ལོ་གྱོན་མའི་རིལ་བུའི་ཉིང་བཅུད་ཀྱིས་གསོས་པ་ནི་ཁྱེད་ཚོས་དཔའ་གདེང་གིས་འཕྱར་པའི་དར་ཆའི་འོག་གི་དམ་བཅའ་དེ་ཡིན་སྲིད།
རྩོམ་བྱང་གི་སྔོན་འགྲོའི་ཚུལ་དུ།
མཆོད་བརྗོད།
ལྷ་ཀླུ་གཉན་གསུམ་ཐུགས་རྗེ་སྤྱན་གྱིས།།
རིམས་ཀྱི་གོད་ཆགས་ཞིབ་ཏུ་གཟིགས་ཏེ།།
འཇིག་རྟེན་མི་རྟག་འཇིགས་རུང་འདི་ཀོ།།
བྱིན་གྱིས་རློབས་ཤིག་མཆོད་པ་འབུལ་ལོ།།
༡
ཏོག་དབྱིབས་ནད་ཀྱི་འཇབ་རྒོད་བཙན་པོས།།
གླིང་བཞི་གླིང་ཕྲན་ཁུ་སིམ་དཀྲོགས་བྱུང་།།
མི་སྡོད་དུས་ཀྱི་རི་མོའི་ངོས་སུ།
རླངས་པ་ནག་པོ་འཚང་ཀ་རྒོད་ཨང་།།
༢
འདུ་བྲལ་འཁོར་བའི་ཆོས་ཉིད་ཀྱིས་བསྡུས།
གོས་དཀར་དཔའ་བོའི་བློ་སྤོབས་ཡངས་པ།།
བྱང་ཆུབ་ལྷ་ཡི་གཟི་བྱིན་གྱིས་བསྐྱངས།
དང་བླངས་སྤུན་ཟླའི་ལྷག་བསམ་གཙང་ངོ་།།
༣
ཐང་ཆད་སྨྲེ་ངག་གདངས་སུ་མ་འབྱོར།།
ཚེ་སྲོག་རུས་ཀྱིས་སྲུང་བའི་ལྷ་རྗེ།།
འཇིགས་རུང་ཏོག་དབྱིབས་ནད་ལ་རྒོལ་ཞིང་།།
བྱམས་པ་ཐུགས་སུ་མངའ་བའི་དང་བླངས།།
༤
རང་ཡུལ་རང་གིས་བསྐོར་བའི་ལྷ་རྗེ།།
མཚོ་ལྷོའི་ཉིང་བཅུད་གཉོར་བར་མཁས་པ།།
ཏོག་དབྱིབས་ནད་ལ་དཔུང་འཇུག་ཐུབ་པའི།།
མཚོ་ལྷོའི་བརྩེ་ཆེན་རིམས་འགོག་བཀོད་འདོམས།།
༥
ཆ་འཕྲིན་དངུལ་གྱི་མེ་ལོང་བཀོལ་མཁས།།
མཚོ་ལྷོའི་སྒྲིག་གཞི་ལྕགས་ཐག་བསླས་མ།།
མཛའ་མཐུན་དཔུང་བ་སྦྲེལ་བར་མི་དོགས།།
མཐུན་པ་སྤུན་བཞིའི་རང་རྣམ་ཚུགས་པ།།
༦
པྲོག་གསར་གློ་ཚད་ཉེ་སར་མངོན་ཀྱང་།།
འབངས་གཅེས་དཔོན་གྱྀ་འབོད་བརྡ་དུང་ཡིན།།
དུང་དཀར་གཡས་འཁྱིལ་ནང་དུ་ཤོང་བའི།།
མཚོ་ལྷོའི་སྤུན་མཆེད་བག་རེ་བྲོ་བ།།
༧
ཕུགས་ཀྱི་འདུན་པ་བསིལ་མོ་རླུང་ཡིན།།
ཏོག་དབྱིབས་ནད་ལ་རྒོལ་བའི་དེང་དུས།།
བསིལ་མོ་རླུང་གི་རྟ་ཕོར་ཞོན་ཏེ།།
མཚོ་ལྷོའི་ཞི་འཇམ་གླིང་ལྔར་བསྐྱལ་བྱུང་།།
༨
རིམས་ཀྱིས་དཔུང་འཇུག་རྒོད་པོའི་དེ་རིང་།།
ས་ཆེན་ཕུ་ནུའི་སྐྱོ་བའི་མིག་འབྲས།།
དྲ་ལམ་བརྙན་ལམ་བརྒྱུད་ནས་མངོན་ན།།
ང་ཡི་བྲང་གཞུང་རྨ་མེད་རྨས་བྱུང་།།
༩
ངས་ནི་ས་ཆེན་ཕུ་ནུའི་དྲུང་དུ།།
མཚོ་ལྷོའི་སྨོན་ལམ་ལོ་གྱོན་རིལ་བུ།།
གོས་དཀར་ལྷ་རྗེའི་ཞལ་དཔར་དང་བཅས།།
རེ་བའི་མཁའ་རུ་བཏེགས་ཏེ་སྤུར་ཡོད།།
༡༠
ཏོག་དབྱིབས་ནད་ལ་ནམ་གྱེས་ཆ་མེད།།
རྒྱལ་ཁའི་གད་རྒྱངས་ཅིས་ཀྱང་སྒྲོག་སྲིད།།
བརྩོན་པའི་གཤོག་པ་མཁའ་རུ་རྐྱོངས་དང་།།
སྔོན་མོ་མཚོ་ལ་གཏན་དུ་འཇུག་སྲིད།།
༡༡
མཚོ་ལྷོའི་རྫོང་ལྔ་མཛུབ་མོ་ལྔ་ཡིན།།
མཛུབ་མོ་ལྔ་བཅིངས་ཁུ་ཚུར་བྱེད་དགོས།།
རེ་བའི་སྐར་ཆེན་མཁའ་རུ་ཚེས་དུས།།
རྒྱལ་ཁའི་ས་གཞི་འོད་དུ་འཁྱིལ་ཡོང་།
༡༢
མི་རྟག་སྐྱེ་འཆི་སྐད་ཅིག་ཙམ་ཡིན།།
དང་དུ་ལེན་པ་རྟུལ་ཕོད་རྣལ་མ།།
མཚོ་ལྷོའི་ཏོག་རྒོལ་དམ་བཅར་ཚུད་པའི།།
རང་སྐྱེས་དཔའ་བོ་དཔའ་མོར་འདུད་དོ།།
༡༣
ཟིལ་གྱིས་གནོན་པའི་བཀའ་རྒྱ་དམ་པོ།།
ཐོག་མ་རང་ནས་གཙིགས་སུ་ཟུངས་དང་།།
རིམས་ཀྱི་སྤྲིན་ནག་འཐིབས་པར་ཅི་དོགས།།
མི་རྟག་འཇིགས་པ་གློ་བུར་ཙམ་ཡིན།།
༡༤
ལྷིང་འཇགས་སྡོད་པ་རིམས་ཀྱི་དགྲ་ཡིན།།
ཉིང་སྐྱུར་བརྟག་པ་རྡོ་རྗེ་ཁྲབ་ཡིན།།
ཁ་འཁྲུག་ཉུང་བ་ངག་གི་ཐུན་ཡིན།།
རིམས་ནད་མཐའ་སྐྲོད་གཏོང་བའི་གཞི་ཡིན།།
༡༥
མཇུག་ཏུ་གཏམ་ལ་རོ་བཅུད་བསྣན་ཏེ།།
རེ་བའི་སྙན་ངག་སྨྱུག་རྩེར་འཁྱུད་པ།།
མཚོ་ལྷོའི་ཡུལ་ལ་སྨོན་པའི་ལྷ་དར།།
སྒོས་སུ་དང་བླངས་དཔའ་བོར་སྐྱེས་རྟེན།།
༢༠༢༢ལོའི་སྤྱི་ཟླ༩བའི་ཚེས་པ༢ཉིན་བྲིས།