སྐབས་དང་པོའི་སྦྲང་ཆར་རྩོམ་རིག་བྱ་དགའ་ཐོབ་པའི་བརྩམས་ཆོས་བདམས་བཀོད། — དགེ་འདུན་ཆོས་འཕེལ།

Redocn_2010011810574247.jpg

རྩོམ་པ་པོ་ངོ་སྤྲོད། 

201510151205466806.jpg

འཇུ་སྐལ་བཟང་ལགས་ནི། 1960ལོར་མགོ་ལོག་དར་ལག་དཔོན་སྐོར་དུ་སྐྱེས།  རང་ལོ་བདུན་པར་དཔོན་སྐོར་སློབ་ཆུང་དུ་ཞུགས།  སྔ་གཞུག་ཏུ་པེ་ཅིན་དང་ཟི་ལིང་སོགས་སུ་སློབ་གྲྭ་འགྲིམས།  རང་ལོ་ཉེར་བདུན་པར་བོད་ཀྱི་རྩོམ་རིག་རམ་འབྱམས་པའི་དམ་བཅའ་བཞག  ད་ལྟ་ཀྲུང་གོའི་གྲངས་ཉུང་མི་རིགས་རྩོམ་རིག་མཐུན་ཚོགས་ཀྱི་ཚོགས་མི་དང་།  མཚོ་སྔོན་ཞིང་ཆེན་རྩོམ་པ་པོ་མཐུན་ཚོགས་ཀྱི་ཚོགས་གཙོ་གཞོན་པ་སོགས་ཀྱི་ཞོར་འགན་འཁུར་ཅིང་། བོད་རྒྱ་སྐད་ཡིག་ཞུས་ཆེན་གྱི་ལོ་ཙྰ་བའི་ཐོབ་མིང་འཛིན་ལ། བོད་ཀྱི་སྐད་ཡིག་དང་གནའ་རྩོམ་སྐོར་གྱི་ཕྱག་ལས་གནང་བཞིན་ཡོད། 1976ལོར་མཚོ་སྔོན་མི་རིགས་སློབ་གླིང་གི་རིག་གཞུང་དུས་དེབ་དུ་སྙན་ངག་དུས་ཀྱི་རྣམ་པ་གསར་བ་ཞེས་པ་བཀོད་པ་ནས་བཟུང་རིམ་གྱིས་རྩོམ་རིག་གསར་རྩོམ་གྱི་ལམ་ལ་ཞུགས་ནས་སྔ་གཞུག་ཏུ་བོད་ཀྱི་དུས་དེབ་མང་པོའི་སྟེང་སྙན་རྩོམ་དང་རྩོམ་རིག་དཔྱད་བརྗོད། རྩོམ་རིག་བསྒྱུར་རྩོམ་སོགས་མང་ཙམ་སྤེལ། དེ་ལས་སྐོར་ཞིག་བོད་ཀྱི་བཏུས་དེབ་མང་པོར་བསྡུས་ཤིང་།  འགའ་ཞིག་སློབ་གྲྭ་ཆེ་འབྲིང་ཆུང་གསུམ་གྱི་བོད་ཡིག་བསླབ་གཞིར་བདམས།  གཞན་ཁོང་གི་སྙན་རྩོམ་ལ་བོད་དང་། ཨ་མ། མ་ཎི།  གྲུ་ག་གཞན་ཞིག་ནས་མཐོང་བའི་འཇིག་རྟེན་སོགས་དབྱིན་ཇི་དང་ཧྥ་རན་སི་སོགས་ཀྱི་ཡི་གེར་བསྒྱུར་ནས་རྒྱལ་ཁབ་དེ་དག་གི་རྩོམ་རིག་དུས་དེབ་ཏུ་འཁོད། ཁོང་ལ་སྔ་གཞུག་ཏུ་ཀྲུང་གོའི་ཀྲོང་ཀྲུང་ཝིན་རྩོམ་རིག་བྱ་དགའ་སོགས་སྙན་རྩོམ་དང་རྩོམ་རིག་གསར་རྩོམ་གྱི་བྱ་དགའ་མང་ཙམ་ཐོབ།  གངས་འདབས་ཀྱི་སེམས་པ་དང་། སྙན་ངག་གི་རྣམ་བཤད་།  གངས་གྲོང་གི་རླུང་སོགས་རྩོམ་རིག་གསར་རྩོམ་དང་ཞིབ་འཇུག་ཕྱོགས་ཀྱི་ཆེད་དེབ་པར་ཏུ་བསྐྲུན་ཡོད།  །

རྩོམ་པ་པོའི་ངོ་སྤྲོད་ནི<<དེང་རབས་བོད་ཀྱི་རྩོམ་པ་པོའི་ལོ་རྒྱུས་དང་བརྩམས་ཆོས་དཀར་ཆག>>ལས་བཀོད།

བྱ་དགའ་ཐོབ་པའི་བརྩམས་ཆོས། 

དགེ་འདུན་ཆོས་འཕེལ།

འཇིག་རྟེན་འཇིག་རྟེན་དུ་ཤེས་པ་ནས་བཟུང་།

ཁྱེད་རང་དགོད་སླ་ལ་ངུ་ཡང་སྐྱེན།


ཐ་སྙད་ཀྱི་རྫ་བུམ་ཆེ་ཆུང་དུ་མ།

སིལ་བུར་བཅག་སྟེ།

ནམ་མཁའ་དང་ནམ་མཁའ་ཡུག་གཅིག་བསྲེས། 

རེ་དོགས་ཀྱི་སྐུད་པ་རྐྱ་ཞིག་ཀྱང་། 

རྣམ་གཞག་གི་ཁབ་མིག་ཇི་ལྟར་སྐྱེད། 


གཅིག་ནི་ཡོད་པའམ་ཡིན་པ་དང་།

ཅིག་ཤོས་ནི་མེད་པ་དང་མིན་པའི་མིག་ཟུང་དེ།

ཇི་ལྟར་བགྲད་ཀྱང་།

ཁྱེད་རང་མི་ཤོང་བས།

སྐུ་ན་ལྔ་བཅུའི་གྲངས་ལ་ཉེ་བའི་ཚེ།

(མིན — ལོ་གྲངས་ལྔ་བཅུ་ནི།

དུས་ཀྱི་བགྲོད་པ་ལགས་ཀྱི།

ཁྱོད་ཀྱི་ན་ཚོད་ག་ལ་ཡིན།

ཁྱེད་ཀྱིས་སྡོམ་ཚིག་བགྲེས་པོ་ཞིག་བཞག་མེད་ལ།

རྒས་འཁོགས་ཀྱི་སྙན་ངག་ནི་དེ་བས་ཀྱང་བྲིས་མ་མྱོང)

འཇིག་རྟེན་གྱི་མགོ་བོ་ཁྲག་ལ་བསྒྲེས་ཏེ། 

འཇིག་རྟེན་ལས་འདས་པའི་སྒོ་གླེགས་བརྡུངས་པ་ན།

བདག་གིས་ནི་རབ་རིབ་ཀྱི་ས་སྲོད་ཅིག་ལ།

ཁྱེད་རང་ལན་མེད་པའི་འདྲི་རྟགས་དུ་མ་ལས་གྲུབ་པའི། 

ལྕགས་ཐག་རིང་པོ་ཞིག་དྲུད་དེ།

ས་སྒང་གི་གངས་ཐིག་མཐོ་ཤོས་ལས།

དལ་བུར་བཞུད་པ་མཐོང་།

སྡིག་བོའུ་ཁྲ་རིང་གི་ཁ་ན་འཐིབས་པའི།

རྫས་དུད་མོག་པོ་དེ་ཡུན་གྱིས་དྭངས་པ་ན།

ཁྱོད་ཀྱི་བང་སོ་དེ།

ལོ་རྒྱུས་ཀྱི་དཀྱོགས་མཚམས་ཤིག་ནས་རྙེད་བྱུང་།

རྩོམ་སྒྲིག་པ། དོ་རྒྱ་དོན་གྲུབ་ཚེ་བརྟན།

དཔྱད་མཆན 0 ཡོད།