་ཧུར་ཐག་བཏང་བ། སྒོ་འབྱེད་རྣམ་པའི་དཔལ་འབྱོར་སྒྲིག་སྲོལ་གསར་པ་རིམ་བཞིན་འཐུས་སྒོ་ཚང་དུ་བཏང་བ། ཕྱི་ཕྱོགས་ཉོ་ཚོང་དང་། ཕྱི་ཕྱོགས་སུ་མ་དངུལ། ཕྱི་རྒྱལ་གྱི་དངུལ་བརྗེས་གསོག་འཇོག་བཅས་བརྟན་པོའི་ངང་འཛམ་གླིང་གི་མདུན་གྲལ་དུ་སླེབས་ཡོད།

ཕྱོགས་ཡོངས་ནས་སྒྱུར་བཅོས་ཟབ་ཏུ་སྤེལ་བར་འགག་གནད་ཆེན་པོ་སྒྲོལ་ཐུབ་ཡོད། སྒྱུར་བཅོས་ཟབ་སྤེལ་ཕྱོགས་ཡོངས་ནས་གོམ་སྟབས་མྱུར་བགྲོད་ཀྱིས་བརྟན་པོར་སྤོས་པ་དང་། ཕྱོགས་གང་ཅིའི་སྒྲིག་སྲོལ་དང་ལམ་སྲོལ་གྱི་འགལ་རྐྱེན་བློ་ཐག་ཆོད་པོས་བསལ་ཡོད། སྒྱུར་བཅོས་ལ་ཕྱོགས་ཡོངས་ནས་ཤུགས་བརྒྱབ་སྟེ། སྣ་མང་བར་བརྒལ་དང་། གཏིང་ཟབ་ཏུ་སྤེལ་ཏེ། སྒྱུར་བཅོས་ཆ་ལག་ཚང་བ་དང་། གོང་བུར་འགྲིལ་བ། མཐུན་སྦྱོར་ལྡན་པ་བཅས་ཀྱི་ཐོག་ནས་སྤེལ་གང་ཐུབ་བྱས་པ་དང་། སྒྱུར་བཅོས་བྱེད་ཁྱོན་དང་། ཟབ་ཚད་རིམ་པ་བཞིན་དུ་བསྟུད་མར་ཇེ་ཆེར་བཏང་སྟེ། སྒྱུར་བཅོས་ཁག་ཆིག་སྟོང་ལྔ་བརྒྱ་ལྷག་བྱས་པ་དང་། ཁྱབ་ཁོངས་གལ་ཆེན་དང་འགག་རྩའི་ལྷུ་ཚིགས་ཀྱི་སྒྱུར་བཅོས་ལ་བར་བརྒལ་རང་བཞིན་གྱི་འཕེལ་རྒྱས་བཏང་ཞིང་། སྒྱུར་བཅོས་བྱ་གཞིའི་ཁྱབ་ཁོངས་གཙོ་བོ་རྩ་བའི་ཆ་ནས་གཏན་འཁེལ་བྱས་ཡོད། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལམ་ལུགས་འཐུས་སྒོ་སྔར་ལས་ཚང་དུ་བཏང་བ་དང་། རྒྱལ་ཁབ་བཅོས་སྐྱོང་གི་མ་ལག་དང་བཅོས་སྐྱོང་བྱེད་ནུས་དེང་རབས་ཅན་དུ་འགྱུར་བར་བྱེད་པའི་ཆུ་ཚད་མངོན་གསལ་གྱིས་མཐོ་རུ་ཕྱིན་པ་དང་། སྤྱི་ཚོགས་ཡོངས་ཀྱི་འཕེལ་རྒྱས་ཀྱི་གསོན་ཤུགས་དང་གསར་གཏོད་ཀྱི་གསོན་ཤུགས་མངོན་གསལ་ཆེ་རུ་ཕྱིན་ཡོད།

དམངས་གཙོ་ཁྲིམས་ལུགས་འཛུགས་སྐྱོང་གི་གོམ་སྟབས་གལ་ཆེན་སྤོས་ཡོད། སྤྱི་ཚོགས་རིང་ལུགས་ཀྱི་དམངས་གཙོ་ཆབ་སྲིད་འཕེལ་རྒྱས་ཧུར་ཐག་བཏང་བ་དང་། ཕྱོགས་ཡོངས་ནས་ཁྲིམས་མཐུན་ལྟར་རྒྱལ་ཁབ་སྐྱོང་བར་སྐུལ་མ་བཏང་བ། ཏང་གིས་འགོ་ཁྲིད་དང་། མི་དམངས་ཀྱིས་རང་ཁྱིམ་རང་བདག ཁྲིམས་མཐུན་ལྟར་རྒྱལ་ཁབ་སྐྱོང་བ་བཅས་གཅིག་གྱུར་དམ་ཚགས་བྱེད་པའི་ལམ་ལུགས་འཛུགས་སྐྱོང་ཕྱོགས་ཡོངས་ནས་ཆེ་རུ་བཏང་བ། ཏང་གིས་འགོ་ཁྲིད་བྱེད་པའི་སྒྲིག་སྲོལ་དང་ལམ་སྲོལ་རྒྱུན་མ་ཆད་པར་འཐུས་སྒོ་ཚང་དུ་བཏང་བ། སྤྱི་ཚོགས་རིང་ལུགས་ཀྱི་དམངས་གཙོ་རྒྱུན་མ་ཆད་པར་འཕེལ་རྒྱས་བཏང་བ། ཏང་ནང་གི་དམངས་གཙོའི་ཁྱབ་རྒྱ་སྔར་ལས་ཆེ་རུ་བཏང་བ། སྤྱི་ཚོགས་རིང་ལུགས་ཀྱི་དམངས་གཙོའི་གྲོས་མོལ་ཕྱོགས་ཡོངས་ནས་ཁྱབ་སྤེལ་བཏང་བ། རྒྱལ་གཅེས་འཐབ་ཕྱོགས་གཅིག་གྱུར་བརྟན་པོའི་ངང་འཕེལ་རྒྱས་བཏང་བ། མི་རིགས་ཀྱི་ཆོས་ལུགས་ལས་དོན་གསར་གཏོད་ངང་སྤེལ་ཡོད། ཚན་རིག་དང་མཐུན་པར་ཁྲིམས་འཛུགས་དང་། ཁྲིམས་བསྟར་ནན་པོ། ཁྲིམས་འཛིན་གཞུང་དྲང་། དམངས་ཡོངས་ཀྱིས་ཁྲིམས་སྲུང་བཅས་ལ་སྐུལ་སྤེལ་ཟབ་མོ་བཏང་བ། ཁྲིམས་སྐྱོང་རྒྱལ་ཁབ་དང་། ཁྲིམས་སྐྱོང་སྲིད་གཞུང་། ཁྲིམས་སྐྱོང་སྤྱི་ཚོགས་འཛུགས་སྐྱོང་བཅས་ལ་ཕན་ཚུན་སྐུལ་སྤེལ་གཏོང་རེས་བྱས་པ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་མ་ལག་ཉིན་བཞིན་འཐུས་སྒོ་ཚང་དུ་བཏང་བས། སྤྱི་ཚོགས་ཡོངས་ཀྱི་ཁྲིམས་སྐྱོང་འདུ་ཤེས་མངོན་གསལ་ཇེ་ཆེར་ཕྱིན་ཡོད། རྒྱལ་ཁབ་ཀྱི་ལྟ་སྐུལ་མ་ལག་སྒྱུར་བཅོས་ཚོད་ལྟ་བྱས་པར་གྲུབ་འབྲས་དངོས་ཐོབ་པ་དང་། སྲིད་འཛིན་སྒྲིག་སྲོལ་སྒྱུར་བཅོས་དང་། ཁྲིམས་འཛིན་སྒྲིག་སྲོལ་སྒྱུར་བཅོས། དབང་ཆ་བཀོལ་སྤྱོད་ལ་ཚོད་འཛིན། ལྟ་སྐུལ་གྱི་མ་ལག་འཛུགས་སྐྱོང་བཅས་ལག་ལེན་བསྟར་ཡོད།

བསམ་བློ་དང་རིག་གནས་ལེགས་སྐྱོང་ལ་ཡར་རྒྱས་ཆེན་པོ་བྱུང་ཡོད། ཏང་གིས་འདུ་ཤེས་འཛིན་སྟངས་ཀྱི་ལས་ཀར་འགོ་ཁྲིད་བྱེད་ཤུགས་ཆེ་རུ་བཏང་བ་དང་། ཏང་གི་རིགས་པའི་གཞུང་ལུགས་གསར་གཏོད་ཕྱོགས་ཡོངས་ནས་ཁྱབ་སྤེལ་བཏང་བ། འདུ་ཤེས་འཛིན་སྟངས་ཁྱབ་ཁོངས་སུ་མར་ཁེ་སི་རིང་ལུགས་ཀྱི་སློབ་སྟོན་གོ་གནས་མངོན་གསལ་ཇེ་ཆེར་གྱུར་པ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དང་ཀྲུང་གོའི་ཕུགས་འདུན་མིའི་སེམས་སུ་ཟབ་མོར་ཟུག་པ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་དང་ཀྲུང་ཧྭའི་ཕུལ་དུ་བྱུང་བའི་སྲོལ་རྒྱུན་རིག་གནས་དར་སྤེལ་ཁྱབ་ཆེར་བཏང་བ། མང་ཚོགས་རང་བཞིན་གྱི་བསམ་པའི་དཔལ་ཡོན་ལེགས་སྐྱོང་གི་བྱེད་སྒོ་ཏན་ཏིག་སྤེལ་ཡོད། སྤྱི་པའི་རིག་གནས་ཞབས་ཞུའི་ཆུ་ཚད་རྒྱུན་མ་ཆད་པར་མཐོ་རུ་བཏང་བ་དང་། རིག་རྩལ་གསར་རྩོམ་བསྟུད་མར་དར་རྒྱས་བྱུང་བ། རིག་གནས་བྱ་གཞག་དང་རིག་གནས་ཐོན་ལས་དབྱར་མཚོ་རྒྱས་པ་ལྟར་འཕེལ་བ། དྲ་སྦྲེལ་ལེགས་སྐྱོང་དང་འཁོར་སྐྱོད་དོ་དམ་རྒྱུན་མ་ཆད་པར་འཐུས་སྒོ་ཚང་དུ་བཏང་བ། དམངས་ཡོངས་ཀྱི་ལུས་སྦྱོང་དང་རྩལ་འགྲན་ལུས་རྩལ་ཕྱོགས་ཡོངས་ནས་འཕེལ་རྒྱས་བཏང་ཡོད། བརྗོད་བྱ་གཙོ་བོ་སྔར་བས་མངོན་གསལ་ཆེ་བ་དང་། དྲང་ནུས་སྔར་བས་ཇེ་ཆེར་གྱུར་པ། རིག་གནས་ཀྱི་གདེང་ཚོད་མངོན་པར་གསལ་བ། རྒྱལ་ཁབ་ཀྱི་རིག་གནས་མཉེན་ཤུགས་དང་ཀྲུང་ཧྭའི་རིག་གནས་ཀྱི་བག་ཆགས་ཇེ་ཆེར་ཕྱིན་པ། ཏང་ཡོངས་དང་སྤྱི་ཚོགས་ཡོངས་བསམ་བློའི་ཐད་མཐུན་སྒྲིལ་གཅིག་གྱུར་སྔར་ལས་ཇེ་བརྟན་དུ་གྱུར་ཡོད།

མི་དམངས་ཀྱི་འཚོ་བ་རྒྱུན་མ་ཆད་པར་ལེགས་བཅོས་བྱུང་བ། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་དོན་འཁྱོལ་གཏིང་ཟབ་བྱས་པ་དང་། དམངས་ཕན་གྱི་བྱེད་ཐབས་འབོར་ཆེན་ཁག་གཅིག་དོན་ཐོག་ཏུ་འཁྱོལ་བར་བྱས་པས། མི་དམངས་ལ་ཐོབ་སྣང་གི་ཚོར་བ་མངོན་གསལ་ཆེ་རུ་ཕྱིན་ཡོད། དབུལ་སྒྲོལ་འགག་སྒྲོལ་གྱི་འཐབ་རྩོད་ལ་ཐག་ཆོད་རང་བཞིན་གྱི་འཕེལ་རྒྱས་བྱུང་སྟེ། དབུལ་ཕོངས་མི་གྲངས་ཁྲི་དྲུག་སྟོང་ལྷག་ཙམ་དབུལ་སྒྲོལ་བརྟན་པོ་བྱུང་བ་དང་། དབུལ་པོར་འགྱུར་ཚད་བརྒྱ་ཆ་བཅུ་དང་ཚག་གཉིས་ནས་བརྒྱ་ཆ་བཞི་མན་དུ་ཆག་པ་རེད། སློབ་གསོའི་བྱ་གཞག་ཕྱོགས་ཡོངས་ནས་འཕེལ་རྒྱས་བྱུང་ཞིང་། དབུས་ནུབ་རྒྱུད་དང་གྲོང་གསེབ་ཀྱི་སློབ་གསོར་མངོན་གསལ་དོད་པོས་ཤུགས་སྣོན་བརྒྱབ་ཡོད། ལས་ཞུགས་ཀྱི་གནས་སྟངས་མུ་མཐུད་ལེགས་བཅོས་བྱུང་བ་དང་། གྲོང་ཁྱེར་དང་གྲོང་རྡལ་གྱི་ལས་ཞུགས་པ་ལོ་རེར་ཆ་སྙོམས་ཁྲི་ཆིག་སྟོང་སུམ་བརྒྱ་ཡན་འཕར་བ་རེད། གྲོང་ཁྱེར་དང་གྲོང་གསེབ་ཀྱི་གྲོང་མིའི་ཡོང་འབབ་འཕར་བའི་མྱུར་ཚད་དཔལ་འབྱོར་འཕེལ་ཚད་ལས་བརྒལ་བ་དང་། ཡོང་འབབ་འབྲིང་གྲས་ཀྱི་མང་ཚོགས་བསྟུད་མར་མང་དུ་སོང་ཡོད། གྲོང་ཁྱེར་དང་གྲོང་གསེབ་ཀྱི་གྲོང་མིར་ཁྱབ་པའི་སྤྱི་ཚོགས་ཀྱི་འགན་སྲུང་མ་ལག་རྩ་བའི་ཆ་ནས་བཙུགས་པ་དང་། མི་དམངས་ཀྱི་བདེ་ཐང་དང་སྨན་བཅོས་འཕྲོད་བསྟེན་གྱི་ཆུ་ཚད་ཇེ་མཐོར་ཕྱིན་ཞིང་། འགན་སྲུང་རང་བཞིན་གྱི་སྡོད་ཁང་འཛུགས་སྐྲུན་ལ་བརྟན་པོའི་ངང་སྐུལ་འདེད་བཏང་ཡོད། སྤྱི་ཚོགས་བཅོས་སྐྱོང་གི་མ་ལག་འཐུས་སྒོ་ཇེ་ཚང་དུ་གྱུར་པ་དང་། སྤྱི་ཚོགས་ཁྱོན་ཡོངས་བརྟན་གནས་ཐུབ་ཅིང་། རྒྱལ་ཁབ་ཀྱི་བདེ་འཇགས་ཁྱོན་ཡོངས་ནས་ཇེ་ཆེར་ཕྱིན་ཡོད།

སྐྱེ་ཁམས་དཔལ་ཡོན་ལེགས་སྐྱོང་བྱས་པའི་ཕན་འབྲས་མངོན་གསལ་དོད་པོ་བྱུང་ཡོད། སྐྱེ་ཁམས་དཔལ་ཡོན་ལེགས་སྐྱོང་ལ་སྐུལ་སྤེལ་ཤུགས་ཆེན་བཏང་ཞིང་། ཏང་ཡོངས་དང་རྒྱལ་ཡོངས་སུ་ལྗང་མདོག་འཕེལ་རྒྱས་ཀྱི་བསམ་གཞི་དོན་འཁྱོལ་གྱི་རང་རྟོགས་དང་རང་འགུལ་གྱི་བསམ་པ་མངོན་གསལ་ཇེ་ཆེར་ཕྱིན་པ་དང་། སྐྱེ་ཁམས་ཁོར་ཡུག་སྲུང་བར་སྣང་ཆུང་བྱེད་ཚུལ་ལ་འགྱུར་བ་མངོན་གསལ་དོད་པོ་བྱུང་ཡོད། སྐྱེ་ཁམས་དཔལ་ཡོན་ལམ་ལུགས་ཀྱི་མ་ལག་གང་མྱུར་ཆགས་པར་བྱས་པ་དང་། གཙོ་ནུས་ཐོན་ཁུལ་གྱི་ལམ་ལུགས་རིམ་བཞིན་ཆ་ཚང་དུ་གྱུར་པ། རྒྱལ་ཁབ་ཀྱི་སྤྱི་གླིང་སྒྲིག་སྲོལ་འཛུགས་པའི་ཚོད་ལྟ་ཁྱབ་སྤེལ་ཧུར་ཐག་བཏང་ཡོད། ཐོན་ཁུངས་ཕྱོགས་ཡོངས་ནས་གྲོན་ཆུང་གིས་ཕན་འབྲས་ཐོན་པར་བྱས་པས། ནུས་ཁུངས་དང་ཐོན་ཁུངས་ཟད་གྲོན་འགྲོ་ཚད་ཇེ་ཆེར་ཆག་ཡོད། སྐྱེ་ཁམས་སྲུང་སྐྱོང་དང་སླར་གསོའི་ལས་གཞི་གལ་ཆེན་བདེ་བླག་ངང་བསྒྲུབས་པ་དང་། རྩི་ཤིང་ཁྱབ་ཁྱོན་རྒྱུན་མཐུད་ངང་ཇེ་ཆེར་ཕྱིན་ཡོད། སྐྱེ་ཁམས་ཁོར་ཡུག་བཅོས་སྐྱོང་བྱེད་ཤུགས་མངོན་གསལ་ཆེ་རུ་བཏང་བས། ཁོར་ཡུག་གི་གནས་སྟངས་ལེགས་བཅོས་ཐུབ་ཡོད། གནམ་གཤིས་ཀྱི་འགྱུར་བར་སྣེ་ཁྲིད་ནས་ཁ་གཏད་འཇལ་བའི་རྒྱལ་སྤྱིའི་མཉམ་ལས་དེ་གོ་ལ་ཧྲིལ་པོའི་སྐྱེ་ཁམས་དཔལ་ཡོན་ལེགས་སྐྱོང་གི་ཐེ་ཞུགས་པ་དང་། ལེགས་སྐྱེས་འབུལ་མཁན། སྣེ་ཁྲིད་པ་བཅས་གལ་ཆེན་དུ་གྱུར་པ་རེད།

དམག་དཔུང་སྟོབས་ལྡན་དང་དམག་དཔུང་དར་རྒྱས་གཏོང་བའི་རྣམ་པ་གསར་པ་བཏོད་ཡོད། ཀྲུང་གོའི་ཕུགས་འདུན་དང་དམག་དཔུང་སྟོབས་ལྡན་དུ་བསྒྱུར་བའི་ཕུགས་འདུན་མངོན་འགྱུར་བྱེད་པར་དམིགས་ཏེ། དུས་བབ་གསར་པའི་འོག་དམག་དོན་གྱི་འཐབ་འཛིང་བྱེད་ཕྱོགས་གཏན་ལ་ཕབ་ནས། རྒྱལ་སྲུང་དང་དམག་དཔུང་དེང་རབས་ཅན་དུ་འགྱུར་བར་སྐུལ་སྤེལ་གང་ཐུབ་བྱས་ཡོད། ཀུའུ་ཐེན་དུ་དམག་ཡོངས་ཀྱི་ཆབ་སྲིད་ལས་དོན་གྲོས་ཚོགས་སྐོང་འཚོགས་བྱས་པ་དང་། རང་རེའི་ཏང་དང་རང་རེའི་དམག་གི་གཟི་བརྗིད་ལྡན་པའི་སྲོལ་རྒྱུན་དང་སྤྱོད་ཚུལ་བཟང་པོ་སླར་གསོ་དར་སྤེལ་བཏང་བས། མི་དམངས་དམག་དཔུང་གི་ཆབ་སྲིད་སྐྱེ་ཁམས་བཅོས་སྐྱོང་ལ་ཕན་འབྲས་ནུས་ལྡན་ཐོན་ཡོད། རྒྱལ་སྲུང་དང་དམག་དཔུང་སྒྱུར་བཅོས་ལ་ལོ་རྒྱུས་རང་བཞིན་ལྡན་པའི་བར་བརྒལ་ཐུབ་སྟེ། དམག་ཨུད་ཀྱིས་སྤྱི་ཡོངས་ནས་བཀོད་འདོམས་དང་། དམག་ཁུལ་གྱིས་གཙོ་བོར་འཐབ་ཇུས་འདོན་པ། དམག་རིགས་ཀྱི་ཆགས་སྟངས་གསར་པ་གཙོ་བོར་སྐྲུན་པ་བཅས་ཀྱི་རྣམ་པ་ཆགས་པར་བྱས་པ། མི་དམངས་དམག་དཔུང་གི་རྩ་འཛུགས་གྲུབ་གཞི་དང་སྟོབས་ཤུགས་ཀྱི་མ་ལག་གསར་བརྗེའི་ངང་ཚུལ་དང་ལྡན་པའི་བསྐྱར་སྐྲུན་ཡོང་བར་བྱས་ཡོད། དམག་སྦྱོང་དང་དམག་གྲབས་བྱེད་ཤུགས་ཆེ་རུ་བཏང་བ། མཚོ་ཐོག་གི་ཁེ་དབང་སྲུང་བ་དང་། འཇིགས་རྒོལ་ལྷིང་སྐྱོང་། ཉེན་སེལ་གུད་སྐྱོབ། རྒྱལ་སྤྱིའི་ཞི་སྲུང་། ཡ་ཏིང་མཚོ་ཁུག་གི་མཚོ་འགྲུལ་སྲུང་སྐྱེལ། མི་ཆོས་རིང་ལུགས་ཀྱི་རོགས་སྐྱོབ་སོགས་པའི་ལས་འགན་གལ་ཆེན་ཕན་འབྲས་ཐོན་པར་བསྒྲུབས་པ་དང་། གོ་མཚོན་སྒྲིག་ཆས་འཕེལ་རྒྱས་གང་མགྱོགས་བཏང་བས། དམག་དོན་འཐབ་རྩོད་ཀྱི་གྲ་སྒྲིག་ལ་གྲུབ་འབྲས་གལ་ཆེན་ཐོབ་ཡོད། མི་དམངས་དམག་དཔུང་གིས་ཀྲུང་གོའི་ཁྱད་ཆོས་ལྡན་པའི་དམག་དཔུང་སྟོབས་ལྡན་དུ་བསྒྱུར་བའི་བགྲོད་ལམ་ཐོག་གོམ་སྟབས་བརྟན་པོས་སྤོས་ཡོད།

ཤང་ཀང་དང་། ཨའོ་མོན། ཐའེ་ཝན་བཅས་ཀྱི་ལས་དོན་ལ་གྲུབ་འབྲས་གསར་པ་ཐོབ་ཡོད། “རྒྱལ་ཁབ་གཅིག་ལ་ལམ་ལུགས་གཉིས”ཀྱི་བྱེད་ཕྱོགས་ཕྱོགས་ཡོངས་ནས་ལག་བསྟར་གནད་ལ་འཁེལ་བ་བྱས་པ་དང་། རྩ་ཁྲིམས་དང་གཞི་རྩའི་བཅའ་ཁྲིམས་ཀྱིས་ཀྲུང་དབྱང་ལ་ཤང་ཀང་དང་། ཨའོ་མོན་ཕྱོགས་ཡོངས་ནས་བདག་སྐྱོང་བྱེད་པའི་དབང་ཆ་སྤྲད་པ་དམ་པོར་བཟུང་ནས། ནང་ས་དང་ཤང་ཀང་ཨའོ་མོན་ས་ཁུལ་བར་མཉམ་ལས་དང་སྤེལ་རེས་ཟབ་ཏུ་བཏང་བ་དང་། ཤང་ཀང་དང་། ཨའོ་མོན་དར་རྒྱས་དང་བརྟན་ལྷིང་རྒྱུན་འཁྱོངས་བྱས་ཡོད། ཀྲུང་གོ་གཅིག་གི་རྩ་དོན་དང“དགུ་གཉིས་ཐུན་མོང་ལྟ་བ”མཐའ་འཁྱོངས་བྱས་ཏེ། ངོགས་གཉིས་ཀྱི་འབྲེལ་བ་ཞི་བའི་ངང་ནས་འཕེལ་བའི་སྐུལ་མ་བཏང་བ་དང་། ངོགས་གཉིས་པོའི་དཔལ་འབྱོར་དང་རིག་གནས་སྤེལ་རེས་མཉམ་ལས་བྱེད་ཤུགས་ཆེ་རུ་བཏང་ནས། ངོགས་གཉིས་པོའི་དབུ་ཁྲིད་པ་ལོ་རྒྱུས་ཀྱི་ངེས་པ་ལྡན་པའི་ཞལ་འཛོམས་ཡོང་བར་བྱས་ཡོད། ཐའེ་ཝན་གྱི་གནས་བབ་གྱུར་པར་ཁ་གཏད་འཚམ་པོས་འཇལ་བ་དང་། “ཐའེ་ཝན་རང་བཙན”གྱི་ཁ་ཕྲལ་སྟོབས་ཤུགས་ལ་ངོ་རྒོལ་དང་བཀག་འགོག་མཐའ་གཅིག་ཏུ་བྱས་ནས། ཐའེ་ཝན་མཚོ་རྒྱུད་ཀྱི་ཞི་བདེ་དང་བརྟན་ལྷིང་སྲུང་སྐྱོང་ནུས་ལྡན་བྱས་ཡོད།

ཕྱོགས་མཐའ་ཀུན་གྱི་ཕྱི་འབྲེལ་བཀོད་པ་ཟབ་མོར་བཏིངས་ཡོད། ཀྲུང་གོའི་ཁྱད་ཆོས་ཀྱི་རྒྱལ་ཁབ་ཆེན་པོའི་ཕྱི་འབྲེལ་ཕྱོགས་ཡོངས་ནས་ཁྱབ་སྤེལ་བཏང་བས། ཕྱོགས་མཐའ་ཀུན་དང་། རིམ་པ་མང་བ། དངོས་སྣང་ཅན་བཅས་ཀྱི་ཕྱི་འབྲེལ་བཀོད་པ་ཆགས་ཏེ། རང་རྒྱལ་འཕེལ་རྒྱས་གཏོང་བར་ཕྱིའི་མཐུན་རྐྱེན་བཟང་པོ་བསྐྲུན་ཡོད། “རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་གཞི་བཏོན་པ་དང་། ཨེ་ཤེ་ཡའི་རྨང་གཞིའི་སྒྲིག་བཀོད་ཀྱི་མ་དངུལ་འཇོག་པའི་དངུལ་ཁང་འཛུགས་གཉེར་བྱེད་འགོ་བརྩམས་པ། དར་གོས་འགྲུལ་ལམ་གྱི་ཐེབས་རྩ་བཙུགས་པ།

ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པའི་རྒྱལ་ཁ་ཕུ་ཐག་བཅད་དེ་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རྒྱལ་ཁ་རླབས་པོ་ཆེ་བརྩོན་ལེན་བྱེད་དགོས།    

“རྒྱུད་གཅིག་ལམ་གཅིག”གི་རྒྱལ་སྤྱིའི་མཉམ་ལས་ཀྱི་འགོ་གཙོའི་གླེང་སྟེགས་ཐོག་མ་དང་། ཨ་ཤེ་ཡ་དང་ཞི་བདེ་རྒྱ་མཚོའི་དཔལ་འབྱོར་མཉམ་ལས་ཚོགས་པའི་འགོ་ཁྲིད་པའི་དངོས་གཞི་མིན་པའི་གྲོས་ཚོགས། རྒྱལ་ཁབ་ཉི་ཤུ་ཚོགས་པའི་འགོ་ཁྲིད་པའི་ཧང་ཀྲོའུ་ཡི་དབུ་ཚོགས། འབོ་གསེར་རྒྱལ་ཁབ་ཀྱི་དབུ་ཁྲིད་པའི་ཞ་མོན་གྱི་མཇལ་འཕྲད། ཨ་ཤེ་ཡའི་རོགས་རེས་ཡིད་རྟོན་གྲོས་ཚོགས་བཅས་འཚོགས་པ་རེད། མིའི་རིགས་ཀྱི་ལས་དབང་གཅིག་པའི་ཚོགས་སྤྱི་འཛུགས་པ་དར་སྤེལ་བཏང་སྟེ། གོ་ལ་ཧྲིལ་པོ་བཅོས་སྐྱོང་གི་མ་ལག་ལ་འཕོ་འགྱུར་ཡོང་བར་བྱས་ཡོད། རང་རྒྱལ་གྱི་རྒྱལ་སྤྱིའི་ཐོག་གི་བག་ཆགས་འཇོག་ནུས་དང་། བློ་སེམས་འགུག་ཤུགས། མཚོན་པར་བྱེད་ནུས་བཅས་ཇེ་ཆེར་ཕྱིན་ཏེ། འཛམ་གླིང་ཞི་བདེ་དང་འཕེལ་རྒྱས་ཡོང་བར་ལེགས་སྐྱེས་གསར་པ་གལ་ཆེན་ཕུལ་ཡོད།

ཕྱོགས་ཡོངས་ནས་ཏང་ནན་པོར་སྐྱོང་བར་ཕན་འབྲས་ཆེན་པོ་ཐོབ་ཡོད། ཏང་གི་འགོ་ཁྲིད་དང་ཏང་ལེགས་སྐྱོང་བྱེད་ཤུགས་ཕྱོགས་ཡོངས་ནས་ཆེ་རུ་བཏང་ནས། ཏང་དོ་དམ་དང་ཏང་སྐྱོང་ལྷུག་པོའི་སྣང་ཚུལ་མཐའ་གཅིག་ཏུ་བསྒྱུར་བ་རེད། ཏང་ཡོངས་ཀྱིས་ཏང་གི་སྒྲིག་ཡིག་གོང་དུ་བཀུར་བར་སྐུལ་སྤེལ་བཏང་བས། ཆབ་སྲིད་ཀྱི་འདུ་ཤེས་དང་། ཁྱོན་ཡོངས་ཀྱི་འདུ་ཤེས། སྲོག་ཤིང་གི་འདུ་ཤེས། དཔེ་ལྟའི་འདུ་ཤེས་བཅས་ཆེ་རུ་ཕྱིན་པ་དང་། ཏང་ཀྲུང་དབྱང་གི་དབང་གྲགས་དང་ཐུན་མོང་གི་གཅིག་གྱུར་འགོ་ཁྲིད་ལ་སྲུང་སྐྱོང་མཐའ་གཅིག་ཏུ་བྱས་པ། ཏང་གི་ཆབ་སྲིད་སྒྲིག་ཁྲིམས་དང་ཆབ་སྲིད་སྲོལ་ལུགས་དམ་ནན་དུ་བཏང་ནས། ཏང་དོ་དམ་དང་ཏང་ནན་པོར་སྐྱོང་བའི་ཆབ་སྲིད་ཀྱི་འགན་འཁྲི་རིམ་པར་དོན་འཁྱོལ་བྱས་ཡོད། མེ་ལོང་ལ་བལྟ་བ་དང་། ཞྭ་གོས་སྲོང་བ། ལུས་པོ་བཀྲུ་བ། ནད་གཞི་བཅོས་པ་སོགས་ཀྱི་བླང་བྱ་མཐའ་འཁྱོངས་བྱས་ཏེ། ཏང་གི་མང་ཚོགས་ལམ་ཕྱོགས་ཀྱི་སློབ་གསོའི་ལག་ལེན་བྱེད་སྒོ་དང་“དྲང་གསུམ་ནན་གསུམ”གྱི་ཆེད་དོན་སློབ་གསོ་སྤེལ་བ། “སློབ་སྦྱོང་གཉིས་དང་ཚད་ལོན་གཅིག”སློབ་སྦྱོང་དང་སློབ་གསོ་རྒྱུན་ལྡན་ཅན་དང་ལམ་ལུགས་ཅན་དུ་སྐུལ་སྤེལ་གཏོང་བ་བཅས་བྱས་པས། ཏང་ཡོངས་ཀྱི་ཕུགས་བསམ་དང་དད་སེམས་སྔར་ལས་བརྟན་དུ་སོང་བ་དང་། ཏང་གཤིས་སྔར་བས་བརྟན་པོར་གྱུར་ཡོད། དུས་སྐབས་གསར་པའི་ལས་བྱེད་པ་བཟང་པོའི་ཚད་གཞི་མཐའ་འཁྱོངས་བྱས་པས། མི་འདེམས་སྤྱོད་བྱེད་ཚུལ་དང་དར་སྲོལ་མངོན་གསལ་ཇེ་བཟང་དུ་གྱུར་ཡོད། ཏང་འཛུགས་སྐྱོང་གི་ལམ་ལུགས་སྒྱུར་བཅོས་ཟབ་ཏུ་སྤེལ་བ་དང་། ཏང་ནང་གི་ཁྲིམས་སྲོལ་ལམ་ལུགས་ཀྱི་མ་ལག་རྒྱུན་མ་ཆད་པར་འཐུས་ཚང་དུ་གྱུར་ཡོད། ཁྲིམས་འཛིན་སྔོན་ལ་བཏང་སྟེ། མི་དམངས་མང་ཚོགས་ཀྱི་བསམ་འཆར་ཆེ་ཤོས་དང་། ཏང་གི་སྲིད་འཛིན་རྨང་གཞི་ཉམས་ཉེན་ཆེ་བའི་གནད་དོན་མངོན་གསལ་དོད་ཤོས་ཐག་གཅོད་གང་ཐུབ་བྱས་ཡོད། ཀྲུང་དབྱང་གི་གཏན་འབེབས་བརྒྱད་བཏོན་པ་དང་། ཕྱི་ཚུལ་རིང་ལུགས་དང་། དཔོན་ཉམས་རིང་ལུགས། སྐྱིད་འདོད་རིང་ལུགས། བག་མེད་ཆུད་ཟོས་ཀྱི་སྤྱོད་ཚུལ་བཅས་བཅོས་སྐྱོང་གཟབ་ནན་བྱས་ཤིང་། ཁྱད་དབང་ལ་ངོ་རྒོལ་མཐའ་གཅིག་ཏུ་བྱས་ཡོད། སྐོར་གཟིགས་ཀྱི་རྣོ་དབལ་ནུས་པ་མངོན་པར་གསལ་ཏེ། ཀྲུང་དབྱང་དང་ཞིང་ཆེན་རིམ་པའི་ཏང་ཨུད་དུ་སྐོར་གཟིགས་ཡོངས་སུ་ཁྱབ་ཐུབ་པ་བྱུང་ཡོད། རུལ་རྒོལ་བཀག་སྡོམ་ཁུལ་མེད་པ་དང་། ཡོངས་སུ་ཁྱབ་པ། བཟོད་སྒོམ་གཏན་ནས་མེད་པ་བཅས་མཐའ་འཁྱོངས་བྱས་ཏེ། “སྟག་རྡུང”དང་། “སྦྲང་གསོད” “ཝ་རྔོན”བཅས་གཡོ་མེད་མཐའ་འཁྱོངས་བྱས་པས། རུལ་སུངས་མི་ཕོད་པའི་དམིགས་ཡུལ་མངོན་འགྱུར་རགས་ཙམ་ཐུབ་པ་དང་། རུལ་སུངས་མི་རུང་བའི་གཟེབ་མའི་ཁ་ཇེ་དམ་དུ་བཏང་བ། རུལ་སུངས་མི་འདོད་པའི་རགས་སྒོ་རྒྱག་བཞིན་ཡོད་པ། རུལ་རྒོལ་འཐབ་རྩོད་ཀྱིས་གནོན་ཚུལ་ཆགས་པ་མ་ཟད་འཕེལ་རྒྱས་ཀྱང་བརྟན་པོར་ཡོང་བཞིན་ཡོད།

ལོ་ལྔའི་རིང་ང་ཚོའི་ཏང་གིས་ཆབ་སྲིད་ཀྱི་བློ་གཤོག་ཆེན་པོ་དང་འགན་འཁྲི་འཁུར་སེམས་ཆེན་པོ་བཅངས་ཏེ། བསམ་གཞི་གསར་པ་དང་བསམ་ཚུལ་གསར་པ། འཐབ་ཇུས་གསར་པ་བཅས་རབ་དང་རིམ་པ་བཏོན་པ་དང་། བྱེད་ཕྱོགས་དང་སྲིད་ཇུས་གལ་ཆེན་རབ་དང་རིམ་པ་བཏོན་པ། བྱེད་ཐབས་གལ་ཆེན་རབ་དང་རིམ་པ་བཏོན་པ། ལས་དོན་གལ་ཆེན་རབ་དང་རིམ་པ་སྤེལ་ནས། ཡུན་རིང་ཐག་གཅོད་འདོད་ཀྱང་ཐག་མ་ཆོད་པའི་དཀའ་གནད་མང་པོ་ཐག་གཅོད་ཐུབ་པ། སྔོན་ཆད་བསྒྲུབ་སྙམ་ཡང་འགྲུབ་མ་ཐུབ་པའི་དོན་ཆེན་མང་པོ་ཞིག་འགྲུབ་ཐུབ་པ་བཅས་བྱུང་སྟེ། ཏང་དང་རྒྱལ་ཁབ་ཀྱི་བྱ་གཞག་ལ་ལོ་རྒྱུས་ཀྱི་རང་བཞིན་ལྡན་པའི་འཕོ་འགྱུར་ཡོང་བར་བྱས་ཡོད། ལོ་རྒྱུས་ཀྱི་རང་བཞིན་ལྡན་པའི་འཕོ་འགྱུར་འདི་དག་གིས་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་ཡོང་བར་བག་ཆགས་གལ་ཆེན་དང་ཟབ་མོ་བཞག་ཡོད།

ལོ་ལྔའི་རིང་ང་ཚོས་ཏང་ལ་འཕྲད་པའི་ཉམས་ཉེན་དྲག་པོའི་ཚོད་བགམ་དང་ཏང་ནང་ཁུལ་གྱི་གནད་དོན་མངོན་གསལ་དོད་རིགས་ལ་ཁ་གཏད་འཇལ་ཕོད་པར་བྱས་ཏེ། བློ་སྟོབས་དང་གཤིས་རྒྱུད་ཞུམ་མེད་ལ་བརྟེན་ནས་སྤྱོད་བཟང་སྒྲིག་ནན་དང་། རུལ་རྒོལ་ངན་གཅོད་ལ་བརྟེན་ནས། ཏང་དང་རྒྱལ་ཁབ་ཀྱི་ནང་ཁུལ་དུ་གནས་པའི་འགལ་རྐྱེན་ཚབས་ཆེན་བསལ་བས། ཏང་ནང་གི་ཆབ་སྲིད་འཚོ་བའི་གནས་ཚུལ་ཇེ་བཟང་དུ་གྱུར་པ་དང་། ཏང་ནང་གི་ཆབ་སྲིད་སྐྱེ་ཁམས་མངོན་གསལ་ཇེ་བཟང་དུ་གྱུར་པ། ཏང་གི་གསར་དུ་གཏོད་ནུས་དང་། གོང་བུར་འགྲིལ་ཤུགས། འཐབ་ནུས་བཅས་མངོན་གསལ་ཇེ་ཆེར་སོང་བ། ཏང་གི་མཐུན་སྒྲིལ་གཅིག་གྱུར་སྔར་བས་བརྟན་པོར་གྱུར་པ། ཏང་དང་མང་ཚོགས་བར་གྱི་འབྲེལ་བ་ལེགས་བཅོས་མངོན་གསལ་བྱུང་བ། གསར་བརྗེའི་སྦྱོང་བརྡར་ཁྲོད་དུ་ཏང་སྔར་བས་ཞུམ་མེད་དུ་གྱུར་ཅིང་། གསོན་ཤུགས་ཆེན་པོ་གསར་པ་འཕེལ་ཏེ། ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་གཏོང་བར་ཆབ་སྲིད་ཀྱི་འགན་ལེན་གཡོ་མེད་འདོན་སྤྲོད་བྱས་ཡོད།

དུས་མཚུངས་སུ། ང་ཚོའི་ལས་ཀར་སྔར་བཞིན་མི་འདང་ས་མང་པོ་ཡོད་ལ་དཀའ་ངལ་དང་འགྲན་སློང་མི་ཉུང་བ་འཕྲད་བཞིན་པའང་ངེས་པར་དུ་རིག་པ་དྭངས་གསལ་གྱིས་ཤེས་པར་བྱེད་དགོས་པ་གཙོ་བོ་ནི། འཕེལ་རྒྱས་དོ་མི་མཉམ་ཞིང་གང་ལེགས་མ་བྱུང་བའི་གནད་དོན་མངོན་གསལ་དོད་རིགས་འགའ་ཞིག་སྔར་བཞིན་ཐག་ཆོད་མེད་པ་དང་། འཕེལ་རྒྱས་ཀྱི་སྤུས་ཀ་དང་ཕན་འབྲས་སྔར་བཞིན་ཞན་པ། གསར་གཏོད་ཀྱི་ནུས་པ་ཆེན་པོ་མེད་པ། དངོས་གཞིའི་དཔལ་འབྱོར་ཆུ་ཚད་མཐོ་རུ་གཏོང་རྒྱུར་ལུས་པ། སྐྱེ་ཁམས་ཁོར་ཡུག་སྲུང་སྐྱོང་གི་ལས་འགན་ལྕི་ལ་ལམ་ཐག་རིང་བ་དང་གཅིག དམངས་འཚོའི་ཁྱབ་ཁོངས་སུ་སྔར་བཞིན་ཞན་ཆ་མི་ཉུང་བ་མང་པོ་ཡོད་པ་དང་། དབུལ་སྒྲོལ་འགག་སྒྲོལ་གྱི་ལས་འགན་དཀའ་ཚེགས་ཆེ་བ། གྲོང་ཁྱེར་དང་གྲོང་གསེབ་ཀྱི་ས་ཁོངས་འཕེལ་རྒྱས་དང་ཡོང་འབབ་བགོ་བཤའི་ཧེ་བག་སྔར་བཞིན་ཆེ་ཙམ་ཡོད་པ། ལས་ཞུགས་དང་། སློབ་གསོ། སྨན་བཅོས། སྡོད་གནས། རྒན་གསོ་སོགས་པའི་ཐད་མང་ཚོགས་ལ་དཀའ་ངལ་མི་ཉུང་བ་འཕྲད་པ་དང་གཉིས། སྤྱི་ཚོགས་ཀྱི་དཔལ་ཡོན་ཆུ་ཚད་མུ་མཐུད་ཇེ་མཐོར་གཏོང་དགོས་པ་དང་གསུམ། སྤྱི་ཚོགས་ཀྱི་འགལ་བ་དང་གནད་དོན་ལྷན་འདྲེས་ལྷན་འདུས་ཡིན་པ་དང་། ཕྱོགས་ཡོངས་ནས་ཁྲིམས་མཐུན་ལྟར་རྒྱལ་ཁབ་སྐྱོང་བའི་ལས་འགན་སྔར་བཞིན་ལྗིད་རྫོབ་ཆེ་བ། རྒྱལ་ཁབ་བཅོས་སྐྱོང་གི་མ་ལག་དང་བཅོས་སྐྱོང་གི་ནུས་པ་ཆེ་རུ་གཏོང་རྒྱུར་ལུས་པ་དང་བཞི། འདུ་ཤེས་འཛིན་སྟངས་ཁྱབ་ཁོངས་ཀྱི་འཐབ་རྩོད་སྔར་བཞིན་རྙོག་འཛིང་ཆེ་བ་དང་། རྒྱལ་ཁབ་ཀྱི་བདེ་འཇགས་ལ་གནས་ཚུལ་གསར་པ་འཕྲད་པ་དང་ལྔ། སྒྱུར་བཅོས་ཀྱི་བཀོད་པ་དང་། སྲིད་ཇུས། བྱེད་ཐབས་བཅས་གལ་ཆེན་ཁག་གཅིག་དོན་འཁྱོལ་སྔར་ལས་ལྷག་པར་བྱེད་དགོས་པ་དང་དྲུག ཏང་འཛུགས་སྐྱོང་གི་ཐད་ལ་སྔར་བཞིན་ལྷུ་ཚིགས་ཞན་ས་མི་ཉུང་བ་གནས་པ་དང་བདུན་བཅས་རེད། གནད་དོན་འདི་དག་ངེས་པར་དུ་ཐག་གཅོད་གང་ཐུབ་བྱེད་དགོས།

ལོ་ལྔའི་རིང་གི་གྲུབ་འབྲས་ནི་ཏང་ཀྲུང་དབྱང་གི་འགྱུར་མེད་དབུ་ཁྲིད་གནང་བའི་འབྲས་བུ་རེད་ལ་རྒྱལ་ཡོངས་མི་རིགས་ཁག་གི་མི་དམངས་ཀྱིས་ཐུན་མོང་ཐོག་འབད་བརྩོན་བྱས་པའི་འབྲས་བུ་དེ་བས་ཀྱང་རེད། ངས་ཀྲུང་གུང་ཀྲུང་དབྱང་གི་ཚབ་ཞུས་ནས། རྒྱལ་ཡོངས་མི་རིགས་ཁག་གི་མི་དམངས་དང་། དམངས་གཙོའི་ཏང་ཤོག་ཁག མི་དམངས་ཀྱི་ཚོགས་པ་ཁག ལས་རིགས་ཁག་གི་རྒྱལ་གཅེས་མི་དྲག་བཅས་དང་། ཤང་ཀང་དམིགས་བསལ་སྲིད་འཛིན་ཁུལ་གྱི་སྤུན་ཟླ་དང་། ཨའོ་མོན་དམིགས་བསལ་སྲིད་འཛིན་ཁུལ་གྱི་སྤུན་ཟླ། སྤུན་ཟླ་ཐའེ་ཝན་པ། དེ་བཞིན་རྒྱ་ཆེའི་ཕྱིར་སྡོད་སྤུན་ཟླ། ཀྲུང་གོ་དེང་རབས་ཅན་དུ་འཛུགས་སྐྲུན་བྱེད་པར་ཐུགས་ཁུར་དང་རོགས་སྐྱོར་གནང་མཁན་རྒྱལ་ཁབ་ཁག་གི་གྲོགས་པོ་བཅས་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།

བློ་མཐུན་རྣམ་པ། སྒྱུར་བཅོས་སྒོ་འབྱེད་བྱས་མ་ཐག་པའི་སྐབས་སུ། ང་ཚོའི་ཏང་གིས་རང་ཉིད་ཀྱི་ལམ་བུར་སྐྱོད་དགོས་པ་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་འཛུགས་སྐྲུན་བྱེད་དགོས་པའི་འབོད་སྐུལ་རླབས་པོ་ཆེ་གནང་བ་རེད། སྐབས་དེའི་དུས་ནས་བཟུང་སྟེ། ང་ཚོའི་ཏང་གིས་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་དེ་འབད་འཐབ་ལྷོད་མེད་བྱས་པ་དང་། རང་རྒྱལ་གྱི་དཔལ་འབྱོར་སྟོབས་ཤུགས་དང་། ཚན་རྩལ་སྟོབས་ཤུགས། རྒྱལ་སྲུང་སྟོབས་ཤུགས། ཕྱོགས་བསྡུས་རྒྱལ་སྟོབས་བཅས་འཛམ་གླིང་གི་མདུན་གྲལ་དུ་ཚུད་པར་བྱེད་དགོས་པའི་སྐུལ་མ་བཏང་བ་དང་། རང་རྒྱལ་གྱི་རྒྱལ་སྤྱིའི་གོ་གནས་སྔར་མེད་མཐོ་རུ་འགྲོ་བར་བྱས་པས། ཏང་གི་རྣམ་པ་དང་། རྒྱལ་ཁབ་ཀྱི་རྣམ་པ། མི་དམངས་ཀྱི་རྣམ་པ། དམག་དཔུང་གི་རྣམ་པ། ཀྲུང་ཧྭ་མི་རིགས་ཀྱི་རྣམ་པ་བཅས་ལ་སྔར་མེད་ཀྱི་འགྱུར་བ་བྱུང་སྟེ། ཀྲུང་ཧྭ་མི་རིགས་རྣམ་པ་གསར་རྐྱང་གི་ཐོག་ནས་འཛམ་གླིང་གི་ཤར་ཕྱོགས་སུ་ལངས་པ་རེད།

ཡུན་རིང་འབད་བརྩོན་བྱས་པར་བརྟེན་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དུས་རབས་གསར་པར་སྐྱོད་འགོ་ཚུགས་པ་འདི་ནི་རང་རྒྱལ་འཕེལ་རྒྱས་གཏོང་བའི་ལོ་རྒྱུས་ཀྱི་ཁ་ཕྱོགས་གསར་པ་རེད།

ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དུས་རབས་གསར་པར་བསྐྱོད་པའི་ཐོག་ནས། ཉེ་རབས་ནས་བཟུང་སྟེ་གེགས་བར་མང་དུ་བྱུང་བའི་ཀྲུང་ཧྭ་མི་རིགས་ཡར་ལངས་ཀྱི་སྔུན་བསུས་པ་དང་། ཕྱུག་པོར་གྱུར་པ་ནས་སྟོབས་ཆེར་གྱུར་པའི་མཆོང་སྐྱོད་རླབས་པོ་ཆེ་བྱས་པ། ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་འོད་སྟོང་ལྡན་པའི་མདུན་ལྗོངས་ཀྱི་སྔུན་བསུས་པ་བཅས་མཚོན་པ་དང་། དུས་རབས་ཉེར་གཅིག་པའི་ཀྲུང་གོར་ཚན་རིག་དང་མཐུན་པའི་སྤྱི་ཚོགས་རིང་ལུགས་ཀྱི་གསོན་ཤུགས་ཆེས་ཆེར་རྒྱས་ཏེ། འཛམ་གླིང་ཐོག་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དར་ཆ་རླབས་པོ་ཆེ་མཐོན་པོར་བསྒྲེངས་པ་མཚོན་པ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བགྲོད་ལམ་དང་། རིགས་པའི་གཞུང་ལུགས། ལམ་ལུགས། རིག་གནས་བཅས་རྒྱུན་མ་ཆད་པར་འཕེལ་རྒྱས་བྱུང་སྟེ། དར་རྒྱས་འགྲོ་བཞིན་པའི་རྒྱལ་ཁབ་དེང་རབས་ཅན་གྱི་བགྲོད་ལམ་དུ་སྐྱོད་ཐབས་རྒྱ་བསྐྱེད་དེ། འཛམ་གླིང་ཐོག་འཕེལ་རྒྱས་མགྱོགས་པོ་ཡོང་རེ་བྱེད་པ་མ་ཟད། རང་ཚུགས་ཀྱང་རྒྱུན་འཁྱོངས་ཡོང་རེ་འདོད་པའི་རྒྱལ་ཁབ་དང་མི་རིགས་ལ་ཁྱོན་ཡོངས་ནས་གདམ་ག་གསར་རྐྱང་མཁོ་འདོན་བྱས་ཏེ། མིའི་རིགས་ཀྱི་དཀའ་ངལ་སེལ་ཕྱིར་ཀྲུང་གོའི་བློ་རིག་དང་། ཀྲུང་གོའི་འཆར་གཞི་མཁོ་འདོན་བྱས་ཡོད།

དུས་རབས་གསར་པ་འདི་ནི་སྔ་མཐུད་ཕྱི་སྐྱོང་དང་། སྔར་སོང་རྒྱུན་འཛིན་གྱིས་མ་འོངས་གསར་དུ་གཏོད་པ་དང་། ལོ་རྒྱུས་ཀྱི་ཆ་རྐྱེན་གསར་པའི་འོག་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རྒྱལ་ཁ་རླབས་པོ་ཆེ་མུ་མཐུད་ནས་ལེན་པའི་དུས་རབས་ཡིན་པ་དང་། འབྱོར་འབྲིང་སྤྱི་ཚོགས་ཕྱོགས་ཡོངས་ནས་བསྐྲུན་པའི་རྒྱལ་ཁ་ཕུ་ཐག་བཅད་དེ་འཕྲལ་མར་སྤྱི་ཚོགས་རིང་ལུགས་ཀྱི་དེང་རབས་ཅན་དུ་འགྱུར་བའི་རྒྱལ་ཁབ་སྟོབས་ལྡན་ཕྱོགས་ཡོངས་ནས་བསྐྲུན་པའི་དུས་རབས་དང་། རྒྱལ་ཡོངས་མི་རིགས་ཁག་གི་མི་དམངས་ཀྱིས་མཐུན་སྒྲིལ་འབད་འཐབ་དང་། བདེ་སྐྱིད་ཀྱི་འཚོ་བ་རྒྱུན་མ་ཆད་པར་བསྐྲུན་ཏེ་མི་དམངས་ཡོངས་རྫོགས་རིམ་བཞིན་ཐུན་མོང་དུ་ཕྱུག་པོར་འགྱུར་བར་བྱེད་པའི་དུས་རབས། ཀྲུང་ཧྭའི་བུ་ཕྲུག་ཡོངས་ཀྱིས་སེམས་མཐུན་སྟོབས་སྒྲིལ་དང་། ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་ཀྲུང་གོའི་ཕུགས་འདུན་མངོན་དུ་འགྱུར་བར་སྤྲོ་བའི་དུས་རབས། རང་རྒྱལ་འཛམ་གླིང་གི་གར་སྟེགས་དང་ཉིན་བཞིན་ཉེ་བར་བསྐྱོད་དེ། མིའི་རིགས་ལ་ལེགས་སྐྱེས་སྔར་ལས་ལྷག་པ་ཆད་མེད་འབུལ་བའི་དུས་རབས་བཅས་རེད།

ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དུས་རབས་གསར་པར་བསྐྱོད་པ་དང་། རང་རྒྱལ་སྤྱི་ཚོགས་ཀྱི་འགལ་བ་གཙོ་བོ་མི་དམངས་ཀྱི་ཉིན་བཞིན་ཆེ་རུ་འགྲོ་བའི་མཛེས་སྡུག་ལྡན་པའི་འཚོ་བའི་དགོས་མཁོ་དང་དོ་མི་སྙོམས་པ་དང་འཐུས་སྒོ་མི་ཚང་བའི་འཕེལ་རྒྱས་དབར་གྱི་འགལ་བར་འགྱུར་ཡོད། རང་རྒྱལ་གྱིས་མི་གྲངས་དུང་ཕྱུར་བཅུ་གྲངས་འགའི་ལྟོ་གོས་ཀྱི་དཀའ་ངལ་བརྟན་པོའི་ངང་ནས་བསལ་བ་དང་། སྤྱིའི་ཆ་ནས་འབྱོར་འབྲིང་མངོན་འགྱུར་བྱུང་སྟེ། མི་རིང་བར་འབྱོར་འབྲིང་སྤྱི་ཚོགས་ཕྱོགས་ཡོངས་ནས་འཛུགས་སྐྲུན་ཐུབ་པ་དང་། མི་དམངས་ཀྱི་མཛེས་སྡུག་ལྡན་པའི་འཚོ་བའི་དགོས་མཁོ་ཉིན་བཞིན་ཆེ་རུ་ཕྱིན་ཏེ། དངོས་པོའི་རིག་གནས་འཚོ་བར་བླང་བྱ་སྔར་ལས་ཆེན་པོ་བཏོན་ཡོད་ལ། དམངས་གཙོ་དང་། ཁྲིམས་སྐྱོང་། དྲང་གཞག དྲང་བདེན། བདེ་འཇགས། ཁོར་ཡུག་སོགས་པའི་བླང་བྱའང་ཉིན་བཞིན་ཆེ་རུ་འགྲོ་བཞིན་ཡོད། དུས་མཚུངས། རང་རྒྱལ་སྤྱི་ཚོགས་ཀྱི་ཐོན་སྐྱེད་ནུས་ཤུགས་ཀྱི་ཆུ་ཚད་སྤྱི་ཡོངས་ནས་མངོན་གསལ་ཆེ་རུ་ཕྱིན་པ་དང་། ཕྱོགས་མང་པོའི་ཐད་སྤྱི་ཚོགས་ཀྱི་ཐོན་སྐྱེད་ནུས་ཤུགས་འཛམ་གླིང་གི་མདུན་གྲལ་དུ་སླེབས་པ། དེ་བས་ཀྱང་མངོན་གསལ་ཆེ་བའི་གནད་དོན་ནི་འཕེལ་རྒྱས་དོ་མི་མཉམ་ཞིང་གང་ལེགས་མ་བྱུང་བ་དེ་རེད། འདི་ནི་མི་དམངས་ཀྱི་མཛེས་སྡུག་ལྡན་པའི་འཚོ་བའི་དགོས་མཁོ་ཉིན་བཞིན་ཆེ་རུ་འགྲོ་ཚུལ་བསྐང་བར་ཚོད་འཛིན་གྱི་རྒྱུ་རྐྱེན་གལ་ཆེན་དུ་གྱུར་ཡོད།

རང་རྒྱལ་སྤྱི་ཚོགས་ཀྱི་འགལ་བ་གཙོ་བོར་འགྱུར་བ་བྱུང་བ་ནི་ཁྱོན་ཡོངས་དང་འབྲེལ་བ་ཡོད་པའི་ལོ་རྒྱུས་རང་བཞིན་གྱི་འགྱུར་བ་ཡིན་ཞིང་། ཏང་དང་རྒྱལ་ཁབ་ཀྱི་ལས་དོན་ལ་བླང་བྱ་གསར་པ་མང་པོ་བཏོན་པ་ངེས་པར་དུ་ཤེས་དགོས། ང་ཚོས་འཕེལ་རྒྱས་ལ་མུ་མཐུད་ནས་སྐུལ་སྤེལ་གཏོང་བའི་རྨང་གཞིའི་ཐོག འཕེལ་རྒྱས་དོ་མི་མཉམ་ཞིང་གང་ལེགས་མ་བྱུང་བའི་དཀའ་ངལ་སེལ་གང་ཐུབ་བྱེད་པ་དང་། འཕེལ་རྒྱས་ཀྱི་སྤུས་ཚད་དང་ཕན་འབྲས་ཇེ་ཆེར་བཏང་ནས། དཔལ་འབྱོར་དང་། ཆབ་སྲིད། རིག་གནས། སྤྱི་ཚོགས། སྐྱེ་ཁམས་སོགས་པའི་ཐད་ཀྱི་མི་དམངས་ཀྱི་དགོས་མཁོ་ཉིན་བཞིན་ཆེ་རུ་འགྲོ་ཚུལ་སྔར་ལས་ལྷག་པར་བསྐངས་ཏེ། མི་ཕྱོགས་ཡོངས་ནས་འཕེལ་རྒྱས་སྔར་ལྷག་འགྲོ་བ་དང་། སྤྱི་ཚོགས་ཕྱོགས་ཡོངས་ནས་ཡར་ཐོན་སྔར་ལྷག་ཡོང་བར་བྱེད་དགོས།

རང་རྒྱལ་སྤྱི་ཚོགས་ཀྱི་འགལ་བ་གཙོ་བོར་འགྱུར་བ་བྱུང་བ་དང་བསྟུན་ནས། ང་ཚོས་སྤྱི་ཚོགས་རིང་ལུགས་གནས་ཡུལ་གྱི་ལོ་རྒྱུས་དུས་རིམ་ལ་བརྡར་ཤ་གཅོད་པར་འགྱུར་བ་བྱུང་མེད་པར། རང་རྒྱལ་སྔར་བཞིན་སྤྱི་ཚོགས་རིང་ལུགས་ཀྱི་ཐོག་མའི་དུས་རིམ་དུ་གནས་པ་མ་ཟད་རྒྱུན་རིང་གནས་རྒྱུ་ཡིན་པའི་རྒྱལ་ཁབ་ཀྱི་གཞི་རྩའི་གནས་ཚུལ་ལ་འགྱུར་བ་བྱུང་མེད་པ་དང་། རང་རྒྱལ་ནི་འཛམ་གླིང་ཐོག་དར་རྒྱས་འགྲོ་བཞིན་པའི་རྒྱལ་ཁབ་ཆེ་ཤོས་ཡིན་པའི་རྒྱལ་སྤྱིའི་གོ་གནས་ལ་འགྱུར་བ་བྱུང་མེད་པ་ངེས་པར་དུ་ཤེས་དགོས། ཏང་ཡོངས་ཀྱིས་སྤྱི་ཚོགས་རིང་ལུགས་ཀྱི་ཐོག་མའི་དུས་རིམ་གྱི་གཞི་རྩའི་རྒྱལ་ཇུས་འདི་ཁོང་དུ་བརྟན་པོར་ཆུད་དགོས་པ་དང་། སྤྱི་ཚོགས་རིང་ལུགས་ཀྱི་ཐོག་མའི་དུས་རིམ་གྱི་དོན་དངོས་ཆེ་ཤོས་འདིར་རྩ་བ་བརྟན་པོར་འཛུགས་པ། ཏང་དང་རྒྱལ་ཁབ་ཀྱི་སྲོག་རྩ་དང་། མི་དམངས་བདེ་སྐྱིད་ཡོང་བ་གཞི་རྩར་གྱུར་པའི་ཏང་གི་གཞི་རྩའི་ལམ་ཕྱོགས་འདི་མཐའ་འཁྱོངས་གཡོ་མེད་བྱས་ཏེ། རྒྱལ་ཡོངས་མི་རིགས་ཁག་གི་མི་དམངས་ལ་འགོ་ཁྲིད་དང་མཐུན་སྒྲིལ་བྱས་ནས། དཔལ་འབྱོར་འཛུགས་སྐྲུན་ལྟེ་བར་འཛིན་པ་དང་། གཞི་རྩའི་རྩ་དོན་བཞི་མཐའ་འཁྱོངས། སྒྱུར་བཅོས་སྒོ་འབྱེད་མཐའ་འཁྱོངས་བཅས་བྱས་ཏེ། རང་སྟོབས་རང་སྤེལ་དང་དཀའ་སྤྱད་འབད་བརྩོན་གྱིས་རང་རྒྱལ་འདི་ཉིད་འབྱོར་ཕྱུག་དང་། དམངས་གཙོ། ཤེས་དཔལ། ཞི་མཐུན། མཛེས་སྡུག་བཅས་ཀྱི་སྤྱི་ཚོགས་རིང་ལུགས་ཀྱི་དེང་རབས་ཅན་དུ་འགྱུར་བའི་རྒྱལ་ཁབ་སྟོབས་དང་ལྡན་པར་བསྐྲུན་པའི་འབད་འཐབ་བྱེད་དགོས།

བློ་མཐུན་རྣམ་པ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དུས་རབས་གསར་པར་སླེབས་ཤིང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འཕེལ་རྒྱས་ཀྱི་ལོ་རྒྱུས་ཐོག་དང་། ཀྲུང་ཧྭ་མི་རིགས་འཕེལ་རྒྱས་ཀྱི་ལོ་རྒྱུས་ཐོག་དོན་སྙིང་འགངས་ཆེན་ལྡན་པ་དང་། འཛམ་གླིང་གི་སྤྱི་ཚོགས་རིང་ལུགས་འཕེལ་རྒྱས་ཀྱི་ལོ་རྒྱུས་ཐོག་དང་། མིའི་རིགས་ཀྱི་སྤྱི་ཚོགས་འཕེལ་རྒྱས་ཀྱི་ལོ་རྒྱུས་ཐོག་ལའང་དོན་སྙིང་འགངས་ཆེན་ལྡན་པ་རེད། ཏང་ཡོངས་ཀྱིས་ཡིད་ཆེས་ཇེ་བརྟན་དང་། སྙིང་སྟོབས་ཆེར་བསྐྱེད་ཐོག་ནས། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལ་གསོན་ཤུགས་སྔར་ལས་ཆེན་པོ་རྒྱས་པར་བྱེད་དགོས།

གཉིས། དུས་རབས་གསར་པའི་ཀྲུང་གོ་གུང་ཁྲན་ཏང་གི་ལོ་རྒྱུས་འགན་འཁྲི།

ལོ་ངོ་བརྒྱའི་གོང་ལ། ཟླ་བ་བཅུ་པའི་གསར་བརྗེའི་མེ་སྒྱོགས་རྒྱག་ཐེངས་གཅིག་ལ་ཀྲུང་གོར་མར་ཁེ་སི་ལེ་ཉིང་རིང་ལུགས་བསྐྱལ་ཡོང་བ་རེད། ཀྲུང་གོའི་སྔོན་ཐོན་ཅན་ཚོས་མར་ཁེ་སི་ལེ་ཉིང་རིང་ལུགས་ཀྱི་ཚན་རིག་དང་མཐུན་པའི་བདེན་དོན་ཁྲོད་ནས་ཀྲུང་གོའི་གནད་དོན་ཐག་གཅོད་པའི་འགྲོ་ལམ་རྙེད་པ་རེད། ཉེ་རབས་ནས་བཟུང་ཀྲུང་གོའི་སྤྱི་ཚོགས་ཀྱི་ལས་འགུལ་དྲག་པོའི་ནང་དང་། ཀྲུང་གོའི་མི་དམངས་ཀྱིས་བཀས་བཀོད་རྒྱུད་འཛིན་གྱི་དབང་སྒྱུར་དང་ཕྱི་རོལ་ནས་ཡོང་བའི་བཙན་འཛུལ་ལ་འཐབ་རྩོད་དྲག་པོ་བྱས་ཤིང་།མར་ཁེ་སི་ལེ་ཉིང་རིང་ལུགས་དང་ཀྲུང་གོའི་བཟོ་པའི་ལས་འགུལ་ཟུང་འབྲེལ་བྱེད་རིང་དུ། 1921ལོར་ཀྲུང་གོ་གུང་ཁྲན་ཏང་དབུ་བརྙེས་པ་རེད། དུས་དེ་ནས་བཟུང་། ཀྲུང་གོའི་མི་དམངས་ཀྱིས་མི་རིགས་རང་བཙན་དང་། མི་དམངས་བཅིངས་འགྲོལ། རྒྱལ་ཁབ་སྟོབས་འབྱོར་ལྡན་པ། མི་དམངས་བདེ་སྐྱིད་ཡོང་བ་བཅས་ཀྱི་འཐབ་རྩོད་བྱེད་པར་རྟེན་གཞི་བྱུང་བས། ཀྲུང་གོའི་མི་དམངས་བསམ་པའི་ཐོག་ནས་གཞན་དབང་ནས་རང་འགུལ་དུ་གྱུར་པ་རེད།

ཀྲུང་ཧྭ་མི་རིགས་ལ་བགྲང་བྱ་ལྔ་སྟོང་ལྷག་གི་དཔལ་ཡོན་གྱི་ལོ་རྒྱུས་ལྡན་ཞིང་། འོད་སྟོང་འབར་བའི་ཀྲུང་ཧྭའི་དཔལ་ཡོན་བསྐྲུན་ཡོད་ལ། མིའི་རིགས་ལ་ལེགས་སྐྱེས་གཟེངས་སུ་ཐོན་པ་ཕུལ་ཡོད་པས་འཛམ་གླིང་ཐོག་གི་མི་རིགས་རླབས་པོ་ཆེར་གྱུར་པ་རེད། ཉལ་ཐའི་དམག་འཁྲུག་ལངས་རྗེས། ཀྲུང་གོ་འདི་ཉིད་ནང་རྩོད་ཕྱི་འཁྲུག་གི་ཉམས་ཞན་གནས་སུ་ལྷུངས་ཤིང་། ཀྲུང་གོའི་མི་དམངས་ཀྱིས་ཟིང་འཁྲུག་བསྟུད་མར་ལངས་པ་དང་། རི་ཀླུང་གཏོར་སྐྱོན་ཐེབས་པ། མི་དམངས་འཚོ་ཐབས་བྲལ་བ་བཅས་ཡ་ང་བའི་གནས་ཀྱི་སྡུག་བསྔལ་ཧ་ཅང་ཆེན་པོ་མྱངས་པ་རེད། མི་རིགས་བསྐྱར་དར་ཡོང་ཕྱིར་སྤྱོད་བཟང་འདུན་ཆེའི་མི་སྣ་གྲངས་ལས་འདས་པས་དཔའ་ངར་ཞུམ་མེད་དང་། སྔོན་འགྱེལ་རྗེས་མཐུད་ཀྱིས་དགའ་སྐྱོ་གཉིས་ལྡན་གྱི་འཐབ་རྩོད་བྱས་ཡོད་ལ། ཚོད་ལྟ་འདྲ་མིན་སྣ་ཚོགས་པའང་བྱས་ཀྱང་། མཐའ་མར་ཀྲུང་གོ་རྙིང་པའི་སྤྱི་ཚོགས་ཀྱི་ངོ་བོ་དང་ཀྲུང་གོའི་མི་དམངས་ཀྱི་ཉམ་ཐག་ལས་དབང་བསྒྱུར་ཐུབ་མེད་པ་རེད།

ཀྲུང་ཧྭ་མི་རིགས་རླབས་ཆེན་བསྐྱར་དར་ཡོང་བར་བྱ་རྒྱུ་ནི་ཉེ་རབས་ནས་བཟུང་ཀྲུང་ཧྭ་མི་རིགས་ཀྱི་ཕུགས་འདུན་རླབས་ཆེ་ཤོས་ཤིག་རེད། ཀྲུང་གོ་གུང་ཁྲན་ཏང་དབུ་བརྙེས་མ་ཐག་པ་ནས་གུང་ཁྲན་རིང་ལུགས་མངོན་འགྱུར་བྱ་རྒྱུ་དེ་ཏང་གི་ཕུགས་བསམ་ཆེ་ཤོས་དང་མཐར་ཐུག་གི་དམིགས་ཡུལ་དུ་བཟུང་ནས། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་བྱེད་པའི་ལོ་རྒྱུས་ཀྱི་ལས་འགན་དེ་འགྱོད་སེམས་མེད་པའི་སྒོ་ནས་ཕྲག་ཏུ་ཁུར་ཏེ། མི་དམངས་ལ་མཐུན་སྒྲིལ་དང་སྣེ་ཁྲིད་ནས་དཀའ་སྤྱད་ཚད་མེད་ཀྱི་འཐབ་རྩོད་བྱས་པ་དང་། རི་ཀླུང་ཁྱུར་མིད་གཏོང་ཐུབ་པ་ལྟ་བུའི་བརྗིད་ཉམས་ཆེ་བའི་ལོ་རྒྱུས་ཀྱི་སྙན་རྩོམ་བརྩམས་ཡོད།

ཀྲུང་ཧྭ་མི་རིགས་རླབས་ཆེན་བསྐྱར་དར་མངོན་འགྱུར་བྱེད་སྙམ་ན། ཀྲུང་གོའི་མི་དམངས་ཀྱི་མགོ་བོ་གནོན་པའི་བཙན་རྒྱལ་རིང་ལུགས་དང་། བཀས་བཀོད་རྒྱུད་འཛིན་རིང་ལུགས། དཔོན་ངན་མ་རྩའི་རིང་ལུགས་བཅས་པའི་རི་བོ་ཆེན་པོ་གསུམ་མགོ་རྟིང་བསློགས་ཏེ་མི་རིགས་རང་བཙན་དང་། མི་དམངས་བཅིངས་འགྲོལ། རྒྱལ་ཁབ་གཅིག་གྱུར། སྤྱི་ཚོགས་བརྟན་ལྷིང་བཅས་ཡོང་བར་བྱེད་དགོས་པ་ང་ཚོའི་ཏང་ལ་ངོས་འཛིན་གཏིང་ཟབ་བྱུང་ཡོད་པ་རེད། ང་ཚོའི་ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་དེ་གྲོང་གསེབ་ལ་བརྟེན་ནས་གྲོང་ཁྱེར་མཐའ་སྐོར་བ་དང་། དྲག་ཤུགས་ཀྱིས་སྲིད་དབང་འཕྲོག་ལེན་བྱེད་པའི་གསར་བརྗེའི་འགྲོ་ལམ་ཡང་དག་ཅིག་རྙེད་པ་དང་། ལོ་ངོ་ཉེར་བརྒྱད་རིང་ཁྲག་བཏོན་དམར་འཛིང་བྱས་ནས་དམངས་གཙོ་རིང་ལུགས་གསར་པའི་གསར་བརྗེ་ལེགས་འགྲུབ་བྱུང་བ་དང་། 1949ལོར་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་བཙུགས་པས། ཀྲུང་གོ་འདི་ཉིད་ལོ་ངོ་སྟོང་ཕྲག་འགའི་བཀས་བཀོད་རྒྱུད་འཛིན་གྱི་སྲིད་དབང་སྒེར་འཛིན་ནས་མི་དམངས་དམངས་གཙོའི་ཕྱོགས་སུ་མཆོང་སྐྱོད་རླབས་པོ་ཆེ་ཐུབ་པ་བྱུང་བ་རེད།

ཀྲུང་ཧྭ་མི་རིགས་རླབས་ཆེན་བསྐྱར་དར་ཡོང་བར་བྱེད་སྙམ་ན། རང་རྒྱལ་གྱི་དོན་དངོས་དང་འཚམ་པའི་སྔོན་ཐོན་གྱི་སྤྱི་ཚོགས་ལམ་ལུགས་ཤིག་ངེས་པར་འཛུགས་དགོས་པ་ང་ཚོའི་ཏང་ལ་ངོས་འཛིན་གཏིང་ཟབ་བྱུང་བ་རེད། ང་ཚོའི་ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་དེ་སྤྱི་ཚོགས་རིང་ལུགས་ཀྱི་གསར་བརྗེ་ལེགས་འགྲུབ་བྱས་པ་དང་། སྤྱི་ཚོགས་རིང་ལུགས་ཀྱི་གཞི་རྩའི་ལམ་ལུགས་གཏན་ཁེལ་བྱས་པ། སྤྱི་ཚོགས་རིང་ལུགས་ཀྱི་འཛུགས་སྐྲུན་ལ་སྐུལ་སྤེལ་བཏང་བ། ཀྲུང་ཧྭ་མི་རིགས་ལ་ལོ་རྒྱུས་བྱུང་ཚུན་དུ་སྤྱི་ཚོགས་ཀྱི་འཕོ་འགྱུར་ལེགས་འགྲུབ་རྒྱ་ཆེ་ཤོས་དང་གཏིང་ཟབ་ཤོས་བྱུང་བས། དེང་རབས་ཀྱི་ཀྲུང་གོ་གོང་སྤེལ་དང་ཡར་རྒྱས་ཀྱི་བྱ་བ་མཐའ་དག་ལ་ཆབ་སྲིད་ཀྱི་རྩ་བའི་རྨང་གཞི་དང་ལམ་ལུགས་ཀྱི་རྨང་གཞི་བཏིང་བས། ཉེ་རབས་ཀྲུང་ཧྭ་མི་རིགས་ཇེ་ཉམས་སུ་འགྲོ་བ་ནས་ལས་དབང་རྩ་བ་ནས་བསྒྱུར་ཐུབ་སྟེ། རྒྱུན་མཐུད་ངང་སྟོབས་འབྱོར་མངའ་ཐང་རྒྱས་པའི་ཕྱོགས་སུ་མཆོང་སྐྱོད་རླབས་པོ་ཆེ་བྱེད་ཐུབ་པ་རེད།

ཀྲུང་ཧྭ་མི་རིགས་རླབས་ཆེན་བསྐྱར་དར་ཡོང་བར་བྱེད་སྙམ་ན། ངེས་པར་དུ་དུས་རབས་ཀྱི་རླབས་རྒྱུན་དང་བསྟུན་པ་དང་། མི་དམངས་ཀྱི་འདོད་བློ་དང་མཐུན་པ། སྒྱུར་བཅོས་སྒོ་འབྱེད་ཕོད་པ་བཅས་བྱས་ཏེ། ཏང་དང་མི་དམངས་ཀྱི་བྱ་གཞག་ལ་ཐོག་མཐའ་བར་གསུམ་དུ་དཔའ་ངར་ཆེར་སྐྱེད་ཀྱིས་མདུན་དུ་སྐྱོད་ཐུབ་པའི་སྒུལ་ཤུགས་ཆེན་པོ་ཞིག་གིས་ཁེངས་སུ་འཇུག་དགོས་པ་ང་ཚོའི་ཏང་ལ་ངོས་འཛིན་གཏིང་ཟབ་བྱུང་བ་རེད། ང་ཚོའི་ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་དེ་སྒྱུར་བཅོས་སྒོ་འབྱེད་ཀྱི་གསར་བརྗེ་རླབས་པོ་ཆེ་གསར་པ་བྱེད་བཞིན་ཡོད་པ་དང་། རྒྱལ་ཁབ་དང་མི་རིགས་འཕེལ་རྒྱས་ཡོང་བར་བཀག་འགོག་བྱེད་པའི་བསམ་བློ་དང་སྒྲིག་སྲོལ་གྱི་འགལ་རྐྱེན་མཐའ་དག་སེལ་ནས། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་འགྲོ་ལམ་བཏོད་པས། ཀྲུང་གོ་འདི་ཉིད་གོམ་སྟོབས་ཆེན་པོའི་ངང་ནས་དུས་རབས་དང་འགྲོགས་ནས་སྐྱོད་ཐུབ་པ་བྱུང་བ་རེད།

ལོ་ངོ96རིང་ལ། ཀྲུང་ཧྭ་མི་རིགས་རླབས་ཆེན་བསྐྱར་དར་ཡོང་བའི་ལོ་རྒྱུས་ཀྱི་ལས་འགན་མངོན་འགྱུར་བྱེད་ཆེད། སྟོབས་ཆེ་ཆུང་གང་ཡིན་དང། གནས་བབ་བཟང་ངན་གང་ཡིན་ལ་མ་བལྟོས་པར། ང་ཚོའི་ཏང་གིས་ག་དུས་ཡིན་ཡང་ཐོག་མའི་བསམ་འདུན་དང་། དམ་བཅའ་མ་བསྒྱུར་བར། མི་དམངས་ལ་མཐུན་སྒྲིལ་དང་སྣེ་ཁྲིད་དེ་དཀའ་ཉེན་མང་པོ་མྱངས་པ་དང་། བློས་གཏོང་ཆེན་པོ་བྱས་པ། ཀྱག་ཀྱོག་གི་རིགས་བརྒྱུད་ཕོད་པ། ནོར་འཁྲུལ་ཡོ་བསྲང་ཕོད་པ་བཅས་བྱས་པས། གཏོར་ཐབས་བྲལ་བ་ལྟ་བུར་སྣང་བའི་དཀའ་གནད་མང་པོ་སེལ་ཐུབ་པ་དང་། ཕུན་སུམ་ཚོགས་པའི་ལོ་རྒྱུས་དེབ་ཐེར་ཐོག་འགོད་རུང་བའི་ས་སྟེང་གི་བྱས་རྗེས་ངོ་མཚར་ཅན་གཅིག་རྗེས་གཉིས་མཐུད་དུ་གསར་སྐྲུན་བྱས་ཡོད།

བློ་མཐུན་རྣམ་པ། དེ་རིང་། ང་ཚོ་ལོ་རྒྱུས་ཐོག་གི་དུས་སྐབས་གང་ཞིག་ལས་ཀྱང་ཀྲུང་ཧྭ་མི་རིགས་རླབས་ཆེན་བསྐྱར་དར་མངོན་འགྱུར་ཡོང་བའི་དམིགས་འབེན་འགྲུབ་པ་དང་ཐག་ཉེ་བ་དང་། གདེང་ཚོད་དང་ནུས་པ་དེ་ལས་ཆེ་བས་ཁེངས་ཡོད། ལེ་དབར་བརྒྱ་བསྐྱོད་དགུ་བཅུ་ལམ་ཕྱེད་ཡིན། ཀྲུང་ཧྭ་མི་རིགས་རླབས་ཆེན་བསྐྱར་དར་ཡོང་བར་བྱེད་པ་ནི་བདེ་བདེ་ལྷོད་ལྷོད་དང་ངང་ཚུལ་བསྟན་པ་ཙམ་གྱིས་མངོན་འགྱུར་ཐུབ་པ་ཞིག་གཏན་ནས་མ་ཡིན་པས། ཏང་ཡོངས་ཀྱིས་ངེས་པར་དུ་དཀའ་ཚེགས་སྔར་ལས་ཆེ་བ་དང་དཀའ་སྡུག་སྔར་ལས་ཆེ་བའི་འབད་བརྩོན་བྱ་རྩིས་བྱེད་དགོས།

ཕུགས་འདུན་རླབས་པོ་ཆེ་མངོན་འགྱུར་བྱེད་པར་ངེས་པར་དུ་འཐབ་རྩོད་རླབས་པོ་ཆེ་བྱེད་དགོས། སྤྱི་ཚོགས་ནི་འགལ་བ་འདུས་མའི་ཁྲོད་དུ་མདུན་སྐྱོད་བྱེད་བཞིན་ཡོད་པས། འགལ་བ་ཡོད་ན་འཐབ་རྩོད་ཡོད་ངེས་རེད། ང་ཚོའི་ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་དེ་འགྲན་སློང་ཆེན་པོར་ཁ་གཏད་ནུས་ལྡན་འཇལ་བ་དང་། ཉེན་ཁ་ཆེན་པོ་བཀག་འགོག འགོག་རྐྱེན་ཆེན་པོ་ཁྱད་གསོད། འགལ་བ་ཆེན་པོ་ཐག་གཅོད་བཅས་ཐུབ་པར་བྱེད་ན། ལོ་རྒྱུས་ཀྱི་ཁྱད་ཆོས་གསར་པ་མང་པོ་ལྡན་པའི་འཐབ་རྩོད་རླབས་པོ་ཆེ་བྱེད་དགོས་ཤིང་། ལོངས་སྤྱོད་འདོད་པ་དང་། སྒྱིད་ལུག་རྣམ་གཡེང་། འགལ་བར་གཡོལ་བ་བཅས་ཀྱི་བསམ་བློ་དང་བྱ་སྤྱོད་ཚང་མ་ནོར་འཁྲུལ་རེད། ཏང་ཡོངས་ཀྱིས་ཏང་གི་འགོ་ཁྲིད་དང་རང་རྒྱལ་སྤྱི་ཚོགས་རིང་ལུགས་ཀྱི་ལམ་ལུགས་སྔར་ལས་རང་རྟོགས་ཀྱི་སྒོ་ནས་མཐའ་འཁྱོངས་བྱས་ཏེ། ཏང་གི་འགོ་ཁྲིད་དང་རང་རྒྱལ་སྤྱི་ཚོགས་རིང་ལུགས་ཀྱི་ལམ་ལུགས་ཞན་དུ་གཏོང་བ་དང་། འཁྱོག་བཤད་བྱེད་པ། ཁས་མི་ལེན་པ་བཅས་ཀྱི་གཏམ་སྤྱོད་མཐའ་དག་ལ་ངོ་རྒོལ་མཐའ་གཅིག་ཏུ་བྱེད་དགོས་པ་དང་། མི་དམངས་ཀྱི་ཁེ་ཕན་སྔར་ལས་རང་རྟོགས་ཀྱི་སྒོ་ནས་སྲུང་སྐྱོང་བྱས་ཏེ་མི་དམངས་ཀྱི་ཁེ་ཕན་ལ་གནོད་སྐྱོན་བཟོ་བ་དང་། མང་ཚོགས་དང་ཁ་བྲལ་བའི་བྱ་སྤྱོད་མཐའ་དག་ལ་ངོ་རྒོལ་མཐའ་གཅིག་ཏུ་བྱེད་དགོས་པ། སྒྱུར་བཅོས་དང་གསར་དུ་གཏོད་པའི་དུས་རབས་ཀྱི་རླབས་རྒྱུན་གསར་པའི་ཁྲོད་དུ་སྔར་ལས་རང་རྟོགས་ཀྱི་སྒོ་ནས་ཞུགས་ཏེ་སྒྱུར་དཀའི་གོམས་གཤིས་ངན་པ་མཐའ་དག་རྩ་བ་ནས་དོར་དགོས་པ། རང་རྒྱལ་གྱི་བདག་དབང་དང་། བདེ་འཇགས། གོང་སྤེལ་བཅས་ཀྱི་ཁེ་ཕན་སྔར་ལས་རང་རྟོགས་ཀྱི་སྒོ་ནས་སྲུང་སྐྱོང་བྱས་ཏེ་མེས་རྒྱལ་ཁ་ཕྲལ་བ་དང་མི་རིགས་ཀྱི་མཐུན་སྒྲིལ་དང་སྤྱི་ཚོགས་ཀྱི་འཆམ་མཐུན་བརྟན་བརླིང་ལ་གཏོར་བཤིག་གཏོང་བའི་བྱ་སྤྱོད་མཐའ་དག་ལ་ངོ་རྒོལ་མཐའ་གཅིག་ཏུ་བྱེད་དགོས་པ། སྔར་ལས་རང་རྟོགས་ཀྱི་སྒོ་ནས་ཉེན་ཁ་སྣ་ཚོགས་བཀག་འགོག་བྱས་ཏེ་ཆབ་སྲིད་དང་། དཔལ་འབྱོར། རིག་གནས། སྤྱི་ཚོགས་སོགས་པའི་ཁྱབ་ཁོངས་དང་རང་བྱུང་ཁམས་ཀྱི་དཀའ་ངལ་དང་འགྲན་སློང་ཐོན་རིགས་ཐམས་ཅད་ཁྱད་གསོད་མཐའ་གཅིག་ཏུ་བྱེད་དགོས། ཏང་ཡོངས་ཀྱིས་འཐབ་རྩོད་རླབས་པོ་ཆེ་འདིའི་ཡུན་རིང་རང་བཞིན་དང་། རྙོག་འཛིང་ཆེ་བའི་རང་བཞིན། དཀའ་ཚེགས་ཆེ་བའི་རང་བཞིན་བཅས་ལ་ངོས་འཛིན་གང་ལེགས་དང་། འཐབ་རྩོད་ཀྱི་སྙིང་སྟོབས་དར་སྤེལ་དང་། འཐབ་རྩོད་ཀྱི་འཇོན་ཐང་ཆེ་རུ་བཏང་སྟེ་འཐབ་རྩོད་རླབས་པོ་ཆེར་རྒྱལ་ཁ་གསར་པ་མུ་མཐུད་ལེན་དགོས།

ཕུགས་འདུན་རླབས་པོ་ཆེ་མངོན་འགྱུར་ཡོང་བར་བྱེད་པར། ངེས་པར་དུ་ལས་གཞི་རླབས་པོ་ཆེ་འཛུགས་སྐྲུན་བྱེད་དགོས། ལས་གཞི་རླབས་པོ་ཆེ་དེ་ནི་ང་ཚོའི་ཏང་གིས་སྐུལ་འདེད་གཏིང་ཟབ་ཏུ་གཏོང་བཞིན་པའི་ཏང་ལེགས་སྐྱོང་གི་ལས་གཞི་རླབས་པོ་ཆེ་གསར་པ་དེ་རེད། ཀྲུང་གོ་གུང་ཁྲན་ཏང་གི་འགོ་ཁྲིད་མེད་ན། མི་རིགས་བསྐྱར་དར་ཡོང་བར་བྱེད་རྒྱུ་དེ་སྟོང་བསམ་ཞིག་ཡིན་ངེས་པ་ལོ་རྒྱུས་ཐོག་ནས་ར་འཕྲོད་བྱུང་ཡོད་ལ་མུ་མཐུད་ནས་ར་སྤྲོད་ཡོང་ངེས་རེད། ང་ཚོའི་ཏང་འདི་ཉིད་ཐོག་མཐའ་བར་གསུམ་དུ་དུས་རབས་ཀྱི་གདོང་ལེན་པ་དང་། མི་རིགས་ཀྱི་རྟེན་གཞིར་འགྱུར་བར་བྱེད་པ་དང་། ཐོག་མཐའ་བར་གསུམ་དུ་མར་ཁེ་སི་རིང་ལུགས་ཀྱི་སྲིད་འཛིན་ཏང་དུ་འགྱུར་བར་བྱེད་ན། རང་ངོས་ཐོག་མཐའ་བར་གསུམ་དུ་ཉམས་སད་ཐེག་ཐུབ་པ་དགོས། ཏང་ཡོངས་ཀྱིས་ཏང་གཤིས་ཀྱི་རྩ་དོན་སྔར་བས་རང་རྟོགས་ཀྱི་སྒོ་ནས་བརྟན་དུ་གཏོང་བ་དང་། གནད་དོན་ལ་ཁ་གཏད་ཕོད་པ། རུས་འབྲད་དུག་སེལ་ཕོད་པ་བཅས་བྱས་ནས་ཏང་གི་སྔོན་ཐོན་རང་བཞིན་དང་དྭངས་གཙང་རང་བཞིན་ལ་གནོད་སྐྱོན་བཟོ་བའི་རྒྱུ་རྐྱེན་མཐའ་དག་སེལ་བ་དང་། ཏང་གི་གཟུགས་གཞིའི་བདེ་ཐང་རུལ་བསླད་བཟོ་བའི་ནད་དུག་ཐམས་ཅད་སེལ་བ། ཏང་གི་ཆབ་སྲིད་ཀྱི་འགོ་ཁྲིད་སྟོབས་ཤུགས་དང་། བསམ་པའི་ཁྲིད་སྟོན་སྟོབས་ཤུགས། མང་ཚོགས་སྒྲིག་འཛུགས་ཀྱི་སྟོབས་ཤུགས། སྤྱི་ཚོགས་འབོད་སྐུལ་བྱེད་ཤུགས་བཅས་རྒྱུན་མི་ཆད་པར་ཆེ་རུ་གཏོང་བ་བཅས་བྱས་ནས། ང་ཚོའི་ཏང་གི་སྐྱེ་སྟོབས་ཆེན་པོ་དང་འཐབ་འཛིང་བྱེད་ཤུགས་ཆེན་པོ་ནམ་ཡང་རྒྱས་ཐུབ་པའི་འགན་ལེན་ཏན་ཏིག་བྱེད་དགོས།

ཕུགས་འདུན་རླབས་པོ་ཆེ་མངོན་འགྱུར་ཡོང་བར་བྱེད་པར། ངེས་པར་དུ་བྱ་གཞག་རླབས་པོ་ཆེར་སྐུལ་སྤེལ་གཏོང་དགོས། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ནི་སྒྱུར་བཅོས་སྒོ་འབྱེད་བྱས་ཚུན་དུ་ཏང་གི་རིགས་པའི་གཞུང་ལུགས་དང་ལག་ལེན་ཆ་ཚང་གི་བརྗོད་བྱ་གཙོ་བོ་ཡིན་པ་དང་། ཏང་དང་མི་དམངས་ཀྱིས་དཀའ་སྡུག་ཚད་མེད་མྱངས་པ་དང་རིན་དོད་ཧ་ཅང་ཆེན་པོ་བཏང་མཐར་ཐོབ་པའི་རྩ་བའི་གྲུབ་འབྲས་རེད། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་བགྲོད་ལམ་ནི་སྤྱི་ཚོགས་རིང་ལུགས་དེང་རབས་ཅན་དུ་མངོན་འགྱུར་ཡོང་བ་དང་། མི་དམངས་བདེ་སྐྱིད་ལྡན་པའི་འཚོ་བ་གསར་སྐྲུན་བྱེད་པའི་བགྲོད་ལམ་ཉག་གཅིག་ཡིན་ཞིང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་གཞུང་ལུགས་མ་ལག་ནི་ཏང་དང་མི་དམངས་ལ་ཀྲུང་ཧྭ་མི་རིགས་རླབས་ཆེན་བསྐྱར་དར་མངོན་འགྱུར་ཡོང་བར་ཁྲིད་སྟོན་བྱེད་པའི་གཞུང་ལུགས་ཡང་དག་ཅིག་ཡིན། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ལམ་ལུགས་ནི་དེང་རབས་ཀྱི་ཀྲུང་གོ་འདི་ཉིད་འཕེལ་རྒྱས་དང་ཡར་ཐོན་ཡོང་བའི་རྩ་བའི་ལམ་ལུགས་ཀྱི་འགན་ལེན་ཡིན། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རིག་གནས་ནི་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་དཔའ་ངར་ཆེར་སྐྱེད་ཀྱིས་མདུན་དུ་སྐྱོད་པར་སྐུལ་མ་ཐེབས་བྱེད་ཀྱི་བསམ་བློའི་སྟོབས་ཤུགས་ཆེན་པོ་ཡིན་པས། ཏང་ཡོངས་ཀྱིས་བགྲོད་ལམ་དང་། རིགས་པའི་གཞུང་ལུགས། ལམ་ལུགས། རིག་གནས་བཅས་ལ་སྔར་ལས་རང་རྟོགས་ཀྱི་སྒོ་ནས་གདེང་ཚོད་ཇེ་ཆེར་གཏོང་དགོས་ཤིང་། སྒོ་སྡོམ་མཁྲེགས་བཟུང་གི་ལམ་རྙིང་ལ་མི་སྐྱོད་ལ། དར་ཆ་བརྗེ་སྒྱུར་གྱི་ལོག་ལམ་ལའང་མི་སྐྱོད་པར། ཆབ་སྲིད་ཀྱི་ངེས་ཤུགས་སྲུང་འཛིན་དང་། དངོས་དོན་སྒྲུབ་ནས་རྒྱལ་ཁབ་དར་རྒྱས་མཐའ་འཁྱོངས་བྱས་ནས། ཐོག་མཐའ་བར་གསུམ་དུ་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་དགོས།

འཐབ་རྩོད་རླབས་པོ་ཆེ་དང་། ལས་གཞི་རླབས་པོ་ཆེ། བྱ་གཞག་རླབས་པོ་ཆེ། ཕུགས་འདུན་རླབས་པོ་ཆེ་བཅས་ཟུང་འབྲེལ་དམ་པོ་དང་། ཕན་ཚུན་རྒྱུན་མཐུད། ཕན་ཚུན་ནུས་པ་ཐོན་རེས་བྱེད་པ་བཅས་ཀྱི་ཁྲོད་ལས་ཐག་ཆོད་རང་བཞིན་གྱི་ནུས་པ་ཐོན་བྱེད་ནི་ཏང་ལེགས་སྐྱོང་གི་ལས་གཞི་རླབས་པོ་ཆེ་གསར་པ་འདི་རེད། ལས་གཞི་རླབས་པོ་ཆེར་སྐུལ་སྤེལ་གཏོང་བར། འཐབ་རྩོད་རླབས་པོ་ཆེ་དང་། བྱ་གཞག་རླབས་པོ་ཆེ། ཕུགས་འདུན་རླབས་པོ་ཆེ་བཅས་ལག་ལེན་བསྟར་རྒྱུ་དང་ཟུང་འབྲེལ་བྱས་ཏེ། འཛམ་གླིང་གི་གནས་བབ་ལ་འགྱུར་ལྡོག་གཏིང་ཟབ་བྱུང་བའི་ལོ་རྒྱུས་ཀྱི་འཕེལ་རིམ་ནང་ཏང་འདི་ཉིད་ཐོག་མཐའ་བར་གསུམ་དུ་དུས་རབས་ཀྱི་མདུན་གྲལ་དུ་བསྐྱོད་ཐུབ་པའི་འགན་ལེན་ཏན་ཏིག་བྱེད་པ་དང་། རྒྱལ་ཁབ་ཕྱི་ནང་གི་ཉེན་ཁ་དང་ཉམས་སད་སྣ་ཚོགས་ལ་ཁ་གཏད་འཇལ་བའི་ལོ་རྒྱུས་ཀྱི་འཕེལ་རིམ་ནང་ཐོག་མཐའ་བར་གསུམ་དུ་རྒྱལ་ཡོངས་མི་དམངས་ཀྱི་སྲོག་ཤིང་དུ་འགྱུར་བར་བྱེད་དགོས་པ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་མཐའ་འཁྱོངས་དང་འཕེལ་རྒྱས་གཏོང་བའི་ལོ་རྒྱུས་ཀྱི་འཕེལ་རིམ་ནང་ཐོག་མཐའ་བར་གསུམ་དུ་འགོ་ཁྲིད་ཀྱི་སྲོག་ཤིང་དུ་འགྱུར་བར་བྱེད་དགོས།

བློ་མཐུན་རྣམ་པ། ལས་འགན་གྱིས་འགན་ཁུར་ཕོད་པའི་སྐུལ་བརྡ་གཏོང་བ་དང་། ལས་འགན་གྱིས་མ་འོངས་པར་ཁྲིད་སྟོན་བྱེད་བཞིན་ཡོད་པས། ང་ཚོས་མི་དམངས་ཀྱི་མངག་བཅོལ་གལ་ཆེན་སྟོང་ཟད་དུ་མི་གཏོང་བ་དང་། ལོ་རྒྱུས་ཀྱི་གདམ་གར་ངོ་མི་གནོང་བར། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ལག་ལེན་རླབས་པོ་ཆེའི་ཁྲོད་དུ། ཏང་གིས་འགོ་ཁྲིད་བརྟན་པོ་དང་དཔའ་ངར་ཞུམ་མེད་ཀྱིས་འབད་འཐབ་བྱེད་པར་བརྟེན་ནས་ཀྲུང་ཧྭའི་བུ་ཕྲུག་ཡོངས་ལ་དཔའ་མཛངས་རྟུལ་ཕོད་ཀྱིས་མདུན་དུ་བསྐྱོད་དགོས་པའི་སྐུལ་ལྕག་བཏང་ཐོག བློ་སེམས་གཅིག་མཐུན་གྱིས་ཀྲུང་གོའི་ཕུགས་འདུན་མཉམ་སྐྲུན་གྱི་བརྗིད་ཉམས་ཆེ་བའི་སྟོབས་ཤུགས་གོང་བུར་འགྲིལ་བར་བྱེད་དགོས།

གསུམ། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་དང་གཞི་རྩའི་ཐབས་ཇུས།

ཚོགས་ཆེན་བཅོ་བརྒྱད་པ་འཚོགས་ཚུན་དུ། རྒྱལ་ཁབ་ཕྱི་ནང་གི་གནས་བབ་ལ་འགྱུར་ལྡོག་བྱུང་བ་དང་རང་རྒྱལ་གྱི་ལས་དོན་ཁག་འཕེལ་རྒྱས་བྱུང་བ་ཚང་མའི་ཐད་ནས་ང་ཚོར་དུས་རབས་ཀྱི་ཞིབ་འཇུག་བྱ་གཞི་གལ་ཆེན་ཞིག་བཏོན་པ་དེ་ནི། རིགས་པའི་གཞུང་ལུགས་དང་ལག་ལེན་ཟུང་དུ་འབྲེལ་བའི་ཐོག་ནས་དུས་རབས་གསར་པར་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་མཐའ་འཁྱོངས་དང་འཕེལ་རྒྱས་གཏོང་བའི་སྤྱིའི་དམིགས་འབེན་དང་། སྤྱིའི་ལས་འགན། སྤྱི་ཁྱབ་བཀོད་པ། འཐབ་ཇུས་ཀྱི་བཀོད་པ། འཕེལ་རྒྱས་གཏོང་ཕྱོགས། འཕེལ་རྒྱས་གཏོང་སྟངས། འཕེལ་རྒྱས་ཀྱི་སྒུལ་ཤུགས། འཐབ་ཇུས་ཀྱི་གོམ་རིམ། ཕྱི་རོལ་གྱི་ཆ་རྐྱེན། ཆབ་སྲིད་ཀྱི་འགན་ལེན་ལ་སོགས་པའི་གཞི་རྩའི་གནད་དོན་ཚུད་པའི་དུས་རབས་གསར་པར་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་གང་འདྲ་ཞིག་མཐའ་འཁྱོངས་དང་འཕེལ་རྒྱས་གཏོང་དགོས་པ་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཇི་ལྟར་བྱས་ནས་མཐའ་འཁྱོངས་དང་འཕེལ་རྒྱས་གཏོང་དགོས་པ་རྒྱུད་རིམ་ལྡན་པའི་སྒོ་ནས་ལན་འདེབས་དགོས་པ་མ་ཟད། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་མཐའ་འཁྱོངས་དང་འཕེལ་རྒྱས་སྔར་ལས་ལེགས་པར་གཏོང་བར་ཕན་ཐོགས་ཡོང་ཆེད། ལག་ལེན་གསར་པར་གཞིགས་ནས་དཔལ་འབྱོར་དང་། ཆབ་སྲིད། ཁྲིམས་སྐྱོང་། ཚན་རྩལ། རིག་གནས། སློབ་གསོ། དམངས་འཚོ། མི་རིགས། ཆོས་ལུགས། སྤྱི་ཚོགས། སྐྱེ་ཁམས་དཔལ་ཡོན། རྒྱལ་ཁབ་ཀྱི་བདེ་འཇགས། རྒྱལ་སྲུང་དང་དམག་དཔུང་། “རྒྱལ་ཁབ་གཅིག་ལ་ལམ་ལུགས་གཉིས” མེས་རྒྱལ་གཅིག་གྱུར། འཐབ་ཕྱོགས་གཅིག་གྱུར། ཕྱི་འབྲེལ། ཏང་ལེགས་སྐྱོང་སོགས་པའི་ཕྱོགས་གང་ཅིའི་ཐད་ལ་གཞུང་ལུགས་ཐོག་ནས་དབྱེ་ཞིབ་དང་སྲིད་ཇུས་ཐོག་ནས་ཁྲིད་སྟོན་ཡང་བྱེད་དགོས་པ་འདི་རེད།

དུས་རབས་ཀྱི་ཞིབ་འཇུག་བྱ་གཞི་གལ་ཆེན་འདིར་དམིགས་ནས། ང་ཚོའི་ཏང་གིས་མར་ཁེ་སི་ལེ་ཉིན་རིང་ལུགས་དང་། མའོ་ཙེ་ཏུང་གི་དགོངས་པ། ཏེང་ཞའོ་ཕིན་གྱི་རིགས་པའི་གཞུང་ལུགས། “མཚོན་བྱེད་གསུམ”གྱི་དགོངས་པ་གལ་ཆེན། ཚན་རིག་དང་མཐུན་པའི་འཕེལ་རྒྱས་ལྟ་བ་བཅས་སློབ་སྟོན་དུ་བཟུང་ནས། བསམ་བློ་བཅིངས་འགྲོལ་དང་། དངོས་ཐོག་བདེན་འཚོལ། དུས་བསྟུན་མདུན་སྐྱོད། བདེན་འཚོལ་དོན་གཉེར་བཅས་མཐའ་འཁྱོངས་དང་། རྩོད་སྒྲུབ་དངོས་གཙོའི་རིང་ལུགས་དང་ལོ་རྒྱུས་དངོས་གཙོའི་རིང་ལུགས་མཐའ་འཁྱོངས། དུས་རབས་ཀྱི་ཆ་རྐྱེན་གསར་པ་དང་ལག་ལེན་གྱི་བླང་བྱ་གསར་པ་དང་ཟུང་འབྲེལ་དམ་ཟབ་བཅས་བྱས་ཐོག མཐོང་སྣང་གསར་རྐྱང་ཞིག་གི་ཐོག་ནས་གུང་ཁྲན་ཏང་གི་སྲིད་འཛིན་ཆོས་ཉིད་དང་། སྤྱི་ཚོགས་རིང་ལུགས་ཀྱི་འཛུགས་སྐྲུན་ཆོས་ཉིད། མིའི་རིགས་ཀྱི་སྤྱི་ཚོགས་གོང་སྤེལ་གྱི་ཆོས་ཉིད་བཅས་ལ་ངོས་འཛིན་ཟབ་ཏུ་བཏང་བ་དང་། དཀའ་སྡུག་ཆེ་བའི་རིགས་པའི་གཞུང་ལུགས་འཚོལ་ཞིབ་བྱས་པས། རིགས་པའི་གཞུང་ལུགས་གསར་གཏོད་ཀྱི་གྲུབ་འབྲས་གལ་ཆེན་ཐོབ་པ་དང་། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་དོན་གྲུབ་པ་རེད།དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་དོན་འདིས་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་མཐའ་འཁྱོངས་དང་འཕེལ་རྒྱས་གཏོང་བ་དང་། སྤྱིའི་ལས་འགན་ནི་སྤྱི་ཚོགས་རིང་ལུགས་ཀྱི་དེང་རབས་ཅན་དང་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་དང་འབྱོར་འབྲིང་སྤྱི་ཚོགས་ཕྱོགས་ཡོངས་ནས་འཛུགས་སྐྲུན་ཐུབ་པར་བྱེད་པའི་རྨང་གཞིའི་ཐོག གོམ་སྟབས་གཉིས་སུ་ཕྱེ་ནས་དུས་རབས་འདིའི་དུས་དཀྱིལ་དུ་སླེབས་སྐབས་འབྱོར་བ་ཕྱུག་ཅིང་དམངས་གཙོ་ལྡན་ལ་དཔལ་ཡོན་དར་བ་དང་འཆམ་མཐུན་ཡིད་སྨོན་གྱི་སྤྱི་ཚོགས་རིང་ལུགས་ཀྱི་དེང་རབས་ཅན་དུ་འགྱུར་བའི་རྒྱལ་ཁབ་སྟོབས་ལྡན་དུ་འཛུགས་སྐྲུན་ཐུབ་པར་བྱ་རྒྱུ་འདི་ཡིན་པ་ཁ་གསལ་བཟོས་པ་དང་། དུས་རབས་གསར་པར་རང་རྒྱལ་སྤྱི་ཚོགས་ཀྱི་འགལ་བ་གཙོ་བོ་ནི་མི་དམངས་ཀྱི་བདེ་སྐྱིད་འཚོ་བའི་དགོས་མཁོ་ཉིན་བཞིན་ཆེ་རུ་འགྲོ་བཞིན་པ་དང་འཕེལ་རྒྱས་དོ་མི་མཉམ་ཞིང་གང་ལེགས་མ་བྱུང་བའི་བར་གྱི་འགལ་བ་ཡིན་པས། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་དགོངས་དོན་ངེས་པར་དུ་མཐའ་འཁྱོངས་བྱས་ནས་མི་ཕྱོགས་ཡོངས་ནས་ཡར་ཐོན་ཡོང་བ་དང་མི་དམངས་ཡོངས་རྫོགས་ཐུན་མོང་དུ་ཕྱུག་འགྱུར་ཡོང་བར་མུ་མཐུད་སྐུལ་འདེད་གཏོང་དགོས་པ་ཁ་གསལ་བཟོས་པ། ཀྲུང་གོའི་ཁྱད་ཆོས་ཀྱི་སྤྱི་ཚོཌ་རིང་ལུགས་ལས་དོན་གྱི་སྤྱིའི་བཀོད་པ་ནི“ཕྱོགས་ལྔ་གཞི་གཅིག”ཡིན་པ་དང་། འཐབ་ཇུས་ཀྱི་བཀོད་པ་ནི“ཕྱོགས་ཡོངས་བཞི”ཡིན་པ་ཁ་གསལ་བཟོས་པ། བགྲོད་ལམ་དང་། རིགས་པའི་གཞུང་ལུགས། ལམ་ལུགས། རིག་གནས་བཅས་ལ་གདེང་ཚོད་བརྟན་པོ་དགོས་ལུགས་ནན་བཤད་བྱས་པ། ཕྱོགས་ཡོངས་ནས་སྒྱུར་བཅོས་ཟབ་སྤེལ་གྱི་སྤྱིའི་དམིགས་འབེན་ནི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ལམ་ལུགས་འཐུས་ཚང་དང་གོང་འཕེལ་གཏོང་རྒྱུ་དང་། རྒྱལ་ཁབ་སྐྱོང་བའི་མ་ལག་དང་སྐྱོང་ནུས་དེང་རབས་ཅན་དུ་འགྱུར་བར་སྐུལ་འདེད་གཏོང་རྒྱུ་འདི་ཡིན་པ་ཁ་གསལ་བཟོས་པ། ཁྲིམས་ལྟར་རྒྱལ་སྐྱོང་ལ་ཕྱོགས་ཡོངས་ནས་སྐུལ་འདེད་གཏོང་བའི་སྤྱིའི་དམིགས་འབེན་ནི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་མ་ལག་འཛུགས་པ་དང་སྤྱི་ཚོགས་རིང་ལུགས་ཀྱི་ཁྲིམས་སྐྱོང་རྒྱལ་ཁབ་བསྐྲུན་རྒྱུ་འདི་ཡིན་པ་ཁ་གསལ་བཟོས་པ། དུས་རབས་གསར་པའི་འོག་དམག་དཔུང་སྟོབས་ལྡན་དུ་སྒྱུར་བའི་ཏང་གི་དམིགས་འབེན་ནི་ཏང་གི་བཀོད་འདོམས་ལ་ཉན་པ་དང་། གཡུལ་ལས་རྒྱལ་ཐུབ་པ། ཀུན་སྤྱོད་བཟང་བ་བཅས་ཀྱི་མི་དམངས་དམག་དཔུང་ཞིག་འཛུགས་སྐྱོང་བྱས་ནས་མི་དམངས་ཀྱི་དམག་དཔུང་འཛམ་གླིང་ཐོག་གི་དམག་དཔུང་བཟང་ཤོས་ཤིག་ཏུ་བསྐྲུན་རྒྱུ་ཡིན་པ་ཁ་གསལ་བཟོས་པ། ཀྲུང་གོའི་ཁྱད་ཆོས་ཀྱི་རྒྱལ་ཁབ་ཆེན་པོའི་ཕྱི་འབྲེལ་གྱིས་རྒྱལ་སྤྱིའི་འབྲེལ་བ་གསར་པ་འཛུགས་སྐྱོང་ལ་སྐུལ་འདེད་བཏང་སྟེ་མིའི་རིགས་ཀྱི་ལས་དབང་གཅིག་པའི་ཚོགས་སྤྱི་འཛུགས་པར་སྐུལ་འདེད་གཏོང་དགོས་པ་ཁ་གསལ་བཟོས་པ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཆེས་རྩ་བར་གྱུར་པའི་ཁྱད་ཆོས་ནི་ཀྲུང་གོ་གུང་ཁྲན་ཏང་གི་འགོ་ཁྲིད་ཡིན་པ་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ལམ་ལུགས་ཀྱི་དགེ་མཚན་ཆེ་ཤོས་ནི་ཀྲུང་གོ་གུང་ཁྲན་ཏང་གི་འགོ་ཁྲིད་ཡིན་པ། ཏང་ནི་ཆེས་མཐོའི་ཆབ་སྲིད་ཀྱི་འགོ་ཁྲིད་སྟོབས་ཤུགས་ཡིན་པ། དུས་རབས་གསར་པར་ཏང་འཛུགས་སྐྱོང་གི་སྤྱིའི་བླང་བྱ་བཏོན་པ། ཏང་ལེགས་སྐྱོང་ཁྲོད་ཀྱི་ཆབ་སྲིད་འཛུགས་སྐྱོང་གི་གོ་གནས་གལ་ཆེན་འབུར་དུ་ཐོན་པ་བཅས་ཁ་གསལ་བཟོས་ཡོད།དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་ནི་མར་ཁེ་སི་ལེ་ཉིན་རིང་ལུགས་དང་། མའོ་ཙེ་ཏུང་གི་དགོངས་པ། ཏེང་ཞའོ་ཕིན་གྱི་རིགས་པའི་གཞུང་ལུཌ། “མཚོན་བྱེད་གསུམ”གྱི་དགོངས་པ་གལ་ཆེན། ཚན་རིག་དང་མཐུན་པའི་འཕེལ་རྒྱས་ལྟ་བ་བཅས་རྒྱུན་འཛིན་དང་འཕེལ་རྒྱས་བཏང་བ་དང་། མར་ཁེ་སི་རིང་ལུགས་ཀྲུང་གོ་ཅན་དུ་འགྱུར་བའི་གྲུབ་འབྲས་གསར་ཤོས། ཏང་དང་མི་དམངས་ཀྱི་ལག་ལེན་གྱི་ཉམས་མྱོང་དང་ཐུན་མོང་གི་བློ་གྲོས་ལས་བྱུང་བའི་ཉིང་བཅུད། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རིགས་པའི་གཞུང་ལུགས་མ་ལག་གི་གྲུབ་ཆ་གལ་ཆེན། ཏང་ཡོངས་དང་རྒྱལ་ཡོངས་མི་དམངས་ཀྱིས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་ཡོང་བར་འབད་འཐབ་བྱེད་པའི་བྱ་སྤྱོད་ཀྱི་ཕྱོགས་སྟོན་བཅས་ཡིན་པས། ངེས་པར་དུ་རྒྱུན་རིང་མཐའ་འཁྱོངས་བྱེད་པ་དང་ཆབས་ཅིག་རྒྱུན་མི་ཆད་པར་འཕེལ་རྒྱས་ཀྱང་གཏོང་དགོས།ཏང་ཡོངས་ཀྱིས་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པའི་ངོ་བོ་དང་ནང་དོན་ཕུན་སུམ་ཚོགས་པོ་ཤེས་རྟོགས་གཏིང་ཟབ་བྱས་ཏེ་ལས་དོན་ཁག་གི་ཁྲོད་དུ་ཕྱོགས་ཡོངས་ནས་ལག་ལེན་ཡང་དག་དང་མཐར་ཕྱིན་བྱེད་དགོས།

(གཅིག) ཏང་གིས་ལས་དོན་མཐའ་དག་ལ་འགོ་ཁྲིད་བྱ་རྒྱུ་མཐའ་འཁྱོངས་བྱེད་དགོས། ཏང་སྲིད་དམག་དམངས་སློབ་གྲྭ་དང་། ཕྱོགས་མཚམས་ཀུན་ཏུ་བཅས་སུ། ཏང་ནི་ཐམས་ཅད་ཀྱི་འགོ་ཁྲིད་མཁན་ཡིན་པས། ཆབ་སྲིད་ཀྱི་འདུ་ཤེས་དང་། ཁྱོན་ཡོངས་ཀྱི་འདུ་ཤེས། སྲོག་ཤིང་གི་འདུ་ཤེས། དཔེ་ལྟོས་ཀྱི་འདུ་ཤེས་བཅས་འཛིན་ཤུགས་ངེས་པར་ཆེ་རུ་གཏོང་བ་དང་། ཏང་ཀྲུང་དབྱང་གི་དབང་གྲགས་དང་གཅིག་བསྡུས་གཅིག་གྱུར་གྱི་འགོ་ཁྲིད་རང་རྟོགས་ངང་ནས་སྲུང་སྐྱོང་བྱེད་དགོས་པ། བསམ་བློ་དང་ཆབ་སྲིད་བྱ་སྤྱོད་བཅས་ཀྱི་ཐོག་ནས་ཏང་ཀྲུང་དབྱང་དང་རང་རྟོགས་ངང་ནས་ཚད་མཐོའི་གཅིག་མཐུན་ཡོང་བར་བྱེད་དགོས་པ། ཏང་གི་འགོ་ཁྲིད་མཐའ་འཁྱོངས་བྱེད་པའི་སྒྲིག་སྲོལ་དང་ལམ་སྲོལ་འཐུས་སྒོ་ཚང་དུ་གཏོང་བ། བརྟན་པོའི་ངང་ནས་ཡར་རྒྱས་ཡོང་བར་བྱེད་པའི་ལས་ཀའི་རྩ་བའི་དགོངས་གཞི་མཐའ་འཁྱོངས་བྱེད་པ། “ཕྱོགས་ལྔ་གཞི་གཅིག”གི་སྤྱིའི་བཀོད་པ་གཅིག་གྱུར་འཆར་འགོད་ཀྱིས་སྐུལ་འདེད་གཏོང་བ། “ཕྱོགས་ཡོངས་བཞི”ཡི་འཐབ་ཇུས་ཀྱི་བཀོད་པ་མཐུན་སྦྱོར་ངང་སྐུལ་འདེད་གཏོང་བ། ཏང་གིས་ཁ་ཕྱོགས་འཛིན་པ་དང་། ཁྱོན་ཡོངས་འཆར་འགོད། སྲིད་ཇུས་གཏན་འབེབས། སྒྱུར་བཅོས་ལ་སྐུལ་སྤེལ་བཅས་བྱེད་ནུས་དང་ངེས་ཤུགས་ཆེ་རུ་གཏོང་བ་བཅས་བྱས་ནས་ཏང་གིས་ཐོག་མཐའ་བར་གསུམ་དུ་ཁྱོན་ཡོངས་ཀྱི་གནས་ཚུལ་འཛིན་སྐྱོང་དང་ཕྱོགས་གང་ཅི་མཐུན་སྦྱོར་བྱེད་པར་འགན་ལེན་ཏན་ཏིག་བྱེད་དགོས།

(གཉིས) མི་དམངས་ལྟེ་བར་འཛིན་རྒྱུ་མཐའ་འཁྱོངས་བྱེད་དགོས། མི་དམངས་ནི་ལོ་རྒྱུས་གསར་སྐྲུན་མཁན་ཡིན་པ་དང་། ཏང་དང་རྒྱལ་ཁབ་ཀྱི་མདུན་ལམ་དང་ལས་དབང་ཇི་ཡོང་ལ་ཐུག་པའི་རྩ་བའི་སྟོབས་ཤུགས་ཡིན་པས། ངེས་པར་དུ་མི་དམངས་ཀྱི་བྱེད་པོའི་གོ་གནས་མཐའ་འཁྱོངས་དང་། སྤྱི་དོན་དུ་ཏང་འཛུགས་དང་དམངས་དོན་དུ་སྲིད་སྐྱོང་མཐའ་འཁྱོངས། བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་བའི་རྩ་བའི་དམིགས་ཡུལ་ལག་ལེན་དུ་བསྟར་བ། ཏང་གི་མང་ཚོགས་ལམ་ཕྱོགས་དེ་རྒྱལ་སྲིད་སྐྱོང་རིམ་ཡོངས་ཀྱི་ལས་སྒོའི་ཁྲོད་ལག་ལེན་མཐར་ཕྱིན་བྱེད་པ། མི་དམངས་ཀྱིས་བདེ་སྐྱིད་འཚོ་བར་སྨོན་ཚུལ་དེ་འབད་འཐབ་ཀྱི་དམིགས་ཡུལ་དུ་འཛིན་པ་བཅས་བྱས་ནས་མི་དམངས་ལ་བརྟེན་ནས་ལོ་རྒྱུས་ཀྱི་བྱས་རྗེས་རླབས་པོ་ཆེ་སྐྲུན་དགོས།

(གསུམ) ཕྱོགས་ཡོངས་ནས་སྒྱུར་བཅོས་ཟབ་སྤེལ་མཐའ་འཁྱོངས་བྱེད་དགོས། སྤྱི་ཚོགས་རིང་ལུགས་ཀྱིས་མ་གཏོགས་ཀྲུང་གོ་སྐྱོབ་མི་ཐུབ་པ་དང་། སྒྱུར་བཅོས་སྒོ་འབྱེད་བྱས་ན་མ་གཏོཌ་ཀྲུང་གོ་དང་། སྤྱི་ཚོགས་རིང་ལུགས། མར་ཁེ་སི་རིང་ལུཌ་བཅས་འཕེལ་རྒྱས་གཏོང་མི་ཐུབ་པས། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ལམ་ལུགས་ངེས་པར་མཐའ་འཁྱོངས་དང་འཐུས་ཚང་དུ་གཏོང་བ་དང་། རྒྱལ་ཁབ་བཅོས་སྐྱོང་གི་མ་ལག་དང་བཅོས་སྐྱོང་གི་ནུས་པ་དེང་རབས་ཅན་དུ་འགྱུར་བར་མུ་མཐུད་སྐུལ་འདེད་གཏོང་བ། དུས་བབ་དང་མི་མཐུན་པའི་བསམ་པའི་འདུ་ཤེས་དང་སྒྲིག་སྲོལ་དང་ལམ་སྲོལ་ཐད་ཀྱི་ཞན་ཆ་མཐའ་དག་མཐའ་གཅིག་ཏུ་མེད་པར་བཟོ་དགོས་པ། ཁེ་ཕན་སྲ་འགྱུར་ལས་བྱུང་བའི་བཀག་རྒྱ་ལས་བརྒལ་ཐབས་བྱེད་པ། མིའི་རིགས་ཀྱི་དཔལ་ཡོན་ལས་བྱུང་བའི་དགེ་མཚན་ལྡན་པའི་གྲུབ་འབྲས་བསྡུ་ལེན། བརྒྱུད་རིམ་ལྡན་ཞིང་འཐུས་སྒོ་ཚང་བ་དང་། ཚན་རིག་དང་མཐུན་ཞིང་ཚད་དང་ལྡན་པ། འཁོར་སྐྱོད་ཕན་འབྲས་ཐོན་པ་བཅས་ཀྱི་ལམ་ལུགས་མ་ལག་འཛུགས་པ་བཅས་བྱས་ཏེ་རང་རྒྱལ་སྤྱི་ཚོགས་རིང་ལུགས་ལམ་ལུགས་ཀྱི་ཁྱད་འཕགས་རང་བཞིན་འདོན་སྤེལ་གང་ཐུབ་བྱེད་དགོས།

(བཞི) འཕེལ་རྒྱས་ཀྱི་འདུ་ཤེས་གསར་པ་མཐའ་འཁྱོངས་བྱེད་དགོས། འཕེལ་རྒྱས་གཏོང་བ་ནི་རང་རྒྱལ་གྱི་གནད་དོན་མཐའ་དག་ཐག་གཅོད་པའི་རྨང་གཞི་དང་འགག་རྩ་ཡིན་ཞིང་། འཕེལ་རྒྱས་གཏོང་རྒྱུ་ནི་ངེས་པར་དུ་ཚན་རིག་དང་མཐུན་པའི་འཕེལ་རྒྱས་ཡིན་དགོས་པ་དང་། གསར་གཏོད་དང་། མཐུན་སྦྱོར། ལྗང་མདོག སྒོ་འབྱེད། མཉམ་སྤྱོད་བཅས་ཀྱི་འཕེལ་རྒྱས་བསམ་གཞི་ངེས་པར་དུ་བློ་བརྟན་འགྱུར་མེད་ཀྱིས་ལག་ལེན་མཐར་ཕྱིན་བསྟར་དགོས། རང་རྒྱལ་སྤྱི་ཚོགས་རིང་ལུགས་ཀྱི་གཞི་རྩའི་དཔལ་འབྱོར་ལམ་ལུགས་དང་བགོ་བཤའི་ལམ་ལུགས་ངེས་པར་དུ་མཐའ་འཁྱོངས་དང་འཐུས་ཚང་དུ་གཏོང་བ་དང་། སྤྱི་ལ་དབང་བའི་ལམ་ལུགས་ཀྱི་དཔལ་འབྱོར་བློ་བརྟན་འགྱུར་མེད་ཀྱི་སྒོ་ནས་འཕེལ་རྒྱས་གཏོང་བ། སྤྱི་ལ་དབང་བ་མ་ཡིན་པའི་ལམ་ལུགས་ཀྱི་དཔལ་འབྱོར་འཕེལ་རྒྱས་གཏོང་བར་བློ་བརྟན་འགྱུར་མེད་ཀྱི་སྒོ་ནས་བསྔགས་སྐུལ་དང་། རྒྱབ་སྐྱོར། ཁྲིད་སྟོན་བཅས་བྱས་ནས་ཐོན་ཁུངས་བགོ་སྒྲིག་ཁྲོད་ཀྱི་ཚོང་རའི་ཐག་གཅོད་རང་བཞིན་གྱི་ནུས་པ་འདོན་ཐུབ་པར་བྱེད་པ་དང་། སྲིད་གཞུང་གི་ནུས་པ་སྔར་ལས་ལྷག་པར་འདོན་སྤེལ་བྱེད་པ། བཟོ་ལས་ཅན་དང་། ཆ་འཕྲིན་ཅན། གྲོང་ཁྱེར་དང་གྲོང་རྡལ་ཅན། ཞིང་ལས་དེང་རབས་ཅན་བཅས་དཔེ་གསར་དུས་གཅིག་ཏུ་འཕེལ་རྒྱས་ཡོང་བར་སྐུལ་འདེད་གཏོང་བ། དཔལ་འབྱོར་གོ་ལ་ཧྲིལ་པོ་ཅན་དུ་འགྱུར་བའི་འཕེལ་རིམ་ལ་རང་འགུལ་ངང་ཞུགས་པ་དང་སྐུལ་འདེད་གཏོང་བ། རིམ་པ་སྔར་ལས་མཐོ་བའི་སྒོ་འབྱེད་རྣམ་པའི་དཔལ་འབྱོར་གོང་འཕེལ་གཏོང་བ་བཅས་བྱས་ནས་རང་རྒྱལ་གྱི་དཔལ་འབྱོར་སྟོབས་ཤུགས་དངོས་དང་ཕྱོགས་བསྡུས་རྒྱལ་སྟོབས་རྒྱུན་ཆད་མེད་པར་ཆེ་རུ་གཏོང་དགོས།

(ལྔ) མི་དམངས་རང་ཁྱིམ་རང་བདག་ཡོང་བ་མཐའ་འཁྱོངས་བྱེད་དགོས། ཏང་གི་འགོ་ཁྲིད་མཐའ་འཁྱོངས་དང་། མི་དམངས་རང་ཁྱིམ་རང་བདག་ཡོང་བ། ཁྲིམས་མཐུན་ལྟར་རྒྱལ་ཁབ་སྐྱོང་བ་བཅས་གཅིག་གྱུར་དམ་ཟབ་བྱ་རྒྱུ་ནི་སྤྱི་ཚོགས་རིང་ལུགས་ཀྱི་ཆབ་སྲིད་གོང་འཕེལ་གཏོང་བའི་བླང་བྱ་ལྡོག་མེད་ཡིན་པས། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཆབ་སྲིད་གོང་འཕེལ་གཏོང་ལམ་ངེས་པར་མཐའ་འཁྱོངས་དང་། མི་དམངས་འཐུས་མིའི་ཚོགས་ཆེན་གྱི་ལམ་ལུགས་དང་། ཀྲུང་གོ་གུང་ཁྲན་ཏང་གིས་འགོ་ཁྲིད་གནང་བའི་ཏང་མང་མཉམ་ལས་དང་ཆབ་སྲིད་གྲོས་མོལ་གྱི་ལམ་ལུགས། མི་རིགས་ས་ཁོངས་རང་སྐྱོང་ལམ་ལུགས། གཞི་རིམ་མང་ཚོགས་ཀྱི་རང་སྐྱོང་ལམ་ལུཌ་བཅས་ངེས་པར་མཐའ་འཁྱོངས་དང་འཐུས་ཚང་དུ་གཏོང་བ། ཆེས་རྒྱ་ཆེ་བའི་རྒྱལ་གཅེས་འཐབ་ཕྱོགས་གཅིག་གྱུར་སྲ་བརྟན་དང་འཕེལ་རྒྱས་གཏོང་བ། སྤྱི་ཚོགས་རིང་ལུགས་ཀྱི་དམངས་གཙོ་གྲོས་མོལ་གོང་འཕེལ་གཏོང་བ། དམངས་གཙོའི་ལམ་ལུགས་ཆ་ཚང་དུ་གཏོང་བ། དམངས་གཙོའི་རྣམ་པ་ཕུན་སུམ་ཇེ་ཚོགས་སུ་གཏོང་བ། དམངས་གཙོའི་ཐབས་ལམ་རྒྱ་སྐྱེད་པ་བཅས་བྱས་ནས་མི་དམངས་རང་ཁྱིམ་རང་བདག་ཡོང་བར་བྱ་རྒྱུ་དེ་རྒྱལ་ཁབ་ཀྱི་ཆབ་སྲིད་འཚོ་བ་དང་སྤྱི་ཚོགས་ཀྱི་འཚོ་བའི་ཁྲོད་དུ་དོན་འཁྱོལ་ཡོང་བའི་འགན་ལེན་བྱེད་དགོས།

(དྲུག) ཕྱོགས་ཡོངས་ནས་ཁྲིམས་མཐུན་ལྟར་རྒྱལ་ཁབ་སྐྱོང་བ་མཐའ་འཁྱོངས་བྱེད་དགོས། ཕྱོགས་ཡོངས་ནས་ཁྲིམས་མཐུན་ལྟར་རྒྱལ་ཁབ་སྐྱོང་བ་ནི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རྩ་བའི་བླང་བྱ་དང་འགན་ལེན་གལ་ཆེན་ཡིན་པས། ཏང་གི་འགོ་ཁྲིད་དེ་ཁྲིམས་མཐུན་ལྟར་རྒྱལ་ཁབ་སྐྱོང་བའི་གོ་རིམ་ཡོངས་དང་ཕྱོགས་གང་ཅིར་ལག་ལེན་མཐར་ཕྱིན་བསྟར་བ་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་བགྲོད་ལམ་ཐོག་བློ་བརྟན་འགྱུར་མེད་ངང་སྐྱོད་པ། རྩ་ཁྲིམས་སྲོག་ཤིང་དུ་གྱུར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་བཅའ་ཁྲིམས་མ་ལག་འཐུས་ཚང་དུ་གཏོང་བ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་མ་ལག་འཛུགས་སྐྱོང་བྱེད་པ། སྤྱི་ཚོགས་རིང་ལུགས་ཀྱི་ཁྲིམས་སྐྱོང་རྒྱལ་ཁབ་འཛུགས་སྐྱོང་བྱེད་པ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་གཞུང་ལུགས་འཕེལ་རྒྱས་གཏོང་བ། ཁྲིམས་མཐུན་ལྟར་རྒྱལ་ཁབ་སྐྱོང་བ་དང་། ཁྲིམས་མཐུན་ལྟར་སྲིད་སྐྱོང་བ། ཁྲིམས་མཐུན་ལྟར་སྲིད་འཛིན་པ་བཅས་ཐུན་མོང་དུ་སྐུལ་འདེད་གཏོང་བ་མཐའ་འཁྱོངས་བྱེད་པ། ཁྲིམས་སྐྱོང་རྒྱལ་ཁབ་དང་། ཁྲིམས་སྐྱོང་སྲིད་གཞུང་། ཁྲིམས་སྐྱོང་སྤྱི་ཚོགས་བཅས་གཞི་གཅིག་ཏུ་འཛུགས་སྐྱོང་མཐའ་འཁྱོངས་བྱེད་པ། ཁྲིམས་མཐུན་ལྟར་རྒྱལ་ཁབ་སྐྱོང་བ་དང་སྤྱོད་བཟང་ལ་བརྟེན་ནས་རྒྱལ་ཁབ་སྐྱོང་བ་ཟུང་འབྲེལ་དང་། ཁྲིམས་མཐུན་ལྟར་རྒྱལ་ཁབ་སྐྱོང་བ་དང་ལུགས་མཐུན་བཞིན་ཏང་སྐྱོང་བ་གཅིག་གྱུར་དམ་ཟབ་བྱ་རྒྱུ་མཐའ་འཁྱོངས་བྱེད་པ། ཁྲིམས་འཛིན་སྒྲིག་སྲོལ་སྒྱུར་བཅོས་ཟབ་སྤེལ་བྱེད་པ་བཅས་བྱས་ནས་མི་རིགས་ཡོངས་ཀྱི་ཁྲིམས་སྐྱོང་གི་བྱང་ཚད་དང་ཀུན་སྤྱོད་ཀྱི་བྱང་ཚད་མཐོ་རུ་གཏོང་དགོས།

(བདུན) སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་མ་ལག་མཐའ་འཁྱོངས་བྱེད་དགོས། རིག་གནས་ཀྱི་གདེང་ཚོད་ནི་རྒྱལ་ཁབ་ཅིག་དང་མི་རིགས་ཤིག་གི་འཕེལ་རིམ་ཁྲོད་སྔར་བས་རྩ་བ་དང་། སྔར་བས་གཏིང་ཟབ། སྔར་བས་རྒྱུན་རིང་བཅས་སུ་གནས་པའི་སྟོབས་ཤུགས་ཡིན་པས། ངེས་པར་དུ་མར་ཁེ་སི་རིང་ལུགས་མཐའ་འཁྱོངས་བྱས་ཏེ། གུང་ཁྲན་རིང་ལུགས་ཀྱི་ཕུགས་བསམ་ཆེན་པོ་དང་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཐུན་མོང་གི་ཕུགས་བསམ་བརྟན་པོར་འཆང་བ་དང་། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་སྐྱེད་སྲིང་དང་ལག་ལེན་བསྟར་བ། འདུ་ཤེས་འཛིན་སྟངས་ཁྱབ་ཁོངས་ཀྱི་གཙོ་ཁྲིད་དབང་ཆ་དང་གཏམ་བརྗོད་དབང་ཆ་རྒྱུན་མི་ཆད་པར་ཆེ་རུ་གཏོང་བ། ཀྲུང་ཧྭའི་ཕུལ་བྱུང་རིག་གནས་གསར་གཏོད་ལྡན་པར་བརྗེ་སྒྱུར་དང་། གསར་གཏོད་ལྡན་པར་འཕེལ་རྒྱས་ཡོང་བར་བྱེད་པ། གསར་བརྗེའི་རིག་གནས་ཀྱི་ཤུལ་འཛིན་དང་། སྤྱི་ཚོགས་རིང་ལུགས་ཀྱི་སྔོན་ཐོན་རིག་གནས་འཕེལ་རྒྱས་གཏོང་བ། གཞི་མ་མ་བརྗེད་ཅིང་ཕྱི་ནས་ཡོང་བ་བསྡུ་ལེན་དང་། མ་འོངས་པར་ཁ་ཕྱོགས་པ། ཀྲུང་གོའི་སྙིང་སྟོབས་དང་། ཀྲུང་གོའི་རིན་ཐང་། ཀྲུང་གོའི་སྟོབས་ཤུགས་བཅས་སྔར་བས་ལེགས་པོར་སྐྲུན་ནས་མི་དམངས་ལ་བསམ་བློའི་ཕྱོགས་སྟོན་འདོན་སྤྲོད་བྱེད་དགོས།

(བརྒྱད) འཕེལ་རྒྱས་གཏོང་རིམ་ཁྲོད་དམངས་འཚོ་འགན་སྲུང་དང་ལེགས་བཅོས་མཐའ་འཁྱོངས་བྱེད་དགོས། དམངས་འཚོའི་བདེ་སྐྱིད་ཆེ་རུ་འགྲོ་བར་བྱེད་རྒྱུ་ནི་འཕེལ་རྒྱས་ཀྱི་རྩ་བའི་དམིགས་ཡུལ་ཡིན་པས། ངེས་པར་དུ་དམངས་འཚོའི་ཕན་ཁེ་མང་ཙམ་གཉེར་བ་དང་། དམངས་འཚོའི་དཀའ་སྡུག་མང་ཙམ་སེལ་ནས། འཕེལ་རྒྱས་གཏོང་བའི་ཁྲོད་དམངས་འཚོའི་ཞན་ཆ་གསབ་པ་དང་། སྤྱི་ཚོགས་དྲང་སྙོམས་དྲང་བདེན་ཡོང་བར་བྱེད་པ། བྱིས་པའི་དུས་ནས་སློབ་གསོ་ཐོབ་པ་དང་། སློབ་ལ་འཁྲིད་མཁན་ཡོད་པ། ངལ་རྩོལ་ལ་ཐོབ་ཆ་ཡོད་པ། ན་དུས་སྨན་བཅོས་ཐུབ་པ། རྒས་དུས་འཚོ་རྟེན་ཡོད་པ། སྡོད་སའི་ཁང་པ་ཡོད་པ། ཉམས་ཞན་སྐྱོང་མཁན་ཡོད་པ་བཅས་ཀྱི་ཐད་རྒྱུན་ཆད་མེད་པར་ཡར་ཐོན་བསྐྱར་མ་ཡོང་བར་བྱེད་པ། དབུལ་སྒྲོལ་འགག་སྒྲོལ་གཏིང་ཟབ་ཏུ་སྤེལ་བ། མཉམ་སྐྲུན་མཉམ་སྤྱོད་ཀྱི་འཕེལ་རྒྱས་གཏོང་རིམ་ཁྲོད་དུ་མི་དམངས་ཡོངས་ལ་ཐོབ་སྣང་སྔར་བས་མང་བའི་ཚོར་བ་ཡོང་བའི་འགན་ལེན་བྱས་ཏེ། མི་ཕྱོགས་ཡོངས་ནས་འཕེལ་རྒྱས་ཡོང་བ་དང་། མི་དམངས་ཡོངས་ཐུན་མོང་དུ་ཕྱུག་པོར་འགྱུར་བར་རྒྱུན་ཆད་མེད་པར་སྐུལ་འདེད་གཏོང་དགོས། བདེ་འཇགས་ཀྱི་ཀྲུང་གོ་འཛུགས་སྐྱོང་བྱེད་པ་དང་། སྤྱི་ཚོགས་བཅོས་སྐྱོང་ལ་ཤུགས་སྣོན་དང་གསར་གཏོད་བྱེད་པ། སྤྱི་ཚོགས་ཀྱི་འཆམ་མཐུན་བརྟན་ལྷིང་སྲུང་བ་བཅས་བྱས་ཏེ། རྒྱལ་ཁབ་ཡུན་རིང་བདེ་འཁོད་དང་། མི་དམངས་བདེ་སྡོད་ལས་བརྩོན་ཡོང་བའི་འགན་ལེན་བྱེད་དགོས།

(དགུ) མི་དང་རང་བྱུང་ཁམས་འཆམ་མཐུན་མཉམ་གནས་ཡོང་བ་མཐའ་འཁྱོངས་བྱེད་དགོས། སྐྱེ་ཁམས་དཔལ་ཡོན་འཛུགས་སྐྱོང་བྱེད་པ་ནི་ཀྲུང་ཧྭ་མི་རིགས་རྒྱུན་མཐུད་ངང་འཕེལ་རྒྱས་ཡོང་བར་བྱེད་པའི་ལོ་ངོ་སྟོང་གི་ཇུས་ཆེན་ཡིན་པས། རི་སྔོ་ཆུ་དྭངས་ནི་གསེར་རི་དངུལ་རི་ཡིན་པའི་བསམ་གཞི་ངེས་པར་དུ་འཆང་བ་དང་ལག་ལེན་དུ་བསྟར་དགོས་པ་དང་། ཐོན་ཁུངས་གྲོན་ཆུང་དང་ཁོར་ཡུག་སྲུང་སྐྱོང་གི་གཞི་རྩའི་རྒྱལ་ཇུས་མཐའ་འཁྱོངས་བྱེད་པ། སྐྱེ་ཁམས་སྐྱོང་བར་ཚེ་སྲོག་ལ་གཅེས་སྤྲས་བྱེད་པ་བཞིན་གྱི་སྤྱོད་ཚུལ་འཛིན་པ། རི་ཆུ་ནགས་ཞིང་མཚེའུ་དང་རྩྭ་བཅས་ཆ་ལག་ཚང་བར་གཅིག་གྱུར་ཐོག་བཅོས་སྐྱོང་གི་འཆར་གཞི་བཀོད་དེ། སྐྱེ་ཁམས་ཁོར་ཡུག་སྲུང་སྐྱོང་གི་ལམ་ལུགས་དམ་ཤོས་ལག་ལེན་བསྟར་ནས། ལྗང་མདོག་འཕེལ་རྒྱས་གཏོང་སྟངས་དང་འཚོ་བ་སྐྱེལ་སྟངས་ཆགས་པར་བྱེད་པ། ཐོན་སྐྱེད་འཕེལ་རྒྱས་དང་། འཚོ་བ་ཕྱུག་འགྱུར།སྐྱེ་ཁམས་བཟང་པོ་བཅས་ཀྱི་དཔལ་ཡོན་ལྡན་པའི་འཕེལ་རྒྱས་ཀྱི་བགྲོད་ལམ་དུ་བློ་བརྟན་འགྱུར་མེད་ངང་སྐྱོད་དེ། བདེ་སྐྱིད་ལྡན་པའི་ཀྲུང་གོ་འཛུགས་སྐྲུན་བྱས་ནས། མི་དམངས་ལ་ཐོན་སྐྱེད་དང་འཚོ་བའི་ཁོར་ཡུག་ལེགས་པོ་སྐྲུན་པ་དང་། གོ་ལ་ཧྲིལ་པོའི་སྐྱེ་ཁམས་བདེ་འཇགས་ཡོང་ཕྱིར་ལེགས་སྐྱེས་འབུལ་དགོས།

(བཅུ) སྤྱི་ཡོངས་ཀྱི་རྒྱལ་ཁབ་ཀྱི་བདེ་འཇགས་ལྟ་བ་མཐའ་འཁྱོངས་བྱེད་དགོས། འཕེལ་རྒྱས་དང་བདེ་འཇགས་གཅིག་གྱུར་འཆར་འགོད་བྱེད་པ་དང་། སེམས་ཁྲལ་གྱི་འདུ་ཤེས་ཆེ་རུ་བཏང་ནས་བདེ་དུས་ཉེན་དྲན་ཐུབ་པར་བྱེད་རྒྱུ་ནི་ང་ཚོའི་ཏང་གི་རྒྱལ་སྲིད་སྐྱོང་ལུགས་ཀྱི་རྩ་དོན་གལ་ཆེན་ཞིག་ཡིན་པས། རྒྱལ་ཁབ་ཀྱི་ཁེ་ཕན་གོང་དུ་བཀུར་བ་ངེས་པར་དུ་མཐའ་འཁྱོངས་དང་། མི་དམངས་བདེ་འཇགས་ཡོང་བ་དམིགས་ཡུལ་དུ་འཛིན་པ། ཆབ་སྲིད་ཀྱི་བདེ་འཇགས་རྩ་བར་འཛིན་པ། ཕྱི་རོལ་གྱི་བདེ་འཇགས་དང་ནང་ཁུལ་གྱི་བདེ་འཇགས། རྒྱལ་ཁབ་མངའ་ཁོངས་ཀྱི་བདེ་འཇགས། རྒྱལ་དམངས་ཀྱི་བདེ་འཇགས། སྲོལ་རྒྱུན་གྱི་བདེ་འཇགས་དང་སྲོལ་རྒྱུན་མ་ཡིན་པའི་བདེ་འཇགས། རང་ངོས་ཀྱི་བདེ་འཇགས་དང་ཐུན་མོང་གི་བདེ་འཇགས་བཅས་གཅིག་གྱུར་འཆར་འགོད་བྱེད་པ། རྒྱལ་ཁབ་ཀྱི་བདེ་འཇགས་ལམ་ལུགས་ཀྱི་མ་ལག་འཐུས་སྒོ་ཚང་དུ་གཏོང་བ། རྒྱལ་ཁབ་ཀྱི་བདེ་འཇགས་ནུས་ཤུགས་ལེགས་སྐྱོང་བྱེད་ཤུགས་ཆེ་རུ་གཏོང་བ་བཅས་བྱས་ནས་རྒྱལ་ཁབ་ཀྱི་བདག་དབང་དང་། བདེ་འཇགས། འཕེལ་རྒྱས་བཅས་ཀྱི་ཁེ་ཕན་སྲུང་སྐྱོང་མཐའ་གཅིག་ཏུ་བྱེད་དགོས།

(བཅུ་གཅིག) ཏང་གིས་མི་དམངས་དམག་དཔུང་ལ་འགོ་ཁྲིད་གཙང་བཙན་བྱེད་པ་མཐའ་འཁྱོངས་བྱེད་དགོས། ཏང་གི་བཀོད་པར་ཉན་པ་དང་། གཡུལ་ལས་རྒྱལ་ཐུབ་པ། སྤྱོད་ཚུལ་བཟང་བ་བཅས་ཀྱི་མི་དམངས་དམག་དཔུང་ཞིག་འཛུགས་སྐྱོང་བྱེད་རྒྱུ་ནི“ལོ་བརྒྱ་གཉིས”ཀྱི་འབད་འཐབ་དམིགས་འབེན་མངོན་འགྱུར་བྱེད་པ་དང་། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་བྱེད་པའི་འཐབ་ཇུས་ཀྱི་ཀ་བརྟེན་ལྟ་བུ་ཡིན་པས། ཏང་གིས་མི་དམངས་དམག་དཔུང་ལ་འགོ་ཁྲིད་བྱེད་པའི་རྩ་བའི་རྩ་དོན་དང་ལམ་ལུགས་རབ་དང་རིམ་པ་ངེས་པར་དུ་ཕྱོགས་ཡོངས་ནས་དོན་འཁྱོལ་བྱས་ཏེ། དུས་རབས་གསར་པའི་ཏང་གི་དམག་དཔུང་སྟོབས་ལྡན་དུ་སྒྱུར་བའི་དགོངས་པ་དེ་རྒྱལ་སྲུང་དང་དམག་དཔུང་འཛུགས་སྐྱོང་བྱེད་རིམ་ཁྲོད་ཀྱི་སློབ་སྟོན་གོ་གནས་སུ་གཏན་འཁེལ་བྱེད་པ། ཆབ་སྲིད་ལ་བརྟེན་ནས་དམག་དཔུང་འཛུགས་སྐྱོང་དང་། སྒྱུར་བཅོས་ལ་བརྟེན་ནས་དམག་དཔུང་སྟོབས་ལྡན་དུ་སྒྱུར་བ། ཚན་རྩལ་ལ་བརྟེན་ནས་དམག་དཔུང་དར་རྒྱས་སུ་གཏོང་བ། ཁྲིམས་མཐུན་ལྟར་དམག་དཔུང་བཅོས་སྐྱོང་བཅས་མཐའ་འཁྱོངས་བྱེད་པ། དངོས་འཐབ་ཀྱི་གནད་ཀར་དོ་སྣང་ཇེ་ཆེ་དང་། གསར་གཏོད་སྐུལ་སྤེལ་ལ་དོ་སྣང་ཇེ་ཆེ། མ་ལག་འཛུགས་སྐྱོང་ལ་དོ་སྣང་ཇེ་ཆེ། ཞིབ་ལས་འབྲས་བཟང་ལ་དོ་སྣང་ཇེ་ཆེ། དམག་དམངས་མཉམ་འདྲེས་ལ་དོ་སྣང་ཇེ་ཆེ་བཅས་བྱས་ནས། དུས་རབས་གསར་པའི་འོག་དམག་དཔུང་སྟོབས་ལྡན་དུ་སྒྱུར་བའི་ཏང་གི་དམིགས་ཡུལ་མངོན་འགྱུར་བྱེད་དགོས།

(བཅུ་གཉིས) “རྒྱལ་ཁབ་གཅིག་ལ་ལམ་ལུགས་གཉིས”དང་མེས་རྒྱལ་གཅིག་གྱུར་ལ་སྐུལ་འདེད་མཐའ་འཁྱོངས་བྱེད་དགོས། ཤང་ཀང་དང་ཨའོ་མོན་ཡུན་རིང་དར་རྒྱས་བརྟན་ལྷིང་རྒྱུན་འཁྱོངས་དང་། མེས་རྒྱལ་ཆ་ཚང་གཅིག་གྱུར་ཡོང་བར་བྱེད་པ་ནི་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་བྱེད་པའི་བླང་བྱ་དགོས་ངེས་ཡིན་པས། ཀྲུང་དབྱང་གིས་ཤང་ཀང་དང་ཨའོ་མོན་དམིགས་བསལ་སྲིད་འཛིན་ཁུལ་ལ་ཕྱོགས་ཡོངས་ནས་བདག་སྐྱོང་བྱེད་དབང་སྲུང་འཛིན་དང་དམིགས་བསལ་སྲིད་འཛིན་ཁུལ་ཚད་མཐོའི་རང་སྐྱོང་བྱེད་དབང་འགན་སྲུང་བྱེད་རྒྱུ་ངེས་པར་དུ་ཟུང་འབྲེལ་དམ་ཚགས་བྱས་ཏེ། “རྒྱལ་ཁབ་གཅིག་ལ་ལམ་ལུགས་གཉིས”ཀྱི་བྱེད་ཕྱོགས་འཛིན་པར་འགྱུར་ལྡོག་མི་ཡོང་བ་དང་། གཡོ་འགུལ་མི་གཏོང་བའི་འགན་ལེན་བྱེད་པ། “རྒྱལ་ཁབ་གཅིག་ལ་ལམ་ལུགས་གཉིས”ཀྱི་ལག་ལེན་གྱི་ངོ་བོ་མི་འགྱུར་བ་དང་བྱེད་སྟངས་མི་འགྱུར་བའི་འགན་ལེན་བྱེད་དགོས། ཀྲུང་གོ་གཅིག་གི་རྩ་དོན་ངེས་པར་དུ་མཐའ་འཁྱོངས་བྱེད་པ་དང་། “དགུ་གཉིས་ཐུན་མོང་གི་ངོས་འཛིན”མཐའ་འཁྱོངས་བྱས་ནས། མཚོ་འགག་ངོགས་གཉིས་ཀྱི་འབྲེལ་བ་ཞི་བའི་ངང་ནས་འཕེལ་རྒྱས་ཡོང་བར་སྐུལ་འདེད་གཏོང་བ་དང་། མཚོ་འགག་ངོགས་གཉིས་ཀྱི་དཔལ་འབྱོར་མཉམ་ལས་དང་རིག་གནས་འགྲོ་འོང་གཏིང་ཟབ་ཏུ་སྤེལ་བ། རྒྱལ་ཁབ་ཁ་ཕྲལ་དུ་གཏོང་བའི་བྱེད་སྒོ་མཐའ་དག་ལ་མཚོ་འགག་ངོགས་གཉིས་ཀྱི་སྤུན་ཟླ་ཚོས་ཐུན་མོང་ཐོག་ངོ་རྒོལ་བྱེད་པར་སྐུལ་འདེད་བཏང་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་ཡོང་བར་མཉམ་དུ་འབད་བརྩོན་བྱེད་དགོས།

(བཅུ་གསུམ) མིའི་རིགས་ཀྱི་ལས་དབང་གཅིག་པའི་ཚོགས་སྤྱི་འཛུགས་སྐྱོང་མཐའ་འཁྱོངས་བྱེད་དགོས། ཀྲུང་གོའི་མི་དམངས་ཀྱི་ཕུགས་འདུན་ནི་རྒྱལ་ཁབ་ཁག་གི་མི་དམངས་ཀྱི་ཕུགས་འདུན་དང་དབུགས་ལམ་གཅིག་གྱུར་ཡིན་པས། ཀྲུང་གོའི་ཕུགས་འདུན་མངོན་འགྱུར་བྱེད་པར་ཞི་བའི་རྒྱལ་སྤྱིའི་ཁོར་ཡུག་དང་བརྟན་ལྷིང་གི་རྒྱལ་སྤྱིའི་སྒྲིག་ལམ་དང་བྲལ་ཐབས་མེད། རྒྱལ་ནང་དང་རྒྱལ་སྤྱིའི་ཁྱོན་ཡོངས་གཉིས་ངེས་པར་དུ་གཅིག་གྱུར་འཆར་འགོད་བྱེད་པ་དང་། ཐོག་མཐའ་བར་གསུམ་དུ་ཞི་བདེའི་གོང་སྤེལ་གྱི་བགྲོད་ལམ་དུ་སྐྱོད་པ། གཉིས་ཕན་མཉམ་ཁེའི་སྒོ་འབྱེད་ཀྱི་འཐབ་ཇུས་ལག་ལེན་བསྟར་བ། འོས་འགན་དང་ཁེ་ཕན་གྱི་ལྟ་ཚུལ་ཡང་དག་མཐའ་འཁྱོངས་བྱེད་པ། ཐུན་མོང་དང་། ཕྱོགས་བསྡུས། མཉམ་ལས། རྒྱུན་མཐུད་བཅས་ཀྱི་བདེ་འཇགས་ལྟ་བ་གསར་པ་འཆང་བ། སྒོ་འབྱེད་གསར་གཏོད་དང་། ཁོང་ཡངས་གཉིས་ཕན་གྱི་གོང་འཕེལ་མདུན་ལྗོངས་དོན་དུ་གཉེར་བ། བསྟུན་མཁས་གཞན་རྗེས་མི་འབྲང་བ་དང་། མཉམ་སྡུད་མཉམ་གསོག་གི་དཔལ་ཡོན་སྤེལ་རེས་ལ་སྐུལ་འདེད་གཏོང་བ། རང་བྱུང་སྤྱི་བཀུར་དང་། ལྗང་མདོག་འཕེལ་རྒྱས་ཀྱི་སྐྱེ་ཁམས་མ་ལག་སྐྲུན་པ། ཐོག་མཐའ་བར་གསུམ་དུ་འཛམ་གླིང་ཞི་བདེ་སྐྱོང་མཁན་དང་། གོ་ལ་ཧྲིལ་པོ་འཕེལ་རྒྱས་ཀྱི་ལེགས་སྐྱེས་འབུལ་མཁན། རྒྱལ་སྤྱིའི་སྒྲིག་ལམ་སྲུང་སྐྱོང་མཁན་བཅས་བྱེད་དགོས།

(བཅུ་བཞི) ཕྱོགས་ཡོངས་ནས་ཏང་ནན་པོར་སྐྱོང་བ་མཐའ་འཁྱོངས་བྱེད་དགོས། རང་ངོས་གསར་བརྗེ་ཕོད་པ་དང་། ཏང་དོ་དམ་དང་ལེགས་སྐྱོང་ནན་པོར་བྱེད་རྒྱུ་ནི་ང་ཚོའི་ཏང་གི་གཤིས་རྒྱུད་མངོན་གསལ་དོད་ཤོས་ཡིན་པས། ངེས་པར་དུ་ཏང་གི་སྒྲིག་ཡིག་རྩ་བའི་གཞི་འཛིན་སར་བྱེད་པ་དང་། ཏང་གི་ཆབ་སྲིད་ལེགས་སྐྱོང་གོ་གནས་ཨང་དང་པོར་འཇོག་པ། བསམ་བློའི་ཐོག་ནས་ཏང་འཛུགས་དང་ལམ་ལུགས་ཐོག་ནས་ཏང་སྐྱོང་ཕྱོགས་གཅིག་ཏུ་ཤུགས་འདོན། ཏང་འཛུགས་སྐྱོང་ཁག་གཅིག་གྱུར་འཆར་འགོད་ཀྱིས་སྐུལ་འདེད་གཏོང་བ། “འགག་རྩའི་ཉུང་ཤས”དམ་དུ་འཛིན་པ། “ནན་གསུམ་དྲང་གསུམ” མཐའ་འཁྱོངས་བྱེད་པ། དམངས་གཙོ་གཅིག་སྡུད་ལམ་ལུགས་མཐའ་འཁྱོངས་བྱེད་པ། ཏང་ནང་ཁུལ་གྱི་ཆབ་སྲིད་འཚོ་བ་ནན་པོར་སྐྱོང་བ། ཏང་གི་སྒྲིག་ཁྲིམས་ནན་དུ་གཏོང་བ། ཏང་ནང་ཁུལ་གྱི་ལྟ་སྐུལ་བྱེད་ཤུགས་ཆེར་སྐྱེད། དགེ་མཚན་ལྡན་ཞིང་སྐྱོན་དང་བྲལ་བའི་ཏང་ནང་ཁུལ་གྱི་ཆབ་སྲིད་རིག་གནས་འཕེལ་རྒྱས་གཏོང་བ། ཏང་ནང་ཁུལ་གྱི་ཆབ་སྲིད་སྐྱེ་ཁམས་ཕྱོགས་ཡོངས་ནས་གཙང་སྒྱུར། ཚུལ་མིན་སྤྱོད་ཡན་སྣ་ཚོགས་ཡོ་བསྲང་མཐའ་གཅིག་ཏུ་བྱེད་པ། བཟོད་སྒོམ་གཏན་ནས་མེད་པའི་རྣམ་འགྱུར་ཐོག་ནས་རུལ་སུངས་ལ་ཆད་པ་གཅོད་པ། ཏང་རང་ངོས་རྒྱུན་ཆད་མེད་པར་གཙང་སྒྱུར་དང་། རང་ངོས་འཐུས་ཚང་། རང་ངོས་གསར་སྒྱུར། རང་ངོས་འཕེལ་རྒྱས་བཅས་ཀྱི་ནུས་པ་ཆེ་རུ་བཏང་ནས། ཏང་དང་མི་དམངས་མང་ཚོགས་བར་གྱི་ཤ་རུས་ལྟ་བུའི་འབྲེལ་བ་ཐོག་མཐའ་བར་གསུམ་དུ་རྒྱུན་འཁྱོངས་བྱེད་དགོས།

གོང་གི་དོན་ཚན་བཅུ་བཞི་ཡིས་དུས་རབས་གསར་པར་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་མཐའ་འཁྱོངས་དང་གོང་སྤེལ་གཏོང་བའི་གཞི་རྩའི་ཐབས་ཇུས་གྲུབ་ཡོད། ཏང་ཡོངས་ཀྱི་བློ་མཐུན་ཚོས་ཏང་གི་གཞི་རྩའི་རིགས་པའི་གཞུང་ལུགས་དང་། གཞི་རྩའི་ལམ་ཕྱོགས། གཞི་རྩའི་ཐབས་ཇུས་བཅས་ངེས་པར་དུ་ཁྱོན་ཡོངས་ནས་དོན་འཁྱོལ་བྱས་ནས། ཏང་དང་མི་དམངས་ཀྱི་བྱ་གཞག་གོང་འཕེལ་ཡོང་བར་ཁྲིད་སྟོན་སྔར་ལས་ལེགས་པར་བྱེད་དགོས།

ལག་ལེན་ལ་རྫོགས་མཐའ་མེད་ལ་གཞུང་ལུགས་གསར་གཏོད་ལའང་རྫོགས་མཐའ་མེད། འཛམ་གླིང་ནི་དུས་དང་རྣམ་པ་ཀུན་ཏུ་འགྱུར་ལྡོག་འགྲོ་བཞིན་པ་དང་། ཀྲུང་གོའང་དུས་དང་རྣམ་པ་ཀུན་ཏུ་འགྱུར་ལྡོག་འགྲོ་བཞིན་ཡོད་པས། ང་ཚོས་གཞུང་ལུགས་ཀྱི་ཐད་ནས་ངེས་པར་དུ་དུས་རབས་ཀྱི་རྗེས་ཟིན་པ་དགོས་ཤིང་། རྒྱུན་ཆད་མེད་པར་ཆོས་ཉིད་ངོས་འཛིན་ཐུབ་པར་བྱེད་པ་དང་། གཞུང་ལུགས་གསར་གཏོད་དང་། ལག་ལེན་གསར་གཏོད། ལམ་ལུགས་གསར་གཏོད། རིག་གནས་གསར་གཏོད་བཅས་དང་དེ་མིན་ཕྱོགས་གཞན་དག་གསར་གཏོད་ལ་རྒྱུན་ཆད་མེད་པར་སྐུལ་འདེད་གཏོང་དགོས།

བློ་མཐུན་རྣམ་པ། དུས་རབས་ནི་བསམ་བློའི་མ་ཡུམ་ལྟ་བུ་ཡིན་ལ་ལག་ལེན་ནི་གཞུང་ལུགས་ཀྱི་འབྱུང་ཁུངས་ཡིན་པས། ང་ཚོས་དུས་རབས་ཀྱི་འབོད་སྒྲ་ཉན་མཁས་པ་དང་། བདེན་དོན་མཐའ་འཁྱོངས་དང་ནོར་འཁྲུལ་ཡོ་བསྲང་ཕོད་ན། དུས་རབས་ཉེར་གཅིག་པར་ཀྲུང་གོའི་མར་ཁེ་སི་རིང་ལུགས་ནི་སྔར་བས་སྟོབས་ཆེ་ཞིང་སྔར་བས་གོ་སྐོན་བློ་འགུག་གི་ནུས་པ་ལྡན་པའི་བདེན་དོན་གྱི་ནུས་ཤུགས་མངོན་ཐུབ་ངེས་ཡིན།

བཞི། འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་པའི་རྒྱལ་ཁ་ཕུ་ཐག་ཆོད་པར་བླངས་ཏེ་སྤྱི་ཚོགས་རིང་ལུགས་ཀྱི་དེང་རབས་ཅན་དུ་འགྱུར་བའི་རྒྱལ་ཁབ་ཕྱོཌ་ཡོངས་ནས་སྐྲུན་པའི་རྒྱང་སྐྱོད་ཀྱི་ལམ་བུ་གསར་པ་འབྱེད་དགོས།

སྒྱུར་བཅོས་སྒོ་འབྱེད་བྱས་ཚུན་དུ། ང་ཚོའི་ཏང་གིས་རང་རྒྱལ་སྤྱི་ཚོགས་རིང་ལུགས་ཀྱི་དེང་རབས་ཅན་དུ་འགྱུར་བའི་འཛུགས་སྐྲུན་ཐད་འཐབ་ཇུས་ཀྱི་བཀོད་པ་བཏིང་བ་དང་། “གོམ་རིམ་གསུམ”གྱི་འཐབ་ཇུས་དམིགས་འབེན་བཏོན་པ་རེད། མི་དམངས་ཀྱི་ལྟོ་གོས་དཀའ་ངལ་སེལ་བ་དང་། མི་དམངས་ཀྱི་འཚོ་བ་སྤྱིའི་ཆ་ནས་འབྱོར་འབྲིང་གི་ཆུ་ཚད་དུ་སླེབས་པའི་དམིགས་ཡུལ་འདི་གཉིས་དུས་བཀག་གི་སྔོན་ལ་མངོན་འགྱུར་བྱུང་ཟིན། རྨང་གཞི་འདིའི་ཐོག་ང་ཚོའི་ཏང་གིས་ཏང་བཙུགས་ནས་ལོ་ངོ་བརྒྱར་སླེབས་སྐབས། དཔལ་འབྱོར་སྔར་ལས་དར་རྒྱས་ཆེ་བ་དང་། དམངས་གཙོ་སྔར་ལས་འཐུས་ཚང་། ཚན་སློབ་སྔར་བས་ཡར་ཐོན། རིག་གནས་སྔར་བས་ཕུན་སུམ་ཚོགས་པོ། སྤྱི་ཚོགས་སྔར་བས་འཆམ་མཐུན། མི་དམངས་ཀྱི་འཚོ་བ་སྔར་བས་ཕྱུག་པོ་བཅས་ཀྱི་འབྱོར་འབྲིང་སྤྱི་ཚོགས་སྐྲུན་ཐུབ་པར་བྱས་རྗེས། དེ་ནས་སླར་ཡང་ལོ་ངོ་སུམ་ཅུའི་རིང་འབད་བརྩོན་བྱས་ཏེ། ཀྲུང་གོ་གསར་པ་བཙུགས་ནས་ལོ་ངོ་བརྒྱར་སླེབས་སྐབས་དེང་རབས་ཅན་རྩ་བའི་ཆ་ནས་མངོན་འགྱུར་བྱས་ཏེ། རང་རྒྱལ་འདི་ཉིད་སྤྱི་ཚོགས་རིང་ལུགས་ཀྱི་དེང་རབས་ཅན་དུ་འགྱུར་བའི་རྒྱལ་ཁབ་ཏུ་སྐྲུན་ཐུབ་པར་བྱེད་དགོས་ལུགས་བཏོན་ཡོད།

ད་ལྟ་ནས2020ལོའི་བར་ནི་འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་པར་བྱེད་པའི་རྒྱལ་ཕམ་ཐག་ཆོད་པར་ལེན་པའི་དུས་རིམ་ཡིན། ཚོགས་ཆེན་བཅུ་དྲུག་པ་དང་། ཚོགས་ཆེན་བཅུ་བདུན་པ། ཚོགས་ཆེན་བཅོ་བརྒྱད་པ་བཅས་ཀྱི་ཐོག་བཏོན་པའི་འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་པར་བྱེད་པའི་བླང་བྱ་ཁག་ལ་གཞིགས་ནས། རང་རྒྱལ་སྤྱི་ཚོགས་རིང་ལུགས་ཀྱི་འགལ་བ་གཙོ་བོའི་འགྱུར་བར་རྩེ་གཅིག་ཏུ་དམིགས་ཏེ། དཔལ་འབྱོར་འཛུགས་སྐྲུན་དང་། ཆབ་སྲིད་ལེགས་སྐྱོང་། རིག་གནས་དར་སྤེལ། སྤྱི་ཚོགས་འཛུགས་སྐྱོང་། སྐྱེ་ཁམས་དཔལ་ཡོན་ལེགས་སྐྱོང་བཅས་གཅིག་གྱུར་འཆར་འགོད་ཀྱིས་སྐུལ་འདེད་གཏོང་བ། ཚན་སློབ་ལ་བརྟེན་ནས་རྒྱལ་ཁབ་དར་རྒྱས་གཏོང་བའི་འཐབ་ཇུས་དང་། ཤེས་ལྡན་མི་སྣར་བརྟེན་ནས་རྒྱལ་ཁབ་སྟོབས་ལྡན་དུ་སྒྱུར་བའི་འཐབ་ཇུས། གསར་གཏོད་སྐུལ་སྤེལ་ཐོག་ནས་འཕེལ་རྒྱས་གཏོང་བའི་འཐབ་ཇུས། ཤང་དང་གྲོང་ཚོ་དར་རྒྱས་གཏོང་བའི་འཐབ་ཇུས། ས་ཁོངས་མཐུན་སྦྱོར་ངང་འཕེལ་རྒྱས་གཏོང་བའི་འཐབ་ཇུས། རྒྱུན་མཐུད་ངང་འཕེལ་རྒྱས་གཏོང་ཐུབ་པའི་འཐབ་ཇུས། དམག་དམངས་མཉམ་འདྲེས་ཐོག་འཕེལ་རྒྱས་གཏོང་བའི་འཐབ་ཇུས་བཅས་བློ་བརྟན་འགྱུར་མེད་ཀྱིས་ལག་ལེན་བསྟར་བ། གཙོ་གནད་དམ་འཛིན་དང་། ཞན་ཆ་གསབ་པ། ཉམས་ཞན་སྟོབས་སྤེལ་བཅས་གཙོ་གནད་དུ་བྱེད་པ་དང་། ཁྱད་པར་དུ་ཉེན་ཁ་ཆེན་པོ་སྔོན་འགོག་སེལ་ཐབས་དང་། དབུལ་བྲལ་གནད་འཁེལ། སྦགས་བཙོག་འགོག་བཅོས་བཅས་ཀྱི་འགག་སྒྲོལ་ལས་ཀ་བློ་བརྟན་འགྱུར་མེད་ཀྱི་སྒོ་ནས་ཡག་པོར་བསྒྲུབས་ཏེ། འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་པར་བྱེད་ཚུལ་མི་དམངས་ཀྱི་ཁས་ལེན་པ་དང་ལོ་རྒྱུས་ཀྱི་ཞིབ་བཤེར་ཐེག་ཐུབ་པར་བྱེད་དགོས།

ཚོགས་ཆེན་བཅུ་དགུ་པ་ནས་ཚོགས་ཆེན་ཉི་ཤུ་པའི་བར་ནི“ལོ་བརྒྱ་གཉིས”ཀྱི་འབད་འཐབ་དམིགས་འབེན་གྱི་ལོ་རྒྱུས་འདྲེས་མཚམས་ཀྱི་དུས་སྐབས་ཡིན། ང་ཚོས་འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་པར་བྱེད་པ་དང་། ལོ་བརྒྱ་དང་པོའི་འབད་འཐབ་དམིགས་འབེན་མངོན་འགྱུར་བྱེད་དགོས་ལ། གནས་བབ་དང་བསྟུན་ནས་མདུན་དུ་བསྐྱོད་དེ། སྤྱི་ཚོགས་རིང་ལུགས་ཀྱི་དེང་རབས་ཅན་གྱི་རྒྱལ་ཁབ་ཏུ་ཕྱོགས་ཡོངས་ནས་འཛུགས་སྐྲུན་བྱེད་པའི་རྒྱང་སྐྱོད་ཀྱི་ལམ་བུ་གསར་པའི་འགོ་བརྩམས་ཏེ། ལོ་བརྒྱ་གཉིས་པའི་འབད་འཐབ་དམིགས་འབེན་གྱི་ཕྱོགས་སུའང་དཔུང་སྐྱོད་བྱེད་དགོས།

རྒྱལ་སྤྱི་རྒྱལ་ནང་གི་གནས་བབ་དང་རང་རྒྱལ་འཕེལ་རྒྱས་ཀྱི་ཆ་རྐྱེན་ལ་ཕྱོགས་བསྡུས་ཀྱིས་དབྱེ་ཞིབ་བྱས་པ་ན། 2020ལོ་ནས་དུས་རབས་འདིའི་དུས་དཀྱིལ་བར་དུ་དུས་རིམ་གཉིས་སུ་ཕྱེས་ནས་བཀོད་སྒྲིག་བྱས་ཆོག

དུས་རིམ་དང་པོ2020ལོ་ནས2035ལོའི་བར་དུ། འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་པའི་རྨང་གཞིའི་ཐོག ཡང་བསྐྱར་ལོ་བཅོ་ལྔ་རིང་འབད་བརྩོན་བྱས་ནས་སྤྱི་ཚོགས་རིང་ལུགས་ཀྱི་དེང་རབས་ཅན་གཞི་རྩའི་ཆ་ནས་མངོན་འགྱུར་བྱེད་དགོས། དེའི་དུས་སུ་སླེབས་སྐབས་རང་རྒྱལ་གྱི་དཔལ་འབྱོར་སྟོབས་ཤུགས་དངོས་དང་ཚན་རྩལ་སྟོབས་ཤུགས་དངོས་ཇེ་ཆེར་ཕྱིན་ཏེ། གསར་གཏོད་ཅན་གྱི་རྒྱལ་ཁབ་ཀྱི་མདུན་གྲལ་དུ་ཚུད་ཐུབ་པ་དང་། མི་དམངས་འདྲ་མཉམ་དུ་ཞུགས་པ་དང་། འདྲ་མཉམ་དུ་འཕེལ་རྒྱས་གཏོང་བའི་ཁེ་དབང་ལ་འགན་ལེན་གང་ལེགས་ཐུབ་ཅིང་། ཁྲིམས་སྐྱོང་རྒྱལ་ཁབ་དང་། ཁྲིམས་སྐྱོང་སྲིད་གཞུང་། ཁྲིམས་སྐྱོང་སྤྱི་ཚོགས་བཅས་གཞི་རྩའི་ཆ་ནས་སྐྲུན་ཐུབ་པ། ཕྱོགས་གང་ཅིའི་ལམ་ལུགས་འཐུས་སྒོ་ཇེ་ཚང་དང་། རྒྱལ་ཁབ་བཅོས་སྐྱོང་གི་མ་ལག་དང་བཅོས་སྐྱོང་གི་ནུས་པ་གཞི་རྩའི་ཆ་ནས་དེང་རབས་ཅན་དུ་མངོན་འགྱུར་ཐུབ་པ། སྤྱི་ཚོགས་ཀྱི་དཔལ་ཡོན་དར་ཚུལ་མཐོ་ཚད་གསར་པར་སླེབས་ཤིང་། རྒྱལ་ཁབ་ཀྱི་རིག་གནས་མཉེན་ཤུགས་ཆེ་རུ་མངོན་གསལ་འགྲོ་བ་དང་། ཀྲུང་ཧྭ་རིག་གནས་ཀྱི་ཤུགས་རྐྱེན་སྔར་བས་ཆེ་ཞིང་ཟབ་མོ་ཡོང་བ། མི་དམངས་ཀྱི་འཚོ་བ་སྔར་བས་ཕྱུག་པོ་དང་། ཡོང་འབབ་འབྲིང་གྲས་མི་ཚོགས་ཀྱི་བསྡུར་ཚད་མཐོ་རུ་མངོན་གསལ་འགྲོ་བ་དང་། གྲོང་ཁྱེར་དང་གྲོང་གསེབ་ཀྱི་ས་ཁོངས་འཕེལ་རྒྱས་ཀྱི་ཧེ་བག་དང་གྲོང་མིའི་འཚོ་བའི་ཆུ་ཚད་ཀྱི་ཧེ་བག་མངོན་གསལ་ཇེ་ཆུང་དུ་འགྲོ་བ། གཞི་རྩའི་སྤྱི་པའི་ཞབས་ཞུ་འདྲ་མཉམ་ཅན་གཞི་རྩའི་ཆ་ནས་མངོན་འགྱུར་ཡོང་བ། མི་དམངས་ཡོངས་ཐུན་མོང་དུ་ཕྱུག་པོར་འགྱུར་བའི་གོམ་སྟབས་བརྟན་པོར་སྤོ་ཐུབ་པ། དེང་རབས་ཀྱི་སྤྱི་ཚོགས་བཅོས་སྐྱོང་གི་རྣམ་པ་གཞི་རྩའི་ཆ་ནས་གྲུབ་ཅིང་། སྤྱི་ཚོགས་གསོན་ཤུགས་རྒྱས་ཤིང་འཆམ་མཐུན་གོ་རིམ་ལྡན་པར་ཡོང་བ། སྐྱེ་ཁམས་ཁོར་ཡུག་གཞི་རྩའི་ཆ་ནས་ལེགས་འགྱུར་ཡོང་ཞིང་བདེ་སྐྱིད་ལྡན་པའི་ཀྲུང་གོའི་དམིགས་འབེན་གཞི་རྩའི་ཆ་ནས་མངོན་འགྱུར་ཡོང་ཐུབ།

དུས་རིམ་གཉིས་པ་2035ལོ་ནས་དུས་རབས་འདིའི་དུས་དཀྱིལ་བར་དུ། དེང་རབས་ཅན་རྩ་བའི་ཆ་ནས་མངོན་འགྱུར་ཡོང་བའི་རྨང་གཞིའི་ཐོག ཡང་བསྐྱར་ལོ་ངོ་བཅོ་ལྔ་རིང་འབད་བརྩོན་བྱས་ནས་རང་རྒྱལ་འདི་ཉིད་འབྱོར་པ་ཕྱུག་ཅིང་དམངས་གཙོ་ལྡན་ལ་དཔལ་ཡོན་དར་བ་དང་འཆམ་མཐུན་བདེ་སྐྱིད་ལྡན་པའི་སྤྱི་ཚོགས་རིང་ལུགས་ཀྱི་དེང་རབས་ཅན་དུ་འགྱུར་བའི་རྒྱལ་ཁབ་སྟོབས་ལྡན་དུ་སྐྲུན་ཐུབ་པར་བྱེད་དགོས། དུས་དེར་སླེབས་སྐབས་རང་རྒྱལ་གྱི་དངོས་པོའི་དཔལ་ཡོན་དང་། ཆབ་སྲིད་ཀྱི་དཔལ་ཡོན། བསམ་པའི་དཔལ་ཡོན། སྤྱི་ཚོགས་ཀྱི་དཔལ་ཡོན། སྐྱེ་ཁམས་དཔལ་ཡོན་བཅས་ཁྱོན་ཡོངས་ནས་ཇེ་བཟང་དུ་འགྲོ་བ་དང་། རྒྱལ་ཁབ་བཅོས་སྐྱོང་གི་མ་ལག་དང་བཅོས་སྐྱོང་གི་ནུས་པ་དེང་རབས་ཅན་དུ་མངོན་འགྱུར་བྱུང་སྟེ། ཕྱོགས་བསྡུས་རྒྱལ་སྟོབས་དང་རྒྱལ་སྤྱིའི་ཤུགས་རྐྱེན་མདུན་གྲལ་དུ་སླེབས་པའི་རྒྱལ་ཁབ་ཏུ་འགྱུར་བ། མི་དམངས་ཡོངས་ཐུན་མོང་ཐོག་ཕྱུག་པོར་འགྱུར་བར་བྱེད་རྒྱུ་རྩ་བའི་ཆ་ནས་མངོན་འགྱུར་ཡོང་ཞིང་། རང་རྒྱལ་མི་དམངས་སྔར་བས་བདེ་སྐྱིད་ཁམས་བཟང་གི་འཚོ་བར་རོལ་ཐུབ་པ་དང་། ཀྲུང་ཧྭ་མི་རིགས་དཔའ་ཉམས་སྔར་བས་ཆེ་བའི་སྒོ་ནས་འཛམ་གླིང་མི་རིགས་ཀྱི་གྲལ་དུ་འགྱིང་ངེས་ཡིན།

བློ་མཐུན་རྣམ་པ། འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་པར་བྱེད་པ་ནས་དེང་རབས་ཅན་རྩ་བའི་ཆ་ནས་མངོན་འགྱུར་བྱེད་པ་དང་། དེ་ནས་སྤྱི་ཚོགས་རིང་ལུགས་ཀྱི་དེང་རབས་ཅན་གྱི་རྒྱལ་ཁབ་སྟོབས་ལྡན་ཕྱོགས་ཡོངས་ནས་སྐྲུན་ཐུབ་པར་བྱེད་པ་ནི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་འཕེལ་རྒྱས་གཏོང་བའི་འཐབ་ཇུས་ཀྱི་བཀོད་པ་ཡིན། ང་ཚོས་བློ་བརྟན་འགྱུར་མེད་དང་སྙིང་རུས་ལྷོད་མེད་ཀྱི་སྒོ་ནས་སྤྱི་ཚོགས་རིང་ལུགས་ཀྱི་དེང་རབས་ཅན་དུ་འགྱུར་བའི་རྒྱང་སྐྱོད་ཀྱི་ལམ་བུ་གསར་པའི་བརྗིད་ཉམས་ལྡན་ཞིང་ཡིད་དབང་འཕྲོག་པའི་ལེ་ཚན་གཏོད་པར་འབད་དགོས།

ལྔ། འཕེལ་རྒྱས་ཀྱི་བསམ་གཞི་གསར་པ་ལག་ལེན་བསྟར་ནས། དེང་རབས་ཅན་གྱི་དཔལ་འབྱོར་མ་ལག་སྐྲུན་དགོས།

“ལོ་བརྒྱ་གཉིས”ཀྱི་འབད་འཐབ་དམིགས་འབེན་མངོན་འགྱུར་དང་། ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་ཡོང་བར་བྱས་ཏེ། མི་དམངས་ཀྱི་འཚོ་བའི་ཆུ་ཚད་རྒྱུན་ཆད་མེད་པར་མཐོ་རུ་གཏོང་བར་ངེས་པར་དུ་འཕེལ་རྒྱས་གཏོང་རྒྱུ་དེ་བློ་བརྟན་འགྱུར་མེད་ཀྱི་སྒོ་ནས་སྲིད་སྐྱོང་རྒྱལ་དར་གྱི་ཏང་གི་ལས་འགན་ཨང་དང་པོར་བརྩིས་ནས་སྤྱི་ཚོགས་ཀྱི་ཐོན་སྐྱེད་ནུས་ཤུགས་བཅིངས་འགྲོལ་དང་དར་སྤེལ་གཏོང་བ་མཐའ་འཁྱོངས་དང་། སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་སྒྱུར་བཅོས་ཀྱི་ཁ་ཕྱོགས་མཐའ་འཁྱོངས་བྱས་ཏེ། དཔལ་འབྱོར་རྒྱུན་མཐུད་དང་སྐྱོན་བྲལ་ངང་ནས་འཕེལ་རྒྱས་འགྲོ་བའི་སྐུལ་འདེད་གཏོང་དགོས།

རང་རྒྱལ་གྱི་དཔལ་འབྱོར་འཕེལ་རྒྱས་མགྱོགས་པོ་ཡོང་རིམ་ནས་སྤུས་ཚད་མཐོ་བའི་འཕེལ་རྒྱས་ཀྱི་དུས་རིམ་དུ་བསྒྱུར་ཅིང་། འཕེལ་རྒྱས་གཏོང་སྟངས་བརྗེ་སྒྱུར་དང་། དཔལ་འབྱོར་གྲུབ་ཚུལ་ལེགས་འགྱུར། འཕར་སྣོན་གྱི་སྒུལ་ཤུགས་བརྗེ་སྒྱུར་བཅས་ཀྱི་འགག་སྒྲོལ་དུས་རིམ་དུ་གནས་ཡོད། དེང་རབས་ཅན་དུ་འགྱུར་བའི་དཔལ་འབྱོར་མ་ལག་འཛུགས་སྐྲུན་བྱེད་པ་ནི་འགག་སྒོ་སྒྲོལ་བའི་ཁ་ཚ་དགོས་གཏུགས་ཀྱི་བླང་བྱ་དང་རང་རྒྱལ་འཕེལ་རྒྱས་གཏོང་བའི་འཐབ་ཇུས་ཀྱི་དམིགས་འབེན་ཡིན་པས། ངེས་པར་དུ་སྤུས་ཚད་ཨང་དང་པོར་འཇོག་པ་དང་ཕན་འབྲས་དམིགས་བཀར་མཐའ་འཁྱོངས། མཁོ་སྤྲོད་ཕྱོགས་ཀྱི་གྲུབ་ཚུལ་རང་བཞིན་གྱི་སྒྱུར་བཅོས་གཙོ་གནད་དུ་བཟུང་ནས། དཔལ་འབྱོར་འཕེལ་རྒྱས་ཀྱི་སྤུས་ཚད་གསར་སྒྱུར་དང་། ལས་ཆོད་གསར་སྒྱུར། སྒུལ་ཤུགས་གསར་སྒྱུར་བཅས་ལ་སྐུལ་འདེད་གཏོང་བ་དང་། གཙོ་རྒྱུ་ཀུན་འདུས་ཀྱི་ཐོན་སྐྱེད་ལས་ཆོད་ཆེ་རུ་གཏོང་བ། དངོས་གཞིའི་དཔལ་འབྱོར་དང་། ཚན་རྩལ་གསར་གཏོད། དེང་རབས་ཀྱི་དངུལ་རྩ། མི་ཤུགས་ཐོན་ཁུངས་བཅས་མཐུན་སྦྱོར་ངང་ནས་འཕེལ་རྒྱས་ཡོང་བའི་ཐོན་ལས་ཀྱི་མ་ལག་འཛུགས་སྐྲུན་གང་ཐུབ་དང་གང་མགྱོགས་སུ་གཏོང་བ། ཚོང་རའི་ལམ་སྲོལ་ཕན་གོ་ཆོད་པ་དང་། ཕྲ་མཐོང་བྱེད་པོར་གསོན་ཤུགས་ལྡན་པ། སྤྱི་ཁོག་སྙོམས་སྒྲིག་ཚད་ལྡན་བཅས་ཀྱི་དཔལ་འབྱོར་སྒྲིག་སྲོལ་འཛུགས་གང་ཐུབ་བྱས་ནས། རང་རྒྱལ་གྱི་དཔལ་འབྱོར་གསར་གཏོད་ནུས་པ་དང་འགྲན་རྩོད་ནུས་པ་རྒྱུན་ཆད་མེད་པར་ཆེ་རུ་གཏོང་དགོས།

(གཅིག) མཁོ་སྤྲོད་ཕྱོགས་ཀྱི་གྲུབ་ཚུལ་རང་བཞིན་གྱི་སྒྱུར་བཅོས་ཟབ་ཏུ་སྤེལ་དགོས། དེང་རབས་ཅན་དུ་འགྱུར་བའི་དཔལ་འབྱོར་མ་ལག་འཛུགས་པར། ངེས་པར་དུ་དཔལ་འབྱོར་འཕེལ་རྒྱས་གཏོང་བའི་ཤུགས་འདོན་ཡུལ་དེ་དངོས་གཞིའི་དཔལ་འབྱོར་ཐད་ལ་བཞག་ནས། མཁོ་སྤྲོད་ཕྱོགས་ཀྱི་མ་ལག་གི་སྤུས་ཚད་མཐོ་རུ་གཏོང་བ་འདི་འགག་སྒྲོལ་གྱི་ཕྱོགས་གཙོ་བོར་བརྩིས་ཏེ། རང་རྒྱལ་གྱི་དཔལ་འབྱོར་སྤུས་ཚད་ཀྱི་བཟང་ཆ་མངོན་གསལ་ཇེ་ཆེར་གཏོང་དགོས། བཟོ་སྐྲུན་གྱི་རྒྱལ་ཁབ་སྟོབས་ལྡན་གང་མགྱོགས་སྐྲུན་དགོས། བཟོ་སྐྲུན་ལས་རིགས་སྔོན་ཐོན་འཕེལ་རྒྱས་ཇེ་མགྱོགས་སུ་བཏང་ནས་དྲ་སྦྲེལ་དང་། གཞི་གྲངས་ཆེ་མོ། མི་བཟོས་རིག་སྟོབས། དངོས་གཞིའི་དཔལ་འབྱོར་བཅས་མཉམ་འདྲེས་གཏིང་ཟབ་ཡོང་བའི་སྐུལ་འདེད་གཏོང་བ་དང་། འཛད་སྤྱོད་མཐོ་འབྲིང་གྲས་དང་། གསར་གཏོད་སྣེ་ཁྲིད། ལྗང་མདོག་ཐཱན་ཉུང་། མཉམ་སྤྱོད་དཔལ་འབྱོར། དེང་རབས་ཀྱི་མཁོ་སྤྲོད་མཐུད་འབྲེལ། མི་ཤུགས་ཐོན་ཁུངས་ཞབས་ཞུ་སོགས་ཀྱི་ཁྱབ་ཁོངས་སུ་འཕར་གཞི་གསར་པ་གསོ་སྤེལ་བྱས་ཏེ་སྒུལ་ནུས་གསར་པ་ཆགས་པར་བྱེད་དགོས། སྲོལ་རྒྱུན་གྱི་ཐོན་ལས་ལེགས་འགྱུར་རིམ་སྤོར་ལ་རྒྱབ་སྐྱོར་བྱེད་པ་དང་། དེང་རབས་ཀྱི་ཞབས་ཞུའི་ལས་རིགས་འཕེལ་རྒྱས་ཇེ་མགྱོགས་སུ་བཏང་ནས་རྒྱལ་སྤྱིའི་ཚད་གཞིར་བསྟུན་ཏེ་ཆུ་ཚད་མཐོ་རུ་གཏོང་དགོས། རང་རྒྱལ་གྱི་ཐོན་ལས་གོ་ལ་ཧྲིལ་པོའི་རིན་ཐང་སྦྲེལ་བའི་མཐོ་འབྲིང་གྲལ་གྱི་ཕྱོགས་སུ་སྐྱོད་པར་སྐུལ་འདེད་བཏང་ནས། འཛམ་གླིང་རིམ་པའི་བཟོ་སྐྲུན་ལས་རིགས་སྔོན་ཐོན་ཁྱུ་ཚོགས་འགའ་ཞིག་སྐྱེད་སྲིང་བྱེད་དགོས། ཆུ་བེད་དང་། ལྕགས་ལམ། གཞུང་ལམ། ཆུ་ཐོག་དབོར་འདྲེན། མཁའ་འགྲུལ། སྦུབས་ལམ། གློག་དྲ། ཆ་འཕྲིན། ཟོག་འདྲེན་སོགས་རྨང་གཞིའི་སྒྲིག་བཀོད་དྲ་བ་འཛུགས་སྐྲུན་བྱེད་ཤུགས་ཆེ་རུ་གཏོང་དགོས། ཐོན་ནུས་དོར་བ་དང་། མཛོད་ཉར་དོར་བ། བཀན་ཤིང་དོར་བ། མ་གནས་གཅོག་པ། ཞན་ཆ་གསབ་པ་བཅས་མཐའ་འཁྱོངས་དང་། ཐོན་ཁུངས་བསགས་གྲངས་བཟང་འགྱུར་བཀོད་སྒྲིག་བྱས་ནས། མཁོ་སྤྲོད་སྤུས་དག་འཕར་རྒྱ་ཆེ་རུ་བསྐྱེད་ནས་སྤྲོད་མཁོའི་འགུལ་རྣམ་དོ་མཉམ་ཡོང་བར་བྱེད་དགོས། ཁེ་ལས་པའི་སྙིང་སྟོབས་སྐུལ་སྤེལ་དང་སྲུང་སྐྱོང་བྱེད་པ་དང་། སྤྱི་ཚོགས་ཀྱི་བྱེད་པོ་སྔར་བས་མང་པོ་གསར་གཏོད་ལས་སྐྲུན་དུ་ཞུགས་པར་བསྔགས་སྐུལ་བྱེད་དགོས། ཤེས་ཡོན་ཅན་དང་། རྩལ་ནུས་ཅན། གསར་གཏོད་ཅན་བཅས་ཀྱི་ངལ་རྩོལ་པའི་དཔུང་ཁག་འཛུགས་སྐྱོང་བྱེད་པ་དང་། ངལ་རྩོལ་དཔེ་བཟང་ཅན་གྱི་སྙིང་སྟོབས་དང་ལག་བཟོ་པའི་སྙིང་སྟོབས་དར་སྤེལ་བཏང་ནས། ངལ་རྩོལ་གཟི་བརྗིད་ཆེ་བའི་སྤྱི་ཚོགས་ཀྱི་དར་སྲོལ་དང་ཡག་ཐོག་ཡག་བརྩེགས་ཀྱི་ལས་སྤྲོའི་དར་སྲོལ་དར་སྤེལ་གཏོང་དགོས།

(གཉིས) གསར་གཏོད་ཅན་གྱི་རྒྱལ་ཁབ་འཛུགས་སྐྲུན་ཇེ་མགྱོགས་སུ་གཏོང་དགོས། གསར་གཏོད་ནི་འཕེལ་རྒྱས་ཀྱི་སྣེ་ཁྲིད་སྒུལ་ཤུགས་དང་པོ་ཡིན་པ་དང་། དེང་རབས་ཅན་གྱི་དཔལ་འབྱོར་མ་ལག་སྐྲུན་པའི་འཐབ་ཇུས་ཀྱི་འདེགས་སྐྱོར་ཡིན། འཛམ་གླིང་གི་ཚན་རྩལ་མདུན་གྲལ་ལ་དམིགས་ནས། རྨང་གཞིའི་ཞིབ་འཇུག་བྱེད་ཤུགས་ཆེ་རུ་གཏོང་དགོས་ཤིང་། སྔ་བལྟས་རང་བཞིན་གྱི་རྨང་གཞིའི་ཞིབ་འཇུག་དང་། སྣེ་ཁྲིད་རང་བཞིན་གྱི་གསར་དུ་གཏོད་པའི་ཐོག་མའི་གྲུབ་འབྲས་འགག་སྒྲོལ་ཆེན་པོ་ཡོང་བར་བྱེད་དགོས། སྤྱོད་གོ་དངོས་ཆོད་ཀྱི་རྨང་གཞིའི་ཞིབ་འཇུག་བྱེད་ཤུགས་ཆེ་རུ་གཏོང་བ་དང་། རྒྱལ་ཁབ་ཀྱི་ཚན་རྩལ་རྣམ་གྲངས་གལ་ཆེན་ལག་ལེན་བསྟར་རྒྱ་ཆེ་རུ་གཏོང་བ། འགག་རྩའི་ཐུན་མོང་རང་བཞིན་གྱི་ལག་རྩལ་དང་། མདུན་གྲལ་གྱི་སྣེ་ཁྲིད་ལག་རྩལ། དེང་རབས་ཀྱི་བཟོ་སྐྲུན་ལག་རྩལ། རྩ་སློག་གི་རང་བཞིན་ལྡན་པའི་ལག་རྩལ་བཅས་གསར་གཏོད་གཙོ་གནད་དུ་བཟུང་ནས། ཚན་རྩལ་གྱི་རྒྱལ་ཁབ་སྟོབས་ལྡན་དང་། སྤུས་ཚད་ཀྱི་རྒྱལ་ཁབ་སྟོབས་ལྡན། མཁའ་སྐྱོད་ཀྱི་རྒྱལ་ཁབ་སྟོབས་ལྡན། དྲ་སྦྲེལ་གྱི་རྒྱལ་ཁབ་སྟོབས་ལྡན། འགྲིམ་འགྲུལ་གྱི་རྒྱལ་ཁབ་སྟོབས་ལྡན། གྲངས་འཛིན་གྱི་ཀྲུང་གོ རིག་ལྡན་གྱི་སྤྱི་ཚོགས་བཅས་འཛུགས་སྐྲུན་བྱེད་པར་འདེགས་སྐྱོར་ནུས་ལྡན་འདོན་སྤྲོད་བྱེད་དགོས། རྒྱལ་ཁབ་ཀྱི་གསར་གཏོད་མ་ལག་འཛུགས་སྐྱོང་བྱེད་ཤུགས་ཆེ་རུ་བཏང་ནས་འཐབ་ཇུས་ཀྱི་ཚན་རྩལ་ནུས་ཤུགས་ཆེ་རུ་གཏོང་དགོས། ཚན་རྩལ་སྒྲིག་སྲོལ་སྒྱུར་བཅོས་ཟབ་སྤེལ་བྱས་ནས་ཁེ་ལས་བྱེད་པོར་འཛིན་པ་དང་། ཚོང་ར་ཕྱོགས་སྟོན་དུ་བྱེད་པ། ཐོན་སློབ་ཞིབ་གསུམ་ལྷན་འདྲེས་ཟབ་མོ་བཅས་ཀྱི་ལག་རྩལ་གསར་གཏོད་མ་ལག་འཛུགས་དགོས། ཁེ་ལས་ཆུང་འབྲིང་གསར་གཏོད་ལ་རོགས་སྐྱོར་བྱེད་ཤུགས་ཆེ་རུ་བཏང་ནས་ཚན་རྩལ་གྱི་གྲུབ་འབྲས་དངོས་སྒྱུར་ཡོང་བར་བྱེད་དགོས། གསར་གཏོད་ཀྱི་རིག་གནས་དར་སྤེལ་བྱས་ནས་ཤེས་བྱའི་ཐོན་དངོས་བདག་དབང་གསར་གཏོད་དང་། སྲུང་སྐྱོང་། བཀོལ་སྤྱོད་བཅས་བྱེད་ཤུགས་ཆེ་རུ་གཏོང་དགོས། རྒྱལ་སྤྱིའི་ཆུ་ཚད་ལྡན་པའི་འཐབ་ཇུས་ཀྱི་ཚན་རྩལ་ཤེས་ལྡན་པ་དང་། ཚན་རྩལ་སྣེ་ཁྲིད་ཤེས་ལྡན་པ། ན་གཞོན་ཚན་རྩལ་ཤེས་ལྡན་པ། ཆུ་ཚད་མཐོ་བའི་གསར་གཏོད་ཚོགས་པ་བཅས་འབོར་ཆེན་ཞིག་སྐྱེད་སྲིང་བྱེད་དགོས།

(གསུམ) གྲོང་གསེབ་དར་རྒྱས་གཏོང་བའི་འཐབ་ཇུས་དོན་འཁྱོལ་བྱེད་དགོས། ཞིང་ལས་དང་གྲོང་གསེབ་ཞིང་པ་གསུམ་གྱི་གནད་དོན་ནི་རྒྱལ་ཇུས་དམངས་འཚོར་ཐུག་པའི་རྩ་བའི་རང་བཞིན་གྱི་གནད་དོན་ཡིན་པས། “ཞིང་གསུམ”གྱི་གནད་དོན་ངེས་པར་དུ་ཐག་གཅོད་ཡག་པོ་བྱེད་རྒྱུ་འདི་ཐོག་མཐའ་བར་གསུམ་དུ་ཏང་ཡོངས་ཀྱི་ལས་ཀའི་གལ་ཆེའི་ནང་གི་དོན་ཆེན་དུ་བརྩིས་ནས། ཞིང་ལས་དང་གྲོང་གསེབ་སྔོན་ལ་འཕེལ་རྒྱས་གཏོང་རྒྱུ་མཐའ་འཁྱོངས་བྱེད་དགོས། ཐོན་ལས་དར་རྒྱས་དང་། སྐྱེ་ཁམས་འཚོ་གནས་ལ་འཕྲོད་པ། ཡུལ་སྲོལ་ཡ་རབས། བཅོས་སྐྱོང་ཕན་འབྲས་ཐོན་པ། འཚོ་བ་ཕྱུག་པོ་བཅས་ཀྱི་སྤྱིའི་བླང་བྱར་གཞིགས་ནས། གྲོང་ཁྱེར་དང་གྲོང་གསེབ་མཉམ་འདྲེས་འཕེལ་རྒྱས་ཀྱི་སྒྲིག་སྲོལ་ལམ་སྲོལ་དང་སྲིད་ཇུས་ཀྱི་མ་ལག་འཛུགས་པ་དང་ཆ་ཚང་དུ་བཏང་ནས། ཞིང་ལས་དང་གྲོང་གསེབ་དེང་རབས་ཅན་དུ་འགྱུར་བའི་སྐུལ་འདེད་གང་མགྱོགས་གཏོང་དགོས། གྲོང་གསེབ་ཀྱི་གཞི་རྩའི་གཉེར་སྐྱོང་ལམ་ལུགས་སྲ་བརྟན་དང་འཐུས་སྒོ་ཚང་དུ་གཏོང་བ་དང་། གྲོང་གསེབ་ཀྱི་ས་ཞིང་ལམ་ལུགས་སྒྱུར་བཅོས་ཟབ་སྤེལ་བྱེད་པ། འགན་གཙང་བླངས་པའི་ས་ཞིང་གི“དབང་ཆ་གསུམ”ལོགས་འཛུགས་ལམ་ལུགས་འཐུས་སྒོ་ཚང་དུ་གཏོང་དགོས། ས་ཞིང་འགན་གཙང་ལེན་པའི་འབྲེལ་བ་བརྟན་པོ་ཡོང་བ་མ་ཟད་ཡུན་རིང་འགྱུར་མེད་ཡོང་བའི་སྲུང་སྐྱོང་བྱེད་པ་དང་། ས་ཞིང་འགན་གཙང་ལེན་རིམ་གཉིས་པའི་དུས་ཡུན་ཐིམས་པའི་རྗེས་ཡང་བསྐྱར་ལོ་ངོ་སུམ་ཅུ་རིང་ནར་འགྱངས་སུ་གཏོང་རྒྱུ་ཡིན། གྲོང་གསེབ་ཐུན་མོང་གི་ཐོན་དབང་ལམ་ལུགས་སྒྱུར་བཅོས་ཟབ་སྤེལ་བྱས་ནས། ཞིང་པའི་རྒྱུ་ནོར་གྱི་ཁེ་དབང་འགན་སྲུང་བྱེད་པ་དང་། ཐུན་མོང་གི་དཔལ་འབྱོར་ཤུགས་ཆེ་རུ་གཏོང་དགོས། རྒྱལ་ཁབ་ཀྱི་འབྲུ་རིགས་བདེ་འཇགས་ལ་འགན་ལེན་བྱས་ཏེ། ཀྲུང་གོ་བའི་འཚོ་རྟེན་རང་ཉིད་ཀྱི་ལག་ཏུ་དམ་པོར་འཛིན་དགོས། དེང་རབས་ཀྱི་ཞིང་ལས་ཐོན་ལས་མ་ལག་དང་། ཐོན་སྐྱེད་མ་ལག གཉེར་སྐྱོང་མ་ལག་བཅས་སྐྲུན་པ་དང་། ཞིང་ལས་ལ་རྒྱབ་སྐྱོར་དང་སྲུང་སྐྱོང་བྱེད་པའི་ལམ་ལུགས་འཐུས་སྒོ་ཚང་དུ་གཏོང་བ། གཞི་ཁྱོན་འཚམ་པའི་གཉེར་སྐྱོང་གི་རྣམ་པ་མང་པོ་འཕེལ་རྒྱས་གཏོང་བ། ཞིང་ལས་གཉེར་སྐྱོང་བྱེད་པོ་དཔེ་གསར་གསོ་སྐྱོང་བྱེད་པ། ཞིང་ལས་སྤྱི་ཚོགས་ཅན་གྱི་ཞབས་ཞུའི་མ་ལག་ཆ་ཚང་དུ་གཏོང་བ། ཞིང་དུད་ཆུང་ངུ་དང་དེང་རབས་ཀྱི་ཞིང་ལས་འཕེལ་རྒྱས་གཏོང་བ་སྦྲེལ་མཐུད་དམ་ཚགས་ཡོང་བར་བྱེད་དགོས། གྲོང་གསེབ་ཀྱི་ཐོན་ལས་དང་པོ་དང་། གཉིས་པ། གསུམ་པ་བཅས་མཉམ་འདྲེས་འཕེལ་རྒྱས་ཡོང་བར་བྱེད་པ་དང་། ཞིང་པའི་ལས་ཞུགས་དང་ལས་གཏོད་ལ་རྒྱབ་སྐྱོར་དང་བསྔགས་སྐུལ་བྱས་ནས། ཡོང་འབབ་འཕར་བར་བྱེད་ཐབས་སྐྱེད་དགོས། གྲོང་གསེབ་ཀྱི་གཞི་རིམ་དང་རྨང་གཞིའི་ལས་དོན་སྒྲུབ་ཤུགས་ཆེ་རུ་བཏང་ནས་རང་སྐྱོང་དང་། ཁྲིམས་སྐྱོང་། སྤྱོད་སྐྱོང་བཅས་ཟུང་འབྲེལ་ཐོག་གྲོང་གསེབ་བཅོས་སྐྱོང་བྱེད་པའི་མ་ལག་ཆ་ཚང་དུ་གཏོང་དགོས། ཞིང་ལས་ཤེས་པ་དང་། གྲོང་གསེབ་ལ་དགའ་བ། ཞིང་པར་དགའ་བ་བཅས་ཀྱི“ཞིང་གསུམ”ལས་དོན་པའི་དཔུང་ཁག་ཅིག་གསོ་སྐྱོང་ཐུབ་པར་བྱེད་དགོས།

(བཞི) ས་ཁོངས་མཐུན་སྦྱོར་ངང་འཕེལ་རྒྱས་གཏོང་བའི་འཐབ་ཇུས་ལག་ལེན་བསྟར་དགོས། གསར་བརྗེའི་གནས་རྙིང་ཁུལ་དང་། མི་རིགས་ས་ཁུལ། མཐའ་མཚམས་ས་ཁུལ། དབུལ་ཕོངས་ས་ཁུལ་བཅས་མགྱོགས་མྱུར་འཕེལ་རྒྱས་གཏོང་བར་རྒྱབ་སྐྱོར་བྱེད་ཤུགས་ཇེ་ཆེར་གཏོང་བ་དང་། བྱེད་ཐབས་སྤྱོད་ཤུགས་ཆེ་རུ་བཏང་ནས་ནུབ་རྒྱུད་གསར་སྤེལ་ཆེན་པོར་གནས་བབ་གསར་པ་ཆགས་པར་བྱེད་པ། སྒྱུར་བཅོས་ཟབ་སྤེལ་བྱས་ཏེ་བྱང་ཤར་སོགས་བཟོ་ལས་ཀྱི་གནས་གཞི་རྙིང་པ་དར་རྒྱས་ཇེ་མགྱོགས་སུ་གཏོང་བ། དགེ་མཚན་འདོན་སྤེལ་བྱས་ནས་དབུས་རྒྱུད་ས་ཁུལ་དར་རྒྱས་ཡོང་བར་སྐུལ་འདེད་གཏོང་བ། གསར་སྐྲུན་གྱིས་ཁྲིད་སྟོན་བྱས་ནས་ཤར་རྒྱུད་ས་ཁུལ་དམིགས་སུ་བཀར་ཏེ་སྔོན་ལ་འཕེལ་རྒྱས་ཡོང་བ་བཅས་བྱས་ནས། ས་ཁོངས་མཐུན་སྦྱོར་ངང་འཕེལ་རྒྱས་གཏོང་བའི་ལམ་སྲོལ་གསར་པ་སྔར་བས་ཕན་གོ་ཆོད་པ་འཛུགས་དགོས། གྲོང་ཁྱེར་ཁྱུ་ཚོགས་གཙོ་བོར་གྱུར་པའི་གྲོང་ཁྱེར་ཆེ་འབྲིང་ཆུང་གསུམ་དང་གྲོང་རྡལ་ཆུང་ངུ་མཐུན་སྦྱོར་ངང་འཕེལ་རྒྱས་གཏོང་བའི་གྲོང་ཁྱེར་དང་གྲོང་རྡལ་གྱི་གནས་བབ་འཛུགས་སྐྱོང་བྱས་ཏེ། ཞིང་ལས་སྤོ་སྒྱུར་མི་འབོར་གྲོང་ཁྱེར་ཅན་དུ་ཇེ་མགྱོགས་སུ་སྒྱུར་དགོས། པེ་ཅིང་གི་རྒྱལ་སའི་བྱེད་ལས་མ་ཡིན་པའི་རིགས་ཁ་འགྲེམས་བྱེད་རྒྱུ“སྣ་ཐག”བྱས་ཏེ་ཅིང་ཅིན་ཅི་གསུམ་མཐུན་སྦྱོར་ངང་འཕེལ་རྒྱས་འགྲོ་བའི་སྐུལ་འདེད་གཏོང་བ་དང་། ཞུང་ཨན་ཁུལ་གསར་འགོ་འཛུགས་ས་མཐོན་པོ་ནས་འཆར་འགོད་དང་། ཚད་གཞི་མཐོན་པོར་འཛུགས་སྐྲུན་བྱེད་དགོས། སྲུང་སྐྱོང་ཆེན་པོ་མཉམ་འཛིན་དང་། གསར་སྤེལ་ཆེན་པོ་མི་བྱེད་པ་ཕྱོགས་སྟོན་དུ་བཟུང་སྟེ་འབྲི་ཆུའི་དཔལ་འབྱོར་རྒྱུད་འཕེལ་རྒྱས་ཡོང་བར་བྱེད་དགོས། ཐོན་ཁུངས་ཅན་གྱི་ས་ཁུལ་གྱི་དཔལ་འབྱོར་རྣམ་པ་བསྒྱུར་ཏེ་འཕེལ་རྒྱས་གཏོང་བར་རྒྱབ་སྐྱོར་བྱེད་དགོས། མཐའ་མཚམས་མགྱོགས་མྱུར་འཕེལ་རྒྱས་བཏང་ནས། མཐའ་མཚམས་སྲ་བརྟན་དང་། རྒྱལ་མཚམས་ཉེན་མེད་བདེ་འཇགས་ཡོང་བའི་འགན་ལེན་ཏན་ཏིག་བྱེད་དགོས། སྐམ་ས་དང་རྒྱ་མཚོ་གཅིག་གྱུར་འཆར་འགོད་མཐའ་འཁྱོངས་བྱེད་པ་དང་། རྒྱ་མཚོའི་སྟོབས་ལྡན་རྒྱལ་ཁབ་འཛུགས་སྐྲུན་ཇེ་མགྱོགས་སུ་གཏོང་དགོས།

(ལྔ) སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་སྒྲིག་སྲོལ་མགྱོགས་མྱུར་འཐུས་སྒོ་ཚང་དུ་གཏོང་དགོས། དཔལ་འབྱོར་སྒྲིག་སྲོལ་སྒྱུར་བཅོས་ནི་ངེས་པར་དུ་ཐོན་དབང་ལམ་ལུགས་འཐུས་སྒོ་ཚང་དུ་གཏོང་བ་དང་རྒྱུ་རྐྱེན་གཙོ་བོ་ཚོང་ར་ཅན་དུ་བགོ་སྒྲིག་བྱ་རྒྱུ་གཙོ་གནད་དུ་བཟུང་སྟེ། ཐོན་དབང་ཕན་གོ་ཆོད་པར་སྐུལ་སྤེལ་དང་། རྒྱུ་ཆ་གཙོ་བོ་རང་མོས་ངང་འཁོར་རྒྱུག རིན་གོང་འཕར་ཆག་གི་འགྱུར་བ་གང་ལ་གང་འཚམ་ཡིན་པ། འགྲན་རྩོད་འདྲ་མཉམ་དང་སྒྲིག་རིམ་ལྡན་པ། ཁེ་ལས་བཟང་ལེན་ངན་དོར་བཅས་མངོན་འགྱུར་བྱེད་དགོས། རྒྱལ་ཁབ་ལ་དབང་བའི་རྒྱུ་ནོར་དོ་དམ་ལམ་ལུགས་མི་འདྲ་བ་ཁག་འཐུས་སྒོ་ཚང་དུ་གཏོང་བ་དང་། རྒྱལ་ཁབ་ལ་དབང་བའི་མ་རྩའི་དབང་ཆ་སྤྲད་དེ་གཉེར་སྐྱོང་བྱེད་པའི་ལམ་སྲོལ་སྒྱུར་བཅོས་བྱེད་པ། རྒྱལ་ཁབ་ལ་དབང་བའི་དཔལ་འབྱོར་ཁ་འགྲེམས་སྟངས་ལེགས་སྒྱུར་དང་། གྲུབ་ཚུལ་ལེགས་སྒྲིག འཐབ་ཇུས་རང་བཞིན་གྱི་བསྐྱར་སྒྲིག་བཅས་ཇེ་མགྱོགས་སུ་གཏོང་བ། རྒྱལ་ཁབ་ལ་དབང་བའི་རྒྱུ་ནོར་གནས་ཐང་སྲུང་འཕར་ཡོང་བར་སྐུལ་འདེད་གཏོང་བ། རྒྱལ་ཁབ་ལ་དབང་བའི་མ་རྩ་སྟོབས་ལྡན་ཕུལ་བྱུང་དང་ཆེན་པོར་འགྱུར་བར་སྐུལ་འདེད་གཏོང་བ་བཅས་བྱས་ཏེ། རྒྱལ་ཁབ་ལ་དབང་བའི་རྒྱུ་ནོར་བརླག་དོར་ཤོར་ཚུལ་བཀག་འགོག་ནུས་ལྡན་བྱེད་དགོས། རྒྱལ་ཁབ་ལ་དབང་བའི་ཁེ་ལས་སྒྱུར་བཅོས་ཟབ་སྤེལ་བྱེད་པ་དང་། དབང་བའི་ལམ་ལུགས་འདྲེས་མའི་དཔལ་འབྱོར་འཕེལ་རྒྱས་བཏང་སྟེ། གོ་ལ་ཧྲིལ་པོར་འགྲན་ནུས་ལྡན་པའི་འཛམ་གླིང་གི་ཁེ་ལས་རྩེ་གྲའི་གྲས་སུ་སྐྱེད་སྲིང་བྱེད་དགོས། ཚོང་རར་ཞུགས་འཐུས་ཀྱི་བཀག་རྒྱ་གསལ་ཐོའི་ལམ་ལུགས་ཕྱོགས་ཡོངས་ནས་ལག་བསྟར་བྱེད་པ་དང་། ཚོང་ར་གཅིག་གྱུར་དང་འདྲ་མཉམ་ཐོག་ནས་འགྲན་རྩོད་བྱེད་པར་འགོག་རྐྱེན་བཟོ་བའི་གཏན་འབེབས་དང་བྱེད་སྟངས་སྣ་ཚོགས་གཙང་སེལ་དང་མེད་པར་བཟོ་བ། དམངས་གཉེར་ཁེ་ལས་གོང་དུ་སྤེལ་བར་རྒྱབ་སྐྱོར། ཚོང་རའི་གཙོ་ཤུགས་མི་འདྲ་བ་ཁག་གི་གསོན་ཤུགས་འདོན་སྤེལ་བཅས་བྱེད་དགོས། ཚོང་དོན་ལམ་ལུགས་སྒྱུར་བཅོས་ཟབ་སྤེལ་བྱེད་པ་དང་། སྲིད་འཛིན་རང་བཞིན་གྱི་སྒེར་སྡེམ་གཏོར་ཏེ། ཚོང་རའི་སྒེར་སྡེམ་བཀག་འགོག་བྱེད་པ་དང་། རྒྱུ་ཆ་གཙོ་བོའི་རིན་གོང་ཚོང་ར་ཅན་དུ་སྒྱུར་བཅོས་ཇེ་མགྱོགས་གཏོང་བ། ཞབས་ཞུའི་ལས་རིགས་ཀྱི་ཞུགས་འཐུས་ཚད་བཀག་གློད་པ། ཚོང་རའི་ལྟ་སྐུལ་དོ་དམ་གྱི་སྒྲིག་སྲོལ་འཐུས་སྒོ་ཚང་དུ་གཏོང་བ་བཅས་བྱེད་དགོས། སྤྱི་ཁོག་སྙོམས་སྒྲིག་གསར་སྐྲུན་དང་འཐུས་སྒོ་ཚང་དུ་གཏོང་བ་དང་། རྒྱལ་ཁབ་ཀྱི་འཕེལ་རྒྱས་འཆར་འགོད་ཀྱི་འཐབ་ཇུས་ཀྱི་ཕྱོགས་སྟོན་ནུས་པ་འདོན་དགོས། ནོར་སྲིད་དང་། དངུལ་ལོར། ཐོན་ལས། ས་ཁོངས་སོགས་པའི་དཔལ་འབྱོར་སྲིད་ཇུས་སྙོམས་སྒྲིག་བྱེད་པའི་ལམ་སྲོལ་ཆ་ཚང་དུ་བཏང་སྟེ། འཛད་སྤྱོད་བྱེད་པར་སྐུལ་འདེད་གཏོང་བའི་སྒྲིག་སྲོལ་དང་ལམ་སྲོལ་འཐུས་སྒོ་ཚང་དུ་གཏོང་བ་དང་། འཛད་སྤྱོད་ཀྱིས་དཔལ་འབྱོར་གོང་སྤེལ་ལ་རྨང་གཞིའི་རང་བཞིན་གྱི་ནུས་པ་འདོན་ཤུགས་ཇེ་ཆེར་གཏོང་དགོས། མ་དངུལ་གཏོང་སྡུད་ལམ་སྲོལ་སྒྱུར་བཅོས་གཏིང་ཟབ་བྱེད་པ་དང་། མ་དངུལ་གཏོང་སྡུད་ཀྱིས་མཁོ་སྤྲོད་ཀྱི་གྲུབ་ཚུལ་ལེགས་སྒྱུར་ལ་ཐོན་པའི་གནད་འགག་རང་བཞིན་གྱི་ནུས་པ་འདོན་སྤེལ་བྱེད་དགོས། དེང་རབས་ཅན་དུ་འགྱུར་བའི་ནོར་སྲིད་ལམ་ལུགས་གང་མགྱོགས་ངང་འཛུགས་པ་དང་། དབང་འགན་ཁ་གསལ་དང་། ནོར་ཤུགས་སྙོམས་སྒྲིག ས་ཁོངས་དོ་མཉམ་བཅས་ཀྱི་ཀྲུང་དབྱང་དང་ས་གནས་ཀྱི་ནོར་སྲིད་འབྲེལ་བ་འཛུགས་དགོས། ཕྱོགས་ཡོངས་ནས་ཚད་ལྡན་ཁ་གསལ་རྟིང་གསལ་དང་། ཚད་གཞི་ཚན་རིག་དང་མཐུན་པ། ཚོད་འཛིན་ནུས་ཤུགས་ལྡན་པ་བཅས་ཀྱི་སྔོན་རྩིས་ལམ་ལུགས་འཛུགས་པ་དང་། གྲུབ་འབྲས་ལ་གཞིགས་པའི་དོ་དམ་བྱེད་སྟངས་ཕྱོགས་ཡོངས་ནས་ལག་བསྟར་བྱེད་དགོས། ཁྲལ་བསྡུའི་ལམ་ལུགས་སྒྱུར་བཅོས་གཏིང་ཟབ་བྱེད་པ་དང་། ས་གནས་ཀྱི་དཔྱ་ཁྲལ་མ་ལག་ཆ་ཚང་དུ་གཏོང་དགོས། དངུལ་རྩའི་སྒྲིག་སྲོལ་སྒྱུར་བཅོས་གཏིང་ཟབ་བྱེད་པ་དང་། དངུལ་རྩས་དངོས་གཞིའི་དཔལ་འབྱོར་ལ་ཞབས་འདེགས་ཞུ་བའི་ནུས་པ་ཇེ་ཆེར་གཏོང་བ། ཐད་ཀར་མ་དངུལ་བསྡུ་བའི་བསྡུར་ཚད་ཇེ་མཐོར་གཏོང་བ། རིམ་པ་མང་བའི་མ་རྩའི་ཚོང་ར་སྐྱོན་བྲལ་ངང་འཕེལ་རྒྱས་ཡོང་བར་བྱེད་དགོས། དངུལ་ལོར་སྲིད་ཇུས་དང་སྤྱི་ཁོག་གཟབ་ནན་སྲིད་ཇུས་ཀྱི་སྲོག་ཤིང་གཉིས་ཀྱིས་སྙོམས་སྒྲིག་བྱེད་པའི་གཞི་སྒྲོམ་ཆ་ཚང་དུ་གཏོང་བ་དང་། སྐྱེད་ཀ་དང་འཛའ་ཐང་ཚོང་ར་ཅན་དུ་སྒྱུར་བཅོས་གཏིང་ཟབ་ཏུ་སྤེལ་དགོས། དངུལ་རྩའི་ལྟ་སྐུལ་དོ་དམ་མ་ལག་ཆ་ཚང་དུ་བཏང་ནས། མ་ལག་རང་བཞིན་གྱི་དངུལ་རྩའི་ཉམས་ཉེན་མི་འབྱུང་བའི་མཚམས་ཚད་བསྲུང་དགོས།

(དྲུག) ཕྱོགས་ཡོངས་ནས་སྒོ་འབྱེད་ཅན་གྱི་གནས་བབ་གསར་པ་ཆགས་པའི་སྐུལ་འདེད་གཏོང་དགོས།

སྒོ་མོ་ཕྱེ་ན་གོང་དུ་འཕེལ། བཀག་སྡོམ་བྱས་ན་རྗེས་སུ་ལུས། ཀྲུང་གོས་སྒོ་མོ་ཆེན་པོ་འབྱེད་པ་ཇེ་ཆེར་གཏོང་བ་ལས། རྒྱག་མི་སྲིད། “རྒྱུད་གཅིག་ལམ་གཅིག”འཛུགས་སྐྲུན་གཙོ་གནད་དུ་བཟུང་སྟེ། ནང་དུ་འདྲེན་པ་དང་ཕྱི་རུ་གཏོང་བ་གལ་ཆེ་མཉམ་དུ་བརྩི་བ་མཐའ་འཁྱོངས་དང་། མཉམ་གྲོས་མཉམ་སྐྲུན་མཉམ་སྤྱོད་བཅས་ཀྱི་རྩ་དོན་བརྩི་སྲུང་དང་། གསར་གཏོད་བྱེད་ནུས་ཇེ་ཆེར་བཏང་ནས་སྒོ་འབྱེད་མཉམ་ལས་བཅས་བྱས་ཏེ། སྐམ་མཚོ་དང་ཕྱི་ནང་མཉམ་འགུལ་དང་། ཤར་ནུབ་ཕྱོགས་གཉིས་ཕན་ཚུན་གཉིས་ཕན་སྒོ་འབྱེད་ཀྱི་རྣམ་པ་ཆགས་པར་བྱེད་དགོས། ཕྱི་ཕྱོགས་སུ་ཉོ་ཚོང་རྒྱ་བསྐྱེད་པ་དང་། ཉོ་ཚོང་གི་ལས་རྣམ་གསར་པ་དང་ཉོ་ཚོང་བྱེད་སྟངས་གསར་པ་སྐྱེད་སྲིང་བྱས་ཏེ། ཉོ་ཚོང་སྟོབས་ལྡན་རྒྱལ་ཁབ་འཛུགས་སྐྱོང་བྱེད་པར་སྐུལ་འདེད་གཏོང་དགོས། ཆུ་ཚད་མཐོ་བའི་ཉོ་ཚོང་དང་མ་དངུལ་གཏོང་བ་རང་མོས་ཅན་དང་སྟབས་བདེ་ཅན་གྱི་སྲིད་ཇུས་ལག་བསྟར་བྱེད་པ་དང་། ཞུགས་འཐུས་ཀྱི་སྔོན་ལ་རྒྱལ་དམངས་ཀྱི་ཐོབ་ཐང་སྟེང་དུ་བཀག་རྒྱའི་གསལ་ཐོ་སྣོན་པའི་དོ་དམ་ལམ་ལུགས་ཕྱོགས་ཡོངས་ནས་ལག་བསྟར་བྱེད་པ། ཚོང་རར་ཞུགས་འཐུས་ཀྱི་ཚད་བཀག་ཆེས་ཆེར་གློད་པ། ཞབས་ཞུའི་ལས་རིགས་ཕྱི་ཕྱོགས་སུ་སྒོ་འབྱེད་རྒྱ་ཇེ་ཆེར་གཏོང་བ། ཕྱི་རྒྱལ་གྱི་ཚོང་པས་མ་དངུལ་འཇོག་པའི་ཁྲིམས་མཐུན་ཁེ་དབང་སྲུང་སྐྱོང་བཅས་བྱེད་དགོས། རང་རྒྱལ་གྱི་མངའ་ཁོངས་ནང་ཐོ་བཀོད་པའི་ཁེ་ལས་ཚང་མར་ཉེ་རིང་ཕྱོགས་རིས་མེད་པ་དང་། འདྲ་མཉམ་གཅིག་མཐུན་གྱི་ལྟ་སྟངས་འཛིན་དགོས། ས་ཁོངས་སྒོ་འབྱེད་ཀྱི་བཀོད་པ་ལེགས་སྒྱུར་བྱས་ནས། ནུབ་རྒྱུད་སྒོ་མོ་འབྱེད་པའི་ཤུགས་ཚད་ཇེ་ཆེར་གཏོང་དགོས། རང་མོས་ཉོ་འཚོང་ཚོད་ལྟ་ཁུལ་ལ་སྒྱུར་བཅོས་ཀྱི་རང་བདག་དབང་ཆ་སྔར་ལས་ཆེན་པོ་སྤྲོད་པ་དང་། རང་མོས་ཉོ་འཚོང་གྲུ་ཁ་འཛུགས་སྐྲུན་བྱེད་པའི་འཚོལ་ཞིབ་བྱེད་དགོས། ཕྱི་ཕྱོགས་སུ་མ་དངུལ་འཇོག་སྟངས་གསར་དུ་གཏོད་པ་དང་། རྒྱལ་སྤྱིའི་ཐོན་ནུས་མཉམ་ལས་ལ་སྐུལ་འདེད་བཏང་སྟེ། གོ་ལ་ཧྲིལ་པོར་ཕྱོགས་པའི་ཉོ་འཚོང་དང་། མ་དངུལ་གཏོང་སྡུད། ཐོན་སྐྱེད། ཞབས་ཞུ་བཅས་ཀྱི་དྲ་བ་ཆགས་པར་བྱེད་པ་དང་། རྒྱལ་སྤྱིའི་དཔལ་འབྱོར་མཉམ་ལས་དང་འགྲན་རྩོད་ཀྱི་དགེ་མཚན་གསར་པ་མགྱོགས་མྱུར་སྐྱེད་སྲིང་བྱེད་དགོས།

བློ་མཐུན་རྣམ་པ། སྤྱི་ཚོགས་ཀྱི་ཐོན་སྐྱེད་ནུས་ཤུགས་བཅིངས་འགྲོལ་དང་འཕེལ་རྒྱས་གཏོང་རྒྱུ་ནི་སྤྱི་ཚོགས་རིང་ལུགས་ཀྱི་ངོ་བོའི་བླང་བྱ་ཡིན་པས། ང་ཚོས་སྤྱི་ཚོགས་ཡོངས་ཀྱི་གསར་སྐྲུན་ནུས་པ་དང་འཕེལ་རྒྱས་ཀྱི་གསོན་ཤུགས་སྐུལ་སྤེལ་བཏང་ནས། སྤུས་ཚད་སྔར་ལས་བཟང་བ་དང་། ཕན་ཆོད་སྔར་ལས་ཆེ་བ། སྔར་ལས་འདྲ་མཉམ་ཡིན་པ། སྔར་ལས་རྒྱུན་མཐུད་རུང་བ་བཅས་ཀྱི་འཕེལ་རྒྱས་ཡོང་བར་བརྩོན་དགོས།

དྲུག མི་དམངས་ཀྱི་རང་ཁྱིམ་རང་བདག་གི་ལམ་ལུགས་མ་ལག་འཐུས་ཚང་དུ་བཏང་ནས། སྤྱི་ཚོགས་རིང་ལུཌ་ཀྱི་དམངས་གཙོའི་ཆབ་སྲིད་འཕེལ་རྒྱས་གཏོང་དགོས།

རང་རྒྱལ་ནི་བཟོ་པའི་གྲལ་རིམ་གྱིས་འགོ་ཁྲིད་ཅིང་། བཟོ་ཞིང་མནའ་འབྲེལ་རྨང་གཞིར་གྱུར་པའི་མི་དམངས་དམངས་གཙོའི་སྲིད་དབང་སྒེར་འཛིན་གྱི་སྤྱི་ཚོགས་རིང་ལུགས་རྒྱལ་ཁབ་ཡིན་པས། རྒྱལ་ཁབ་ཀྱི་དབང་ཆ་ཡོད་ཚད་མི་དམངས་ལ་དབང་བ་ཡིན། རང་རྒྱལ་སྤྱི་ཚོགས་རིང་ལུགས་ཀྱི་དམངས་གཙོ་ནི་མི་དམངས་ཀྱི་རྩ་བའི་ཁེ་ཕན་སྲུང་སྐྱོང་བྱེད་པའི་དམངས་གཙོ་ཁྱབ་རྒྱ་ཆེ་ཤོས་དང་། དོན་དངོས་དང་མཐུན་ཤོས། ཕན་གོ་ཆོད་ཤོས་བཅས་ཡིན། སྤྱི་ཚོགས་རིང་ལུགས་ཀྱི་དམངས་གཙོའི་ཆབ་སྲིད་འཕེལ་རྒྱས་གཏོང་བ་ནི་མི་དམངས་ཀྱི་འདོད་བློ་མཚོན་པ་དང་། མི་དམངས་ཀྱི་ཁེ་ཕན་འགན་སྲུང་བྱེད་པ། མི་དམངས་ཀྱི་གསར་སྐྲུན་ནུས་པ་འདོན་སྤེལ་བྱེད་པ་བཅས་ཡིན་ཞིང་། ལམ་ལུགས་ཆ་ལག་ཚང་བར་བརྟེན་ནས་མི་དམངས་རང་ཁྱིམ་རང་བདག་ཡོང་བའི་འགན་ལེན་བྱེད་དགོས།

ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཆབ་སྲིད་འཕེལ་རྒྱས་གཏོང་བའི་བགྲོད་ལམ་ནི། ཉེ་རབས་ནས་བཟུང་སྟེ་ཀྲུང་གོའི་མི་དམངས་ཀྱི་ཡུན་རིང་འབད་འཐབ་བྱེད་པའི་ལོ་རྒྱུས་ཀྱི་གཏན་ཚིགས་དང་། གཞུང་ལུགས་ཀྱི་གཏན་ཚིགས། ལག་ལེན་གྱི་གཏན་ཚིགས་བཅས་ཀྱི་ལྡོག་མེད་ཀྱི་འབྲས་བུ་ཡིན་ལ། ཏང་གི་ངོ་བོའི་རང་གཤིས་མཐའ་འཁྱོངས་དང་། ཏང་གི་རྩ་བའི་དམིགས་ཡུལ་ལག་ལེན་བསྟར་བའི་ལྡོག་མེད་བླང་བྱའང་ཡིན། འཛམ་གླིང་ཐོག་ཡོངས་སུ་འདྲ་མཚུངས་ཡིན་པའི་ཆབ་སྲིད་ལམ་ལུགས་ཀྱི་མ་དཔེ་མེད་ལ། ཆབ་སྲིད་ལམ་ལུགས་དེ་ཁྱད་པར་ཅན་གྱི་སྤྱི་ཚོགས་ཀྱི་ཆབ་སྲིད་ཆ་རྐྱེན་དང་ལོ་རྒྱུས་རིག་གནས་ཀྱི་སྲོལ་རྒྱུན་དང་ཁ་བྲལ་ནས་སྤྱི་མཚན་དུ་ཤན་འབྱེད་བྱེད་མི་རུང་བ་དང་། གཅིག་རང་མཆོག་འཛིན་མི་རུང་བ་དང་། ཕྱི་རྒྱལ་གྱི་ཆབ་སྲིད་ལམ་ལུགས་ཀྱི་མ་དཔེ་མི་འཕྲོད་བཙན་སྦྱོར་ཡང་བྱེད་མི་རུང་། རང་རྒྱལ་སྤྱི་ཚོགས་རིང་ལུགས་ཀྱི་དམངས་གཙོའི་ཆབ་སྲིད་ཡུན་རིང་མཐའ་འཁྱོངས་དང་། རྒྱུན་མི་ཆད་པར་འཕེལ་རྒྱས་གཏོང་བ་དང་། ཆབ་སྲིད་སྒྲིག་སྲོལ་སྒྱུར་བཅོས་ཧུར་ཐག་དང་བརྟན་པོའི་ངང་ནས་བྱེད་པ། སྤྱི་ཚོགས་རིང་ལུགས་ཀྱི་དམངས་གཙོའི་ཆབ་སྲིད་ལམ་ལུགས་ཅན་དང་། ཚད་ལྡན་ཅན། གོ་རིམ་ཅན་བཅས་སུ་སྐུལ་སྤེལ་གཏོང་བ་དང་། མི་དམངས་ཀྱིས་ཁྲིམས་མཐུན་ལྟར་ཐབས་ལམ་དང་རྣམ་པ་མི་འདྲ་བ་སྣ་ཚོགས་བརྒྱུད་དེ་རྒྱལ་ཁབ་ཀྱི་བྱ་གཞག་དོ་དམ་དང་། དཔལ་འབྱོར་དང་རིག་གནས་བྱ་གཞག་དོ་དམ། སྤྱི་ཚོགས་ཀྱི་བྱ་གཞག་དོ་དམ་བཅས་བྱེད་པའི་འགན་ལེན་བྱེད་པ། གསོན་ཉམས་ལྡན་ཞིང་འཁྲུག་ཆ་དོད་པ་དང་། བརྟན་ལྷིང་མཐུན་སྒྲིལ་གྱི་ཆབ་སྲིད་རྣམ་པ་སྲ་བརྟན་དང་འཕེལ་རྒྱས་གཏོང་དགོས།

(གཅིག) ཏང་གི་འགོ་ཁྲིད་མཐའ་འཁྱོངས་དང་། མི་དམངས་རང་ཁྱིམ་རང་བདག ཁྲིམས་མཐུན་ལྟར་རྒྱལ་ཁབ་སྐྱོང་བ་བཅས་གཅིག་གྱུར་དམ་ཟབ་བྱེད་དགོས། ཏང་གི་འགོ་ཁྲིད་ནི་མི་དམངས་ཀྱིས་རང་ཁྱིམ་རང་བདག་བྱེད་པ་དང་ཁྲིམས་མཐུན་ལྟར་རྒྱལ་ཁབ་སྐྱོང་བའི་རྩ་བའི་འགན་ལེན་ཡིན་པ་དང་། མི་དམངས་རང་ཁྱིམ་རང་བདག་བྱེད་པ་ནི་སྤྱི་ཚོགས་རིང་ལུགས་ཀྱི་དམངས་གཙོའི་ཆབ་སྲིད་ཀྱི་ངོ་བོའི་ཁྱད་ཆོས་ཡིན་ལ། ཁྲིམས་མཐུན་ལྟར་རྒྱལ་ཁབ་སྐྱོང་བ་ནི་ཏང་གིས་མི་དམངས་ཀྱི་འགོ་ཁྲིད་དེ་རྒྱལ་ཁབ་སྐྱོང་བའི་གཞི་རྩའི་རྣམ་པ་ཡིན་ཞིང་། འདི་གསུམ་པོ་རང་རྒྱལ་སྤྱི་ཚོགས་རིང་ལུགས་ཀྱི་དམངས་གཙོའི་ཆབ་སྲིད་ཀྱི་ལག་ལེན་རླབས་པོ་ཆེའི་ནང་དུ་གཅིག་གྱུར་བྱུང་ཡོད། རང་རྒྱལ་གྱི་ཆབ་སྲིད་འཚོ་བའི་ཁྲོད་དུ། ཏང་ནི་འགོ་ཁྲིད་བྱེད་མཁན་གྱི་གནས་སུ་ཡོད་པས། ཏང་གི་གཅིག་སྡུད་དང་གཅིག་གྱུར་གྱི་འགོ་ཁྲིད་བྱེད་ཤུགས་ཇེ་ཆེར་གཏོང་བ་དང་གཅིག མི་དམངས་འཐུས་ཚོགས་དང་། སྲིད་གཞུང་། སྲིད་གྲོས་བཅས་དང་། ཁྲིམས་ཁང་དང་ཞིབ་དཔྱོད་ཁང་གིས་ཁྲིམས་མཐུན་དང་སྒྲིག་ཡིག་ལྟར་འགན་ནུས་སྒྲུབ་པ་དང་། ལས་དོན་སྒྲུབ་པ། ནུས་པ་འདོན་པ་བཅས་ལ་རྒྱབ་སྐྱོར་བྱེད་པ་དང་གཉིས་ཏེ། འདི་གཉིས་ནི་གཅིག་གྱུར་ཡིན། ཏང་གི་འགོ་ཁྲིད་བྱེད་སྟངས་དང་སྲིད་དབང་སྐྱོང་སྟངས་ལེགས་སྒྱུར་བྱས་ཏེ། ཏང་གིས་མི་དམངས་ཀྱི་འགོ་ཁྲིད་དེ་རྒྱལ་ཁབ་ཕན་ནུས་ལྡན་པར་སྐྱོང་བའི་འགན་ལེན་བྱེད་དགོས། མི་དམངས་གོ་རིམ་ལྡན་པའི་ངང་ཆབ་སྲིད་ལ་ཐེ་ཞུགས་བྱེད་རྒྱ་བསྐྱེད་དེ། མི་དམངས་ཀྱིས་ཁྲིམས་མཐུན་ལྟར་དམངས་གཙོའི་འདེམས་བསྐོ་དང་། དམངས་གཙོའི་གྲོས་མོལ། དམངས་གཙོའི་ཇུས་གཅོད། དམངས་གཙོའི་དོ་དམ། དམངས་གཙོའི་ལྟ་སྐུལ་བཅས་བྱེད་པའི་འགན་ལེན་བྱེད་དགོས། རྒྱལ་ཁབ་ཀྱི་ཁྲིམས་ལུགས་གཅིག་གྱུར་དང་། གཟི་རྔམ། དབང་ཟིལ་བཅས་སྲུང་སྐྱོང་བྱེད་པ་དང་། འགྲོ་བ་མིའི་ཐོབ་ཐང་ཁྲིམས་སྐྱོང་གི་ཐོག་ནས་འགན་སྲུང་བྱེད་ཤུགས་ཇེ་ཆེར་གཏོང་བ། མི་དམངས་ཀྱིས་ཁྲིམས་མཐུན་ལྟར་ཁྱབ་རྒྱ་ཆེ་བའི་ཁེ་དབང་དང་རང་དབང་ལོངས་སུ་སྤྱོད་པའི་འགན་ལེན་བཅས་བྱེད་དགོས། གཞི་རིམ་གྱི་སྲིད་དབང་སྲ་བརྟན་དུ་གཏོང་བ་དང་། གཞི་རིམ་གྱི་དམངས་གཙོའི་ལམ་ལུགས་འཐུས་སྒོ་ཚང་དུ་གཏོང་བ། མི་དམངས་ཀྱི་གནས་ཚུལ་ཤེས་དབང་དང་། ཐེ་ཞུགས་བྱེད་དབང་། འདོད་བློ་མཚོན་པར་བྱེད་དབང་། ལྟ་སྐུལ་བྱེད་དབང་བཅས་འགན་ལེན་བྱེད་དགོས། ཁྲིམས་མཐུན་ལྟར་ཇུས་ཐག་གཅོད་པའི་ལམ་སྲོལ་ཆ་ཚང་དུ་གཏོང་བ་དང་། ཇུས་གཅོད་ཚན་རིག་དང་མཐུན་ཞིང་། ལག་བསྟར་བློ་ཐག་ཆོད་པ། ལྟ་སྐུལ་ཤེད་ཤུགས་ལྡན་པ་བཅས་ཀྱི་དབང་ཆ་སྤྱོད་པའི་ལམ་སྲོལ་འཛུགས་དགོས། རིམ་ཁག་འགོ་ཁྲིད་ལས་བྱེད་པས་དམངས་གཙོའི་འདུ་ཤེས་ཟབ་ཏུ་གཏོང་བ་དང་། དམངས་གཙོའི་སྤྱོད་ཚུལ་དར་སྤེལ། མི་དམངས་ཀྱི་ལྟ་སྐུལ་དང་ལེན་བཅས་བྱས་ནས། མི་དམངས་ཀྱི་སྤྱི་ཞབས་པ་བཟང་པོ་བྱེད་དགོས།

(གཉིས) མི་དམངས་རང་ཁྱིམ་རང་བདག་བྱེད་པའི་ལམ་ལུགས་ཀྱི་འགན་སྲུང་བྱེད་ཤུགས་ཇེ་ཆེར་གཏོང་དགོས། མི་དམངས་འཐུས་མི་ཚོགས་ཆེན་གྱི་ལམ་ལུགས་ནི་ཏང་གི་འགོ་ཁྲིད་མཐའ་འཁྱོངས་དང་། མི་དམངས་ཀྱིས་རང་ཁྱིམ་རང་བདག་བྱེད་པ། ཁྲིམས་མཐུན་ལྟར་རྒྱལ་ཁབ་སྐྱོང་བ་བཅས་གཅིག་གྱུར་དམ་ཟབ་བྱེད་པའི་རྩ་བའི་ཆབ་སྲིད་ལམ་ལུགས་ཀྱི་བཀོད་སྒྲིག་ཡིན་པས། ངེས་པར་དུ་ཡུན་རིང་མཐའ་འཁྱོངས་བྱེད་པ་དང་རྒྱུན་མི་ཆད་པར་འཐུས་སྒོ་ཚང་དུ་གཏོང་དགོས། མི་དམངས་ཀྱིས་མི་དམངས་འཐུས་མི་ཚོགས་ཆེན་བརྒྱུད་དེ་རྒྱལ་ཁབ་ཀྱི་དབང་ཆ་སྤྱོད་པར་རྒྱབ་སྐྱོར་དང་འགན་ལེན་བྱེད་དགོས། མི་དམངས་འཐུས་ཚོགས་དང་དེའི་རྒྱུན་ལས་ཨུ་ལྷན་གྱིས་ཁྲིམས་འཛུགས་ཀྱི་ལས་ཀའི་ཁྲོད་གཙོ་ཁྲིད་ཀྱི་ནུས་པ་འདོན་པ་དང་། མི་དམངས་འཐུས་ཚོགས་ཀྱི་རྩ་འཛུགས་ལམ་ལུགས་དང་ལས་ཀའི་ལམ་ལུགས་འཐུས་ཚང་དུ་གཏོང་བ། མི་དམངས་འཐུས་ཚོགས་ཀྱིས་ཁྲིམས་མཐུན་ལྟར་ཁྲིམས་འཛུགས་ཀྱི་དབང་ཆ་དང་། ལྟ་སྐུལ་གྱི་དབང་ཆ། ཐག་གཅོད་ཀྱི་དབང་ཆ། བསྐོ་འཐེན་གྱི་དབང་ཆ་བཅས་སྤྱོད་པར་རྒྱབ་སྐྱོར་དང་འགན་ལེན་བྱས་ཏེ། མི་དམངས་འཐུས་ཚོགས་ཀྱི་འཐུས་མིའི་ནུས་པ་སྔར་ལས་ལེགས་པར་བཏོན་ནས། མི་དམངས་འཐུས་ཚོགས་རིམ་པ་ཁག་དང་དེའི་རྒྱུན་ལས་ཨུ་ལྷན་རྩ་ཁྲིམས་དང་བཅའ་ཁྲིམས་ཀྱིས་སྤྲད་པའི་འགན་འཁྲི་ཁག་ཕྱོགས་ཡོངས་ནས་ཕྲག་ཏུ་འཁུར་བའི་ལས་དོན་ལས་ཁུངས་སུ་འགྱུར་བར་བྱེད་པ་དང་། མི་དམངས་མང་ཚོགས་དང་འབྲེལ་བ་དམ་ཟབ་བྱེད་པའི་འཐུས་ཚབ་ལས་ཁུངས་སུ་འགྱུར་བར་བྱེད་དགོས། མི་དམངས་འཐུས་ཚོགས་ཀྱི་ཆེད་དོན་ཨུ་ཡོན་ལྷན་ཁང་འཛུགས་སྟངས་འཐུས་སྒོ་ཚང་དུ་གཏོང་བ་དང་། མི་དམངས་འཐུས་ཚོགས་ཀྱི་རྒྱུན་ལས་ཨུ་ལྷན་དང་ཆེད་དོན་ཨུ་ལྷན་ཁོངས་མིའི་གྲུབ་ཚུལ་ཇེ་ལེགས་སུ་གཏོང་དགོས།

(གསུམ) སྤྱི་ཚོགས་རིང་ལུགས་ཀྱི་གྲོས་མོལ་དམངས་གཙོའི་ནུས་པ་གལ་ཆེན་འདོན་སྤེལ་བྱེད་དགོས། བྱ་བ་ཐམས་ཅད་གྲོས་མོལ་བྱས་པས་ཆོག མི་དམངས་ཀྱི་བྱ་བ་མི་དམངས་ཀྱིས་གྲོས་ནས་སྒྲུབ་དགོས་པ་འདི་ནི་མི་དམངས་དམངས་གཙོའི་བདེན་ལུགས་མཐར་སོན་རེད། གྲོས་མོལ་དམངས་གཙོ་ནི་ཏང་གི་འགོ་ཁྲིད་མངོན་འགྱུར་བྱེད་ཐབས་གལ་ཆེན་ཞིག་ཡིན་ལ། རང་རྒྱལ་སྤྱི་ཚོགས་རིང་ལུགས་ཀྱི་དམངས་གཙོའི་ཆབ་སྲིད་རྣམ་པ་ཁྱད་པར་ཅན་དང་ཐུན་མོང་མ་ཡིན་པའི་དགེ་མཚན་ཡིན་པས། དམངས་གཙོ་གྲོས་མོལ་ཡོངས་ཁྱབ་དང་། རིམ་པ་མང་པོ། ལམ་ལུགས་ཅན་བཅས་སུ་འཕེལ་རྒྱས་གཏོང་བ་དང་། སྲིད་ཏང་གི་གྲོས་མོལ་དང་། མི་དམངས་འཐུས་ཚོགས་ཀྱི་གྲོས་མོལ། སྲིད་གཞུང་གི་གྲོས་མོལ། སྲིད་གྲོས་ཀྱི་གྲོས་མོལ། མི་དམངས་ཚོགས་པའི་གྲོས་མོལ། གཞི་རིམ་གྱི་གྲོས་མོལ། དེ་བཞིན་སྤྱི་ཚོགས་རྩ་འཛུགས་ཀྱི་གྲོས་མོལ་བཅས་གཅིག་གྱུར་འཆར་འགོད་ཀྱིས་སྐུལ་འདེད་གཏོང་དགོས། གྲོས་མོལ་དམངས་གཙོའི་ལམ་ལུགས་འཛུགས་སྐྱོང་བྱེད་ཤུགས་ཇེ་ཆེར་བཏང་སྟེ། ལམ་ལུགས་ཀྱི་གོ་རིམ་དང་ཐེ་ཞུགས་ཀྱི་ལག་ལེན་ཆ་ལག་ཚང་བ་ཞིག་ཆགས་པར་བྱས་ནས། མི་དམངས་ལ་དུས་རྒྱུན་གྱི་ཆབ་སྲིད་འཚོ་བའི་ཁྲོད་ཐེ་ཞུགས་ཀྱི་ཁེ་དབང་ཡོངས་ཁྱབ་དང་། རྒྱུན་མཐུད། གཏིང་ཟབ་བཅས་ཡོང་བའི་འགན་ལེན་བྱེད་དགོས།

མི་དམངས་སྲིད་གྲོས་ནི་ཀྲུང་གོའི་ཁྱད་ཆོས་ཀྱི་ལམ་ལུགས་ཀྱི་བཀོད་སྒྲིག་ཡིན་ལ། སྤྱི་ཚོགས་རིང་ལུགས་ཀྱི་གྲོས་མོལ་དམངས་གཙོའི་ཐབས་ལམ་གལ་ཆེན་དང་ཆེད་དོན་གྲོས་མོལ་ལས་ཁུངས་ཡིན། མི་དམངས་སྲིད་གྲོས་ཀྱི་ལས་དོན་ནང་ཏང་དང་རྒྱལ་ཁབ་ཀྱི་ལས་འགན་ལྟེ་བ་འདུས་དགོས་པ་དང་། མཐུན་སྒྲིལ་དང་དམངས་གཙོའི་བརྗོད་བྱ་གཙོ་བོ་གཉིས་ལ་དམིགས་ཏེ། གྲོས་མོལ་དམངས་གཙོ་དེ་ཆབ་སྲིད་གྲོས་མོལ་དང་། དམངས་གཙོའི་ལྟ་སྐུལ། སྲིད་ཞུགས་སྲིད་གླེང་བཅས་ཀྱི་གོ་རིམ་ཡོངས་ལ་ཁྱབ་པར་བྱེད་དགོས་ལ། སྲིད་དོན་གྲོས་མོལ་གྱི་ནང་དོན་དང་རྣམ་པ་འཐུས་སྒོ་ཚང་དུ་གཏོང་བ་དང་། ངོས་འཛིན་གཅིག་མཐུན་ཇེ་ཆེ་དང་མཐུན་སྒྲིལ་ཇེ་དམ་དུ་གཏོང་གང་ཐུབ་བྱེད་དགོས། མི་དམངས་སྲིད་གྲོས་ཀྱི་དམངས་གཙོའི་ལྟ་སྐུལ་བྱེད་ཤུགས་ཇེ་ཆེར་བཏང་སྟེ། ཏང་དང་རྒྱལ་ཁབ་ཀྱི་བྱེད་ཕྱོགས་དང་སྲིད་ཇུས་གལ་ཆེན་དང་ཇུས་གཞི་གལ་ཆེན་གྱི་བཀོད་སྒྲིག་དོན་འཁྱོལ་བྱས་ཚུལ་ལ་གཙོ་གནད་དུ་ལྟ་སྐུལ་བྱེད་དགོས། མི་དམངས་སྲིད་གྲོས་ཀྱི་ལས་རིགས་དབྱེ་ཁོངས་མི་འདྲ་བའི་མཚོན་བྱེད་རང་བཞིན་ཇེ་ཆེར་གཏོང་བ་དང་། ཨུ་ཡོན་གྱི་དཔུང་ཁག་འཛུགས་སྐྱོང་བྱེད་ཤུགས་ཇེ་ཆེར་གཏོང་དགོས།

(བཞི) ཁྲིམས་མཐུན་ལྟར་རྒྱལ་ཁབ་སྐྱོང་བའི་ལག་ལེན་ཇེ་ཟབ་ཏུ་གཏོང་དགོས། ཕྱོགས་ཡོངས་ནས་ཁྲིམས་མཐུན་ལྟར་རྒྱལ་ཁབ་སྐྱོང་རྒྱུ་ནི་རྒྱལ་ཁབ་བཅོས་སྐྱོང་གི་གསར་བརྗེ་གཏིང་ཟབ་མོ་ཞིག་ཡིན་པས། ཁྲིམས་ཀྱིས་སྐྱོང་བ་ངེས་པར་མཐའ་འཁྱོངས་བྱས་ནས། ཚན་རིག་དང་མཐུན་པའི་ཁྲིམས་འཛུགས་དང་། ཁྲིམས་བསྟར་ནན་པོར་བྱེད་པ། ཁྲིམས་འཛིན་དྲང་གཞག དམངས་ཡོངས་ཀྱིས་ཁྲིམས་སྲུང་བཅས་ལ་སྐུལ་སྤེལ་གཏོང་དགོས། ཕྱོགས་ཡོངས་ནས་ཁྲིམས་མཐུན་ལྟར་རྒྱལ་ཁབ་སྐྱོང་བའི་ཀྲུང་དབྱང་གི་འགོ་ཁྲིད་ཚོགས་ཆུང་བཙུགས་ནས། ཁྲིམས་སྐྱོང་གི་ཀྲུང་གོ་འཛུགས་སྐྱོང་ལ་གཅིག་གྱུར་ཐོག་འགོ་ཁྲིད་བྱེད་ཤུགས་ཇེ་ཆེར་གཏོང་དགོས། རྩ་ཁྲིམས་ལག་བསྟར་དང་ལྟ་སྐུལ་བྱེད་ཤུགས་ཇེ་ཆེར་གཏོང་བ་དང་། རྩ་ཁྲིམས་དང་འཚམ་མཐུན་ཡིན་མིན་ཞིབ་བཤེར་བྱས་ཏེ། རྩ་ཁྲིམས་ཀྱི་དབང་ཟིལ་སྲུང་སྐྱོང་བྱེད་དགོས། ཚན་རིག་དང་མཐུན་པར་ཁྲིམས་འཛུགས་དང་། དམངས་གཙོའི་ཁྲིམས་འཛུགས། ཁྲིམས་མཐུན་ལྟར་ཁྲིམས་འཛུགས་བཅས་བྱས་ནས། ཁྲིམས་བཟང་ལ་བརྟེན་ནས་འཕེལ་རྒྱས་ལ་སྐུལ་འདེད་གཏོང་བ་དང་། ལེགས་སྐྱོང་མཁས་པོ་ཡོང་བའི་འགན་སྲུང་བྱེད་དགོས། ཁྲིམས་སྐྱོང་སྲིད་གཞུང་འཛུགས་སྐྱོང་བྱས་ནས། ཁྲིམས་མཐུན་ལྟར་སྲིད་སྐྱོང་བར་སྐུལ་འདེད་གཏོང་བ་དང་། ཁྲིམས་བསྟར་གཟབ་ནན་ཚད་ལྡན་དང་དྲང་གཞག་ཡ་རབས་བཅས་ཀྱི་སྒོ་ནས་བྱེད་དགོས། ཁྲིམས་འཛིན་སྒྲིག་སྲོལ་ཕྱོགས་བསྡུས་ཀྱིས་སྒྱུར་བཅོས་ཆ་ལག་ཚང་བར་གཏིང་ཟབ་བྱེད་པ་དང་། ཁྲིམས་འཛིན་འགན་འཁྲིའི་ལམ་ལུགས་ཕྱོགས་ཡོངས་ནས་དོན་འཁྱོལ་བྱས་ཏེ། ཁྲིམས་འཛིན་གྱི་གྱོད་དོན་རེ་རེའི་ནང་མི་དམངས་མང་ཚོགས་ལ་འདྲ་མཉམ་དང་དྲང་གཞག་གི་ཚོར་སྣང་སྐྱེས་སུ་འཇུག་གང་ཐུབ་བྱེད་དགོས། དམངས་ཡོངས་ལ་ཁྲིམས་ལུགས་ཤེས་བྱ་ཁྱབ་སྤེལ་གཏོང་ཤུགས་ཇེ་ཆེར་གཏོང་བ་དང་། སྤྱི་ཚོགས་རིང་ལུགས་ཀྱི་ཁྲིམས་སྐྱོང་རིག་གནས་འཛུགས་སྐྱོང་བྱེད་པ། རྩ་ཁྲིམས་དང་བཅའ་ཁྲིམས་བླ་ན་མེད་པ་དང་། བཅའ་ཁྲིམས་ཀྱི་མདུན་དུ་མི་ཚང་མ་འདྲ་མཉམ་ཡིན་པའི་ཁྲིམས་སྐྱོང་གི་བསམ་གཞི་འཆང་དུ་འཇུག་དགོས། ཏང་རྩ་འཛུགས་རིམ་པ་ཁག་དང་ཏང་ཡོན་ཡོངས་ཀྱིས་སྣེ་ཁྲིད་དེ་བཅའ་ཁྲིམས་ལ་བརྩི་འཇོག་དང་། སློབ་སྦྱོང་། བརྩི་སྲུང་། བེད་སྤྱོད་བཅས་བྱེད་དགོས། རྩ་འཛུགས་དང་སྒེར་པ་སུ་གང་ལ་ཡང་རྩ་ཁྲིམས་དང་བཅའ་ཁྲིམས་ལས་འདས་པའི་དམིགས་བསལ་དབང་ཆ་ཡོད་མི་ཆོག ཁྲིམས་ཚབ་གཏམ་བྱེད་དང་། ཁྲིམས་མགོ་དབང་གནོན། ཁེ་གཉེར་ཁྲིམས་འགལ། ཉེར་ཕྱོགས་ཁྲིམས་འགལ་བཅས་གཏན་ནས་བྱེད་མི་ཆོག

(ལྔ) སྒྲིག་གཞི་དང་སྲིད་འཛིན་སྒྲིག་སྲོལ་སྒྱུར་བཅོས་གཏིང་ཟབ་བྱེད་དགོས། སྒྲིག་གཞི་སྣ་ཚོགས་འཛུགས་པར་གཅིག་གྱུར་གྱིས་བཀོད་སྒྲིག་བྱས་ནས། ཏང་སྲིད་སྡེ་ཁག་དང་ནང་ཁུལ་དུ་བཙུགས་པའི་སྒྲིག་གཞིའི་དབང་ཆ་ཚན་རིག་དང་མཐུན་པར་བགོ་སྒྲིག་བྱེད་པ་དང་འགན་འཁྲི་ཁ་གསལ་བཟོ་དགོས། སྒྲིག་ཁོངས་ཀྱི་ཐོན་ཁུངས་སྣ་ཚོགས་གཅིག་གྱུར་གྱིས་བཀོལ་སྤྱོད་བྱས་ནས། དོ་དམ་གྱི་སྒྲིག་སྲོལ་ཚན་རིག་དང་མཐུན་ཞིང་འཚམ་པོ་ཆགས་པར་བྱེད་པ་དང་། རྒྱལ་ཁབ་ཀྱི་སྒྲིག་གཞིའི་འཛུགས་ཁྲིམས་འཐུས་སྒོ་ཚང་དུ་གཏོང་དགོས། སྲིད་གཞུང་གི་འགན་ནུས་སྒྱུར་བ་དང་། ལས་ཁུངས་ཁུ་བསྡུ་དང་དབང་ཆ་གཤམ་སྤྲོད་གཏིང་ཟབ་བྱེད་པ། ལྟ་སྐུལ་དོ་དམ་བྱེད་སྟངས་གསར་སྐྲུན་བྱེད་པ། སྲིད་གཞུང་ལ་ཀུན་གྱིས་ཡིད་ཆེས་བྱེད་ཚད་དང་སྲིད་གཞུང་གི་ལག་བསྟར་བྱེད་ཤུགས་ཇེ་ཆེར་གཏོང་བ་བཅས་བྱས་ནས། མི་དམངས་ཀྱི་འདོད་བློ་ཚིམ་པའི་ཞབས་ཞུ་ཅན་གྱི་སྲིད་གཞུང་འཛུགས་སྐྱོང་བྱེད་དགོས། ཞིང་ཆེན་རིམ་པ་དང་དེ་མན་གྱི་སྲིད་གཞུང་ལ་རང་བདག་དབང་ཆ་སྔར་བས་མང་པོ་སྤྲོད་དགོས། ཞིང་ཆེན་དང་གྲོང་ཁྱེར་དང་རྫོང་བཅས་སུ་འགན་ནུས་འདྲ་མཚུངས་ཡིན་པའི་ཏང་སྲིད་ལས་ཁུངས་ཟླ་སྒྲིལ་གྱིས་འཛུགས་པའམ་ཡང་ན་མཉམ་བསྲེས་ཀྱིས་གཞུང་དོན་སྒྲུབ་སྟངས་འཚོལ་ཞིབ་བྱེད་དགོས། བྱ་ལས་སྡེ་ཚན་སྒྱུར་བཅོས་གཏིང་ཟབ་བྱེད་པ་དང་། སྤྱི་ཕན་གྱི་ངང་ཚུལ་ཇེ་ཆེར་གཏོང་བ། སྲིད་གཞུང་དང་བྱ་ལས་སྡེ་ཚན་ལོགས་སུ་འབྱེད་པ་དང་། བྱ་ལས་སྡེ་ཚན་དང་ཁེ་ལས་སོ་སོར་འབྱེད་པ། དོ་དམ་དང་ལས་གཉེར་ལོགས་སུ་འབྱེད་པ་བཅས་བྱེད་དགོས།

(དྲུག) རྒྱལ་གཅེས་འཐབ་ཕྱོགས་གཅིག་གྱུར་སྲ་བརྟན་དང་འཕེལ་རྒྱས་གཏོང་དགོས། འཐབ་ཕྱོགས་གཅིག་གྱུར་ནི་ཏང་གི་བྱ་གཞག་ལ་རྒྱལ་ཁ་ལེན་པའི་ཐབས་མཆོག་གལ་ཆེན་ཞིག་ཡིན་པས་ངེས་པར་དུ་ཡུན་རིང་མཐའ་འཁྱོངས་བྱེད་དགོས། རྒྱལ་གཅེས་རིང་ལུགས་དང་སྤྱི་ཚོགས་རིང་ལུགས་ཀྱི་དར་ཆ་མཐོན་པོར་བསྒྲེངས་ནས། མཐུན་སྒྲིལ་ཆེན་པོ་དང་མཉམ་འབྲེལ་ཆེན་པོའི་བརྗོད་བྱ་གཙོ་བོ་ཁོང་དུ་ཟབ་མོ་ཆུད་པར་བྱེད་པ་དང་།

 གཅིག་མཐུན་རང་བཞིན་དང་སྣ་མང་རང་བཞིན་གཅིག་གྱུར་མཐའ་འཁྱོངས་བྱས་ཏེ། སྤྱི་མཐུན་གྱི་ཆ་ཆེ་ཤོས་རྙེད་པར་བྱེད་པ་དང་། ཐུན་མོང་གི་རེ་སྨོན་ཆེ་ཤོས་གཏོད་དགོས། ཡུན་རིང་མཉམ་གནས་དང་། ཕན་ཚུན་ལྟ་སྐུལ། གཅིག་སེམས་གཅིག་གཏད། བདེ་སྡུག་མཉམ་མྱོང་བཅས་མཐའ་འཁྱོངས་བྱས་ནས། དམངས་གཙོའི་ཏང་ཤོག་ལ་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་སྲིད་ཞུགས་ཏང་གི་བླང་བྱ་ལྟར་འགན་ནུས་སྔར་ལས་ལེགས་པར་སྒྲུབ་པའི་རྒྱབ་སྐྱོར་བྱེད་དགོས། མི་རིགས་མཐུན་སྒྲིལ་དང་ཡར་ཐོན་གྱི་སློབ་གསོ་གཏིང་ཟབ་སྤེལ་བ་དང་། ཀྲུང་ཧྭ་མི་རིགས་ཀྱི་ཐུན་མོང་ཚོགས་པའི་འདུ་ཤེས་བརྟན་པོ་འཆང་བ་དང་། མི་རིགས་ཁག་ཕན་ཚུན་འགྲོ་འོང་དང་སྤེལ་རེས་མཉམ་འདྲེས་བཅས་བྱེད་ཤུགས་ཇེ་ཆེར་བཏང་སྟེ། མི་རིགས་ཁག་སེ་འབྲུ་བཞིན་དུ་རྡོག་པོར་འགྲིལ་བར་བྱས་ནས། མཉམ་དུ་མཐུན་སྒྲིལ་འབད་འཐབ་དང་། མཉམ་དུ་དར་རྒྱས་གོང་འཕེལ་ཡོང་བར་བྱེད་དགོས། ཏང་གི་ཆོས་ལུགས་ལས་དོན་གྱི་གཞི་རྩའི་བྱེད་ཕྱོགས་ཕྱོགས་ཡོངས་ནས་ལག་བསྟར་བྱེད་པ་དང་། རང་རྒྱལ་གྱི་ཆོས་ལུགས་ཀྲུང་གོ་ཅན་དུ་འགྱུར་བའི་ཁ་ཕྱོགས་མཐའ་འཁྱོངས་དང་། ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་འཚམ་མཐུན་ཡོང་བ་བྱེད་པར་ཁྲིད་སྟོན་ཧུར་ཐག་བྱེད་དགོས། ཏང་ཕྱིའི་ཤེས་ཡོན་ཅན་གྱི་ལས་དོན་སྒྲུབ་ཤུགས་ཇེ་ཆེར་གཏོང་བ་དང་། སྤྱི་ཚོགས་ཀྱི་རིམ་གྲས་གསར་པའི་མི་སྣའི་ལས་དོན་ལེགས་པོར་བསྒྲུབས་ཏེ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་བྱ་གཞག་འཛུགས་སྐྲུན་བྱེད་པའི་ཁྲོད་ཀྱི་ཁོང་ཚོའི་ནུས་པ་གལ་ཆེན་འདོན་སྤེལ་བྱེད་དགོས། མཛའ་མཐུན་ལྷད་མེད་ཀྱི་སྲིད་ཚོང་འབྲེལ་བ་གསར་པ་འཛུགས་པ་དང་། སྤྱི་ལ་དབང་བ་མ་ཡིན་པའི་ལམ་ལུགས་ཀྱི་དཔལ་འབྱོར་སྐྱོན་བྲལ་ངང་འཕེལ་རྒྱས་གཏོང་བ་དང་སྤྱི་ལ་དབང་བ་མ་ཡིན་པའི་ལམ་ལུགས་ཀྱི་དཔལ་འབྱོར་མི་སྣ་སྐྱོན་བྲལ་ངང་འཚར་ལོངས་ཡོང་བར་སྐུལ་སྤེལ་གཏོང་དགོས། ཕྱིར་སྡོད་སྤུན་ཟླ་དང་། ཕྱིར་ལོག་རང་མི་དང་ཕྱིར་སྡོད་རང་མིའི་ཁྱིམ་མི་བཅས་ལ་ཡོངས་ཁྱབ་ཏུ་མཐུན་སྒྲིལ་དང་འབྲེལ་གཏུག་བྱས་ནས། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་མཉམ་དུ་འབད་བརྩོན་བྱེད་དགོས།

བློ་མཐུན་རྣམ་པ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཆབ་སྲིད་ལམ་ལུགས་ནི་ཀྲུང་གོ་གུང་ཁྲན་ཏང་དང་ཀྲུང་གོའི་མི་དམངས་ཀྱི་གསར་གཏོད་རླབས་པོ་ཆེ་ཞིག་ཡིན། རང་རྒྱལ་སྤྱི་ཚོགས་རིང་ལུགས་ཀྱི་དམངས་གཙོའི་ཆབ་སྲིད་ཀྱི་དགེ་མཚན་དང་ཁྱད་ཆོས་ཡོངས་སུ་འདོན་སྤེལ་བྱས་ནས། མིའི་རིགས་ཀྱི་ཆབ་སྲིད་དཔལ་ཡོན་ཡར་ཐོན་ཡོང་བར་ཀྲུང་གོའི་བློ་གྲོས་ཀྱིས་ཁེངས་པའི་བྱས་རྗེས་འཇོག་པར་ང་ཚོར་རྦད་དེ་གདེང་ཚོད་དང་ནུས་པ་ཡོད།

བདུན། རིག་གནས་ཀྱི་གདེང་ཚོད་བརྟན་པོ་ཡོང་བར་བྱས་ཏེ། སྤྱི་ཚོགས་རིང་ལུགས་ཀྱི་རིག་གནས་དར་རྒྱས་གོང་འཕེལ་ཡོང་བར་བྱེད་དགོས།

རིག་གནས་ནི་རྒྱལ་ཁབ་ཅིག་དང་མི་རིགས་ཤིག་གི་བླ་སྲོག་ཡིན་པས། རིག་གནས་དར་ན་རྒྱལ་ཁབ་དར་རྒྱས་ཡོང་བ་དང་། རིག་གནས་སྟོབས་དང་ལྡན་ན་མི་རིགས་སྟོབས་ལྡན་དུ་འགྱུར་ངེས། རིག་གནས་ཀྱི་གདེང་ཚོད་ཆེན་པོ་མེད་པ་དང་། རིག་གནས་དར་རྒྱས་གོང་འཕེལ་མ་བྱུང་ན། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་མི་སྲིད། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རིག་གནས་འཕེལ་རྒྱས་ཀྱི་བགྲོད་ལམ་མཐའ་འཁྱོངས་བྱེད་པ་དང་། མི་རིགས་ཡོངས་ཀྱི་རིག་གནས་གསར་གཏོད་དང་གསར་སྐྲུན་གྱི་གསོན་ཤུགས་སྐུལ་སློང་བྱས་ནས། སྤྱི་ཚོགས་རིང་ལུགས་ཀྱི་རིག་གནས་སྟོབས་ལྡན་རྒྱལ་ཁབ་སྐྲུན་དགོས། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རིག་གནས་ནི་ཀྲུང་ཧྭ་མི་རིགས་ཀྱི་ལོ་ངོ་ལྔ་སྟོང་ལྷག་ཙམ་གྱི་དཔལ་ཡོན་རྒྱས་པའི་ལོ་རྒྱུས་ལས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་བྱུང་བ་དང་། ཏང་གིས་མི་དམངས་ཀྱི་འགོ་ཁྲིད་དེ་གསར་བརྗེ་དང་། འཛུགས་སྐྲུན། སྒྱུར་བཅོས་གསུམ་གྱི་ཁྲོད་གསར་དུ་བཏོད་པའི་གསར་བརྗེའི་རིག་གནས་དང་སྤྱི་ཚོགས་རིང་ལུགས་ཀྱི་སྔོན་ཐོན་རིག་གནས་བཏོད་པ་ཡིན་ཞིང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ལག་ལེན་རླབས་པོ་ཆེའི་ནང་རྩ་བ་ཚུགས་ཡོད། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རིག་གནས་འཕེལ་རྒྱས་གཏོང་བ་ནི་མར་ཁེ་སི་རིང་ལུགས་མཛུབ་ཁྲིད་དུ་བྱེད་པ་དང་། ཀྲུང་ཧྭའི་རིག་གནས་ཀྱི་ལངས་ཕྱོགས་བརྟན་སྲུང་། དེང་རབས་ཀྱི་ཀྲུང་གོའི་དོན་དངོས་ལ་རྩ་བ་འཛུགས་པ། ད་ལྟའི་དུས་རབས་ཀྱི་ཆ་རྐྱེན་དང་ཟུང་འབྲེལ་བཅས་བྱས་ཏེ་དེང་རབས་ཅན་དུ་ཁ་ཕྱོགས་པ་དང་། འཛམ་གླིང་ལ་ཁ་ཕྱོགས་པ། མ་འོངས་པར་ཁ་ཕྱོགས་པ་བཅས་དང་། མི་རིགས་དང་། ཚན་རིག མང་ཚོགས་བཅས་ཀྱི་སྤྱི་ཚོགས་རིང་ལུགས་ཀྱི་རིག་གནས་འཕེལ་རྒྱས་གཏོང་བ་ཡིན་ལ། སྤྱི་ཚོགས་རིང་ལུགས་ཀྱི་བསམ་པའི་དཔལ་ཡོན་དང་དངོས་པོའི་དཔལ་ཡོན་མཐུན་སྦྱོར་ངང་འཕེལ་རྒྱས་ཡོང་བར་བྱེད་པ་ཡིན། མི་དམངས་ལ་ཞབས་འདེགས་ཞུ་བ་དང་སྤྱི་ཚོགས་རིང་ལུགས་ལ་ཞབས་འདེགས་ཞུ་བ་མཐའ་འཁྱོངས་བྱེད་པ་དང་། མེ་ཏོག་མཉམ་བཞད་དང་མཁས་བརྒྱ་འགྲན་གླེང་མཐའ་འཁྱོངས་བྱེད་པ། གསར་སྐྲུན་རང་བཞིན་སྤོ་སྒྱུར་དང་། གསར་གཏོད་རང་བཞིན་གྱི་འཕེལ་རྒྱས་མཐའ་འཁྱོངས་བྱས་ནས། ཀྲུང་ཧྭའི་རིག་གནས་འོད་སྟོང་འབར་བ་གསར་པ་རྒྱུན་མ་ཆད་པར་གསར་དུ་གཏོད་དགོས།

(གཅིག) འདུ་ཤེས་འཛིན་སྟངས་ཀྱི་ལས་ཀའི་འགོ་ཁྲིད་དབང་ཆ་ཁོང་དུ་བརྟན་པོར་ཆུད་པར་བྱེད་དགོས། རིག་གནས་མདུན་སྐྱོད་ཀྱི་ཁ་ཕྱོགས་དང་འཕེལ་རྒྱས་ཀྱི་བགྲོད་ལམ་ནི་འདུ་ཤེས་འཛིན་སྟངས་ལ་ཐུག་པ་ཡིན་པས། མར་ཁེ་སི་རིང་ལུགས་ཀྲུང་གོ་ཅན་དང་། དུས་རབས་ཅན། མང་ཚོགས་ཅན་བཅས་སུ་འགྱུར་བར་ངེས་པར་སྐུལ་འདེད་གཏོང་བ་དང་། གོང་བུ་འགྲིལ་ཤུགས་དང་སྣེ་ཁྲིད་ཀྱི་ནུས་པ་ཆེན་པོ་ལྡན་པའི་སྤྱི་ཚོགས་རིང་ལུགས་ཀྱི་འདུ་ཤེས་འཛིན་སྟངས་སྐྱེད་སྲིང་བྱས་ནས་ཕུགས་འདུན་དང་། དད་སེམས། རིན་ཐང་གི་བསམ་གཞི། ཀུན་སྤྱོད་ཀྱི་ལྟ་བ་བཅས་ཀྱི་ཐོག་མི་དམངས་ཡོངས་མཐུན་སྒྲིལ་དམ་ཟབ་ཡོང་བར་བྱེད་དགོས། གཞུང་ལུགས་ཀྱིས་དྲག་ཆས་སྤྲོས་ཤུགས་ཆེ་རུ་བཏང་ནས། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མི་རྣམས་ཀྱི་སེམས་སུ་ཟབ་མོ་འཇགས་པར་བྱེད་དགོས། མར་ཁེ་སི་རིང་ལུགས་ཀྱི་གཞུང་ལུགས་ཞིབ་འཇུག་དང་ལེགས་སྐྱོང་ཟབ་ཏུ་སྤེལ་ནས། ཀྲུང་གོའི་ཁྱད་ཆོས་ཀྱི་མཚན་ཉིད་རིག་པ་དང་སྤྱི་ཚོགས་ཚན་རིག་གང་མྱུར་ལེགས་སྐྱོང་དང་། ཀྲུང་གོའི་ཁྱད་ཆོས་ཀྱི་རིག་མཛོད་དཔེ་གསར་འཛུགས་སྐྱོང་བྱེད་ཤུགས་ཆེ་རུ་གཏོང་དགོས། གླེང་ཕྱོགས་ཀྱི་ཁྲིད་སྟོན་ཡང་དག་མཐའ་འཁྱོངས་དང་སྒྲོག་སྤེལ་བྱེད་སྟངས་འཛུགས་སྐྱོང་དང་གསར་གཏོད་བྱེད་པར་མཐོང་ཧ་ཅང་ཆེན་པོ་བྱས་ཏེ། གསར་འགྱུར་དང་གླེང་ཕྱོགས་སྒྲོག་སྤེལ་བྱེད་ནུས་དང་། ཁྲིད་སྟོན་བྱེད་ནུས། བག་ཆགས་འཇོག་ནུས། ཀུན་གྱིས་ཡིད་ཆེས་བྱེད་ཚད་བཅས་ཇེ་ཆེར་གཏོང་དགོས། དྲ་སྦྲེལ་གྱི་ནང་དོན་ལེགས་སྐྱོང་བྱེད་ཤུགས་ཆེ་རུ་གཏོང་བ་དང་། དྲ་སྦྲེལ་ཕྱོགས་བསྡུས་ཀྱིས་བཅོས་སྐྱོང་བྱེད་པའི་མ་ལག་བཙུགས་ཏེ་དྭངས་གཙང་གི་དྲ་སྦྲེལ་བར་སྟོང་གཏོད་དགོས། འདུ་ཤེས་འཛིན་སྟངས་ཀྱི་ལས་ཀའི་འགན་འཁྲིའི་ལམ་ལུགས་དོན་འཁྱོལ་ཡོང་བར་བྱེད་པ་དང་། འཐབ་ས་ལེགས་སྐྱོང་དང་དོ་དམ་བྱེད་ཤུགས་ཆེ་རུ་གཏོང་བ། ཆབ་སྲིད་ཀྱི་རྩ་དོན་ཐད་ཀྱི་གནད་དོན་དང་། བསམ་བློའི་ངོས་འཛིན་གྱི་གནད་དོན། རིག་གཞུང་གི་ལྟ་བའི་གནད་དོན་བཅས་དབྱེ་བ་འབྱེད་པར་དོ་སྣང་བྱས་ཏེ། ནོར་འཁྲུལ་གྱི་ལྟ་བ་སྣ་ཚོགས་ལ་ལྟ་བ་གསལ་སྟོན་གྱིས་ངོ་རྒོལ་དང་བཀག་འགོག་བྱེད་དགོས།

(གཉིས) སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་སྐྱེད་སྲིང་དང་ལག་ལེན་བྱེད་དགོས། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་ནི་དེང་རབས་ཀྱི་ཀྲུང་གོའི་སྙིང་སྟོབས་གཅིག་བསྡུས་སུ་མཚོན་བྱེད་ཡིན་པ་དང་། མི་དམངས་ཡོངས་ཀྱི་ཐུན་མོང་གི་རིན་ཐང་དོན་གཉེར་གཅིག་ཏུ་འདུས་ཡོད་པས། མི་རིགས་བསྐྱར་དར་གྱི་ལས་འགན་ཆེན་པོ་འཁུར་བའི་དུས་རབས་ཀྱི་མི་གསར་པ་གསོ་སྐྱོང་བྱེད་པར་དམིགས་ཏེ། སློབ་གསོས་སྣེ་འཁྲིད་ཅིང་། ལག་ལེན་ལ་གོམས་པ་དང་། ལམ་ལུགས་ཀྱི་འགན་ལེན་བཅས་ཆེ་རུ་གཏོང་བ་དང་། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བས་རྒྱལ་དམངས་ལ་སློབ་གསོ་དང་། བསམ་པའི་དཔལ་ཡོན་ལེགས་སྤེལ། བསམ་པའི་རིག་གནས་ཐོན་རྫས་གསར་གཏོད་ཐོན་སྐྱེད་སྒྲོག་སྤེལ་བཅས་བྱེད་པར་སྣེ་ཁྲིད་ཀྱི་ནུས་པ་འདོན་སྤེལ་བྱེད་དགོས་ཤིང་། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་སྤྱི་ཚོགས་འཕེལ་རྒྱས་ཀྱི་ཕྱོགས་གང་ཅིར་འཐིམ་པར་བྱས་ཐོག མི་རྣམས་ཀྱི་བརྩེ་དུང་གི་ངོས་འཛིན་གཅིག་མཐུན་དང་བྱ་སྤྱོད་ཀྱི་གོམས་སྲོལ་དུ་འགྱུར་བར་བྱེད་དགོས། དམངས་ཡོངས་འགུལ་བ་དང་། ལས་བྱེད་པས་འགོ་ཁྲིད་མཐའ་འཁྱོངས་བྱས་ནས། ཁྱིམ་ཚང་ནས་སྒྲུབ་འགོ་རྩོམ་པ་དང་བྱིས་པའི་དུས་ནས་དམ་འཛིན་བྱེད་དགོས། ཀྲུང་ཧྭའི་སྲོལ་རྒྱུན་རིག་གནས་ཕུལ་དུ་བྱུང་བར་འདུས་པའི་བསམ་བློའི་ལྟ་བ་དང་། མི་ཆོས་ཀྱི་སྙིང་སྟོབས། ཀུན་སྤྱོད་ཀྱི་ཚད་གཞི་བཅས་འཚོལ་འདོན་དང་། དུས་རབས་ཀྱི་དགོས་མཁོ་དང་ཟུང་འབྲེལ་བྱས་ནས་རྒྱུན་འཛིན་དང་གསར་གཏོད་བྱས་ཏེ། ཀྲུང་ཧྭའི་རིག་གནས་ལ་ནམ་ཡང་མཚར་སྡུག་དང་དུས་རབས་ཀྱི་གཟི་མདངས་ལྡན་དུ་འཇུག་དགོས།

(གསུམ) བསམ་བློ་དང་ཀུན་སྤྱོད་ལེགས་སྐྱོང་བྱེད་ཤུགས་ཆེ་རུ་གཏོང་དགོས། མི་དམངས་ལ་དད་མོས་ཡོད་ན། རྒྱལ་ཁབ་ལ་སྟོབས་ཤུགས་ལྡན་ཞིང་མི་རིགས་ལ་རེ་བ་ཡོད། མི་དམངས་ཀྱི་བསམ་བློའི་གོ་རྟོགས་དང་། ཀུན་སྤྱོད་ཀྱི་ཆུ་ཚད། དཔལ་ཡོན་གྱི་བྱང་ཚད་བཅས་ཇེ་མཐོར་བཏང་ནས། སྤྱི་ཚོགས་ཡོངས་ཀྱི་དཔལ་ཡོན་ཆུ་ཚད་མཐོ་རུ་གཏོང་དགོས། ཕུགས་བསམ་དང་དད་སེམས་ཀྱི་སློབ་གསོ་ཁྱབ་ཆེར་སྤེལ་བ་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དང་ཀྲུང་གོའི་ཕུགས་འདུན་དྲིལ་བསྒྲགས་ཀྱི་སློབ་གསོ་ཟབ་སྤེལ། མི་རིགས་ཀྱི་སྙིང་སྟོབས་དང་དུས་རབས་ཀྱི་སྙིང་སྟོབས་དར་སྤེལ། རྒྱལ་གཅེས་རིང་ལུགས་དང་། ཐུན་མོང་རིང་ལུགས། སྤྱི་ཚོགས་རིང་ལུགས་བཅས་ཀྱི་སློབ་གསོ་རྒྱག་ཤུགས་ཆེ་རུ་གཏོང་བ་བཅས་བྱས་ཏེ། མི་རྣམས་ལ་ལོ་རྒྱུས་ཀྱི་ལྟ་བ་དང་། མི་རིགས་ཀྱི་ལྟ་བ། རྒྱལ་ཁབ་ཀྱི་ལྟ་བ། རིག་གནས་ཀྱི་ལྟ་བ་བཅས་ཡང་དག་འཆང་བའི་སྣེ་འཁྲིད་དགོས། སྤྱི་དམངས་ཀྱི་ཀུན་སྤྱོད་ལེགས་སྐྱོང་ལས་གཞི་ཟབ་ཏུ་སྤེལ་ནས། སྤྱི་ཚོགས་ཀྱི་སྤྱི་པའི་ཀུན་སྤྱོད་དང་། ལས་རིགས་ཀྱི་ཀུན་སྤྱོད། ཁྱིམ་ཚང་གི་སྤྱོད་བཟང་། སྒེར་གྱི་གཤིས་སྤྱོད་བཅས་ལེགས་སྐྱོང་ལ་སྐུལ་འདེད་གཏོང་ཞིང་། མི་རྣམས་ཡར་ཐོན་དགེ་བརྩོན་དང་། རྒན་བཀུར་བྱམས་བརྩེ། མེས་རྒྱལ་ལ་བློ་དཀར་བ། མི་དམངས་ལ་བློ་དཀར་བའི་སྐུལ་སློང་བྱེད་དགོས། བསམ་བློ་དང་ཆབ་སྲིད་ལས་ཀར་ཤུགས་སྣོན་རྒྱག་པ་དང་ལེགས་བཅོས་བྱས་ནས། མང་ཚོགས་རང་བཞིན་གྱི་བསམ་པའི་དཔལ་ཡོན་གསར་དུ་གཏོད་པའི་བྱེད་སྒོ་ཟབ་མོར་སྤེལ་དགོས། ཚན་རིག་གི་སྙིང་སྟོབས་དར་སྤེལ་དང་། ཚན་རིག་གི་ཤེས་བྱ་ཁྱབ་གདལ་གཏོང་བ། ཡུལ་སྲོལ་གོམས་གཤིས་སྒྱུར་བ། དུས་རབས་ཀྱི་གོམས་སྲོལ་གསར་པ་དར་སྤེལ་གཏོང་བ་བཅས་བྱས་ཏེ། རུལ་སུངས་རྗེས་ལུས་ཀྱི་རིག་གནས་བསླད་སྐྱོན་བཀག་འགོག་བྱེད་དགོས། ཡིད་རྟོན་ལེགས་སྐྱོང་དང་མ་སྐུལ་དང་བླངས་ཀྱི་ཞབས་ཞུ་ལམ་ལུགས་ཅན་དུ་འགྱུར་བར་སྐུལ་སྤེལ་གཏོང་བ་དང་། སྤྱི་ཚོགས་ཀྱི་འགན་འཁྲི་འཁུར་སེམས་དང་། སྒྲིག་ལམ་སྲུང་སེམས། ལེགས་སྐྱེས་འབུལ་སེམས་བཅས་ཆེ་རུ་གཏོང་དགོས།

(བཞི) སྤྱི་ཚོགས་རིང་ལུགས་ཀྱི་རིག་རྩལ་དར་རྒྱས་གོང་སྤེལ་གཏོང་དགོས། སྤྱི་ཚོགས་རིང་ལུགས་ཀྱི་རིག་རྩལ་ནི་མི་དམངས་ཀྱི་རིག་རྩལ་ཡིན་པས། མི་དམངས་ལྟེ་བར་འཛིན་པའི་གསར་རྩོམ་གྱི་ཁྲིད་ཕྱོགས་ངེས་པར་དུ་མཐའ་འཁྱོངས་བྱེད་དགོས་ཤིང་། འཚོ་བར་ཟབ་ཞུགས་དང་། མི་དམངས་ཀྱི་ཁྲོད་དུ་རྩ་བ་ཟབ་མོ་ཚུགས་ནས་དུས་རབས་ལ་ངོ་གནོང་མི་དགོས་པའི་རིག་རྩལ་གསར་རྩོམ་བྱེད་དགོས། རིག་རྩལ་གསར་རྩོམ་དར་རྒྱས་གཏོང་དགོས་ན། བསམ་བློ་གཏིང་ཟབ་ཅིང་སྒྱུ་རྩལ་རྩེར་སོན། བཟོ་སྐྲུན་སྤུས་དག་བཅས་ཕན་ཚུན་གཅིག་གྱུར་ཡོང་བ་མཐའ་འཁྱོངས་བྱས་ཏེ་བརྗོད་བྱ་དངོས་གསར་རྩོམ་བྱེད་ཤུགས་ཆེ་རུ་བཏང་ནས། ཏང་དང་མེས་རྒྱལ་ལ་བསྟོད་པ་དང་། མི་དམངས་དང་དཔའ་བོར་བསྟོད་པའི་བརྩམས་ཆོས་ཕུལ་བྱུང་ཆད་མེད་འདོན་དགོས། རིག་གཞུང་དམངས་གཙོ་དང་སྒྱུ་རྩལ་དམངས་གཙོ་དར་སྤེལ་བཏང་སྟེ། རིག་རྩལ་ཐོག་མར་གསར་དུ་གཏོད་ནུས་ཆེ་རུ་བཏང་སྟེ་རིག་རྩལ་གསར་གཏོད་ལ་སྐུལ་འདེད་གཏོང་དགོས། སྤུས་ཚད་དང་བརྩམས་ཆོས་འགན་འཁྲི་གསུམ་ལ་དོ་སྣང་བྱེད་པ་དར་སྤེལ་བཏང་ནས། མ་རབས་དང་། ཐ་མལ་བ། སྤྲེལ་ལད་བཅས་བཀག་འགོག་བྱེད་དགོས། རིག་རྩལ་དཔུང་ཁག་འཛུགས་སྐྱོང་བྱེད་ཤུགས་ཆེ་རུ་བཏང་སྟེ། སྤྱོད་རྩལ་གཉིས་ལྡན་གྱི་མཁས་དབང་གྲགས་ཅན་འབོར་ཆེན་ཞིག་སྐྱེད་སྲིང་བྱེད་པ་དང་། ཆུ་ཚད་མཐོ་བའི་གསར་རྩོམ་མི་སྣ་ཁག་གཅིག་གསོ་སྐྱོང་བྱེད་དགོས། (ལྔ) རིག་གནས་བྱ་གཞག་དང་རིག་གནས་ཐོན་ལས་འཕེལ་རྒྱས་ཡོང་བར་བྱེད་དགོས། མི་དམངས་ཀྱི་བདེ་སྐྱིད་ལྡན་པའི་འཚོ་བར་རོལ་བའི་རེ་སྨོན་གསར་པ་སྐོང་དགོས་ན། ངེས་པར་དུ་བསམ་པའི་ལོངས་སྤྱོད་ཕུན་སུམ་ཚོགས་པོ་མཁོ་འདོན་བྱེད་དགོས། རིག་གནས་ཀྱི་སྒྲིག་སྲོལ་སྒྱུར་བཅོས་ཟབ་སྤེལ་བྱེད་པ་དང་། རིག་གནས་དོ་དམ་སྒྲིག་སྲོལ་འཐུས་སྒོ་ཚང་དུ་བཏང་སྟེ། སྤྱི་ཚོགས་ཀྱི་ཕན་འབྲས་ཨང་དང་པོར་འཇོག་ཅིང་། སྤྱི་ཚོགས་ཀྱི་ཕན་འབྲས་དང་དཔལ་འབྱོར་གྱི་ཕན་འབྲས་གཅིག་གྱུར་གྱི་སྒྲིག་སྲོལ་དང་ལམ་སྲོལ་གང་མགྱོགས་འཛུགས་དགོས། སྤྱི་པའི་རིག་གནས་ཞབས་ཞུའི་མ་ལག་འཐུས་ཚང་དུ་གཏོང་བ་དང་། རིག་གནས་དམངས་ཕན་ལས་གཞི་ལག་བསྟར་ཟབ་མོར་བྱས་ནས། མང་ཚོགས་རང་བཞིན་གྱི་རིག་གནས་བྱེད་སྒོ་ཕུན་སུམ་ཚོགས་སུ་གཏོང་དགོས། རིག་དངོས་སྲུང་སྐྱོང་བེད་སྤྱོད་དང་རིག་གནས་ཤུལ་བཞག་སྲུང་སྐྱོང་དང་རྒྱུན་འཛིན་བྱེད་ཤུགས་ཆེ་རུ་གཏོང་དགོས། དེང་རབས་ཅན་གྱི་རིག་གནས་ཐོན་ལས་མ་ལག་དང་ཚོང་རའི་མ་ལག་ཆ་ཚང་དུ་གཏོང་བ་དང་། ཐོན་སྐྱེད་གཉེར་སྐྱོང་ལམ་སྲོལ་གསར་དུ་བཏོད་ཅིང་། རིག་གནས་དང་དཔལ་འབྱོར་སྲིད་ཇུས་འཐུས་སྒོ་ཚང་དུ་བཏང་སྟེ། རིག་གནས་ཀྱི་ལས་རྣམ་གསར་པ་སྐྱེད་སྲིང་བྱེད་དགོས། དམངས་ཡོངས་ལུས་ཁམས་བདེ་ཐང་ཡོང་བའི་བྱེད་སྒོ་རྒྱ་ཆེར་སྤེལ་བ་དང་། ལུས་རྩལ་སྟོབས་ཆེའི་རྒྱལ་ཁབ་འཛུགས་སྐྲུན་མགྱོགས་པོ་བྱེད་པར་སྐུལ་འདེད་བཏང་ནས། པེ་ཅིང་གི་དགུན་དུས་ཨོ་རྩལ་འགྲན་ཚོགས་དང་། དབང་པོ་སྐྱོན་ཅན་གྱི་དགུན་དུས་ཨོ་རྩལ་འགྲན་ཚོགས་གྲ་སྒྲིག་ལེགས་པོ་བྱེད་དགོས། ཀྲུང་གོ་དང་ཕྱི་རྒྱལ་གྱི་མི་ཆོས་སྤེལ་རེས་ལ་ཤུགས་སྣོན་བརྒྱབ་སྟེ། རང་ཉིད་གཙོ་བོར་བཟུང་ནས་མཉམ་སྡུད་མཉམ་གསོག་བྱེད་དགོས། རྒྱལ་སྤྱིའི་སྒྲོག་སྤེལ་ནུས་པ་ལེགས་སྐྱོང་ལ་སྐུལ་འདེད་གཏོང་བ་དང་། ཀྲུང་གོའི་བྱུང་རབས་ལེགས་པོ་བརྗོད་པ། ཀྲུང་གོ་མངོན་སུམ་དང་། རིམ་མང་། ཁྱོན་ཡོངས་མངོན་པར་བྱས་ནས་རྒྱལ་ཁབ་ཀྱི་རིག་གནས་མཉེན་པའི་སྟོབས་ཤུགས་ཆེ་རུ་གཏོང་དགོས།

བློ་མཐུན་རྣམ་པ། ཀྲུང་གོ་གུང་ཁྲན་ཏང་ནི་དབུ་བརྙེས་པའི་ཉིན་ནས་བཟུང་ཀྲུང་གོའི་སྔོན་ཐོན་རིག་གནས་ཀྱི་དགེ་མཚན་ལྡན་པའི་སྣེ་ཁྲིད་པ་དང་ལག་བསྟར་བ་ཡིན་ལ། ཀྲུང་ཧྭའི་སྲོལ་རྒྱུན་རིག་གནས་ཕུལ་དུ་བྱུང་བའི་བློ་དཀར་རྒྱུན་འཛིན་པ་དང་དར་སྤེལ་གཏོང་མཁན་ཡང་ཡིན། དེང་རབས་ཀྱི་ཀྲུང་གོ་གུང་ཁྲན་ཏང་མི་དང་ཀྲུང་གོའི་མི་དམངས་ཀྱིས་རིག་གནས་ཀྱི་འགན་འཁྲི་གསར་པ་ཕྲག་པར་འཁུར་འོས་ལ་འཁུར་ཡང་ཐུབ་ངེས་ཡིན་པ་དང་། ལག་ལེན་གྱི་གསར་གཏོད་ཁྲོད་དུ་རིག་གནས་གསར་གཏོད་བྱེད་པ་དང་། ལོ་རྒྱུས་ཡར་ཐོན་གྱི་ཁྲོད་རིག་གནས་ཡར་རྒྱས་ཡོང་བར་བྱེད་དགོས།

བརྒྱད། དམངས་འཚོ་འགན་སྲུང་དང་ལེགས་བཅོས་བྱེད་པའི་ཆུ་ཚད་མཐོ་རུ་གཏོང་བ་དང་། སྤྱི་ཚོགས་བཅོས་སྐྱོང་བྱེད་ཤུགས་ཆེ་རུ་གཏོང་བ་དང་གསར་དུ་གཏོད་དགོས།

མི་སུ་ལ་ཞབས་འདེགས་ཞུ་བའི་གནད་དོན་ནི་སྲིད་ཏང་ཞིག་དང་སྲིད་དབང་ཞིག་གི་ངོ་བོར་ཞིབ་བཤེར་བྱེད་པའི་རྡོ་ཀ་ཤུ་ཀ་ལྟ་བུ་ཡིན་པ་ཏང་ཡོངས་ཀྱིས་ངེས་པར་དུ་ཡིད་ལ་འཇགས་པར་བྱེད་དགོས། མི་དམངས་ཀྱི་སྣེ་ཁྲིད་ནས་བདེ་སྐྱིད་ལྡན་པའི་འཚོ་བ་གསར་སྐྲུན་བྱེད་པ་ནི། ང་ཚོའི་ཏང་གི་ཐོག་མཐའ་བར་གསུམ་དུ་འགྱུར་དུ་མེད་པའི་འབད་འཐབ་ཀྱི་དམིགས་ཡུལ་ཡིན། ངེས་པར་དུ་མི་དམངས་ཀྱི་ཁེ་ཕན་ཐོག་མཐའ་བར་གསུམ་དུ་བླ་ན་མེད་པའི་གནས་སུ་འཇོག་པ་དང་། སྒྱུར་བཅོས་དང་འཕེལ་རྒྱས་ཀྱི་གྲུབ་འབྲས་སྔར་ལས་མང་པོ་སྔར་ལས་དྲང་སྙོམས་ཀྱི་སྒོ་ནས་མི་དམངས་ཡོངས་ལ་ཕན་ཐོགས་སུ་བཅུག་སྟེ། མི་དམངས་ཡོངས་ཐུན་མོང་ཐོག་ཕྱུག་པོར་འགྱུར་བའི་ཕྱོགས་སུ་རྒྱུན་མ་ཆད་པར་མདུན་དུ་སྐྱོད་དགོས།

དམངས་འཚོ་འགན་སྲུང་དང་ལེགས་བཅོས་བྱེད་ན། མི་དམངས་ཀྱིས་སེམས་ཁུར་ཆེ་ཤོས་བྱེད་པ་དང་། ཆེས་ཐད་ཀ་དང་། ཆེས་དོན་དངོས་ཀྱི་ཁེ་ཕན་གནད་དོན་དམ་པོར་འཛིན་དགོས་པ་དང་། གང་ཐུབ་ཅི་ཐུབ་བྱེད་དགོས་ལ་འཁོས་དཔག་ལའང་བསྟུན་དགོས་ཤིང་། དོན་དག་རེ་རེ་བཞིན་བསྒྲུབ་དགོས་པ་དང་། ལོ་རེ་ནས་ལོ་རེ་བཞིན་བསྒྲུབ་དགོས། མི་རེ་ངོ་རེས་འགན་འཁྲི་སྒྲུབ་ཅིང་། མི་རེ་ངོ་རེས་ལོངས་སུ་སྤྱོད་པ་མཐའ་འཁྱོངས་བྱེད་ཅིང་། མཐའ་ཚད་བརྟན་སྲུང་དང་། གཙོ་གནད་འབུར་ཐོན། ལམ་ལུགས་འཐུས་ཚང་། སྔོན་དཔག་ཁྲིད་སྟོན་བཅས་བྱས་ནས། སྤྱི་པའི་ཞབས་ཞུའི་མ་ལག་འཐུས་སྒོ་ཚང་དུ་གཏོང་ཞིང་མང་ཚོགས་ཀྱི་གཞི་རྩའི་འཚོ་བ་འགན་སྲུང་བྱེད་པ་དང་།

 ཉིན་བཞིན་ཆེ་རུ་འགྲོ་བའི་མི་དམངས་ཀྱི་བདེ་སྐྱིད་འཚོ་བའི་དགོས་མཁོ་བསྐོང་དགོས། སྤྱི་ཚོགས་ཀྱི་དྲང་སྙོམས་དྲང་བདེན་ལ་མུ་མཐུད་སྐུལ་སྤེལ་བཏང་སྟེ། ཕན་ནུས་ལྡན་པའི་སྤྱི་ཚོགས་བཅོས་སྐྱོང་དང་། སྤྱི་ཚོགས་ཀྱི་སྒྲིག་ལམ་བཟང་པོ་ཆགས་པར་བྱས་ནས། མི་དམངས་ལ་ཐོབ་སྣང་སྐྱིད་སྣང་བདེ་སྣང་གསུམ་སྔར་ལས་ཆེ་རུ་འགྲོ་བ་དང་། སྔར་ལས་འགན་སྲུང་། སྔར་ལས་རྒྱུན་མཐུད་བཅས་ཡོང་བར་བྱེད་དགོས།

(གཅིག) སློབ་གསོའི་བྱ་གཞག་དམིགས་སུ་བཀར་ནས་སྔོན་ལ་འཕེལ་རྒྱས་གཏོང་དགོས། སློབ་གསོ་སྟོབས་ཆེའི་རྒྱལ་ཁབ་འཛུགས་སྐྱོང་བྱེད་པ་ནི་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་རྨང་གཞིའི་ལས་གཞི་ཡིན་པས། སློབ་གསོའི་བྱ་གཞག་ངེས་པར་དུ་དམིགས་སུ་བཀར་ནས་སྔོན་ལ་འཕེལ་རྒྱས་གཏོང་བའི་གནས་སུ་བཞག་སྟེ། སློབ་གསོའི་སྒྱུར་བཅོས་གཏིང་ཟབ་ཏུ་གཏོང་བ་དང་། སློབ་གསོ་དེང་རབས་ཅན་དུ་འགྱུར་ཚད་མགྱོགས་སུ་གཏོང་བ། མི་དམངས་ཡིད་ཚིམ་པའི་སློབ་གསོ་ལེགས་པོ་གཉེར་དགོས། ཏང་གི་སློབ་གསོའི་ཐབས་ཇུས་ཕྱོགས་ཡོངས་ནས་ལག་བསྟར་བྱེད་པ་དང་། ཀུན་སྤྱོད་ལྡན་པའི་མི་སྣ་གསོ་སྐྱོང་བྱེད་པའི་རྩ་བའི་ལས་འགན་དོན་འཁྱོལ་བྱེད་པ། བྱང་ཚད་སློབ་གསོ་འཕེལ་རྒྱས་གཏོང་བ། སློབ་གསོ་འདྲ་སྙོམས་ཡོང་བར་བྱས་ཏེ། སྤྱོད་ཤེས་ལུས་མཛེས་བཞི་ཕྱོགས་ཡོངས་ནས་འཕེལ་རྒྱས་ཡོང་བའི་སྤྱི་ཚོགས་རིང་ལུགས་འཛུགས་སྐྲུན་མཁན་དང་ཤུལ་འཛིན་པ་གསོ་སྐྱོང་བྱེད་དགོས། གྲོང་ཁྱེར་དང་གྲོང་གསེབ་ཀྱི་འོས་འགན་སློབ་གསོ་གཞི་གཅིག་ཅན་འཕེལ་རྒྱས་ཡོང་བར་བྱས་ཏེ། གྲོང་གསེབ་ཀྱི་འོས་འགན་སློབ་གསོར་མཐོང་ཧ་ཅང་ཆེན་པོ་བྱེད་ཅིང་། སློབ་ན་མ་སོན་གོང་གི་སློབ་གསོ་དང་། དམིགས་བསལ་སློབ་གསོ། དྲ་སྦྲེལ་སློབ་གསོ་བཅས་ལེགས་པོ་གཉེར་བ་དང་། མཐོ་འབྲིང་དུས་རིམ་གྱི་སློབ་གསོ་ཁྱབ་གདལ་བཏང་ཐོག བྱིས་པ་མི་རེ་ངོ་རེར་སྤུས་ཚད་ལེགས་པའི་སློབ་གསོ་འདྲ་མཉམ་ལོངས་སྤྱོད་གང་ཐུབ་བྱེད་དུ་འཇུག་དགོས། ལས་རིགས་སློབ་གསོ་དང་གསོ་སྦྱོང་མ་ལག་འཐུས་སྒོ་ཚང་དུ་གཏོང་དགོས་པ་དང་། ཐོན་སྐྱེད་དང་སློབ་གསོ་མཉམ་འདྲེས་དང་སློབ་གྲྭ་དང་ཁེ་ལས་མཉམ་ལས་ཟབ་ཏུ་སྤེལ་དགོས། སློབ་ཆེན་རྩེར་སོན་དང་རིག་ཚན་རྩེར་སོན་གང་མགྱོགས་འཛུགས་སྐྱོང་བྱས་ནས། མཐོ་རིམ་སློབ་གསོ་དོན་སྙིང་ལྡན་པར་འཕེལ་རྒྱས་ཡོང་བར་བྱེད་དགོས། སློབ་མའི་རོགས་དངུལ་ལམ་ལུགས་ཆ་ཚང་དུ་བཏང་སྟེ། གྲོང་ཁྱེར་དང་གྲོང་གསེབ་ཀྱི་གསར་ཐོན་ངལ་རྩོལ་ནུས་ཤུགས་མང་ཆེ་བས་མཐོ་འབྲིང་དུས་རིམ་གྱི་སློབ་གསོ་དང་ལེན་བྱེད་པ་དང་མཐོ་རིམ་སློབ་གསོ་སྔར་ལས་མང་པོ་མྱོང་དུ་འཇུག་དགོས། སྤྱི་ཚོགས་སྟོབས་ཤུགས་ཀྱིས་སློབ་གསོ་གཉེར་བར་རྒྱབ་སྐྱོར་དང་ཚད་ལྡན་བཟོ་དགོས། དགེ་རྒན་གྱི་ཀུན་སྤྱོད་དང་དར་སྲོལ་འཛུགས་སྐྱོང་བྱེད་ཤུགས་ཆེ་རུ་བཏང་ནས། བྱང་ཚད་མཐོ་བའི་དགེ་རྒན་དཔུང་ཁག་གསོ་སྐྱོང་བྱེད་པ་དང་། སྤྱི་ཚོགས་ཡོངས་ཀྱིས་དགེ་རྒན་ལ་གུས་བཀུར་དང་སློབ་གསོར་མཐོང་ཆེན་བྱེད་པ་དར་སྤེལ་གཏོང་དགོས། རྒྱུན་མཐུད་སློབ་གསོ་ལེགས་པོ་གཉེར་བ་དང་། སློབ་སྦྱོང་ཅན་གྱི་སྤྱི་ཚོགས་མགྱོགས་པོ་འཛུགས་སྐྱོང་བྱས་ནས་རྒྱལ་དམངས་ཀྱི་བྱང་ཚད་མཐོ་རུ་ཤུགས་ཆེན་གཏོང་དགོས།

(གཉིས) ལས་ཞུགས་ཀྱི་སྤུས་ཚད་དང་མི་དམངས་ཀྱི་ཡོང་འབབ་ཆུ་ཚད་མཐོ་རུ་གཏོང་དགོས། ལས་ཞུགས་ནི་དམངས་འཚོ་ཆེ་ཤོས་ཡིན། ལས་ཞུགས་སྔོན་ལ་བྱེད་པའི་འཐབ་ཇུས་དང་ལས་ཞུགས་ཀྱི་སྲིད་ཇུས་དགེ་མཚན་ལྡན་པ་མཐའ་འཁྱོངས་བྱས་ནས། སྤུས་ཚད་སྔར་ལས་མཐོ་ཞིང་ལས་ཞུགས་སྔར་ལས་མང་པོ་ཡོང་བར་བྱེད་དགོས། ལས་རིགས་ཀྱི་རྩལ་ནུས་གསོ་སྦྱོང་གཞི་རྒྱ་ཆེན་པོ་བྱས་ཏེ། གྲུབ་ཚུལ་རང་བཞིན་གྱི་ལས་ཞུགས་འགལ་བ་ཐག་གཅོད་བྱེད་པར་དོ་སྣང་བྱེད་པ་དང་། ལས་གཏོད་ཀྱིས་ལས་ཞུགས་ལ་སྐུལ་ཁྲིད་བྱ་རྒྱུར་བསྔགས་སྐུལ་བྱེད་དགོས། ཕྱོགས་ཡོངས་ནས་སྤྱི་པའི་ལས་ཞུགས་ཞབས་ཞུ་མཁོ་འདོན་བྱས་ནས། མཐོ་རིམ་སློབ་ཐོན་སློབ་མ་སོགས་ན་གཞོན་ཁྱུ་ཚོགས་དང་ཞིང་པ་ལས་མིར་ཐབས་ལམ་མང་པོའི་ཐོག་ནས་ལས་ཞུགས་དང་ལས་སྒོ་གཏོད་པར་སྐུལ་འདེད་གཏོང་དགོས། ངལ་རྩོལ་ནུས་ཤུགས་དང་ཤེས་ལྡན་མི་སྣ་སྤྱི་ཚོགས་ཀྱི་ངང་ཚུལ་ལྡན་པར་འཁོར་སྐྱོད་བྱེད་པར་འགོག་རྐྱེན་བཟོ་བའི་སྒྲིག་སྲོལ་དང་ལམ་སྲོལ་གྱི་སྐྱོན་ཆ་བསལ་ཏེ། མི་ཚང་མར་དཀའ་སྤྱད་ངལ་རྩོལ་བྱས་པར་བརྟེན་ནས་རང་ངོས་འཕེལ་རྒྱས་གཏོང་བའི་གོ་སྐབས་ལྡན་པར་བྱེད་དགོས། སྲིད་གཞུང་དང་། བཟོ་ཚོགས། ཁེ་ལས་བཅས་ཐུན་མོང་དུ་ཞུགས་པའི་གྲོས་མོལ་དང་མཐུན་སྦྱོར་བྱེད་པའི་སྒྲིག་སྲོལ་འཐུས་སྒོ་ཚང་དུ་བཏང་སྟེ། འཆམ་མཐུན་གྱི་ངལ་རྩོལ་འབྲེལ་བ་འཛུགས་དགོས། རྩོལ་བསྟུན་ཐོབ་སྤྲོད་ཀྱི་རྩ་དོན་མཐའ་འཁྱོངས་བྱེད་པ་དང་གནད་ཆེའི་རྒྱུ་རྐྱེན་ལ་བསྟུན་ནས་བགོ་བཤའ་རྒྱག་པའི་སྒྲིག་སྲོལ་དང་ལམ་སྲོལ་འཐུས་སྒོ་ཚང་དུ་བཏང་ཐོག ཡོང་འབབ་བགོ་བཤའ་རྒྱག་ཚུལ་སྔར་ལས་ལུགས་མཐུན་དང་སྔར་ལས་གོ་རིམ་ལྡན་པར་བྱེད་དགོས། ལས་བརྩོན་ཁྲིམས་སྲུང་ཐོག་ནས་ཕྱུག་པོར་འགྱུར་རྒྱུར་བསྔགས་སྐུལ་བྱེད་པ་དང་། ཡོང་འབབ་འབྲིང་བའི་མི་ཚོགས་རྒྱ་སྐྱེད་པ། ཡོང་འབབ་དམའ་བའི་མིའི་ཡོང་འབབ་ཇེ་མང་དུ་གཏོང་བ། ཡོང་འབབ་མཐོ་དྲགས་པ་སྙོམས་སྒྲིག ཁྲིམས་འགལ་གྱི་ཡོང་འབབ་གཏན་འགོག་བཅས་བྱེད་དགོས། དཔལ་འབྱོར་འཕར་སྣོན་ཡོང་བ་དང་མཉམ་དུ་གྲོང་མིའི་ཡོང་འབབ་དུས་གཅིག་ཏུ་འཕར་བ་དང་། ངལ་རྩོལ་ཐོན་སྐྱེད་ལས་ཕྱོད་ཆེ་རུ་གཏོང་བ་དང་མཉམ་དུ་ངལ་རྩོལ་གྱི་ཐོབ་ཆའང་དུས་གཅིག་ཏུ་མང་དུ་གཏོང་རྒྱུ་མཐའ་འཁྱོངས་བྱེད་དགོས། གྲོང་མིའི་ངལ་རྩོལ་ཡོང་འབབ་དང་རྒྱུ་ནོར་རང་བཞིན་གྱི་ཡོང་འབབ་ཀྱི་ཐབས་ལམ་རྒྱ་སྐྱེད་གཏོང་དགོས། སྲིད་གཞུང་གིས་བགོ་བཤའ་བསྐྱར་མ་བརྒྱབ་ནས་སྙོམས་སྒྲིག་བྱེད་པའི་འགན་ནུས་ལག་བསྟར་ཡག་པོ་བྱས་ནས། གཞི་རྩའི་སྤྱི་པའི་ཞབས་ཞུ་དྲང་སྙོམས་ཅན་དུ་སྐུལ་སྤེལ་གང་མགྱོགས་གཏོང་བ་དང་ཡོང་འབབ་བགོ་བཤའི་ཧེ་བག་ཆུང་དུ་གཏོང་དགོས།

(གསུམ) སྤྱི་ཚོགས་འགན་སྲུང་གི་མ་ལག་འཛུགས་སྐྱོང་བྱེད་ཤུགས་ཆེ་རུ་གཏོང་དགོས། མཐའ་ཚད་སྐྱོང་བ་དང་། དྲ་སྦྲེལ་ཚགས་དམ་བཟོ་བ། ལམ་སྲོལ་འཛུགས་པ་བཅས་ཀྱི་བླང་བྱ་ལྟར། དམངས་ཡོངས་ལ་ཁྱབ་ཅིང་། གྲོང་ཁྱེར་དང་གྲོང་གསེབ་གཅིག་གྱུར་འཆར་འགོད། དབང་ཆ་དང་འགན་འཁྲི་གསལ་བ། འགན་སྲུང་འཚམ་པོ། རྒྱུན་མཐུད་ཐུབ་པ་བཅས་ཀྱི་བང་རིམ་མང་བའི་སྤྱི་ཚོགས་ཀྱི་འགན་སྲུང་མ་ལག་ཕྱོགས་ཡོངས་ནས་འཛུགས་ཐུབ་པར་བྱེད་དགོས། དམངས་ཡོངས་འགན་བཅོལ་ནང་ཞུགས་པ་ཕྱོགས་ཡོངས་ནས་ལག་བསྟར་བྱེད་དགོས། གྲོང་ཁྱེར་དང་གྲོང་རྡལ་གྱི་ལས་བཟོའི་མ་མཐའི་རྒན་གསོའི་འགན་བཅོལ་དང་གྲོང་ཁྱེར་དང་གྲོང་གསེབ་ཀྱི་གྲོང་མིའི་མ་མཐའི་རྒན་གསོའི་འགན་བཅོལ་ལམ་ལུགས་འཐུས་སྒོ་ཚང་དུ་བཏང་ནས། རྒན་གསོའི་འགན་བཅོལ་རྒྱལ་ཡོངས་སུ་གཅིག་གྱུར་གང་མྱུར་བྱེད་དགོས། གྲོང་ཁྱེར་དང་གྲོང་གསེབ་ཀྱི་གྲོང་མིའི་གཅིག་གྱུར་གྱི་མ་མཐའི་སྨན་བཅོས་འགན་བཅོལ་ལམ་ལུགས་དང་ནད་གཞི་ཆེ་རིགས་འགན་བཅོལ་ལམ་ལུགས་འཐུས་ཚང་དུ་གཏོང་བ་དང་། ལས་ཤོར་དང་། ལས་རྨས་འགན་བཅོལ་ལམ་ལུགས་འཐུས་སྒོ་ཚང་དུ་གཏོང་དགོས། རྒྱལ་ཡོངས་གཅིག་གྱུར་གྱི་སྤྱི་ཚོགས་འགན་བཅོལ་གྱི་སྤྱི་པའི་ཞབས་ཞུའི་སྟེགས་བུ་འཛུགས་དགོས། གྲོང་ཁྱེར་དང་གྲོང་གསེབ་ཀྱི་སྤྱི་ཚོགས་རོགས་སྐྱོབ་མ་ལག་གཅིག་གྱུར་འཆར་འགོད་བྱེད་པ་དང་། འཚོ་བའི་འགན་སྲུང་དམའ་ཤོས་ཀྱི་ལམ་ལུགས་འཐུས་སྒོ་ཚང་དུ་གཏོང་དགོས། ཕོ་མོ་འདྲ་མཉམ་གྱི་གཞི་རྩའི་རྒྱལ་ཇུས་མཐའ་འཁྱོངས་བྱས་ནས་བུད་མེད་དང་། བྱིས་པའི་ཁྲིམས་མཐུན་ཁེ་དབང་འགན་སྲུང་བྱེད་དགོས། སྤྱི་ཚོགས་ཀྱི་རོགས་སྐྱོབ་དང་། སྤྱི་ཚོགས་ཀྱི་ཕན་བདེ། གཞན་ཕན་གྱི་བྱ་གཞག སྔོན་ལ་བདེ་འགོད་སོགས་པའི་ལམ་ལུགས་འཐུས་སྒོ་ཚང་དུ་གཏོང་ཞིང་། གྲོང་གསེབ་ཀྱི་གཞིས་ལུས་བྱིས་པ་དང་། བུད་མེད། རྒན་རྒོན་བཅས་བྱམས་སྐྱོང་གི་ཞབས་ཞུའི་མ་ལག་ཆ་ཚང་དུ་གཏོང་དགོས། དབང་པོ་སྐྱོན་ཅན་གྱི་བྱ་གཞག་འཕེལ་རྒྱས་བཏང་སྟེ། དབང་པོ་སྐྱོན་ཅན་གྱི་ཁམས་གསོའི་ཞབས་ཞུ་ཇེ་ཆེར་གཏོང་དགོས། ཁང་པ་ནི་སྡོད་ས་ཡིན་པ་ལས་སྦིར་འཚོང་བྱེད་པ་མིན་པའི་ངེས་གནས་མཐའ་འཁྱོངས་བྱེད་ཅིང་། བྱེད་པོ་མང་པོས་མཁོ་སྤྲོད་དང་། ཐབས་ལམ་མང་པོས་འགན་སྲུང་། བོགས་ཉོ་མཉམ་འཛིན་བཅས་ཀྱི་སྡོད་ཁང་ལམ་ལུགས་གང་མྱུར་བཙུགས་ཏེ། དམངས་ཡོངས་ལ་སྡོད་སའི་ཁང་པ་ཡོད་པར་བྱེད་དགོས།

(བཞི) དབུལ་སྒྲོལ་འགག་སྒྲོལ་གྱི་འཐབ་རྩོད་ལ་རྒྱལ་ཁ་མཐའ་གཅིག་ཏུ་ལེན་དགོས། དབུལ་ཕོངས་མི་འབོར་དང་དབུལ་ཕོངས་ས་ཁུལ་རྒྱལ་ཡོངས་དང་མཉམ་དུ་ཁྱོན་ཡོངས་ནས་འབྱོར་འབྲིང་སྤྱི་ཚོགས་སུ་བསྐྱོད་དུ་འཇུག་རྒྱུ་ནི་ང་ཚོའི་ཏང་གི་གཟི་བརྗིད་ལྡན་པའི་དམ་བཅའ་ཡིན་པས། ཏང་ཡོངས་དང་རྒྱལ་ཡོངས་སྤྱི་ཚོགས་ཡོངས་བཅས་ཀྱི་སྟོབས་ཤུགས་སྐུལ་སློང་བྱས་ཏེ། དབུལ་སྐྱོར་གནད་འཁེལ་དང་དབུལ་སྒྲོལ་གནད་འཁེལ་མཐའ་འཁྱོངས་བྱེད་པ་དང་། ཀྲུང་དབྱང་གིས་གཅིག་གྱུར་འཆར་འགོད་དང་ཞིང་ཆེན་གྱིས་གཙོ་འགན་འཁུར་བ། གྲོང་ཁྱེར་དང་རྫོང་གིས་དོན་འཁྱོལ་ལ་དམ་འཛིན་བཅས་བྱེད་པའི་ལས་ཀའི་ལམ་སྲོལ་མཐའ་འཁྱོངས་བྱེད་པ། ཏང་སྲིད་འགོ་ཁྲིད་གཙོ་བོས་སྤྱི་འགན་འཁུར་བའི་འགན་འཁྲིའི་ལམ་ལུགས་ཇེ་ཆེར་གཏོང་བ། དབུལ་སྐྱོར་ཆེན་མོའི་གནས་སྟངས་མཐའ་འཁྱོངས་བྱེད་པ། དབུལ་སྐྱོར་དེ་བློ་སྐྱོར་རིག་སྐྱོར་དང་ཟུང་འབྲེལ་བྱ་རྒྱུ་གལ་ཆེར་འཛིན་པ། ཤར་རྒྱུད་དང་ནུབ་རྒྱུད་དབུལ་སྐྱོར་མཉམ་ལས་ཟབ་ཏུ་སྤེལ་བ། ཧ་ཅང་དབུལ་ཞིང་ཕོངས་པའི་ས་ཁུལ་དུ་དབུལ་སྒྲོལ་གྱི་ལས་འགན་གཙོ་གནད་དུ་འགག་སྒྲོལ་བཅས་བྱས་ཏེ། 2020ལོར་སླེབས་དུས་རང་རྒྱལ་གྱི་ད་ལྟའི་ཚད་གཞིའི་ཐོག་གྲོང་གསེབ་ཀྱི་དབུལ་ཕོངས་མི་འབོར་དབུལ་སྒྲོལ་ཡོང་བའི་འགན་ལེན་བྱས་ཏེ། དབུལ་ཕོངས་རྫོང་ཡོངས་རྫོགས་ཀྱི་དབུལ་ཕོངས་ཞྭ་མོ་འབུད་པ་དང་། ས་ཁོངས་རང་བཞིན་གྱི་དབུལ་ཕོངས་ཡོངས་རྫོགས་གཙང་སེལ་བྱས་ཏེ། དབུལ་སྒྲོལ་ངོ་མ་དང་། དངོས་འབྲེལ་དབུལ་སྒྲོལ་ཐུབ་པར་བྱེད་དགོས།

(ལྔ) བདེ་ཐང་ཀྲུང་གོའི་འཐབ་ཇུས་ལག་ལེན་བསྟར་དགོས། མི་དམངས་བདེ་ཐང་ཡོང་བ་ནི་མི་རིགས་དར་རྒྱས་དང་རྒྱལ་ཁབ་སྟོབས་འབྱོར་ལྡན་པའི་མཚོན་རྟགས་གལ་ཆེན་ཡིན་པས། རྒྱལ་དམངས་བདེ་ཐང་གི་སྲིད་ཇུས་འཐུས་སྒོ་ཚང་དུ་བཏང་སྟེ། མི་དམངས་མང་ཚོགས་ལ་ཕྱོགས་གང་ཅི་དང་དུས་འཁོར་ཧྲིལ་པོར་བདེ་ཐང་གི་ཞབས་ཞུ་བསྒྲུབ་དགོས། སྨན་དང་སྨན་བཅོས་འཕྲོད་བསྟེན་སྒྲིག་སྲོལ་སྒྱུར་བཅོས་ཟབ་ཏུ་སྤེལ་བ་དང་། ཀྲུང་གོའི་ཁྱད་ཆོས་ཀྱི་མ་མཐའི་སྨན་བཅོས་འཕྲོད་བསྟེན་ལམ་ལུགས་དང་། སྨན་བཅོས་འགན་སྲུང་ལམ་ལུགས། སྤུས་ལེགས་དང་ཕན་གོ་ཆོད་པའི་སྨན་བཅོས་འཕྲོད་བསྟེན་ཞབས་ཞུའི་མ་ལག་བཅས་ཕྱོགས་ཡོངས་ནས་འཛུགས་པ་དང་། དེང་རབས་ཀྱི་སྨན་ཁང་དོ་དམ་ལམ་ལུགས་ཆ་ཚང་དུ་གཏོང་དགོས། གཞི་རིམ་གྱི་སྨན་བཅོས་འཕྲོད་བསྟེན་ཞབས་ཞུའི་མ་ལག་དང་མཁོ་ཆོད་སྨན་པའི་དཔུང་ཁག་འཛུགས་པར་ཤུགས་སྣོན་རྒྱག་དགོས། སྨན་ལ་བརྟེན་ནས་སྨན་ཁང་སྐྱོང་ཚུལ་ཁྱོན་ཡོངས་ནས་མེད་པར་བཟོ་བ་དང་། སྨན་རྫས་མཁོ་སྤྲོད་ཀྱི་འགན་ལེན་ལམ་ལུགས་ཆ་ཚང་བཟོ་དགོས། སྔོན་འགོག་གཙོ་བོར་འཛིན་རྒྱུ་མཐའ་འཁྱོངས་བྱས་ཏེ། རྒྱལ་གཅེས་འཕྲོད་བསྟེན་ལས་འགུལ་གཏིང་ཟབ་སྤེལ་བ་དང་། བདེ་ཐང་དང་ཡ་རབས་ཚུལ་ལྡན་གྱི་འཚོ་བ་སྐྱེལ་སྟངས་དར་སྤེལ་གཏོང་བ། ནད་གཞི་ཚབས་ཆེན་སྔོན་འགོག་དང་ཚོད་འཛིན་བཅས་བྱེད་དགོས། ཟས་རིགས་བདེ་འཇགས་འཐབ་ཇུས་ལག་བསྟར་བྱས་ཏེ། མི་དམངས་ཉེན་མེད་བློ་བདེའི་ངང་ནས་ཟས་རིགས་སྤྱོད་དུ་འཇུག་དགོས། ཀྲུང་ལུགས་དང་ཕྱི་ལུགས་གསོ་དཔྱད་གལ་ཆེ་མཉམ་འཛིན་མཐའ་འཁྱོངས་དང་། ཀྲུང་ལུགས་གསོ་རིག་གི་སྨན་བཅོས་དང་སྨན་རྫས་ལས་དོན་རྒྱུན་འཛིན་དང་འཕེལ་རྒྱས་གཏོང་དགོས། སྤྱི་ཚོགས་ཀྱིས་སྨན་ཁང་འཛུགས་པར་རྒྱབ་སྐྱོར་བྱས་ནས། བདེ་ཐང་གི་ཐོན་ལས་འཕེལ་རྒྱས་གཏོང་དགོས། བུ་བཙའི་སྲིད་ཇུས་དང་དེ་འབྲེལ་གྱི་དཔལ་འབྱོར་དང་སྤྱི་ཚོགས་ཀྱི་སྲིད་ཇུས་ཆ་འགྲིག་སྦྲེལ་མཐུད་ཡོང་བར་བྱས་ཏེ། མི་འབོར་འཕེལ་རྒྱས་གཏོང་བའི་འཐབ་ཇུས་ལ་ཞིབ་འཇུག་བྱེད་ཤུགས་ཆེ་རུ་གཏོང་དགོས། མི་འབོར་རྒན་རྒོན་ཅན་དུ་འགྱུར་བར་ཁ་གཏད་གང་ལེགས་འཇལ་བ་དང་། རྒན་གསོ་དང་། རྒན་བརྩི། རྒན་བཀུར་བཅས་ཀྱི་སྲིད་ཇུས་མ་ལག་དང་སྤྱི་ཚོགས་ཀྱི་ཁོར་ཡུག་སྐྲུན་པ། སྨན་བཅོས་དང་རྒན་གསོ་ཟུང་འབྲེལ་ཡོང་བ། རྒན་རྒོན་གྱི་ལས་དོན་དང་ཐོན་ལས་འཕེལ་རྒྱས་མགྱོགས་སུ་གཏོང་བ་བཅས་བྱེད་དགོས།

(དྲུག) མཉམ་སྐྲུན་མཉམ་བཅོས་མཉམ་རོལ་བཅས་ཀྱི་སྤྱི་ཚོགས་བཅོས་སྐྱོང་གི་གནས་སྟངས་བསྐྲུན་དགོས། སྤྱི་ཚོགས་བཅོས་སྐྱོང་ལམ་ལུགས་འཛུགས་ཤུགས་ཆེ་རུ་གཏོང་བ་དང་། ཏང་ཨུད་ཀྱིས་འགོ་འཁྲིད་པ་དང་། སྲིད་གཞུང་གིས་འགན་འཁུར་བ། སྤྱི་ཚོགས་ཀྱིས་མཉམ་སྒྲུབ། མང་ཚོགས་ཐེ་ཞུགས། ཁྲིམས་སྐྱོང་གིས་འགན་སྲུང་བཅས་བྱེད་པའི་སྤྱི་ཚོགས་བཅོས་སྐྱོང་གི་སྒྲིག་སྲོལ་འཐུས་སྒོ་ཚང་དུ་བཏང་ནས། སྤྱི་ཚོགས་བཅོས་སྐྱོང་སྤྱི་ཚོགས་ཅན་དང་། ཁྲིམས་སྐྱོང་ཅན། རིག་ནུས་ཅན། ཆེད་ལས་ཅན་བཅས་སུ་འགྱུར་བའི་ཆུ་ཚད་མཐོ་རུ་གཏོང་དགོས། སྤྱི་ཚོགས་ཀྱི་འགལ་བ་སྔོན་འགོག་དང་སེལ་བའི་ལམ་སྲོལ་འཛུགས་པར་ཤུགས་སྣོན་རྒྱག་པ་དང་། མི་དམངས་ནང་ཁུལ་གྱི་འགལ་བ་ཐག་གཅོད་ཡང་དག་པར་བྱེད་དགོས། བདེ་འཇགས་ངང་འཕེལ་རྒྱས་གཏོང་བའི་འདུ་ཤེས་འཆང་བ། ཚེ་སྲོག་བླ་ན་མེད་པ་དང་། བདེ་འཇགས་ཨང་དང་པོའི་བསམ་བློ་དར་སྤེལ་གཏོང་བ། སྤྱི་པའི་བདེ་འཇགས་མ་ལག་ཆ་ཚང་དུ་གཏོང་བ། བདེ་འཇགས་ངང་ཐོན་སྐྱེད་བྱེད་པའི་འགན་འཁྲིའི་ལམ་ལུགས་འཐུས་སྒོ་ཚང་དུ་གཏོང་བ། བདེ་འཇགས་ཀྱི་དོན་རྐྱེན་ཆེན་པོ་དང་ཚབས་ཆེ་གྲས་བཀག་འགོག་མཐའ་གཅིག་ཏུ་བྱེད་པ། གནོད་འགོག་གེགས་སེལ་རྒུད་སྐྱོབ་ཀྱི་ནུས་པ་ཇེ་ཆེར་གཏོང་བ་བཅས་བྱེད་དགོས། སྤྱི་ཚོགས་བདེ་སྐྱོང་ཉེན་ཟོན་གྱི་སྔོན་འགོག་ཚོད་འཛིན་མ་ལག་གང་མགྱོགས་འཛུགས་པ་དང་། ཆགས་སྲེད་དང་རྒྱན་འཛུགས། དུག་རྫས། ནག་ཚོགས། བསླུ་བྲིད། མགོ་སྐོར་སོགས་ཁྲིམས་འགལ་ཉེས་གསོག་གི་བྱེད་སྤྱོད་ལ་ཁྲིམས་ལྟར་རྡུང་རྡེག་དང་ཉེས་ཆད་བཅད་དེ། མི་དམངས་ཀྱི་མི་ལུས་དབང་ཆ་དང་། རྒྱུ་ནོར་དབང་ཆ། མི་གཤིས་དབང་ཆ་བཅས་སྲུང་སྐྱོང་བྱེད་དགོས། སྤྱི་ཚོགས་ཀྱི་སེམས་ཁམས་ཞབས་ཞུའི་མ་ལག་འཛུགས་ཤུགས་ཆེ་རུ་གཏོང་བ་དང་། རང་བརྩི་རང་བཀུར་དང་། ཚུལ་མཐུན་ཞི་ལྷོད། ཧུར་བརྩོན་ཡར་སྐྱེད་བཅས་ཀྱི་སྤྱི་ཚོགས་ཀྱི་བསམ་པའི་འཁྱེར་སོ་སྐྱེད་སྲིང་བྱེད་དགོས། སྡེ་ཁུལ་བཅོས་སྐྱོང་མ་ལག་འཛུགས་སྐྱོང་བྱེད་ཤུགས་ཆེ་རུ་གཏོང་བ་དང་། སྤྱི་ཚོགས་བཅོས་སྐྱོང་གི་ལྟེ་བ་གཞི་རིམ་དུ་སྤོ་སྒྱུར་བྱེད་པ་དང་། སྤྱི་ཚོགས་རྩ་འཛུགས་ཀྱི་ནུས་པ་འདོན་སྤེལ་བྱས་ཏེ། སྲིད་གཞུང་གིས་བཅོས་སྐྱོང་དང་སྤྱི་ཚོགས་ཀྱིས་སྙོམས་སྒྲིག གྲོང་མིས་རང་སྐྱོང་བཅས་བྱེད་པའི་མཉམ་འགུལ་བཟང་པོར་འགྱུར་བར་བྱེད་དགོས།

(བདུན) རྒྱལ་ཁབ་ཀྱི་བདེ་འཇགས་སྲུང་སྐྱོང་ནུས་ལྡན་བྱེད་དགོས། རྒྱལ་ཁབ་ཀྱི་བདེ་འཇགས་ནི་རྒྱལ་ཁབ་བདེ་འགོད་ཀྱི་རྨང་རྡོ་གལ་ཆེན་ཡིན་པ་དང་། རྒྱལ་ཁབ་ཀྱི་བདེ་འཇགས་སྲུང་སྐྱོང་བྱ་རྒྱུ་ནི་རྒྱལ་ཡོངས་མི་རིགས་ཁག་གི་མི་དམངས་ཀྱི་བདེ་རྩར་ཐུག་ཡོད། རྒྱལ་ཁབ་བདེ་འཇགས་ཀྱི་འཐབ་ཇུས་དང་རྒྱལ་ཁབ་བདེ་འཇགས་ཀྱི་སྲིད་ཇུས་འཐུས་སྒོ་ཚང་དུ་བཏང་སྟེ། རྒྱལ་ཁབ་ཀྱི་ཆབ་སྲིད་བདེ་འཇགས་སྲུང་སྐྱོང་མཐའ་གཅིག་ཏུ་བྱེད་པ་དང་། བདེ་འཇགས་ཀྱི་ལས་དོན་ཁག་གཅིག་གྱུར་གྱིས་བསྒྲུབ་དགོས། རྒྱལ་ཁབ་ཀྱི་བདེ་འཇགས་མ་ལག་ཆ་ཚང་དུ་གཏོང་བ་དང་། རྒྱལ་ཁབ་ཀྱི་བདེ་འཇགས་ཁྲིམས་སྐྱོང་ཐོག་ནས་འགན་སྲུང་བྱེད་ཤུགས་ཆེ་རུ་གཏོང་བ། བདེ་འཇགས་ཐད་ཀྱི་ཉེན་ཁར་བག་ཟོན་དང་བཀག་འགོག་བྱེད་པའི་ནུས་པ་ཇེ་ཆེར་གཏོང་དགོས། སིམ་འཛུལ་དང་མགོ་རྟིང་སློག་པ། གཏོར་བརླག་གཏོང་བ་བཅས་ཀྱི་བྱ་སྤྱོད་དང་། དྲག་ཤུགས་འཇིགས་སྐུལ་གྱི་བྱ་སྤྱོད། མི་རིགས་ཁ་ཕྲལ་གྱི་བྱ་སྤྱོད། ཆོས་ལུགས་ཐལ་དྲགས་ཀྱི་བྱ་སྤྱོད་བཅས་ལ་བག་ཟོན་ནན་པོར་བྱེད་པ་དང་རྡུང་རྡེག་དྲག་པོར་གཏོང་དགོས། རྒྱལ་ཁབ་ཀྱི་བདེ་འཇགས་སློབ་གསོར་ཤུགས་སྣོན་རྒྱག་པ་དང་། ཏང་ཡོངས་དང་རྒྱལ་ཡོངས་མི་དམངས་ཀྱི་རྒྱལ་ཁབ་བདེ་འཇགས་ཡོང་བར་བྱེད་པའི་འདུ་ཤེས་ཟབ་ཏུ་བཏང་སྟེ། སྤྱི་ཚོགས་ཡོངས་སུ་རྒྱལ་ཁབ་ཀྱི་བདེ་འཇགས་སྲུང་སྐྱོང་བྱེད་པའི་མཉམ་ཤུགས་ཆེན་པོ་ཆགས་པར་བྱེད་དགོས།

བློ་མཐུན་རྣམ་པ། རྒྱ་ཆེའི་མི་དམངས་ཀྱི་རྩ་བའི་ཁེ་ཕན་ནི་ངེས་པར་དུ་ཏང་གི་ལས་དོན་ཡོད་ཚད་ཀྱི་ཚད་གཞི་མཐོ་ཤོས་སུ་འཇོག་དགོས། ང་ཚོས་མི་དམངས་མང་ཚོགས་ཀྱི་དོན་ཆུང་རྣམས་རང་ཉིད་ཀྱི་དོན་ཆེན་དུ་འཛིན་རྒྱུ་མཐའ་འཁྱོངས་བྱས་ནས། མི་དམངས་མང་ཚོགས་ཀྱིས་དོ་ཁུར་བྱེད་པའི་དོན་དག་ནས་བརྩམས་པ་དང་། མི་དམངས་མང་ཚོགས་འདོད་བློ་ཚིམ་པར་བྱེད་པའི་དོན་དག་ནས་འགོ་བརྩམས་ཏེ། མི་དམངས་ཀྱི་སྣེ་ཁྲིད་དེ་བདེ་སྐྱིད་ལྡན་པའི་འཚོ་བ་རྒྱུན་མ་ཆད་པར་སྐྲུན་དགོས།

དགུ། སྐྱེ་ཁམས་དཔལ་ཡོན་གྱི་སྒྲིག་སྲོལ་སྒྱུར་བཅོས་གང་མགྱོགས་བྱས་ཏེ། ཡིད་སྨོན་གྱི་ཀྲུང་གོ་སྐྲུན་དགོས།

མི་དང་རང་བྱུང་ནི་ཚེ་སྲོག་གི་ཕུང་པོ་གཅིག་འདུས་ཡིན་པས། མིའི་རིགས་ཀྱིས་ངེས་པར་དུ་རང་བྱུང་ལ་བརྩི་འཇོག་དང་། རང་བྱུང་ལ་བསྟུན་པ། རང་བྱུང་སྲུང་སྐྱོང་བཅས་བྱེད་དགོས། མིའི་རིགས་ཀྱིས་རང་བྱུང་གི་ཆོས་ཉིད་ལ་བརྩི་འཇོག་བྱས་ཚེ་ད་གཟོད་རང་བྱུང་གསར་སྤེལ་དང་བཀོལ་སྤྱོད་བྱེད་པའི་ཐད་ལམ་ལོག་ཏུ་སྐྱོད་ཚུལ་སྔོན་འགོག་ནུས་ལྡན་བྱེད་ཐུབ། མིའི་རིགས་ཀྱིས་རང་བྱུང་ཁམས་ཆེན་མོར་གནོད་འཚེ་བཏང་ཚེ་མཐའ་མཇུག་ཏུ་མིའི་རིགས་རང་ཉིད་ལ་གནོད་འཚེ་ཕོག་པ་ནི་ལྡོག་ཏུ་མེད་པའི་ཆོས་ཉིད་ཡིན།

ང་ཚོས་འཛུགས་སྐྲུན་བྱེད་པའི་དེང་རབས་ཅན་ནི་མི་དང་རང་བྱུང་འཆམ་མཐུན་མཉམ་གནས་ཀྱི་དེང་རབས་ཅན་ཡིན་པས། དངོས་པོའི་རྒྱུ་ནོར་དང་བསམ་པའི་རྒྱུ་ནོར་གང་མང་གསར་སྐྲུན་བྱས་ཏེ་མི་དམངས་ཀྱི་བདེ་སྐྱིད་འཚོ་བའི་དགོས་མཁོ་ཉིན་བཞིན་ཆེ་རུ་འགྲོ་ཚུལ་བསྐོང་དགོས་ལ། སྐྱེ་ཁམས་ཐོན་རྫས་སྤུས་ལེགས་སྔར་ལས་མང་པོ་མཁོ་སྤྲོད་བྱས་ཏེ་མི་དམངས་ཀྱི་སྐྱེ་ཁམས་ཁོར་ཡུག་ཡིད་དུ་འོང་བའི་དགོས་མཁོ་ཉིན་བཞིན་ཆེ་རུ་འགྲོ་ཚུལ་ཡང་བསྐོང་དགོས། གྲོན་ཆུང་དང་སྲུང་སྐྱོང་ལ་དམིགས་བསལ་གཟིགས་སྐྱོང་དང་། རང་བྱུང་སླར་གསོ་གཙོ་བོར་འཛིན་པའི་བྱེད་ཕྱོགས་ངེས་པར་དུ་མཐའ་འཁྱོངས་བྱས་ནས། ཐོན་ཁུངས་གྲོན་ཆུང་དང་ཁོར་ཡུག་སྲུང་སྐྱོང་བྱེད་པའི་བར་སྟོང་གི་གནས་སྟངས་དང་། ཐོན་ལས་ཀྱི་གྲུབ་ཚུལ། ཐོན་སྐྱེད་བྱེད་སྟངས། འཚོ་བ་སྐྱེལ་སྟངས་བཅས་ཆགས་པར་བྱས་ཏེ། རང་བྱུང་ཁམས་ལྷིང་འཇགས་འཆམ་མཐུན་དང་མཛེས་སྡུག་བསྐྱར་ལྷོགས་ཡོང་བར་བྱེད་དགོས།

(གཅིག) ལྗང་མདོག་འཕེལ་རྒྱས་ཡོང་བར་སྐུལ་འདེད་གཏོང་དགོས། ལྗང་མདོག་ཐོན་སྐྱེད་དང་འཛད་སྤྱོད་ཀྱི་བཅའ་ཁྲིམས་ལམ་ལུགས་དང་སྲིད་ཇུས་ཀྱི་ཁྲིད་ཕྱོཌ་མགྱོགས་པོར་འཛུགས་པ་དང་། ལྗང་མདོག་ཐཱན་ཉུང་དང་རྒྱུན་འཁོར་འཕེལ་རྒྱས་འགྲོ་བའི་དཔལ་འབྱོར་མ་ལག་འཛུཌ་པ་དང་ཆ་ཚང་དུ་གཏོང་དགོས། ཚོང་རས་ཁྲིད་སྟོན་བྱེད་པའི་ལྗང་མདོག་ལག་རྩལ་གསར་གཏོད་མ་ལག་འཛུགས་པ་དང་། ལྗང་མདོག་དངུལ་རྩ་འཕེལ་རྒྱས་གཏོང་བ། ནུས་ཁུངས་གྲོན་ཆུང་དང་ཁོར་ཡུག་སྲུང་སྐྱོང་གི་ཐོན་ལས་དང་། སྦགས་མེད་ཐོན་སྐྱེད་ཀྱི་ཐོན་ལས། སྦགས་མེད་ནུས་ཁུངས་ཀྱི་ཐོན་ལས་བཅས་དར་རྒྱས་གཏོང་དགོས། ནུས་ཁུངས་ཐོན་སྐྱེད་དང་འཛད་སྤྱོད་ཀྱི་གསར་བརྗེར་སྐུལ་འདེད་གཏོང་བ་དང་། སྦགས་མེད་ཐཱན་ཉུང་དང་། ཉེན་མེད་ཆོད་ཆེའི་ནུས་ཁུངས་མ་ལག་འཛུགས་དགོས། ཐོན་ཁུངས་ཕྱོགས་ཡོངས་ནས་གྲོན་ཆུང་དང་རྒྱུན་འཁོར་བེད་སྤྱོད་བྱེད་པར་སྐུལ་འདེད་གཏོང་བ་དང་། རྒྱལ་ཁབ་ཀྱི་ཆུ་གྲོན་ཆུང་གི་བྱ་སྤྱོད་སྤེལ་བ། ནུས་ཁུངས་ཟད་གྲོན་དང་དངོས་རྫས་ཟད་གྲོན་ཆུང་དུ་གཏོང་བ། ཐོན་སྐྱེད་མ་ལག་དང་འཚོ་བའི་མ་ལག་རྒྱུན་འཁོར་སྦྲེལ་མཐུད་ཐུབ་པ་བཅས་བྱེད་དགོས། བབ་ཆགས་ཚད་མཐུན་དང་། ལྗང་མདོག་ཐཱན་ཉུང་གི་འཚོ་བ་སྐྱེལ་སྟངས་དར་སྤེལ་གཏོང་བ་དང་། རྒྱས་སྤྲོས་ཆུད་ཟོས་དང་ཚུལ་མིན་འཛད་སྤྱོད་ལ་ངོ་རྒོལ་བྱེད་པ། གྲོན་ཆུང་ཅན་གྱི་ལས་ཁུངས་དང་། ལྗང་མདོག་ཁྱིམ་ཚང་། ལྗང་མདོག་སློབ་གྲྭ། ལྗང་མདོག་སྡེ་ཁུལ་བཅས་འཛུགས་པ་དང་། ལྗང་མདོག་ཕྱོགས་ཐོན་བཅས་ཀྱི་བྱ་སྤྱོད་སྤེལ་དགོས།

(གཉིས) ཁོར་ཡུག་གི་གནད་དོན་མངོན་གསལ་དོད་པོ་ཐག་གཅོད་གང་ཐུབ་བྱེད་དགོས། དམངས་ཡོངས་ཀྱིས་མཉམ་དུ་བཅོས་སྐྱོང་དང་། རྩ་བ་ནས་འགོག་བཅོས་མཐའ་འཁྱོངས་བྱེད་པ་དང་། རླུང་ཁམས་ཆེན་མོའི་སྦགས་བཙོག་འགོག་བཅོས་ཀྱི་བྱ་སྤྱོད་རྒྱུན་མཐུད་ངང་སྤེལ་ནས། མཁའ་རླུང་གཙང་མར་སྲུང་བའི་འཐབ་རྩོད་ལས་རྣམ་པར་རྒྱལ་བར་བྱེད་དགོས། ཆུའི་སྦགས་བཙོག་འགོག་བཅོས་ཇེ་མགྱོགས་སུ་གཏོང་བ་དང་། ཆུ་འབབ་རྒྱུད་ཀྱི་ཁོར་ཡུག་དང་མཚོ་འགྲམ་ཉེ་རྒྱུད་ཕྱོགས་བསྡུས་ཀྱིས་བཅོས་སྐྱོང་བྱེད་དགོས། ས་རྒྱུའི་སྦགས་བཙོག་ལྟ་སྡོམ་དང་ཉམས་གསོ་བྱེད་ཤུགས་ཇེ་ཆེར་གཏོང་བ་དང་། ཞིང་ལས་ཀྱི་ཁ་གཏིང་གཉིས་ཀྱི་སྦགས་བཙོག་འགོག་བཅོས་བྱེད་ཤུགས་ཆེ་རུ་གཏོང་བ། གྲོང་གསེབ་ཀྱི་གྲོང་མིའི་འཚོ་གནས་ཁོར་ཡུག་བཅོས་སྐྱོང་གི་བྱེད་སྒོ་སྤེལ་བ་བཅས་བྱེད་དགོས། སྲ་དངོས་སྙིགས་རོ་དང་གད་སྙིགས་གཙང་སེལ་བྱེད་ཤུགས་ཆེ་རུ་གཏོང་དགོས། སྦགས་བཙོག་འབུད་པའི་ཚད་གཞི་ཇེ་མཐོར་གཏོང་བ་དང་། འབུད་གཏོང་མཁན་གྱི་འགན་འཁྲི་ཇེ་ཆེར་གཏོང་བ། ཁོར་ཡུག་སྲུང་སྐྱོང་གི་ཡིད་རྟོན་དཔྱད་འཇོག་དང་། ཆ་འཕྲིན་བཙན་ཤེད་རང་བཞིན་གྱིས་ཡོངས་བསྒྲགས་བྱེད་པ། ཉེས་ཆད་ནན་པོ་དང་དངུལ་ཆད་ལྗིད་པོ་གཅོད་པ་སོགས་ཀྱི་ལམ་ལུགས་ཆ་ཚང་དུ་གཏོང་དགོས། སྲིད་གཞུང་གིས་གཙོ་ཁྲིད་བྱེད་པ་དང་། ཁེ་ལས་བྱེད་པོར་འཛིན་པ། སྤྱི་ཚོགས་ཀྱི་རྩ་འཛུགས་དང་མང་ཚོགས་ལྷན་དུ་ཞུགས་པ་བཅས་ཀྱི་ཁོར་ཡུག་བཅོས་སྐྱོང་མ་ལག་འཛུགས་དགོས། གོ་ལ་ཧྲིལ་པོའི་ཁོར་ཡུག་བཅོས་སྐྱོང་ཁྲོད་ཧུར་ཐག་ངང་ཞུགས་པ་དང་། བཙོག་སྐྱོན་ཉུང་དུ་གཏོང་བའི་ཁས་ལེན་དོན་འཁྱོལ་བྱེད་དགོས།

(གསུམ) སྐྱེ་ཁམས་མ་ལག་སྲུང་སྐྱོང་བྱེད་ཤུགས་ཆེ་རུ་གཏོང་དགོས། སྐྱེ་ཁམས་མ་ལག་འགངས་ཆེན་སྲུང་སྐྱོང་དང་ཉམས་གསོའི་ལས་གྲྭ་གལ་ཆེན་ལག་བསྟར་བྱས་ཏེ། སྐྱེ་ཁམས་བདེ་འཇགས་ཀྱི་སྲུང་ཡོལ་གྱི་མ་ལག་ལེགས་འགྱུར་དང་། སྐྱེ་ཁམས་བར་ཁྱམས་དང་སྐྱེ་དངོས་སྣ་མང་ཅན་དུ་སྲུང་སྐྱོང་བྱེད་པའི་དྲ་སྦྲེལ་འཛུགས་སྐྱོང་བྱས་ཏེ། སྐྱེ་ཁམས་མ་ལག་གི་རྒྱུ་སྤུས་དང་གཏན་འཇགས་རང་བཞིན་ཇེ་ཆེར་གཏོང་དགོས། སྐྱེ་ཁམས་སྲུང་སྐྱོང་གི་དམར་ཐིག་དང་། བརྟན་ཆགས་ཀྱི་གཞི་རྩའི་ཞིང་ཁ། གྲོང་ཁྱེར་དང་གྲོང་རྡལ་གསར་སྤེལ་དང་མཐའ་མཚམས་བཅས་ཚོད་འཛིན་གྱི་མཚམས་ཐིག་གསུམ་འགོད་པའི་ལས་དོན་ལེགས་པར་བསྒྲུབ་དགོས། རྒྱལ་ཁབ་ཀྱི་མངའ་ཁོངས་སྔོ་ལྗང་ཅན་དུ་སྒྱུར་བའི་བྱེད་སྒོ་སྤེལ་ཏེ། མྱ་ངམ་ཐང་དུ་འགྱུར་བ་དང་། བྱེ་རྡོ་ཅན་དུ་འགྱུར་བ། ས་ཆུ་ཤོར་ཚུལ་བཅས་ཕྱོགས་བསྡུས་ཀྱིས་བཅོས་སྐྱོང་བྱེད་པར་སྐུལ་འདེད་གཏོང་ཞིང་། འདམ་ར་སྲུང་སྐྱོང་དང་བསྐྱར་གསོ་བྱེད་ཤུགས་ཆེ་རུ་གཏོང་བ་དང་། ས་གཤིས་ཀྱི་གནོད་འཚེ་འགོག་ཤུགས་ཆེ་རུ་གཏོང་དགོས། རང་བྱུང་ནགས་ཚལ་སྲུང་སྐྱོང་བྱེད་པའི་ལམ་ལུགས་འཐུས་སྒོ་ཚང་དུ་གཏོང་བ་དང་། ཞིང་དོར་ནགས་གསོ་རྩྭ་འདེབས་ཀྱི་རྒྱ་ཁྱོན་ཆེ་རུ་གཏོང་དགོས། རྨོ་ཞིང་སྲུང་སྐྱོང་ནན་པོར་བྱེད་པ་དང་། རྨོ་ཞིང་འདེབས་འཇོག་རེས་མོས་ཀྱི་ཚོད་ལྟ་བྱེད་གནས་རྒྱ་སྐྱེད་པ། རྨོ་ཞིང་དང་། རྩྭ་ཐང་། ནགས་ཚལ། ཆུ་བོ། མཚེའུ་བཅས་སོར་ཆུད་སྐྱེ་འཕེལ་གྱི་ལམ་ལུགས་ཆ་ཚང་དུ་གཏོང་བ། ཚོང་ར་ཅན་དང་སྣ་མང་ཅན་གྱི་སྐྱེ་ཁམས་ཁ་གསབ་ལམ་སྲོལ་འཛུགས་པ་བཅས་བྱེད་དགོས།

(བཞི) སྐྱེ་ཁམས་ཁོར་ཡུག་ལ་ལྟ་སྐུལ་དོ་དམ་བྱེད་པའི་སྒྲིག་སྲོལ་སྒྱུར་བཅོས་བྱེད་དགོས། སྐྱེ་ཁམས་དཔལ་ཡོན་འཛུགས་སྤེལ་བྱེད་པའི་སྤྱི་ཡོངས་ཀྱི་འཆར་འགོད་དང་རྩ་འཛུགས་ཀྱི་འགོ་ཁྲིད་བྱེད་ཤུགས་ཆེ་རུ་གཏོང་བ་དང་། རྒྱལ་ཁབ་ལ་དབང་བའི་རང་བྱུང་ཐོན་ཁུངས་ཀྱི་རྒྱུ་ནོར་དོ་དམ་དང་རང་བྱུང་སྐྱེ་ཁམས་ཀྱི་ལྟ་སྐུལ་དོ་དམ་ལས་ཁུངས་བཙུགས་ཏེ། སྐྱེ་ཁམས་ཁོར་ཡུག་དོ་དམ་གྱི་ལམ་ལུགས་འཐུས་སྒོ་ཚང་དུ་གཏོང་ཞིང་། དམངས་ཡོངས་ལ་དབང་བའི་རང་བྱུང་ཐོན་ཁུངས་ཀྱི་རྒྱུ་ནོར་བདག་དབང་ཡོད་མཁན་གྱི་འགན་འཁྲི་གཅིག་གྱུར་གྱིས་ལག་བསྟར་དང་། རྒྱལ་ཁབ་ཀྱི་མངའ་ཁོངས་བར་སྟོང་གི་སྤྱོད་སྒོ་རྩིས་སྤྲོད་དོ་དམ་དང་སྐྱེ་ཁམས་སྲུང་སྐྱོང་དང་ཉམས་གསོའི་འགན་འཁྲི་གཅིག་གྱུར་ཐོག་ལག་བསྟར། གྲོང་ཁྱེར་དང་གྲོང་གསེབ་ཀྱི་བཙོག་དངོས་སྣ་ཚོགས་འབུད་གཏོང་དང་སྲིད་འཛིན་ཁྲིམས་བསྟར་གྱི་འགན་འཁྲི་གཅིག་གྱུར་གྱིས་ལག་བསྟར་བཅས་བྱེད་དགོས། རྒྱལ་ཁབ་ཀྱི་མངའ་ཁོངས་བར་སྟོང་གསར་སྤེལ་སྲུང་སྐྱོང་གི་ལམ་ལུགས་འཛུགས་པ་དང་། གཙོ་ནུས་ཐོན་ཁུལ་གྱི་ཆ་འགྲིག་སྲིད་ཇུས་འཐུས་སྒོ་ཚང་དུ་བཏང་སྟེ། རྒྱལ་ཁབ་སྤྱི་གླིང་གཙོ་ཤུགས་སུ་གྱུར་པའི་རང་བྱུང་སྲུང་སྐྱོང་ཁུལ་གྱི་མ་ལག་འཛུགས་སྐྱོང་བྱེད་དགོས། སྐྱེ་ཁམས་ཁོར་ཡུག་གཏོར་སྐྱོན་གཏོང་བའི་བྱ་སྤྱོད་བློ་ཐག་རྦད་ཆོད་ཀྱིས་བཀག་འགོག་བྱེད་པ་དང་ཆད་པ་གཅོད་དགོས།

བློ་མཐུན་རྣམ་པ། སྐྱེ་ཁམས་དཔལ་ཡོན་འཛུགས་སྐྱོང་བྱེད་པ་ནི་བྱས་རྗེས་དེང་འདིར་བཞག་ནས། ཕན་འབྲས་བསྐལ་བརྒྱར་ཐོན་པ་ཞིག་ཡིན། ང་ཚོས་སྤྱི་ཚོགས་རིང་ལུགས་ཀྱི་སྐྱེ་ཁམས་དཔལ་ཡོན་གྱི་ལྟ་བ་བརྟན་པོར་འཆང་བ་དང་། མི་དང་རང་བྱུང་ཁམས་འཆམ་མཐུན་ངང་འཕེལ་རྒྱས་འགྲོ་བའི་དེང་རབས་ཅན་དུ་འགྱུར་བའི་འཛུགས་སྐྲུན་གྱི་རྣམ་པ་གསར་པ་ཆགས་པར་བྱས་ཏེ། སྐྱེ་ཁམས་ཁོར་ཡུག་སྲུང་སྐྱོང་བྱེད་ཕྱིར་ང་ཚོ་མི་རབས་འདིའི་ནུས་ཤུགས་འདོན་དགོས།

བཅུ། ཀྲུང་གོའི་ཁྱད་ཆོས་ཀྱི་དམག་དཔུང་སྟོབས་ལྡན་གྱི་ལམ་དུ་མཐའ་འཁྱོངས་བར་བསྐྱོད་དེ། རྒྱལ་སྲུང་དང་དམག་དཔུང་དེང་རབས་ཅན་དུ་འགྱུར་བར་ཕྱོགས་ཡོངས་ནས་སྐུལ་འདེད་གཏོང་དགོས།

རྒྱལ་སྲུང་དང་དམག་དཔུང་འཛུགས་སྐྱོང་ནི་ལོ་རྒྱུས་ཀྱི་འགོ་ཚུགས་ས་གསར་པ་ཞིག་ཏུ་གནས་ཡོད། རྒྱལ་ཁབ་ཀྱི་བདེ་འཇགས་ཁོར་ཡུག་ལ་འགྱུར་བ་ཟབ་མོ་བྱུང་བར་དམིགས་པ་དང་། རྒྱལ་ཁབ་དང་དམག་དཔུང་སྟོབས་ལྡན་དུ་གྱུར་བའི་དུས་རབས་ཀྱི་བླང་བྱར་དམིགས་ནས། དུས་རབས་གསར་པར་དམག་དཔུང་སྟོབས་ལྡན་འཛུགས་སྐྱོང་བྱེད་པའི་ཏང་གི་བསམ་བློ་ངེས་པར་དུ་ཕྱོགས་ཡོངས་ནས་དོན་འཁྱོལ་ཡོང་བར་བྱེད་པ་དང་། གནས་བབ་གསར་པའི་འོག་ཏུ་དམག་དོན་འཐབ་ཇུས་བྱེད་ཕྱོགས་དོན་འཁྱོལ་བྱེད་པ། སྟོབས་དང་ལྡན་པའི་དེང་རབས་ཅན་གྱི་སྐམ་དམག་དང་། མཚོ་དམག མཁའ་དམག མེ་ཤུགས་འཕུར་མདའི་དམག འཐབ་ཇུས་ཀྱི་རོགས་སྐྱོར་དམག་དཔུང་བཅས་འཛུགས་པ། བློ་རྩ་བརྟན་ཞིང་ནུས་ཕྱོད་ཆེ་བའི་འཐབ་ཁུལ་མཉམ་ལས་དམག་འཐབ་ཀྱི་བཀོད་འདོམས་ལས་ཁུངས་འཛུགས་པ། ཀྲུང་གོའི་ཁྱད་ཆོས་ཀྱི་དེང་རབས་དམག་འཐབ་ཀྱི་མ་ལག་འཛུགས་པ་བཅས་བྱས་ནས་ཏང་དང་མི་དམངས་ཀྱིས་དཀྲིས་པའི་དུས་རབས་གསར་པའི་འགན་འཁྲི་དང་ལས་འགན་འཁུར་དུ་ལེན་དགོས།

འཛམ་གླིང་གི་དམག་དོན་གསར་བརྗེ་གསར་པའི་འཕེལ་ཕྱོགས་དང་རྒྱལ་ཁབ་ཀྱི་བདེ་འཇགས་དགོས་མཁོར་འཚམ་པ་དང་། འཛུགས་སྐྱོང་བྱེད་པའི་སྤུས་ཚད་དང་ཕན་ནུས་ཇེ་ཆེར་བཏང་ནས། 2020ལོར་སླེབས་དུས་གཞི་རྩའི་ཆ་ནས་འཕྲུལ་ཆས་ཅན་དུ་འགྱུར་བ་དང་། ཆ་འཕྲིན་ཅན་དུ་འཛུགས་སྐྱོང་བྱེད་པར་གྲུབ་འབྲས་གལ་ཆེན་ཐོབ་པ། འཐབ་ཇུས་ཀྱི་ནུས་པ་ཇེ་ཆེར་འཕེལ་བ་བཅས་ཀྱི་འགན་ལེན་བྱེད་དགོས། རྒྱལ་ཁབ་དེང་རབས་ཅན་དུ་འཕེལ་རིམ་དང་གཅིག་མཚུངས་ཐོག་ནས། དམག་དོན་གྱི་གཞུང་ལུགས་དེང་རབས་ཅན་དང་། དམག་དཔུང་གི་རྩ་འཛུགས་རྣམ་པ་དང་། དམག་དོན་མི་སྣ། གོ་མཚོན་དང་སྒྲིག་ཆས་བཅས་ཕྱོགས་ཡོངས་ནས་དེང་རབས་ཅན་དུ་འགྱུར་བར་བྱས་ཏེ། 2035ལོར་སླེབས་དུས་གཞི་རྩའི་ཆ་ནས་རྒྱལ་སྲུང་དང་དམག་དཔུང་དེང་རབས་ཅན་དུ་མངོན་འགྱུར་ཡོང་བ་དང་། དུས་རབས་འདིའི་དུས་དཀྱིལ་དུ་སླེབས་དུས་མི་དམངས་དམག་དཔུང་འཛམ་གླིང་གི་དམག་དཔུང་རྩེ་གྲའི་གྲས་སུ་ཕྱོགས་ཡོངས་ནས་འཛུགས་སྐྱོང་ཐུབ་པར་བརྩོན་དགོས།

དམག་དཔུང་གི་ཏང་འཛུགས་སྐྱོང་བྱེད་ཤུགས་ཆེ་རུ་བཏང་ནས། “གསར་བརྗེའི་གཞི་རྒྱུ་རྒྱུན་དུ་འཛིན། དམག་དཔུང་སྟོབས་ལྡན་འགན་ལྕི་འཁུར”ཞེས་པའི་བརྗོད་བྱ་གཙོ་བོའི་སློབ་གསོ་སྤེལ་བ་དང་། དམག་མིའི་གཟི་བརྗིད་མཚན་སྙན་མ་ལག་འཛུགས་སྤེལ་ལ་སྐུལ་འདེད་གཏོང་བ། བླ་སྲོག་ལྡན་ལ་འཇོན་ཐང་ཡོད་པ་དང་། ངར་ཤུགས་ཆེ་བ། གཤིས་རྒྱུད་བཟང་བ་བཅས་ཀྱི་དུས་རབས་གསར་པའི་གསར་བརྗེའི་དམག་མི་གསོ་སྐྱོང་བྱས་ཏེ། མི་དམངས་དམག་དཔུང་གི་ངོ་བོ་དང་། དམིགས་ཡུལ། རང་གཤིས་བཅས་ནམ་ཡང་མི་ཉམས་པར་བྱེད་དགོས། རྒྱལ་སྲུང་དང་དམག་དཔུང་སྒྱུར་བཅོས་མུ་མཐུད་ཟབ་སྤེལ་བྱས་ཏེ། དམག་དཔོན་ལས་རིགས་ཅན་གྱི་ལམ་ལུགས་དང་། ཞི་དཔོན་གྱི་ལས་འགན་འཁུར་མཁན་གྱི་ལམ་ལུགས། དམག་ཞབས་ལམ་ལུགས་སོགས་སྲིད་ཇུས་དང་ལམ་ལུགས་འགངས་ཆེན་སྒྱུར་བཅོས་ཟབ་སྤེལ་བྱེད་པ་དང་། དམག་དོན་དོ་དམ་གྱི་གསར་བརྗེར་སྐུལ་སྤེལ་བཏང་ཐོག ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དམག་དོན་ལམ་ལུགས་འཐུས་ཚང་དང་འཕེལ་རྒྱས་གཏོང་དགོས། ཚན་རྩལ་ནི་སྲོག་ཤིང་དུ་གྱུར་པའི་འཐབ་ནུས་ཡིན་པའི་བསམ་བློ་འཆང་དགོས་ཤིང་། ལག་རྩལ་གསར་གཏོད་འགངས་ཆེན་དང་རང་བདག་གསར་གཏོད་ལ་སྐུལ་འདེད་གཏོང་བ་དང་། དམག་དོན་གྱི་འཇོན་ཐང་ལྡན་པའི་མི་སྣ་སྐྱེད་སྲིང་གི་མ་ལག་འཛུགས་པར་ཤུགས་སྣོན་བརྒྱབ་ནས། གསར་གཏོད་ཅན་གྱི་མི་དམངས་དམག་དཔུང་འཛུགས་སྐྱོང་བྱེད་དགོས། ཕྱོགས་ཡོངས་ནས་དམག་སྐྱོང་ནན་པོར་བྱས་ཏེ། དམག་སྐྱོང་བྱེད་ཐབས་རྩ་བ་ནས་འགྱུར་ལྡོག་ཡོང་བར་བྱས་ནས། རྒྱལ་སྲུང་དང་དམག་དཔུང་འཛུགས་སྐྱོང་ཁྲིམས་ལུགས་ཅན་དུ་འགྱུར་བའི་ཆུ་ཚད་ཇེ་མཐོར་གཏོང་དགོས།

དམག་དཔུང་གིས་དམག་གྲབས་བྱེད་དགོས་པས། ལས་དོན་ཐམས་ཅད་ངེས་པར་དུ་འཐབ་ནུས་ཀྱི་ཚད་གཞི་མཐའ་འཁྱོངས་བྱས་ཏེ། གཡུལ་འགྱེད་ཐུབ་པ་དང་གཡུལ་ལས་རྒྱལ་བའི་ཕྱོགས་སུ་རྩེ་གཅིག་ཏུ་དམིགས་དགོས། འཐབ་ཇུས་ཕྱོགས་ཁག་གི་དམག་དོན་འཐབ་རྩོད་ཀྱི་གྲ་སྒྲིག་ཡག་པོ་ཏན་ཏིག་བྱེད་པ་དང་། སྲོལ་རྒྱུན་གྱི་བདེ་འཇགས་ཁྱབ་ཁོངས་དང་བདེ་འཇགས་ཁྱབ་ཁོངས་དཔེ་གསར་གྱི་དམག་དོན་འཐབ་རྩོད་གྲ་སྒྲིག་གཅིག་གྱུར་གྱིས་སྐུལ་འདེད་བཏང་སྟེ། དམག་འཐབ་ཀྱི་སྟོབས་ཤུགས་དང་འགན་སྲུང་གི་སྟོབས་ཤུགས་དཔེ་གསར་འཕེལ་རྒྱས་གཏོང་བ་དང་། དངོས་འཐབ་ཅན་གྱི་དམག་དོན་སྦྱོང་བརྡར་བྱེད་པ། དམག་དོན་སྟོབས་ཤུགས་སྤྱོད་ཤུགས་ཆེ་རུ་གཏོང་བ། དམག་དོན་རིག་ནུས་ཅན་དུ་འཕེལ་རྒྱས་གང་མགྱོགས་གཏོང་བ། དྲ་སྦྲེལ་གྱི་ཆ་འཕྲིན་མ་ལག་ལ་བརྟེན་པའི་མཉམ་སྦྲེལ་དམག་འཐབ་ཀྱི་ནུས་པ་དང་ཁྱབ་ཁོངས་ཡོངས་ཀྱི་དམག་འཐབ་ནུས་པ་ཆེ་རུ་གཏོང་དགོས་ཤིང་། ཕན་ནུས་ཐོན་པའི་རྒྱས་ཉམས་གཏོད་པ་དང་། ཉམས་ཉེན་ལྟ་འདོམས། དམག་འཐབ་བཀག་འགོག དམག་འཐབ་ལས་རྒྱལ་བ་བཅས་བྱེད་དགོས།

རྒྱལ་ཁབ་ཕྱུག་འགྱུར་དང་དམག་དཔུང་སྟོབས་ལྡན་གཅིག་གྱུར་ཡོང་བ་མཐའ་འཁྱོངས་བྱས་ཏེ་གཅིག་གྱུར་གྱི་འགོ་ཁྲིད་དང་། རྩེ་རིམ་ཇུས་འགོད། སྒྱུར་བཅོས་གསར་གཏོད། ལས་གཞི་འགངས་ཆེན་དོན་འཁྱོལ་བཅས་བྱེད་ཤུགས་ཆེ་རུ་གཏོང་བ་དང་། རྒྱལ་སྲུང་ཚན་རྩལ་བཟོ་ལས་ལ་སྒྱུར་བཅོས་ཟབ་སྤེལ་བྱས་ཏེ་དམག་དམངས་མཉམ་འདྲེས་གཏིང་ཟབ་ཏུ་འཕེལ་བའི་རྣམ་པ་ཆགས་པ་དང་། རྒྱལ་ཁབ་ཀྱི་འཐབ་ཇུས་མ་ལག་དང་ནུས་པ་གཞི་གཅིག་ཅན་དུ་འཛུགས་སྐྱོང་བྱེད་དགོས། རྒྱལ་སྲུང་སྐུལ་སློང་གི་མ་ལག་འཐུས་སྒོ་ཚང་དུ་བཏང་ནས། དེང་རབས་ཀྱི་མཐའ་མཚམས་དང་མཚོ་རྒྱུད་མཁའ་སྲུང་བཅས་སྟོབས་ཆེན་དང་བརྟན་པོ་འཛུགས་སྐྱོང་བྱེད་དགོས། དམག་ཞབས་ཐིམས་པའི་དམག་མིར་དོ་དམ་འགན་སྲུང་བྱེད་པའི་ལས་ཁུངས་འཛུགས་པ་དང་། དམག་མི་དང་དམག་མིའི་ཁྱིམ་མིའི་ཁྲིམས་མཐུན་ཁེ་དབང་སྲུང་སྐྱོང་བྱས་ཏེ། དམག་མི་སྤྱི་ཚོགས་ཡོངས་ཀྱིས་གོང་དུ་བཀུར་བའི་ལས་རིགས་ཤིག་ཏུ་འགྱུར་བར་བྱེད་དགོས། ཉེན་རྟོག་དྲག་དཔུང་སྒྱུར་བཅོས་ཟབ་སྤེལ་བྱས་ཏེ། དེང་རབས་ཅན་གྱི་དྲག་ཆས་ཉེན་རྟོག་པའི་དཔུང་སྡེ་འཛུགས་སྐྱོང་བྱེད་དགོས།

བློ་མཐུན་རྣམ་པ། ང་ཚོའི་དམག་དཔུང་ནི་མི་དམངས་དམག་དཔུང་ཡིན་ཞིང་། ང་ཚོའི་རྒྱལ་སྲུང་ནི་དམངས་ཡོངས་ཀྱི་རྒྱལ་སྲུང་ཡིན་པས། ང་ཚོས་དམངས་ཡོངས་ཀྱི་རྒྱལ་སྲུང་སློབ་གསོར་ཤུགས་སྣོན་རྒྱག་པ་དང་། དམག་སྲིད་དང་དམག་དམངས་དབར་གྱི་མཐུན་སྒྲིལ་སྲ་བརྟན་དུ་བཏང་ནས། ཀྲུང་གོའི་ཕུགས་འདུན་དང་དམག་དཔུང་སྟོབས་ལྡན་ཅན་དུ་འགྱུར་བའི་ཕུགས་འདུན་མངོན་འགྱུར་ཡོང་ཕྱིར་སྟོབས་ཤུགས་ཆེན་པོ་གཅིག་ཏུ་བསྒྲིལ་དགོས།

བཅུ་གཅིག “རྒྱལ་ཁབ་གཅིག་ལ་ལམ་ལུགས་གཉིས”མཐའ་འཁྱོངས་བྱས་ཏེ། མེས་རྒྱལ་གོང་བུ་གཅིག་གྱུར་ལ་སྐུལ་སྤེལ་གཏོང་དགོས།

ཤང་ཀང་དང་ཨའོ་མོན་མེས་རྒྱལ་གྱི་པང་དུ་ལོག་པ་ནས་བཟུང་སྟེ། “རྒྱལ་ཁབ་གཅིག་ལ་ལམ་ལུགས་གཉིས”ལག་ལེན་བསྟར་བར་འཛམ་གླིང་ཡོངས་ཀྱིས་ཁས་ལེན་པའི་ལེགས་འགྲུབ་བྱུང་ཡོད། “རྒྱལ་ཁབ་གཅིག་ལ་ལམ་ལུགས་གཉིས”འཛིན་པ་ནི་ལོ་རྒྱུས་ཐོག་ཤང་ཀང་དང་ཨའོ་མོན་གྱི་གནད་དོན་འཕྲོ་ལུས་ཐག་གཅོད་པའི་ཐབས་ཇུས་ལེགས་ཤོས་ཡིན་ལ། ཤང་ཀང་དང་ཨའོ་མོན་མེས་རྒྱལ་གྱི་པང་དུ་ལོག་རྗེས་དུས་ཡུན་རིང་པོར་དར་རྒྱས་དང་བརྟན་ལྷིང་ཡོང་བ་རྒྱུན་འཁྱོངས་བྱེད་པའི་ལམ་ལུགས་ལེགས་ཤོས་ཀྱང་ཡིན་པ་དོན་དངོས་ལས་ར་འཕྲོད་བྱུང་ཡོད།

ཤང་ཀང་དང་ཨའོ་མོན་དུས་ཡུན་རིང་པོར་དར་རྒྱས་དང་བརྟན་ལྷིང་ཡོང་བ་རྒྱུན་འཁྱོངས་བྱེད་པར“རྒྱལ་ཁབ་གཅིག་ལ་ལམ་ལུགས་གཉིས”དང་། “ཤང་ཀང་བས་ཤང་ཀང་སྐྱོང་བ” “ཨའོ་མོན་བས་ཨའོ་མོན་སྐྱོང་བ” ཚད་མཐོའི་རང་སྐྱོང་བྱེད་པ་བཅས་ཀྱི་བྱེད་ཕྱོགས་ངེས་པར་དུ་ཕྱོགས་ཡོངས་ནས་ལག་བསྟར་གནད་འཁེལ་བྱེད་དགོས་ཤིང་། རྩ་ཁྲིམས་དང་གཞི་རྩའི་བཅའ་ཁྲིམས་གཞིར་བཟུང་ནས་ལས་དོན་དམ་ནན་བསྒྲུབ་དགོས་པ་དང་། གཞི་རྩའི་བཅའ་ཁྲིམས་ལག་བསྟར་བྱེད་པ་དང་འབྲེལ་བ་ཡོད་པའི་ལམ་ལུགས་དང་ལམ་སྲོལ་འཐུས་སྒོ་ཚང་དུ་གཏོང་དགོས། དམིགས་བསལ་སྲིད་འཛིན་ཁུལ་གྱི་སྲིད་གཞུང་དང་སྲིད་འཛིན་དཔོན་གྱིས་ཁྲིམས་མཐུན་ལྟར་སྲིད་སྐྱོང་བ་དང་། ལས་དོན་ཧུར་ཐག་སྒྲུབ་པར་རྒྱབ་སྐྱོར་བྱེད་དགོས་ལ། ཤང་ཀང་དང་ཨའོ་མོན་གྱི་ལས་རིགས་ཁག་གི་མི་སྣར་མཐུན་སྒྲིལ་དང་ཁོང་ཚོའི་སྣེ་ཁྲིད་དེ་སྟོབས་ཤུགས་གཅིག་སྒྲིལ་གྱིས་འཕེལ་རྒྱས་ཡོང་བར་བརྩོན་པ་དང་། འཆམ་མཐུན་ཡོང་བའི་སྐུལ་སྤེལ་གཏོང་བ། དམངས་འཚོ་འགན་སྲུང་དང་ལེགས་བཅོས་བྱེད་ཅིང་དམངས་གཙོ་གོ་རིམ་ལྡན་པའི་སྒོ་ནས་སྐུལ་སྤེལ་གཏོང་བ་དང་། སྤྱི་ཚོགས་ཀྱི་བརྟན་ལྷིང་སྲུང་སྐྱོང་བྱེད་པ། རྒྱལ་ཁབ་ཀྱི་བདག་དབང་དང་། བདེ་འཇགས། འཕེལ་རྒྱས་བཅས་ཀྱི་ཁེ་ཕན་སྲུང་སྐྱོང་བྱེད་པའི་རྩ་ཁྲིམས་ཀྱི་འགན་འཁྲི་སྒྲུབ་པ་བཅས་ཀྱི་རོགས་རམ་བྱེད་དགོས།

ཤང་ཀང་དང་ཨའོ་མོན་འཕེལ་རྒྱས་གཏོང་བ་ནི་མེས་རྒྱལ་ནང་སའི་འཕེལ་རྒྱས་དང་དམ་པོར་འབྲེལ་ཡོད་པས། ཤང་ཀང་དང་ཨའོ་མོན་རྒྱལ་ཁབ་འཕེལ་རྒྱས་གཏོང་བའི་སྤྱི་ཡོངས་དང་འདྲེས་པར་རྒྱབ་སྐྱོར་བྱེད་ཅིང་། ཡུའེ་ཀང་ཨའོ་ཁུག་ཆེན་ཁུལ་འཛུགས་སྐྲུན་དང་། ཡུའེ་ཀང་ཨའོ་མཉམ་ལས། ཀྲུའུ་ཅང་ཟུར་གསུམ་གླིང་ཁུལ་ཁོངས་མཉམ་ལས་བཅས་གཙོ་གནད་དུ་བཟུང་སྟེ། ནང་སས་ཤང་ཀང་ཨའོ་མོན་དག་དང་ཕན་ཚུན་གཉིས་ཕན་མཉམ་ལས་བྱེད་པར་ཁྱོན་ཡོངས་ནས་སྐུལ་སྤེལ་དང་། ཤང་ཀང་དང་ཨའོ་མོན་གྱི་གྲོང་མི་ནང་སར་འཕེལ་རྒྱས་ཡོང་བར་བྱེད་པའི་སྲིད་ཇུས་དང་བྱེད་ཐབས་གཏན་འབེབས་དང་འཐུས་སྒོ་ཚང་དུ་གཏོང་དགོས།

ང་ཚོས་རྒྱལ་གཅེས་པ་བྱེད་པོ་གཙོ་བོར་གྱུར་པའི“ཤང་ཀང་བས་ཤང་ཀང་སྐྱོང་བ”དང“ཨའོ་མོན་བས་ཨའོ་མོན་སྐྱོང་བ”མཐའ་འཁྱོངས་བྱེད་པ་དང་། རྒྱལ་གཅེས་ཀང་གཅེས་ཨའོ་གཅེས་བཅས་ཀྱི་སྟོབས་ཤུགས་གོང་སྤེལ་དང་རྒྱ་སྐྱེད་བཏང་ནས། སྤུན་ཟླ་ཤང་ཀང་བ་དང་སྤུན་ཟླ་ཨའོ་མོན་བའི་རྒྱལ་ཁབ་ཀྱི་འདུ་ཤེས་དང་རྒྱལ་གཅེས་ཀྱི་བསམ་པ་ཆེ་རུ་གཏོང་བ་དང་། སྤུན་ཟླ་ཤང་ཀང་བ་དང་སྤུན་ཟླ་ཨའོ་མོན་བར་མེས་རྒྱལ་གྱི་མི་དམངས་དང་མཉམ་དུ་མི་རིགས་བསྐྱར་དར་གྱི་ལོ་རྒྱུས་འགན་འཁྲི་འཁུར་དུ་འཇུག་པ་དང་། མེས་རྒྱལ་སྟོབས་འབྱོར་མངའ་ཐང་རྒྱས་པའི་གཟི་བརྗིད་རླབས་པོ་ཆེ་མཉམ་རོལ་བྱེད་དུ་འཇུག་དགོས།

ཐའེ་དབན་གྱི་གནད་དོན་ཐག་གཅོད་བྱས་ཏེ་མེས་རྒྱལ་རྦད་དེ་གོང་བུ་གཅིག་གྱུར་ཡོང་བར་བྱེད་རྒྱུ་ནི་ཀྲུང་ཧྭའི་བུ་ཕྲུག་ཡོངས་ཀྱི་ཐུན་མོང་གི་རེ་འདུན་ཡིན་པ་དང་། ཀྲུང་ཧྭ་མི་རིགས་ཀྱི་རྩ་བའི་ཁེ་ཕན་གནས་ས་ཡིན་པས། “ཞི་བའི་གཅིག་གྱུར་དང་། རྒྱལ་ཁབ་གཅིག་ལ་ལམ་ལུགས་གཉིས”ཀྱི་བྱེད་ཕྱོགས་ངེས་པར་མུ་མཐུད་མཐའ་འཁྱོངས་བྱས་ཏེ། ངོགས་གཉིས་ཀྱི་འབྲེལ་བ་ཞི་བའི་སྒོ་ནས་འཕེལ་རྒྱས་ཡོང་བར་བྱས་ནས་མེས་རྒྱལ་ཞི་བའི་སྒོ་ནས་གཅིག་གྱུར་ཡོང་བའི་འཕེལ་རིམ་ལ་སྐུལ་འདེད་གཏོང་དགོས།

ཀྲུང་གོ་གཅིག་གི་རྩ་དོན་ནི་ངོགས་གཉིས་ཀྱི་འབྲེལ་བའི་ཆབ་སྲིད་རྨང་གཞི་ཡིན་པས། ཀྲུང་གོ་གཅིག་གི་རྩ་དོན་མཚོན་པའི“དགུ་གཉིས་ཐུན་མོང་ལྟ་བ”ཡིས་ངོགས་གཉིས་ཀྱི་འབྲེལ་བའི་རྩ་བའི་ངོ་བོ་གསལ་འབྱེད་བྱས་ཤིང་། ངོགས་གཉིས་ཀྱི་འབྲེལ་བ་ཞི་བའི་ངང་ནས་འཕེལ་རྒྱས་ཡོང་བར་འགན་ལེན་བྱེད་པའི་འགག་རྩ་ཡིན། “དགུ་གཉིས་ཐུན་མོང་ལྟ་བ”ཡི་ལོ་རྒྱུས་དངོས་ཁས་ལེན་པ་དང་། ངོགས་གཉིས་ཀྲུང་གོ་གཅིག་ལ་གཏོགས་པ་ངོས་འཛིན་གཅིག་མཐུན་བྱུང་ན། ངོགས་གཉིས་དབར་གླེང་མོལ་བྱེད་རེས་ཐུབ་པ་དང་། ངོགས་གཉིས་ཀྱི་སྤུན་ཟླ་ཚོས་སེམས་ཁུར་བྱེད་པའི་གནད་དོན་གྲོས་མོལ་ཐོག་ནས་ཐག་གཅོད་བྱེད་ཐུབ་ཅིང་། ཐའེ་དབན་གྱི་སྲིད་ཏང་དང་ཚོགས་པ་གང་ཞིག་ཡིན་རུང་སྐམ་ས་དང་འབྲེལ་བ་བྱེད་པར་གེགས་ཆ་ཡོང་མི་སྲིད།

ངོགས་གཉིས་ཀྱི་སྤུན་ཟླ་ནི་ལས་དབང་གཅིག་མཐུན་གྱི་ཤ་རུས་གཅིག་པའི་སྤུན་ཟླ་ཡིན་ཞིང་། རིགས་རྒྱུད་གཅིག་ལས་མཆེད་པའི་ཁྱིམ་ཚང་གཅིག་ལྟ་བུ་ཡིན། ང་ཚོས“ངོགས་གཉིས་ཁྱིམ་ཚང་གཅིག་ལྟར་ཡིན་པའི”བསམ་གཞི་ཟབ་མོར་བཅངས་ནས། ཐའེ་དབན་གྱི་ད་ཡོད་སྤྱི་ཚོགས་ལམ་ལུགས་དང་སྤུན་ཟླ་ཐའེ་དབན་བའི་འཚོ་བ་སྐྱེལ་སྟངས་ལ་བརྩི་བཀུར་བྱེད་པ་དང་། སྔོན་ལ་སྤུན་ཟླ་ཐའེ་དབན་བ་དང་མཉམ་དུ་སྐམ་ས་འཕེལ་རྒྱས་ཀྱི་གོ་སྐབས་མཉམ་སྤྱོད་བྱེད་འདོད་ཡོད། ང་ཚོས་ངོགས་གཉིས་ཀྱི་དཔལ་འབྱོར་དང་རིག་གནས་སྤེལ་རེས་དང་མཉམ་ལས་རྒྱ་ཆེར་གཏོང་བ་དང་། ཕན་ཚུན་ཕན་རེས་ཡོང་བར་བྱས་ནས་སྤུན་ཟླ་ཐའེ་དབན་བ་སྐམ་ས་རུ་སློབ་སྦྱོང་དང་ལས་གཏོད། ལས་ཞུགས། འཚོ་བ་སྐྱེལ་བ་བཅས་སུ་འོང་བར་སྐམ་སའི་སྤུན་ཟླ་དང་གཅིག་མཚུངས་ཀྱི་ཐོབ་ཐང་རིམ་པར་འདོན་སྤྲོད་བྱས་ཏེ། སྤུན་ཟླ་ཐའེ་དབན་བའི་ཕན་བདེ་ཆེ་རུ་བསྐྱེད་དགོས། ངོགས་གཉིས་ཀྱི་སྤུན་ཟླས་ཐུན་མོང་ཐོག་ཀྲུང་ཧྭའི་རིག་གནས་དར་འཕེལ་ཡོང་བར་བྱེད་པ་དང་། བསམ་པ་གཅིག་མཐུན་ཡོང་བ་བྱེད་པར་ང་ཚོས་སྐུལ་མ་གཏོང་དགོས།

ང་ཚོས་རྒྱལ་ཁབ་ཀྱི་བདག་དབང་དང་མངའ་ཁོངས་ཆ་ཚང་སྲུང་སྐྱོང་མཐའ་གཅིག་ཏུ་བྱས་ཏེ། རྒྱལ་ཁབ་ཁ་ཕྲལ་བའི་ལོ་རྒྱུས་ཀྱི་སྐྱོ་གར་དེ་ཡང་བསྐྱར་འཁྲབ་སྟོན་བྱེད་དུ་གཏན་ནས་མི་འཇུག རྒྱལ་ཁབ་ཁ་ཕྲལ་བའི་བྱེད་སྤྱོད་ཐམས་ཅད་ལ་ཀྲུང་གོ་བ་ཡོངས་ཀྱིས་ངོ་རྒོལ་མཐའ་གཅིག་ཏུ་བྱེད་ངེས་ཡིན། ང་ཚོར་རྣམ་པ་གང་རུང་གི“ཐའེ་དབན་རང་བཙན”བྱེད་པའི་ཁ་ཕྲལ་གྱི་ངན་ཇུས་གཏོར་ཕམ་གཏོང་བའི་བློ་སྟོབས་བརྟན་པོ་དང་། ཡིད་ཆེས་ཟབ་མོ། ནུས་ཤུགས་འདང་ངེས་བཅས་ཡོད། མི་སུ་ཡིན་དང་། ཚོགས་པ་གང་ཡིན། སྲིད་ཏང་གང་ཡིན། དུས་ནམ་ཡིན། རྣམ་པ་གང་ཞིག་སྤྱོད་མིན་བཅས་ལ་མ་བལྟོས་པར། ང་ཚོས་ཀྲུང་གོའི་མངའ་ཁོངས་ཀྱི་ས་ཆ་གང་ཞིག་ཀྱང་ཀྲུང་གོ་ནས་ཁ་ཕྲལ་དུ་གཏན་ནས་མི་འཇུག་ཐག་ཆོད་ཡིན།

བློ་མཐུན་རྣམ་པ། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་བྱེད་རྒྱུ་ནི་ཀྲུང་གོ་བ་ཡོངས་ཀྱི་ཐུན་མོང་གི་ཕུགས་འདུན་ཡིན། སྤུན་ཟླ་ཀང་ཨའོ་ཐའེ་ཚུད་པའི་ཀྲུང་ཧྭའི་བུ་ཕྲུག་ཡོངས་ཀྱིས་ལོ་རྒྱུས་ཀྱི་འཕེལ་ཕྱོགས་ཆེན་པོར་བསྟུན་པ་དང་། མི་རིགས་ཀྱི་བདེན་དོན་མཉམ་འཁུར་བྱས་ནས། མི་རིགས་ཀྱི་ལས་སྐལ་དེ་རང་ཉིད་ཀྱི་ལག་ཏུ་དམ་པོར་བཟུང་ཕྱིན། ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་ཕུགས་འདུན་བཟང་པོ་ལྷན་དུ་གཏོད་ཐུབ་ངེས་ཡིན་པར་ང་ཚོར་ཡིད་ཆེས་བརྟན་པོ་ཡོད།

བཅུ་གཉིས། ཞི་བའི་འཕེལ་རྒྱས་ཀྱི་བགྲོད་ལམ་དུ་མཐའ་འཁྱོངས་བར་བསྐྱོད་དེ། མིའི་རིགས་ཀྱི་ལས་དབང་གཅིག་པའི་ཐུན་མོང་ཚོགས་པ་འཛུགས་སྐྱོང་ལ་སྐུལ་སྤེལ་གཏོང་དགོས།

ཀྲུང་གོ་གུང་ཁྲན་ཏང་ནི་ཀྲུང་གོའི་མི་དམངས་ལ་བདེ་སྐྱིད་སྐྲུན་མཁན་གྱི་སྲིད་ཏང་ཞིག་ཡིན་ལ། མིའི་རིགས་ཡར་ཐོན་ཡོང་བའི་བྱ་གཞག་གི་དོན་དུ་འབད་བརྩོན་བྱེད་མཁན་སྲིད་ཏང་ཞིག་ཀྱང་ཡིན་པས། ཀྲུང་གོ་གུང་ཁྲན་ཏང་གིས་མིའི་རིགས་ལ་ལེགས་སྐྱེས་གསར་པ་སྔར་བས་ཆེན་པོ་འབུལ་རྒྱུ་དེ་ཐོག་མཐའ་བར་གསུམ་དུ་རང་ཉིད་ཀྱི་འགན་འཁྲིར་བརྩིས་ཡོད།

ཀྲུང་གོས་ཞི་བདེ་དང་། འཕེལ་རྒྱས། མཉམ་ལས། མཉམ་རྒྱལ་བཅས་ཀྱི་དར་ཆ་མཐོན་པོར་བསྒྲེངས་ནས། འཛམ་གླིང་གི་ཞི་བདེ་སྲུང་སྐྱོང་དང་། ཐུན་མོང་ཐོག་གོང་དུ་འཕེལ་བར་བྱེད་པའི་ཕྱི་འབྲེལ་སྲིད་ཇུས་ཀྱི་དགོངས་དོན་དམ་སྲུང་བྱས་པ་དང་། བློ་བརྟན་འགྱུར་མེད་ངང་ནས་ཞི་བདེ་མཉམ་གནས་ཀྱི་རྩ་དོན་ལྔ་པོའི་རྨང་གཞིའི་ཐོག་རྒྱལ་ཁབ་ཁག་དང་མཛའ་མཐུན་མཉམ་ལས་སྤེལ་རྒྱུ་དང་། ཕན་ཚུན་བརྩི་འཇོག་དང་། དྲང་སྙོམས་དྲང་བདེན། མཉམ་ལས་མཉམ་རྒྱལ་བཅས་ཀྱི་རྒྱལ་སྤྱིའི་འབྲེལ་བ་གསར་པ་འཛུགས་པའི་སྐུལ་འདེད་གཏོང་རྒྱུ་ཡིན།

འཛམ་གླིང་ནི་འཕེལ་རྒྱས་ཆེན་པོ་དང་འཕོ་འགྱུར་ཆེན་པོ། ལེགས་སྒྲིག་ཆེན་པོ་བཅས་བྱེད་སྒང་དུ་གནས་ཡོད་པ་དང་། ཞི་བདེ་དང་འཕེལ་རྒྱས་གཉིས་ནི་སྔར་བཞིན་དུས་རབས་ཀྱི་བརྗོད་བྱ་གཙོ་བོ་ཡིན། འཛམ་གླིང་སྣེ་མང་ཅན་དང་། དཔལ་འབྱོར་གོ་ལ་ཧྲིལ་པོ་ཅན། སྤྱི་ཚོགས་ཆ་འཕྲིན་ཅན། རིག་གནས་སྣ་མང་ཅན་བཅས་སུ་འཕེལ་རྒྱས་གཏིང་ཟབ་ཏུ་སོང་བ་དང་། གོ་ལ་ཧྲིལ་པོའི་བཅོས་སྐྱོང་མ་ལག་དང་རྒྱལ་སྤྱིའི་སྒྲིག་ལམ་འཕོ་འགྱུར་ཇེ་མགྱོགས་སུ་འགྲོ་བཞིན་པ། རྒྱལ་ཁབ་ཁག་ཕན་ཚུན་འབྲེལ་གཏུག་དང་བརྟེན་རེས་ཇེ་ཟབ་ཏུ་འགྲོ་བཞིན་པ། རྒྱལ་སྤྱིའི་སྟོབས་ཤུགས་ཀྱི་བསྡུར་ཚད་དོ་མཉམ་ཇེ་ཆེར་གྱུར་པ་བཅས་ཀྱི་རྐྱེན་པས། ཞི་བདེ་དང་འཕེལ་རྒྱས་ཀྱི་འཕེལ་ཕྱོགས་ཆེན་པོ་ལྡོག་ཐབས་མེད་པར་གྱུར་ཡོད། དུས་མཚུངས་སུ། འཛམ་གླིང་ཐོག་གཏན་འཇགས་མིན་པ་དང་གཏན་མ་འཁེལ་བའི་ཆ་མངོན་གསལ་དོད་པོར་གྱུར་པ་དང་། འཛམ་གླིང་གི་དཔལ་འབྱོར་འཕེལ་བར་བྱེད་པའི་ནུས་པ་མི་འདང་བ། དབུལ་ཕྱུག་གཉིས་སུ་གྱེས་ཚུལ་ཚབས་ཇེ་ཆེར་འགྲོ་བ། ས་ཁུལ་གྱི་གླེང་ཆ་ཆེ་བའི་གནད་དོན་གཅིག་འཇགས་གཅིག་ལངས་ཡིན་པ། འཇིགས་སྐུལ་རིང་ལུགས་དང་། དྲ་སྦྲེལ་བདེ་འཇགས། རིམས་ནད་ཚབས་ཆེན། གནམ་གཤིས་འགྱུར་ལྡོག་སོགས་སྲོལ་རྒྱུན་མ་ཡིན་པའི་བདེ་འཇགས་ཀྱི་འཇིགས་པ་བསྟུད་མར་མཆེད་བཞིན་ཡོད་པས། མིའི་རིགས་ལ་ཐུན་མོང་གི་འགྲན་སློང་མང་པོ་འཕྲད་བཞིན་ཡོད།

ང་ཚོ་འཚོ་བཞིན་པའི་འཛམ་གླིང་འདིར་རེ་བས་ཁེངས་ཡོད་ལ། འགྲན་སློང་གིས་ཀྱང་ཁེངས་ཡོད་པས། དོན་དངོས་རྙོག་འཛིང་ཆེ་བའི་དབང་གིས་ང་ཚོས་ཕུགས་འདུན་འདོར་མི་རུང་བ་དང་། ཕུགས་བསམ་རྒྱང་ཐག་རིང་བའི་དབང་གིས་བརྩོན་ལེན་བྱ་རྒྱུ་འདོར་མི་རུང་། མིའི་རིགས་ལ་འཕྲད་པའི་འགྲན་སློང་སྣ་ཚོགས་ལ་རང་གཅིག་པུས་ཁ་གཏད་འཇལ་ཐུབ་མཁན་གྱི་རྒྱལ་ཁབ་གཅིག་ཀྱང་མེད་ལ། རང་ལམ་རང་བཀག་གི་ཁེར་ཆགས་གླིང་ཕྲན་དུ་ཕྱིར་ལོག་ཐུབ་མཁན་རྒྱལ་ཁབ་ཀྱང་གཏན་ནས་མེད།

རྒྱལ་ཁབ་ཁག་གི་མི་དམངས་ཀྱིས་སེམས་ཤུགས་གཅིག་སྒྲིལ་བྱས་ཏེ་མིའི་རིགས་ཀྱི་ལས་དབང་གཅིག་པའི་ཐུན་མོང་ཚོགས་པ་འཛུགས་སྐྱོང་དང་། ཡུན་རིང་ཞི་བདེ་དང་། བདེ་འཇགས་ཡོངས་ཁྱབ། ཐུན་མོང་དུ་དར་རྒྱས། སྒོ་འབྱེད་ཁོང་ཡངས། དྭངས་གཙང་ཡིད་འོང་བཅས་ཀྱི་འཛམ་བུ་གླིང་འཛུགས་སྐྲུན་དགོས་ལུགས་ང་ཚོས་འབོད་སྐུལ་བྱེད་རྒྱུ་ཡིན། ཕན་ཚུན་བརྩི་བཀུར་དང་། འདྲ་མཉམ་ཐོག་གྲོས་མོལ་བྱེད་དགོས་ཤིང་། འཇམ་འཐབ་ཀྱི་བསམ་ཕྱོགས་དང་བཙན་དབང་ཆབ་སྲིད་མཐའ་གཅིག་ཏུ་དོར་ནས། གླེང་མོལ་བྱེད་པ་ལས་འགྲན་རྒོལ་མི་བྱེད་པ་དང་། གྲོགས་པོ་སྒྲིག་པ་ལས་མནའ་འབྲེལ་དུ་མི་ཞུགས་པའི་རྒྱལ་ཁབ་དང་རྒྱལ་ཁབ་དབར་གྱི་འབྲེལ་བ་འཛུགས་པའི་བགྲོད་ལམ་གསར་པར་བསྐྱོད་དགོས། གླེང་མོལ་གྱི་ཐབས་ལ་བརྟེན་ནས་རྩོད་གཞི་ཐག་གཅོད་དང་། གྲོས་མོལ་གྱི་ཐབས་ལ་བརྟེན་ནས་འགལ་བ་སེལ་རྒྱུ་མཐའ་འཁྱོངས་བྱེད་དགོས་པ་དང་། སྲོལ་རྒྱུན་དང་སྲོལ་རྒྱུན་མ་ཡིན་པའི་བདེ་འཇགས་ཀྱི་འཇིགས་སྐུལ་ལ་གཅིག་གྱུར་འཆར་འགོད་ཀྱིས་ཁ་གཏད་འཇལ་ནས། འཇིགས་སྐུལ་རིང་ལུགས་ཀྱི་རྣམ་པ་མཐའ་དག་ལ་ངོ་རྒོལ་བྱེད་དགོས། ཕྱར་བ་གྲུ་འདེགས་དང་། ཉོ་འཚོང་དང་དངུལ་འཇོག་རང་མོས་ཅན་དང་སྟབས་བདེ་ཅན་དུ་འགྱུར་བར་བྱེད་པ་དང་། དཔལ་འབྱོར་གོ་ལ་ཧྲིལ་པོ་ཅན་དུ་སྔར་བས་སྒོ་འབྱེད་དང་། ཁོང་ཡངས། ཀུན་ཕན། དོ་མཉམ། མཉམ་རྒྱལ་བཅས་ཀྱི་ཕྱོགས་སུ་འཕེལ་བར་བྱེད་དགོས། འཛམ་གླིང་གི་དཔལ་ཡོན་སྣ་མང་རང་བཞིན་ལ་བརྩི་འཇོག་བྱེད་དགོས་པ་དང་། དཔལ་ཡོན་སྤེལ་རེས་ལ་བརྟེན་ནས་དཔལ་ཡོན་གྱི་འགལ་རྐྱེན་སེལ་བ་དང་། དཔལ་ཡོན་དཔེ་བལྟ་བྱེད་རེས་ལ་བརྟེན་ནས་དཔལ་ཡོན་གྱི་འགལ་ཟླ་སེལ་བ། དཔལ་ཡོན་མཉམ་གནས་ལ་བརྟེན་ནས་དཔལ་ཡོན་གྱི་ཁྱད་འཕགས་ལས་བརྒལ་དགོས། ཁོར་ཡུག་མཛའ་མཐུན་མཐའ་འཁྱོངས་བྱས་ཏེ་མཉམ་ལས་ཐོག་ནས་གནམ་གཤིས་ཀྱི་འགྱུར་བར་ཁ་གཏད་བཅག་སྟེ། མིའི་རིགས་ཆགས་ས་རྟེན་སའི་གོ་ལའི་ཁྱིམ་གཞིས་གཅེས་སྐྱོང་བྱེད་དགོས།

ཀྲུང་གོས་རང་བཙན་རང་བདག་གི་ཞི་བདེའི་ཕྱི་འབྲེལ་སྲིད་ཇུས་བློ་རྩ་བརྟན་པོས་ལག་བསྟར་བྱེད་རྒྱུ་དང་། རྒྱལ་ཁབ་ཁག་གི་མི་དམངས་ཀྱིས་རང་བདག་སྒོ་ནས་འཕེལ་རྒྱས་གཏོང་བའི་བགྲོད་ལམ་གདམ་ག་རྒྱག་དབང་ལ་བརྩི་འཇོག་དང་། རྒྱལ་སྤྱིའི་དྲང་སྙོམ་དྲང་བདེན་སྲུང་སྐྱོང་། རང་ཉིད་ཀྱི་འདོད་བློ་གཞན་ལ་བཙན་འགེལ་བྱེད་པར་ངོ་རྒོལ། རྒྱལ་ཁབ་གཞན་གྱི་ནང་སྲིད་ལ་ཐེ་ཇུས་བྱེད་པར་ངོ་རྒོལ། ཆེ་བས་ཆུང་བཪ་བརྙས་བཅོས་ཀྱི་ཚུལ་ལ་ངོ་རྒོལ་བཅས་བྱེད་རྒྱུ་ཡིན། ཀྲུང་གོས་རྒྱལ་ཁབ་གཞན་པའི་ཁེ་ཕན་བློས་གཏོང་དུ་བཅུག་ནས་རང་ཉིད་འཕེལ་རྒྱས་གཏོང་རིགས་རྩ་བ་ནས་མི་བྱེད་ལ། རང་ཉིད་ཀྱི་ཚུལ་མཐུན་ཁེ་དབང་འདོར་རིགས་ཀྱང་རྩ་བ་ནས་མི་བྱེད། སུ་ཞིག་གིས་ཀྱང་ཀྲུང་གོར་རང་ཉིད་ཀྱི་ཁེ་ཕན་ལ་གནོད་པའི་ངན་འབྲས་འཁྱུར་མིད་གཏོང་དུ་འཇུག་རྒྱུའི་སྟོང་བསམ་མ་འཆང་ཞིག ཀྲུང་གོས་འགོག་སྲུང་རང་བཞིན་གྱི་རྒྱལ་སྲུང་སྲིད་ཇུས་ལག་བསྟར་བྱེད་བཞིན་ཡོད། ཀྲུང་གོའི་འཕེལ་རྒྱས་ཀྱིས་རྒྱལ་ཁབ་གང་ཞིག་ལའང་འཇིགས་སྐུལ་བཟོ་མི་སྲིད། ཀྲུང་གོ་འཕེལ་རྒྱས་ཀྱི་ཚད་ཇི་འདྲ་ཞིག་ཏུ་སླེབས་རུང་ནམ་ཡང་བཙན་དབང་ཧམ་གཉེར་མི་བྱེད་ལ་ནམ་ཡང་རྒྱ་སྐྱེད་མི་གཏོང་།

ཀྲུང་གོས་གོ་ལ་ཧྲིལ་པོའི་རོགས་ཟླའི་འབྲེལ་བ་འཕེལ་རྒྱས་ཧུར་ཐག་གཏོང་བ་དང་། རྒྱལ་ཁབ་ཁག་དང་ཁེ་ཕན་མཉམ་འདྲེས་ཀྱི་གནས་རྒྱ་ཆེར་གཏོང་བ། རྒྱལ་ཁབ་ཆེ་ཁག་དང་མཐུན་སྦྱོར་མཉམ་ལས་བྱེད་པར་སྐུལ་འདེད་གཏོང་བ། སྤྱི་ཡོངས་ནས་བརྟན་ལྷིང་དང་། འཕེལ་རྒྱས་དོ་མཉམ་གྱི་རྒྱལ་ཁབ་ཆེན་པོའི་འབྲེལ་བའི་གཞི་སྒྲོམ་འཛུགས་སྐྱོང་བྱེད་པ། མཛའ་བརྩེ་ཟོལ་མེད་དང་གཉིས་ཕན་བཟོད་སྒོམ་གྱི་བསམ་གཞི་ལྟར་ཁྱིམ་མཚེས་དང་འཆམ་ཞིང་། ཁྱིམ་མཚེས་དང་འགྲོགས་པའི་ཉེ་འབྲེལ་མཐའ་འཁོར་གྱི་ཕྱི་འབྲེལ་བྱེད་ཕྱོགས་ལ་གཞིགས་ཏེ། མཐའ་འཁོར་རྒྱལ་ཁབ་དབར་དང་འབྲེལ་བ་ཇེ་དམ་དུ་གཏོང་བ་དང་། འོས་འགན་དང་ཁེ་ཕན་གྱི་ལྟ་བ་ཡང་དག་དང་མཛའ་བརྩེ་ཟོལ་མེད་དང་གཉིས་ཕན་བཟོད་སྒོམ་གྱི་བསམ་གཞི་བཅངས་ནས་འཕེལ་རྒྱས་འགྲོ་བཞིན་པའི་རྒྱལ་ཁབ་དབར་དང་མཐུན་སྒྲིལ་མཉམ་ལས་བྱེད་ཤུགས་ཆེ་རུ་གཏོང་བཞིན་ཡོད། རྒྱལ་ཁབ་ཁག་གི་སྲིད་ཏང་དང་ཆབ་སྲིད་རྩ་འཛུགས་དབར་དུ་སྤེལ་རེས་མཉམ་ལས་བྱེད་ཤུགས་ཆེ་རུ་བཏང་ནས་མི་དམངས་འཐུས་ཚོགས་དང་། སྲིད་གྲོས། དམག་དཔུང་། ས་གནས། མི་དམངས་ཀྱི་ཚོགས་པ་སོགས་ཀྱི་ཕྱི་ཕྱོགས་འགྲོ་འོང་ལ་སྐུལ་འདེད་གཏོང་རྒྱུ་ཡིན།

ཀྲུང་གོས་ཕྱི་ཕྱོགས་ལ་སྒོ་འབྱེད་པའི་གཞི་རྩའི་རྒྱལ་ཇུས་མཐའ་འཁྱོངས་དང་། རྒྱལ་སྒོ་ཕྱེ་ནས་འཛུགས་སྐྲུན་མཐའ་འཁྱོངས། “རྒྱུད་གཅིག་ལམ་གཅིག”གི་རྒྱལ་སྤྱིའི་མཉམ་ལས་ལ་སྐུལ་སྤེལ་ཧུར་ཐག་བཏང་སྟེ། སྲིད་ཇུས་འབྲེལ་མཐུད་དང་། སྒྲིག་བཀོད་མཉམ་སྦྲེལ། ཉོ་འཚོང་ཤར་གཏོང་། མ་དངུལ་རྒྱུན་འཁོར། དམངས་སེམས་གཅིག་མཐུན་བཅས་ཡོང་བའི་འབད་བརྩོན་བྱེད་པ་དང་། རྒྱལ་སྤྱིའི་མཉམ་ལས་ཀྱི་ལས་སྟེགས་གསར་པ་བསྐྲུན་ཏེ། ཐུན་མོང་ཐོག་འཕེལ་རྒྱས་གཏོང་བའི་སྒུལ་ཤུགས་གསར་པ་བསྣན་དགོས། དར་རྒྱས་འགྲོ་བཞིན་པའི་རྒྱལ་ཁབ་དང་ལྷག་པར་དུ་དར་རྒྱས་ཞན་ཤོས་ཀྱི་རྒྱལ་ཁབ་ལ་རོགས་སྐྱོར་བྱེད་ཤུགས་ཇེ་ཆེར་བཏང་སྟེ། ལྷོ་བྱང་འཕེལ་རྒྱས་ཀྱི་ཧེ་བག་ཇེ་ཆུང་དུ་འགྲོ་བར་བྱེད་དགོས།

ཀྲུང་གོས་ཕྱོགས་མང་ཉོ་འཚོང་སྒྲིག་སྲོལ་ལ་རྒྱབ་སྐྱོར་བྱས་ཏེ། རང་མོས་ཉོ་འཚོང་ཁུལ་འཛུགས་སྐྲུན་བྱེད་པར་སྐུལ་འདེད་གཏོང་བ་དང་། སྒོ་འབྱེད་ཅན་གྱི་འཛམ་གླིང་གི་དཔལ་འབྱོར་འཛུགས་སྐྲུན་བྱེད་པར་སྐུལ་འདེད་གཏོང་རྒྱུ་ཡིན། ཀྲུང་གོས་མཉམ་གྲོས་མཉམ་སྐྲུན་མཉམ་སྤྱོད་བཅས་ཀྱི་གོ་ལ་ཧྲིལ་པོ་བཅོས་སྐྱོང་གི་ལྟ་བ་རྒྱུན་འཛིན་བྱེད་པ་དང་། དམངས་གཙོ་ཅན་གྱི་རྒྱལ་སྤྱིའི་འབྲེལ་བ་དར་སྤེལ་གཏོང་བ་དང་། རྒྱལ་ཁབ་དག་ལ་ཆེ་ཆུང་དང་། དྲག་ཞན། དབུལ་ཕྱུག་བཅས་ཀྱི་ཁྱད་པར་མི་འབྱེད་པར་ཚང་མ་འདྲ་མཉམ་ཡིན་པ་མཐའ་འཁྱོངས་བྱེད་ཅིང་། མཉམ་འབྲེལ་རྒྱལ་ཚོགས་ཀྱིས་དགེ་མཚན་ལྡན་པའི་ནུས་པ་འདོན་པར་རྒྱབ་སྐྱོར་བྱེད་པ་དང་། རྒྱལ་སྤྱིའི་ལས་དོན་ཁྲོད་དུ་དར་རྒྱས་འགྲོ་བཞིན་པའི་རྒྱལ་ཁབ་ཀྱི་འཐུས་ཚབ་རང་བཞིན་དང་གཏམ་དབང་ཇེ་ཆེར་གཏོང་བར་རྒྱབ་སྐྱོར་བྱེད་ཀྱི་ཡོད། ཀྲུང་གོས་འགན་འཁྲི་འཁུར་བའི་རྒྱལ་ཁབ་ཆེན་པོའི་ནུས་པ་མུ་མཐུད་དུ་བཏོན་ཏེ། གོ་ལ་ཧྲིལ་པོའི་བཅོས་སྐྱོང་མ་ལག་སྒྱུར་བཅོས་དང་འཛུགས་སྐྲུན་བྱེད་པར་ཧུར་ཐག་ངང་ཐེ་ཞུགས་བྱེད་པ་དང་། ཀྲུང་གོའི་བློ་གྲོས་དང་སྟོབས་ཤུགས་རྒྱུན་མ་ཆད་པར་འབུལ་རྒྱུ་ཡིན།

བློ་མཐུན་རྣམ་པ། འཛམ་གླིང་གི་ལས་དབང་ནི་རྒྱལ་ཁབ་ཁག་གི་མི་དམངས་ཀྱི་ལག་ཏུ་ཡོད་ལ། མིའི་རིགས་ཀྱི་མདུན་ལམ་ནི་རྒྱལ་ཁབ་ཁག་གི་མི་དམངས་ཀྱི་གདམ་གར་རག་ལས་ཡོད། ཀྲུང་གོའི་མི་དམངས་ཀྱིས་རྒྱལ་ཁབ་ཁག་གི་མི་དམངས་དང་མཉམ་དུ། མིའི་རིགས་ཀྱི་ལས་དབང་གཅིག་པའི་ཚོགས་པ་འཛུགས་སྐྱོང་ལ་སྐུལ་སྤེལ་གཏོང་བ་དང་། ཐུན་མོང་ཐོག་མིའི་རིགས་ཀྱི་བདེ་སྐྱིད་ལྡན་པའི་མ་འོངས་པ་གཏོད་འདོད་ཡོད།

བཅུ་གསུམ། བློ་བརྟན་འགྱུར་མེད་ཀྱིས་ཕྱོགས་ཡོངས་ནས་ཏང་ནན་པོར་བསྐྱངས་ཏེ། ཏང་གི་སྲིད་སྐྱོང་ནུས་པ་དང་འགོ་ཁྲིད་ཀྱི་ཆུ་ཚད་རྒྱུན་མ་ཆད་པར་མཐོ་རུ་གཏོང་དགོས།

ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་འདི་དུས་རབས་གསར་པར་སླེབས་པས། ང་ཚོའི་ཏང་ལ་རྣམ་པ་གསར་པ་དང་བྱས་རྗེས་གསར་པ་ངེས་པར་ཡོད་དགོས། ལྕགས་རྡུང་བར་ཐོ་བ་ངེས་པར་མཁྲེགས་དགོས། ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་དེ་འཐབ་རྩོད་རླབས་པོ་ཆེ་བྱེད་པ་དང་། བྱ་གཞག་རླབས་པོ་ཆེར་སྐུལ་སྤེལ་གཏོང་བ། ཕུགས་འདུན་རླབས་པོ་ཆེ་མངོན་འགྱུར་བཅས་བྱེད་ན། ཏང་གི་འགོ་ཁྲིད་ངེས་པར་བློ་བརྟན་འགྱུར་མེད་ཀྱིས་མཐའ་འཁྱོངས་དང་འཐུས་ཚང་དུ་གཏོང་དགོས་པ་དང་། ཏང་སྔར་ལས་ཞུམ་མེད་སྟོབས་ལྡན་ཞིག་ཏུ་བློ་བརྟན་འགྱུར་མེད་ཀྱིས་འཛུགས་སྐྱོང་བྱེད་དགོས།

ཕྱོགས་ཡོངས་ནས་ཏང་ནན་པོར་སྐྱོང་བའི་ལས་ཀ་དེ་ནམ་ཡང་སྒྲུབ་བཞིན་པའི་ལམ་ན་ཡོད། སྲིད་ཏང་ཞིག་དང་། སྲིད་དབང་ཞིག་གི་མདུན་ལམ་དང་ལས་དབང་ནི་ཀུན་གྱིས་བློ་ཕྱོགས་གཏད་མིན་ལ་རག་ལས་པ་ཡིན། མི་དམངས་མང་ཚོགས་ཀྱིས་ངོ་རྒོལ་དང་ཞེ་སྡང་བྱེད་ཡུལ་གང་ཡིན་པ་དེར་ང་ཚོས་དོགས་ཟོན་དང་ཡོ་བསྲང་མཐའ་གཅིག་ཏུ་བྱེད་དགོས། ང་ཚོའི་ཏང་གི་མདུན་དུ་ལྷགས་པའི་སྲིད་སྐྱོང་གི་ཁོར་ཡུག་རྙོག་འཛིང་ཡིན་ལ། ཏང་གི་སྔོན་ཐོན་རང་བཞིན་ལ་གནོད་པ་དང་། ཏང་གི་ལྷད་མེད་རང་བཞིན་ཇེ་ཞན་དུ་གཏོང་བའི་རྒྱུ་རྐྱེན་ཡང་རྙོག་འཛིང་ཡིན་པ། ཏང་ནང་ཁུལ་དུ་བསམ་བློ་དང་། རྩ་འཛུགས། སྤྱོད་ཚུལ་གསུམ་མི་གཙང་བའི་གནད་དོན་འབུར་དུ་ཐོན་པའང་རྩ་བ་ནས་ཐག་གཅོད་ཐུབ་མེད་པ། ཏང་གི་མདུན་དུ་ལྷགས་པའི་སྲིད་སྐྱོང་གི་ཉམས་སད་དང་། སྒྱུར་བཅོས་སྒོ་འབྱེད་ཀྱི་ཉམས་སད། ཚོང་རའི་དཔལ་འབྱོར་གྱི་ཉམས་སད། ཕྱིའི་ཁོར་ཡུག་གི་ཉམས་སད་བཅས་ཀྱི་ཡུན་རིང་རང་བཞིན་དང་རྙོག་འཛིང་རང་བཞིན་ལ་ངོས་འཛིན་ཟབ་མོ་ཐུབ་པར་བྱེད་དགོས་པ་དང་། ཏང་གི་མདུན་དུ་ལྷགས་པའི་བསམ་པ་རྣམ་གཡེང་གི་ཉེན་ཁ་དང་། འཇོན་ནུས་མི་འདང་བའི་ཉེན་ཁ། མང་ཚོགས་དང་ཁ་བྲལ་བའི་ཉེན་ཁ། སྒྱིད་ལུག་རུལ་སུངས་སུ་འགྱུར་བའི་ཉེན་ཁ་བཅས་ཀྱི་རྣོ་ངར་ཆེ་བའི་རང་བཞིན་དང་ཛ་དྲག་ཆེ་བའི་རང་བཞིན་ངོས་འཛིན་གཏིང་ཟབ་ཐུབ་པར་དགོས་ཤིང་། གནད་དོན་འཛིན་ཕྱོགས་མཐའ་འཁྱོངས་དང་། འཐབ་ཇུས་ངེས་ཤུགས་རྒྱུན་འཁྱོངས་བྱས་ཏེ། ཕྱོགས་ཡོངས་ནས་ཏང་ནན་པོར་སྐྱོང་བ་འདི་འཕེལ་རྒྱས་གཏིང་ཟབ་འགྲོ་རྒྱུར་སྐུལ་འདེད་གཏོང་དགོས།

དུས་རབས་གསར་པར་ཏང་ལེགས་སྐྱོང་བྱེད་པའི་སྤྱིའི་བླང་བྱ་ནི། ཏང་གིས་ཕྱོགས་ཡོངས་ནས་འགོ་ཁྲིད་བྱེད་རྒྱུ་མཐའ་འཁྱོངས་དང་འགོ་ཁྲིད་བྱེད་ཤུགས་ཆེ་རུ་གཏོང་བ་དང་། ཏང་གིས་ཏང་ཉིད་དོ་དམ་དང་། ཕྱོགས་ཡོངས་ནས་ཏང་ནན་པོར་སྐྱོང་བ་མཐའ་འཁྱོངས་བྱས་ཏེ། སྲིད་ཡུན་རིང་སྐྱོང་བའི་ཏང་གི་ནུས་པ་ཆེ་རུ་གཏོང་བ་དང་། སྔོན་ཐོན་རང་བཞིན་དང་དྭངས་གཙང་རང་བཞིན་ལེགས་སྐྱོང་བྱེད་ཤུགས་ཆེ་རུ་གཏོང་བ་གཙོ་གནད་དུ་འཛིན་པ་དང་། ཏང་གི་ཆབ་སྲིད་ལེགས་སྐྱོང་བྱ་རྒྱུ་གཙོ་རྐང་དུ་འཛིན་པ། ཕུགས་འདུན་དང་དད་སེམས་འགྱུར་མེད་བརྟན་པོ་ཡོང་བར་བྱེད་པའི་དམིགས་ཡུལ་གཞི་རྩར་འཛིན་པ། ཏང་ཡོངས་ཀྱི་ཧུར་སེམས་དང་རང་འགུལ་རང་བཞིན། གསར་གཏོད་རང་བཞིན་བཅས་སྐུལ་སློང་བྱེད་རྒྱུ་ཤུགས་འདོན་སར་བྱས་ཏེ། ཏང་གི་ཆབ་སྲིད་ལེགས་སྐྱོང་དང་། བསམ་བློ་ལེགས་སྐྱོང་། རྩ་འཛུགས་ལེགས་སྐྱོང་། ཀུན་སྤྱོད་ལེགས་སྐྱོང་། སྒྲིག་ཁྲིམས་སྲུང་སྐྱོང་བཅས་ཕྱོགས་ཡོངས་ནས་སྐུལ་སྤེལ་གཏོང་བ་དང་། ལམ་ལུགས་འཛུགས་སྐྱོང་བྱེད་རྒྱུ་འདི་དེ་དག་གི་ཁྲོད་དཀྱུས་གཅིག་ཏུ་ཁྱབ་པར་བྱས་ནས། རུལ་རྒོལ་གྱི་འཐབ་རྩོད་ལ་སྐུལ་སྤེལ་གཏིང་ཟབ་བྱེད་པ་དང་། ཏང་འཛུགས་སྐྱོང་གི་སྤུས་ཀ་རྒྱུན་མ་ཆད་པར་ཇེ་བཟང་དུ་བཏང་ནས། ཏང་འཛུགས་སྐྱོང་བྱེད་རྒྱུ་འདི་ཉིད་ཐོག་མཐའ་བར་གསུམ་དུ་དུས་རབས་ཀྱི་མདུན་གྲལ་དུ་བསྐྱོད་ཅིང་། མི་དམངས་ཀྱིས་སྙིང་ཐག་པ་ནས་བརྩི་བཀུར་ཞུ་བ་དང་། རང་ཉིད་གསར་བརྗེ་བྱེད་ཕོད་པ། དཀའ་ངལ་སྣ་ཚོགས་ཀྱི་ཉམས་སད་ཐེག་ཐུབ་པ། སྐྱེས་སྟོབས་ཀྱི་དཔལ་འབར་བ་བཅས་ཀྱི་མར་ཁེ་སི་རིང་ལུགས་ཀྱི་སྲིད་སྐྱོང་ཏང་ཞིག་ཏུ་འཛུགས་སྐྱོང་བྱེད་དགོས།

(གཅིག) ཏང་གི་ཆབ་སྲིད་ལེགས་སྐྱོང་བྱེད་པ་འདི་ཨང་དང་པོར་འཇོག་དགོས། ལྟ་བ་གསལ་སྟོན་གྱིས་ཆབ་སྲིད་ལ་དང་དོད་བྱེད་པ་ནི་རང་རེའི་ཏང་འདི་ཉིད་མར་ཁེ་སི་རིང་ལུགས་ཀྱི་སྲིད་ཏང་ཞིག་ཡིན་པའི་ཆ་ནས་རྩ་བའི་བླང་བྱ་ཡིན། ཏང་གི་ཆབ་སྲིད་ལེགས་སྐྱོང་ནི་ཏང་གི་རྩ་བའི་རང་བཞིན་གྱི་ལེགས་སྐྱོང་ཡིན་ཞིང་། ཏང་ལེགས་སྐྱོང་གི་ཁ་ཕྱོགས་དང་ཕན་འབྲས་གང་ཡོང་ལ་ཐུག་པ་ཡིན། ཏང་ཡོངས་ཀྱིས་ཀྲུང་དབྱང་ལ་བརྩི་སྲུང་ཞུ་བའི་འགན་ལེན་བྱེད་པ་དང་། ཏང་ཀྲུང་དབྱང་གི་དབང་གྲགས་དང་གཅིག་སྡུད་གཅིག་གྱུར་དུ་འགོ་ཁྲིད་མཐའ་འཁྱོངས་བྱེད་པ་ནི་ཏང་གི་ཆབ་སྲིད་འཛུགས་སྐྱོང་གི་ལས་འགན་གཙོ་བོ་ཡིན། ཏང་ཡོངས་ཀྱིས་ཏང་གི་ཆབ་སྲིད་ལམ་ཕྱོགས་ལག་ལེན་བརྟན་པོར་བྱེད་དགོས་པ་དང་། ཆབ་སྲིད་ཀྱི་སྒྲིག་ལམ་དང་ཆབ་སྲིད་ཀྱི་སྲོལ་ལུགས་ནན་པོར་བསྲུང་དགོས་ཤིང་། ཆབ་སྲིད་ཀྱི་ལངས་ཕྱོགས་དང་། ཆབ་སྲིད་ཀྱི་ཁ་ཕྱོགས། ཆབ་སྲིད་ཀྱི་རྩ་དོན། ཆབ་སྲིད་ཀྱི་བགྲོད་ལམ་བཅས་ཀྱི་ཐད་ནས་ཏང་ཀྲུང་དབྱང་དང་ཚད་མཐོའི་གཅིག་གྱུར་བྱེད་དགོས། ཏང་གི་སྒྲིག་ཡིག་ལ་གོང་བཀུར་དགོས་པ་དང་། གནས་བབ་གསར་པའི་འོག་ཏང་ནང་ཁུལ་གྱི་ཆབ་སྲིད་འཚོ་བའི་ཚད་གཞི་འགའ་ཞིག་ལག་བསྟར་ནན་པོར་བྱས་ཏེ། ཏང་ནང་ཁུལ་གྱི་ཆབ་སྲིད་འཚོ་བའི་ཆབ་སྲིད་རང་བཞིན་དང་། དུས་རབས་རང་བཞིན། རྩ་དོན་རང་བཞིན། འཐབ་འཛིང་རང་བཞིན་བཅས་ཆེ་རུ་བཏང་ནས། ཚོང་ཟོག་བརྗེ་རེས་ཀྱི་རྩ་དོན་གྱིས་ཏང་ནང་ཁུལ་གྱི་འཚོ་བར་བསླད་སྐྱོན་ཐེབས་ཚུལ་རང་འགུལ་ངང་ནས་བཀག་འགོག་བྱས་ནས། སྲོལ་བཟང་སྤྱོད་བཟང་གི་ཆབ་སྲིད་སྐྱེ་ཁམས་བཟང་པོ་ཞིག་སྐྲུན་དགོས། དམངས་གཙོ་གཅིག་སྡུད་ལམ་ལུགས་ཀྱི་ལམ་ལུགས་ཁག་འཐུས་ཚང་དང་དོན་འཁྱོལ་བྱེད་པ་དང་། དམངས་གཙོ་གཞིར་བྱས་པའི་གཅིག་སྡུད་དང་གཅིག་སྡུད་དུ་སློབ་སྟོན་བྱེད་པའི་དམངས་གཙོ་ཟུང་འབྲེལ་མཐའ་འཁྱོངས་བྱས་ཏེ། དམངས་གཙོ་དར་སྤེལ་གང་ལེགས་གཏོང་དགོས་ལ། གཅིག་སྡུད་དང་གཅིག་གྱུར་ཀྱང་མཁས་པོར་བྱེད་དགོས། བློ་དཀར་ཟོལ་མེད་དང་། གཞུང་དྲང་ཚུལ་མཐུན། དངོས་ཐོག་བདེན་འཚོལ། སྲིད་བརྩོན་སྤྱོད་གཙང་སོགས་ཀྱི་རིན་ཐང་ལྟ་བ་དར་སྤེལ་གཏོང་དགོས་ཤིང་། རང་དོན་རིང་ལུགས་དང་། ཁ་ཐོར་རིང་ལུགས། རང་མོས་རིང་ལུགས། རང་གཅེས་རིང་ལུགས། མི་བཟང་རིང་ལུགས་བཅས་སྔོན་འགོག་དང་ངོ་རྒོལ་མཐའ་གཅིག་ཏུ་བྱེད་དགོས་པ་དང་། ཕྱོགས་རིས་རིང་ལུགས་དང་། ཤོག་ཁའི་རིག་གནས། གྲུ་ཁའི་རིག་གནས་བཅས་སྔོན་འགོག་དང་ངོ་རྒོལ་མཐའ་གཅིག་ཏུ་བྱེད་དགོས་པ་དང་། ཌ་རུ་མགོ་དང་མགོ་གཉིས་མར་ངོ་རྒོལ་མཐའ་གཅིག་ཏུ་བྱེད་དགོས། ཏང་ཡོངས་ཀྱི་བློ་མཐུན་དང་ལྷག་པར་དུ་མཐོ་རིམ་ལས་བྱེད་པས་ཏང་གཤིས་སྦྱོང་བརྡར་བྱེད་ཤུགས་ཆེ་རུ་བཏང་ནས། ཆབ་སྲིད་གོ་རྟོགས་དང་ཆབ་སྲིད་ནུས་པ་རྒྱུན་ཆད་མེད་པར་ཇེ་ཆེར་གཏོང་བ་དང་། ཏང་ལ་བློ་དཀར་ཞིང་། ཏང་གི་དཀའ་ངལ་སེལ་རོགས་དང་། ཏང་དོན་དུ་རང་འགན་གཙང་སྒྲུབ། དམངས་དོན་དུ་བདེ་སྐྱིད་སྐྲུན་པ་བཅས་ཆབ་སྲིད་ཀྱི་འགན་ཁུར་རྩ་བར་བརྩིས་ཏེ། གུང་ཁྲན་ཏང་མིའི་ཆབ་སྲིད་ཀྱི་རང་མདངས་ཉམས་མེད་བསྲུང་དགོས།

(གཉིས) དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་བསམ་བློས་ཏང་ཡོངས་ལ་དྲག་ཆས་སྤྲོས་དགོས། བསམ་བློ་ལེགས་པར་སྐྱོང་བ་ནི་ཏང་གི་རྨང་གཞིའི་རང་བཞིན་གྱི་འཛུགས་སྐྱོང་ཡིན། གསར་བརྗེའི་ཕུགས་བསམ་དགུང་སྔོན་དབྱིངས་ལས་མཐོ། གུང་ཁྲན་རིང་ལུགས་ཀྱི་ཕུགས་བསམ་ཆེན་མོ་དང་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཐུན་མོང་ཕུགས་བསམ་ནི། ཀྲུང་གོའི་གུང་ཁྲན་ཏང་མིའི་བསམ་པའི་བརྟེན་གཞི་དང་ཆབ་སྲིད་ཀྱི་བླ་སྲོག་ཡིན་ལ། ཏང་གི་མཐུན་སྒྲིལ་གཅིག་གྱུར་རྒྱུན་འཁྱོངས་བྱེད་པའི་བསམ་བློའི་རྨང་གཞིའང་ཡིན། ཕུགས་བསམ་དང་དད་སེམས་བརྟན་པོར་འཆང་བ་དེ་ཏང་གི་བསམ་བློ་ལེགས་སྐྱོང་གི་ལས་འགན་གཙོ་བོར་བཟུང་སྟེ། ཏང་ཡོངས་ལ་ཏང་གི་དམིགས་ཡུལ་བློ་ལ་བརྟན་པོར་ངེས་རྒྱུའི་སློབ་གསོ་དང་སྣེ་ཁྲིད་བྱེད་པ་དང་། གུང་ཁྲན་ཏང་མིའི་བསམ་པའི་སྒལ་རུས་འདྲོང་བར་བྱས་ཐོག འཇིག་རྟེན་ལྟ་བ་དང་། མི་ཚེའི་ལྟ་བ། རིན་ཐང་ལྟ་བ་བཅས་ཀྱི“གཅུས་ཕུར་གཙོ་བོ”ལྟ་བུའི་གནད་དོན་ཐག་གཅོད་ལེགས་པར་བྱས་ནས། གུང་ཁྲན་རིང་ལུགས་ཀྱི་ཕུགས་བསམ་ཆེན་མོ་དང་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཐུན་མོང་ཕུགས་བསམ་གཡོ་མེད་ཀྱི་དད་མོས་མཁན་དང་བློ་དཀར་གྱི་ལག་བསྟར་མཁན་རང་རྟོགས་ངང་ནས་བྱེད་དགོས། མར་ཁེ་སི་རིང་ལུགས་ཀྱི་སློབ་སྲོལ་དར་སྤེལ་དང་། “སློབ་སྦྱོང་གཉིས་དང་ཚད་ལོན་གཅིག”སློབ་སྦྱོང་དང་སློབ་གསོ་རྒྱུན་རྣམ་ཅན་དང་ལམ་ལུགས་ཅན་དུ་འགྱུར་བར་བྱེད་པར། རྫོང་དང་ཁྲུའུ་རིམ་པ་ཡན་གྱི་འགོ་ཁྲིད་ལས་བྱེད་པ་གཙོ་བོར་བཟུང་སྟེ། ཏང་ཡོངས་སུ“ཐོག་མའི་བསམ་འདུན་མ་བརྗེད་པར། འགན་འཁྲི་ཡིད་ལ་བརྟན་པོར་འཆང་”ཞེས་པ་བརྗོད་གཞི་གཙོ་བོར་འཛིན་པའི་སློབ་གསོ་སྤེལ་ནས། ཏང་གི་རིགས་པའི་གཞུང་ལུགས་གསར་དུ་གཏོད་པར་བརྟེན་ནས་བསམ་བློར་དྲག་ཆས་སྤྲས་ཏེ། ཏང་ཡོངས་ཀྱིས་དུས་རབས་གསར་པར་ཏང་གི་ལོ་རྒྱུས་ཀྱི་ལས་འགན་མངོན་འགྱུར་ཡོང་བར་རང་རྟོགས་སྔར་ལས་ཆེ་བའི་ཐོག་ནས་འབད་བརྩོན་ལྷོད་མེད་བྱེད་དགོས།

(གསུམ) བྱང་ཚད་མཐོ་ཞིང་ཆེད་ལས་ཅན་དུ་འགྱུར་བའི་ལས་བྱེད་པའི་དཔུང་ཁག་འཛུགས་སྐྱོང་བྱེད་དགོས། ཏང་གི་ལས་བྱེད་པ་ནི་ཏང་དང་རྒྱལ་ཁབ་ཀྱི་བྱ་གཞག་གི་རྐང་བྱེད་སྟོབས་ཤུགས་ཤིག་ཡིན། ཏང་གིས་ལས་བྱེད་པར་དོ་དམ་བྱེད་པའི་རྩ་དོན་མཐའ་འཁྱོངས་དང་། སྤྱོད་ཡོན་གཉིས་ལྡན་དང་སྤྱོད་ཚུལ་གཙོ་བོར་འཛིན་རྒྱུ་མཐའ་འཁྱོངས། ཕྱོགས་བཞི་མཚམས་བརྒྱད་ནས་ཡོང་བའི་སྤྱོད་ཡོན་གཉིས་ལྡན་གྱི་མི་དང་མཛངས་མི་ཁོ་ན་བསྐོ་གཞག་བྱ་རྒྱུ་མཐའ་འཁྱོངས། བྱ་གཞག་གོང་དུ་བཀུར་བ་དང་གཞུང་དྲང་ཚུལ་མཐུན་བྱ་རྒྱུ་མཐའ་འཁྱོངས་བཅས་བྱས་ཏེ་ལས་བྱེད་པ་བཟང་པོའི་ཚད་གཞི་དོན་ཐོག་ཏུ་འཁྱོལ་བར་བྱེད་དགོས། མི་སྣ་འདེམས་སྤྱོད་ཀྱི་ཁྲིད་ཕྱོགས་ཡང་དག་མཐའ་འཁྱོངས་བྱས་ནས། མི་སྣ་འདེམས་སྤྱོད་ཀྱི་དར་སྲོལ་ལེགས་སུ་གཏོང་བ་དང་། ཆབ་སྲིད་ཀྱི་ཚད་གཞི་འབུར་ཐོན་ཡོང་བར་བྱེད་པ། “འདུ་ཤེས་བཞི”དང་“གདེང་ཚོད་བཞི”བརྟན་པོར་འཆང་བ་དང་། ཏང་ཀྲུང་དབྱང་གི་དབང་གྲགས་སྲུང་སྐྱོང་མཐའ་གཅིག་ཏུ་བྱེད་པ། ཏང་གི་རིགས་པའི་གཞུང་ལུགས་དང་ལམ་ཕྱོགས། བྱེད་ཕྱོགས། སྲིད་ཇུས་བཅས་ཕྱོགས་ཡོངས་ནས་ལག་ལེན་མཐར་ཕྱིན་བསྟར་བ། ལྷག་བསམ་དཀར་ཞིང་སྤྱོད་པ་གཙང་བ། འགན་ཁུར་ཕོད་པ་བཅས་ཀྱི་ལས་བྱེད་པ་གནས་སྤོར་དང་གལ་གནད་ཆེ་སར་བསྐོ་གཞག་བྱེད་པ། འགོ་ཁྲིད་ཚན་པ་རིམ་པ་ཁག་ལེགས་འདེམས་ཧྲག་སྒྲིག་བྱེད་དགོས། ཆེད་ལས་ཀྱི་ནུས་པ་དང་ཆེད་ལས་ཀྱི་སྙིང་སྟོབས་སྐྱེད་སྲིང་བྱ་རྒྱུར་མཐོང་ཆེན་བྱས་ཏེ། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་འཕེལ་རྒྱས་གཏོང་བའི་བླང་བྱ་དང་འཚམ་པར་བྱེད་པའི་ལས་བྱེད་པའི་དཔུང་ཁག་གི་ནུས་པ་ཆེ་རུ་གཏོང་དགོས། ན་གཞོན་ལས་བྱེད་པ་འཚོལ་བསྡུ་ཤུགས་ཆེན་བྱས་ནས་གཞི་རིམ་གྱི་ལས་ཡུལ་དངོས་དང་དཀའ་ངལ་དང་དཀའ་ཚེགས་ཆེ་ཁུལ་དུ་ན་གཞོན་ལས་བྱེད་པ་གསོ་སྐྱོང་དང་སྦྱོང་བརྡར་བྱ་རྒྱུར་མཐོང་ཆེན་བྱས་ཏེ། ལག་ལེན་ནང་ཉམས་སད་ཐེག་པའི་ཕུལ་བྱུང་ན་གཞོན་ལས་བྱེད་པ་རྒྱུན་ཆད་མེད་པར་འདེམས་སྤྱོད་བྱེད་དགོས། བུད་མེད་ལས་བྱེད་པ་དང་། གྲངས་ཉུང་མི་རིགས་ལས་བྱེད་པ། ཏང་ཕྱིའི་ལས་བྱེད་པ་བཅས་གསོ་སྐྱོང་དང་འདེམས་སྒྲུག་གི་ལས་དོན་གཅིག་གྱུར་འཆར་འགོད་ཀྱིས་ཡག་པོར་བསྒྲུབ་དགོས། ལས་བྲལ་དང་ལས་འཁྱུར་ངལ་གསོ་བརྒྱབ་པའི་ལས་བྱེད་པའི་ལས་དོན་ནན་ཏན་ངང་ཡག་པོར་བསྒྲུབ་དགོས། དོ་དམ་ནན་པོ་དང་ལྟ་སྐྱོང་ཟུང་འབྲེལ་དང་སྐུལ་ལྕག་དང་གཅུན་འདོམས་གལ་ཆེ་མཉམ་དུ་འཛིན་རྒྱུ་མཐའ་འཁྱོངས་བྱེད་པ་དང་། ལས་བྱེད་པར་དཔྱད་ཞིབ་གདེང་འཇོག་བྱེད་པའི་ལམ་སྲོལ་འཐུས་སྒོ་ཚང་དུ་གཏོང་བ། སྐུལ་ལྕག་ལམ་སྲོལ་དང་ནོར་འཛོལ་རུང་ལ་ནོར་འཁྲུལ་ཡོ་བསྲང་གི་ལམ་སྲོལ་འཛུགས་པ་བཅས་བྱས་ནས་འགན་ཁུར་ཕོད་པ་དང་། ལས་དོན་ཏན་ཏིག་ངང་སྒྲུབ་པ། སྒེར་དོན་མི་གཉེར་བ་བཅས་ཀྱི་ལས་བྱེད་པ་རྣམས་ལ་ལྟ་བ་གསལ་སྟོན་གྱིས་རྒྱབ་སྐྱོར་བྱེད་ཤུགས་ཆེ་རུ་ གཏོང་དགོས། ཏང་རྩ་འཛུགས་རིམ་པ་ཁག་གིས་གཞི་རིམ་གྱི་ལས་བྱེད་པར་སེམས་ཁུར་དང་གཅེས་སྐྱོང་བྱས་ཏེ་རང་འགུལ་ངང་ཁོང་ཚོའི་སེམས་ཁྲལ་དང་དཀའ་ངལ་སེལ་རོགས་བྱེད་དགོས།

ཤེས་ལྡན་མི་སྣ་ནི་མི་རིགས་དར་རྒྱས་ཡོང་བར་བྱེད་པ་དང་རྒྱལ་སྤྱིའི་འགྲན་རྩོད་དུ་རང་འགུལ་དབང་ཆ་ཐོབ་པར་བྱེད་པའི་འཐབ་ཇུས་ཀྱི་འབྱུང་གཞི་ཡིན་པས། ཏང་གིས་ཤེས་ལྡན་མི་སྣར་དོ་དམ་བྱེད་པའི་རྩ་དོན་མཐའ་འཁྱོངས་བྱས་ཏེ་གནམ་འོག་གི་ཤེས་ཡོན་རྨད་བྱུང་ཅན་བསྡུས་ནས་སྤྱོད་པ་དང་། ཤེས་ལྡན་མི་སྣར་བརྟེན་པའི་རྒྱལ་ཁབ་སྟོབས་ཆེན་འཛུགས་སྐྲུན་གང་མགྱོ གས་བྱེད་དགོས། ཤེས་ལྡན་མི་སྣའི་སྲིད་ཇུས་དགེ་མཚན་སྔར་ལས་ཆེ་བ་དང་། སྒོ་མོ་ཇེ་ཆེར་ཕྱེ་བ། ཕན་ནུས་སྔར་ལས་ཆེ་བ་བཅས་ལག་ལེན་བསྟར་ནས། ཤེས་ལྡན་པ་རྟོགས་པའི་བློ་རིག་དང་། ཤེས་ལྡན་པར་གཅེས་པའི་གཞུང་སེམས་དྲང་པོ། ཤེས་ལྡན་པ་སྤྱོད་པའི་བློ་ཁོག ཤེས་ལྡན་པ་དང་འདྲིས་པའི་བློ་རྒྱ། ཤེས་ལྡན་པ་འདུ་བའི་ཐབས་མཆོག་བཅས་ལ་བརྟེན་ནས་ཏང་ཕྱི་ནང་དང་རྒྱལ་ཁབ་ཕྱི་ནང་གི་ཕྱོགས་གང་ཅིའི་ཤེས་ལྡན་པ་ཕུལ་བྱུང་ཏང་དང་མི་དམངས་ཀྱི་འཐབ་རྩོད་རླབས་པོ་ཆེའི་ནང་འདུ་བར་བྱེད་པ་དང་། ཤེས་ལྡན་མི་སྣ་བས་མཐའི་དབུལ་ཕོངས་ས་ཁུལ་དང་། མཐའ་མཚམས་ཀྱི་མི་རིགས་ས་ཁུལ། གསར་བརྗེའི་གནས་ཁུལ་རྙིང་པ། གཞི་རིམ་གྱི་འཐབ་ཕྱོགས་དང་པོ་བཅས་སུ་སྐྱོད་པར་སྐུལ་ལྕག་དང་ཁྲིད་སྟོན་བྱས་ནས། མི་ཚང་མ་འཇོན་ཐང་ཅན་དུ་འགྱུར་འདོད་ཡོད་པ་དང་། མི་ཚང་མས་འཇོན་ཐང་ཅན་དུ་འགྱུར་བར་འབད་པ། མི་ཚང་མ་འཇོན་ཐང་ཅན་དུ་འགྱུར་ཐུབ་པ། མི་ཚང་མས་འཇོན་ཐང་ངོམ་ཐུབ་པ་བཅས་ཀྱི་རྣམ་པ་བཟང་པོ་ཞིག་ཆགས་པར་བྱས་ཐོག ལས་རིགས་ཁག་གི་ཤེས་ལྡན་མི་སྣའི་གསར་སྐྲུན་གྱི་གསོན་ཤུགས་གཅིག་རྗེས་གཉིས་མཐུད་དུ་འདོན་པ་དང་། སྤྱང་གྲུང་དང་བློ་རིག་ཡོད་ཚད་འདོན་དུ་འཇུག་དགོས།

(བཞི) གཞི་རིམ་གྱི་རྩ་འཛུགས་འཛུགས་སྐྱོང་བྱེད་ཤུགས་ཆེ་རུ་གཏོང་དགོས། ཏང་གི་གཞི་རིམ་རྩ་འཛུགས་ནི་ཏང་གི་ལམ་ཕྱོགས་དང་། བྱེད་ཕྱོགས། སྲིད་ཇུས་དང་། ཐབས་ཇུས་བཀོད་སྒྲིག་ལག་བསྟར་དོན་འཁྱོལ་འགན་ལེན་ཏན་ཏིག་བྱེད་པའི་རྨང་གཞི་ཡིན་པས། རྩ་འཛུགས་བྱེད་ཤུགས་ཆེ་རུ་གཏོང་རྒྱུ་གཙོ་གནད་དུ་བཟུང་ནས་ཆབ་སྲིད་ཀྱི་ཕན་ནུས་མངོན་གསལ་དོད་པོ་ཡོང་བར་བྱེད་པ་དང་། ཁེ་ལས་དང་། གྲོང་གསེབ། ལས་ཁུངས། སློབ་གྲྭ ཚན་རིག་ཞིབ་འཇུག་ཁང་། ཁྲོམ་གཞུང་གི་སྡེ་ཁུལ། སྤྱི་ཚོགས་ཀྱི་རྩ་འཛུགས་སོགས་པའི་གཞི་རིམ་གྱི་ཏང་རྩ་འཛུགས་དེ་དག་ཏང་གི་འདོད་ཚུལ་དྲིལ་སྒྲོག་དང་། ཏང་གི་གྲོས་ཆོད་ལག་བསྟར། གཞི་རིམ་བཅོས་སྐྱོང་གི་འགོ་ཁྲིད། མང་ཚོགས་ལ་མཐུན་སྒྲིལ་དང་སྐུལ་སློང་། སྒྱུར་བཅོས་འཕེལ་རྒྱས་ལ་སྐུལ་འདེད་གཏོང་བ་བཅས་ཀྱི་འཐབ་འཛིང་གི་བཙན་རྫོང་ཞིག་ཏུ་སྐྲུན་དགོས། ཏང་ཀྲི་པུའུ་ཡིས་ཏང་ཡོན་ལ་སློབ་གསོ་རྒྱག་པ་དང་། ཏང་ཡོན་ལ་དོ་དམ། ཏང་ཡོན་ལ་ལྟ་སྐུལ། དེ་བཞིན་མང་ཚོགས་སྒྲིག་འཛུགས་དང་། མང་ཚོགས་ལ་དྲིལ་སྒྲོག མང་ཚོགས་གོང་བུར་བསྒྲིལ་བ། མང་ཚོགས་ལ་ཞབས་འདེགས་ཞུ་བ་བཅས་ཀྱི་ཐད་ཀའི་འགན་འཁྲི་ཡག་པོར་ཁུར་ནས། རྒྱ་ཆེའི་ཏང་ཡོན་རྣམས་ལ་གདོང་ལེན་དཔེ་བཟང་གི་ནུས་པ་འདོན་སྤེལ་བྱ་རྒྱུའི་ཁྲིད་སྟོན་བྱེད་དགོས། “ཚོགས་འདུ་གསུམ་དང་སློབ་ཚན་གཅིག”གི་ལམ་ལུགས་མཐའ་འཁྱོངས་བྱས་ཏེ་ཏང་གི་གཞི་རིམ་རྩ་འཛུགས་སྒྲིག་བཀོད་དང་བྱེད་སྒོ་སྤེལ་སྟངས་གསར་གཏོད་ལ་སྐུལ་འདེད་གཏོང་བ་དང་། གཞི་རིམ་ཏང་རྩ་འཛུགས་ཀྱི་སྣེ་ཁྲིད་པའི་དཔུང་ཁག་འཛུགས་སྐྱོང་བྱེད་ཤུགས་ཆེ་རུ་གཏོང་བ། གཞི་རིམ་ཏང་རྩ་འཛུགས་ཀྱི་ཁྱབ་རྒྱ་ཆེ་རུ་གཏོང་བ་བཅས་བྱས་ཏེ། གཞི་རིམ་ཏང་རྩ་འཛུགས་ཁ་ཤས་ཞན་འགྱུར་དང་དོན་སྟོང་། མཐར་ལུས་བཅས་ཀྱི་གནད་དོན་ཐག་གཅོད་གང་ཐུབ་བྱེད་དགོས། ཏང་ནང་ཁུལ་གྱི་གཞི་རིམ་དམངས་གཙོ་རྒྱ་ཆེར་གཏོང་བ་དང་། ཏང་དོན་ཡོངས་བསྒྲགས་ལ་སྐུལ་འདེད་བཏང་སྟེ་ཏང་ཡོན་ཏང་ནང་ཁུལ་གྱི་ལས་དོན་ལ་ཞུགས་པ་དང་། ཏང་རྩ་འཛུགས་དང་ལས་བྱེད་པར་ལྟ་སྐུལ་བྱེད་པ། གོང་རིམ་ཏང་རྩ་འཛུགས་ལ་བསམ་འཆར་དང་གྲོས་འགོ་འདོན་པ་བཅས་ཀྱི་ཐབས་ལམ་ཤར་བགྲོད་ཡོང་བར་བྱེད་དགོས། ཐོན་ལས་བཟོ་པ་དང་། ཞིང་པ་ན་གཞོན། ཤེས་ཡོན་ཆེ་བ་བཅས་ཀྱི་ཚོགས་སྤྱིའི་ཁྲོད་དང་། སྤྱི་དབང་མིན་པའི་ལམ་ལུགས་ཀྱི་དཔལ་འབྱོར་རྩ་འཛུགས་དང་། སྤྱི་ཚོགས་ཀྱི་རྩ་འཛུགས་ཁྲོད་ཏང་ཡོན་འཕེལ་རྒྱས་གཏོང་བར་མཐོང་ཆེན་བྱེད་དགོས། ཏང་ནང་ཁུལ་དུ་སྐུལ་ལྕག་དང་། སེམས་ཁུར། རོགས་སྐྱོར་བཅས་བྱེད་ཤུགས་ཆེ་རུ་གཏོང་དགོས། ཏང་ཡོན་ལ་སློབ་གསོ་དང་དོ་དམ་བྱེད་པའི་དམིགས་བྱ་ལྡན་པ་དང་ཕན་ནུས་ལྡན་ཤུགས་ཇེ་ཆེར་གཏོང་བ་དང་། ཚད་མ་ལོན་པའི་ཏང་ཡོན་ལ་རྩ་འཛུགས་ཀྱིས་ཐག་གཅོད་བྱེད་པའི་ལས་དོན་བརྟན་པོ་དང་གོ་རིམ་ལྡན་པའི་ངང་ནས་སྤེལ་དགོས།

(ལྔ) སྤྱོད་བཟང་སྒྲིག་ནན་རྒྱུན་འཁྱོངས་ལྷོད་མེད་བྱེད་དགོས། རང་རེའི་ཏང་ནི་མི་དམངས་ཁྲོད་ནས་བྱུང་བ་དང་། མི་དམངས་ཁྲོད་དུ་རྩ་བ་ཚུགས་པ། མི་དམངས་ལ་ཞབས་འདེགས་ཞུ་བ་བཅས་ཡིན་པས། མང་ཚོགས་དང་ཁ་བྲལ་ཕྱིན་གསོན་ཤུགས་བརླག་ངེས་རེད། ཀུན་སྤྱོད་འཛུགས་སྐྱོང་ལ་ཤུགས་སྣོན་རྒྱག་པར་ངེས་པར་དུ་ཏང་དང་མི་དམངས་མང་ཚོགས་དབར་གྱི་ཤ་རུས་ལྟ་བུའི་འབྲེལ་བ་རྒྱུན་འཁྱོངས་བྱ་རྒྱུར་རྩེ་གཅིག་ཏུ་དམིགས་ཏེ། མང་ཚོགས་ཀྱི་ལྟ་བ་དང་མང་ཚོགས་ཀྱི་བརྩེ་སེམས་ཟབ་ཏུ་བཏང་ནས་ཏང་གིས་སྲིད་སྐྱོང་བའི་མང་ཚོགས་ཀྱི་རྨང་གཞི་རྒྱུན་མི་ཆད་པར་ཟབ་ཏུ་གཏོང་དགོས། མང་ཚོགས་ཀྱིས་བསམ་འཆར་ཆེན་པོ་འདོན་པའི་གནད་དོན་ཡིན་ཕྱིན་སྒམ་ནན་ངང་ནས་བསྒྲུབ་དགོས་པ་དང་། མང་ཚོགས་ཀྱི་ཁེ་ཕན་ལ་གནོད་པའི་བྱ་སྤྱོད་ཡིན་ཕྱིན་ཡོ་བསྲང་མཐའ་གཅིག་ཏུ་བྱེད་དགོས། གོང་གིས་འོག་ལ་སྣེ་ཁྲིད་རྒྱུ་མཐའ་འཁྱོངས་བྱས་ཏེ་ཀྲུང་དབྱང་གི་གཏན་འབེབས་བརྒྱད་ཀྱི་དགོངས་དོན་གྱི་གྲུབ་འབྲས་སྲ་བརྟན་དང་། རྒྱ་སྐྱེད། དོན་འཁྱོལ་བཅས་བྱེད་པ་དང་། “སྤྱོད་ཚུལ་བཞི”ཡི་གནད་དོན་མུ་མཐུད་དུ་བཅོས་སྒྲིག་བྱས་ཏེ། ཁྱད་དབང་གི་བསམ་བློ་དང་ཁྱད་དབང་གི་སྣང་ཚུལ་ལ་ངོ་རྒོལ་མཐའ་གཅིག་ཏུ་བྱེད་དགོས། ཆབ་སྲིད་ཀྱི་སྒྲིག་ཁྲིམས་དང་རྩ་འཛུགས་ཀྱི་སྒྲིག་ཁྲིམས་གཙོ་གནད་ཐོག་ནན་དུ་བཏང་སྟེ་སྤྱོད་གཙང་གི་སྒྲིག་ཁྲིམས་དང་། མང་ཚོགས་ཀྱི་སྒྲིག་ཁྲིམས། ལས་ཀའི་སྒྲིག་ཁྲིམས། འཚོ་བའི་སྒྲིག་ཁྲིམས་བཅས་དམ་ནན་ཡོང་བའི་སྣེ་འཁྲིད་དགོས། སྐྱོན་བརྗོད་དང་རང་སྐྱོན་རང་བརྗོད་མཐའ་འཁྱོངས་དང་། སྔ་བསླབ་ཕྱི་འདོམས་དང་ནད་བཅོས་སྲོག་སྐྱོབ་མཐའ་འཁྱོངས། སྒྲིག་བསྟར་ལ་ལྟ་སྐུལ“རྣམ་པ་བཞི”ལ་བརྟེན་ཏེ་ཆུང་ངུ་དང་སྔ་ཙམ་ནས་དམ་འཛིན་དང་། མ་བྱུང་གོང་ནས་སྔོན་འགོག་བྱེད་དགོས། ལས་བྱེད་པར་དོ་དམ་བྱེད་དབང་ཡོད་པའི་ཏང་རྩ་འཛུགས་ལ་དེ་མཚུངས་སུ་སྒྲིག་ཁྲིམས་ཀྱི་ཆད་པ་གཅོད་དབང་སྤྲད་དེ་ལྟ་སྐུལ་སྒྲིག་སྲུང་གི་འགན་འཁྲི་རྩད་གཅོད་བྱེད་ཤུགས་ཆེ་རུ་གཏོང་དགོས། སྒྲིག་ཁྲིམས་ཀྱི་སློབ་གསོ་རྒྱག་ཤུགས་ཆེ་རུ་གཏོང་བ་དང་། སྒྲིག་ཁྲིམས་ལག་བསྟར་བྱེད་ཤུགས་ཆེ་རུ་བཏང་ནས་ཏང་ཡོན་དང་། ལས་བྱེད་པ་རྣམས་ལ་འཇིགས་བཀུར་ཤེས་པ་དང་། དོགས་ཟོན་ལྡན་པ། གཞི་ཐིག་བརྟན་སྲུང་བཅས་བྱེད་དུ་འཇུག་པ་དང་། ལྟ་སྐུལ་དང་གཅུན་འདོམས་ཀྱི་ཁོར་ཡུག་ཁྲོད་ལས་ཀ་བྱེད་པ་དང་འཚོ་བ་སྐྱེལ་བར་གོམས་སུ་འཇུག་དགོས།

(དྲུག)རུལ་སུངས་ལ་རྒོལ་བའི་འཐབ་རྩོད་ལ་ཟིལ་གྱིས་ནོན་པའི་རྒྱལ་ཁ་ལེན་དགོས། མི་དམངས་མང་ཚོགས་ཀྱིས་རུལ་སུངས་ཀྱི་སྣང་ཚུལ་ལ་ཞེ་སྡང་ཆེ་ཤོས་བྱེད་པ་ཡིན་ཞིང་། རུལ་སུངས་ནི་རང་རེའི་ཏང་ལ་འཕྲད་པའི་འགྲན་སློང་ཆེ་ཤོས་དེ་ཡིན། རུལ་སུངས་ལ་རྒོལ་བ་ནམ་ཡང་སྒྲུབ་བཞིན་པའི་ལམ་ཁར་ཡོད་པའི་བློ་རྩ་བརྟན་པོ་དང་སྙིང་རུས་ཆེན་པོས། རྩ་ལག་མཉམ་བཅོས་ཟབ་ཏུ་སྤེལ་ནས། ལས་བྱེད་པ་སྤྱོད་གཙང་དང་། སྲིད་གཞུང་གཙང་སྐྱོང་། ཆབ་སྲིད་དྭངས་གཙང་བཅས་ཀྱི་འགན་ལེན་བྱས་ཚེ། ད་གཟོད་ལོ་རྒྱུས་ཀྱི་རེས་འཁོར་དུས་ཡུན་གྱི་ཚད་ལས་ཐོན་ཏེ། ཏང་དང་རྒྱལ་ཁབ་ཡུན་རིང་བདེ་བར་འགོད་པའི་འགན་ལེན་བྱེད་ཐུབ། དེང་སྐབས། རུལ་སུངས་ལ་རྒོལ་བའི་འཐབ་རྩོད་ཀྱི་གནས་བབ་སྔར་བཞིན་ཛ་དྲག་དང་རྙོག་འཛིང་ཆེ་བས། ཟིལ་གྱིས་མནན་ཚུལ་སྲ་བརྟན་དང་། ཟིལ་གནོན་ངང་ཚུལ་གྱི་རྒྱལ་ཁ་བརྩོན་ལེན་བྱེད་པའི་ཆོད་སེམས་ངེས་པར་དུ་གཡོ་མེད་བརྟན་པོར་ལྡན་དགོས། བཀག་སྡོམ་ཁུལ་མེད་པ་དང་། ཀུན་ལ་ཁྱབ་པ། བཟོད་སྒོམ་གཏན་ནས་མེད་པ་བཅས་མཐའ་འཁྱོངས་བྱེད་པ་དང་། བཀག་སྡོམ་གལ་ཆེན་དང་། མཐོ་གནོན་དྲག་པོ། ཡུན་རིང་ཟིལ་ཤུགས་བཅས་མཐའ་འཁྱོངས། ལྐོག་རྔན་ལེན་མཁན་དང་སྤྲོད་མཁན་མཉམ་དུ་རྩད་གཅོད་མཐའ་འཁྱོངས་བཅས་བྱས་ནས། ཏང་ནང་དུ་ཁེ་ཕན་གྱི་ཚོགས་ཁག་ཆགས་ཚུལ་བཀག་འགོག་མཐའ་གཅིག་ཏུ་བྱེད་དགོས། གྲོང་ཁྱེར་དང་རྫོང་གི་ཏང་ཨུད་དུ་སྐོར་དཔྱོད་ལམ་ལུགས་བཙུགས་ཏེ། མང་ཚོགས་ཀྱི་ཉེ་འཁོར་དུ་བྱུང་བའི་རུལ་སུངས་ཀྱི་སྣང་ཚུལ་བཅོས་སྐྱོང་བྱེད་ཤུགས་ཆེ་རུ་གཏོང་དགོས། རུལ་སུངས་པ་ཡུལ་གང་དུ་བྲོས་ཀྱང་ཚང་མ་བཟུང་སྟེ་ཁྲིམས་ལ་སྦྱོར་དགོས་པ་དང་། ཁྲིམས་ཀྱིས་གཅུན་དགོས། རུལ་སུངས་ལ་རྒོལ་བའི་རྒྱལ་ཁབ་ཀྱི་ཁྲིམས་འཛུགས་པར་སྐུལ་འདེད་གཏོང་བ་དང་། སྒྲིག་ཁྲིམས་ཞིབ་བཤེར་ལྟ་ཞིབ་མ་ལག་ཏུ་ཁེབས་པའི་ཉེས་འདོན་ཐེར་འདོན་ལས་སྟེགས་སྐྲུན་དགོས། རུལ་སུངས་མི་ཕོད་པའི་ཟིལ་ཤུགས་ཆེ་རུ་གཏོང་བ་དང་། རུལ་སུངས་མི་རུང་བའི་གཟེབ་མ་དམ་དུ་གཏོང་བ། རུལ་སུངས་མི་འདོད་པའི་རང་རྟོགས་ཇེ་ཆེར་གཏོང་བ་བཅས་བྱས་ནས། འབད་པ་ལྷོད་མེད་ཐོག་ནས་དུས་བདེ་ཞོད་འཇགས་དང་། གནམ་ས་གཡའ་དག་རྡུལ་དག་ཡོང་བར་བྱེད་དགོས།

(བདུན) ཏང་དང་རྒྱལ་ཁབ་ཀྱི་ལྟ་སྐུལ་མ་ལག་ཆ་ཚང་དུ་གཏོང་དགོས། ཏང་གི་རང་ངོས་གཙང་སྐྱོང་ནུས་པ་ཆེ་རུ་གཏོང་བའི་རྩ་བ་དེ་ཏང་གིས་རང་ཉིད་ལ་ལྟ་སྐུལ་དང་མང་ཚོགས་ཀྱིས་ལྟ་སྐུལ་བྱེད་ཤུགས་ཆེ་རུ་གཏོང་བར་བརྟེན་དགོས། དབང་ཆ་སྤྱོད་པར་ཚོད་འཛིན་དང་ལྟ་སྐུལ་བྱེད་ཤུགས་ཆེ་རུ་བཏང་སྟེ། མི་དམངས་ལ་དབང་ཆར་ལྟ་སྐུལ་བྱེད་དུ་འཇུག་པ་དང་། ཀུན་གྱིས་མཐོང་གསལ་དུ་དབང་ཆ་སྤྱོད་དུ་བཅུག་སྟེ། དབང་ཆ་ལམ་ལུགས་ཀྱི་གཟེབ་ཏུ་འཇུག་དགོས། གོང་ནས་འོག་ཏུ་རྩ་འཛུགས་ཀྱི་ལྟ་སྐུལ་བྱེད་ཤུགས་ཆེ་རུ་གཏོང་བ་དང་། འོག་ནས་གོང་དུ་དམངས་གཙོའི་ལྟ་སྐུལ་ལེགས་བཅོས་བྱེད་པ། རིམ་མཉམ་ལྟ་སྐུལ་བྱེད་རེས་ཀྱི་ནུས་པ་འདོན་སྤེལ་བྱེད་པ། ཏང་ཡོན་འགོ་ཁྲིད་ལས་བྱེད་པར་དུས་རྒྱུན་དུ་དོ་དམ་ལྟ་སྐུལ་བྱེད་ཤུགས་ཆེ་རུ་གཏོང་བ་བཅས་བྱེད་དགོས། ཆབ་སྲིད་ཀྱི་སྐོར་གཟིགས་ཟབ་སྤེལ་དང་། གནད་དོན་གསར་རྙེད་དང་། ཟིལ་ཤུགས་ཆགས་པར་གཡོ་འགུལ་མི་གཏོང་བ་མཐའ་འཁྱོངས་བྱས་ཏེ། སྐོར་གཟིགས་སྐོར་དཔྱོད་གོང་འོག་མཉམ་འགུལ་གྱི་ལྟ་སྐུལ་དྲ་སྦྲེལ་འཛུགས་དགོས། རྒྱལ་ཁབ་ཀྱི་ལྟ་ཞིབ་ལམ་ལུགས་སྒྱུར་བཅོས་ཟབ་ཏུ་སྤེལ་བ་དང་། ཚོད་ལྟའི་ལས་དོན་རྒྱལ་ཡོངས་སུ་སྤེལ་དགོས། རྒྱལ་ཁབ་དང་། ཞིང་ཆེན། གྲོང་ཁྱེར། རྫོང་བཅས་ཀྱི་ལྟ་ཞིབ་ཨུ་ཡོན་ལྷན་ཁང་བཙུགས་ནས། ཏང་གི་སྒྲིག་ཁྲིམས་ཞིབ་བཤེར་ལས་ཁུངས་དང་མཉམ་དུ་གཞུང་དོན་བསྒྲུབས་ཏེ། སྤྱི་པའི་དབང་ཆ་སྤྱོད་པའི་གཞུང་དོན་སྒྲུབ་མཁན་ཡོངས་ལ་ལྟ་ཞིབ་ཡོངས་སུ་ཁྱབ་པར་བྱེད་དགོས། རྒྱལ་ཁབ་ཀྱི་ལྟ་ཞིབ་བཅའ་ཁྲིམས་གཏན་ལ་ཕབ་སྟེ། ལྟ་ཞིབ་ཨུ་ཡོན་ལྷན་ཁང་ལ་བཅའ་ཁྲིམས་ལྟར་འགན་དབང་གི་མཚམས་ཚད་དང་བརྟག་དཔྱད་བྱེད་ཐབས་ཁྲིམས་མཐུན་ལྟར་སྤྲད་དེ། ཉར་འཇོག་གིས“གཏན་འཁེལ་གཉིས”བྱེད་ཐབས་ཀྱི་ཚབ་བྱེད་དགོས། རྩིས་བཤེར་དོ་དམ་གྱི་སྒྲིག་སྲོལ་སྒྱུར་བཅོས་བྱས་ཏེ། བསྡོམས་རྩིས་ཀྱི་སྒྲིག་སྲོལ་འཐུས་སྒོ་ཚང་དུ་གཏོང་དགོས། ཏང་གིས་གཅིག་གྱུར་བཀོད་འདོམས་དང་། ཡོངས་སུ་ཁྱབ་པ། ཟིལ་ལྡན་ཆོད་ཆེའི་ལྟ་སྐུལ་མ་ལག་འཛུགས་སྐྱོང་བྱས་ནས། ཏང་ནང་གི་ལྟ་སྐུལ་དེ་རྒྱལ་ཁབ་ལས་ཁུངས་ཀྱི་ལྟ་སྐུལ་དང་། དམངས་གཙོའི་ལྟ་སྐུལ། ཁྲིམས་འཛིན་གྱི་ལྟ་སྐུལ། མང་ཚོགས་ཀྱི་ལྟ་སྐུལ། གླེང་ཕྱོགས་ཀྱི་ལྟ་སྐུལ་བཅས་དང་སྟར་ལ་བརྒྱུས་ནས་ལྟ་སྐུལ་གྱི་འགྲིལ་ཤུགས་ཇེ་ཆེར་གཏོང་དགོས།

(བརྒྱད) སྲིད་སྐྱོང་གི་འཇོན་ཐང་ཕྱོགས་ཡོངས་ནས་ཇེ་ཆེར་གཏོང་དགོས། མི་འབོར་དུང་ཕྱུར་བཅུ་གསུམ་ལྷག་ཙམ་གྱི་སྤྱི་ཚོགས་རིང་ལུགས་ཀྱི་རྒྱལ་ཁབ་ཆེན་མོར་འགོ་ཁྲིད་བྱེད་པར། རང་རེའི་ཏང་འདི་ཆབ་སྲིད་ཐད་ཉམས་སད་ཐེག་ཐུབ་པ་དགོས་ལ་འཇོན་ཐང་ཡང་ཧ་ཅང་ཆེན་པོ་ལྡན་དགོས། སློབ་སྦྱོང་གི་འཇོན་ཐང་ཇེ་ཆེར་བཏང་ནས། ཏང་ཡོངས་སུ་སློབ་སྦྱོང་བྱེད་མཁས་པོ་དང་། ལག་ལེན་ཕོད་པའི་ཁོར་ཡུག་ལེགས་པོ་སྐྲུན་དགོས་ཤིང་། མར་ཁེ་སི་རིང་ལུགས་ཀྱི་སློབ་སྦྱོང་ཅན་གྱི་སྲིད་ཏང་འཛུགས་སྐྱོང་དང་། སློབ་སྦྱོང་ཅན་གྱི་རྒྱལ་ཁབ་ཆེན་པོ་འཛུགས་སྐྱོང་བྱེད་པར་སྐུལ་འདེད་གཏོང་དགོས། ཆབ་སྲིད་ཀྱི་འགོ་ཁྲིད་འཇོན་ཐང་ཇེ་ཆེར་བཏང་ནས། འཐབ་ཇུས་ཀྱི་བསམ་གཞིགས་དང་། གསར་གཏོད་ཀྱི་བསམ་གཞིགས། རྩོད་སྒྲུབ་ཀྱི་བསམ་གཞིགས། ཁྲིམས་སྐྱོང་གི་བསམ་གཞིགས། གཞི་ཐིག་གི་བསམ་གཞིགས་བཅས་མཐའ་འཁྱོངས་བྱེད་དགོས་པ་དང་། ཏང་གི་ལམ་ཕྱོགས་དང་བྱེད་ཕྱོགས་དང་སྲིད་ཇུས་བཅས་ཚན་རིག་དང་མཐུན་པར་གཏན་འབེབས་དང་བློ་ཐག་རྦད་ཆོད་ཀྱིས་ལག་ལེན་དུ་བསྟར་ནས། ཏང་གིས་ཁྱོན་ཡོངས་ཀྱི་གནས་ཚུལ་འཛིན་སྐྱོང་དང་། ཕྱོགས་གང་ཅི་མཐུན་སྦྱོར་ངང་ནས་དོན་ཐོག་ཏུ་འཁྱོལ་བར་བྱེད་དགོས། སྒྱུར་བཅོས་དང་གསར་གཏོད་ཀྱི་འཇོན་ཐང་ཇེ་ཆེར་བཏང་ནས། བློ་རྩ་བརྟན་པོས་ཡར་རྒྱས་བརྩོན་ལེན་བྱེད་པའི་བསམ་པའི་འཁྱེར་སོ་རྒྱུན་འཁྱོངས་བྱེད་དགོས་པ་དང་། དོན་དངོས་དང་ཟུང་འབྲེལ་བྱས་ནས་གསར་གཏོད་རང་བཞིན་གྱི་ལས་དོན་སྐུལ་འདེད་གཏོང་མཁས་པོ། འཕྲིན་འབྲེལ་དྲ་སྦྲེལ་ལག་རྩལ་དང་ཆ་འཕྲིན་ཅན་གྱི་ཐབས་ལ་བརྟེན་ནས་ལས་དོན་སྒྲུབ་མཁས་པོ་བཅས་བྱེད་དགོས། ཚན་རིག་དང་མཐུན་པར་འཕེལ་རྒྱས་གཏོང་བའི་འཇོན་ཐང་ཇེ་ཆེར་གཏོང་བ་དང་། འཕེལ་རྒྱས་ཀྱི་བསམ་གཞི་གསར་པ་དོན་འཁྱོལ་མཁས་པོར་བྱས་ནས་འཕེལ་རྒྱས་ཀྱི་རྣམ་པ་གསར་པ་རྒྱུན་ཆད་མེད་པར་གཏོད་དགོས། ཁྲིམས་མཐུན་ལྟར་སྲིད་སྐྱོང་བའི་འཇོན་ཐང་ཇེ་ཆེར་བཏང་ནས། ཏང་གི་འགོ་ཁྲིད་དང་ཏང་འཛུགས་སྐྱོང་བྱེད་པའི་ཕྱོགས་གང་ཅིར་ཁེབས་པའི་ཏང་ནང་གི་ཁྲིམས་སྲོལ་དང་ལམ་ལུགས་ཀྱི་མ་ལག་གང་མགྱོགས་ཆགས་པར་བྱེད་པ་དང་། རྒྱལ་ཁབ་ཀྱི་སྲིད་དབང་ལས་ཁུངས་ལ་འགོ་ཁྲིད་བྱེད་ཤུགས་ཇེ་ཆེར་གཏོང་བ་དང་ལེགས་བཅོས་བྱེད་དགོས། མང་ཚོགས་ཀྱི་ལས་དོན་སྒྲུབ་པའི་འཇོན་ཐང་ཇེ་ཆེར་བཏང་ནས། མང་ཚོགས་ཀྱི་ལས་དོན་སྒྲུབ་པའི་སྒྲིག་སྲོལ་ལམ་སྲོལ་དང་བྱེད་སྟངས་བྱེད་ཐབས་གསར་དུ་གཏོད་པ་དང་། བཟོ་ཚོགས་དང་གུང་གཞོན་ཚོགས་པ། བུད་མེད་མཉམ་འབྲེལ་ལྷན་ཚོགས་སོགས་ཚོགས་པའི་རྩ་འཛུགས་ཀྱི་ཆབ་སྲིད་རང་བཞིན་དང་། སྔོན་ཐོན་རང་བཞིན། མང་ཚོགས་རང་བཞིན་བཅས་ཇེ་མཐོར་གཏོང་བར་སྐུལ་འདེད་གཏོང་བ་དང་། མང་ཚོགས་དང་འབྲེལ་གཏུག་བྱེད་པའི་ཟམ་པ་དང་སྦྲེལ་ཐག་ལྟ་བུའི་ནུས་པ་འདོན་སྤེལ་བྱེད་དགོས་ཤིང་། རྒྱ་ཆེའི་མི་དམངས་མང་ཚོགས་རྣམས་བློ་བརྟན་འགྱུར་མེད་ཀྱི་སྒོ་ནས་ཏང་གི་རྗེས་སུ་འབྲང་བའི་སྒྲིག་འཛུགས་བྱེད་པ་དང་སྐུལ་མ་གཏོང་དགོས། དོན་འཁྱོལ་དམ་འཛིན་གྱི་འཇོན་ཐང་ཇེ་ཆེར་བཏང་ནས། སྐད་ཆ་དྲང་པོར་ཤོད་པ་དང་། བྱ་བ་དངོས་སྒྲུབ་པ། སྒྲུབ་ཐབས་གནད་འཁེལ་སྤྱོད་པ། ཕན་འབྲས་ངོ་མ་ཐོན་ཐབས་བཅས་མཐའ་འཁྱོངས་བྱེད་པ་དང་། ཐོག་ལྟར་དྲག་ལ་གློག་ལྟར་མྱུར་བ་དང་། སྙིང་རུས་གཏན་འཁྱོངས་ཟུང་འབྲེལ་དམ་པོར་བྱས་ཏེ། དཀའ་གནད་འགག་སྒྲོལ་ཕོད་པ་དང་། ལྕགས་གཟེར་འདེབས་པ་ལྟ་བུའི་སྙིང་སྟོབས་བཅངས་ཏེ་ལས་དོན་ཁག་དངོས་གཉེར་ཞིབ་གཉེར་ལེགས་གཉེར་བཅས་བྱེད་དགོས། ཉེན་ཁའི་ཁ་ལོ་སྒྱུར་བའི་འཇོན་ཐང་ཇེ་ཆེར་བཏང་ནས། ཕྱོགས་གང་ཅིའི་ཐད་ཀྱི་ཉེན་ཁ་སྔོན་འགོག་ཚོད་འཛིན་གྱི་ལམ་སྲོལ་ཆ་ཚང་དུ་གཏོང་དགོས་པ་དང་། རྙོག་འཛིང་ཆེ་བའི་འགལ་བ་སྣ་ཚོགས་ཐག་གཅོད་མཁས་པོར་བྱེད་པ། མདུན་སྐྱོད་ལམ་བུའི་ཐོག་གི་དཀའ་ངལ་དང་ཉེན་ཁ་སྣ་ཚོགས་ལས་རྒྱལ་ཕོད་པ། ལས་ཀའི་རང་འགུལ་དབང་ཆ་དམ་པོར་འཛིན་པ་བཅས་བྱེད་དགོས།

བློ་མཐུན་རྣམ་པ། བྱ་གཞག་རླབས་པོ་ཆེར་ངེས་པར་དུ་ཏང་གི་འགོ་ཁྲིད་སྟོབས་དང་ལྡན་པ་ཡོད་དགོས། རང་རེའི་ཏང་གིས་རང་ཉིད་འཛུགས་སྐྱོང་ལེགས་པོ་དང་འཛུགས་སྐྲུན་སྟོབས་དང་ལྡན་པར་བྱས་ཏེ། ཏང་གིས་ཐོག་མཐའ་བར་གསུམ་དུ་མི་དམངས་དང་ལྷན་དུ་བསམས་པ་དང་ལྷན་དུ་བསྒྲུབས་པའི་འགན་ལེན་བྱས་ཚེ། ཀྲུང་གོའི་མི་དམངས་ཀྱི་ཕུགས་བསམ་རླབས་པོ་ཆེ་ཐེག་པའི་གྲུ་གཟིངས་ཀྱི་སྣེ་ཁྲིད་དེ་རླབས་གཤགས་མདུན་སྐྱོད་ཐུབ་ཅིང་། རྒྱལ་ཁའི་ངང་ནས་འོད་སྟོང་འབར་བའི་ཕ་མཐར་བགྲོད་ཐུབ་ངེས་ཡིན།

བློ་མཐུན་རྣམ་པ། ཀྲུང་ཧྭ་མི་རིགས་ནི་དཀའ་སྡུག་ཁྱད་བསད་དང་། དཔའ་ངར་ཞུམ་མེད་ཀྱི་མི་རིགས་རླབས་པོ་ཆེ་ཡིན་པ་དང་། ཀྲུང་གོའི་མི་དམངས་ནི་བརྩོན་འགྲུས་ལྡན་ལ་དཔའ་ངར་ཆེ་བ་དང་། འབད་བརྩོན་ལྷུར་ལེན་བྱེད་པའི་མི་དམངས་རླབས་པོ་ཆེ་ཡིན་ལ། ཀྲུང་གོ་གུང་ཁྲན་ཏང་ནི་འཐབ་རྩོད་ཕོད་པ་དང་། རྒྱལ་ཁ་ལེན་ཕོད་པའི་སྲིད་ཏང་རླབས་པོ་ཆེ་ཞིག་ཡིན། ལོ་རྒྱུས་ཀྱི་འཁོར་ལོ་མདུན་ནས་མདུན་དུ་བསྐྱོད། དུས་ཀྱི་རླབས་རྒྱུན་དྲག་ནས་དྲག་ཏུ་འཕྱུར། ལོ་རྒྱུས་ཀྱིས་གཡོ་མེད་མཁན་དང་། དཔའ་མཛངས་རྟུལ་ཕོད་མཁན། འཐབ་རྩོད་དྲག་པོ་བྱེད་མཁན་བཅས་ཁོ་ནར་གཟིགས་སྐྱོང་བྱེད་པ་ལས། སོམ་ཉི་ཅན་དང་། སྒྱིད་ལུག་ཅན། དཀའ་འཚེར་ཅན་བཅས་བསྒུག་མི་སྲིད། ཏང་ཡོངས་ཀྱིས་ངེས་པར་དུ་དཀའ་སྤྱད་འབད་འཐབ་དང་། ང་རྒྱལ་འཚབ་འཚུབ་སྤོང་བའི་སྤྱོད་ཚུལ་རྒྱུན་འཁྱོངས་དང་། དུས་ཀྱིས་མི་བསྒུག་པས། སྐར་ཆ་ཙམ་ལའང་བརྩོན་པའི་སྙིང་སྟོབས་བཅངས་ཏེ། དུས་རབས་གསར་པའི་རྒྱང་སྐྱོད་ཀྱི་ལམ་བུར་སྟོབས་ཤུགས་ཆེར་སྐྱེད་ཀྱིས་ལེགས་པོར་བསྐྱོད་དགོས། ཏང་ཡོངས་ཀྱིས་ངེས་པར་དུ་རང་རྟོགས་སྒོ་ནས་ཏང་གི་མཐུན་སྒྲིལ་དང་གཅིག་གྱུར་བསྲུང་དགོས་པ་དང་། ཏང་དང་མི་དམངས་མང་ཚོགས་བར་གྱི་ཤ་ཁྲག་ལྟ་བུའི་འབྲེལ་བ་རྒྱུན་འཁྱོངས། རྒྱལ་ཡོངས་མི་རིགས་ཁག་གི་མི་དམངས་གྱི་མཐུན་སྒྲིལ་ཆེན་མོ་སྲ་བརྟན་དུ་གཏོང་བ། རྒྱལ་ཕྱི་རྒྱལ་ནང་གི་ཀྲུང་ཧྭའི་བུ་ཕྲུག་མཐུན་སྒྲིལ་བྱེད་ཤུགས་ཆེ་རུ་གཏོང་བ། མཐུན་སྒྲིལ་བྱེད་རུང་བའི་སྟོབས་ཤུགས་ཡོད་ཚད་ལ་མཐུན་སྒྲིལ་བཅས་བྱས་ཏེ། སེམས་ཤུགས་གཅིག་སྒྲིལ་ངང་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་འོད་སྟོང་འབར་བའི་ལམ་དུ་བསྐྱོད་དགོས།

གཞོན་ནུ་དར་རྒྱས་བྱུང་ན་རྒྱལ་ཁབ་དར་རྒྱས་ཡོང་། གཞོན་ནུ་སྟོབས་དང་ལྡན་ན་རྒྱལ་ཁབ་སྟོབས་ཤུགས་ཆེ། གཞོན་རབས་རྣམས་ལ་ཕུགས་བསམ་དང་། འཇོན་ཐང་། འགན་ཁུར་གྱི་བསམ་པ་བཅས་ལྡན་ན། རྒྱལ་ཁབ་ལ་མདུན་ལམ་ཡོང་བ་དང་། མི་རིགས་ལ་ཕུགས་རེ་ཡོད། ཀྲུང་གོའི་ཕུགས་འདུན་ནི་ལོ་རྒྱུས་དང་ད་ལྟའི་ཕུགས་འདུན་ཡིན་ལ། མ་འོངས་པའི་ཕུགས་འདུན་ཡང་ཡིན། ང་ཚོའི་མི་རབས་འདིའི་ཕུགས་འདུན་ཡིན་ལ་དེ་བས་ཀྱང་གཞོན་རབས་པའི་ཕུགས་འདུན་ཡང་ཡིན། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་ཀྲུང་གོའི་ཕུགས་འདུན་ནི་མཐར་གཏུག་ན་གཞོན་ནུ་མི་རབས་རིམ་པས་གཅིག་རྗེས་གཉིས་མཐུད་དུ་འབད་པ་ལྷོད་མེད་བྱས་ནས་མངོན་འགྱུར་བྱེད་པར་འགྱུར། ཏང་ཡོངས་ཀྱིས་གཞོན་རབས་པར་ཐུགས་ཁུར་དང་གཅེས་སྐྱོང་བྱེད་དགོས་ཤིང་། ཁོ་ཚོའི་མི་ཚེའི་ཕུགས་བསམ་མངོན་འགྱུར་ཡོང་བར་གར་སྟེགས་སྐྲུན་དགོས། རྒྱ་ཆེའི་གཞོན་ནུ་རྣམས་ཀྱིས་ཕུགས་བསམ་དང་དད་སེམས་བརྟན་པོར་འཆང་བ་དང་། ཕུགས་བསམ་ཆེན་པོ་བཅངས་ཏེ། གོམ་པ་བརྟན་པོའི་ངང་ནས་དུས་རབས་ཀྱི་རླབས་གཤགས་ཕོ་རྒོད་པར་བརྩོན་ཏེ། ཀྲུང་གོའི་ཕུགས་འདུན་མངོན་འགྱུར་བྱེད་པའི་གསོན་ཉམས་རྒྱས་པའི་ལག་ལེན་ཁྲོད་ལང་ཚོའི་ཕུགས་འདུན་དགུང་ལ་སྤུར་དགོས་ཤིང་། མི་དམངས་ལ་ཁེ་ཕན་གཉེར་བའི་འབད་འཐབ་ལྷོད་མེད་ཁྲོད་མི་ཚེའི་སྙན་དབྱངས་བརྩམ་དགོས།

རྒྱ་ཆེན་མཛད་པ་སྐྱོང་བའི་ཚེ། ས་སྟེང་ཐམས་ཅད་སྤྱི་སྐལ་ཡིན། སྤྱི་ལེ་གྲུ་བཞི་མ་ས་ཡ་དགུ་དང་འབུམ་དྲུག་ལྷག་ཙམ་ཡོད་པའི་ས་གཞི་ཆེན་མོའི་སྟེང་དུ་འགྲེངས་ཤིང་། ཀྲུང་ཧྭ་མི་རིགས་ཀྱིས་དུས་ཡུན་རིང་པོར་འབད་དེ་བསགས་པའི་ལོ་ངོ་སྟོང་ཕྲག་ལྔ་ལྷག་ཙམ་རིང་གི་རིག་གནས་ཀྱི་ཉིང་བཅུད་ལ་རོལ་ཏེ། ཀྲུང་གོའི་མི་དམངས་དུང་ཕྱུར་བཅུ་གསུམ་ལྷག་ཙམ་ལ་གཅིག་ཏུ་འགྲིལ་བའི་སྟོབས་ཤུགས་ཆེན་པོ་ཡོད་པས། ང་ཚོ་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་བགྲོད་ལམ་དུ་བསྐྱོད་པར་འགྲན་ཟླ་བྲལ་བའི་དུས་རབས་ཀྱི་གར་སྟེགས་ཆེན་པོ་ལྡན་ཞིང་། འགྲན་ཟླ་མེད་པའི་ལོ་རྒྱུས་ཀྱི་གཏིང་གཞི་ཟབ་མོ་ཡོད་ལ། འགྲན་ཟླ་མེད་པའི་མདུན་སྐྱོད་ཀྱི་བརྟན་ཤུགས་ཆེན་པོ་ཡོད། ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཡོངས་ཀྱིས་ཏང་ཀྲུང་དབྱང་གི་མཐའ་སྐོར་དུ་མཐུན་སྒྲིལ་དམ་ཟབ་བྱེད་པ་དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དར་ཆ་རླབས་པོ་ཆེ་མཐོན་པོར་བསྒྲེངས་ཤིང་། བློ་རྩ་བརྟན་པོས་ཡར་རྒྱས་ལྷུར་ལེན་དང་དཀའ་སྤྱད་སྙིང་རུས་ཀྱིས་ལས་ཀ་བྱས་ནས། དེང་རབས་ཅན་དུ་འགྱུར་བའི་འཛུགས་སྐྲུན་ལ་སྐུལ་སྤེལ་དང་། མེས་རྒྱལ་གོང་བུ་གཅིག་ཏུ་འགྱུར་བ། འཛམ་གླིང་གི་ཞི་བདེ་སྲུང་བ་དང་ཐུན་མོང་དུ་འཕེལ་རྒྱས་ཡོང་བར་བྱེད་པ་བཅས་ལོ་རྒྱུས་ཀྱི་ལས་འགན་ཆེན་པོ་གསུམ་འགྲུབ་པའི་ཆེད་དང་། འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་པའི་རྒྱལ་ཁ་ཕུ་ཐག་ཆོད་པར་ལེན་པ་དང་། དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རྒྱལ་ཁ་རླབས་པོ་ཆེ་བརྩོན་ལེན། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་ཀྲུང་གོའི་ཕུགས་འདུན་མངོན་འགྱུར་བྱེད་པ། མི་དམངས་ཀྱིས་བདེ་སྐྱིད་ལྡན་པའི་འཚོ་བར་སྨོན་ཚུལ་མངོན་འགྱུར་ཡོང་བ་བཅས་ཀྱི་ཆེད་དུ་མུ་མཐུད་ནས་འབད་བརྩོན་ལྷོད་མེད་བྱེད་དགོས། །

(སྙན་སྒྲོན་རྩོམ་ཡིག་ཆ་ཚང་ཚོགས་ཆེན་གྱི་དྲུང་ཡིག་ཁྲུའུ་ནས་མཁོ་འདོན་བྱས་པ་གཞིར་བཟུང)

རྩོམ་སྒྲིག་པ། : ཀླུ་མོ་མཚོ།