སྩ་ཡིག་གི་གསང་བ།

གཅིག སྤྱི་བཤད།

ང་ཚོས་ནམ་རྒྱུན་སྐད་ཆ་བཤད་སྐབས་དང་། གཞན་ལ་སློབ་ཁྲིད་བྱེད་སྐབས། རྩོམ་ཡིག་འབྲི་སྐབས་བཅས་སུ་མིང་དང་ཚིག་གིས་མ་འདང་བའི་དཀའ་ངལ་དང་། ཁ་སྐད་དང་ཡིག་སྐད་གཉིས་ལ་བར་ཁྱད་ཆེ་བའི་དབང་གིས་དཀའ་ངལ་མང་བོ་ཞིག་ཡང་ཡང་འཕྲད་ཀྱིན་འདུག ཡིན་རྒྱུ་ནི། ད་ཡོད་ཀྱི་བརྡ་སྤྲོད་གཞུང་ལུགས་སམ། བརྡ་སྤྲོད་ཀྱི་ཁྲིམས་ཡིག་སུམ་ཅུ་བ་དང་། རྟགས་ཀྱི་འཇུག་པ་འདི་གཉིས་ཀྱིས་བོད་མི་ས་ཡ་དྲུག་གི་སྐད་ཆ་དང་ཡི་གེ་གཉིས་ཆ་ཁེབས་ཐུབ་ཀྱིན་ཡོད་མེད་དང་། དེ་ལ་ལེགས་བཅོས་ཇི་ལྟར་བྱེད་དགོས་མིན་སོགས་རྩ་བ་ནས་གླེང་དགོས་པ་ཞིག་ཡིན་ཀྱང་། དེ་ནི་བརྗོད་གཞི་རྒྱ་ཆེན་པོ་ཡིན་པས་རེ་ཞིག་བསྐྱུངས་ཏེ། འདིར་ནམ་རྒྱུན་ང་རང་གིས་ཡི་གེ་འབྲི་སྐབས་འཕྲད་བཞིན་པའི་ཡིག་རྡོག་གཅིག་རང་གི་སྐོར་ལ་གླེང་མོལ་ཐུང་ངུ་ཞིག་བྱ་རྩིས་ཡིན།

 དཀའ་བའི་ལྡོག་ཟླ་སླ་ཞེས་པའི་ཡི་གེ་འདི་མདོ་སྨད་པ་དག་ལ་མཚོན་ན་ཤེས་ཡོན་ཅན་ཁོ་ནས་མ་གཏོགས་ཡུལ་མི་བྱིངས་ཀྱིས་མི་གོ་བའི་ཡི་གེ་ཞིག་ཡིན། ཁོང་རྣམ་པས་སླ་ཞེས་པའི་ཡིག་འབྲུ་འདིའི་ཚབ་ལ་སྩ་ཡིག་འདི་ཉིད་བེད་སྤྱོད་བྱེད། དེར་བརྟེན་དབུས་སྐད་དུ། ལས་སླ་བོ་རེད། ཅེས་པ་འདིའི་དོད་ཨ་མདོའི་ཁ་སྐད་དུ། སྩ་མོ་རེད་ཟེར། ངས་སྨྱུ་གུ་བཟུང་བ་ནས་དེ་རིང་བར་སྩ་མོ་ཞེས་པའི་ཡི་གེ་འདི་བེད་སྤྱོད་བཏང་བ་ཞིག་དྲན་གྱིན་མི་འདུག ང་ཚོར་ཁ་སྐད་མང་བོ་ཞིག་ངག་ནས་བརྗོད་པ་ཙམ་ལས་ཡིག་ཐོག་ཏུ་དབབ་རྒྱུ་མེད་པ་ལྟ་བུའི་གོམས་གཤིས་རྒྱུན་འབྱམས་པ་ཡོད་སྟབས། སྩ་ཞེས་པའི་ཡི་གེ་འདི་ཡང་ཕལ་ཆེར་དེའི་ཁོངས་སུ་གཡུགས་པར་སྣང་། ཡིན་ནའང་ངས་སླ་ཞེས་པའི་ཡི་གེ་འདི་འབྲི་ཐེངས་རེ་རེ་བཞིན་སེམས་ངོར་ཐོག་མར་འཆར་བ་ནི་སླ་ཡིག་འདི་ཉིད་མ་ཡིན་པར་སྩ་ཞེས་པའི་ཡིག་འབྲུ་འདི་རེད། ཡི་གེ་བརྗོད་འདོད་ཀྱི་ཀུན་སློང་གིས་སྩ་ཡིག་འདི་བསྐུལ་ནས། བསམ་བློའི་སྐད་ཅིག་གཉིས་པ་དེ་ལ་དྲན་ཤེས་ཀྱིས་སྩ་ཡིག་འདི་ཉིད་ཡིག་བསྒྱུར་བྱས་ཏེ་སྨུག་རྩེ་ལ་ཐོན་འོངས་པ་ནི་སླ་ཡིག་འདི་ཡིན་དགོས་པ་འབྱུང་གིན་ཡོད། ངས་སྩ་ཡིག་འདི་ཉིད་འབྲི་མི་དགོས་པ་དང་བཤད་མི་དགོས་པའི་རྒྱང་སྐོར་ཅི་ཙམ་བྱས་ཀྱང་། ཨ་མས་བསླབས་པའི་ཡི་གེའི་རྩ་བ་འདི་དག་རང་ཤུགས་ཀྱིས་སེམས་ངོས་ནས་ཡལ་བསུབ་ཏུ་མི་འགྲོ་ཞིང་། གཏན་བརྗེད་དུ་གཏོང་བའི་ཐབས་ཤེས་གཞན་ཀྱང་མ་རག ལར་འདི་ཉིད་ང་ལྟ་བུ་མི་ཆུང་གཅིག་ལ་འཕྲད་པའི་དཀའ་ངལ་ཞིག་ཀྱང་མ་ཡིན་པར་མི་གྲངས་ས་ཡ་དུ་མ་ཐུན་མོང་ལ་འཕྲད་བཞིན་པའི་དཀའ་ངལ་ཞིག་ཡིན་སྟབས། གླེང་སློང་བྱེད་རིན་མེད་པ་ཞིག་ཀྱང་མ་ཡིན་པར། སླ་ཡིག་གི་དོད་དུ་སྩ་ཡིག་རྗོད་མཁན་གྱི་མི་གྲངས་ས་ཡ་དུ་མས་རྩ་སྐྱུར་མ་བྱས་ཀྱི་བར་དུ་མུ་མཐུད་གནས་རྒྱུ་ཡིན་པའི་གནད་དོན་ཞིག་ཅི་ལ་མིན།

   སྩ་ཡིག་འདི་སྤྱིར་བཏང་གི་འཇུག་ཡུལ་དུ་མ་ཞིག་ཡོད་པ་ནི། བརྡ་རྙིང་འགའ་ཞིག་ཏུ་བསུ་བ་ལ་བསྩུ་བ་དང་། བརྩེ་བ་ལ་བསྩེ་བ། བསགས་པ་ལ་བསྩགས་པ། བསང་བ་ལ་བསྩང་བ། བཙན་པོ་ལ་བསྩན་ཕོ། བསལ་བ་ལ་བསྩལ་བ་ལྟ་བུ་དང་། དེང་སང་ཡོངས་གྲགས་བེད་སྤྱོད་བྱེད་བཞིན་པ་ནི། གནང་བ་སྩལ་པ་དང་། བཀའ་སྩལ་བ་ལྟ་བུ་ལས་བཀོལ་སྤྱོད་མང་བོ་མེད་པར་གྱུར་ཡོད།

སུམ་ཅུ་བའི་གཞུང་དུ་ནས་ལས་གཉིས་སྡུད་པ་ལ་འཇུག་ཚུལ་ཞིག་གསུངས་ཡོད་ཀྱང་། ལག་ལེན་དངོས་ཀྱི་སྐབས་ལས་སྒྲ་སྡུད་པ་ལ་འཇུག་པའི་དཔེ་མཚོན་རྩོད་རྙོག་ཅན་གཅིག་རང་ལས་རྙེད་མི་ཐུབ། དུས་རབས་དང་སྐད་ཡིག་ལ་འགྱུར་བ་ཆེན་པོ་ཐེབས་པའི་དབང་གིས་ཡིན་ནམ། ལས་སྒྲ་སྡུད་པ་ལ་འཇུག་པ་དེ་ཡང་ལས་སྒྲ་མ་ཡིན་པར་ལ་སྒྲར་གྱུར། དེ་ནི་ལ་སོགས་པ་ཞེས་པ་དེ་ཡིན། དེའི་རྒྱུ་མཚན་སུམ་འགྲེལ་མཁན་པོ་རྣམས་ཀྱིས་མཛད་པ་ནི། ཏུན་ཧོང་གཏེར་ཡིག་སོགས་ཡིག་རྙིང་ཁག་ཅིག་ཏུ་ལསྩོགས་པ་ཞེས་པ་ཞིག་འབྱུང་བ་དེ་ཡིན་པར་འགྲེལ་གྱིན་ཡོད། དེ་ཉིད་ལ་མི་འཐད་པའི་སྒྲུབ་བྱེད་གཏོང་དགོས་དོན་མེད་ཀྱང་། དེ་ཉིད་ཡིན་པའི་ཡིན་ལུགས་ར་སྤྲོད་གསལ་བོར་བྱེད་ཐུབ་མཁན་ཀྱང་མེད་པར་སྣང་།ད་དུང་རྟགས་འཇུག་སྤྱི་འགྲོས་ལ་གཞིགས་ན་སྩ་ཡིག་འདི་ཉིད་གཟུགས་འགྱུར་བའི་བྱ་ཚིག་ཅིག་ཡིན་སྟབས། མ་འོངས་པ་ལ་བསྩལ་དང་། ད་ལྟ་བ་དང་སྐུལ་ཚིག་ལ་སྩོལ། འདས་པ་ལ་བསྩལ་འདི་འདྲ་འབབ་པ་ཡིན་མོད། དེང་སང་འདས་མ་འོངས་གཉིས་ཆར་སྔོན་འཇུག་བ་ཡིག་མི་ཐོབ་པ་འབྲི་ཚུལ་ཤུགས་ཆེ། ལུགས་འདི་འཛིན་མཁན་དག་ནི་སུམ་རྟགས་ཀྱི་གཞུང་ལུགས་ལས་ཤིང་དཔར་དུ་གང་ཐེབས་པ་རྩ་ཆེར་འཛིན་མཁན་དག་གི་འདོད་ཕྱོགས་ཡིན།

 གཉིས། སྐབས་བབ་ཀྱི་བརྗོད་དོན་དངོས།

  ཕྲན་གྱིས་ཅི་ཙམ་བསམས་པ་དེ་ཙམ་གྱིས་ང་ཚོས་ཡུལ་མི་ས་ཡ་དུ་མས་ཉིན་རེའི་འཚོ་བའི་ནང་བེད་སྤྱོད་ཆེ་ཙམ་ཡོད་པའི་སྩ་ཡིག་གི་ཁྱབ་ཁོངས་འདི་སྣང་མེད་སྐྱུར་འཇོག་བྱེད་རྒྱུ་དེ་ཐབས་ལམ་ལེགས་ཤོས་དེ་མ་ཡིན་པར། འདིའི་འཇུག་ཡུལ་དང་གོ་དོན། ཡི་གེ་གང་ཐོབ་པ་སོགས་ལ་དཔྱད་ཞིབ་བྱ་རྒྱུ་དང་། སླ་ཡིག་དང་སྩ་ཡིག་འདི་གཉིས་ཀྱི་འཇུག་ཡུལ་ཕལ་ཆེར་འདྲ་མཚུངས་ཡིན་པ་ངོ་འཕྲོད་ཆེད། མདོ་ཁམས་པ་དག་གི་ཁ་སྐད་ཁྲ◌ོད་དར་ཁྱབ་ཆེ་བའི་སྩ་ཡིག་དང་། ཡིག་སྐད་དུ་འགྲོ་རྒྱུག་ཆེ་བའི་སླ་ཡིག་གཉིས་གཤིབ་བསྡུར་དཔེ་མཚོན་ཁག་ཅིག་གཤམ་གསལ་ལྟར།

༡། སླ། སྩ།

༢། སློང་།     སྩོང་།

༣། སློབ།       སྩོབ།

༤། སླང་།      སྩང་།

༥། སླེབས།      སྩེབས།

༦། སློག་པ།    སྩོག་པ།

༧། སློག       སྩོག

༨། སླ་ང་།     སྩ་ང་།

༩། སླེ་བོ།      སྩེ་བོ།

༡༠། སློ།       སྩོ།

ཡི་གེ་སྐོར་ཚོགས་འདི་གཉིས་གཤིབ་བསྡུར་བྱས་པའི་རེའུ་མིག་ལ་གཟིགས་ན་ང་ཚོར་བསམ་བློ་བསྐྱར་མ་ཞིག་ངེས་པར་འཁོར་ཐུབ་པ་ཡིན་ལ། གཤམ་དུ་དེ་དག་ལ་དཔེ་མཚོན་དང་བཅས་འགྲེལ་བཤད་ཕྲན་བུ་རེ་བྱ་རྒྱུ་ཡིན།

༡། སྩ། སྩ་ནི་གང་ཞིག་བྱེད་སྟབས་བདེ་བའི་དོན་ཏེ། ཡིག་སྐད་ཀྱི་སླ་ཞེས་པ་དེའི་དོད་ཐུབ་ལྟ་བུ་ཡིན། སྩ་ཡིག་འདི་ཨ་མདོ་བའི་གླུ་ཚིག་ཏུ་གསལ་བ་ནི།

སྐྱིད་ལ་རྟ་ཞིག་ཡོད་དུས་ན། །

སྒ་ཞིག་སྟོད་རྒྱུ་སྩ་མོ་རེད། །

སྐྱིད་ལ་ཕ་མ་ཡོད་དུས་ན། །

གླུ་ཞིག་ལེན་རྒྱུ་སྩ་མོ་རེད། ། ཅེས་དང་།

སྟག་ཤར་བ་ཇག་ལ་འགྲོ་ནི་ཚོ། །

ཇག་ཕར་འགྲོ་སྩ་དང་ཚུར་ཡོང་དཀའ། །

ཚུར་ཡོང་སྔུན་ན་རྒྱུ་ཞིག་དགོས། །

རྒྱུ་མེད་ན་རི་སྤྱང་རྔ་ལོ་རེད། ། ཅེས་པ་ལྟ་བུ་སོགས་དཀའ་ཡིག་གི་ལྡོག་ཟླ་ལ་སླ་ཡིག་མ་བཞག་པར་སྩ་ཡིག་བརྗོད་པའི་གླུ་ཚིག་མང་བོ་ཡོད་ཅིང་། ནམ་རྒྱུན་གྱི་ཡུལ་མིའི་ཁ་སྐད་ལ་སླ་ཞེས་པ་འདི་བེད་སྤྱོད་གཏོང་མཁན་མི་རྙེད། ལྷ་ས་ནས་བྱང་ཤར་དུ་འགྲོ་བའི་དབང་དུ་བྱས་ཚེ། ཨ་མདོ་སྟོད་◌྄ྭམ་བརྒལ་ཙམ་ནས་ཡི་གེ་ལ་སྦྱངས་མ་མྱོང་མཁན་ཞིག་ལ་སླ་མི་སླ་ཞེས་བཤད་ན་སུས་ཀྱང་གོ་མི་ཐུབ། སྩ་དང་མི་སྩ་ཞེས་ཤོད་དང་བདེ་གླགས་ངང་གོ་ཐུབ། མི་འདི་ལས་སླ་བོ་མ་རེད་ཟེར་རྒྱུའི་ཚབ་ལ། མི་འདི་སྩ་མོ་མ་རེད་ཟེར། དེས་ན་འུ་ཅག་ལ་སྩ་ཡིགའདི་འཇུག་ཡུལ་དང་བཅས་ར་འཕྲོད་བྱུང་།

༢། སྩོང་། སློང་ཡིག་གི་དོད་སྩོང་ཡིག་འདི་ནི་ཁ་ཟས་གོས་སོགས་སློང་བའི་དོན་ཡིན་ཏེ། སྤྲང་བོས་བྲོ་སྩོང་གིན་འདུག མཆོད་རྟེན་རྒྱག་ཆེད་ཞལ་འདེབས་སྩོང་གིན་འདུག་ཟེར། སྩོང་ཡིག་འདི་གཟུགས་འགྱུར་བའི་བྱ་ཚིག་ད་ལྟ་བ་ཡིན་སྟབས། འདིས་དྲངས་པའི་འདས་ཚིག་ལ་བསྩངས་དང་། མ་འོངས་པར་བསྩང་། སྐུལ་ཚིག་ལ་སྩོང་། དེ་བཞིན་བྱེད་པ་བོ་ལ་སྩོང་མཁན་བཅས་སུ་འབོད།

༣། སྩོབ། སྩོབ་ནི་ཡི་གེ་དང་ལག་རྩ་ལ་སོགས་སློབ་པའི་དོན་ཏེ། ཡི་གེ་སྩོབ། སྨན་སྩོབ། རྩིས་སྩོབ། ཤིང་བཟོ་སྟངས་སྩོབ་སོགས་ཟེར། བསླབས་ཟིན་པའམ་འདས་ཚིག་ལ་བསྩབས་ཟེར། ཡི་གེ་བསྩབས་ནས་ཕྱིར་ཡོང་ལྟ་བུ་ཟེར། སྐུལ་ཚིག་ལ་སྩོབས་ཟེར། ཁྱེད་ཀྱིས་ཁོང་ལ་ཡི་གེ་སྩོབས་ཟེར། འདི་ཡང་དུས་གསུམ་སྐུལ་ཚིག་དང་བཅས་པ་ཡོད་པའི་གཟུགས་འགྱུར་བའི་བྱ་ཚིག་ཞིག་ཡིན།

༤། སྩང་། སྩང་ཡིག་འདིའི་དོན་ནི། སྡོང་བོ་ལྟ་བུ་ས་ལ་འགྱེལ་ནས་ཡོད་པ་ཡར་སློང་བའི་དོན་ཏེ། དར་ཤིང་སྩོང་གིན་འདུག ཆང་འཐུང་ལམ་འགྲམ་དུ་འགྱེལ་བ་ཡར་བསྩངས། ཁང་བའི་ཀ་མགོ་བསྩངས། ཕག་ཤ་ཟོས་པས་མཁྲིས་ནད་བསྩངས་ལྟ་བུ་སྟེ་གང་ཞིག་བསླངས་པའི་དོན་ལ་འཇུག

༥། སྩེབས། མཚོ་སྔོན་གྱི་རོང་ཁུལ་ཁག་ཅིག་ཏུ། འདི་ནས་ཆུ་ཚོད་གསུམ་གྱིས་སྩེབས་ཐུབ་ལྟ་བུ་དང་། སྡེ་ཚ་ནས་སྐུ་འབུམ་ལ་ཉི་མ་གཅིག་གིས་སྩེབས་ཐུབ་ལྟ་བུ་ཟེར། དེ་ལ་འབྲོག་པ་རྣམས་ཀྱིས་འཕྱ་སྨོད་བྱེད། རྒྱུ་མཚན་ནི་ཨ་མདོ་སྤྱིའི་རྗོད་སྟངས་ལ་སྩེབས་དང་མི་སྩེབས་ཞེས་པ་སྙོབ་ཐུབ་མིན་གྱི་དོན་ཏེ། ལག་པ་ཁང་བའི་གནམ་ངོས་ལ་སྕེབས་ཐུབ། མདུང་ཡུ་ཐུང་བས་མ་སྩེབས་ཐལ་ཟེར་བ་ལྟ་བུ་སོགས་གང་ཞིག་གིས་གང་ལ་སྙོབ་མིན་གྱི་དོན་ཡིན་དགོས། འོན་ཀྱང་བསམ་བློ་ཞིབ་ཚགས་པོ་བཏང་ན། ཁོང་རྣམ་པས་སྕེབས་མི་སྩེབས་ཟེར་བ་དེ་སླེབས་ཐུབ་མིན་གྱི་དོན་ཡིན་དགོས་པས་ངོ་མཚར་ལྡན་པ་ཞིག་ཏུ་མཐོང་།

༦། སྩོག་པ། འདི་ལ་ཡིག་སྐད་དུ་སློག་པ་ཟེར། དེ་རིང་བར་སློག་པའི་དོད་སྩོག་པ་ལ་ཡིག་ཐོག་ཏུ་དག་ཆ་གཏན་ཁེལ་བ་མེད། དབུས་གཙང་བ་དག་གིས་པགས་ཚག པགས་ཚགས། པགས་ཙག་སོགས་བྲིས་པ་ཤས་ཆེ། མདོ་སྨད་པ་ཕལ་ཆེར་གྱིས་རྩག་འབྲི། སྩག་པའི་རྒྱུའི་ཁྱད་པར་ལ་གཞིགས་ཏེ། ལུགས་ལྤགས་ཀྱིས་བཟོས་པ་ལ་ལུག་སྩག ར་ལྤགས་ཀྱིས་བཟོས་པ་ལ་ར་སྩག ཚར་བུས་བཟོས་པ་ལ་ཚར་སྩག་སོགས་སུ་འབོད།

༧། སྩོག འདི་ནི་ཕྱི་ནང་བརྗེ་སྒྱུར་བྱས་པ་ལྟ་བུའི་དོན་ཡིན་དགོས་ཏེ། ཞིང་སའི་ཆེད་དུ་ས་རྒོད་སྩོག་གིན་འདུག་ཅེས་ལྟ་བུ་ཡིན། ད་དུང་འདི་ཉིད་གཟུགས་འགྱུར་བའི་བྱ་ཚིག་ཀྱང་ཡིན་དགོས་སྟབས། བསྩག་བྱའི་ས་རྒོད་ལྟ་བུ་མ་འོངས་པ་དང་། ས་རྒོད་བསྕགས་ཏེ་ཞིང་དུ་བསྒྱུར་ལྟ་བུ་འདས་པ། ས་རྒོད་སྩོགས་ཤིག་ལྟ་བུ་སྐུལ་ཚིག ས་རྒོད་སྩོག་མཁན་ལྟ་བུ་བྱེད་པ་བོ་ལ་འཇུག གཞན་ཡང་གྱོན་གོས་ཕྱི་ནང་བསྒྱུར་པ་ལ་སྟོད་ཐུང་ཕྱིར་སྩོག་ཟེར། དགྲ་དང་གོད་ཆག་སོགས་ཕྱིར་སློག་པའམ་ཟློག་པའི་དོན་ཏེ། དམག་སྣ་ཕྱིར་སྩོག གོད་ཁ་ཕྱིར་སྩོག་ལྟ་བུ་དོན་གྱིས་འབབ། ཡང་དངུལ་སིལ་མ་ཕྱིར་སློག་པའི་དོན་ཏེ། སྒོར་མོ་གཅིག་ཕྱིར་སྩོག་ལྟ་བུ། དངོས་པོ་དང་ལམ་ལུགས་སོགས་མགོ་རྟིང་སློག་པའི་དོན་དུའང་འཇུག་པར་སྣང་སྟེ། དཔེར་ན་རྫ་མ་མགོ་མཇུག་སྩོག གོང་མའི་སྲིད་དབང་མགོ་རྟིང་སྩོག་ཅེས་པ་ལྟ་བུའོ།། དེང་སང་སྩོག་གི་ཚབ་ཏུ་རྫོགས་འབྲི་བ་ནི་དོན་གྱིས་གནད་མ་ཤེས་པའི་སྐྱོན་ཡིན། ཁོ་བོས་ཀྱང་སྔར་དེ་འདྲ་བྲིས་པ་དྲན་ཡང་དོན་གྱིས་སྩོག་འདི་ཉིད་ལས་འགྲོ་ས་གཞན་མེད་པར་སྣང་།

འོ་ན་དེང་དུས་ཀྱི་སྐད་གདངས་ལ། གོང་གི་དཔེ་མཚོན་དེ་དག་གི་སྒྲ་གདངས་རྫོགས་ལྟ་བུ་ཐོན་གྱིན་ཡོད་སྟབས་སྩོགས་ག་ལ་འོས་སྙམ་ན། དེ་ཡང་བདེན་མོད། རྫོགས་ཞེས་པ་འདིས་ལས་གང་ཞིག་གི་མཇུག་བསྡུས་པའི་དོན་ཙམ་ལས་མི་སྟོན། སྩག་པ་ཕྱིར་རྫོགས། སྒོར་མོ་རྫོགས། སྲིད་དབང་མགོ་མཇུག་རྫོགས་ལྟ་བུ་བྲིས་ན་ཡིག་དོན་ལ་གོ་རྒྱུ་མེད། ནམ་རྒྱུན་ཁ་སྐད་དུ་རྫོགས་ལྟ་བུར་རྗོད་པ་ནི། ད་བར་མཁས་པས་དཔྱད་རིན་མ་མཐོང་བ་དང་། དཀྱུས་མས་དོ་སྣང་མ་བྱས་པར་རྒྱུན་རིང་ལུས་ཁར། ངག་ཐོག་ཏུ་ལྷན་སྐྱེས་སུ་ཡོད་པའི་སྩོགས་དེ་ཉིད་རི་མོའི་ལམ་དུ་མཐོང་རྒྱུ་མེད་ཅིང་། སྩོག་དང་རྫོགས་གཉིས་ཀྱི་སྒྲ་གདངས་ཀྱང་ཉེ་བས་མ་བརྟགས་མ་དཔྱད་པའི་སྒོ་ནས་རྫོགས་འདི་ཉིད་བྲིས་པར་སྣང་།

༨། སྩ་ང་། འདི་ནི་ཁྲོ་དང་། ལྕགས། རག ཟངས་མ། ཁ་ར་སོགས་ཀྱིས་བཟོས་པའི་སླ་ངའི་དོན་ཡིན་དགོས། ད་བར་ཡི་གེ་བ་རྣམས་ཀྱིས་སླ་དང་སྩ་གཉིས་འཇུག་པ་མཚུངས་པའི་གནད་མ་ཤེས་སྟབས། ཟངས་ཡིག་འདི་བྲིས་ཏེ། ཁྲོ་ཟངས། ལྕགས་ཟངས། ཁར་ཟངས་ལྟ་བུ་བྲིས་འདུག་ཀྱང་། དེ་དག་ཐམས་ཅད་ཀྱི་རྒྱུ་ཆ་ཟངས་མིན་སྟབས་ཟངས་ཡིག་མི་ཐོབ་ཅིང་། ཁ་སྐད་དུ་ཟང་ང་ལྟ་བུར་རྗོད་པ་ནི། སྩ་ངའི་སྒྲ་ཟུར་ཅུང་ཟད་ཉམས་པ་ཙམ་ཡིན།

༩། སྩེ་བོ། འདི་ནི་དེང་དུས་ཡིག་སྐད་དུ་སླེ་བོར་འབོད་པ་དེ་ཡིན། སླ་དང་སྩའི་འཇུག་པ་མཚུངས་ཚུལ་མ་ཤེས། སྩ་ཡིག་གི་སྒྲ་གདངས་ཀྱང་རྩ་ཡལ་དུའང་མ་སོང་བའི་བར་མཚམས་ཤིག་ཏུ་འབྲི་ཚུལ་མི་མཚུངས་པ་སྣ་ཚོགས་འབྱུང་གིན་ཡོད། དཔེར་ན་ཨ་མདོ་བ་དག་གིས་སིས་པོ་དང་། སེ་བོ། སི་སོ་ལྟ་བུར་རྗོད། བོད་རྒྱ་ཚིག་མཛོད་དུ་ཙེལ་པོ་བྲིས་འདུག ཡིན་རྒྱུ་ནི་སྩེ་བོ་རང་ཡིན་དགོས་པར་མཐོང་།

༡༠། སྩོ། འདི་ནི་ར་ལུག་དང་འབྲི་གཡག་སོགས་ཀྱི་གྲོད་པའི་ནང་གི་ཟས་སྙིགས་ཀྱི་དོན་ཡིན་དགོས་ཏེ། ཡིག་སྐད་དུ་སློ་བྲིས་ཡོད། དེང་དུས་ཀྱང་ངག་ནས་རྗོད་དུས་སྩོ་རང་དུ་རྗོད། འདིའི་གནད་མ་ཤེས་པའི་དབང་གིས་བོད་རྒྱ་ཚིག་མཛོད་ཆེན་མོར་བཙོ་བྲིས་འདུག་ཀྱང་། བཙོ་ནི་ཤ་སོགས་བཙོ་བྱའི་བྱ་ཚིག་མ་འོངས་པ་ཡང་ཡིན་ལ། ཡིག་སྐད་ཀྱི་སློ་དང་འབྲེ་ལ་རྩ་ནས་མེད་པ། དེང་དུས་ཀྱང་ངག་ནས་རྗོད་སྐབས་སྩོའི་སྒྲ་གདངས་རང་ཐོན་གྱིན་ཡོད་སྟབས་དོན་གྱིས་སྩོ་ཡིག་འདི་ཉིད་ལས་མ་འདས་པ་འདྲ།

གསུམ། མཇུག་བསྡུ།

ངས་རྒྱུན་རིང་བོ་ཞིག་ལ་སྩག་པའི་མིང་འབྲི་མ་ཤེས་པར་ལུས། ཕྱིས་ཚིག་མཛོད་རེ་ཟུང་དང་། རྩོམ་ཡིག་ཁག་ཅིག་ཏུ་ཚག་དང་ཚགས། ཙག་དང་རྩག་སོགས་ལག་ཏུ་གང་ཐེབས་བྲིས་འདུག་པ་མཐོང་ནས་སྒྲ་གདངས་ལ་གཞིགས་ཏེ་རྩག་ཡིག་འདི་ཉིད་བྲིས་པ་ཡིན། འོན་ཀྱང་བསམ་བློ་ཞིབ་ཏུ་བཏང་ན། ནམ་རྒྱུན་སླ་ཡིག་དང་སྩ་ཡིག་འདི་གཉིས་འཇུག་ཡུལ་མཚུངས་པ་མང་བའི་བློ་བསྐྱེད་བྱུང་། དེའི་ཐོག་ནས་བསམས་པས་གོང་དུ་དཔེ་མཚོན་དུ་བཀོད་པ་དེ་དག་རྙེད། གསང་བ་དེ་དག་ཤེས་ལྡན་པ་དག་ལ་དཔྱད་གཞིའི་ཆེད་འདིར་བཀོད་པ་ཡིན།

  འདི་བློ་ལ་མི་འཐད་མཁན་དང་། ཡིན་ལུགས་ཀྱི་རྒྱུ་མཚན་ར་འཕྲོད་ཀྱང་ཁས་ལེན་བྱེད་འདོད་མེད་མཁན། རྒྱུ་མཚན་ཅི་ཙམ་བཤད་ཀྱང་ར་འཕྲོད་རྒྱུ་གཏན་ནས་མེད་མཁན་དག་ལ་ནི་འོ་བརྒྱལ་ཞུ་འདོད་མེད། བདག་ལ་འཕྲད་པ་ལྟ་བུའི་དོགས་འཆར་ཡོད་ཀྱང་བསམ་གཞིགས་དཔྱིས་ཕྱིན་པ་མ་གནང་བའི་སྐྱེ་བོ་རྣམས་དང་། གནས་ལུགས་དང་རྒྱུ་མཚན་གྱི་རྗེས་སུ་འབྲང་མཁན་རྣམ་དཔྱོད་ལྡན་པ་འདྲ་ཡོད་ཚེ་ལེགས་སྐྱེས་སུ་ཕུལ་བ་ཡིན་པས་མུ་མཐུད་དཔྱད་པའི་རེ་བ་ཡོད།ད་དུང་ཞིབ་ཚགས་ཀྱི་ལུགས་སུ་བྱས་ན་ངོ་མཚར་ལྡན་པའི་དཔེ་མཚོན་གཞན་ཡང་རྙེད་རྒྱུ་ལ་ཐེ་ཚོམ་མེད་ཀྱང་། བསམ་གཞིགས་ཀྱི་སྒོ་མོ་གཅིག་གིས་གནས་ལུགས་མང་བོ་ར་འཕྲོད་འབྱུང་ཐུབ་པ་ཡིན་སྟབས་དེ་རིང་འཕྲལ་དུ་འདི་ཙམ་གྱིས་འཐུས་པར་བྱ།

          སྤྱི་ལོ་༢༠༡༠ ཟླ་༦ ཚེས༡ ཉིན་ཕུལ།

རྩོམ་སྒྲིག་པ། མཁའ་འགྲོ་ཚེ་བརྟན།

དཔྱད་མཆན 0 ཡོད།