ཟླ་འོད་འོག་གི་གྲོ་ཞིང་ཁ།

ཁྲི་སེམས་དཔའ།  

ཟླ་བ་བསྙེགས་ནས། སྐར་མ་བསྙེགས་ནས།

ང་རང་གྲོ་ཞིང་ཁའི་མཚན་ངོགས་སུ་འབྱོར།

བསིལ་ཞིང་འཇམ་པའི་མཚན་རླུང་གིས།

ཟླ་འོད་ཁུར་ནས་བདག་ལ་བགྲོད་ལམ་ཕྱེས།

རྡོག་འོག་གི་རྐང་ལམ་ཕྲ་མོ་ཕྱིར་དྲན་གྱི་ཀློང་དུ་བསྲིངས།

བསམ་གཞིག་གི་ལྗོན་རྩེར་སྨིན་པའི་འདས་དོན་གྱི་འབྲས་བུ་མངར་མོ།

བྱིས་དུས་ཀྱི་རྩེད་རར་ངང་གིས་བྲུལ།

 

ང་ཡི་ཕ་ཡུལ།དོ་ནུབ་བདག་གིས་ཟླ་འོད་ཀྱི་མཚན་གོས་གྱོན་ནས།

 

རང་བྱུང་ཁམས་ཀྱི་ལྷིང་འཇགས་ལ་མཉན་ཡོད།

དོ་ནུབ་ཀྱི་ཟླ་བ་དཀར་བོང་བོང་།བྱིས་སྒྲུང་གི་འཇིག་རྟེན་དུ་ལུས་པའི།

གཏམ་རྒྱུད་ཀྱི་འགྱུར་ཁུགས་ཤིག་དང་འདྲ་བར།

ངའི་སེམས་ཁ་རུ་ངང་གིས་ཤུད་སོང་།

 

ཟླ་འོད་ཀྱི་བསིལ་འཇམ་ལ་མགོ་བོ་བསྙེས་ནས།

དགུ་ཚིགས་ཀྱི་ཀློང་དུ་བསམ་གཞིག་གི་འདབ་གཤོག་བརྐྱངས་ཚེ།

རེས་གསལ་རེས་མོག་གི་དྲན་པ་དེ་ཚོས།

ཟླ་འོད་ཀྱི་དྭངས་གཙང་རུམ་ནས།

མཚན་མོའི་མཁའ་ངོགས་སུ་འགྲེ་ལྡོག་བརྒྱག

ཟླ་འོད་ཀྱི་གཅེས་སྐྱོང་ཐོབ་པའི་གྲོ་ཞིང་ཁ།

སྔུར་དབྱངས་ཀྱི་ཀློང་དུ་བདེ་བར་གཟིམས།

 

ཟླ་འོད་ནི་ཤང་ཤང་འབབ་པའི་གཙང་བོ་ཞིག་དང་འདྲ་སྟེ།

འབའ་འབུར་མི་སྙོམས་པའི་ལ་ཐང་ཀུན་ཏུ།

ཟླ་འོད་ཆུ་རུ་བཞུར།

ཟླ་འོད་ཀྱི་ཟེགས་མ་བདག་གི་རྨི་ལམ་དུ་ཆོལ་སོང་།

བདག་གི་ངལ་དུབ་བཀྲུས་སོང་།

རྩོམ་སྒྲིག་པ། དོ་རྒྱ་དོན་གྲུབ་ཚེ་བརྟན།

དཔྱད་མཆན 0 ཡོད།