ཟླ་དྲུག་པའི་འཁྱུག་བྲིས།
ལག་གཉིས་སོར་མོའི་རྩེ་ལ། །
ཡིད་ཀྱི་འོད་ཟེར་དཀྲིས་ནས། །
རལ་གྲི་མཁའ་ལ་གདེང་བ། །
རི་མོ་བཞིན་དུ་བྲི་འོ། །
ཡུལ་འདི་དྭངས་བསིལ་རི་བོ། །
འདི་སྣང་ཡིན་མདོག་ཞུ་ཡང་། །
ཕྱི་ཡི་སྒྲིབ་པ་སངས་ཏེ། །
ལྷ་ཡི་སྤྱན་རས་འཁོར་ས། །
སྨུག་པ་ཟོམ་ལས་ལྡང་སྟེ། །
ཉི་མའི་རྒྱུ་ལམ་གཅོད་དུས། །
གཡུ་ལོ་གོས་སུ་བྱས་པ། །
ཚངས་ཆེན་པིར་ལ་འཁྱུགས་སམ། །
ཆུ་མོ་ཡིན་ན་དྭངས་པ། །
བཏུང་བས་སྙིང་ལ་བསིལ་བ། །
ཤེས་རབ་ལྷ་ཡི་ཆབ་འདིས། །
ནང་གི་དྲི་མ་དག་གོ། །
ངག་གི་སྐུད་པ་འཁྲོལ་པའི། །
དབྱངས་ཅན་གླུ་ལ་བྲེལ་ལམ། །
ནགས་མའི་བྱེའུ་ཡིན་ཡང་། །
ཡིད་ཀྱི་རི་དྭགས་འགུག་པ། །
བྱིན་རླབས་ཉི་འོད་སྤྲོ་བའི། །
འཇམ་དབྱངས་གཞོན་ནུའི་ཞིང་འདིར། །
ད་རེས་ཡིད་སེམས་དྭངས་པའི། །
སྐལ་བཟང་མེ་ཏོག་འཁྲུངས་པ། །
དབྱར་ཟླ་དྲུག་པ་འདི་ནི། །
མི་འདུག་འགྲོ་མཁན་ཡིན་པས། །
སྟོད་ཀྱི་ཨ་ཕོ་ང་ཡང་། །
མི་འདུག་འགྲོ་མཁན་ཡིན་པ། །
2018.7.18ཉིན་རི་བོ་རྩེ་ལྔ་ནས།