ང་ཡི་ཨ་མ། ང་ཡི་ལྷ་མོ།

སྲིད་པ་ཆགས་པའི་དབུ་ཁྱུད་ནས་བཟུང་། ཨ་མ་ནི་ཉི་མ་བཞིན། རྩྭ་ཐང་བཞིན། འཇའ་ཚོན་བཞིན་ཕྲུ་གུའི་སེམས་ཀྱི་ལོངས་སྤྱོད་དུ་གྱུར་ལ། མི་ཚེའི་བརྒྱུད་རིམ་ཁྲོད་ཀྱི་ནམ་མཁའ་དང་ས་གཞིར་གྱུར། ང་ལ་མཚོན་ནའང་། ཨ་མ་ནི་སྙིང་དང་མིག་ཟུང་བཞིན་མེད་དུ་མི་རུང་བའི་དབང་པོ་དང་འཇིག་རྟེན། ཚོར་བ་དང་འོད་སྣང་དུ་གྱུར།

རེད་དེ། ཨ་མ་ནི་ཆུང་དུས་སྣབས་དང་གཅིན་སྐྱག་ལ་མི་འཛེམ་པའི་ལུས་སེམས་གསོ་བའི་སྐྱབས་མགོན་ཞིག ཨ་མ་ནི་ཀ་ཁའི་སློབ་ལ་གཉེར་དུས་ཕྲུ་གུ་ལ་རེ་བ་དང་སྨོན་ལམ་གཙང་མ་གནང་བའི་དགོས་འདོད་སྤུངས་འབྱུང་ཞིག ཨ་མ་ནི་རྒྱང་རིང་གི་ཡུལ་དུ་ཡོད་པའི་ཕྲུ་གུ་ལ་རྡེའུ་དཀར་ནག་གི་དབྱེ་བ་འབྱེད་ལུགས་སྟོན་པའི་མཛངས་མ་ཐོག་མ་དང་། སྙིང་ཕུར་རྡེབ་མཁན་ཐོག་མ་དེ་ཡིན། ནར་སོན་རྗེས་ཨ་མ་ནི་ང་ཡི་ཕྲུ་གུ་ཞེས་ལོ་ལེགས་ཀྱི་འབྲས་བུ་བསྣམས་ཏེ་ལ་རྒྱ་དང་སྤོབས་པ་བསྐྱེད་པའི་མི་ཡུལ་གྱི་བདག་མོ་ཞིག

ད་ལྟ། མ་གནས་འགྲོ་ཡིན་ན་གནས་ཡུལ་འགྲིམས། བན་སེར་མོ་ཡིན་ན་ཆོས་གྲྭ་བསྙེགས། རྒྱབ་དཔེ་ཁུག་ཁུར་མཁན་སློབ་གླིང་འགྲིམས། སྐྱེས་ཕོ་ཞིག་ཡིན་ན་ཁྱིམ་ཐབ་འཛིན་ལ་རན་པའི་ལོ་ངོ་ཉི་ཤུ་རྩ་གྲངས་ལ་བུད་པའི་ཕྱིར་དྲན་གྱི་ངོགས་སུ། ཨ་མའི་བཀའ་དྲིན་ནི་ཆུང་ཆུང་རྫིང་བུ་བཞིན་མ་ཡིན་པར་ཀུན་གསལ་གྱི་ཕ་མཐའ་དང་བྲལ་བའི་རྒྱ་མཚོ་དང་གཉིས་སུ་མ་མཆིས།

ང་ཡི་ཨ་མ་ནི་མཐོ་སྒང་གི་ཨ་མ་གཞན་དང་འདྲ་བར། བཞོ་ལུང་བཏགས་ཤིང་བཞོ་ཟེའུ་བསྐྱོར་ཏེ་འབྲི་དང་མཛོ་མོའི་ནུ་མགོར་འཇུ་དགོས་ལ། སླེ་བོ་ཁུར་ནས་སྒོ་ཕྱུགས་ཀྱི་ལྕི་བ་འཐུ་དགོས། རྒྱ་ཚེབ་བཟུང་ནས་རྩྭ་འདེད་པ་དང་བོད་ཁེམ་བཟུང་ནས་འབྲུ་འཕྱར་དགོས་པར་མ་ཟད། ཕྲུ་གུའི་སློབ་སྦྱོང་གི་ཆེད་དུ་ནངས་སྔ་ལངས་དང་དགོང་འཕྱི་ཉལ་བྱེད་དགོས་ལ། སྤོ་བོ་དང་རྨོ་བོ། ཨ་ཕ་དང་ཨ་ནེའི་སྐྱིད་སྡུག་གི་ངོ་ཟིན་དགོས། དེ་ལྟ་ནའང་། ཨ་མ་ལ་སུན་སྣང་མེད། འཁང་ར་མེད། གནག་སེམས་མེད། མིག་ཆུ་ནི་དེ་བས་མེད།

ནམ་རྒྱུན། ཨ་མས་ང་ལ་བུད་མེད་ནི་གཡའ་དག་པའི་ནམ་མཁའ་དང་ས་དོག་མོའི་ཁ་ཞེང་ཡིན་ཟེར། དུས་དེ་ཤེད་ནས་བཟུང་། ངས་བུད་མེད་ནི་ཨ་མ་ལྟ་བུར་ཡིན་དགོས་པར་སྙམ་སྟེ། བྱམས་དང་སྙིང་རྗེ་ལྡན་ཞིང་། ལས་དང་རྒྱུ་འབྲས་སྲུང་བ། ཕྲག་དོག་དང་ང་རྒྱལ་མེད་ཅིང་གཡོ་སྒྱུ་དང་ཕྲ་མ་མེད་པ་སོགས་ཀྱི་ཁྱད་ཆོས་ལྡན་དགོས་པར་སྙམ།

ང་ཡི་ཨ་མ། ང་ཡི་ལྷ་མོ།ཁྱེད་ནི་ང་ཡི་བསམ་བློ་དང་དེའི་གཟི་འོད་ཡིན་ལ། ངའི་མི་ཚེའི་མིག་དཔེ་ཉག་ཅིག་ཡིན།

ཨ་མ། ངའི་སྤང་ལྗོངས་ཀྱི་སྟེང་རོལ་ན་དྭངས་གཙང་གི་ཆུ་མགོ་ལྟ་བུའི་ཨ་མ་ཁྱེད་ཡོད་ན། ང་ལ་མེ་ཏོག་གི་ཕྲ་རྒྱན་དང་གཡང་དཀར་གྱི་འབའ་སྒྲ་མེད་ཀྱང་ཆོག ངའི་མི་ཚེ་ཡི་མཁའ་དབྱིངས་ན་ཟླ་བ་ལྟ་བུའི་ཨ་མ་ཁྱེད་ཡོད་ན། ང་ལ་སྐར་མ་སྨིན་དྲུག་ལྟ་བུའི་སྐར་ཚོགས་ཀྱི་ཕྲ་རྒྱན་ཡང་མེད་ཀྱང་ཆོག

ང་ཡི་ཨ་མ། ང་ཡི་ལྷ་མོ། ཁྱེད་ནི་མི་ཡུལ་དུ་གནང་བའི་ལེགས་སྐྱེས་ཐོག་མ་ཞིག བུད་མེད་ཀྱི་ཁམས་ན་མཛེས་པའི་གངས་རྒྱན་མེ་ཏོག་དེ་ཉིད་ལགས། །

རྩོམ་སྒྲིག་པ། མཁའ་མཚོ་སྐྱིད།

དཔྱད་མཆན 0 ཡོད།