སྐབས་དང་པོའི་སྦྲང་ཆར་རྩོམ་རིག་བྱ་དགའ་ཐོབ་པའི་རྩོམ་པ་པོ་དང་བརྩམས་ཆོས་བདམས་བཀོད།

བརྩེ་ལྡན་གྱི་དྲ་གྲོགས་རྣམ་པ།  སྐུ་ཁམས་བཟང་། 

ཀྲུང་གོ་བོད་ཀྱི་དྲ་བ་ནི་རྒྱལ་ཁབ་ཕྱི་ནང་ཀུན་ན་དགའ་བསུ་ཆེན་པོ་ཐོབ་པའི་གསར་འགྱུར་དང་རྩོམ་རིག བརྙན་ཟློས།  རོལ་མོ་སོགས་སྣ་འཛོམས་ཀྱི་དྲ་བ་ཞིག་ཡིན་ལ། རྒྱ་ཆེའི་ཀློག་པ་པོ་རྣམ་ཀྱི་རེ་འདུན་སྐོང་ཆེད། དེ་རིང་ནས་བཟུང་ངེད་དྲ་བས་སྐབས་སོ་སོའི་སྦྲང་ཆར་རྩོམ་རིག་བྱ་དགའ་ཐོབ་པའི་རྩོམ་པ་པོ་དང་བརྩམས་ཆོས་རྣམས་རེ་མོས་སུ་ཀྲུང་གོ་བོད་ཀྱི་དྲ་བའི་རྩོམ་རིག་ལེ་ཚན་གྱི་ཆེད་སྒྲིག(www.tibet3.cn)དང་འཕྲིན་སྟེགས(TBTnews)སུ་འགོད་རྒྱུ་ཡིན་པས། སྐུ་ཉིད་ཀྲུང་གོ་བོད་ཀྱི་དྲ་བར་ཕེབས་པར་དགའ་བསུ་ཞུ། 


རྩོམ་པ་པོ་ངོ་སྤྲོད།

1.jpg

སྐྱབས་རྗེ་བླ་མ༧ཤར་གདོང་བློ་བཟང་བཤད་སྒྲུབ་རྒྱ་མཚོ།

ངེས་པ་དོན་གྱི་དགེ་བའི་བཤེས་གཉེན་ཆེན་མོ་རྗེ་ཤར་གདོང་བློ་བཟང་བཤད་སྒྲུབ་རྒྱ་མཚོ་མཆོག་ནི། སྤྱི་ལོ༡༩༢༢ལོར་མཚོ་སྔོན་ཞིང་ཆེན་དཔའ་ལུང་རྫོང་ཁོངས་བྱ་ཁྱུང་དགོན་པའི་ཉེ་འདབས་ཀྱི་གུང་ཡེ་དགོན་ཚར་ཞེས་པའི་གྲོང་སྡེར་ཡབ་གཟུངས་ཐར་དང་ཡུམ་མཚོ་སྐྱིད་གཉིས་ཀྱི་སྲས་སུ་འཁྲུངས། མ་ཡུམ་གྱི་ལྷུམས་སུ་བཞུགས་དུས་ནས་སེམས་དཔའ་ཆེན་པོ་ཁ་གྱ་འཇམ་དབྱངས་དཔལ་ལྡན་གྱིས་ཤར་གདོང་སྐུ་ཕྲེང་བཞི་བའི་ཡང་སྲིད་དུ་ངོས་འཛིན་མཛད། དགུང་ལོ་བདུན་གྱི་སྟེང་དགེ་ལྡན་བསྟན་པའི་འབྱུང་གནས་དཔལ་ལྡན་བྱ་ཁྱུང་ཐེག་ཆེན་ཡོན་ཏན་དར་རྒྱས་གླིང་དུ་གདན་དྲངས་ཤིང་རྗེ་བེ་སི་རིན་པོ་ཆེ་བློ་བཟང་བསྟན་པ་རྒྱ་མཚོའི་དྲུང་ནས་རབ་ཏུ་བྱུང་སྟེ་མཚན་བློ་བཟང་བཤད་སྒྲུབ་རྒྱ་མཚོར་གསོལ། སན་ཁྲོན་ཨ་ལགས་ཡཱང་ཀྱཱ་བློ་བཟང་བསྟན་པའི་རྒྱལ་མཚན་སོགས་སྐྱེས་ཆེན་དུ་མ་ཚུལ་བཞིན་དུ་བསྟེན་ནས་ཡི་གེ་འབྲི་ཀློག་དང་སུམ་རྟགས་དག་གསུམ། སྒྲ་སྙན་ངག་སྐར་རྩིས་སོགས་ཐུན་མོང་གི་རིག་གནས་ལ་གསན་སྦྱོང་མཛད་ཅིང་དཔྱིས་ཕྱིན་པར་མཁྱེན། མཁས་གྲུབ་ཆེན་པོ་རྗེ་འཇིགས་མེད་དམ་ཆོས་རྒྱ་མཚོ་དང་། དཔལ་ཚེ་ཏན་ཞབས་དྲུང་འཇིགས་མེད་རིགས་པའི་བློ་གྲོས་རྣམ་གཉིས་ཀྱི་དྲུང་དུ་སྔ་ཕྱིར་མདོ་སྔགས་གཞུང་ལུགས་རབ་འབྱམས་ལ་ཐོས་བསམ་རྒྱ་ཆེར་མཛད་ཅིང་། འཛིན་གྲྭ་རིམ་བརྒྱུད་མཐར་ཕྱིན་ཏེ་བཀའ་བཅུ་རབ་འབྱམས་པའི་མིང་བཏགས་བླངས། བསྟན་པའི་གསལ་བྱེད་ཆེན་མོ་བླ་བྲང་བླ་ཁོ་རིན་པོ་ཆེ་དང་། རྡོ་སྦིས་དགེ་བཤེས་ཤེས་རབ་རྒྱ་མཚོ་རིན་པོ་ཆེ་སོགས་ལས་ཀྱང་དབང་ལུང་ཁྲིད་མན་ངག་གི་བདུད་རྩི་མང་དུ་མནོས་ཤིང་མཁས་པའི་གྲགས་པ་རིམ་གྱིས་འབར། ཁྱད་པར་དུ་ཁོང་གི་ལམ་རིམ་ཆེན་མོའི་ཤིང་པར་ལ་ཞུ་དག་ཞིབ་གསལ་གནང་བའི་ཡོན་ཏན་གྱིས་ཐུགས་ཡིད་འཕྲོག་སྟེ་རྗེ་འཇིགས་མེད་དམ་ཆོས་རྒྱ་མཚོ་མཆོག་ནས་མཁྱེན་རབ་ཀྱི་དབང་ཕྱུག་ཤར་གདོང་སྤྲུལ་བའི་སྐུ་ཞེས་རྗེས་སུ་ཡི་རངས་ཀྱི་མེ་ཏོག་འཐོར་ཞིང་། རྡོ་སྦིས་དགེ་བཤེས་རིན་པོ་ཆེ་མཆོག་ནས་ཀྱང་བྱ་ཁྱུང་གི་ས་དཀར་ནང་ན་གསེར་སེར་བོ་རྡོག་རྡོག་ཅིག་འདུག་ཅེས་དོན་དང་མཐུན་པའི་བསྔགས་བརྗོད་བླ་མེད་མཛད། ༡༩༥༦ལོར་མཚོ་སྔོན་མི་རིགས་སློབ་གྲྭ་ཆེན་མོས་གདན་ཞུས་ལྟར་སློབ་གྲྭ་དེ་གའི་བོད་ཡིག་དགེ་རྒན་གྱི་འགན་བཞེས་ཏེ་སྔ་ཕྱིར་བོད་ཀྱི་བརྡ་སྤྲོད་དང་རྩོམ་རིག སྙན་ངག་བཅས་ཀྱི་དཔེ་ཁྲིད་མཛད་ཅིང་སློབ་མའི་བློ་དང་འཚམས་པའི་བསླབ་གཞི་དུ་མའང་རྩོམ་སྒྲིག་གནང་། ༡༩༥༨ལོར་མ་ཉེས་ཁ་གཡོགས་ཐེབས་ཤིང་དེ་ནས་ལོ་ཉི་ཤུའི་རིང་ལ་ལུས་སེམས་གཉིས་ཀས་འོ་རྒྱལ་ཆེན་པོ་མྱངས་ཀྱང་། དམ་པའི་རང་རྟགས་མ་ཉམས་པའི་ངོ་མཚར་ལོ་རྒྱུས་མི་ཉུང་བ་ཡོད་པར་གྲགས། ༡༩༧༩ལོར་དཀར་འདོན་བྱས་ཏེ་སླར་ཡང་མཚོ་སྔོན་མི་རིགས་སློབ་གྲྭ་ཆེན་མོའི་གྲངས་ཉུང་མི་རིགས་སྐད་ཡིག་སྡེ་ཁག་གི་དགེ་རྒན་ཆེན་མོའི་ཁུར་བཞེས་ཐོགས་ཕྱིར་སློབ་གྲྭ་ཆེན་མོ་བ་དང་། ཞིབ་འཇུག་སློབ་མ། དགེ་རྒན་བཅས་ལ་གང་ལ་གང་འཚམ་གྱིས་བོད་ཀྱི་སྲོལ་རྒྱུན་རིག་གནས་ཏེ་ནང་དོན་རིག་པ་དང་། ཚད་མ་རིག་པ། གནའ་རབས་རྩོམ་རིག སྙན་ངག་བཅས་བུམ་པ་གང་བྱོའི་ཚུལ་དུ་དཔེ་ཁྲིད་མཛད་དེ་བོད་ཀྱི་རིག་གནས་ཉམས་པ་སོར་ཆུད་དང་མ་ཉམས་གོང་དུ་སྤེལ་བར་བྱས་རྗེས་བླ་མེད་བཞག་པས་སྙན་པའི་གྲགས་པ་གངས་ལྗོངས་ཡོངས་སུ་ཁྱབ། ཁྱད་པར་དུ་ཁོང་རིན་པོ་ཆེའི་ཁོག་ན་ཡོན་ཏན་གྱི་གཏེར་བརྡོལ་ཀྱང་ཕྱི་རུ་ཁེངས་ཤིང་དྲེགས་པའི་ཉམས་ཡེ་ནས་མེད་པ། རྙེད་པ་དང་བཀུར་བསྟི་དོན་དུ་མི་གཉེར་ཞིང་འཚོ་བ་འདོད་ཆུང་ཆོག་ཤེས་ལྡན་པ། རིས་མེད་ཐུགས་རྗེ་ཀུན་ལ་ཁྱབ་ཅིང་གདུལ་བྱའི་རེ་བ་ཡིད་བཞིན་དུ་སྐོང་བའི་ཡོན་ཏན་གྱིས་ཀུན་གྱི་ཡིད་དབང་ཅིག་ཅར་དུ་འཕྲོག་པས་དད་པའི་སྙིམ་པ་སྙིང་གར་མི་སྦྱོར་བ་གཅིག་ཀྱང་མེད། ༡༩༨༥ལོར་ལས་འཁྱུར་ངལ་གསོ་བྱས་ཟིན་ནའང་དཔེ་ཁྲིད་ཀྱི་དགོས་མཁོ་ལྟར་ཡང་བསྐྱར་སློབ་གྲྭའི་གདན་ཞུས་དང་དུ་བླངས་པའི་ཐོག  ད་དུང་ནུབ་བྱང་མི་རིགས་སློབ་གྲྭ་ཆེན་མོ་དང་། མཚོ་སྔོན་སློབ་གསོ་སློབ་གླིང་གི་དགེ་སློབ་རྣམས་ཀྱི་རེ་བ་ལྟར་དངོས་ཕེབས་དཔེ་ཁྲིད་གནང་སྟེ་འདོད་པའི་རེ་བ་ཡིད་བཞིན་དུ་བསྐངས་པ་ལས། ཁོང་གི་སྐུ་ཚེ་གང་བོ་མི་རིགས་སློབ་གསོའི་ལས་དོན་ལ་ཕུལ་བའི་སྙིང་སྟོབས་དེ་གསལ་བར་མཚོན་ཐུབ་པ་ཡིན། ཁོང་གིས་ལོ་ངོ་བཅུ་ཕྲག་འགའི་རིང་ལ་དངོས་སུ་བསྐྱངས་པའི་རིགས་སོ་སོའི་སློབ་མ་ནི་རང་ཞིང་གི་ལས་གནས་སོ་སོར་ཐང་མ་བརྡལ་བ་ཇི་བཞིན་ཁྱབ་ཡོད་པ་དང་། དེའི་ནང་ནས་ལ་ལ་ནི་ཕུལ་དུ་བྱུང་བའི་སྲིད་འཛིན་གྱི་འགོ་འདྲེན་དུ་གྱུར་ཏེ་སྤྱི་ཚོགས་ཀྱི་ཕན་བདེའི་ལས་དོན་ལ་གཞོལ། ཁ་ཅིག་ནི་སློབ་གྲྭ་ཆེ་འབྲིང་ཆུང་གསུམ་གྱི་དགེ་རྒན་དུ་གྱུར་ཏེ་ཕ་མས་བུ་ལ་ཇི་བཞིན་མི་རབས་གསར་བ་གསོ་སྐྱོང་གི་ལས་ལ་བརྩོན།འགའ་ཤས་ནི་ཆེད་ལས་སྣ་ཚོགས་ཀྱི་རྐང་འཛིན་དུ་གྱུར་ཏེ་རང་གི་བློ་གྲོས་ཀྱི་རྩལ་དང་སྟོབས་ལ་བརྟེན་ནས་མི་རྣམས་ལ་བསམ་པའི་ལོངས་སྤྱོད་དང་དངོས་པོའི་ལོངས་སྤྱོད་འཛད་དུ་མེད་པ་གསར་སྐྲུན་བྱེད་བཞིན་མཆིས་པས། ཁོང་ནི་བོད་ཀྱི་མཁས་པ་རྒན་པའི་ཁྲོད་ནས་མི་རིགས་སློབ་གསོའི་ཁྲིད་སྟེགས་སུ་བཞུགས་ཡུན་ཆེས་རིང་ཞིང་བཀའ་དྲིན་ཆེས་ཆེ་བའི་དགེ་རྒན་ཆེན་མོ་ཞིག་ཡིན་ཞེས་ཀུན་ལ་སྨྲ་བར་སྤོབས་སོ།།

4.jpg

༡༩༨༧ལོར་པཎ་ཆེན་སྣང་བ་མཐའ་ཡས་༧བློ་བཟང་འཕྲིན་ལས་ལྷུན་གྲུབ་ཆོས་ཀྱི་རྒྱལ་མཚན་དཔལ་བཟང་བོའི་བཀའ་ལུང་ལྟར་ཀྲུང་གོའི་བོད་བརྒྱུད་ནང་བསྟན་སློབ་གླིང་གི་དགེ་རྒན་དུ་དངོས་ཕེབས་ཀྱིས་གྲུབ་མཐའ་རིས་མེད་ཀྱི་བོད་སོག་གི་བླ་སྤྲུལ་བརྒྱ་ཕྲག་དུ་མར་དབྱར་ཟླ་བཞི་བའི་ཚེས་བཅོ་ལྔའི་དུས་ཆེན་གསུམ་འཛོམས་ཀྱི་ཉིན་པཎ་ཆེན་ཐམས་ཅད་མཁྱེན་པས་བྱང་ཆུབ་ལམ་རིམ་ཆེན་མོའི་དབུ་བཙུགས་ནས༼འཛམ་གླིང་མཁས་པ་ཡོངས་ཀྱི་གཙུག་གི་བརྒྱན༽ཞེས་པའི་བར་ཐུགས་ཡིད་ཤིན་ཏུ་དགྱེས་པའི་སྒོ་ནས་བཤད་ཁྲིད་གནང་ནས་༼ད་ལྟ་མཁས་བཙུན་བཟང་གསུམ་གྱི་བདག་པོ་ཨ་ལགས་ཤར་གདོང་ཚང་ཡིན་དེ་རིང་ནས་བཟུང་ཁོང་གིས་ངའི་ཚབ་བྱེད་ནས་ཁྱེད་ཅག་ལ་བྱང་ཆུབ་ལམ་རིམ་ཆེན་མོའི་ཁྲིད་གནང་རྒྱུ་ཡིན༽གསུངས་ནས་ལམ་རིམ་གྱི་དཔེ་ཆ་བླ་མ་རིན་པོ་ཆེའི་ཕྱག་ཏུ་གནང་། དེ་ནས་མཉམ་མེད་ཙོང་ཁ་བས་མཛད་པའི་བྱང་ཆུབ་ལམ་རིམ་ཆེན་མོ་ཞེས་པའི་མཚན་བྱང་ལ་དུས་ཚོད་བཞི་ཙམ་ལ་ཟབ་ཁྲིད་རྒྱ་ཆེར་མཛད་པས་མཁས་པའི་མཚན་སྙན་འཐོབ་པའི་བླ་མ་དང་དགེ་བཤེས་མཐའ་དག་ངོ་མཚར་བའི་གནས་སུ་གྱུར། དེ་ནས་བཟུང་སྟེ་ལུང་རིགས་དཔེ་གསུམ་གྱི་མཐའ་སྤྲོས་ཤིང་། མན་ངག་ཞལ་ཤེས་ཉམས་མྱོང་དང་བཅས་པའི་སྒོ་ནས་བྱང་ཆུབ་ལམ་རིམ་ཆེན་མོའི་ཟབ་ཁྲིད་གནང་བ་གཙོ་བྱས་ཏེ། དོན་གྱི་ལམ་རིམ་བེའུ་བུམ་སྔོན་པོ་དཔེའི་ལམ་རིམ་ཆོས་དཔེ་རིན་ཆེན་སྤུངས་བ།ལམ་རིམ་བློ་སྦྱོང་དང་བླ་མ་མཆོད་པའི་ཁྲིད་ཡིག་ལ་སོགས་པའི་གཞུང་། གནད་ཀྱི་མདུད་རྒྱ་འགྲོལ་དཀའ་བ་མཐའ་དག་བྲག་ཐོག་ནས་ཆུ་འཕྱོ་དང་ནམ་མཁའ་ལ་མདུང་བསྐོར་བ་བཞིན་ཕངས་མེད་དུ་སྩལ་བས་གྲུབ་མཐའ་རིས་མེད་ཀྱི་བླ་སྤྲུལ་ཀུན་གྱི་ཡིད་དབང་རབ་ཏུ་འཕྲོག་སྟེ་གཙུག་གི་རྒྱན་དུ་བཀུར་བ་དང་དགེ་བཤེས་པོ་ཏོ་བ་གཉིས་པའི་མཚན་རང་ཤུགས་ཀྱིས་ཐོགས། ད་དུང་རྒྱ་བོད་ཀྱི་དགོན་ཁག་མང་བོར་ཕེབས་ནས་དད་ལྡན་སེར་སྐྱ་བགྲང་ལས་འདས་པ་སྨིན་གྲོལ་གྱི་ལམ་དུ་བཀོད་པར་མ་ཟད་རྒྱུན་གྱི་གླེང་མོལ་ཡན་གྱི་གསུང་བཤད་རྣམས་སུའང་གདུལ་བྱ་རང་རང་གི་བློ་དང་འཚམ་པའི་སྐྱབས་འགྲོ་དང་ལས་འབྲས་སོགས་ལམ་རིམ་གྱི་ཆོས་སྐོར་རྣམས་ཁ་བརྡའི་ཚུལ་དུ་གནང་བ་དང་། གཞན་མི་རིགས་རང་གི་སྐད་ཡིག་སློབ་གསོའི་ཕྱོགས་ལའང་ཐུགས་ཁུར་དང་རྒྱབ་སྐྱོར་བླ་མེད་གནང་བ་ལ་༼ཉན་ཤེས་ན་ཨ་ལགས་ཤར་གདོང་ཚང་གི་ཁ་བརྡའི་ནང་ན་མན་ངག་མང་པོ་ཡོད།༽ཅེས་ཆུ་བཟང་རྡོ་རྗེ་འཆང་གིས་དངོས་སུ་གསུངས། རྒྱལ་བའི་གསུང་རབ་བཀའ་དང་དགོངས་འགྲེལ་ཀུན་ལ་ནང་བྱན་ཆུབ་པ་དང་ངེས་པ་གཏིང་ནས་རྙེད་པས། ཕྱི་ནང་གི་མཁས་པ་སུ་ཞིག་གིས་དོན་མི་འདྲ་བའི་དྲི་བ་གང་མཛད་ཀྱང་། རྒྱལ་བའི་དགོངས་པ་དང་མཐུན་པར་མ་ཟད་སྐྱེ་བོ་དེའི་བློ་དང་འཚམ་པའི་དྲི་ལན་བློ་ཐོག་ཏུ་འབབ་པ་རེ་གནང་རྒྱུ་ཡོད་པ་ནི་གཞུང་ལུགས་གདམས་པར་ཤར་བའི་རྟགས་མཚན་དུ་འདོད་དོ། ཁོང་གིས་བསྟན་འགྲོའི་དོན་རླབས་སྒྲུབ་པའི་མཛད་བཟང་གིས་འཕྲིན་ལས་དབྱར་མཚོ་བཞིན་དུ་འཕེལ་ཞིང་རྒྱལ་ཁབ་ཕྱི་ནང་གི་མི་རིགས་ཐ་དད་པའི་དད་ལྡན་རྣམས་བུང་བའི་ཚོགས་འཁོར་བ་བཞིན་དྲུང་དུ་འདུས་པའི་ངོ་མཚར་ཁྱད་ཆོས་བསམ་བརྗོད་ཡུལ་ལས་འདས་སོ།།

3.jpg

མཉམ་མེད་བུ་རམ་ཤིང་བའི་བསྟན་པ་དྲི་མ་མེད་པ་འདི་ཉིད་འཛིན་སྐྱོང་སྤེལ་གསུམ་དང་འགྲོ་དོན་རླབས་ཆེན་སྒྲུབ་སླད་ངེས་དོན་གྱི་མཁས་བཙུན་བཟང་གསུམ་འཛོམས་པའི་དགེ་བའི་བཤེས་གཉེན་ཆེན་མོ་ཁོང་གིས་ཆུང་བྱིས་པའི་དུས་ནས་བཟུང་ཆུ་ཚོད་སྐར་ཆ་རེ་ཡང་ཆུད་ཟོས་སུ་མ་བཏང་བར་དམ་པའི་ཆོས་ལ་འཆད་རྩོད་རྩོམ་གསུམ་དང་འགྲོ་དོན་སྒྲུབ་པ་ངོ་ལྐོག་བྲལ་བའི་སྒོ་ནས་ཁོང་གི་སྐུ་ཚེ་གང་བོ་བསྟན་འགྲོའི་དོན་དུ་ཕུལ་ཏེ། སྤྱི་ལོ་ཉིས་སྟོང་ལོའི་ཧོར་ཟླ་དྲུག་པའི་ཚེས་བཅུ་གསུམ་ལ་མདོ་སྨད་བསྟན་པའི་ཆུ་འགོ་དཔལ་ལྡན་བྱ་ཁྱུང་ཐེག་ཆེན་ཡོན་ཏན་དར་རྒྱས་གླིང་ནས་རྒྱ་བོད་སོག་གསུམ་གྱི་གདུལ་བྱ་གྲངས་མེད་ལ་དཔལ་དུས་ཀྱི་འཁོར་ལོའི་དབང་ཆེན་གནང་ནས་སྐལ་ལྡན་བུ་སློབ་རྣམས་ལ་བྱིན་རླབས་བདུད་རྩིའི་ཆར་ཆེན་ཕབ་པའི་ཆོས་ཀྱི་མཛད་སྒོ་ལེགས་པར་གྲུབ་རྗེས་ཀྱི་ཉིན་གསུམ་པར་ཁོང་གི་བུ་སློབ་དག་ལ་བསྟན་འགྲོའི་དོན་ཆེན་ཁུར་དུ་འཁྱེར་བ་ལ་སྙིང་སྟོབས་དང་སྤོབས་པ། བརྩོན་འགྲུས་ཆེན་པོས་སྒྲུབ་དགོས་ཚུལ་གྱི་ཞལ་གདམས་གལ་ཆེན་གནང་སྟེ་སྐུའི་བཀོད་པ་དགོངས་པ་ཆོས་དབྱིངས་སུ་ཐིམ་སོང་།།

6.jpg

རྗེ་འདི་ཉིད་འཆད་པ་དང་རྩོད་པའི་ཡོན་ཏན་ལ་མངའ་བརྙེས་པར་མ་ཟད། རྩོམ་པའི་ཡོན་ཏན་ལའང་དབང་འབྱོར་བ་ཞིག་ཡིན་པས།གཞོན་དུས་ལེགས་བཤད་ཀྱི་རྩོམ་མི་ཉུང་བ་ཞིག་སྤེལ་མོད་ཀྱི། ལ་ལ་ནི་མི་ངེས་མེད་ཀྱི་ལག་ཏུ་འཁྱམས་པས་ལག་ཐོགས། ཕལ་ཆེར་ནི་དུས་ཀྱི་འཕོ་འགྱུར་གྱིས་ཁྱུར་མིད་བཏང་བ་ཤིན་ཏུ་ཕངས་ཆེ་བའི་གནས་སུ་གྱུར། རྗེ་འདི་བས་ཉེ་བའི་ལོ་བཅུ་ཕྲག་ལྷག་གི་རིང་ལ་སྔ་ཕྱིར་བརྩམས་པའི་ལེགས་བཤད་ཀྱི་རྩོམ་སྣ་ཚོགས་དང་ཁོང་གིས་དངོས་སུ་དཔེ་ཁྲིད་གནང་སྐབས་རྣམ་དཔྱོད་ལྡན་པའི་སློབ་བུ་འགས་ཟིན་བྲིས་སུ་བཏབ་པ་རྣམས་ལྡེབས་གཅིག་ཏུ་བསྒྲིགས་པ་ལ། རྩོམ་པ་པོ་རང་ཉིད་ཀྱིས་ལན་དུ་མར་སྤྱིར་བོད་ལ་རིག་གནས་འདི་འདྲ་རྒྱ་ཆེ་ཞིང་གཏིང་ཟབ་པ་ཡོད་པའི་ཐོག་མཁས་དབང་རིམ་བྱོན་གྱིས་བརྩམས་པའི་ལེགས་བཤད་ཀྱི་རྩོམ་གསེར་སྦྱང་བཙོ་མའི་རི་བོ་ལྟ་བུ་ཁྲི་ཕྲག་མང་པོ་བཞུགས་པ་ལ། ད་ལྟ་དེ་དག་ལ་སྦྱོང་མཁན་དང་གོ་མཁན། ཉམས་སུ་ལེན་མཁན་ནི་ཉིན་མོའི་སྐར་མ་ལྟ་བུར་གྱུར་ན། སྐྱེས་སྦྱངས་ཀྱི་ཡོན་ཏན་ནམ་མཁའི་མེ་ཏོག་གི་ཟེའུ་འབྲུར་ཆགས་པ་བདག་ལྟ་བུའི་ངག་འཆལ་ལ་འབྲས་བུ་ཅི་ཞིག་མཆིས་ཞེས་གསུངས་ཏེ་ཤིན་ཏུ་མི་དགྱེས་པའི་ཚུལ་མཛད་ཀྱང་། སློབ་བུ་ཚོས་པར་དུ་བཏབ་ན་ཕན་སླེབས་ཆེ་བས་ཅིས་ཀྱང་ཐུགས་འཁྲོལ་གནང་བར་ཞུ་ཞེས་ཡང་ཡང་ནན་གྱིས་བསྐུལ་བ་ལ་བཟློག་མ་ནུས་པས། དེ་ལྟ་ན་བྱེ་མའི་གསེབ་ཀྱི་གསེར་སིལ་མ་ལྟ་བུ་ལེགས་ཆ་རེ་གཉིས་རེ་ཡོད་ན་དེ་བཞིན་དང་། མ་རྟོགས་ལོག་རྟོག་གི་སྐྱོན་ཚབས་ཧ་ཅང་ཐལ་བ་ཡོད་ན། བསྲེགས་བཅད་བརྡར་གསུམ་དང་མཚུངས་པའི་དགག་སྒྲུབ་རྣམ་དག་བགྱིད་པ་རྒྱལ་བའི་དགོངས་པར་གནས་པས་དེ་བཞིན་མཛད་པར་ཞུ་ཞེས་པར་འདེབས་བྱས་ཆོག་པའི་ལྡེ་མིག་མཚོ་སྔོན་མི་རིགས་དཔེ་སྐྲུན་ཁང་ལ་གཏད་ཅིང་ཀློག་པ་པོ་ལ་ཕན་སླེབས་རེ་ཡོད་ན་དེ་ལས་ཆེ་བའི་དགེ་བ་མེད་ཅེས་གསུང་བཞིན་དུ་བརྩམས་ཡོན་སྐར་གང་ཡང་མེད་པར་བྱས་པའི་ཐོག་སྒོར་ཁྲི་གཉིས་ཀྱི་ཞལ་འདེབས་གནང་བ་ལ། ཁོང་གི་བུ་སློབ་རྣམ་དཔྱོད་ཅན་དག་གིས་ཕྱོགས་གཅིག་ཏུ་བསྒྲིགས་ནས་ཁྱོན་བསྡོམས་པོད་དྲུག་ཡོད་པ་དེ། མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་ཏེ་རྒྱ་ཆེ་བའི་ཀློག་མཁན་རྣམས་ཀྱི་སྤྱན་ལམ་དུ་བཀྲམ་པས། ཀློག་མཁན་རྣམས་ཀྱིས་ཀྱང་དགའ་བསུ་ཆེན་པོ་ཐོབ། གསུང་འབུམ་དེར༢༠༠༠ལོའི་ཟླ་དགུ་བར་ཞིང་ཆེན་བཅོ་ལྔའི་གྲོང་ཁྱེར་དང་རང་སྐྱོང་ཁུལ་གྱི་དཔེ་སྐྲུན་ཁང་བཅོ་བརྒྱད་ཀྱིས་བསྡུས་པའི་དཔེ་དེབ་དཔྱད་འདེམ་ཁྲོད་ཕུལ་བྱུང་དཔེ་དེབ་ཀྱི་བྱ་དགའ་ཐོབ་པ་དང་། ༢༠༠༡ལོའི་ཟླ༨པར་སྐབས་ལྔ་བའི་རྒྱལ་ཡོངས་བོད་ཡིག་དཔེ་དེབ་དཔྱད་འདེམ་ཁྲོད་བྱ་དགའ་ཨང་དང་པོ་ཐོབ། ཡང་ལོ་དེའི་ཟླ༡༢པར་པེ་ཅིན་དུ་སྐབས་ལྔ་བའི་མི་རིགས་དཔེ་དེབ་ཀྱི་བྱ་དགའ་ཨང་དང་པོ་ཐོབ། བྱ་དགའ་འདི་ལ་མཚོན་ན་ཀྲུང་གོའི་མི་རིགས་དཔེ་དེབ་ཀྱི་བྱ་དགའི་ཆེས་མཐོ་བའི་རྣམ་གྲངས་ཡིན།འདི་གའི་དཔེ་སྐྲུན་ཁང་གིས་སྙིང་ཐག་པ་ནས་བཀའ་དྲིན་ཆེ་ཞུ་ཞིང་།དགེ་བ་འདི་ཡིས་བོད་ཀྱི་རིག་གནས་སྔར་ལས་འཕེལ་ཞིང་རྒྱས་པར་གྱུར་ཅིག་གུ། །


ཁོང་གི་གསུང་འབུམ་གྱི་ནང་དོན་དང་ཁྱད་ཆོས།

སྤྱིར་ཁོང་གི་གསུང་རྩོམ་ནི་ཁ་གསལ་ཞིང་གོ་བདེ་བ་དང་། རྒྱས་བསྡུས་འཚམ་ཞིང་གནད་དུ་འཁེལ་བ་ཞིག་ཡིན་ལ། གསུང་འབུམ་དེབ་དང་པོ་རུ་ད་ལྟའི་སློབ་གྲྭ་ཆེན་མོ་བ་དང་ལས་དང་པོ་དག་གི་བློ་ཁ་དང་བསྟུན་ནས་ལམ་རིམ་ཆེན་མོའི་སྐྱེས་བུ་ཆུང་ངུ་དང་སྐྱེས་བུ་འབྲིང་གི་སྐབས་ཀྱི་བརྗོད་དོན་དག་གོ་སླ་བའི་ངང་ལེགས་པར་བཀྲལ་ཡོད། དེའི་རྗེས་རྟེན་འབྲེལ་བསྟོད་པ་དང་། བླ་མ་ལྔ་བཅུ་བའི་འགྲེལ་བ། འཕྲིན་ཡིག་གི་སྐོར། སྙན་རྩོམ་གྱི་སྐོར། བསླབ་བྱའི་སྐོར། པར་བྱང་སྨོན་ཚིག རྟོགས་བརྗོད་དང་གསོལ་འདེབས་ཀྱི་སྐོར།འཕྲིན་བཅོལ་གྱི་སྐོར། དཀར་ཆག་གི་སྐོར་སོགས་བསྡུས་ཡོད། པོད་གསུམ་པ་རུ་དཔེ་ཡི་སྒོ་ནས་དོན་སྟོན་པའི་དཔེ་ཆོས་རིན་ཆེན་སྤུངས་པའི་འགྲེལ་བ་མོས་ལྡན་ཡིད་ཀྱི་བདུད་རྩི་ཞེས་པ་དང་བློ་སྦྱོང་མཚོན་ཆ་འཁོར་ལོའི་བཤད་པ་བཀོད་ཡོད། པོད་བཞི་བ་རུ༼བེའུ་བུམ་སྔོན་པོའི་འགྲེལ་བ༽ལ་འགྲེལ་ལེགས་པར་བཏབ་ནས་སློབ་གཉེར་གནང་མཁན་རྣམས་ལ་གོ་བདེའི་ངག་གིས་བཀྲལ་ཡོད། པོད་ལྔ་བ་རུ་བློ་སྦྱོང་དོན་བདུན་མ་རྒྱས་པར་བཀོད་པའི་སྟེང་། འགྲེལ་བ་གསལ་ལ་མ་ནོར་བར་ཆ་ཚང་བར་གསུངས་ཡོད། པོད་དྲུག་པ་རུ་ཞི་ལྷག་གི་སྐོར་བཀོད་ཡོད་དོ། །

གོང་གསལ་གྱི་གསུང་རྩོམ་པོད་དྲུག་པོའི་ནང་དུ་ཁོང་གི་སྐུ་ཚེ་གང་བོར་མི་རིགས་སློབ་གསོ་དང་། བོད་ཀྱི་རིག་གནས་རྒྱུན་འཛིན་སྤེལ་གསུམ་གྱི་མཛད་རྗེས་བླ་མེད་བཞག་པའི་ངང་ཚུལ་དེ་ཡོངས་སུ་འདུས་ཡོད་པས། དེང་རབས་བོད་རིགས་ཤེས་ལྡན་ན་གཞོན་སུ་ཡིན་ཡང་ཁོང་གི་ལེགས་བཤད་བཙོ་མ་གསེར་དང་འདྲ་བའི་གསུང་རྩོམ་འདིར་མཇལ་བ་ཙམ་གྱིས་ངེས་ཤེས་ཆེན་པོ་འདྲོངས་པར་མ་ཟད། ཐུན་མོང་མ་ཡིན་པའི་བོད་ཀྱི་རིག་གནས་ཀྱི་བླ་ན་མཐོ་བའི་རང་བཞིན་ཡང་རྟོགས་ཐུབ་བོ། །

སྤྱིར་ཁོང་རིན་པོ་ཆེས་དགོངས་པ་ཆོས་དབྱིངས་སུ་བསྡུས་ཏེ་ངེད་ཅག་དང་ཁ་བྲལ་ནའང་ཁོང་གི་ཟུམ་པ་མེད་པའི་ཐུགས་རྗེ་ཡི་སྤྱན་ཟུང་ནི་ང་ཚོའི་སེམས་ན་རྡོ་ལ་རི་མོ་བརྐོས་པ་བཞིན་གསལ་ལེར་ཡོད་ལ། འགག་པ་མེད་པའི་གསུང་དབྱངས་ནི་ད་དུང་ང་ཚོའི་སྙན་ལམ་ན་ལྷང་ལྷང་དུ་གྲགས་བཞིན་ཡོད། ལྷག་པར་དུ་ཁོང་རིན་པོ་ཆེའི་གསུང་རྩོམ་རྣམས་ང་ཚོའི་འདྲེན་བྱེད་ཀྱི་ལམ་དུ་མངོན་པར་བསྟར་ཡོད་པས། ང་ཚོས་ཀྱང་ཁོང་གི་བཀའ་སློབ་ལྟར་འབད་བརྩོན་དང་དཀའ་སྤྱད་ཀྱི་སློབ་གཉེར་ཁུར་དུ་བླངས་ནས་བོད་ཀྱི་རིག་གནས་ལ་སྦྱངས་པ་ལེགས་པོ་ཞིག་བྱ་རྒྱུ་ནི་ཧ་ཅང་གལ་ཆེ་བར་སེམས་སོ། །

བདག་གི་བླ་མ་རིན་པོ་ཆེ་ཁོང་གི་རྣམ་ཐར་མདོར་བསྡུས་ཤིག་དཔེ་དེབ་དང་དྲ་ཐོག་ན་ཡོད་པ་རེ་གཉིས་གཞིར་བཞག་ནས་ཁོང་གི་སློབ་བུ་ཐ་ཤལ་བ་མི་ཁོམ་པའི་རྒྱལ་སྲས་ནས་བྲིས་པ་དགེ་བའི་རྒྱུ་གྱུར་ཅིག་གུ། །


བྱ་དགའ་ཐོབ་པའི་བརྩམས་ཆོས། 

རྟོགས་བརྗོད་གསེར་གྱི་མེ་ཏོག                      

ༀ་སྭ་སྟི།

བྱ་དཀའི་སྤྱོད་པ་འབུམ་ཕྲག་གིས། །

ཟག་མེད་ཆོས་ཀྱི་སྐུ་བརྙེས་ཏེ། །

འཕྲིན་ལས་ཉི་ཟླ་འབར་བའི་གཟིས། །

རྨོངས་སེལ་ཤྰཀྱ་སེང་གེར་འདུད། །

དགེ་མ་མངོན་དགའ་འོ་མའི་མཚོའི། །

ངང་མོ་བསིལ་བའི་རྔ་ཡབ་ཅན། །

ལེགས་གསུང་དྲི་ཟའི་རྒྱུད་མངས་གླུས། །

དྲན་པའི་རི་དྭགས་འཛིན་པ་སྩོལ། །

བྱེ་བ་ཕྲག་བརྒྱའི་འཇིག་རྟེན་ན། །

ཀུན་བཟང་ཉི་མའི་སྣང་གསལ་གྱིས། །

ཆེ་ལས་ཆེ་བའི་ཅོད་པན་རྩེ། །

ས་ལ་བསྙིལ་བས་དགེ་ལེགས་བྱིན། །

བློ་བཟང་འཕྲིན་ལས་ལྷན་གྲུབ་སྟེ། །

ཆོས་ཀྱི་རྒྱལ་མཚན་སྒྲེང་བའི་མགོན། །

སྙིང་གི་པདྨའི་ལྟེ་བ་ལ། །

བྱང་ཆུབ་བར་དུ་འབྲལ་མེད་བསྟེན། །

གང་གི་གསང་གསུམ་ཡོན་ཏན་མཐའ། །

གཞལ་ལ་འཇམ་དབྱངས་ངལ་བྱེད་ཀྱང་། །

སྐྲ་རྩེས་བླངས་པའི་ཐིགས་པ་ཙམ། །

བརྗོད་འདོད་སྙིང་གི་ཁུང་བུར་ཉལ། །

བདག་གིས་ཚེ་རབས་ཕྲེང་བ་རུ། །

གཟུངས་སྤོབས་ཤེས་རབ་མི་ཟད་པའི། །

གཏེར་ལ་འདོད་རྒུར་སྤྱོད་པའི་སླད། །

རྣམ་ཐར་སྙིང་བོ་བརྗོད་ལ་སྤྲོ། །

མི་འཇིགས་སྟོབས་བཅུའི་རྩལ་ལྡན་རྣམས། །

རང་ཉིད་གཤེགས་པའི་ལམ་པོ་ཆེར། །

མཁའ་ཉམས་ལུས་ཅན་བཀྲི་མཛད་པ། །

ལྷན་སྐྱེས་འགྱུར་མེད་རང་བཞིན་ཉིད། །

འཇིག་ལྟ་ཉི་ཤུའི་གཅོང་རོང་དུ། །

ལྷུང་བའི་ཉམ་ཐག་སྐྱེ་རྒུ་ལ། །

འཕྲལ་ཡུན་དགོས་འདོད་ནོར་བུའི་དཔྱ། །

ལྷུགས་པར་འཇོ་བ་དེ་རྨད་དོ། །

ཉིན་བྱེད་སྣང་བས་མི་མཚོན་པའི། །

སྤྲུལ་རབས་རྒྱ་མཚོའི་རྡུལ་གྲངས་ལས། །

བརྒལ་བས་མཐའ་ཡས་གདུལ་བྱ་ལ། །

སྨན་པའི་ལེགས་མཛད་བསམ་ལས་འདས། །

བྱིན་རླབས་ཉི་མའི་རྩེ་དགའ་དང་། །

དད་པའི་པདྨོ་ཕྲད་པ་ལས། །

དགེ་ལེགས་མི་ཟད་སྦྲང་རྩིའི་དཔལ། །

ཅིར་ཡང་འཕྲུལ་བ་དངོས་པོའི་གཤིས། །

འཇམ་དབྱངས་འཁོན་གྱི་གདུང་རྒྱུད་ལ། །

ཡེ་ཤེས་སྤྱན་གྱིས་མངོན་གཟིགས་ཏེ། །

བོས་མདོའི་ཡུལ་གྲུར་དག་པའི་སྐུས། །

ལྷུམས་སུ་ཞུགས་པའི་དགེ་མཚན་བསྟན། །

ལྷ་དང་བླ་མ་དགོངས་གཅིག་གིས། །

བློ་བཟང་ཆོས་ཀྱི་ཉི་མ་ཆེ། །

དགེ་ལེགས་རྣམ་པར་རྒྱལ་བ་དེའི། །

མི་འཇིགས་གདོང་ལྔའི་ཁྲི་ལ་བཀོད། །

རླབས་ཆེན་ཚོགས་གཉིས་འོ་མའི་བཅུད། །

གསོས་སུ་སྨིན་པ་སེང་གེའི་བུ། །

འཕྲིན་ལས་མཆེ་སྡེར་འབར་བ་ཞིག །

གངས་རིའི་རྩེ་མོར་མཆོང་བར་བརྩོན། །

རྒྱལ་བ་རྒྱལ་བྱེད་ཚལ་དུ་གཤེགས་པ་བཞིན། །

ཆོས་ཀྱི་ཉི་མའི་ཆོད་སྲིད་ཁྲི་འཕང་ལ། །

ཡོན་ཏན་ཏིལ་གྱི་གང་བུ་ལྟར་གྱུར་པ། །

མཚན་དཔེས་བརྒྱན་པའི་མཆོག་སྤྲུལ་གཞོན་ནུ་འགྱིང་། །

འཇིགས་མེད་འཕྲིན་ལས་ཆོས་ཀྱི་རྒྱ་མཚོ་ཆེར། །

བསླབ་ཚིགས་སྔ་མ་ཤྲ་མ་ཎེ་རའི་སྡོམ། །

ངེས་པ་ལྔ་བྲལ་ཉེས་མེད་ཕུན་ཚོགས་སུ། །

བཞེས་ཏེ་རྣམ་བྱང་ཞི་བའི་ལམ་དུ་ཞུགས། །

རྨོངས་མུན་ཐོས་པའི་སྒྲོན་མེ་མ་སྦྱངས་ན། །

བླང་དང་དོར་བྱའི་དེ་ཉིད་མི་མཐོང་བས། །

མཚན་ཉིད་བཅུ་ལྡན་བཤེད་གཉེན་དུ་མ་ལས། །

མདོ་རྒྱུད་སྦྲང་རྩིའི་དགའ་སྟོན་ཚད་མེད་བཞེས། །

གང་ཤར་དག་པའི་རོལ་བར་འཆར་བ་ཡི། །

གཟིགས་མོར་སྔོན་ནས་གོམས་པའི་བག་ཆགས་ཀྱིས། །

སྣང་གྲག་རིག་གསུམ་བདེ་སྟོང་རྣམ་རོལ་ཏུ། །

ཤར་བའི་ངང་ལ་ཉིན་དང་མཚན་དུ་འབྱམས། །

འདྲེན་པ་ཁྱོད་དང་གཟི་བརྗིད་རྒྱལ་བོའི་དབང་། །

གཉིས་མེད་གཉིས་སུ་སྣང་ཞིང་ཤར་བ་དང་། །

གཅིག་ཀྱང་དུ་མར་སྟོན་པའི་སྒྱུ་འཕྲུལ་ནི། །

སྒྱུ་མ་ལས་ཀྱང་སྒྱུ་མའི་ཆོ་འཕྲུལ་ཉིད། །

དགུང་གྲངས་རྒྱལ་སྲིད་གྲངས་སུ་སླེབས་པའི་དུས། །

མ་འོངས་དོན་རྣམས་མངོན་སུམ་མཛུབ་ཚུགས་སུ། །

སྟོན་པའི་རྡོ་རྗེའི་བཀའ་ལུང་འགྱུར་མེད་པ། །

གསུངས་པའི་དོན་དེ་དེ་བཞིན་མངོན་དུ་གྱུར། །

ཐུབ་དབང་གངས་རི་ལས་འོངས་པའི། །

རྟེན་འབྱུང་ཟབ་མོའི་ཉལ་འགྲོའི་རྒྱུན། །

ཀླུ་སྒྲུབ་ཐུགས་མཚོར་འཁྱིལ་བ་གང་། །

ཁྱོད་ཀྱི་རྣམ་དཔྱོད་ཧུབ་ཀྱིས་བཞེས། །

ཐོས་པའི་མེ་ཏོག་གྲངས་མང་ཡང་། །

བསམ་སྒོམ་སྦྲང་རྩིའི་བཅུད་མེད་ན། །

བུང་བའི་དགའ་སྟོན་མི་འགྱུར་ཏེ། །

རི་མོར་བྲིས་པའི་མར་མེ་བཞིན། །

དེ་ཕྱིར་ཐོས་བསམ་ལྗོན་པ་ལས། །

སྒོམ་པའི་འབྲས་བུ་ཆེར་སྨིན་པའི། །

སྐུ་བཞིའི་རོ་ལ་ལོངས་སྤྱོད་པ། །

མཁས་གྲུབ་རྣམ་ཐར་ཁྱོད་ཀྱིས་བཞེས། །

དཔག་མེད་བསྐལ་པའི་སྔ་རོལ་ནས། །

སྤངས་རྟོགས་མ་ལུས་མཐར་ཕྱིན་ཀྱང་། །

གང་ལ་དེ་འཚམ་ཐབས་མཁས་ཀྱིས། །

ལམ་ལ་སློབ་པའི་བརྟུལ་ཞུགས་བསྐྱངས། །

སྐྱེ་རྒུའི་རྨོངས་པའི་མུན་སེལ་བས། །

ཉིན་མོར་བྱེད་དང་མཚུངས་མོད་ཀྱང་། །

ཉི་མས་ཚ་གདུང་སྐྱེད་བྱེད་ལ། །

ཁྱོད་ཀྱིས་སྡུག་བསྔལ་ལྷག་མེད་འཇོམས། །

བསྟན་འགྲོའི་ཀུ་མུད་རྒྱས་མཛད་པས། །

མཚན་མོའི་མགོན་དང་ཆོས་མཚུངས་ཀྱང་། །

ཁྱོད་ཀྱི་ཡོན་ཏན་ཆ་ཤས་ནི། །

འགྲིབ་པ་ནམ་ཡང་མ་མཆིས་སོ། །

སྡིག་པའི་ནགས་ཚལ་སྲེག་པ་ལ། །

བསྐལ་པའི་མེ་དང་ཆེས་འདྲ་མོད། །

མགོན་པོ་ཁྱོད་ཀྱི་ཐུགས་རྒྱུད་ནི། །

སྙིང་རྗེའི་རླན་གྱིས་གཏོང་བ་མེད། །

དག་དང་མ་དག་འཇིག་རྟེན་ན། །

ཁྱོད་དང་འདྲ་བ་ཡེ་མེད་པས། །

ཨེ་མ་སྐྱབས་མགོན་ཁྱོད་ཉིད་ཀྱི། །

དཔེ་ལ་རང་ལས་གཞན་མ་དམིགས། །

ཕྱོགས་བཅུའི་རྒྱལ་བ་མ་ལུས་པ། །

ཡང་རྗེ་ཁྱོད་ཀྱི་སྤྲུལ་པ་སྟེ། །

ཁྱོད་ཀྱང་རྒྱལ་བ་མ་ལུས་པའི། །

རྣམ་འཕྲུལ་ཁོ་ནར་བདག་གིས་འཁུམས། །

ཉི་ཟླ་བྱེ་བའི་སྒྲོན་ཐོགས་ཏེ། །

སྲིད་ཞིའི་དབྱིངས་སུ་བཙལ་ན་ཡང་། །

རྙེད་དཀའི་བསམ་འཕེལ་ནོར་བུ་ནི། །

མགོན་ཁྱོད་ཁོ་ན་ལས་གཞན་མེད། །

དངོས་ཀྱི་གདུལ་བྱ་རྫོགས་པ་ན། །

བདེ་ཆེན་ཆོས་ཀྱི་ཕོ་བྲང་དུ། །

ཆེད་དུ་བྱོན་ནས་གློ་བུར་དུ། །

མཁའ་སྤྱོད་རྡོ་རྗེའི་ཞིང་དུ་གཤེགས། །

འོན་ཀྱང་རྡུལ་བྲལ་ཡེ་ཤེས་སྤྱན། །

དྲི་མ་མེད་པར་ཉེར་གཟིགས་ཏེ། །

བརྩེ་ཆེན་དོན་ཡོད་ཞགས་པ་ཡིས། །

ནམ་ཡང་མི་གཏོང་ཆོས་ཉིད་དོ། །

བསམ་མི་ཁྱབ་ལ་དད་བྱས་པའི། །

རྣམ་སྨིན་བསམ་གྱིས་མི་ཁྱབ་པས། །

བདེ་ལྡན་ཞིང་མགོན་ཁྱོད་ཉིད་ལ། །

དད་ཅིང་གུས་པས་འདི་ལྟར་བྲིས། །

སྙིང་ལ་རྨོངས་པའི་མུན་པ་ནག །

ལྕེ་ལ་ལོག་སྨྲའི་གཏེར་བརྒྱ་བརྡོལ། །

སྐལ་ཆད་དག་ལ་སུ་ཞིག་སེམས། །

དད་ལྡན་དགའ་བ་སྐྱེ་བར་ངེས། །

དུག་ལྔ་སྤུངས་པའི་ལྷུན་པོ་ལ། །

སངས་རྒྱས་སྟོང་གི་མཐུ་རྡུགས་པས། །

བཞད་གད་སྙིང་རྗེའི་ཡུལ་ལས་ཅི། །

ཁྱེད་ཅག་ཅི་དགར་བྱ་བའི་རིགས། །

ཚེ་རབས་ཀུན་ཏུ་དགེ་བའི་བཤེས། །

འཇམ་དབྱངས་ལྟ་བུས་རྗེས་བཟུང་སྟེ། །

ཟབ་རྒྱས་དེ་ཉིད་འབྱེད་པ་ལ། །

ཟླ་བྲལ་ཤེས་རབ་འཐོབ་པར་ཤོག །


བརྩམས་ཆོས་གདམ་བཀོད། 

ཅོང་སྒྲ།

ཟླ་བཞིན་མཐིང་གའི་སྤྱན་རས་གཡོ། །

རིན་ཆེན་ལན་བུ་ཕྲག་པར་དཔྱངས། །

མཉེན་ལྕུག་ཕྱག་གིས་རྒྱུད་མང་སྦྲེང་།།

ཚངས་སྲས་བཞད་མས་ཤིས་པ་སྩོལ། །

སྙིང་ལ་འོ་མའི་ཆ་བོ་འཁྱིལ། །

ངག་ལ་རིགས་པའི་མེ་ཏོག་ལྡེམ། །

རང་རིགས་བློ་གསལ་གཞོན་ནུ་ལ། །

གཞེན་སྐུལ་ཅོང་གི་ང་རོ་སྒྲོགས། །

རང་གི་བློ་གྲོས་ཚད་མ་ཡིས། །

འཁྲུལ་བྲལ་ཚད་མའི་གཞུང་ལམ་ལ། །

གོམ་འགྲོས་ཚད་མས་ལེགས་བགྲོད་ན། །

འབྲས་བུ་ཚད་མ་ཅིས་མི་འབྱུང་། །

ལྟར་སྣང་སྟོང་སྐད་སྒྱུ་མའི་སྤྱོད། །

ལྷུན་པོའི་སྲིད་དུ་ཚད་རྫོགས་ཀྱང་། །

བདེན་པའི་གནད་ལ་གཏུགས་པའི་ཚེ། །

སྙིང་བོས་དབེན་པའི་རང་མཚང་ངོམ། །

དེ་བས་སློབ་དཔོན་ཚད་མ་ལ། །

སྟེན་ཚུལ་ཚད་མས་ལེགས་བསྟེན་ནས། །

བསླབ་བྱའི་ལེགས་བཤད་ཚད་མ་ལ། །

ཚད་མས་ཐེ་ཚོམ་ཆོད་པར་སྦྱོངས། །

བློ་ལ་ཉི་མའི་འོད་སྣང་སྐྱིལ། །

ངག་ལ་བདེན་གཏམ་གསེར་རི་རྩེགས། །

ལག་ལ་བྲིས་ཀྱི་གློག་འཁྱུགས་ན། །

འཕྲལ་ཡུན་འདོད་དགུའི་རིན་ཆེན་འབྱུང་། །

གསུམ་བཞི་གསུམ་གྱི་ནག་པོ་བརྩེགས། །

འབུར་འཇོམས་བྱེད་པའི་ཆོ་ག་ལ། །

དུས་དྲུག་སྤྱོད་ལམ་རྣམ་པ་བཞིར། །

ཡེངས་མེད་བརྩོན་པ་འདུན་མའི་རྩེ། །

རྨ་བྱས་རང་ལ་རྟོག་པའི་དཔེ། །

ས་པཎ་གསུངས་པའི་དོན་དེ་གལ། །

ཁྱད་པར་ས་མང་དུག་གི་ལྕེར། །

བག་ཟོན་བྱེད་པ་གནད་ཀྱི་འགངས། །

མཛེས་བྱའི་ཕྱིར་ན་གཉིས་བྱུང་བར། །

མངོན་པའི་གཞུང་ལས་འབྱུང་བ་བཞིན། །

རྣམ་ཀུན་མིག་རྣ་གཉིས་གཉིས་པོ། །

ཚང་བར་གྱིས་ཤིག་སྙིང་གི་གཏམ། །

ཐེམ་ཐོག་རིལ་མའི་རང་བཞིན་དང་། །

ཆུ་སྣའི་ངང་ཚུལ་རྣམ་སྤངས་ནས། །

བསྲེགས་གཏུབས་བཅས་ཀྱང་མི་འགྱུར་བའི། །

ས་ལེ་སྦྲམ་གྱི་རང་གཤིས་ཟུངས། །

རྩོམ་སྒྲིག་པ། དོ་རྒྱ་དོན་གྲུབ་ཚེ་བརྟན།

དཔྱད་མཆན 0 ཡོད།