ཟླ་དགུ་བའི་ཚེས་ཉེར་གསུམ་ཉིན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་དང་ཁ་ན་ཏའི་ཙུང་ལི་ཐི་ལུའུ་ཏོ་རྣམ་གཉིས་མཉམ་དུ་ཀྲུང་གོ་དང་ཁ་ན་ཏའི་མཉམ་ལས་དཔལ་འབྱོར་ཉོ་ཚོང་གླེང་སྟེགས་སྐབས་དྲུག་པར་ཞུགས་པར་མ་ཟད་ཤིས་ཚིག་ཕུལ།
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཟླ་དགུ་བའི་ཚེས་ཉེར་གསུམ་ཉིན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་དང་ཁ་ན་ཏའི་ཙུང་ལི་ཐི་ལུའུ་ཏོ་རྣམ་གཉིས་མཉམ་དུ་ཀྲུང་གོ་དང་ཁ་ན་ཏའི་མཉམ་ལས་དཔལ་འབྱོར་ཉོ་ཚོང་གླེང་སྟེགས་སྐབས་དྲུག་པར་ཞུགས་པར་མ་ཟད་ཤིས་ཚིག་ཕུལ། ཀྲུང་གོ་དང་ཁ་ན་ཏ་རྒྱལ་ཁབ་གཉིས་ཀྱི་བཟོ་ཚོང་ལས་རིགས་ཀྱི་མི་སྣ་བདུན་བརྒྱ་ལྷག་བྱ་འགུལ་ལ་ཞུགས།
ལིས་ཁི་ཆང་གིས་གསུངས་རྒྱུར། ཀྲུང་གོས་ཁྲིམས་ལྟར་རྒྱལ་སྐྱོང་ཁྱོན་ཡོངས་ནས་ལག་བསྟར་བྱེད་བཞིན་ཡོད་པ་དང་། དེའི་ནང་དུ་རྒྱལ་སྤྱིའི་སྒྲུབ་སྟངས་དཔྱད་གཞིར་བཟུང་སྟེ་ཁྱབ་ཁོངས་སོ་སོ་ནས་བཅའ་ཁྲིམས་དང་ཁྲིམས་སྲོལ་འཛུགས་པ་དང་དེ་འཐུས་ཚང་དུ་གཏོང་བ་དང་མཉམ་དུ་མུ་མཐུད་ནས་སྲིད་བསྡུ་དབང་གཏོང་དང་དབང་གཏོང་དོ་དམ་ཟུང་འབྲེལ་བྱེད་པ། ཞབས་ཕྱི་ལེགས་སྒྱུར་བྱེད་པ་སོགས་ཀྱི་བཅོས་སྒྱུར་ལག་བསྟར་བྱས་ཏེ། ཤེས་བྱའི་ཐོན་དབང་སྲུང་སྐྱོབ་ཤུགས་ཚད་ཇེ་ཆེར་གཏོང་བ་དང་། སྔར་ལས་འདྲ་མཉམ་ཡིན་པའི་ཚོང་རའི་ཁོར་ཡུག་དང་སྔར་ལས་ལེགས་བཅོས་བྱེད་པའི་ཁྲིམས་ལུགས་ཁོར་ཡུག་གསར་སྐྲུན་བྱེད་རྒྱུ་འདུས་ཡོད། ཕྱིན་ཆད་འཕེལ་རྒྱས་བྱུང་ནས་དུས་རིམ་གང་ཞིག་ཏུ་སླེབ་རུང་ཀྲུང་གོས་བློ་བརྟན་འགྱུར་མེད་སྒོས་སྒོ་འབྱེད་རྒྱ་བསྐྱེད་དེ་ཕྱི་ཕྱོགས་སྒོ་འབྱེད་ཀྱི་སྒོ་མོ་སྔར་ལས་ཡངས་བར་ཕྱེས་པ་དང་། ཕྱི་དངུལ་སྲིད་ཇུས་བེད་སྐྱོད་པ་སྔར་ལས་ཚད་ལྡན་དང་མངོན་གསལ་ཡིན་ཟེར།
ཐི་ལུའུ་ཏོ་ཡིས་བཤད་རྒྱུར། ཁ་ན་ཏ་དང་ཀྲུང་གོའི་ཙུང་ལིས་ཕན་ཚུན་ལ་འཚམས་འདྲི་དང་གྲོས་མོལ་གང་མང་བྱས་ཏེ་དངོས་གཉེར་གྲུབ་འབྲས་གང་མང་བྱུང་བ་དང་། དེ་ལས་ཕྱོགས་གཉིས་ཀྱིས་གྲོས་མོལ་བརྒྱུད་དེ་མཉམ་ལས་ལ་སྐུལ་འདེད་བཏང་ཆོག་པ་མཚོན་ཡོད། ཕྱོགས་གཉིས་ཀྱིས་མུ་མཐུད་དུ་འབྲེལ་འདྲིས་དམ་པོ་བྱེད་པ་དང་། མཉམ་དུ་འབད་བརྩོན་བྱས་ཏེ་ཁ་ན་ཏ་དང་ཀྲུང་གོའི་འབྲེལ་བ་དེ་བརྟན་འཇགས་དང་འཕེལ་རྒྱས་ཀྱི་བགྲོད་ལམ་དུ་ཡང་བསྐྱར་ཞུགས་པ་དང་། དུས་སྐབས་གསར་བའི་ནང་དུ་རྒྱལ་ཁབ་གཉིས་ཀྱི་འབྲེལ་བའི་ཐད་ནས་གཉིས་ཕན་མཉམ་རྒྱལ་གྱི་མངོན་འགྱུར་བྱེད་པར་མ་ཟད་རྒྱལ་ཁབ་གཉིས་ཀྱི་མི་དམངས་ལ་བདེ་སྐྱིད་སྐྲུན་དགོས་ཟེར།